#مراس_الدعجاء
للكاتبة: هدهد 💛
لاتنسون التصويت والمتابعة للحساب وتعليقاتكم الي احبهم حيل ✨💛
والروح أجتي مسودنه ،
وأشبگها وي روحك شبگ
لا تبچي أطيح وي الدمع
والروح أسويها نفس ..
ومناشغ أشهگها شهگ ،
وبريتك يا ريتي ..
لمن أصيرلك نفس ،
لا أخنگك ولا أختنگ
- جبار رشيد
✤———————————————✤
سحبت موبايلي وشفت المتصل محمد! محمد المختفي صار فترة طويله ، بسرعة
فتحت خط وحطيته على اذني وحجيت
- الو؟
حجه بنبرة غريبه وتعجبت كُل العجب من نبرته
-محمد: لياا.. ليالي
عدلت گعدتي وسألته
-محمد؟ شبيك؟؟ صاير شي؟
-محمد: أسف
-دحجيلي شكو؟ شبيك؟
-محمد: هو السبب والله
-هاي شبيك شدا تحجي؟ شصاير؟ شبي صوتك؟ تبجي؟
خنس گلبي مفزوعة من صوت طگطگه يمه وعبالك يمشي وأكو صوت خطوات، حجيت بهدوء احاول أركز
-أنت وين حاچيني؟
-محمد: مريممم ولچ ضحكت عليّه
صفنت أحاول أفهم ؟ مريم؟؟؟ شجابها للسالفة هسه شصاير؟ مو عود انخطبت وتخرجت من زمان؟؟
-مريم شسوت؟ شدتحچي؟
-محمد: خلتني وراحت
- خلي تولي متستاهلك
-محمد: احبها
- خلي اجيك هسه؟
-محمد: ما تندليني
-ليش؟ بس گلي عنوانك
-محمد: ههه اني يم بيتها .. الخاينه الي عافتني واني صغير
ما فهمت شيقصد .. شنو هالحاله الي هو بيها؟ معقول مريم؟
-يم مريم؟؟
-محمد: هههههههههه لااااااا يم امي
-امك؟
ما أستوعبت شنو يحجي .. جان حجيه ملخبط ويشاهك عبالك مختنك
-وين امك؟
-محمد: ببيتها
-وين بيتها؟ دحجي شبيك؟
-محمد: بالكوت
-شنو؟ محمد شارب شي؟ مو طبيعي تحجي ؟
بقى ساكت شويه وبعدها انسد الخط حاولت إتصل مرة ومرتين بس ما يجاوب
اكيد بي شي مو معقوله ؟ محمد عمرة ما تصرف هيج تصرفات بس شبي هسه؟
قررت اخابر عماد لأن عرفت هو صديق محمد .. العجيب بالموضوع أكتشفت من صار حادث عماد هو عاف كل أصدقاءه وانعزل عن الجميع
إتصلت عليه بقى دقايق يالله جاوب وبعد سلام حجيت
-عماد تعرف محمد وين هسه؟
-عماد: محمد ؟ لا صار فترة ما مبين
-خابرني مدري شبي يحجي مخربط
-عماد: شلون؟
-يگلي اني يم امي بالكوت !
-عماد: امه!! بس الي اعرفه امه متزوجه شخص بعيد بغير محافظه ومحمد مستقر ببغداد هنا وما يتواصل وياها شصاير ؟
-ما اعرف ومدري شبي حالته مو طبيعيه
-عماد: شلون؟
-عبالك.. عبالك شارب شي لان يخربط ومدري شيحجي
-عماد: محمد يشرب؟ مستحيل!!
-والله اجيت احجي وياك لان مدا اعرف شبي يعتذر ومدري شيحجي
-عماد: يعتذر؟؟؟
-هو مو صاحي والله
-عماد: اكيد گلج يم امي اني؟
-اي والله وگال بالكوت
-عماد: راح اسأل عنه اني لتقلقين
-ماشي مشكور
-عماد: ولو مو بيناتنا ، صح اگلچ؟
-گلي شنو؟
-عماد: سمعتي شي؟
-شي؟ مثل شنو؟
-عماد: ها؟ لا ولا شي
-احجي اذا صاير شي عماد!
