أصبحت الدروب النوارة ظلام في وجه غلاب الخطاوي

21

-
بدر أبتسم وهو يدفن وجهه بحضن امه: والله اني محظوظ ان امي مره قويه وماترضى بالظلم مثلك
شمايل لعبت بشعره: لا تماطل وخذ العشا للمجلس
بدر رفع راسه: ابوي طيب يدري ؟
شمايل كشرت: ما يدري ، راح مع عمك اقنعه مبارك بعد الشين .. ابوك ماهو صاحي من تالي عليه حركات ما ادري وش هي قايله فارش فراشه بالصاله من أمس و ينتظرهم يدخلون عليه! ومتولج سعود بالطلعه والنزله لين هج سعود من البيت ، لازم اشوف لي صرفه مع أبوك وتصرفاته هذي
بدر بضحكه: سوي معه نفس الي سويتيه قبل يوم قال بيسوي شقق فوق بيتنا ويأجرها
شمايل حطت جلالها عند فمها تحاول توقف ضحك من هالذكرى، يوم دخل عليهم سعود وهي ماخذه عقال مصلح وتطقه به من عصبيتها من عناده واستفزازه لها وكيف وقف سعود بينهم يحاول يوقفها عن طقها لأبوه
شمايل بضحكه: الله يصلحه سعود بث الخبر لكم وانتم ماتنسون
بدر وقف وهو رايح للمطبخ: للحين منقهر اني ما حضرت الحدث ، الا وين البنات؟
شمايل: في غرفهم جو من بيت جدك ودخلت كل وحده جحرها وصكت هالباب وراه
بدر طلع حافظه في الفرن وطلع لأمه: هذي؟
شمايل: ايه وشوف السلطات والدقوس والمشاريب في الثلاجه.. جدك جايب حليب ابل طعمه يجيب العافيه خذه لاتنساه
بدر كشر: وانا بشيل هذا كله لحالي ! لاجو خل يشيلون معي
شمايل شهقت: اعقب يا بدير ما تبي تخدم اخوانك الي اكبر منك؟
بدر: خلاص يا كلمه ردي مكانك بوديهم كلهم بس وشوله الدراما والشهقات هذي
شمايل: اهوه بس خذ الاغراض واطلع وانت ساكت صدعت براسي الله يغربل بليسك ماتسكت
بدر طلع للمجلس وفرش السفره وهو يحط الاغراض فوقها بعدها لّف على الدفايه وهو يشغلها ويقربها منه وانسدح عندها وهو ينتظر اخوانه يجون ،
دخل سعود وهو يبتسم: ريحة الأكل واصلتني وانا برا
بدر فز وهو يطالع ورا سعود بلهفه: وش فيك لحالك ؟ وينهم؟
سعود جلس على السفره: الا بس هم بسياره وانا بسياره وسابقهم بشوي بيدخلون الحين
ناظر بدر الباب بترقب وعدل جلسته وهو يشوف ضاوي وبندر يدخلون
ضاوي جلس على السفره وهو يردف: بدير قم جب الشطه وينها
بدر كشر: السلام لله ، على طول من دخل اوامر يا شينك
بندر ابتسم وهو يشوف بدر الي قام بتحلطم يجيب الشطه وتنهد بعُمق ، يا حلو شعور البيت .. شعور انك بمكانك بين اخوانك وتاكلون عشا البيت .. شعور مفتقده من زمان ويدري انه بيفقده لباقي عمره لأنه من سابع المستحيلات يرجع لهالبيت ،
سعود دق ركبته: ولد وين رحت؟ تعش
بندر فز من سرحانه وهو يردف: موجود بس انتظر الشطه
ضاوي كشر: انا بصب لي اول
بندر ضحك: صب لك أول تحسبني بزر زيك ؟
سعود ابتسم وهو مشتاق لمناقراتهم ولهذي اللمة: الله لا يخليني منكم قولو امين
بدر كشر وهو داخل: فوق اني اكرف من صبح بعد ما أنشمل بالدعاوي!
