#مراس_الدعجاء
للكاتبة: هدهد
لاتنسون التصويت والمتابعة للحساب وتعليقاتكم الي احبهم 💛🎀
باجِر من ترد ما تلگه شي موجوّد
تلگه الوَرد ذابِل والأرض صحره
تلگاني مدينّة مسَدده البيّبان
بيها الگمَر ميت والشمّس حمره
✤————————————————✤
-عـثمان طـلع ...
كلمتين دخلن لگلبي فرحه وشعور بدغدغة جوه بطني صار
وأشوفك ؟ معقوله بعد هالفترة نتقابل؟ راح اسولف وياك واسولفلك الصار؟
اسولفلك شكثر اشتاقيت ؟
من داخل تفكيري واحلامي الورديه انسحبت بشهگتها وبچيها الي لون أحلامي للأسود
-ميان: بس.. بس مارجع !
-شنو؟ شنو قصدج مو تگولين طلع؟؟ فهميني!
-ميان: ليالي عثمان قرر وراح يرجع لـ لبنان ويعوفنـا!!! ولج شلون نقنعه امي راح تموت نفسها من البجي بس هو اخذ جنطته وراح للمطار .. ليالي احجي گولي شسوي؟
سَاكت شرد اگلك
هو ظل لسان
بي اكدر اسولف
ابيات شعرية صغيرة وصفت صمتي وشلل لساني بعد كلامها
توقعت نلتقي ويعاتبني ونرجع اصدقاء
حتى لو يزعل مني راح اراضيه
حتى لو عاتبني راح اخليه
حتى لو ..
بس ماتوقعت يروح من البلد كله.. يعني مو معقوله
-تشاقين صح، مستحيل يسويها هو گلي ماراح يرجع لـ لبنان!
-لاا گال راح يروح وطلع من البيت
-من يمته طلع؟؟؟
-الصبح انطوه إفراج ومحد يدري هو گايل للمحامي ليبلغ احد واجه الظهر سلم علينه ولج انصددددمنه من دخل ومكيفين بعدها دخل لغرفتة وطلع شايل جنطة السفر وشگد تلاوينه ويا ورفضنه الصار بس ما گدرنه اله حلف امي ما توگف بطريقه وطلع
-شگد صار من طلع ميان گليلي؟
-ساعتين
بسرعة سديت الاتصال وبديت أدور على رقمه الي صار سنوات ما اعرف عنه شي..
رقم منسي بس صاحبة ما طلع من تفكيري
إتصلت مرة ومرتين بس جان مغلق وأستوعبت شلون يبقى الرقم مغلق كل هالوقت؟
أكيد انباع من الشركة
رجعت خابرتها وسألتها ماعدها علم
وسديته من عدها اخابر عماد الي بعد ثالث رنه جاوبني
-ها ليالي ؟
-انطيني رقم عثمان اذا عندك؟ هو اكيد ما يبقى بدون رقم؟
-ما عندي والله .. ما اتوقع اشترة بهالسرعة لان طلع بغراضه القديمه.. تعبت واني ادور عنه ما هوه اختفه
-شلون يعني؟ اخاف صدك راح يسافر!!!
-دورت بالمطار گالوا ماكو رحلة للبنان الا بعد 6 ساعات
-خاف حاجز بيها؟
-ما اگدر اخذ منهم معلومات بس راح أنتظر گبال المطار لحد ما اشوفه
-اجي؟
-وين تجين؟
-للمطار وياك
-عماد:تحجين صدك؟ ليش تجين لا اني انتظره
-فدوه اريد اشوفه افهمني عماد
-لا لتجين ليالي اني انتظر بس أشوفه ابلغج والله
-ماشي
سديته وبقيت بمكاني صافنه لا أكدر اسوي شي
ولا اگدر اشوفه وشصار وياه
حقه يزعل
بس مو من حقه يترك الكل ويروح
بقيت الهي نفسي وماكو إتصال من عماد ومرت ساعات وقررت اطلع
أروح للمطار وشيصير خلي يصير
بدلت ملابسي على السريع ونزلت أشوف امي جانت گاعده تخابر برُسل اختي
وگفت گبالها واشرتلها راح اطلع وهزت راسها بمعنى وين؟
-مشوار سريع واجي
طلعت بسرعة قبل لتركز زيادة وتفتح تحقيق وياي ودخلت سيارتي اسوقها
متجهه للمطار اليوم لازم أشوفه لازم
بنص الطريق وبوسط الازدحام رن موبايلي يفزعني وچان نفسه الرقم الغريب الي اتصل بالمرة الفاتت وطنشته بس مرة ثانية إتصل وجاوبت بملل
-نعم؟ منو؟؟
احمد ربي إلف مرة اني واگفه لأن لو سمعت صوته واني أسوق چان احتمال
تصنمت وصار حادث
-هـذا اني لـيل
تلبكت وما عرفت شحچي وشنو أرد ؟
صوته سببلي دمار بمشاعري وبعد وقت طويل من الانقطاع سمعته !
