عندما رأيت نار حبهما تشتعل و انارت المكان
كنت المطر الذي هطل تلك الليلة و اطفأها.
لا تنسون التصويت + التعليق بين الفقرات.
استمتعو ب القراءه. ❤️
~~~~~~~~~~~~~~~~
:- ،احبچ.
ما ادري وين اطم روحي
اذب نفسي ب المي الي گدامي؟
لو وين گلولي.؟
:- شبيج ساكته؟
:- عيب ولك عيب.
:- عيب شنو ؟
:- شنو احبج عيب ما عندك خوات؟
:- عندي ٦ خوات وبنيه ومره.
:- عيب ما تستحي من مرتك؟
:- لااا. بس هيه تستحي مني.
:- عيييب عيييب لا تكول احبج.
:- شلون ورطه لعد المن اكوله؟
:- ل حسن.
همس بينه وبين نفسه بس گدرت الگط شوي.
:- هم علمته نور ودگ ميانه وي حسن بعد.
:- شكلت؟
:- سلامت گلبج حبيبتي.
:- ،عزاااا عيييب.
:- ،من نعله على العيب غير اعرف شكايل؟؟؟؟
صاح عليه يلطم يريد يعرف شكو.
:- ما تكليلي شكو؟ عيب شنو. ؟شكلت غلطت فشرت نعلت فعلت شيييي كليلي؟
:- عيب شنو تحجي هيج بله سمعتك امك؟
:- تهلهل كفيلج العباس تخلص مني.
:- يعني هيج انته غاثهم.؟
:- كلش وبس يردوني اتزوج حتى يذبوني على مرتي.
:- يعني اني ابتلي؟؟؟؟ بطلت ما اريد اتزوج طلگني.
:- فات الأوان.
:- لا بعد وقت بعدنه ما متزوجين ولا عاقدين محكمه.
:- لا ماكو اصلا فات الأوان نشرت منشور ريمار بنت....
تزوجت إسحاق ابن....
وحسن هم نشر مباركه الي ب صفحته اني اخذتج يعني بين قوسين( شهرناج شهيره)
وكله عرفت. شنو اطلگج هسه مو لعب السالفه كله عرفت تزوجتي.
:- اكلك صدگ تحجي لو تضحك عليه؟
شفته ضحك ولم شفايفه لجوه.
ضربته على ايده شايفني زعطوطه؟
:- شنو تضحك عليه؟
هز راسه ب لا وبعده حابس ضحكته وگوه لازم نفسه.
:- إسحاق تشاقه اكيد؟ لان مو هيج نشر..
؛:- والعباس ما اجذب.
:- جذذذذذذب؟ ؟؟
:- وعلي ما اجذب.
:- لا لا اكيد تضحك عليه وين نشرته؟ ما شفت لا تضحك عليه إسحاق فدوه.
طلع تلفونه من جيبيه ودخل للفيس وراواني منشور قديم ومن الصوره عرفته مالت المشيه.
:- هااااي صدگ مسويه؟
:- اي والله ما اجذب حتى ناشره من زمان ليش ما عندج حسابي؟
هزيت راسي لا متعجبه منه هاي لمته ناشره اشو ما كلتلي نور
واني استحيت اطلب حسابه..
:- ما عندي حساباتك نصهه لذلك ما شفته.
نزلت راسي ب الگاع ما اريد اشوفه
مواضيعنه الي نفتحه تافهه
مو مثل المخطوبين
مرات يحاول يحجي وياي او يخليني افتح گلبي اله واحجي بس ما اگدر
ما اگدر احجي فد شي يزعجني لو فد سر عندي واني بحاله طبيعيه يعني
كل أسراري وكلشي كلته اله جان ب لحضات صعبه لحضات عصبيه لحضات مؤلمه.
وإنما اني ب الأساس ما الي رغبه اطلع الي ب داخلي وما ودي احد يعرفه.
احس ب الضعف من اشكي لاحد
احس ب ذله حتى لو المقابل ما حجه شي.
ماشيه على منطق دائما.
(الشكوى لغير الله مذله)
لذلك ما فد يوم شكيت لاحد ب الطبيعيه او فضفضت اله ب الطبيعه كله
ب اوقات صعبه واوقات عصبيه.
:- زعجج هذه الشي ريمار؟ كولي عادي والله
بس لان اغلب الي يخطبون اشوفهم هيج يعني نشرو
ما توقعتج تزعلين او تضوجين.؟
:- لا ب العكس ما زعلانه بس
ما جنت اعرف
بس لا ما اضوج على هيج شي.
سكتت وهوه هم سكت مگال شي.
علاقتنه متوتره بس نحاول نحله.
:- كومي ندخل جوه راح يتغدون.
ما كلت شي غير نهضت من مكاني منزله راسي ما باوعت عليه..وهوه واكف منتضرني اجي وياه.
مشينه ويه بعض جنباً إلى جنب.
لحد ما وصلنه لبيت جده.
المكان حلو وهادئ ب نفس الوقت
جميل وبسيط
لا مو بسيط افضل من البسيط.
الخضار الأنهار موقع البيت تحسه كله مدروس.
:- إسحاق.
:- همم
جاوبني بدون لا يلتفتت عليهه واحنه نمشي.
:- شوكت ارجع للبيت؟
وكف كانو استوعب سؤالي
اني ليش باقيه عدهم؟
تزوجت؟ لا لعد ليش ابقه.
دار وجهه عليه يحاول يختار الجمل.