-عماد: لا تطمني والله ماكو شي
-ماشي يالله براحتك
-عماد: الله وياج
سديته وبنفس الوقت إتصلت وحدة من صديقاتي علية .. جاوبت بسرعة لان تذكرت موضوع جنت ناسيته
-نيران: هلا حبيبي شكو ماكو؟
- عمري نسيتج والله شصار ؟
-نيران: لا حبيبي عادي ، على سالفة الوظيفة عندي الج شي يمكن يفيدج مبدئيًا
- شنو هو؟
-نيران: اكو شركة معروفة تريد متدربين بعد شهر ينفتح التقديم عليها حضري السيفي مالتچ لان الفرص نادرة بيها
-زين موثوقه الشغله؟
-كُلش تفيدج واگلج حرفيًا فرصه ماتتعوض وخصوصًا تخصصچ صحافة
-حبيبي شكرًا تعبتج حيل
-نيران: تدللين حبيبتي ولو
-ابوسج
سديته أفكر بالموضوع وتناسيت موضوع محمد فترة
-
نزلت اتعشه بعد ما صاحوني وجنت اتثاوب منعسه هالفترة نومي كلش مخربط قليل وعندي ارق .. دخلت للصالة شفت حاطين الاكل وكلها گاعده ..
-امنية: غسلي ايدينج وتعالي ماما
-غسلت
گعدت اشوف علوش يضحك وهو يدفر بحسنين ويلعب مع حيدر وابوي كل شويه يصيح بيهم
-فضل: هتليه نعمة الله گدامكم كافي
لحد ما گعدت امي وصاحت بيهم خنستنا كلنا وبدينه ناكل، وسط مناقشات العائله وسوالف متخلص أنتبهت لبابا كل شويه ينطيني نظرات ما عرفت شنو مغزاها بس من گمت اغسل صار هو گدامي وحجه
-فضل: ها بابا شلونج؟
-زينه
بقيت ساكتة وهو يغسل گدامي من المغسلة ومن خلص تعديته وغسلت بس هو بقه مستند على الحايط وبصفه عكازته وحجه
-شلونج هاليومين؟
-زينه شلوني؟ ماطلعت من البيت حتى
-اها خوش
نشفت ايدي مستغربه ورجعت لغرفتي ابدل بعدها رجعت نزلت واني مبدله وشفتهم گاعدين يشربون جاب وحجيت
-بابا حطلع مع صديقاتي مشوار
-فضل: بهالليل؟ وين؟
-عيد ميلاد وحدة من صديقاتي بمطعم محتفلات
-فضل: أكيد
عقجت حواجبي من تدقيقه
-أكيد من يمته مجذبه بالموضوع اني؟
-فضل: ها لا براحتج
لبست حذائي وطلعت أحرك سيارتي ووصلت لبيت صديقتي نيران اللي تعرفت عليها هي وبقيه الشلة المكونه من 4 صديقات من سنتين والحمد لله كسبت صديقات ما يتعوضون ، اول ما وصلت رمشت عليها ونزلت بسرعة تصعد وحجت
-نيران: عشت حبيبي انتَ وسيارتك الصاكه
-تدلل قلبي.
-نيران: شنو جبتيلها هديه؟
-ما جبت تصدگين؟
-نيران: عزة بعينج انزلي انزلي يم احد يبيع ورد وجيبيلها بوكيه ورد حلوه
-جنت عود مقرره اشتريلها على ذوقج لان ما الي هالفترة خلك لأي هديه وربج مدا استوعب شي حتى نفسي
-نيران: باعي جيبي من اي محل إكسسوار حطي وغلفي يم ابو الورد
-أوك خلي نمر لأحد المحلات بس نوصل للمول
بالفعل حركت ووصلنا واختاريت الها گلادة فضة بسيطة بس تخبل ونزلنا نغلفها واخذت بوكيه مرتب وياها وطلعنا للمطعم الي بي الحفلة .. هي وحده تعرفنا عليها وصارت صديقتنا بس مو مقربه حيل من عدنا
نزلت بعد ما صفيت السيارة ودخلنا للمطعم ولگيناها تصور وداير مدايرها كوم بنات ما گدرنا حتى نقرب منها الا بعد مدة وخلصت تصوير وتقربت تبوسنا وانطيناها الهدايا وهي فرحت حيل
-سارة: ياروحي فدوه مشكورات مجان لازم تتعبون نفسكم
-تدللين حبيبي
-نيران: ترجعينهم بعيد ميلادنا ترا لتنسين
ضحكنا على كلامها وبعدها بدت اجواء العيد ميلاد مالها وگصت الكيك وغنينا الها وخلصنا ودرت وجهي اباوع الموجودات ووگعت عيني بعين وحدة اعرفها كلش زين وأعرف شگد مشتاقه الها
چانت ليان !
