أصبحت الدروب النوارة ظلام في وجه غلاب الخطاوي

7

-
نوير كشرت: مالقيت حجز الا الضحى! مالقيت الفجر
نور بوزت: يالله تكفين حاولي منا ولا منا اي طيران عادي المهم الفجر
نوير تنهدت: مالقيت مع الاسف يلا ماعليه خيره ، قومي ننام عشان نقوم الفجر ونتجهز ونطلع المطار
نور بتردد: طيب اسمعي بنام معك عادي؟
نوير ابتسمت: ليش خايفة من شيء ؟
نور كشرت: طلع لي فيديو سطيف وهو يقول وحيدوه وانتي تعرفيني اخاف منه من كنت بزر
نوير ضحكت بقوه: يالله نور يابزر للحين تخافين منه!
نور: اييه اضحكي وش عليك كنتي انتي ونواره تروعوني فيه لين سببتوا لي عقده وصار عندي فوبيا
نوير سحبتها: أمشي يا ام الفوبيا بنومك بحضني وبقرالك قصه بعد وش رايك؟
نور كبحت بسمتها: تتطنزين علي !
نوير سحبت خد نور: ابتسمي ترا شايفتك وانتي شوي وتتشققين
ضحكت نور وراحوا لغرفة نوير اللي زحفت وتركت مكان لنور بسريرها ،
دخلت نور بحضن أختها ونوير صارت تلعب بشعر نور قبل تردف: تبغين أقولك قصة الأرنب والسلحفاة ؟
نور ضحكت قبل تكشر: بنت تراي كبيره خلاص لاتعامليني على اني طفله
نوير ابتسمت: طيب وش اسوي ما اشوفك الا طفله مستحيل أشوفك كبيرة!
نور: نفس كلام أبوي دايم
نوير تنهدت بقلق: والله ناغزني قلبي على أبوي! مو ملاحظة إنه غريب بهذي السفرة هو ونواره؟
نور بلعت ريقها بتوتر: الا شوي بس ان شاءلله خير
نوير أمنت من قلب قبل تبدا تغفى عيونها من شدّة تعبها اليوم
-
المُستشفـى//
سعود بإستغراب بعد ما قفل من جده: وش جايه جدي، يقول بلغ العيال بكره كلكم من الصباح نمسك خط البر
بدر: اقص يدي اذا مو البنات الي قايلين له يبون وهو عاد ما يصدق خبر اي شي يقولونه تم وحاضر وحنا الي نبلّش!
رايف: من الحين اقولكم انا مستحيل اخذهم معي اذا نجوان ورجاوي وخالتي دانه ممكن لكن الجنانوه الثلاث مناوي ووريف وريوف مالي دخل فيهم
عدّال رفع حاجب: ياسلام وانا ! خير بروح معكم
سعود ناظره: لا ياحبيبي ماتقدر بتتنوّم يومين
ضاوي ناظر سعود بنظرات مبهمه فهمها سعود واومئ له، شاح ضاوي ببصره عن سعود وهو يسرّح بباله وأفكاره..كيف بيكون لقائه مع بنـدر؟
بدر اللي لاحظ نظرات إخوانه أدرّك وش يفكرون فيه
مهمار لف على عدّال: الحين انت صدق وش بنسوي بك والله البلشه المشكله لو نعلمهم بالصدق بيقومون الدنيا ولا يقعدونها
عدّال بسرعه: لا كل شيء الا إنكم تقولون لهم وش بيسكت امي وعمتي موضي اكبر دراما في العالم اسكتوا روحو بس وفهد بيجيني ولا سألوا عني قولو عندي مهمه خارج الرياض
مهمار: لا ماني مخليك هنا ورايح اتمشى بقعد عندك وكيفهم عاد
عدّال: تقعد عندي وش تبي ولا وش بتفيدني فيه ممرض انت وانا مدري؟ رح بس امري هيّن مافيني الا العافيه
رايف نقّل نظره بين سعود وضاوي اللي أظلمت وجيههم وخيّم الصمت عليهم ، ولّف على بدر بإستغراب وهو يأشر براسه عليهم