:- بكيفج شوكت ما تردين ترجعين كليلي بس.
:- بس شنو. ؟
:- ما مرتاحه عدنه انتي ريمار مزعوجه من شي؟ سامعه كلمه؟
:- قابل منين اسمع كلمه؟ حتى ما اطلع اذا يجيكم احد ومحد شايفني.
:- لعد ليش تردين تروحين؟
:- والمن باقيه؟ إسحاق تره گعدتي عدكم غلط.
هز راسه متفهم وكمل سيره واني وراه بس بعده يحجي.
:- مثل ما كتلج شوكت ما تردين ترجعين كليلي
ادري بيج ما مرتاحه عدنه.
:- مو هيج قصدي.
:- اعرف قصدج ريمه
اعرف احساسج وكلشي فاهمج ما يحتاج حتى تحجين
ادري تخافين لا أحد يحجي عليج
وتخافين احد يحس ب غيابج من بيتج
وما تردين تثقلين علينه وتحسين گعدتج عدنه قبل العرس غلط وخاف احد يفهمج غلط
صح لو لا؟
هزيت راسي اله صحيح كل الي كاله صح.
:- لعد هاي هيه اني ارجعج بس أمر عليج كل فتره اذا ما عندج مانع طبعاً؟
:- اهلا بيك ب كل وقت.
دخلنه للبيت وكان الكل موجود.
أقاربه بنات وشباب وأهله وخواته.
اول مره اقابل خواته ب الحقيقه فقط اتصال ومن تلفون نور
انحرج منهن لان ما متعوده عليهن وعلاقتي مو قويه بيهن.
اشوف الأطفال يلعبون والي يم امه والي يسولفون.
ساعات من تشوف هيج مناضر تختنك.
تكول ليش ما تعيش هيج؟
ليش ما عندك عائله حلوه؟
صح ما اعرف الي دا يعيشو ب الضبط زين او لا
بس من تشوفهم ب لحضه راحه وفرح تحس مرتاحين وتعود عليك كل همومك.
ربي يحفظهم. اخاف احسدهم.
الحجيه :- يا هلا ب مرت ابني هلا ب الحلوه هلا ب جنتنه ولك وين جنت ماخذه ورايح.
إسحاق :- تره جبتهه وجيت؟ . غير انتي وديتيني؟
:- انجب لا تجذبني.
سكتته وصاحتلي اگعد يمهه.
قربت يمي تهمس حتى محد يسمعه.
تحجي وتعلج شلون خلگ الهه
:- اكلج بيبي.
رديت عليهه.
:- ها بيبي كولي؟
:- هذه وجهج شنو تخليله وهيج متفح انطيني اسم الشي الي تخلي مو وجهي صاير جاف.
حبست ضحكت گوه عمره راح يطگ السبعين ودور حلات بعد؟
:- بيبي صُدگ تحجين؟
:- شكالولج عليه اجذب ولج؟ اي شبيه كليلي شنو تخلين خلي نصير حلوين مثلج.
غمزتلي ب النهايه.
ضحكت عليه وهزيت راسي.
:- ههههه ان شاء الله تدللين بيبي اني ادزهن الج.
:- من اكول نادره وحلوه احد يلومني.
اجت بنيه صغيرونه يم الحجيه وشاورته
سمعته تكله صبو الغده
الحجيه كلتله يجيبو.
بقيت گاعده ب مكاني واريد اكوم اساعدهن بس استحي صراحه لا اعرفهن ولا شي.
نور ما اجت ويانه. مريضه وباقيه ب البيت لوحده.
حاول إسحاق وياهه تجي ويانه بس مَقبلت.
اجينه بس احنه وام إسحاق.
شكم بنيه من هنا كامو واخوات إسحاق همين.
لو نور ويايه جان اخذت راحتي شوي بس ما اعرف احد غير إسحاق.
واتفشل اگعد يمه
اول شي لان اني مَمتعوده من انو التسق بي.
وثاني شي متفشله منهم خاف يكولون عليه فد شي.
بقيت گاعده يم بيبيه إسحاق على الاقل مو غريبه.
:- شبيج يمه ؟
:- ها؟
:- شبيج اشو صافنه. ؟بيج شي صاير شي؟
:- لا ماكو بس
يعني ما متعوده شوي.
:- فتره وتتعودين كلنه هيج ب البدايه.
:- صُدگ يعني طبيعي هيج شي؟
:- اي كلش طبيعي
اتذكر ب ايام خطوبتي جنت حيل أخجل
منه ومن اهله
بس وره الزواج تعودت عليهم وتعودو عليه لدرجه لازم كل گعده اسمي يتذكر وينفقد اذا ما موجوده گدام عينهم.
:- اللله فدوه شلون حلوه سولفيلي بعد.
:- ههههه بعدين وره الغده اخذج للبستان انتي والبنات اسولف الكم هناك حتى هم تتعودين عليهم ويتعودون عليج.
فرحت على تفهمهه وموقفه وياي.
حسيته مثل امي حنونه كلش
وحلوه كلش كلامه نصايح مو امر.
روحهه خضره.
جابو الغده وتغدينه وسط سوالفهم الحلوه.
المداهر والشقه
ما شفت حقد او بز ب الكلام.
وهذه الي حبيته بيهم.
خلصنه الغده وشالو السفره.
ردت اكوم اساعدهم بس استحي.
حاجيت بيبيه إسحاق حتى تكللهن.
:- شو گعدي گعدي عشره مدري ١٥ مره ب المطبخ عايزات الج.
