#مراس_الدعجاء
للكاتبة هدهد
اتمنى تستمتعون بالبارت وتشبعونه تعليقات وتصويتات حلوة مثلكم💛
چنت خايف
شفتك وگربت يمك
ردت اگلك جيت اطمنك
وآني خايف
وخايف يطمنله خايف
ردت اگلك حتى هذا البلد غربة
وصار موطن من هويتك
ردت اگلك
حتى حيطان الدرابين القديمة
آتاني جيتك .
✤———————————————✤
-اللي احبها راح تجي للعراق
بقيت ارمش أحاول استوعب الجملة الي گالها، جنت ساكتة بس
داخلي تبعثر وتلخبط
-الله، حلو وأخيرًا تلتقون بعد فراق سنوات
اني وياه جانت نظراتنا بالفراغ بس من نطقت حسيت بنظراته عليَّه
نظفت حلكي وباوعتله واني أتظاهر بعدم إهتمام وسألته
-بس شعجب؟
-تريد نلتقي، ردت أرجع للبنان بس تراجعت بقراري وهسه هيّ راح تجي
-حلو
هز راسه ورجع نظراته لگدامنا وبهاي اللحظة أهتز موبايلي
وجفلت من رنة المسج الي داهمت الصمت الي محاوطنا
طلعته من جيبي وشفتها من صديقه الي كاتبه
-اموت عليج تدرين؟
ما أنتبهت لعثمان واللي واضح شاف هذا المسج
انمدت ايدة وجفلت من سحب مني الموبايل بسرعة بس لحگت اقفله
رفع حاجبه وگلي
-افتحيّه
ميلت راسي وبعصبيه حجيت
-منو انطاك الحق تتعدى على خصوصيتي؟
تقدمت منه اريد اخذه بس جر أيدي بسرعة وصار وجهي مقابل وجهه بس
فرق الطول مخليّه يحني راسه حتى ييصير قريب مني
-ليل لا تخليني اعصب عليج
-عصب واذا عصبت عثمان؟
-اغثج
-ماتگدر
مد أيده ورجع جوانب گذلتي لوره اذاني، حركته لا اراديه بس حسيت
وجهي راح ينفجر من الخجل .. الحمدلله ما يبين عليّه
-شلون اثبتلج شلون ؟
دفعت ايده وابتعدت خطوتين وحجيت بأستفزاز
-تصرفاتك جايه بناءًا على غضبك لان انتَ مزعوج مني عود غدرتك صح؟
رفع حواجبه بدون كلام وكملت احجي
-لا تتصرف هيج اذا تحس راح تلعب بمشاعري او تأذيني فأحب اكلك لو تبقى اخر شخص مستحيل افكر بيك عاطفيًا لان ما اشوفك بس اخ ، لا تخلي وساوسك تغطي على عثمان الي اعرفه
حسيت بده يضغط على فكه حيل وايده سادها وضاغط عليها،
للحظة ترددت بس ما تراجعت وكملت كلامي
-عثمان انت مو هيج.. اذا اني بنظرك غدرتك فلا تستخدم هيج اساليب ماتناسبك واكرهني علنيًا ولا تستخدم طرق تافهه مال جهال، اضربني اذا تريد ما اهتم بس لا تفكر راح اتأثر من مجرد تلامسات محرمه لان راح اتقرف بس
أنسحبت بسرعة ما مستوعبه شصار بس جنت حيل قريبه منه
وحجه وهو يضغط على ايدي بطريقه قويه وأحسه فقد
-ايااااج ليالي اياج تحاولين تسوين نفسج تحسين بشنو احس ماشي؟ مستحيل تعرفون احساسي ومستحيل تفهموني ومن سابع المستحيلات أهتم بكلامج، بس صار اللمسات المحرمة على گولتج راح تختفي وراح يصير بدالها اشياء هواي ترضيج
تركني وبدون وعي توجهت ايدي لمكان ضغطته الي وجعتني،
جنت متشوشه من نظراته.. عبالك حقد وغضب بس حنان بيهم
شفته راد يتقدم من شافني اضغط على ايدي بس تراجع
وهف الموبايل بالهوه الي ولو ما مديت ايدي بالوقت
المناسب جان صار طشار اذا وكع على الشارع
توه تحرك من مكانه يريد يصعد السيارة انتبهت اني وياه لشخص واكف
قريب من عدنا يباوعلنا بنظره شك
عثمان باوعلي واشر للسيارة حتى أصعدها بس الرجال قاطع نظراتنا
-موعد ها؟ صدك الناس صايرة ماعدها أخلاق
رفعت حواجبي من لهجته الي تبين قرفه عبالك شايف شي مقرف
ماتحملت ورديت عليّه