بدر بهمس: عشان موضوع بندر
رايف: صح! بندر في العزبه للحين من بعد اخر موضوع؟
بدر اومئ: اوامر ابوي
مهمار لف على سعود: سعود..ابو غيم وين رحت ؟
سعود صحى من سرحانه وهو يلف على مهمار: هلا وش بغيت
مهمار: اقول وش الخطه وش الوضع متى بنمشي وكيف التقسيم
سعود بتشتت: والله مدري ماقالّي شيء، تبغون نفس تقسيمنا دايم؟
رايف فز: لا دايم تحشروني انا وبدر مع الجنانوه والاغراض تحشّون سيارتنا بها
بدر بتذمر: واذا رحنا مع الطلّعه حقت العقوم قعدو يصايحون ويقولون لجدي ويجلدنا مانبيهم
سعود: وانتم ليش تروحون مع الطلعه الي عند العقوم ؟ براسكم بلا منتم مرتاحين لين تنكبون اعماركم وتطيرون عقولنا
مهمار بسرعه: انا باخذ امي وخالتي ام سعود ونجوان
بدر ضحك: على طول باخذ نجوان يمكن ما تبيك طيب يمكن ما اسمح لك انا ؟
مهمار قلب عيونه: هذا الناقص بزر طول اصبعي ويجي يسمح لي اخذ زوجتي ولالا دبر وراك بس
عدّال بصداع: صدعتوا براسي خلاص لجيتوني اول البلوت وتالي هداتكم على الروحه اطلعو روحو بيت جدي وخططو على كيفكم خلوني ارقد وارتاح
سعود وقف وهو يتجه لعدّال: بتنام ؟ تعبان فيك شيء؟
عدّال: لا مافيني شي بس نوم ذبحني بنام أريّح
سعود لف على العيال: روحو انا برافق معه اليوم وبرسل لكم في القروب تقسيمنا
مهمار بإعتراض: مالك لوا بس محد مرافق مع اخوي الا انا ..
قاطعه سعود: مو قلت إن عندك لقاء مع موكلك ست الصباح ؟ روح جهز أوراقك وأمورك عشان تخلّص بسرعه وتلحق علينا الضحى نروح جميع، وكلنا اخوان مابه فرق قعدت انا ولا انت
رايف: بس انت تعيبين اليوم منت على بعضك رح ارتاح انا ماعندي شيء بكره اوف بقعد عنده
سعود: تدري ان عمتي موضي ماتنام ولا ارتاح بنومتها الا وانت في البيت روح وريّح راسها ولا توجعوني في راسي قلت لكم بقعد انا يلا بدون اعتراضات ونقاشات
بدر ابتسم: حلو عشان بكره اجلد غيومه قبل تجي
سعود ضحك: والله ياويلك لو تلمس شعره منها، ضاوي بنتي في امانتك
ضاوي ابتسم ببهوت: ماعليك لو قرب منها كسرت يدينه ورجوله
رايف بوهقه: طيب كيف بنرجع وحنا جايين بسيارتك؟
سعود طلع مفتاحه وهو يمده لضاوي: مرني بكره الصبح
ضاوي: ودوامك ؟
سعود: بعتذر عن الدوام بكره مو مشكله
ضاوي اومئ بدون رد ولف على العيال: نمشي الحين؟
مهمار وقف وهو يناظر ساعته: ايه يلا يالله يمدينا ننام كم ساعه قبل الفجر
سعود مسك يد ضاوي بهمس: بكلمك شوي تعال معي
طلع سعود ووراه ضاوي ومهمار إتجه لعدّال يوصيه على نفسه بينما بدر ورايف يناظرون ببعض
رايف بتفكير: كيف نصرفهم ؟ مستحيل اركبهم سيارتي خصوصًا اختك تفجر الراس
بدر: مع انها اختي بس والله العظيم انها تفجر الراس صدق حتى انا مابيها ، مافيه مفر بيحطونهم معنا وقل ماقلته
في الخارج عند ضاوي وسعود،
سعود بهدوء: بندر مازال هناك
ضاوي صّد: شسوي فيه ما يهمني
سعود تنهد: ضاوي حنا اخوانه لازم نصدقه و..