قط الشطه على ضاوي الي فز: الله لا ياخذك روعتني ما تشوف ثوبي ابيض؟ لو منكسره كسرت راسك
بدر جلس عند الدفايه وهو يمد يدينه: احسن من يلبس ثوب ابيض في الشتا؟
ضاوي كشر: وانت وش عليك مني تحسب جسمي دلوع زيك يبرد على طول
سعود: ليش ما تاكل بدر؟
ضاوي: لاتخاف عليه تلاقيه زاط لين قال امين في بيت جدي
سعود فز وهو يلف على بدر: صح .. وش صارلكم ؟ جاكم شي؟ وين ريوف
بدر ضحك: صباح الخير قدنا معودين بيوتنا ومتروشين ومتعشين ونصنا رقدو.. ماعليك على قولة عديل قرود مافينا الا العافيه
سعود تنهد براحه: الله يصلحكم روعتوني وتهادينا انا وعدّال رفع ضغطي كل الامور تنحل عنده بهواش
ضاوي باستغراب: ليش وش صار؟
سعود: مارجعو معنا بدر ورايف والبنات الي معهم قعدو لين الليل وجاهم مطر قوي الله يعطينا خيره
بندر رفع راسه وهو يشوف الاجواء: مافيه مطر هنا
ضاوي: قالولك في البر مب هنا بيننا وبينه ساعتين ، الحمدلله بس ان المحطة قريبه منه هذي حسنة دربه الطويل
بدر وهو يتمغط بنعاس: طولتو جاني النوم وانا انتظركم
سعود وقف: الحمدلله الله يجعلها نعمه دايمه .. لاتنام صحصح بسوي لنا شاهي واجيب البلوت
بدر فز بحماس: من الحين انا معك
ضاوي كشر: عاد انا وبندر الي ميتين عليك مالت بس
بندر: انا ارفض هذا الشي.. ضاوي فاشل في ذا اللعبه ماراح نفوز ما اقبل هذا الشي
ضاوي رفسه: يحصل لك بس تلعب معي
سعود ضحك: هذا وانا ما بعد جبتها وبدينا نلعب وبديتو بمناقركم وهواشاتكم لاجت وش بتسوون؟
بدر ابتسم: اقول استاذنا الفاضل ابو بدر كانك بتتأخر بالنومة اليوم؟ ودوام بكره؟
سعود بضحكة: ابو بدر بعد ! ابو غيم لو سمحت وش فيك مضيع
بدر كشر: مالي دخل ولدك بتسميه بدر علي خلاص
سعود ابتسم: طيب يمكن ما يطلع ولد يمكن يطلع بنوته زي القمر مثل غيومتي
بدر: لا خلاص طفشنا غيم وجابت لنا الضغط ابي ولد
ضاوي: تكلم عن نفسك حبيبي انا ابي بنت زي غيم
بندر اومئ: وانا بعد وبعدين من قال جابت الضغط حبيبة عمها هي ماجابت الا الغيم والسحاب والمطر على حياتنا
سعود ابتسم وهو يصفق بيدينه: لا لا ما اقدر على كمية الحب ذي لبنتي اشتقت لها تصدقون بروح اطل عليها
بدر كشر: ايه اركض اركض لبنتك وانا دخلت ولا حتى طليت بوجهي
ضاوي وبندر انفجرو ضحك وسعود ابتسم وهو يرجع لين عند بدر وسحب راسه له وهو يضمه بقوه: هاه يا ولدي يا بدر الحين اقدر اروح اعطي اختك الجزء المتبقي من الحنان؟
ضاوي وهو مازال ميت ضحك على وجه بدر: والله العظيم مو طبيعي هو وغيرته ومناقره مع غيم بديت اشك انه ولدك صدق
سعود ابتسم وهو يحب راس بدر الي استحى: انه ولدي صدق
بدر بتصريف عشان يخفي خجله: خلاص رح لبنتك
بندر ضحك بقوه وهو يمسك بطنه: بطني ما اقدر شوف وجهه كيف حمّر
ضاوي طشر الببسي الي كان بفمه من الضحك على تعابير بدر
بندر ضحك بقرف وهو يدف ضاوي: الله يقلعك يا وصخ وصخت الدنيا
بدر مات ضحك على وجه بندر: احسن شر البليه ما يضحك بتطقطقون علي وعاقبكم ربي
سعود طلع من عندهم وهو يضحك وابتسم وهو يتنهد بعُمق، من زمان عن اللحظات ذي .. يحس بروحه رجعت وهو يسمع اصوات ضحكاتهم تتعالـى.. كمية الطمأنينة والراحة والأمان الي يحس فيها بوجود اصوات اخوانه حوله يضحكون ويسولفون ويمزحون مو عادية
دخل البيت وشاف الصالة فاضية رقى على طول لجناحه وفتح الباب وهو مستغرب الهدوء ،
دخل غرفته وشاف عروب منسدحه بالسرير وهي تقرا كتاب ،
ابتسم وهو يجلس قبالها: وش تقرين ؟
عروب رفعت راسها بابتسامه باهته: هلا سعود .. ولا شي روايه
سعود عقد حاجب: وش فيه وجهك شاحب ؟ فيك شي عروب؟
عروب ضحكت: يمكن لاني حامل مثلًا ؟ انت تعرف حمالي ووحامي صعب ويهد حيلي .. ناسي حالي وانا بغيم ؟
سعود تنهد بقلق وهو ينسدح جنبها وسحب راسها لحضنه: والله لا شفتك وانتي تتألمين من حملك اقول خلاص هذا اخر ضنى من غير شر .. ما اطيق اشوفك وجعانه
عروب بضحكة: يا سلام ونخلي غيم وحيده لا اخت ولا اخ؟ ماعليك طبيعي الحمال والوحام كذا لا تقلق
سعود باس راسها: انتي اهم بالدنيا عندي من اي فكرة ثانية ، مارحتي للبنات أجل؟
عروب غمضت وهي مسترخية من لعب سعود بشعرها: لا ماكان فيني حيل من بعد مارجعنا وترويش غيم الله يصلحها تعبتني صايره عنيده مره
سعود ضحك: تو قبل اجيك بدر يناشبني عليها ويبي الي ببطنك ولد ما يبي بنت
عروب ضحكت: يا حبيله بدر ما يشوف غيم الا وهو تال قرونها
سعود باس راسها وهو ينزله على المخده، كشرت عروب: ليش قمت !