-وانت طالع بهذا الوقت شكو؟ حبيبتك بعدها ما وصلت مو؟
جنت احس بعصبيه وغضب من محادثتنا انا وعثمان وفرغت مشاعري
بكلماتي، هو انفعل وصاح
-هو شتتوقع من ال****
لحظة والثانية وما أحس الا الرجال يصيح وعثمان يضرب بي بعنف
ضرب مو طبيعي جان بينهم والرجال من البدايه مبين مو
راحه وصحت
بصوت عالي من شفته يطلع سجينه من جيب بنطرونه
-عثمااان دير بالك عنده سجينه
جنت بقمة خوفي بس تعجبت من عثمان كدر يسيطر عليّ
وبكل سهوله عوج ايده وشمرها بعيد ودفعه وباوعلي وكال
-اصعدي السياره وارجعي للبيت
باوعتله بتردد بس صاح يطلعني من ترددي وصعدت بسرعه
وتحركت راجعه للبيت وتفكيري بحركاته الي سواها وهو
يراوغ الرجال بكل احترافيه
معقوله هذا نفسه عثمان القديم الي جان الطف منه ماكو؟
رجعت وبقيت كاعده بسيارتي أنتظر اشوفه يجي
وربع ساعة مرت لحد ما بينت سيارته من بداية الفرع ودخل
وكف السيارة بالباب ونزل واني هم فتحت الباب ونزلت
رفع عيونه يشوفني وحجه
-ادخلي
-انت بخير ماتأذيت مو؟
هز راسه بدون كلام والعجيب ما مبين ابد متهاوش بس
أصابعه صايرات حمر بمكان المفاصل
مبين شبع هذاك ضرب
سحبت نفس وزفرته متنهده وتحركت من گدامه اريد ادخل للبيت
بس قبلها درت وجهي اشوفه للمرة الاخيرة وشفته يباوعلي
لثانيتين بس حسيت نظراته تلين بس دار وجهه ودخل وطبك الباب
حسيت بوجع بمكان گلبي وشعور ببطني مو حلو ودخلت
-
بعد يومين
دخلت مكان شغلي بتعب نفسي بس ما بينت ووزعت
ابتسامات للكل ورحت لمكتبي المشترك مع زملائي بالشغل وكالعاده
يتكدس الشغل لحد ما تجي استراحة الغده
طلعن البنات قبلي واني بقيت الملم غراضي ومددت ايديني بألم
من گد ما جنت گاعده بوضعيه وحده احس تشنجت،
نزعت سترتي وبقيت ببنطرون رسمي بني وقميص ابيض ساده
رفعت اكمام القميص وعدلت شعري الي جنت رابطته بشكل ذيل
وتحركت للمطعم الخاص بالشركة
اخذت اكلي وتوجعت اكعد بصف البنات لان الطاولات كلها مليانه
باوعتلي وحده منهن وحجت
-فدوه ليالي شوفي غير مكان هذا مكان ايمان راحت للحمام
رفعت حواجبي بأستنكار لان المكان جان جبير وينفع 2 بس ما اهتميت
ودورت بعيني على مكان ماجان اكو، تنهدت وتحركت اكعد على الكرسي
الي موجود بزاوية المطعم وحطيت اكلي بحضني واكلت بسرعة
خلصت وشربت العصير وذبيتهم بالمكان المخصص وطلعت
حسيت شخص وگف بصفي ورفعت عيني اشوفه جان جمال
-جمال: هلو ليالي
-هلا جمال
-جمال: عادي نحجي شويه؟
باوعتله وشفت وجهه جان هادي.. هزيت راسي وطلعت وراه،
تمشه هو لحد ما وصل قريب من قاعات الاجتماعات الفارغات ووگف
-جمال: ليالي اريد اعتذر منج
عقجت حواجبي ورديت على كلامه
-بخصوص شنو؟
رفع ايده خجلان وحك نهاية راسه مبتسم
-جمال: ماجنت اعرف انهُ انتِ تحبين شخص ثاني
رمشت اكثر من مره احاول أستوعب شنو يگول
-شنو؟
-جمال: ماكو داعي تخجلين مني اعرف الحب مو بيدنا مثل ما اني حبيتج
-اوكف جمال شتحجي؟
-جمال: عثمان گلي على علاقتكم الي محد يدري بيها
توسعت عيوني بكل دهشة وهو كمل كلام
-جمال: عثمان ما يتعوض ابد لاتفرطين بي اعرفه من زمان والله يهنيكم، اعتذر مره ثانية اذا سببتلج ازعاج
ماعرفت شنو احجي وهزيت راسي وهو راح
حسيت ايديني عرگت من الكلام شلون يحجي هيج حجي!!!!