وگفت أتقرب منها وهيه هم وگفت وتقابلنا وسلمنا على بعض سلام خفيف
-ليان: شلونج؟
-بهالدنيا والله
-ليان: سمعت تخرجتي؟
-اي والله هالسنه
-ليان: مشتاقين حيل لوجودج
تنهدت وابتسمت بوجهها
-اكيد كارهيني لتجامليني ليان
-ليان: لا والله الي صار صار
-وحرمتكم من اخوكم بسبب تسجيل
-ليان: اني واثقة بيج مو انتِ الي انطيتيه كدليل لان اعرف علاقتج مع عثمان زين وحتى امي وميان ما ماخذات على خاطرهن منج
-الي صار اذاكم حيل مستحيل أسامح نفسي
-ليان: مو انتِ الي انطيتي التسجيل للشرطة صح؟
-شنو الفرق؟
-ليان: واثقة مو انتِ ويفرق هواي والله
استحيت من لطفها وياي وحجيت أضيع السالفة
-شلونه؟
باوعتلي وزفرت نفس زعلانه من حاله
واني حتى ما اگدر اتخيل الوضع الي بي وحالته بوسط السجون
-اكيد مو زين بالسجن سؤالي تافه
-ليان: ماتعرفين شصار؟
قبل لا احجي وارد عليها التفتنا بسرعة لصياح وشفنا شخص يدخل من بوابه المطعم ويسحل وحده ومن البنات الي موجودات بحفل العيد ميلاد وانصدمنا حيل من جان يغلط وكلها ساكته
- يا ادبسز دايحه بنصاص الليالي بالمطاعم تفرفرين مو؟ عبالج ما وراج زمال يكضج مكيفه؟ اليوم اربيج من جديد
-عوفففني وخررر هددد شعررري
لزمتني ليال من ايدي لان حست بيه اريد اتحرك
ليان: لتتدخلين خابري الشرطة بس ولج هذا همجي ليأذيج
-خلي يولي اني اعلمه
محد حاول يتدخل بس واحد من الامنيه اجه وطلب منهم يتهاوشون برك لان يسببون ازعاج! الموقف صعب وتخيلت نفسي مكانها وتقدمت بسرعة اسحبها من ايدة لان هانها بما فية الكفايه بس لزمتني ليان
-ليالي: شگد قليل تربيه من تهينها گدام الناس؟ حتى لو تقربلك اختك مدري مرتك شخليت للغربه وانتَ تضربها گدام اليسوه والي ما يسوه؟
جان منفعل وصاح بوجهي
-لتتدخلين انتِ ووخررري عنها يله
-ليالي: عود رجوله من تصايح وتنابح مثل الجلب بنص هالناس؟ رجوله تفرض نفسك عليها وتضربها؟
-احتررمي نفسج *** والزمي حدودج
-ليالي: اني من الاساس محترمة نفسي بس انتَ دايس على نفسك وساحلها بالرجلين وتصايح والفاظك مال الشوارع مو مال احترام
شفت البنت تشد على كتفي وتهمس وهي تبجي
-هذا ميخاف من احد ليضربج حبابه اسكتي
-ليالي: لتخافين هيج اشكال ينسحلون سحل هسه بس تجي الشرطة
رفعت موبايلي اتصل على بابا وأول ما حطيته على اذني تفاجأت من اجه يعت بأيدي ويشمر الموبايل بالگاع ويفلشه وصاح
-تخوفيني بالشرطة؟ ادوس عليج وعليهم ماشي؟
-ليالي: تدوس عليهم مو؟ هههههههههه لعد ليش ترجف وضربت الموبايل مو حتى ما اخابرهم؟
تقرب بسرعة الي بالامنيه وحجه ويانه
-رجاءًا بدون مشاكل اطلعوا بره كلكم
واشوفلك الجلب هذا الي يطافر يهجم على الحجي الي يشتغل بالأمن ويضربه يوگعه بالگاع وصاح
-تطردونيييي؟ تعرفون اني منو؟ اشتريكم كلكم حيوانات
-ليالي: محد حيوان غيرك يا وصخ يا عديم رجوله
تقرب مني بسرعة والبنت سحبتني ووگفت گدامي وصاحت
-عووووفهاااا يا حقير فشلتني يا زمال بس بيك تضرب ليش اريد اتطلك منك بسبب حقارتك وهمجيتك الي مثل الحيوانات تمشي وتضرب
-لج بنت ال*** انعل والد والديج اليوم