سمعت صوته
وكلمة ليل الي يگولها ولأول مرة احس مشاعري تفيض ودگات گلبي تعبر الحد المطلوب الها!
-عـثمان!!
صمت مر وفزعني صوت صفارات السيارة وهمه يگلولي حركي وأنتبهت
السيارات الي گدامي كلها تحركت وبسرعة حركت ادخل فرع فارغ حتى اوگف لأن
رجفتي مانعتني اتحرك حتى
-انتِ وين؟
-يهمك؟
-خلينا نلتقي هسه ضروري
-تعال ل....
قبل لا اكمل كلامي قاطعني
-تعالي لبيتنا القديم
مفهمت وسألته بعدم فهم
-تقصد بيتكم الي گدام بيتنا؟
-اي
-شلون اجي هناك؟ ترا يگدرون يشوفوننا هناك
حسيت بي تحرك من مكانه وبعدها بمدة سمعت صوت باب سيارة ينطبك بقوة
تنحنح وحجه بهدوء طاغي على نبرته
-تعالي ل***
-ماشي جايه
غلق موبايله بدون كلام واني احس حتى عضلاتي متشنجة
وصار عندي مغص ببطني من الي راح يصير
عثمان.. عثمان اجه؟ رجع !!!!!
مدري ليش ما دا اصدك
وعيت على نفسي وحركت بأتجاه العنوان
الغريب العجيب چان مجمع سكني.. بمنطقة راقية حيل بس ما اهتميت كثر ما استغربت
شنو الي منتظرني؟
بعد ربع ساعة تقريبًا وصلت وعيوني بقت تتجول بالمكان الواسع وما لمحته
عيوني متلهفه چانت لشوفته.. تدور عليَّ بكل كتر
رفعت موبايلي إتصل على رقمه الي من گد ما تأملته حفضته
وجاوبني وحجه قبلي
-ادخـلي للمبنى الثـاني وروحـي لشقه رقم 031
-شتسوي بشقه ؟
-تثقين بيه؟
سؤاله عبالك سهم واخترق گلبي.. شلون تسألني هذا السؤال واني خنت ثقتك؟
حسب الي تظنه
-اكـيـد
-تعالي لعد
سديته من عنده وسميت بالله ودخلت .. چانت الدنيا المغرب والساعة 5 .. الجو بارد مثلج واني مغطيني جاكيت صوفي بس ، احس وجهي يلسعني من الهوه البارد
طلعت كلينكس ومسحت انفي الي چان يحرگني وعرفت راح اتمرض
ايديني بوسط جيوبي يتدفون وشعري تندمت رفعته لان لو منزلته چان دفاني
دخلت للمبنى الثاني وشفت الحارس وتقدمت عليه اتنحنح
-السـلام عليكم
باوعلي مستغرب يمكن ورد السلام وحجه
-تفضلي بشنو اگدر اخدمج؟
-اريـد اعرف الشقة رقم 031 وين؟
عقج حواجبه وگال
-أول مرة تجين لهنا؟
-اي
-اصعدي ثالث طابق تلگينها بالبداية وحاولي تتجنبين تطلعين صوت عالي رجاءً
-ماشي
تحركت ادفي نفسي وصعدت عن طريق المصعد وضعطت ثالث طابق
تحرك المصعد لمدة وجيزة وانفتح وطلعت أتمشى وعيوني على ارقام الشقق.. 028 ، 029 ، 030 ، ولگيتها .. 031
وگفت گبال الباب متوترة شوية.. لا مو شوية هواي!
ضغطت الجرس الي بصف الباب انتظر ينفتح بتوتر ومنزله راسي
وانفتح!
گلبي حسيته حينفجر من شفت رجلينه وبهدوء رفعت راسي وشفته، شفت عثمان!