بسرعة تحركت للمكتب واخذت موبايلي إتصل عليّه مرتين يدك وهو
مايرد، حسيت اعصابي تغلي
-اني اعلمك عثمان
مر الوقت ببطئ وجنت احترك حتى إطلع
وبالفعل مر الوقت وطلعت من الشركة اتوجه لسيارتي بس
بكل تفاجؤ شفته
جان واكف ومرتجي على سيارته وانتبهت هواي بنات عيونهم عليَه
جان لابس بجامة رياضيه رصاصية مع تيشيرت اسود
لابس نظاراته الطبيه وهالمرة مخفف اللحيه كلها بس شواربه بارزه
طلعت أتمشى لعنده وجاكيتي بأيدي اليسره هو والجنطه
من انتبه الي عدل وگفته وثبت نظاراته مبتسم بأستفزاز وأول ما
وصلت اعنده شلت جنطتي وضربتها بصدرة حيل
-أنت شگد مستفز؟
باوع للناس الي يباوعولنا وتقدم سحب جنطتي والجاكيت وفتح باب سيارته
وحجه بهدوء
-اصعدي نتفاهم بمكان ثاني
گلبت عيوني ورفضت اتحرك
-ليش تستحي نتناقش هنا؟
قبل لا احجي شي ثاني سحب ايدي ودخلت للسيارة
أنتبهت اول مرة ادخلها من هذاك الوقت.. جانت متغيرة من جوه هواي
دخل وباوعلي وگال
-حطي الحزام
عندت ومارديت عليه ولا باوعتله
سمعته يزفر وتقرب مني بشكل خطير وسحب الحزام وحاوطني بي
-لاتصيرين عنيده ليل
بعدت نظري للجام وتحرك هو بسرعة وبعد مده صف السيارة
جان مكان عام ونزل هو قبلي، فتحت الحزام ونزلت
وكف بصفي وسحب ايدي يحاوطها بصمت وتحرك يمشي
حتى نعبر الشارع ووصل بصف كشك مال ايسكريم وعصاير وباوعلي
-شنو نكهتج المفضله؟
-موز
هز راسه وتحرك يجيب اكثر من نوع بعلبه وحده وياها خواشيك وسحبني
مره ثانيه وكعدنا بكرسي فارغ قريب من الشارع بس بطرف
بعيد عن الالعاب مال الحديقة
حط الموطات بيناتنا ومدلي خاشوگه خشبيه وگال
-اكلي
بقيت صافنه على شكله .. متعجبه من تصرفه وهو ياكل بتلذذ
باوعلي واشر بحواجبه حتى اكل وبالفعل كليت
بهدوء ووسط الناس الي داير ما دايرنا حجيت
-ليش گلت لجمال هذاك الكلام؟
أرتفعت شفايفه بأبتسامه مستمتعه وجاوب
-ليش لا؟
-ليش لا شنو؟ عثمان انت مستوعب تصرفاتك؟
-تريدين تتزوجينه؟
-مالك دخل سواء اي او لا
سحب شعره يرجعه ليوره وگال
- مايناسبج ليل ما يناسبج، تستاهلين احسن
-والاحسن وين الگاه؟
-كدامج
توسعت عيوني مصدومه من كلمته
وهو ابتسم بوجهي وعرفته يتشاقه
-كلامك سخيف وانت اسخف ، رجعني لسيارتي
اشر على الموطات الي ساحن وگلي
-اكلي حتى نروح
-ماينوكلن ساحن صارن مي
شفته يسحب العلبه ويخوطهم كلهم سوه ورفع خاشوگته گدام حلكي
وبسرعة كال
-اكلي لا تتوصخ ملابسج
بقلة حيله فتحت حلكي وهو دفع الخاشوكه واكلت محتواها
جان طعمها طيب حيل والنكهات كلها مخلوطه
رغم اكره طعم الككو بالموطه بس استمتعت بيها مع بقيه النكهات
ابتسم بوجهي وگال
-طيب مو؟
-امممم طيب