سعود ابتسم: بجيب لك بابونج واطل على غيوم
عروب تثاوبت وهي تفرك عيونها: لا بنام انا خلاص ماعاد اشوف شي بس كنت انتظر اشوفك قبل انام ، بتنام الحين؟
سعود: لا بنزل لأخواني تحت مسوين جلسة ، نوم العوافي حبيبتي واذا احتجتي شي اتصلي علي طيب؟
عروب اومئت وهي مغمضة ودنى سعود وهو يبوسها قبل يطلع لغرفة غيم، ابتسم لمن دخل وشافها نايمه بفوضوية وتوجه لها وهو يعدّل سدحتها ويطلع
كان بينزل بس شاف فيه نور من غرفة ريوف ودخل وهو يبتسم: ريوفه الحلوه هنا؟ توقعتك عند بيت جدي
ريوف بهدوء: لا رجعت منهم قبل شوي
سعود باستغراب قرب وهو يجلس على طرف سريرها: افا كأن النفسية شينة ولا ؟
ريوف ابتسمت بتكلف: لا مافيني شي بس تعرف تعب اليوم
سعود ضيق عيونك بشك: علي انا ريوفه ؟
ريوف ابتسمت بتصريف: عادي ولا شي بس تعرف على وجه الاختبارات النهائية والتخرج والهواجيس حقت الجامعه والقبول
سعود ضحك: وبس! والله ماعندك سالفه لاتضيقين خاطرك اذا ما قبلوك بدخلك على حسابي خليني بس اشوف ريوف الي دايم اشوفها
ابتسمت ريوف بإمتنان وهي تحضن سعود: الله لايخليني منك
سعود نكش شعرها: ولا منك يا عنقودتنا الحلوه .. تنزلين معي؟ مسوين جلسة انا واخوانك كلهم
ريوف رفعت راسها: احلف! حتى بندر؟؟
سعود ابتسم وهو يهز راسه: حتى بندر
ريوف: أجل بنزل معك
سعود وقف وهو يسحبها: يلا خلينا نمر على محطتنا الثانية غرفة نجوان
ريوف ضحكت: ماهي يمنا الاخت تكلم عريس الغفله
سعود ابتسم: لا اذا كذا اجل نخليهم على راحتهم الله يتمم عليهم
ريوف بضيق: مو مستوعبة ان بنهاية الترم هذا بعد التخرج بتتزوج وتطلع من البيت خلاص !
نجوان فتحت الباب وفزو سعود وريوف ، نجوان ضحكت: وش فيكم بسم الله عليكم
ريوف بعصبيه: روعتينا وش فيك تفتحين بالقوه ذي تداهمين انتي؟
سعود ضحك: توك تقولين مو مستوعبة انها بتتزوج وتروح وتطلع من البيت
ريوف كشرت: لا خلاص خلوها تروح وتخرش زوجها مو تخرشنا
نجوان تخصرت: كنتم تبون تجتمعون بدوني !