عيوني وعيونه التقوا بس مو نفس المرات الي فاتن
هالمرة مشاعر شاذة ومتطرفه دخلت بيناتنا
هو يحس بسي واني احس بشي ثاني
شفت ملامحة الي متغيرة وشعرة الي مخففه حيل بس شواربه نفسهم.. مطول لحيه شويه ومبين محلق جديد .. لابس ازرق وفوگهم جاكيت مطري أسود
عيونه متغيرة
مطفيه ومو نفس النظرة الي اعرفهم
حرت شحجي؟ شلون اتصرف هسه؟
تحرك هو وسوالي مجال ادخل وگـال
-تريدين تبقين واگفه برة بهالبرد ؟
دخلت وهو سد الباب ودخل .. گلبي يدك حيل ما أعرف شحيصير ؟
انداريت عليَّه وهو اشرلي أتقدم ودخلنا للصالة
فتح جاكيته ونزعه وشمرة على الطاولة وگعد قبلي على وحدة من الكنبات
جان اثاث الشقه حيل مرتب وحديث
گعدت مقابيله و چنت إضغط على ايديني بجيوبي حيل من التوتر وقررت اكسر هالصمت الغريب
-شلونك؟
ابتسم إبتسامة رغم معرفتي بي چانت غامضة حيل
حك خشمه وگال
-جـاوبيني انتِ شلونـي؟
توترت من سؤاله .. احس بضغط من نظراته الباردة وحسيته مو نفسه عثمان الي أعرفه وقررت احجي السالفة وأتوقع راح يفهمني
-عثمان اني لازم اگلك شي
ميل راسه ورجع نفسه ليورة شويه وگال
-ما يحتاج
-بس لازم تسمعني...
طفر گلبي متوتر ببطني من وگف بسرعة مفاجئه وأبتسم
-خلي أضيفچ شي ما اريد اسمع اعتراض
هزيت راسي بتوتر وهو دخل من واحد من ابواب البيت وحزرت هو المطبخ
بقيت گاعده لدقايق وطلع شايل قواطي ببسي إثنين وتفاجأت من شمر ناحيتي وحده منهم وبسرعة لزمتها مندهشة
أبتسم ورفع ابهامه مثل اللايك وگال
-مثل العادة ليل لابُـد تكونين مستعدة
ما فهمت شيقصد ونزلت القوطية على الطاوله الي گدامي بصمت ووگفت
-هـاي الرسميات شيلها وتعال نحجي
تقدم مني ودفعني يوگعني بوضعية الجلوس وگعد بصفي بالضبط ورد
-لا لا يا رسمية هاي؟ خلي نعدلها اذا حسيتج برسمية بكلامي لـيل
ابتعدت عنه بمسافة وللصراحة ماعرفته
مو نفس طباع عثمان الي اعرفه
-شبيك؟ دتخوفني بتصرفاتك
-لا ليـش تخافين مني؟
حجه بعدم اهتمام ورجع ظهرة على الكنبة وميل راسه وعيونه عليَّه
بكل صدق اكو شي مختلف بي
-عثمـان
أبتسم من نطقت اسمه وحجه
-لـيل
بقيت ارمش أحاول أفهم نبرتة المختلفة وهو كمل يتقرب من وجهي
-ليل اسود انتِ ، سوداوية مثل اسمج
رفعت حواجبي من كلامه الي صدمني واستغربت
-شتقصد؟
-تعرفين قصدي زين
-عثمان شبيك؟ مدا اعرف شدا تحجي
وگف ووگفت هم مبتعده عنه بس تصنمت من شفته يشمر القوطية الي
بيدة حيل بالحايط وحجه بعصبيه
-ليل شتحسين هسه؟
-عثمان أنتَ صاحي؟
الي صار بعدها صدمني وتجمدت بمكاني ارجف من تقرب مني وعلى وجهه نظرة شخص فاقد احساسه ووعيه وتقرب مني بسرعة بطريقة مخله وقريبه حيل يبوسني وهو يطوقني ما اگدر اتحرك حاولت ادفعه بس هو جامد ميتحرك وما تركني واختنگت
وجنت ادفر بي حتى يتزحزح بس ما بعد لحد ما هو راد يبعد ، وطوق وجهي وتقرب يحجي
-ليالي.. ما أحس بشي تجاهج
جنت ارجف حيل وگلبي حيطلع من رهبة الموقف والخوف متملكني حيل
ماتوقعت ولا واحد بالميه يبدر هيج تصرف من عثمان