-جنت اشتري اكثر من نكهه واخليهم يذوبون سوه واخلطهم واشربهم
طلعت من حلگي ضحكه سخيفه وحجيت
-افكار فضائية
ما اهتم وسحب العلبه وشربها كلها بعد ما انتهيت وبقه بيها
سحبت كلينكس من جيبي ومديته اله حتى ينظف وجهه
-حتى شوارب ابو شهاب صار بيهم
ضحك من غرابة اللقب وگال
-ابو شهاب؟
-من اول ماشفتك تذكرني بي خصوصًا من تلوي بيهم
-رحمة ابو شهاب ولا الفارة الي مع توم وجيري
ضحكت لا اراديا على كلمته وحجيت
-منو گالها الك؟
-امي من بديت اربي بيهم تگلي هذا اللقب
-ما الومها
ابتسم بخفه ومد أيده يدفع گصتي على كيف بأصبعه
حركته دهشتني وعبالك رجع عثمان القديم.. بقينا نسولف ونسينا كل شي
وره ظهرنا ومرت ساعتين ورجعني لسيارتي ورجعت للبيت
-
بعد مرور ايام بدون احداث تُذكر بس صار بيها زواج حيدر
تزوجوا وقرر حيدر يستقلون ويعيشون بشقتهم .. وقررنا هاي الفترة نخطب لحسنين
بابا جان فرحان بيهم وامي تروح وترجع تدعيلي اتزوج واني رافضه
وزادت المشاكل من رفضت شخص بعد ، شسوي يعني ما اريد ؟
رجعت للبيت بعد ماتونست مع البنات ، جان اليوم عطله بعد اسبوع
ضغط عالي وتوجهت كبل جوه اريد ارتاح بغرفتي
ميته احس عضامي تطكطك من التعب لان افترينا هواي
توني دنگت انزع بحذائي وسمعت بابا يسولف
-فضل: شبيج امنية ترا تزعجينها بكلامج
-امنية: ليش يا فضل هو غير اني ادور مصلحتها؟ غير هيه بنتي؟
-فضل: لعد اني ما افرح اشوف بنتي تختار شريك حياتها وتتزوج
قبل لا الله ياخذ امانته؟
-امنية: احنه ما دايمين الها واتمنى اشوفها سعيدة
-فضل: خليها براحتها لحد ما تختار هيه تتزوج لتضغطين عليها ترا احنه اهلها
وهيه مو زايده ، تصرفاتج هيج تحسسها
بقيت صافنه اسمع محادثتهم بتعجب، شنو الي يهم هالكثر بالزواج؟
كل همهم اتزوج؟ واذا ما اريد وما ارتاحيت ؟
فتحت الباب ودخلت واول ما شافوني غيروا الموضوع ورحبوا بيه
وطلعت فوك ارتاح ومحادثتهم على بالي
جبت اكل وطلعت بالبلكونه مال غرفتي اكل واتأمل وتفكيري كله
بمواضيع هواي صارت وياي شلون اتصرف ؟
اوافق على اي واحد يجيني؟ زين ليش؟
حتى ارضيهم؟ معقوله اوافق على شخص ما ارتاحله مثلًا او ما ببالي
اتزوجه حتى بس بنظرهم يشوفوني سعيده؟
اني مو ضد الزواج بس هالفترة ما أكدر ما اعرف ليش
مو ببالي وما اكدر اتقبل اي رجال
نزلت راسي من سمعت صوت هورن سيارة ومقابيلي گبل شفته
جان مرتجي على سيارته وموبايله بيده والضوه عاكس على وجهه
عيونه تباوعلي
رفعت حواجبي وسمعت صوت موبايلي بداخل الغرفة يرن
وگفت ادخل اجيبه وارجع شفته متقرب اكثر وصاير مقابيل غرفتي
-الو؟
-شبيج طافرة الدنيا من عينج؟
هو صدك طافرة الدنيا من عيني بس جذبته
-مابيه شي افكر بموضوع بس