تقرب وبده يضرب بيها وللاسف المطعم مابي هواي جانوا واغلبها نسوان خايفات منه وعمال المطعم بسرعة دخلوا سوو نفسهم مايشوفون شي وهو مستمر يدافر بيها ، تقربت منه ونزعت حذائي وبالكعب على راسه خليته يصيح بمكانه
-ياهمجي وخر عنها بسرعة
-لج بنت ال*** شلون تضربيني؟
جان يريد يتقرب مني بس البنت الي واگعه بالگاع لزمت برجله متخليه يتقرب وتوالاها ضرب وسب واخر شي صار من شفته يسحب بطل گزاز من الطاوله ويريد يهفه على راسها بس مدري شلون تحركت بسرعة وحضنتها وحسيت بشي يتفلش على راسي وصياح البنات اخر شي سمعته
-
گعدت وأحس بصداع يهتك راسي هتك وريحة معقمات واثوات عالية تثقب اذاني
حطيت ايدي على راسي وحجيت بصوت مبحوح
-نصوو صوتكم راسسسسي
حسيت ايد دافيه تنحط على راسي وكلام انحچه يهديني
-على كيفج لتضغطين على راسچ حبيبتي
فتحت عيوني ونظراتي چانت متشوشه بس ثبتت على وجه حيدر الي ابتسم الي يطمنني
-حيدر: شلون صرتي؟ خو ميوجعج شي؟
هزيت راسي لا وگلت
-راسي حيدر راح ينفجر منو يحچي هيج؟ سكتهم
-حيدر: هاي بسبب الضربه اللي اخذتيها عندج صداع وتحسس من الاصوات رغم خفيفه وتجي من برة الغرفة
-شصارلي؟
-حيدر: طلعتي مسوية روحچ سوبر مان وعالسينچ بالمستشفى هسه
ضحكت على تصنيفه رغم وجعي وحجيت
-لا صدك؟
-حيدر: الثولة شكم مرة اكلج لتتعاركين اذا رجال اكبر منج وهمجي هيج؟ لچ الاغبر شارد من واگعه وحتى مرته مدخلينها للمستشفى وهسه ابوي متحلف عليج بعد متطلعين
-هم مريضه وهم تعاقبون بيه؟ صدك بلا إحساس
-حيدر: يرادلج ندخلج دورة تدريبية حتى تعرفين تدافعين عن نفسج لان مو طبيعي كل عركه توگعين بيها هيج؟ شگد فشله
-أنجب
-حيدر: هاي عليمن؟
-عليك ولا على المريض حرج
ضحك وتقدم يبعد المغذي ويسد مكان الكانونه اللي خلصت وحجه
-حيدر: تگدرين توگفين؟
رفعت نفسي اضغط عليها حيل بس عبالك اكو طلقة بنص جمجمتي من الوجع واول ما حطيت رجليني على الگاع خرطت العافية وتسرسحت بالگاع بس همزين لزمني يرجعني على الجربايه
-حيدر: الضربة سببتلچ 4 خياطات لذلك تحسين بضغط بمؤخرة راسج والدوخة بسبب فقر الدم الي طلع حاد عندج وانطوچ ملايين الفيتامينات وكومه حديد حتى تتغذين واشوفج ما تاكلينهم ادفنج
-لا بالله ليش؟
-حيدر: يگلي الدكتور هاي شبيها متاكل؟ انطوج حديد للأبد ميخلص لحد متصير نسبة دمچ عاليه
-يوووه
-حيدر: وجعووه هيكل عضمي صايرة
-ديلا اصير عارضة ازياء
-حيدر: عارضة نعل انتِ يحطوج ستاند يعلگون بيج الملابس بالباب
-جعص الخواطر
-حيدر: انلصمي وهسه اشتريلج عصير برتقال واحط فوگه الحديد اريدج تخلصينه كله ماشي؟ صدك ليان تگول خلي تخابرني تطمني من تگعد خطيه هيه خابرتنا وبلغتنا واجت للمستشفى بس بقيتي الليل كله نايمه وتأخر الوقت ورجعت هيه وبعد وحده شعرها احمر هم بقت
-هاي نيران هسه اخابرهن بس لحظة الساعة شگد؟
-حيدر: ب3 بالليل خابريها باجر
-امي شعجب ما اجت؟ عبالك مو بنتهم جان متت وهمه محد يمي
-حيدر: انجبي الساحرة الشريرة لتاخذين غيبتهم ترا جانوا هنا بس طردوهم لأن ميصير بس مرافق واحد واني بقيت، هاي وينها جاي تتصل عليج ام صماخ متستاهلين
جاوبها وحجت وياه وطمنها وانطاني الموبايل واول ما حطيته على اذني حجت هيه