دفعته عني حيل ورفعت ايدي أريد أضربه بس لزمها حيل وگال
-من هسه اني أتصرف حسب الي احسه مناسب ليالي
-مناسب؟؟؟؟ تصرفك القذر هذا وتقربك مني مناسب؟؟؟ أصحى على نفسك يا حقير
أبتسم بوجهي وسحبني قريبه منه واني متعجبه من تصرفاته
وتغييره وتوني أكتشفت قوته.. ماجان يتزحزح ابدًا
-لاتخافين ليالي .. راح يتغير كل شي
-شبيك شنو هالحجي أصحى
تعجبت من رفع ايدة قاطع كلامي وحجه بنبرة أمر
-ليالي أطلعي برة
رفعت عيوني متصنمه من نبرتة .. وما چان يگول ليل كالعاده
ما اعرف ليش تأثرت
-نعم؟؟؟؟
-جنت اريد اتأكد من شي وتأكدت
ما مستوعبه شيگول بقيت صافنه عليَّه شيحجي هذا؟ ابتعدت ليورة
وحاجيته
-عثمان بالله عليك صاحي؟
هز راسه مبتسم ابتسامة مبهمه
-اهلج هسه يقلقون عليج
مدا استوعب شيصير وياه بس هزيت رأسي وبسرعة طلعت من المكان
أتنفس بعمق وما مستوعبه هذا الصار شنو؟
بـ شنو يفكر عثمان؟
بسرعة نزلت من كامل المبنى ورحت لسيارتي وأول ما دخلتها وصلني
مسج منه
- مشتاقتلي؟ أشوف الشغف بعيونـج
بسرعة التفتت ما شفته ورديت عليَّه
-تحلم عثمان
ثواني ورجع رد
-احلامي كلها تتحقق، بالمناسبة حبيت الموستنج بس لونها ما ناسبج
-مو انتَ تقرر عثمان
-منا ورايح محد غيري ياخذ القرارات .. يالله روحي ولا تسوقين سريع اخاف عليج
مارديت وحركت بسرعه عناد بي
وبالطريق اتصلت امي عليَّه
-ليالي وينج؟
-جايه بالطريق ليش؟
-أمنية: اهل عثمان رجعوا لبيتهم هنا
-شنو؟ يمته؟؟
-امنية: هسه جاي ينقلون بغراضهم صلاوات يگولون عثمان طالع اليوم ورجعوا الله يفرحهم يارب
-امين ماما
سديته ووصلت بعد لحظات للبيت وخابرت عماد
الي جاوبني بعد ثالث رنه
-عماد: ها ليالي؟
-شصار وياك؟
-عماد: إتصل عليَّه وگال ماراح يروح اليوم
-اممم شلون؟
-عماد: ما أعرف، دزيتلج رساله من گلي بس ما شفتيها
-اي جنت ممنتبهه يالله لعد اعوفك براحتك
-عماد: الله وياج
دخلت للبيت بعد ما باوعت لبيتهم الي جانت الاضواء طافيه بي
وبوجهي طلع بابا الي من شافني حجه بسرعة
-فضل: ها ليالي وين جنتي؟
-ليش؟
-فضل: شفتيه؟
تنهدت وحجيت
-واذا شفته؟
-فضل: ليالي
-بابا مستوعب بسببك انظلم هو؟ وتريدني ما اشوفه؟
-فضل: لا يأذيج ليالي
-ميأذيني صدك أعرفه ولا تعترض رجاءً بابا
راد يحجي شي بس سكت وهز راسه
-فضل: الي تشوفينه
دخلنا ليجوه وشفت امي صابه الاكل وگعدت اكل
واحاول اتناسه كل شي
-
مر شهر ونص وعثمان ما مبين
حتى اهله ما يعرفون اخبارة وهو ما وصللهم اخبارة وحذرني انطي رقمه لأحد او اگللهم على مكانه واني بالفعل ما دخلت نفسي بشي
طلعت من الباب وتلگتني ميان تريد تصعد السيارة وگدامها عماد
الي انتقل لهنا هم وياهم
اخوه رائد وره ما طلع حكم عثمان رجع للبنان لأن عنده التزامات بس يجي
كل مدة يشوفهم بالعطل الجبيرة
أحس صاير عدهم تشتت شويه بالعائلة
حجت ميان بأبتسامه تخاطبني
-ميان: هلا لولو
-ولج اهلي عافوا هالدلع وانتِ لسه تصيحيني بي؟
-ميان: حلو شسوي؟
-اسكتي، هلا عماد شلونك؟
ابتسم ورد عليّه
-عماد: هلا ليالي