-راح اخليج تفكرين بموضوعين بدال واحد
باوعت عليَّ بأستغراب ونبرة صوته واثقه، نزلت الموبايل كدامي وفتحت سبيكر
وسحبت الاكل اكل منه، هو سأل
-شتاكلين؟
-إندومي
-الله يطيح حظج
-أنجب
-انجبي وياي
ابتسمت على كلمتة الي مبين ما ناسيها وهو گال
-شنو تفكرين بي؟
-اووه هواي مواضيع
-لتفكرين زيادة خليهم وره ظهرج
-لا بله؟ وتنگلب حياتي بسبب عدم توفر حلول لمشاكلي؟
-صايرة تتفلسفين ؟
-اعجبك بتفلسفاتي
-اي تعجبيني
غصيت بلگمتي وباوعتله
-لا هاك؟
ضحك وهز راسه مبتسم وگال
-لتاكلين بسرعة
-مالك شغل
خلصت اكلي وتوني اريد اوكف اشيله هو حجه
-أبقي مكانج بعدين روحي
-وليش؟
رفعت راسي اباوعله جان يباوع بنظرة غريبه وابتسامة هادئة
هم على شفايفه.. حمحم وحجه
-باجر يتغير كل شي
-شيصير يعني؟ شبيك تحجي هيج؟
-نعرف سوه باجر
ما اهتميت وهزيت راسي ووگفت
-راح ادخل يالله باي
-باي
سديته واخذت آكلي ووكفت ادخل .. غسلت ونمت
-
جنت أداوم وهالمرة عندي شغل زيادة وبقيت للعصر
وطلعت هلكانه لان على جره وحده من الصبح للعصر وصعدت
سيارتي اسوق للبيت .. اول ما دخلت جوه تعجبت من شفت البيت صمته
وشفت بالباب احذيه هواي وعرفت يمنه خطار لذلك طفرت كبل لغرفتي
سبحت وبدلت ما جنت اريد انزل بس دخلت امي گلتلي اترتب وانزل بسرعه
طلعت بعد ما رشيت عطري وشفت اهل عثمان بالصالة..
سلمت عليهم واخذوني بالاحضان لدرجه تعجبت بيها وشويه وأستأذنوا
واول ما طلعوا شفت ماما ميته فرح
-شكو؟ شبيكم؟
امي هزت راسها بدون كلام وطنشت سؤالي ودخلت جوه لغرفتها
گلبت عيوني بكل ملل وصعدت، كشخه مال خمس دقايق راحت على الفاضي
غيرت ملابسي ونمت
-
گعدت راسي يريد ينفجر من الصداع وغسلت وكفت اغير ملابسي للدوام
ودك موبايلي، سحبته جان العثه وجاوبت واني نص نايمه وجاي البس بقميصي
-نعم؟
-نعامه هيج واحد يرد الصبح؟
-شتريد؟
-إسلم على خطيبتي ميصير؟
تثاوبت وغطيت حلگي وسديت اتصاله بدون اهتمام
عدلت شعري ومشطته بالگوه لان نمت وجان مفلول وتعكرش
ظفرته ولبست جاكيت الدوام وحذائي وطلعت
صعدت بسيارتي وحركت للشغل
واجاني إتصال جاوبته بملل
-ها؟
-شبيج؟
-شبيه؟
-ليل لا تستفزيني
-ما استفزك شكو؟
سمعته يزفر بصوت عالي وسده بوجهي
گلبت عيوني بعدها وگفت گبال الشركه ودخلت
بـ الليل
كعدت مع اهلي بعد العشه وجان حيدر وسمر موجودين،
امي عازمتهم على العشه، كعدنا نشرب جاي بعدها بابا سولف
-فضل: ليالي تعرفين امس جانوا يمنه خطار صح؟
-اي
-فضل: جانوا اهل عثمان يمنه لسبب
رفعت حواجبي بتعجب وحجيت
-سبب؟ لشنو؟
-فضل: اجونـا يطلبون ايدج
✤———————————————✤
يتبع
الانستگرام: iwantmeto
لاتعليق ❤️🔥
توقعاتكم؟
احبكم
دُمتم بِوّد