ريوف: بسم الله جنبه من علمك؟
نجوان: ضاوي ارسلي
سعود: والله ما تحلى جلسه بدونك بس ريوف قالت تكلمين العريس فقلنا بنخليكم على راحتكم
نجوان وهي تنزل معهم كشرت بعد طاريه لان مكالمتهم ماتمت على خير الا زاد سوء التفاهم بينهم من اسلوب مهمار الي كان مازال معصب منها من العزبه ،
دخلو المشب وبندر أبتسم وهو يشوف خواته
ضاوي: هلا هلا بملح المحليه وزينته الحين جت الحياة
ريوف وسعت عيونها: يقلع ام الكذب والنفاق الي فيك
جلسوا كلهم حوالين الدفايه وبراد الشاهي والمكسرات بوسطهم، كانت جلستهم ما بين سوالف وضحك ومحارش ضاوي وبدر لريوف الي تتنرفز بسرعـه.. كانت ليلة إستثنائية لهم بعد هالوقت الطويل الي قاطعين فيه عن بعض متناسين كل مشاكلهم وهمومهم ،
بدر بتوتر وهو يشوف نظرات ريوف الي ماسكه عليه سالفة دعسه ابد رايف اليوم، زفر وهو يتحمل كل شي الا ذل ريوف له وهي تخليه يسوي الي يبي وتحرق اعصابه بنظراتها وكلامها عشان ما تعلم احد بالمصايب الي يسويها
تحمحم وهو يردف: سعود بقولك شيء
سعود ناظره باستغراب: وشو؟
بدر بتوتر: تبي الصدق؟ بقولك اياها على بلاطه.. انا دعست يد رايف اليوم بالسياره
شهقو كلهم ماعدى ريوف الي كشرت: وجع ماعاد عندي شي امسكه عليك خربت متعتي
سعود بخوف: صاحي انت ؟ كيف ومتى وليش سويت كذا؟!
بدر بسرعه: قبل تهاوش والله العظيم بالغلط كنا نحاول نطلع الكفر من التغريز وكنت تعبان ودعست يده
ناظر ضاوي بندر قبل يلّف على سعود بكلام سريع: دامها خربانه خربانه، ترا بندر ما طلق رجاوي
سعود شرق بالشاهي وريوف طيرت عيونها وهي تطق ظهره: حسبي الله عليكم كانكم بتذبحون اخوي
سعود لف على بندر بصدمه: هو صادق؟!
بندر بعصبيه رفس ضاوي: قسم بالله آنك بزر وش دخلك انت فيني ما تعلمني الي جاب طاري ذا الموضوع ويشهو ؟ دامه خربها ها تراه يحب وريف ويبي يخطبها بس ابوه بيرفضها
ضاوي وسع عيونه: خير يا الدب وش دخلني انا ووريف الحين!
سعود حط يده على راسه: الله لا يعطي عدوكم عافيه .. فيه احد بيزيد بعد؟
نجوان بتردد: ما ابي مهمار خلاص
سعود ناظر ريوف: قومي قومي جيبي لي شي ارتفع ضغطي
فزت ريوف وبدر ناظر سعود: سعود اسمع..
سعود قاطعه بحده: اص ما ابي اسمع اصواتكم خلاص ، انا اشوف مصيبة مين ولا مين ؟
ضاوي لّف على نحوان: هذي ماعليك منها كذابه دلعها الي كل يوم وهي ناطه بوجيهنا ما ابيه بعدين تبيه 
نجوان كشرت: لا صادقه
سعود تنهد وهو ياخذ الماء من ريوف: جيبي جيبي نشفو ريقي اخوانك ذول قسم بالله
ريوف كشرت: طيب خلونا على الاقل نكمل السهره بعدين علمو بمصايبكم خربتو علي
سعود حط الكاس وهو يلّف عليهم: بدر وش صار على رايف الحين؟
بدر كشر: ماهو انا من صبح ابي اتكلم بس ماعطيتني وجه ، والله انه طيب وبخير كانه قرد ماعليه
سعود بعد بصره عنه وهو يناظر بندر، صمت مطبّق مر بينهم قبل ينطق سعود: ليش ؟
بندر تنهد وهو يمسح على وجهه: ما قدرت
سعود: ما قدرت ، تقدر تدافع عن رغبتك مو تكذب عليهم وعلينا إنك طلقتها وأنت ما طلقتها ! وش هالتصرفات بندر ؟
بندر بعصبيه: ما أحد له يحق ينقد تصرفاتي تجاههم ياسعود، هم اللي ماخلو لي فرصه
سعود ضيق عيونه: تحسبني ما ادري وش نواياك يا بندر؟ تبي تنتقم منهم بطريقة تضرك وتضرها! وش بيكون ردة فعلها لاعرفت باللي انت مخليها على ذمتك للحين عشانه؟
بندر بلع ريقه من سعود اللي يخوفه دايم بفهمه له ومعرفته له، كيف عرف كل شيء بداخله ونواياه وطريقة تفكيره؟
ضاوي عقد حاجب وهو يلّف على بندر: ليش وش ناوي تسوي انت؟!