-ميان: والله اسمج طويل .. خلي نصيحلج ليل على كلام عثمان
-ما احب.. احب اسمي بدون اي دلع
-ميان: بكيفج ، وين ترحين؟
-موعد مع صديقتي
قلصت عيونها ورفعت حواجبها وحجت مزعوجه
-ميان: هااا تخونيني؟ طلعات من وراي؟؟
تضحكت على ملامحها المزعوجه
-المرة الجايه نطلع بس اني وانتِ شرايج؟
-ميان: تم ، يالله عميدي ما بقى وقت
-يمشي بأحشائكم التدليع مال الاسماء؟
-عماد: تربية عثمان عاد يحب يطلع دلع ما مطروق ويسمي بي عود خاص
ابتسمت بدون جواب.. كُل اسئلتي جوابها عثمان
-عماد: يالله من رخصتج طالعين نوصل هاي لشغلها
-الله وياكم
وراح كل شخص لوجهه غير
وصلت بعد فترة لمكان اللقاء وجان بواحد من المولات وشفتها تنتظرني بالكراج واول مانزلت سلمنا وحضنتني وبكل فرح كالت
-يالله ليالي تأخرتي
-شبيج سمر؟ هيه هديه على اساس حيدر راح يهتم حيل بس شوفتج تهمه
-سمر: متعرفين سوالف الحبايب داده انتِ سنگل
-هههههههههه خوش بوري طاحضج
سمر تصير خطيبة حيدر الي سولفتلكم عنها وأجلوا زواجههم للمرة الالف
لان قررت هيه يصير بالصيف وهو ما اعترض بالعكس عنده هواي اشغال
ووافقها وقرروا يأجلونه ،
وحده بشوشه ولطيفه وتخبل
صعدنا سويه للمول وبدت الرحله للبحث عن هديه عيد ميلاد الحب مالها
تريد شي نادر وحلو
ودي احجي واكللها حيدر ما راح يهتم لهالسوالف بس ماتقتنع
وبعد فرة ساعات وماتت رجليناتنا لگت ساعة وسبحه وقرآن مطرز بأسمه اخذتهم فرحانه
-سمر: شوفي شلون التفاصيل تهم؟
-ديلا متت تعب اشتعل شيب حيدر
-سمر: لتغلطين ما عاش الي يغلط على سيد الاحباب
-متأثرة زياده انتِ
-سمر: عايشه اللحظة مو؟
-حيل
-سمر: الله يرزقج يارب شخص تحبينه حب مو معقول وماترضين عليَّه شي
وتريدين بس تفرحينه
-ايع
-سمر: ايع مو؟ والله اذكرج واتشمت بيج ونشوف
رجعنه ودخلنه مطعم ناكل وكلامها مدري ليش بقى بذاكرتي
وما اجه غير عثمان على بالي
أكلت وياها وطلعنا جانت ترتب لعيد ميلاده الي بعد مده وحالفه تسوي
حفل جبير والي يحمسني روحها المرحه وشگد بيها طاقة عكس
حيدر مرات بكون جدي زيادة واختلافهم يعجبني
ودعنا بعض ورجعت للبيت لگيت امي كاعده تخابر برسل وتسألها
عن بنوتتها وگالت راح تمرنا بالليل وسدته بعد مكالمه شطولها
شويه ودخل بابا وحجه
-فضل: معزومين لطهور ابن مجتبى باجر كلكم
-أمنية: والله لو مو فشله فلا رحت
-فضل: بس وجبي عليهم انتِ وليالي وارجعن لا تطولن
-امنية: صار
-واني شكو اروح ؟
-فضل: لإن اذا مارحتي راح يظنونچ ضعيفة ، روحي واكسري توقعاتهم
هزيت راسي بعدم معرفه وماعندي رغبه حتى اروح
بس ما حجيت شي وصعدت فوك ابدل
غيرت وگعدت أتصفح موبايلي واجاني مسج من رقم عثمان الي للآن ما سميته
وبقى بس رقم نهايته صفر
-گـاعده؟
بقيت اباوع للمسج بدون رد ورجع دز رسالة
-راح إتصل
بالفعل اتصل ومارديت
بعدها فصل وبسرعة حطيت وضع طيران وبقيت اباوع بالبرامج ما مهتمه بس رجع دز رسالة بالواتس
-لـيالي ترا اجيج
-أحلف ؟ خوفتني حيل ورجفت
-أحسن خافي
-صدكت اخاف منك؟ تخسي