:- بس فشله.
:- لا فشله ولا شي اگعدي ب مكانج وبطلي عياره هسه شوي حتى نطلع للبستان
اذا تردين ترتاحين روحي ل غرفتي اگعدي بيهه خاف تستحين.
:- لا عادي ابقه گاعده وياكم.
:- بكيفج يمه.
بقيت گاعد يمهه وهيه تسولف ويه مره گاعده ب جهته الثانيه.
شفت تلفوني اجتني رساله على الواتساب.
فتحته ولكيته من إسحاق
جان گاعد مقابيلي على القنفه بس ويه الزلم
والنسوان ب جهه.
إسحاق :- ملانه مو؟
:- كلش احس نفسي مطي لا احل ولا اربط حتى محد اسولف وياهه.
:- ومنو الي تسولفين وياه هسه؟
:- تعرف قصدي يعني قبل شوي.
:- نطلع؟
:- وين؟
اتأخر ب الرد رفعت راسي اشوفه يكتب بسرعه والي يمهه ما منتبهين اله شجاي يسوي.
:- اراويج شغلات حلوه شغلات تخصج
شغلات راح تحبيه
او يمكن تحبيه شغلات نگدر نكول
جنت اظن راح تجمعني بيج
بس ما جان الهه فايده.
:- أثرت فضولي.
:- خلينه نطلع ونشبع فضولج
اطلعي سوي روحج تروحين فد مكان
او اطلعي من المطبخ بي باب خلفي لبره البيت
واني اجي وراج.
كمت من مكاني للمطبخ
ما اندله بس على صوت المواعين وصوت السوالف عرفت المطبخ.
دخلت واني منحرجه كلهن انتبهن عليه كلش استحيت بس ولا وحده تدخلت.رجعن لشغلهن.
طلعت بره انتضره.
الشي الي خلاني بحيره.
هوه خوات إسحاق.
ما وحده حجت وياي
ولا وحده تدخل او فتحت وياي سالفه.
بس على گد السلام. ما شفتهن ب المشيه مالت إسحاق.
بس الي عرفتهه جانو ب بيت إسحاق.
هاي اول مره التقي بيهن
لو ما إسحاق يكلي ذني خواتي
ما جنت راح اعرف.
:- بشنو صافنه.؟
كمزت من مكاني كاضه گلبي بخوف.
:- يمهه خوفتني عبالي بزونه.
:- اني بزونه؟
:- لا بس اجيت ب سكته وخوفتني.
:- نمشي؟
:- بس وين؟
:- تعالي واني اراويج.
لزم أيدي
وهاي جانت اول مره
تفاجئت بي لدرجه حتى ما سحبت أيدي
صخام ب عينك إسحاقو.
وصلنه گدام باب يعود ل نفس البيت
بس يختلف.
:- احنه وين؟
سالته واني اباوع عليه
وهوه ترك أيدي ونزل ما اعرف شنو يدور.
راح ل زوايه ب الحايط.
وطلع خشبه ب الطابوك مالت البيت
ومد أصبعه طلع من وراهه مفتاح.
هاي شلون ضامه؟
رجع الخشبه مكانهه. وجاب المفتاح فتح بي الباب.
دخل ودخلت وراه.
جانت الغرفه ضلمه وفتح بيه الضوه.
ميز حاسبه
وحاسوب واله طباعه وأوراق وصوار ماليه المكان سرير على جهه وبطانيه.
تلفزيون بلازمه على الحايط مشكل.
غرفه متكامله.
بس الأغراض الي بيهه غريبه.
:- شنو هاي إسحاق؟
:- غرفتي القديمه.
سالت مستغربه غرفته؟
:- غرفتك؟ ليش انته جنت عايش هنا؟
هز راسه وباوع عليهه.
:- اممم فتره لا بأس بيهه
فتره صعبه قضيته هنا
انعزلت عن الكُل واتخذت هذه المكان ملجئي الخاص.
:- بس ليش؟
يعني ليش هنا جنت وشنو هاي الشغلات.
حجيت واني ااشر على الحاسوب والصور.
ابتسم وراح گعد على الكرسي وهوه يشيل ب الصور.
:- سدي الباب وتعالي.
:- لو اموت ما اسده شنو تريد احصلي حجايه؟
:- ههههه والعباس ما. اسويلج شي.
:- فنك تسوي شي غير افنيك.
رفع حاجبه ب وجهي عود يعني تحجين صدگ.
:- الغرفه بيه كامرات ريمه والشباك مفتوح سدي الباب عندي غايه.
كامرات!! يحجي صدگ؟
رديت الباب ما قفلته تحسبناً لاي شي.
واجيت وكفت يمه.
سحب تخته جانت جوه الميز حتى اگعد عليهه.
:- اگعدي هنا ما عندي كرسي ثاني.
گعدت بس بعيد عنه شوي مو لزگ.
:- ما اعرف اشرح بس اذا عندج سؤال مستعد اجاوبج.
:- شنو هاي الصور وليش مخلي هيج أغراض ب غرفتك؟
تنهد وبده يحجي ب التفصيل.
وهوه يأشر على كل شي يحجي.
:- هاي طابعه
وهذه الحاسوب احمل بي الصور واشتغل بي شغلي الخاص
والطابعه اسحب بيهه اي صوره او فد شي مهم عندي.
:- صور شنو؟
حك رقبته متردد بس حجه...
:- صورج
:- صوري!!!
فتحت عيوني متعجب شنو جاي يحجي صوري شنو جابهم الهه؟
:- على كيفج راح تطلع عيونج.