ضاوي قاطعه بقهر: نصدقه في وش وهو بالتحقيق مافتّح فمه بحرف ومطلعه ابوي كفاله؟ الغلط راكبه من راسه لساسه ومفشلنا في كل مكان حتى بدر المسكين فشله في مكان شغله وكلو وجيهنا العرب لاتنتظر مني اخذه بالاحضان ولا استقبله بصدر رحب وصدقني لو اشوفه قدامي الحين عدلت ملامح وجهه
سعود بضيق: ضاوي تكفى ياضاوي لاتحرق قلبي زياده كفايه انه خسر كل شيء وابوي منفيه للبر له فتره حتى جوال مامعه ومو سامح لنا نزوره لاتصير مع الناس ضده
ضاوي: انا مع الناس ضده يا سعود ولا يمكن يتغير رايي واترك لهفتك له لأنه منكر حسنى وبيقابل لهفتك بجحود اذا حتى ابوي جحده وهو مطلعه من السجن وش متوقع ردة فعله لك؟
سعود بعصبيه: ضاوي وش هالحكي ! تراه اخوك الكبير لاتنسى هالشي
ضاوي ببرود: ماعندي اخو كبير الا سعود غيره ماعترف فيه
سعود بحده: ان طال الزمن ولا قصر مردك لاخوك ياضاوي
ضاوي تجاهله وهو يمشي عنه وسعود تنهد بضيق قبل يضرب بيده الجدار بقهر يحّس إن نار شابه بداخلـه،
خذا نفس عميق وهو يحاول يهدي نفسه وجلس على هذا الوضع لدقايق قبل يرجع يدخل وهو يردف بهدوء: ترا ضاوي سبقكم اطلعو له لا تتاخرون عليه
مهمار حب راس عدّال قبل يبعد: انتبه لنفسك استودعتك الله لازم كل شهرين تعطينا اكشن جديد
عدّال ابتسم بتعب: اسوي لكم فعاليات
بدر: فعاليات الله يحرمنا منها صدق
رايف ناظر سعود برجاء: حاول مانكون مع الجنانوه انفداك
سعود ضحك بدون نفس: على اساس انك تفرق عنهم يارجال كلكم نفس الطينه توكل بس
مهمار ضحك بصخب: قسم بالله آنك ماكذبت بحرف
رايف كشر وهو يمسك يد بدر: امش امش الظاهر حتى اخوك الوحيد الي كان يحبنا صكوه بعين وتغيّر علينا
مهمار تحمحم وهو يهمس لسعود: تكفى حط نجوان معي لاتنسى اجمع راسين بالحلال لك اجر
سعود ضحك من قلب: والله انكم منتم صاحين اليوم فيكم بلا
طلعوا العيال وسعود تمدد على الأريكة اللي كان عليها،
بينما عدّال ناظره بهدوء: ما سمع منك ضاوي؟
سعود بضيق: ردة فعله كانت قاسيه ماهي شخصيته ولا هي عوايده انت تعرف ضاوي كيف هادي وسمح بس اذا صار الموضوع يخص بندر ينقلب وكأنه شخص ثاني!
عدّال: من حرّته عليه، من حبه له، لو كان ما يهمه ماكان عصب وانهار كل مايجي طاريه
سعود: حب بينقص من اعمارهم ، بيمضي فينا العمر وهم مازالو كلهم معادين بندر! انا لحالي ما اكفي يا عدّال
عدّال بجديه: بندر عليه من الغلط ما يتحمله ماهو منزّه تمامًا لاتنسى هالشي ياسعود، كل الي يتطلبه الموضوع انه يتنازل عن عناده لو شوي ويعتذر بشكل لايق وياخذ بخاطر عمي وجدي وكل شي بيتسهل بعدها لكنه حتى على عمي وجدي مو سائل
سعود: يكابر لأنه متنرفز من داخله من الطريقه الي صدو فيها عنه لو يتنازلون هم شوي كل شي بينحّل وبيلين بندر، خايف يصير نفس الي صار مع عمي طامي وجدي سعد..اخاف نروح البر ولا نلاقيه ونسأل عنه بكل مكان ولا نلاقي له آثـر!