-ارجفج كلج أگدر
-فكاهي صاير
-أسمعي.. باچر تعالي لشقتي
عدلت گعدتي مزعوجه وأتصلت عليه وانهديت بي
-لشقتك؟ لا خاف متقبل؟
سمعت صوت ضحكته وتعجبت.. من زمان ما سمعتها
حجه يرد على كلامي بهدوء
-مشتاق لصوتج من تتهاوشين
-لتصير مزعج وكلامك كله مو صح
-ليش؟ شمدريج؟
-يا شمدريني؟ اعرفك مو نفسك الي جنت اعرفه
-بدون لغوه زايدة تعالي لشقتي
-لتأمرني ترا اندمك والله عثمان .. هواي اشياء متعرف عنها واذا عرفت تتندم منطيتك فرصه تسمعني واذا تعدت تصرفاتك الحدود مستحيل تسمعها واطردك من حياتي كلها
ثوانِ صمت مرت بعدها سمعت صوت ضحكته بس جانت باردة وعبالك يضحك جذب بعدها گال بنبرة حاده
-حياتج صارت حياتي ليالي ومستحيل اطلع منها إلا اعيشج نفس شعوري ونفس غدرتج .. احب اخذ الموضوع على كيف واطبخه بنار هادية وتعرفيني طباخ شاطر
-لتخليني اكرهك أكثر
-راح تحـبيني
-تحلم
-تعالي باجر
-مستحيل
سديت الاتصال مزعوجه من نبرته الي تغيرت وتصرفاته كلها تغيرت
عثمان من يمته هيج؟
دزلي مسج مطلعني من دوامة تفكيري
-اذا ما اجيتي اني راح اجي
مارديت عليه وطفيت النت وتمددت بجربايتي انام
-
ثاني يوم
جنت لابسه فستان بسيط بس فخم ومرتبه نفسي الدنيا المغرب والعزيمه صارت
بالعشه قررت ماما تاخذني بس وگالت لرسل لتروح وبالفعل رسل
مجانت تريد تروح لأن تكرههم
دخلت لبيتهم ووياي امي وشفت اغلب گرايبنا موجودين من طرف ابوي
صار سلام سريع ودخلنا بالاستقبال نگعد وناس تسأل عن ناس
شفت نرجس تدخل من الباب تضيف الكل ومن وصلت لمكاني حجت
بنبرة مليانه سميّه
-نرجس: ليالي شعجب جايه
-عزمتونا وواجبنا نوجب العزيمه لو متعرفين؟
-نرجس: اها، بشريني ما انخطبتي ؟
-لا انتظر قبولي بوظيفتي وانتِ ليش ماتبشريني أول مو اكبر مني؟ يمته تتزوجين؟
شفتها تتنقل بنظراتها على الكل محروجه واني ماعجبني الوضع للصراحة بس تستاهل لان السالفة هي بدتها وباوعتلي بكره وگالت
-نرجس: انتظر ولد حلال مو اخذ ياهو الجان
-عفية والله لعد كل الممتزوجات هم يفكرن هيج لتستعجلين على رزقج
عافتني وطلعت ووره شويه دخلت وهيه گايدة ايد دعاء الشفيه الي عبالك
كاتله ابنها بس تخوزر جنها نعجه .. شگد ما اطيق نفاقهم من اكبر واحد لاصغره
بس عناد اجيت
سلمت دعاء على الكل وما سلمت عليه فعلًا ضحكت على الغباء
الي شايلته عبالها تزعجني؟ بقيت گاعده اشرب جاي ومامهتمه شويه ودخل
الشفيه الجبير مالتهم مجتبى وهو حاط ابنه على گلبه ويسلم على النسوان
باوعلي وابتسم وگال
-هلا ليالي شلونج؟
-الحمدلله
-صايرة متبينين شعجب؟
-اشغال مافارغة
-مجتبى: مري مشتاقين
شفت دعاء فحمت وردت اغمه للاغبر يعني شگد هيلك ومايستحي
امي ردت عليه بدالي
-امنية: قدمت على وظيفة ومنتظرة قبولها ومافارغه تمر وتتونس
هز راسه مبتسم لامي بدون كلام وحجت دعاء
-دعاء: يالله حبيبي تعال صعد نوسي فوك ليتمرض
صعد ليفوك وهيه وراه عود قويه وكذا شكد سخيفه
بعدها اتصل موبايلي وسط كوم النسوان وتفاجأت من جان عثمان!