:- منين جبتهم؟
:- منج.
:- لا تضحك عليه إسحاق دا احجي صُدگ منين جبتهم؟
:- والعباس منج.
:- شلون مني شلون؟
اني حتى الصور هاي ما دازته ل احد ولا احد شايفهم.
:- اي بس اني وانتي.
:- إسحاق لا تحرك اعصابي كلي منين جبت الصور.
:- بگتهن من تلفونج..
:- شلون ؟
هكرت حساباتج وگدرت اخذ الصور.
:- تشاقه مو؟ كول جاي تشاقه.
:- للأسف لا.
:- لا تكلي من خرب تلفوني وراح كلشي انته السبب يعني انته هكرته؟
كمت من مكاني مجاي استوعب.
صوري من قبل الزواج عند شخص لا أعرفه ولا اعرف شجاي يدور مو وراي.
:- اسحاق انته تعرف شجاي تحجي؟
انته تعرف الي مسوي حرام؟
:- بس انتي مرتي هسه ليش حرام.
:- مرتك هسه مو قبل كم سنه!!،
:- بس من اخذتهم ما جانت نيتي زفره.
:- لعد شنو جانت نيتك نضيفه؟ الي ياخذ صور بنيه بدون علمه ويهكر حساباته هذه نيته شنو نضيفه؟
:- اي لا تعميني ويه الكل
ريمه اخذتهم لان جانو يفيدوني بفد شي
وصورج لا أحد شافهم ولا حتى اني رجعت شفتهم من خلصت الشغلات
وهاي اول مره گدامج اطلعهم من فتره.
حركت الطبله وخليته گدامه وقريب عليه
هوه صاير أعلى مني لان الكرسي عالي والتخته الي گاعده عليهه اني ناصيه.
گعدت واباوع عليهه.
:- زين اگدر اعرف شنو الغايه؟
:- حتى نگدر نفرق.
:- تفرق ب شنو؟
طلع صوره من صوري وهاي الصوره اعرفهه
وخله صوره ثانيه.
بينتلي مدى الاختلاف ب الصورتين.
:- حتى نگدر نفرق بين هاي وهاي.
:- بيني وبين رحمه؟....
~~~~~~~
:- اي يمه نازل ان شاء الله الليله.
لا ما اتأخر اجوز اني والتسعه يمج
اي اي ان شاء الله ادير بالي لا تخافين
خالتي يمج؟
خوش هاي هيه.
سديت التلفون منهه واني اسوق
راجع من دوامي بعد ما أخذت سيارتي من الكراج.
اخذ سيارتي من اصعد للكراج وياي
ومن نقرب على اخر نقطهه قريبه على الشغل
اخذ السياره واخليه عد صديقي عنده كراج سيارات
ابقيه عنده لمن اصعد.
اني وخليل سوه.
اني اسوق وهوه نايم.
هذه تاليتي اشتغل سايق عد ابن زنيبه.
جان غافي ب سابع نومه واني عيوني احس جاي ينسدن وينفتحن من النعاس
اخاف انوب اسوي حادث.
وكفت السياره على الترابي.
وصحت اگعده.
:- كوووووومممم .
فز خطيه ويباوع على كل الجهات
خاف وكسر خاطري حسسني ب تأنيب الضمير. لان گعدته.
:- گوم اگعد كمت اغفي لا نندعم.
خله راسه بين اديه يفرك بي وبعده الفزه بي.
انتضرته لمن هده شوي وحجه.
خليل :- هيج يگعدون همه؟
:- يعني تريد تلگه السياره صايره قوطيه ودمك يطلع منين ما جان.
:- جان تگعدني على كيف يا اخي والله حتى گلبي ما هده.
:- هسه يهده كوم سوق ب مكاني.
:- نعسان...
:- خايب اغفي اغفي شبيك والعباس اگلبك ب السياره حتى لو مو حادث عمده اسويه.
كام يتافف ما راضي طلع من السياره حتى يگعد ب مكاني.
واني ما نزلت بس طفرت للكرسي مالته.
رجعت الكرسي لوره ونمت گبل بدون لا حتى احجي وياهه...
ما حسيت ب الطريق ولا بشي بس ب ايد تهزني حيل تگعدني.
:- خاييييب كوم وصلنه وصلنه كوم.
فتحت عيوني اشوف شنو گدامي.
شفت باب البيت تفاجئت بي لمته وصلنه.؟
:- هاي لمته وصلنه.
:- حقك عيني تعرف ب الطريق غير گضيته شخير.
نزلت من السياره حتى ما جاوبته..
.خليل بيته ب غير منطقه يعني لازم هسه انزله يرتاح يمي.
فتحت باب الكراج واشرلته يدخل ب السياره.
واني دخلت للبيت جوه.
محمد :- يمه لحد يطلع خليل يمي ب الديوانيه.
صحت من الباب وسمعتني بنت خالتي وهزت راسه اي.
دخل خليل ب السياره ورحت سديت الباب وراه اني.
انتضرته ينزل ماكو..فتحت الباب عليه.
ولكيته صافن لِگدام.
باوعت على شنو صافن..ومن شفت نضره عيونه وين ما تحملت نفسي.
سحبته من ياخته نزلته لجوه وهوه طاح على كبره.. كومته ودفعته للديوانيه.واني متحلف بي..
:- شبيك تخبلت اكو واحد يسوي هيج؟
وكف ب مكانه متعجب ويصيح كانو هوه ابو الحق.