عدّال بهدوء: ابوي سعد كان لاقي آثر لعمي طامي اول ما اختفى وراح الظهران فتره لكنه تجاهل هالآثر بإرادته وكابر ولا التفت لولده ولا قرب منه وعمي طامي زاد بالمكابر ولا رجع لأبوه وهو يعرّف مكانه وين ، لكن لو صار هالشيء لبندر أبوك بيرجعه على طول ويمحط ظهره بالعقال مابين طامي وبندر مقارنه لان ابو بندر ماهو سعد
سعود تنهد وهو يغمض عيونه بدون رد وعدّال فهم إنه ماعاد يبي يتناقش بالموضوع لذلك ألتزم الصمت هو بعد،
كان يستعد للنوم لكن الرساله الي ينتظرها اليوم كله من فهد وصلته، فتحها وعيونه تتسّع زيادة مع كل حرف يقراه من هالرساله
"سألت عن الممرضه المسؤولة عنك وقالوا لي إنها ممرضة سعودية إسمها نوير بنت طامي، فيه مشكلة سوت لك شيء غلط ولا إيش؟"
فهى بالإسم وهو يرجع يعيده مره ومرتين وثلاث! يحّس بالدنيا من حوله وقفت وهو يتذكر كلامها،صوتها،مسكة يدها، نظراتها وعيونها الي من شافها وهو يحّس بإنه يعرف هالعيـون!
ماهو مصدق إنها نويـر نفسها، ماهو مصدق إنها الممرضة المسؤولة عنه ولا حتى إنها هي بنت عمه نفسها كل شيء فجأه حسّه مُبهم وملخبط وعقله متشتت من التفكيـر!
-
صبـاح الخمـيس، قدام مدرسة البنـات//
طلعت ريوف ووسعت عيونها وهي تشوف بدر ورايف جايينها بـ سيارة وريف الهايلكس غمارتين
تلفتت يمين ويسار قبل تركض وهي تشّد العبايه على عيونها وتركب السياره
لفت عليهم بعصبيه وهي تقط شنطتها بجنبها: ووجع ليش جاييني بهالخرابه! حسبي الله الحمدلله إنه الصباح محد حولي ولا خرب برستيجي
رايف رفع حاجب: عشتوا يا أم برستيج انتي اقصاك ريوفوه ام شوشه هديها بس لا انزلك هنا
ريوف كشرت: ياليت والله تنزلني بكون ممنونه لك ولا اقعد بها
بدر ناولها ساندوتش مغلّف: اكلي بس واسكتي
ريوف خذت الساندوتش: وشو ذا ، كبده ؟ الله يديم النعمه خير حتى فطور صاحي مو جايبين شايفيني ابو الشباب انت وياه ولا وش وضعكم ! ليش ماخذاني ابوي سعد !
رايف بإنزعاج: بدير سكت اختك هذا وحنا تونا بس خط المدرسه وش عاد خط البر الطويل
بدر: هذا الموجود تبغين تاكلين اكلي تبغين تقعدين جوعانه اقعدي بالطقاق وبعدين ابوي سعد ماهو فاضيلك خذا عمتي موضي وامي ومرت عمي مصلح وراحو من بعد الفجر
ريوف شهقت: وانا اقول ليش عروب الي مصحيتني مو امي! يقلع ام الخيانه هو وعدني امس ياخذني اوف بموت جوع
رايف وهو مركز على الخط ناظرها من المرايه بحده: اكلي وخلي عنك البقاط لاتقعدين جايعه
ريوف تثاوبت وهي تحط راسها على الدريشه: بنام اذا رحنا السوبرماركت اخذت شي اكله
بدر: قبل تنامين قومي وين جامعة مناوي؟ الي جنب كلية رايف ولا الجديده
ريوف: المبنى الجديد الي عند بوليفارد المقاهي
رايف بتذمر: والله حاله كأني سواقهم الخاص ولا ابوهم اقعد اطلعهم من دواماتهم واوديهم الله يسامحك بس ياسعد
-
بيت سعـد//
عروب جلست على الكنب بتعب: غيم حبيبتي خلاص لبسك كويس ووصلنا بيت جدو وين تبغين تبدلين بعد!