-امنية: اليوم ارجعي للبيت اعلمج منو الي مسويه روحها بطله وتنقذ بالناس
-هاي عود اني مريضه تهدديني يمه؟
-امنية: لج ادبسز لو ميته جان تدرين شسويتلج؟
-شسويتي؟ تلحگيني؟
-امنية: اسويج ليالي شوي واحطج للجلاب
-عشتي ماما الرقيقه
بقت شويه ترزل بيه وبعدها تطمنت عليه ووصتني على نفسي وسدت الموبايل وحجه حيدر
-حيدر: بالله شتحسين؟ وين اكو ثوله تشمر روحها حتى تاخذ الضربة ؟
-لعد اعوفه يكسر راسها وابقى ساكته؟
-حيدر: لاثوله جان شلتي بطل ثاني وفلشتي راسه احسن
-فد حقير ماشفت شلون عاملها وضربها عبالك يضرب برجال ومحد تدخل تخيل؟ طلعت روحي
-حيدر: عديم رجوله هذا بس نلگاه انعل جد جده
-ليش مالگيتوه؟
-حيدر: لا شارد الخنيثه بس وربچ انعل جده بس الگاه ، يالله حطلع اجيب عصير من برة المستشفى واجي
-ماشي
طلع واني دورت موبايلي بس تذكرت فلشه الحقير هذاك وتنهدت مزعوجه والصداع بدة يخف .. شويه وانفتحت الباب ودخلت ممرضه من شافتني گاعده تقربت مبتسمة وحجت
-هلو حبي شلونج؟ الحمدلله على السلامة
-الله يسلمچ
تقربت ومن شافت المحلول مخلص ذبته بالزبالة وحجت
-تحسين بشي؟
-راسي يوجعني
-عادي بسبب الخياطات لازم تاخذ فترة يوجعن بس راح يخف بعد كم ساعة ويروح ، الخياط بعد اسبوع تشيلينه ولازم قبل مترحين الصبح نحطلج محلول وريدي ثاني لذلك ارتاحي هسه
-ماشي شكرا
-العفو
طلعت واني تمددت احاول انام وبالفعل شويه ونمت وماحسيت الا والصبح يطلع واهلي بالغرفة .. فتحت عيوني وطلع بوجهي بابا الي واگف قريب مني ويسأل حيدر عني ومن شافني ابتسم وحجه
-فضل: صباح الخير ، الحمدلله على سلامتج بابا
-الله يسلمك بابا
تقربت امي وحجت
-امنية: الحمدلله على سلامتج امي اخر الاوجاع يارب
-الله يسلمج، سهله ترا شبيكم عبالك طالعه من عملية ترا هو جرح صغير
-فضل: جرح صغير وخياطات وبالمستشفى لعد لو تتعاركين صدك شيصير؟
-استشهد
ضربتني امي على ايدي وحجت
-امنية: فال الله ولا فالج ادبسز خلي اشوفج تتعاركين بعد الا احطج واموتج
تقرب مني حيدر يحط صينية اكل وبيها عصير گدامي وگال
-حيدر: اكلي اكلي لا تصير عركه صدك
اكلت وجنت ميته جوع ، جانت شوربه شكلها يشهي وحاره والعجيب طلعت طيبه حيل ووياها سموذي موز يخبل ، خلصت وانفتح الباب ودخلت الممرضة تصبح علينا وشكلت الي مغذي وحجت
-بس يخلص تگدرين تطلعين
هزيت راسي وتحركت تطلع من الغرفه واني بسرعة باوعت لحيدر وحجيت
-موبايلي ماشفته؟
-حيدر: متفلش
-الله ياخذه الحقير فلشه كون يتفلش راسه
-فضل: اطلع اشتريلها غيرة
- هو وينه؟
-حيدر: بسيارتي
- جيب شريحتي لتنساها
-حيدر: من يخلص المحلول ارجعكم واجيب الها
بقينا نص ساعة وطلعنا وأول ما رجعت للبيت عبالك طلعت من الموت ما بقى احد ما اجانه يتحمد الي بالسلامة وبابا مكيف يتباها بيه يگللهم مدافعة لوحدة وضاربه واحد ومهولين بالموضوع
بالليل گاعده بالصالة اباوع بموبايلي الجديد وتعجبت من اندك الباب وحسنين گال
-اكيد اجونا خطار على ليالي
وبسرعة امي رتبت المكان الي گاعدين بي وراحت فتحت الباب وتعجبت من دخلوا ليان وميان وامهم !!