:- واكو احد بهاي النفسيه يدخل بيت ناس ويباوع على عرضهم؟
فتح عيونه كانو صحه على نفسه من الي كلته.
راد يحجي بس عفته ورحت.
طلعت اجيبله بطانيه من داخل البيت وما ردت احجي وياه زايد لا تصير عركه.
دخلت ولكيت رباب گاعد ب الگاع يم الطبله مخليه عليهه كتبه وجاي تدرس.
ما منتبه عليه من دخلت
واني متأكد ما جانت منتبه على خليل اصلآ. رغم صغر سنه صحيح بس متربيه عدل.
:- رباب بلا زحمه عليج لا تطلعين بدون حجاب بره عندي خطار ولا تخلين الباب مفتوح هسه مفتوح وانتي مقابله عيب بابا ما يصير.
رفعت راسه تستمع لكلامي عدل وعلى طول حديثي هيه تهز راسهه. بس اخر شي حجت.
رباب :- ليش احد شافني؟
:- اي بابا شافج خطاري ما يصير حرام حبيبتي روحي كملي قرايتج ب غرفتج ولبسي حجاب من تطلعين.
شالت كتبه وراحت لللغرفه بهدوء.
صح ما تلبس حجاب گدامي
بس ما احاجيه مخليه على راحته
اعتبره مثل اختي الصغيره او مثل بنتي
عمره الصغير واعيه بس مو ويه الكل
ويه الغريب وبلدراسه واعيه
بس ماخذه ميانه ويانه ويه الأقارب بدون حجاب بحكم انتو مثل اخواني.
خليته على راحته ما دام متعوده هيه. قافله على عقله عادي تذب الحجاب گدامنه.
واعرف كلامي ما راح يجيب نتيجه
لان الشخص اذا ما هوه يصحى على نفسه
ما راح يستمر ب شي.
خليه هيج واني اغض بصري عنهه لحد ما تستوعب انو هيه غلط.
دخلت غرفه الحجيه اخذ بطانيه منهه.
لكيته نايمه ما گعدته
بس سحبت البطانيه وطلعت بهدوء حتى ما تگعد.
وديته لخليل وما باوعت ب وجهه
وهوه ما تجرأ يرفع عينه ب عيني
يخلي عينه على عرضي
ما اخلي عيني ب عينه.
خطار يرتاح ويروح لبيته ويحترم نفسه.
تركته يرتاح وطلعت اسوي عشى النه احنه الاثنين.
امي نايمه وخالتي نايمه.
بس رباب گاعده تدرس ب غرفته.
ما بيه حيل اطبخ بس مُجبر.
طلعت كبود من المجمده وكبه.
طبختهم وسويت طماطه وزلاطه وياههن.
لكيت جايبين صمون بعده حار.
هاي سوالف خالتي تطلع تشتري وترجع
واني شكم مره احذره لا تطلعين وحدج ودي احد.
بس ما تسمعني عبالك احجي ويه حايط.
اخذت العشى للديوانيه لكيته صافن ب السگف من حس بيه اجيت. غمض عيونه بسرعه وسوه نفسه نايم.
شگد عار ولا يستحي.
خليت العشى يمه.
وصحيته.
:- خليل كوم.
ماكو ما يسمع كانو ما احجي وياه.
:- كوم تعشى لا تسوي نفسك نايم.
هم ماكو نفس عود ما يجاوب شوفوني نايم وغافي؟
كمت سحبت البطانيه من عنده ورفسته رفسه
طلعت ضيم گلبي منه كلش.
هوه گعد وطفر طفره شلون طفره.
:- من اگعدك تكوم وعيب عليك تسوي روحك نايم
استحي على روحك.
من حجيت وياه كام وذب البطانية.
:- من رخصتك راجع لأهلي اني.
:- اگعد تعشى وانغمر عود امشي باجر.
:- ما اريد لا اكلك ولا النوم عندك.
هذه من كل عقله.
:- خليل ارجع وعوف التمسلت هذه وسوالف المزعطه وارجع.
ما يسمعني يلبس ب حذائه ومطنش.
طفح الكيل وضاق الصبر. خلص اذا يروح ينتهي كلشي بينه.
محمد :- وحق الله يا خليل
اذا تعتب عتبه الباب وتطلع هسه
لا صاحبي ولا اعرف ومتبري منك منا ليوم الحساب لا اعرفك ولا تعرفني.
وخليك ب علم ما مبري الذمه لاي شي شفته وياي.
وكف ب مكانه متصنم
وما يعرف يكمل لو يرجع
يريد يكمل بس لازمه حلفاني
ويريد يرجع بس لازمته كرامته.
بقه گاعد على تجه الباب مالت الديوانيه.
لا هوه مكمل ولا راجع.
گعدت اني ب الگاع ما همني
ومديت أيدي اتعشه.
اذا يبقه يبقه واذا يروح يروح كلشي ب ايده وقراره.
:- قرر حتى إذا تبقه تجي تتعشه لا يبرد ويصير ما ينوكل.
احجي واني اكل ومن كل عقلي ما منطي اهميه اصلآ.
حسيت ب ضل احد فوك راسي.
رجع ورجعه الحلفان..
بس ما اكل وياي.
نام ب مكانه وتغطه ب البطانيه.
ما حاجيته
وما راح الومه الإنسان مرات يحرفه الشيطان
مرات يوسوس ب راسه.