نجوان شالت غيم وهي تحطها بحضنها: غيومه لبسك يجنن وش رايك نتفق انا وانتي اتفاق؟ تبقين على لبسك لين نوصل البر بعدها تختارين الي تبغين والبسك بنفسي
غيم اومئت بحماس وغروب ابتسمت: الله يسعدك نجوان فكيتيني من ازعاجها
نجوان باست خد غيم وهي تحطها على الأرض: يلا العبي لين نجي نروح ، بروح اشوف دانه بالمطبخ وانتي ابقي هنا مرتاحه والله ياويلك عروب تلحقينا ارتاحي
عروب كشرت: يابنت خليني اساعدكم شوي بس ماراح يصير علي شي
نجوان وقفت وهي تشيل عباتها: كيفك اذا تبين تسمعين هواش دانه من الصباح
دخلت رجاوي: السلام عليكم هاه سبقتوني اشوف يا الخاينات
نجوان بضحكه: كملي سلامك طيب على طول هوشه
رجاوي ابتسمت وهي تفتح يدينها: غيومه تعاالي واي لي كم يوم ماشفتك بطق امك
عروب ضحكت: فوق على تعب الحمل بنطق بعد!
نجوان سحبت طرحة رجاوي: خلي بنت اخوي وزوجة اخوي في حالهم وقومي ساعدينا
رجاوي كشرت: لاتسحبيني كذا تراي رسامه يعني مُرهفة الأحاسيس ماتحمل الدفاشه ذي
نجوان: ياي يا مرهفة الأحاسيس انتي خفي علينا
راحوا رجاوي ونجوان المطبخ وضحكوا على منظر دانه الي مشمره اكمام مخورها ورابطه طرحتها على مدار راسها
دانه بعصبيه: تضحكون انتي وهي وانا اكرف هنا ابوي وموضي راحو من فجر وسحبوا علي خلو العزبه وقدر الضغط وكل شي علي من صبح وانا انظف فيهم وارتب وعيت لاتخلص
رجاوي سحبت منها المنشفه وهي تضحك: والله شكلك تحفه خلاص روحي جهزي اغراضك وحنا بنكمل عنك
دانه تنهدت: حتى مخوري توسّخ! والله حاله
نجوان خذت مناديل وهي تبللها وقربت من مخور دانه وهي تمسحه: ماعليك بسيطه بتروح الحين روقي بس
دانه ناظرت بالساعه: شنقل ومنقل راحو يجيبون مناوي وريوف وللحين مارجعوا والله طولو وش يسوون هذول
نجوان ضحكت بسخريه: هذا وجهي اذا ماراحو يسعسعون الحين في مقهى ولا بوفيه يبلعون
دانه: انا وانتم بنروح مع مهمار ترا وقالي بيجي على سبع او سبع ونص خلكم جاهزين وسعود وضاوي بيروحون مع بعض وعروب معاهم
رجاوي تلفتت بإستغراب: وين وريف؟
دانه: تكوي بلوفراتنا
نجوان: ياسلام وانتم توكم تجهزون كل شي اليوم خير وينكم امس!
دانه: حكم القوي على الضعيف ابوي غصبنا ننام وكل شوي يجي يشيك نمنا ولالا، معسكر والله العظيم
رقت دانه اكمل باقي اغراضها هي ووريف كانت تجهز اغراضها وتكوي البلوفرات ومخورها على السريع ..