وگفت اسلم عليهم وتحمدوا الي بالسلامة وحجينا بسطحية چانوا لطيفين لأبعد حد
-ميان: الحمد على السلامة
-ليان: متت خوف عليج من وگعتي والله الحمدلله على السلامة صدك قوية وتصديتي اله
-الله يسلمجن ، صارت بعد وما منعت روحي
-فيروز: لا تجازفين بروحك يا حبيبتي لان مو كل مرة راح تسلمي من اولاد الحرام هدول
-ان شاء الله خاله
جنت مستحيه حيل منهم وامي منطلقة بالسوالف حقها متعرف السالفة أصلًا ولا تعرف النا دخل بكل شي ، استمرت السوالف وبعدها ماطولوا نص ساعة واستأذنوا يروحون وامي اصرت بس گالت خالة
-فيروز: نعيدها ان شاء الله بالافراح وآخر الاوجاع يارب
-امنية: يوم اللي يطلع بي عثمان وينور بيتكم ونفرح بي يارب
زادت نبضات گلبي من انذكر اسمه فجأه وخالة ابتسمت
-امين يارب حبيبتي
وطلعت هيه والبنات واني بقيت ساكتة وصعدت ارتاح بفراشي ونمت
-
كاعدة كالعادة بالبيت بعد اصابتي بابا منعني اطلع هواي واني جنت احس بأنزعاج أصلًا من الباندج الي مغطي راسي وما اطلع لحد ما صار وقت فلة الخياط ورحت اني وحيدر للمستشفى وخلصنا وطلعنا وأصريت علية ينزلني بالحديقه العامة ويروح واني ارجع وحدي بس هو اصر من اريد ارجع اخابرة وراح
نزلت اتمشى واتنفس بعمق ارفه عن نفسي عبالك اريد ازيح كل همومي بس ما ينزاحن
بعد كم شهر ويطلع عثمان اللي ماشفته من سنتين؟ اني نفسي ما مستوعبه وشگد مشتاقة اله ولوجوده
گعدت على مقاعد فارغة وصفنت افكر بي وماگدرت ما اسأل عنه وفتحت موبايلي ودزيت رسالة لعماد اسأله بيها عنه وره شويه هو خابرني ورديت
-عماد: ليالي هم سامعة شي؟
-شسمع يعني؟
-شعجب تسأليني عنه اذا ما سامعة ؟
-عماد احچيلي كل شي عنه شصاير لتخوفني
تنهد وسكت مدة وتوني اريد احچي هو گال
-عماد: بالقانون السجين من اول ما ينحبس ينحسبله مع المدة مال السجن مالته تعرفين؟
صفنت استوعب كلمتة وبالفعل شلون راحت عن بالي؟ يعني طارن شهرين ونص من حكمه وشگد صار؟
-طلع عـثمان!!
سمعته ياخذ نفس ويزفرة بحسرة وگال
-عماد: لا.. عثمان قبل لا تخلص محكوميته بعدلة كم شهر ومتعارك مع سجين ثاني
-شنوو!! وشصار؟؟؟
-عماد: وبسببها حاطينه بالانفرادي وللأسف هذاك متعاون مع عصابه بالسجن و
-عماااد شداتحجي انتَ! وشصار ؟
-عماد: متهاوشين وياه وضاربينه سچين وصاير عندة تلف بالكلية
شهگت نفس حسيته بالگوه دخل ريتي وما استوعبت الصار وگفت بمكاني وصحت
-لتچذب !!!!!
-عماد: والله ما اچذب
حسيت بوجع بمكان گلبي وحتى ماگدرت ابقى واگفه وردت اوگع لو ما سندت نفسي بالكرسي وگعدت أتنفس بصوت
-عماد: شبيج انتِ زينه!!!
-احچي وشصار مابيه شي!