وبراس كل انسان ما احدد خليل فقط
كلنه نغلط
بس ب نفس الوقت لازم نعرف غلطنه حتى ما نكرره..تعشيت
وشلت مواعيني ضميت عشى خليل واني متأكد راح يصحى جوعان.
جبت بطانيه ونمت ب الديوانيه وياه.
واني افكر ب كلشي.
وهاي من الساعات الي اتذكره إلى الآن.
بيوم الي بات خليل عدنه
وهذه اليوم الي فكرت بي وربطت كلشي.
اتذكره لهاي اللحظه
وماكو شي راح من بالي.
گعدت ويه نفسي.
حاسبته محاسبه تامه
محاسبه قويه
محسابه نهائيه.
إلى متى نبقه ب هذه الخوف
الي متى نعيش ب رعب من الأقربون النه
إلى متى راح تستمر حكايتنه المؤلمه؟
كل الاسئله ادور ب راسي.
إلى متى ماكو نهايه لهذه الشي؟
بس الاهم.
شنو حكايتنه
وشنو سبب خوفنه.
خلوني احجيلكم عنه.
اني محمد ابن امي وابوي وحيدهم وسندهم
ومثل ما جان والدي يسميني.
الأول والاخير.
وفعلا جنت الأول. والأخير
لا قبلي أحد ولا بعدي احد. وحيد اهلي.
قبل لا امي تزوج ابوي جانت عايشه ب بغداد ويه اهلهه.
جانت عائله امي عائله معقده
عائله نفسيه
محاربين للمرأه من جميع النواحي.
ممنوع تكملين دراسه ممنوع تحبين ممنوع تلبسين شي احنه ما نعرف بي ممنوع تشترين فلان شي ممنوع تصرفين كذا شي. ممنوع المكياج الطلعات الخصوصيه ممنوعه منعاً باتاً.
أوامر تدخلات وعدم وجود خصوصيه للمراه عدهم نهائيه.
اذا تريد تشتري فد شغله لازم تكول لكل نفر ونفر ب البيت صغير وجبير مره او رجال بدون استثناء.
احد يگدر يعيش هيج؟
احد يگدر يتحمل هيج؟
مجرد التفكير انو انتي كَمرأه اذا تردين تشترين شي خاص بيج شي نسائي او شي خاص لازم تگولين للكل؟
لازم تمشي ب اوامرهم
بس اذا خالفته يا ويلك.
هنا راح يكون العقاب. بس عقاب ب الضرب؟
ب الحرق؟لا.
العقاب اسوء ومختلط ما بين الي سبق ذكرته
وما بين عقاب تدمير النفسيه.
طفله صغيره غلطت.
اشترت حلاوه بدون علمهم شراح يصير يعني؟
راح تنضرب، وتترزل، وتمنع من مصروف شهر، يغيبوه من دوامهه اسبوع وهذا اذا ما بطلوه.
يقتلوه نفسيا.
لدرجه يخلوه تغيب.
ويطلعونه ب الباب توكف تباوع على بنات وولد المنطقه يروحون ل الدوام
وهمه وراهه يكولون راح تنحمرين من هذه الدوام.
وفعلاً حرموههه و بطلوه.
عاشت هذي الطفله ب رعب.
لحد ما وصل عمرهه عمر الشباب.
كبرت وشبت هذي البنت.
ازدادت جمال.
وخلت عيون الشباب الي ب عائله تصير عليهه.
الكُل صار يريده ويتمناهه.
وحده ب هذه الجمال والترافه.؟ والبياض..
منو ما يريده اصلا؟.
بس القدر لعب لعبته.
وتزوجت شخص
لا من اهلهه ولا من عشيرته ولا من محافظته اصلآ.
شخص من غير لهجه.
شخص يختلف اسلوبه وكلامه ومنطقه وطريقه تفكيره وحياته وحريته.
كلشي يختلف عنده وعند اهل عشيرته.
وهذه الشخص ما خطبه عن سؤال او عبث..لا.
هذه الشخص خطبه عن عشق وهيام.
عن كلام احد من اقربائهه اله. عنهه.
جان واحد من اولاد العائاه يصير صديق زوج البنيه هذي مستقبلا.
.جان يحجيله عن كلشي ب البنيه.
طوله شكله جسمه بياضهه جمالهه حتى شكم شامه ب وجهه وشكم نمشه موجوده.
حافظه حفظ مثل اسمه.. بس ما جان ييضن اني الي مقابيله يحجيه.
راح يقع ب عشق هذي البنيه..
من اتأكد بطلنه من حبه لهذي البنت.
خطبهه.
وما جان ينقص مال وجاه ونسب وابن شيوخ محد يكله لا.
من شكله تعرف هيبته.
من شكله تعرف حنيته.
من شكله ترتاحله وتطمأن ب العيشه وياهه.
خطبه وما جان عد عائله بطلتنه غير الموافقه.. بدون شور البنيه.
انغرو ب المال الي يمكن يحصلو من هيج نسابه.
ضنو انو ممكن لو تزوجت بنتهم هيج شخص عنده مال
ب اي وقت حاجه يروحون للنسيب والله محتاجين وكفتك ويانه.
ويخمطو ب شكم فلس.
بس يله خليهم على تفكيرهم هذه.
وافقو على الولد وصار العرس
البنيه فقط الي عرفته
انو خلص بأجر عرسهه يله راح تتجهز وخلص.
بدون اخذ شوره بدون علمه من وقت حتى لو كانت تريد تجهز.. هنا حست نفسه حاله حال الحيوان
حالهه حال السلعه.