-
الساعه ٧ صباحًا//
كانت سيارة رايف وسيارة سعود وسيارة مهمار موقفه جنب بعض قدام بيت سعد والبنات يطلعون الاغراض من البيت والعيال يشيلونها
دانه بصراخ: امسكه زين طبق البيض داخل لا يتكسر
بدر بتكشيره: شالين حتى البيض ليش قلّت الاكلات مالقيتوا الا بيض تطفحونه ؟
دانه بتهديد: شل وانت ساكت ترا قايمه بدري والشياطين فوق راسي من قوة النفسيه المخيسه اذلف عن وجهي
سعود بنرفزه: وش فيكم اصواتكم واصله لأخر بيت ، هذا وحنا تونا مابعد بدت فقرة السوبرماركت! يارب سترك
عروب ابتسمت وهي تمر من جنبه: اذا جت فقرة السوبرماركت بتقوم حرب داحس وغبراء
ضحك سعود بينما بدر ابتسم: ماتضحك بس عشان المدام قايلتها ضحكت
رايف: والله لو انا قايلها وذاب بهذا الوقت كان لف وجهي بكفر السياره بس عشانه الحب الي يذب شاق الوجه ضحكه
عروب حمّر وجهها وراحت بسرعه للسياره بينما سعود لف عليهم: وجع احرجتوها
رايف بسخريه: ياعيني يداري مشاعرها بعد لنا الله بس
ريوف طلعت ركض بدفاشه وهي توقف بنص الشارع: وين الكرتون الصغير؟
رايف فز: بسم الله الرحمن سكنهم مساكنهم تقل باتمان مرسبن عندنا
ريوف كشرت: حتى ذباتك شينه كنها وجهك خلص وينه
رايف: حطيناه بسيارة مهمار لو تموتين مافتح الدبه بعد مارتب كل شي وش تبغين فيها
ريوف وهي شوي وتصيح: اوف فيها ساندوتشات دجاج مسويتها عمتي دانه لي بس حطتها بالغلط في الكرتون وش اكل الحين يعني!
رايف بهدوء: احسن كان كليتي الكبده وش زينها مافيها شيء بس مهوله
ريوف بقهر: انطم مالك دخل
راحت تركب السياره وصفقت الباب بقوه بينما رايف لحقها بعصبيه: ووجع كسرتي سيارتي وكسر
ريوف فتحت الدريشه: من زين السياره
رايف: قسم بالله لو ماتعقلين لانتف شوشتك الملتويه وانزلك من السياره
ريوف قلبت عيونها وهي تسكر الدريشه ،
مناوي بإنزعاج: ياكثر قراقك انتي وياه الحين بنقعد كذا طول الطريق ؟ اوف ياربي ليش دايم أنقّط عندكم !
وريف طلعت من البيت وغيم ماسكه يدها وتسحبها ، ضحكت وريف: ياروحي ياغيوم انا بروح بسياره ثانيه ، تجين معي ؟
غيم اومئت بحماس ووريف ابتسمت وهي تشيلها: امشي نستأذن من ماما اول
اتجهت لسيارة سعود وضاوي اللي كان جالس بطفش عند مقعد السايق ينتظر يخلصون مناوشاتهم فز بسرعه وعروب مسكت ضحكتها من لاحظته: تبغاني اخليها تجي معانا؟
ضاوي اومئ بسرعه: تكفين يامرت اخوي انا في وجهك خليها تجي معنا خليني انبسط بالطريق
عروب: خلاص ماعليك عندي
فتحت الدريشه من قربت وريف وهي تردف: هلا وروفه زين شفناك يابنت غاطسه من اليوم
وريف بخجل لان ضاوي يسمعهم: الطلعه جت فجأه وجدي مو مقصر منومنا غصب بدري ماخلانا نجهز شيء برواق
عروب: يا حليله عمي متحمس مايبيكم تتاخرون بالصباح
وريف ضحكت: ايه محرق جوالاتنا اتصالات من طلع هو وامي وخالاتي وهم كل شوي يتصلون يتاكدون اننا جايين بالطريق
غيم رفعت نفسها وهي تنادي امها الي لفت لها: ها غيم وش فيك ؟
وريف: ايه صح جيت اقولك عادي اخذ غيم معي ؟
عروب: بتطفشك صدقيني وتقعد تصيح او تتهاوش مع بدر تعالي انتي معنا تسليني بعد لحالي مخليني وكلكم متوزعين
وريف بلعت ريقها بتردد: مدري والله ..