-عماد: هسه حالته أحسن بس
-بس؟؟؟
-عماد: إحتمال يعيدون النظر بمحاكمته بسبب العنف الي صار
-شلووون!! مو گلت همه هاجمين عليه؟
-عماد: السجن بي أشكال وألوان ليالي وأكو عصابات بكبرها بي يعني مال تطلع الحقيقة بسرعة مستحيل
-ياربي شحالته هسه وشلون صحته؟
-عماد: والله زين
-يعني هسه اكيد يرجعون يحاكموه لو لا؟
-عماد: اذا واحد من السجناء رفع عليه شكوة تصير
-واذا لا؟
-عماد: تمر عادي ويطلع بموعدة
-شديصير وياه ياربي عماد گلبي راح ينفجر فهمني شسوي شلون اشوفه وهو حتى وجهي ميريد يلمحه؟ شسوي؟
-عماد: لتضعفين ليالي اعرفج قويه وبس يطلع لتعوفينه الزگي بي وخلي الزعل يروح
-الله كريم
سديت الموبايل بعد ما ودعته ونزلت دموعي
يمكن على عثمان او يمكن على حالي ، وين قوتي اللي كلكم تحجون بيها؟ ترا اني ضعيييفة مو قويه
شحاله هسه ؟ شلون تحمل يدخل سجن والمصيبه عبالة اني السبب يمكن هسه ويكرهني هم .. شلون اذا طلع وگطع كل سبل الكلام وياه ويگطع علاقته نهائيًا وياي؟
شلون اذا كرهني ؟ مستحيل اتحمل أشوف نظرات الكره منه!!
حطيت ايديني على وجهي أنزل دموع خيبتي وزعلي وضعفي
وادعي للمستقبل يكون حلو
-
لبست بسرعة وطلعت أسوق بعجله للمكان الموعود .. لمكان موعدي مع البنات اللي فجأة تقرر ووصلت اشوفهن .. ليان وميان ونيران .. گاعدات بمطعم وگدامهن اكل
-خيااانه عيني عينك؟
-ليان: تأخرتي شنو نسويلج؟
-نيران: ماتحملنا اليوع يختي
-يوعاانه يوعااانه حتى انييي
گعدت بعد ما نزعت الكوت اعلگه على ظهر الكرسي وطلبت هم اكل وياهن وبدينه ناكل ونسولف
- اگول صدك هم سمعتن عن التقديم مال الوظايف ؟
-نيران: للان ما انقبلتي؟
-لا وين ما طلع اسمي بين المقبولين
-نيران: شوفيني صار سنتين أدور وظيفة وماشفت شي
-لچ تنقبلين اذا مو اليوم باجرلان تحليلات
-نيران: يحضي منين؟ التحليلات صايرين اكثر من العمالة
-دسكتي تصخمت ودخلت ادبي وفد متندمه ولو هو اني لو افطس ما اطلع منه لو داخله علمي بس حرفيًا فقدت كل الحماس وما الي واهس بالاعلام هالفترة
-ميان: الحمدلله خلصت وفتحت صيدلية ومرتاحه
-تتشمتين يعني؟
-ليان: ختولي حاسه بشعورجن هسه اني صار شگد متخرجه بس للاسف حتى الوظايف كلها كارهتها عود مهندسه كهرباء بس جانوا مشغليني بمصنع مال اكل وراتب زفت
-نيران: عمي لو بمصنع مال نعل قابله
-شتسوين بي؟ تحللين للقنادر؟
-نيران: نكتشف بيهم فقر دم لو التهابات
-ميان: واني اعالجهم
-واني اطگلهم صورة وانشرها
-ليان: خوش شغلة والله خلي نفتح عيادة سوه
-ميان: صدكت جان شالونه شيل للسجن بشفل
-اگلجن ما ندور اي شغله ميهم لحد ما نلگه وظيفة بيها خير
-نيران: أفكر اشتغل بصالون
-أفكر استغل فيترچي
-ميان: الله اكبر فيترچي؟ بس يسمع بيج عثمان ينجلط هههههههههههههه
صار صمت بعد ضحكتها واني صفنت فازة على ذكر اسمه ونيران سألت
-نيران: منو عثمان ؟
شربت ليان عصير وجاوبت
-ليان: أخوي
-نيران: ها الله يخلي الكم
حچينه كلنه مرة وحده
-أمين
خلصنا أكل وسوالف بعد ساعتين ووگفت ليان عدها موعد ونيران وگفت استأذنت هم وراحت وبقيت اني وميان بس وقررنا نطلع سوه وجنا ونسولف سوه، تحركت لسيارتي وصعدت يمي وحركت وهي مبتسمة حجت
-ميان: اشتريتي سيارة نفس نوع سيارة عثمان ؟
باوعتلها وابتسمت أرد على سؤالها