باعوهه.
تحت اسم هذه يناسبج اخذي.
بس صدگ راح يكون يناسبه.؟
الولد جان يعرف كلشي عنهه شنو تحب شنو تكره من شنو تخاف شنو شكله
حبه على حب الوصف بس
بدون لا يشوفه اصلآ.
وجان ب باله هذي مظلومه.
هذي تحتاج العوض
تحتاج احد كفو ب حياتهه.
وكان الهه الكفو والسند.
عاشت وياه افضل ايام حياته. عاشت ب راحه حست أخيراً نفسه انسان
ذو كيان ومشاعر واحاسيس وكلشي يملكه الإنسان..
بس الشي الي جان عائق ب طريقهم
هوه الذريه
سنوات بقو بدون أطفال
انتضرو انتضرو وماكو فايده
راجعو ورادو يعالجون. بس كل دكتور يروحون اله جان يكول نفس الكلام.
ما بيكم شي وما تحتاجون علاج.. وكان هذه هوه الحكم
الانتضار لحد ما تجي الذريه.
انتضرو سنوات أخرى حتى ربهم رزقهم ب طفل.
طفل.
طفل صغير نور حياتهم وملئه سعاده وراحه وخلصو من كلام الناس.
بس كان الكلام كله عن الام.
وجانو يذبون الصوج بيهه.
انتي العقيمه، العاقر،
مستحيل يصير عندج أطفال.
ما يوم احد فكر يمكن يكون الاب هوه العقيم
بس الحمد لله قضاء الله وحكمه.
رزقهم ب طفل سكت الكُل.
كبر هذه الطفل وبده يفهم.. وصل عمر انتقالي من الطفوله نحو المراهقه.
وهنا الطامه الكبرى. هنا الكارثه....
الطفل جان بيوم من الايام راجع من المدرسه..
فرحان ب درجتهه استلم شهاده ااَلسادس ابتدائي وجابه من المدرسه.
منتضر لمته يوصل.
بس تمنه ما يوصل ب ذاك اليوم.
يشوف بيته دخان.
وماكو بس صراخ مره ب الشارع تصيح للناس يساعدوهه.
وتصرخ..
:- الحكوني يا اهلي
الحكوني يا عشيرتي
راح رجلي احترك طلعو ولكم وين المروه
وين الضمير رجلي يحترك ولكم اطلعو.
تصرخ تركض تضرب ب أبواب البيوت تطلب المساعده. وذاك الطفل صافن ب الي گدامهه.
بيتهه بيت طفولته الي عاش بيه كل عمره.. وفوق هذه يباوع على ذاك الرجل الي يحاول يطلع من الشباك..
بس ماكو وسيله..الشباك مسدود
والشجره سادته ب اغصانهه أيضآ..
والنار تاكل وتنهش ب لحم الرجل.
المنضر كان مرعب لطفل ب هذه العمر وهذه الحال.. وهوه يشوف ابوه يحترق وصار رماد وحطام.
كان منضر مرعب بعد ما طفه البيت من النار وبرد.
يصعد الطفل لغرفه ابوه ويلكه فقط..
بقايا عضام ودم ولحم اسود محترق ما باقي بي فقط القليل.
هذه تاليه الرجل النبيل العاشق؟هذه تاليه الشخص المؤمن المرتاح.. هذه تاليه الطفل يرجع لبيت خواله ويعيش الي عشته أمه
وترجع نفس المعاناه. حتى ينعاد على الطفل نفس المشهد..ونفس الحريق. هوه موت خاله..
احد اخوان امه مثل ما نسميهم.
مات خاله وهذه الخال جان الوحيد الي يهتم ب امر الطفل هذه
مات مثله مثل والد الطفل.
ومحد عرف مسبب هذول الحرائق غير الطفل بس ما جان يگدر يحجي.
خوفاً من خواله الثانين.
احد قتل أشخاص أبرياء.
كبر هذه الطفل وبده يوضح اله كلشي.
نمه الحقد بداخله عليهم
وخاصه من عرف ماضيهم ويه امهه.
قرر يبتعد بس يگدر يجمع شكم فلس يعيش بي نفسه وامه.
طلب منهم ما يدخلون بي بس هيهات يقبلون هذول الطواغيه.
تعرض الطفل لما تعرضت اله امهه.
عاش الضلم او جزء من الضلم لان معامله الولد عدهم تختلف عن معامله البنت.
كبر ودخل العسكريه لسبب.
انو الراتب هوه الي راح يطلعهم.
درس وتعب ووصل لحد ما صار عنده القدره يبتعد.
يأجر بيت.
وفعلا اجر بيت ب منطقه ثانيه وهذه البيت اخذ جزء جبير من الراتب.
بس تهون كله ب سبيل يبعد امهه عن هذول الطواغيه.
بقه فتر على هذي الحال حتى وجد هذه الطفل شي يفيده ويفيد امهه.
لمن بفد يوم الله دز اله انسان نگدر تكول عنه النور بليله ضلمه.
:- بس سيدي هذه مبلغ مو شوي.
:- تستاهل ابني والله تستاهل واني اعرف ضروفك.
:- بس سيدي ليش؟ ليش تنطيني هذه المبلغ.؟
:- اعرفك محتاج.
:- بس هواي هذه مو قليل.
:- اني ما منطي الك صدقه او هديه منطي الك قرض وشوكت ما ترجعه رجعه.
:- والله ما اعرف شكول بس خاف
خاف ما اگدر اسدده بعدين.