قاطعتها عروب باصرار: تعالي بس يابنت الحلال نتونس مع بعض وتسكت غيوم
وريف بإستسلام: خلاص اجل بجيب شنطة يدي واجي
ضاوي ابتسم بوسع: قسم بالله انك محزمي انتي وغيومه ، غيومه تعالي بشتريلك السوبرماركت كله لاوقفنا عنده الحين
ضحكت عروب: والله انك خفيف الله يخلف بس اخطبها وخلاص
ضاوي ابتسم: قريب ان شاءلله خل تخلص معاملات ارضي بس
عروب: الله يوفقكم ويتمم عليكم يارب
اما بسيارة مهمار فـ دانه ركبت لكن سرعان ما كشرت : اسمعني انت وياها بتتهاوشون ولا تقعدون تنغزون في بعض من الحين علموني انزل من السياره مافيني شدّه
مهمار ضحك: انتي وش فيك اليوم متلبسك جني ابوي سعد ! بعدين انا ماعندي شيء اقوله الا اذا بعض الناس عندهم شيء هذا شي ثاني
نجوان رفعت حاجب: بعض الناس لهم اسم يابعض الناس ولا ؟
دانه حطت يدها على راسها: لا انا انزل احسن ابعد عن الشر وغنيلو
نجوان سحبت دانه: اجلسي بس هذا الناقص بتطلع وتخليني
سعود وقف عند جهة مهمار الي نزل الدريشه: هلا؟
سعود: خلاص اموركم تمام نمشي؟
دانه: اصبر باقي رجاوي بتجي الحين
سعود ناظر بساعته: يلا كلنا جاهزين مابقى الا انتم خلوها تستعجل
دانه ناظرت بالبيت الي طلعت منه رجاوي وهي تقفل الباب: هذاهي جت
سعود رجع لسيارتهم وارسل بالقروب: يلا توكلنا على الله
رجع للسياره ونطت غيم على طول بحضنه وشد عليها وهو يبتسم: يامرحبا بقلب ابوها
مشت اول شيء سيارة مهمار الي كانت بالمقدمه بعدها سيارة رايف بعدها سيارة سعود
سعود ناظر سيارة رايف الي طايرين ومسرعين وتنهد: ياربي منهم مايتوبون!
طلّع جواله وهو يتصل ببدر ويهزأه لاجل يخففون سرعه ،
بعد اكثر من نص ساعه وصلوا للمحطة وهم ينزلون من السيارات كلهم
دانه تمغطت: ياويلي تجبست وهو بس نص ساعه وش عاد باقي الطريق !
رجاوي كشرت: والله مالوم مناوي تكره البر خطه لحاله يكسر الظهر
نجوان: ياعزتي لعروب بس حامل وبتاكل تبن من الطريق
سعود بصوت جهوري: اسمعوني كلكم قدامكم بس ربع ساعه تدخلون وتخلصون كل اموركم وتطلعون ومابغى هواش ولا ابغى سالفة اذا ركبنا السياره ومشينا خطوتين يالله نسيت هذا ونسيت هذا ونرجع نوقف من جديد نبي ننجز يلا انطلقو
توجه سعود ومهمار وضاوي لمقهى الشاي الموجود بالمحطه لاجل ياخذون شاهي وقهوه ، بينما البنات كلهم مع بدر ورايف اتجهو للسوبرماركت
دانه: اسمعوا انا ونجوان علينا قسم الفطاير والمشروبات وريوف ومناوي روحو قسم الشبسات وعروب ورجاوي الككاوات يلا عشان نخلص بسرعه
بدر: اسمعو جيبولنا معكم لاتنسونا
ريوف: ليه ماعندكم رجول ؟
رايف: ترا لسانها طايل هذي اليوم بدير سكتها
بدر بطفش: تراكم قرفتوني عيشتي عميمه ضبطينا بس
دانه يإنشغال: ماني فاضيه لكم روحو وخذو الي تبون
انقسمو بالسوبرماركت وبدر ناظر برايف وهو يناظر العربيه: تفكر باللي افكر فيه؟
رايف ضحك بحماس: امش
بدر: انا اخف منك انا الي بركب اول
نط بدر في العربيه ورايف يفحط فيه باسياب السوبرماركت وضحكهم عالي
دانه وسعت عيونها: ياويلي هذولا وش يسوون!