سعود لف على ضاوي: وانت جايك الدور الحين .. ما عقلت عن هالخبال للحين ؟ انت تعرف خالد زين وتعرف سالفته مع طامي وسعد .. هو بالموت رجع ولده وبنته قبل سنتين عند موضي ! انتم وش فيكم تبون تهبلون فيني ولا تهبلون في ابوي ولا في جدي ولا من بالضبط؟
نجوان: طيب اعط شكوتي وجه؟
كلهم بصوت واحد لفو عليها: انتي اسكتي !
نجوان فزت: بسم الله روعتوني خير
ريوف بانزعاج: يختي اسكتي خل نكمل المسلسل الي صاير هنا ، انتي كذوب كلنا ندري بترجعين له من يصدقك بالله؟ اص بس .. كمل سعود
سعود كتم ضحكته الي بتطلع بعز عصبيته بسبب ريوف: لا يا شيخه مبسوطه يعني باللي صاير ؟
ريوف بلعت ريقها: لا يعني بس سعود وش فيك لاتطبق اسلوبك مع الطلاب علي انا شكو هم الي مسوين المصايب
سعود وقف: قومو قومو لمو هالفوضى ونامو صدعتو براسي ماعاد اتحمل حرف زايد .. لي تفاهم مطوّل معاكم بكرة حتى انتي نجوان
طلع سعود وبندر انقض على ضاوي وهم يصفقون في بعض
بدر سحب ريوف ونجوان: امشو امشو خلوهم يتطاقون لين يطيح الي بروسهم مالنا دخل
نجوان: والفوضى من بيلمها ؟
بدر وهو يتثاوب: نشوفلها بكره ماعليك .. والله ميت نوم خلاص ماعاد اشوف
ريوف كشرت: حيوان ماعاد خليت لي ممسك كل شي تعترف فيه وش هالحركات الخايسه؟
بدر بنص عين: لا يا شيخه! من الي حركاته خايسه انا ولا انتي تقعدين تذليني وتعيشيني بضيم وقهر .. اعترف ابرك لي
نجوان: وش موقفتي انا مع بزران الالفين ؟ يلا بس
ريوف بسخريه: خفي علينا تراك مواليد ١٩٩٩
بدر بضحكة عاليه: واخر شهر بعد
-
صباح الأحـد، بيت سعد/
صحت نوير وهي تتمغط من نومة طويلة مريحة، فركت عيونها وهي تستنشق ريحة القهوه والعجين اللي دخلت بوسط خشمها
قامت وهي تشيّك على سرير نور ولقتها للحين نايمه ، أخذت جوالها بتشوف كم الساعه وتوسعت عيونها وهي تقرأ رسايل نواره الي بالليل "نوير نوير ابوي اليوم حرك يده !!! وقالوا فيه احتمالية ايجابية انه يصحى بهذي الايام"
شهقت بقوه خلّت نور تقوم بخوف: وش فيك وش صاير ابوي فيه شيء؟
نوير ركضت لنور بدموع بعيونها وهي تحضنها بصراخ: ابوي يقولون فيه احتمالية يصحى هذي الايام
شهقت نور وهي تتمسك بنوير: تكفين قولي والله متى قالوه ؟
نوير مدت لها الجوال ونور وقفت على السرير وهي تناقز بوناسه ، ضحكت نوير وهي تطقها: بنت اهجدي دخوتيني
نور بحماس: خلينا نروح قطر
نوير تنهدت: ودي والله العظيم ودي لا فتح ابوي عيونه يلاقينا كلنا حوله، بس مستحيل يرضون يعطوني اجازة.. بعدين انتم بفترة اختبارات حساسة لازم تنتبهين
نور كشرت: نوير ترا بس مراجعات الاختبارات باقي
نوير رفعت جوالها: خلينا نتصل على نواره
نور وهي توها تنتبه للريحة: الله فيه ريحة اكل حلوه!
نوير اومئت: اي من قمت وانا اشمها وبعد هالخبر انفتحت نفسيتي للاكل اكثر
نور ناظرت جوال نوير: ماترد؟ شوفيها مرسله الرساله ثنتين الليل اكيد انها نايمه الحين
نوير اومئت وهي توقف: اكيد اذا قامت بتتصل ، يلا قومي نبدل وننزل خذي معاك طرحة إحتياط
نور هزت راسها وهي تتمغط بكسل: طيب مع ان باقي فيني نوم
بدلو وعلى فتحتهم للباب كانت غرفة وريف الي مقابلتهم تفتح الباب
-
إنتهى، ارائكم وتعليقاتكم🤍؟.