نزلت الموبايل أسوي صامت ولهيت نفسي بس اهتز بحضني على اشعارات
واحد وره الثاني ورفعته اشوفه كاتب
-اطلعي من بيت هالسگط
-اني يم بيتكم
-عشر دقايق اذا ماطلعتي ادخل لبيتكم
تفاجأت بكلامه وباوعت لأمي وگلتلها
-اريد ارجع مليت
-امنية : اصبري العشه راح يصبونه اكلي وارجعي
-ما اريد لازم اروح صديقتي تريد تخابرني
-امنية: شيگولون عليج اذا طلعتي هسه؟ خلي العشه يجي وشويه واطلعي
بقيت گاعده بهدوء وبداخلي متوتره خاف صدك يدخل لبيتنا وتصير مشكله
مرت عشرين دقيقه بين ما جابوا الاكل وبسرعة اكلت لگمتين وطلعت
جان الباب الي بيناتنا أحنه وبيت عمي ماهوه
من رجع بابا غير البناء ورجع سوه البيت اول شي وخر الباب وصار
ما عدنا بس بابين خارجي وبالخلفيه بس وهذا احسن قرار صار
طلعت ودخلت بيتنا بسرعة اباوع بكل مكان جان بيتنا فارغ والباب مسدود
تنهدت براحه لان عرفته ما هوه وجذب عليه وقبل لا إطلع من المكان
تصنمت من حسيت بظل وراي بالحديقه
قبل لا التفت حسيت بإيدين تطوقني من ورة وقبل لا اصيح انمدت ايد تكمم حلگي
وسمعت همساته
-بس الحايط يفصلنا عن مجموعة اشخاص تريدين يجون ويشوفون منظرنا؟
بالفعل جان بس حايط يفصل عن حايط عمامي وحديقتهم الي مليانه زلم
حاولت ابتعد بس بقى مطوقني حيل وحجيت اصيح بي بهمس
-شنو تسوي انتَ تخبلت؟ عوفني
همس بوسط شعري من ورة
-انجنيت من وراج
گلبي جان راح يوگف من گد ما هوه قريب مني
ما متعودة على قُربه جنت اتلاوة بأيدة وما گدرت انسحب منه لحد ما حسيته
يسحب شعري وحجه بهدوء
-مو گلتلج عندج بس 10 دقايق ؟
-عوفني عثمان تصرفاتك عيب شبيك!!
لفني لحتى اصير مقابيله وشفته .. كل مره اشوفه أحس بمغص
حط ايدة على وجهي وگال
-بردانه؟
-وخر
-ما اريد
رفعت رجلي اريد ادفرة بس تصلبت من بسرعة لزمها وگال
-فكري قبل لتتصرفين هيج.. ليل
-مستوعب شلون انتَ متقرب مني؟؟
تقرب مني حيل لدرجه عبالك راح نتحاضن بس نزل راسه مبتسم
وگال بنبرة متلاعبة
-اسمـع گلبج ينبضلي لهنـا
حسيت بحرج مو طبيعي من نبرته الواثقه وغضب من نفسي
ومنه وصحت بدون وعي
-عثماااان وخر
تفاجأ من صحت واني نفسي ردت ارگع راسي بالحايط لان سمعت
اصوات تتقرب من الحايط وبسرعة سحبني بجهة الحديقة
الخلفيه بعيدًا عن الانظار وگال
-بلاء اذا شافوج بحضني شيگولون؟
-خايف وانتَ ساس البلا؟
-ماعندي مانع يشوفونا صدگي
گدرت ابتعد عنه من تحركنا بس بقيت واگفه شويه بعيد
عنه وگلت بملل
-أطلع ما اريد احد يشوفك
-ليش؟ تغـارين عليَّه؟
رفعت حواجبي من ثقته وهزيت ايدي
-وأثق زيادة
تقرب مني بس ابتعدت بتوتر لحد ما حسيت بالسياج يطخ
بظهري وصرت متحاصره منه
-ليش تبتعدين؟ تخافين؟
-مستحيل اخاف ومنك خصوصًا
أرتفعت شفايفة بأبتسامه واثقه حيل وحسيت وراها الف معنى
-من اكلج مره ثانيه تعالي للشقة تجين لا اعيدها واجيج لهنـا
-ما أهتم وما راح اجي تحلم تستفرد بيه
ضحك وحجه بشقه خبيث
-تخافين أعيد عليچ الصار؟
حسيت باحراج ما من بعده أحراج وخصوصًا من جان واثق
ولا كأنهُ هو الي سوه الي سواه
-أشگ حلگك حتى
مد ايدة يعدل گذلتي وحجه بهدوء
-تحضري للي حيصير .. عندج فرصه بس
قبل لا أسأل عن السالفة هو تحرك للباب الخلفي وفتحه وقبل لا يطلع
باوعلي مبتسم وگال
-تصبحين على خير يا سوداويه
طلع واني اخذتها ركضه للبيت ولغرفتي تحديدًا وشمرت نفسي على الجرباية
انتفس بصوت عالي وبراحه بعد ضغط طويل
ريحته بملابسي لزگت .. كالعادة رغم بساطتها بس ما إلها مثيل
كل ما اشتمها أحس باللي صار واتذكره
شنو الي حول صداقتنا لهالمشاعر المضطربة ؟
معقوله أحس بهالتوتر تجاهه؟
نزعت الجاكيت مالتي وحضنته جان بي ريحته
معقوله بس ريحته تأثر عليَّ!