:- تگدر ان شاء الله وخليك واثق ما الح عليك على ربع دينار شوكت ما عندك ادفع.
فرح بهذه المبلغ وجان مثل طوق النجاه اله ولوالدته.
اشترى بيت ب الفلوس الي قرضهن اله الرجال
وهذه الرجال جان الضابط الي وياه ب الشغل
الضابط الأعلى رتبه منه او نگول المسؤول عنه.
استقر وضعه لفتره.
بس مرض امه هلكه وخلاه قلق.
سكر وضغط وضعف عام.
امه المره الجبيره الحنونه شافه تذبل كل يوم گدام عينه.. من أثر فراق زوجهه ومن تعب اخوانهه.
ولحد هذه اليوم بعد ما خلص فلوس الضابط وسددهن كاملات كل حياته كرسهه لامه.
وعنايته بيهه.
واهتمامه. لكن.
بعدهم خواله يلاحقو ويردون الفائده منه.
حاسبت نفسي بعد هذه الفتكر.
لازم اخلي گدامي هدف
لازم اعيش حياتي
ولازم اعالج امي.
فكرت هواي. بس ما فكرت انو الإنسان مصيره الفناء والموت ومحد باقي لأحد.
~~~~~
نور /
وحدي ب البيت بدون احد.
جسمي مكسر والتعب الي دا احس بي مو طبيعي.
فلاونزه قويه بس ما اكلهم عليهه.
كل الي كلته راسي يوجعني وتعبانه ما الي خلگ هوسه.
لان اعرف إسحاق راح يكنسل الطلعه ويبقه وياي واني اريده يقضي وقت أطول ويه ريمار.
كمت من سريري ب تعب متجهه للحمام.
حرارتي ارتفعت حيل وبس المي البارد يخفضه.
اخذت ملابسي ودخلت للحمام اسبح.
كل حركه وكل خطوه اخطيه ب صعوبه.
دمرتني الصخونه دمرتني ب حد ذاتهه.
سبحت گوه وطلعت من الحمام. حتى المروحه مطفيته الدنيا حر بس اني بردانه..
لفيت نفسي زين ب البطانيه بعد ما أخذت علاجي.
شوكت تخلص.
بقيت اگلب ب التلفون اتابع مسلسلاتي الكوريه
ليش اكو احلى منهه؟
لفيت نفسي عدل وبقيت اتابع جوه البطانيه.
واني دا اتابع دگ تلفوني.
لكيته حسن.
هذه شعده من مصيبه بعد؟
فتحت الخط عليه.
:- الو؟
:- نور ام الوكفات والنخوات.
:- يا ستار استر.
:- جايج ب طلب صغير.
:- والله شوف هوه الواضح مو صغير.
:- انتي وين هسه؟
:- ب البيت بس ليش؟
:- اتفقت ويه ولايه نطلع سويه بس ما تقبل تگول ما اطلع وياك وحدي.
:- اي واني شنو الي أسوي؟
:- تجين ويانه امر عليج اخذج ونروح الهه كلت اله ناخذ نور ووافقت العباس عليج لا تكولين لا.
:- حسن شنو اجي وياكم شنو موقعي من الإعراب انته رجال وخطيبتك اني شكو حاشره روحي ب النص..
:- يابه بس نوصل وين ما تردين تروحين روحي حبابه فدوه اروحلج وافقي نشفت دمي هذيج يله رضت.
:- ما اگدر حسن والله.
:- اذا على إسحاق تره اتصلت بيه وكاله خلي تروح وياك لا تشيلين هم.
:- مو على إسحاق بس مريضه والله ب الفراش.
:- مريضه ؟سلامات شبيج اشو إسحاق ما كال مريضه.
:- إسحاق ما يُعرف لو يُعرف تلكاه يمي هسه بس اني ما كلت الهم خلي يروح شوي يطلع هوه ومرته وحدهم.
:- لعد اخوج يروح ويه خطيبته واني تستخسرين عليه اروح وياهه؟ حبابه نور حاولي واطلعي هم غيري جو شوي يروح المرض اذا انتي نايمه ب الفراش غير الصخونه تزيد.
:- شوف اطلع وياك ب شرط.
:- موافق من قبل لا تشرطين.
:- دسمع انته اول شي.
:- اسمع.
:- اروح بس تشتريلي غده على حسابك لان بعدني ما متغديه وهمين اي شي اريد اشتري انته تدفعه اتفقنه؟
:- يابه هاي هيه اتفقنه.
:- لعد يله بسرعه روح جيبه وتعالو تلگوني جاهزه.
:- لا عيني امر عليج اول لان ست الحسن والدلال تكول تجيبه اول شي ما تثق.
:- تمام بس تأنيني اخلص تبديل واجي.
سديت منه كمت بسرعه ابدل ما شاء الله راح المرض هسه.
بدلت بس لبست صايه عريضه وياه رتبت حذاء وشال مرتبات.
ردت اخلي مكياج بس ما بيه حيل خليت مرطب لوجهي ومشطت حواجبي وخلص.
سمعت هورن سياره ب الباب.
نزلت بسرعه قفلت البيت وطلعت.
شفت سياره حسن ب الباب وفاتح الجامه.
رحت فتحت الباب وگعدت وره...
يتبع.....
~~~~~~~~~~~~~~~~~~~~~~~~~~~~~
طولت عليكم مو؟ 🥺
فتره صعبه مرت عليه. بس ان شاء الله ماكو بعد انتضار.
بقه بارتين على الاقل ونختم.