ريوف ضحكت بحماس: الله ياحظهم بروح العب
نجوان غطت عيونها بفشله: الله يفشل عدوهم هذولا ليش دخلو معنا؟
عروب وهي منهاره ضحك: الله يسعدهم خلوهم مونسينا
مناوي طلعت جوالها: بصورهم عشان اوري جدي سعد
نجوان مسكت ريوف الي بتروح: خير انتي انثبري وين رايحه الحين ننقدهم وتروحين معهم! انطقي
دانه: الهونا عن الاغراض خلصو يلا بيفصلون علينا مهمار وضاوي
رجاوي: قولو الحمدلله عدّال مب معنا ولا كان كلنا الحين جثث
مهمار كان يشرب من الشاهي بسرحان يفكر كيف بيتناقش مع نجوان ورجاوي ودانه معاهم؟
بينما سعود وضاوي الجو متكهرب بينهم من بعد حوار أمـس ،
سعود أخذ النعناع وهو يعطي ضاوي: الشاهي ساده
ضاوي كبّح إبتسامته لأن سعود يدري انه مايشرب الشاهي الا بـ النعناع
مهمار: وانا اشفط الشاهي بدون طعم عادي!
قطـر//
صحت نواره بإنزعاج على صوت ضربات الباب، جلست على السرير وهي تفرك عيونها بصوت نعسان: مين؟
غلّاب: للحين نايمه ! تاركك امس بدري ما نمتي اول ما دخلتي يعني؟
نواره تأفأفت وهي تسحب طرحتها: انت وش تبي مني الله على الازعاج والبثره خير جاي من الصباح وش عندك
غلاب: افتحي جايب لش فطور
نواره تثاوبت وهي تمشي بخطوات متأنية للمراية الي بالحمام لأجل تلبس نقابها وعباتها وطلعت بعد دقايق وهي تفتّح له
غلاب ابتسم بوسع: صباح الخير
نواره قلبت عيونها: الساعه سبع الصباح الله يشغل عدوك في نفسه
غلاب حط الاكل على الطاولة: ليش ما نمتي اجل وش سويتي ؟
نواره: وانت وش عليك !
تجاهلت غلاب وهي تاخذ جوالها لكن سرعان ما شهقت وهي تشوف رسايل خواتها وقت كانت نايمه وهم يقولون انهم بيوصلون الضحى لقطر ،
غلاب فز: بسم الله وش فيش وش صاير!
نواره ناظرته بخوف وضياع: خواتي بيجون الضحى هنا! يمه وش اسوي علمني وش اسوي ابوي ما صحى
غلاب: بسم الله عليش هدي وراش تروعتي كذا ، بسال الدكتور اذا تقدرين تطلعين الحين ونروح نجيبهم من المطار وتعلمينهم بكلش
نواره جلست على السرير وهي تحس بدموعها بدت تتجمع بعيونها: وربي خايفه كيف اقولهم وكيف ردة فعلهم؟ وش بنسوي؟ وابوي للحين ماصحى ولا ندري بيصحى ولالا!
غلاب بجديه: نواره تعوذي من الشيطان وقومي خليش قويه عشان خواتش لاتقولين لهم الخبر وانتي ضعيفه بيضعفون معش اكلي وعيني من الله خير بعدها نطلع المطار ونجيبهم وتعلمينهم
نواره تنهدت بهّم، وغلاب فز: بنت لا اشوفش تبكين ! قوي عزومش وكل شي بيصير خير وانتي وخواتش في وجهي والله ما يلحقكم ضيم ولا ضعف وانتم في قطر
نواره هدّت شوي من بعد كلامه لكنها ماقدرت ترد عليه بشيء ،
غلاب وقف: انا بطلع الحين اخليش تفطرين براحتش لاخلصتي علميني عشان نروح
نواره بتردد: وين رها؟
غلاب: رها عندها محاضرات الصباح اعتبريني سايق يابنت الحلال بيوصلش لهالحين ماوثقتي يعني؟
نواره تنهدت: ماعندي خيار ثاني لكن ترا في شنطتي مبرد اظافر لو فكرت بشي غرزته بعيونك
غلاب بضحكه بقشعريره: اعوذ بالله يا التفكير الاجرامي ماني مسوي بش شي عيني من الله خير وخليه زيني به اظافرش ماله داعي استخدامات ثانيه
نواره: بتقعد هنا؟ عشان اذا خلصت اناديك
غلاب كان بيقول ايه لكن ابتسم بلكاعه على الفكره الي طرت بباله عشان ياخذ رقمها: لا عندي شغله ضروريه اسويها بعطيش رقمي لاخلصتي تدقين علي
نواره مدّت جوالها له بتردد وهي تردف لنفسها ماعليه لاخلصت وشفت خواتي حذفته
-
إنتهـى.