بوسط توتر مديت ايدي احطها على مكان گلبي وانصدمت بگد نبضاته
شي ما لازم يصير.. شي غلط!
لفلفت نفسي بالبطانيه ونمت بوسط أضطرابات اول مره أحس بيها
-
غيرت ملابسي وطلعت أتوجه لمكان شغلي الجديد
واخيرًا !!
دخلتها وكلي فرح وحماس لشغلي ووظيفتي الجديده واندفعت بشغف
وبالفعل جانت شركه ضخمة واكو حوالي 100 متدرب
حديد بقسم الاعلام والصحافة وبدينا من
اول يوم تعليم عن القوانين ووزعونا كل مجموعة بمكتب
جان الشغل صعب للصراحه وخصوصًا احنا مبتدئين بس لازم الشغل
يطلع مثالي
تعرفت على بنتين وشاب بنفس المكتب وبدينا نشتغل سوه
جان وقت الدوام من الثمانية الصبح لحد ال2 الظهر ومليان شغل مر اول 3 ايام هدوء .. من الشغل للبيت ومن البيت للشغل
الساعة 11 الظهر اندك باب المكتب ودخلت موضفة الاستقبال بالشركه
جان اسمها نوره ، گالت مبتسمة
-نوره: منو الي بيكم اسمها ليالي؟
باوعتلها بأستغراب وحجيت
-اني ليش؟
تقربت وبيدها بوكيه ورد جبير ولونه ازرق
وحجت بفرح
-نوره: اوي فدوه شلون لوكيه يخبل هذا اجاج مع مندوب من الحب مالج
وگفن البنات متعجبات يشوفنه جان حيل حلو واني نفسي متعجبه بس
الاستغراب ماليني
-من منو؟ شو انطيني الكرت الي وياه
تقربت واخذته منها وشفت سطرين مكتوبات
-اتمنى ماتتعبين نفسج ، كل ماتشوفين الورد تذكريني "خطيبج"
وحده من الموظفات حجت وهيه تطفر بحماس
-الله فددد رومااانتك هذا هنيالج عمي
-ايي ولج شوفي شوفي الله يرزقنا
بقيت صافنه عليهن ما مستوعبه بس اجه ببالي الحقير مجتبى
اكيد هالحركه من عنده
عفتهن وطلعت شايله الكارت ورحت لقائمة الحظر وفتحتها بكل انزعاج
واتصلت عليه مرتين بعدها جاوب
-مجتبى: الو؟
-انتَ يمته تبطل سوالفك؟؟
-مجتبى: ليالي؟ شعجب متصلة عليه؟
-لتغشم روحك واثگل شويه شكد مكروه وماعندك كرامه؟
شكم مره رفضتك؟؟؟ ليش ماتفك ياخه عني؟
ياخي اكرررهك ولي ولتضايقني!!
حسيت كل الضغط اللي جان محاصرني طلع مع رزالتي
وعليت صوتي عليه لحد ما حجه بغضب
-مجتبى: منو ميت عليج انتِ؟
-حركاتك بطلها
-مجتبى: ياحركات هاي؟
-ولي من وجهي اذا شفتك الله شاهد ادوس ببطنك شگد سز
سديته بوجهه وحضرته ورجعت للمكتب واخذت البوكيه
وفتحت الزباله وشمرته بيها تحت انظار
البنات المتعجبه .. وگفت وحده وگالت
-شبيج حبي ؟
-باعي دنيا اي رساله او هديه تجيني للمكتب ذبيها لان لا اني عندي
خطيب ولا حبيب هذا شخص مايستحي على دمه ويلحك وراي
ماشي؟ وبطريقج بلغي نوره
-دنيا: ماشي عمري بس اخذي نفس خلي يولي
فركت راسي لان حسيت صار يوجعني من العصبية
ورجعت اشتغل بدون ميروح المكان من بالي
رجعت بعد كم ساعه للبيت وتغديت ونمت
واول ما گعدت شفت شي ياريت ما شفته بحياتي
✤———————————————✤
يتبع
مشتاقتلكم والله وشكرًا لتفهمكم مرضي 💛🥹
توقعاتكم؟
آرائكم ؟
احبكم
دُمتم بِوّد ✨