-اي هم موستنج
-ميان: لو شافها راح يفرح ههههههههه صرتي تلميذته
تنهدت مبتسمة بحزن .. حيل احس بفراغ ما يملي بس وجوده وما بقى شي بس ايام ويطلع من السجن ونتواجه.. شلون؟ شنو ردة فعله؟
طلعني من صفنتي ايدها الي على كتفي وحجت بنبرة حنونه
-ميان: باعي اني وامي وليان سولفنا وواثقين بيچ مستحيل تسوينها وتنطين التسجيل وما اعرف شصار بس كوني متأكده ماراح يصير الا كل خير
-ان شاء الله يارب
باوعتلي وبقت مترددة حسيت اكو حچي عدها بس ما گالته
-احجي شكو؟
-ميان: باعي سمعت من عماد شي
-شنو؟
-ميان: لا ولا شي بس راح يطلع بالاسبوع الجاي يمكن
-يعني ما انعاد النظر بمحاكمته؟
-ميان: لاا لأن همه الي هجموا عليه وشايفين الكاميرات والحمدلله همه زادت عقوبتهم وطلعوا عثمان من الحبس الانفرادي
-الله يساعده مابقى شي ويطلع
-ميان: ممكن اطلب منج طلب؟
-بعيني شنو ؟
-ميان: سالمة عيونج، عادي ترجعين تحاولين تصادقينه وترجعون مثل قبل؟
-بنظرج عثمان يفكر أصلًا يرجع يحجي وياي؟ بربچ؟
-ميان: هو يعزج حيل والله حتى لو زعل فترة ويرجع يصالحج
-ما اتوقع ميان
-ميان: شوفي مو لأن اخوي بس والله عثمان حنون ما يحقد صح عتابه قاسي ويصير بارد حيل بس من يحس الطرف المقابل ندمان يسامحه لتستسلمين وصالحي لأن علاقتكم حيل حلوه وقويه وصداقتكم ما تستاهل هالنهاية
-يارب.. اتمنى ما أشوفه يكرهني
-ميان:تطمني ولتستسلمين بس
هزيت راسي وسألتها
-ماترجعون لبيتكم؟ الي يمنه اقصد
-ميان: ما اعرف والله خلي يطلع عثمان ونشوف هو شيقرر
-يارب ترجعون والله مشتاقه لوجودكم حيل
-ميان: ياحبيبي امين واحنه مشتاقين هم الكم وللبيت
-
فتحت عيوني على شخص يهز بيه وشفته حسنين الي جان يحچي متذمر وملان
-حسنين: دگعدي لا اخبزج هسه .. ولج هيووو راحت عليج المقابلة
-يا مقابله هاي؟
-حسنين: ثول مو عندج مقابلة شغل
بقيت ثانيتين بس وطفرت من تذكرت المقابلة الي لازم اروحلها اليوم
بعد بحث دام فترة لگيت خوش شركة تتعاقد مع الإعلاميين
وقدمت واليوم الموعد مال المقابلة
-ولك شكووو هسه مگعدني راح اتأخر
تحركت بسرعة اسحب بنطرون جينز وبلوز ودخلت ابدل وطلعت بعد ما غسلت وخلصت بسرعة مكياجي واني البس جواريبي وامشط وطرت جوه بعدها رجعت ركض اصعد لان نسيت السويج
-خرا بالحظ خررررا بالحظظظظ
طفرت واسمع امي تحجي بصوت عالي
-امنية: بالتوفيق يمه گلبي وربي وياج
ابتسمت لكلمتها وطلعت أصعد سيارتي وحركت بسرعة شويه زايدة وفجأه تذكرت بنفس هالشارع من مرة سقت سيارة عثمان وهو بصفي يصور ويضحك واني ازيد بسرعتي ومشغل هو اغاني وتسابقنا ضد شباب بالشارع وسبقناهم هم
وصلت ومرت المقابلة على خير الحمدلله وطلعت من المكان أتحرك أريد أمشي وأول ما صعدت سيارتي دك موبايلي برقم غريب استغربت بس جاوبت
-الو ؟
اول ما حجيت انسد الاتصال ، أستغربت متعجبه الي صار بس ما أهتميت وأول ما رجعت للبيت وتوني داخله أجاني إتصال ثاني بس من ميان
جاوبت وحجت برجفه صدمتني
-ليالي
-ها
حچت بنبرة مهزوزة
- عثمــان طـلع ..
✤———————————————✤
يتبع
كلكم بالانستا يالله🫣❤️🔥
iwantmeto@
رآيكُم؟
تعليقاتكم ما تنسوها لان احبها لتطلعون بدون ماتنطون رايكم
توقعاتكم ؟
عثمان؟
ليل؟
البارت الجاي لقاء 🤏🏻
وبالبارت الجاي مفاجأة
احبكم
دُمتم بِوّد