#مراس_الدعجاء
للكاتبة: هــدهد 💛
لا تنسون التصويت والمتابعة للحساب مع تعليقاتكم قلباتي ✨
بلايه وداع مثل الماي من ينشف بلايه وداع
عريان السيد خلف
✤———————————————————✤
بچي وعياط الناس هو الي ينسمع من البيت ، تركت الي بيدي بالشارع وركضت مفزوعة وايدي على گلبي .. بذاك الوقت فكرت بشي واحد وهو بابا واخوي الي شغلهم بالجيش وبأخطر اماكن بالعراق
دخلت واني حتى خطواتي احسهن ما يلوحن الگاع ومريت بين اكووووام ناس وشفت كوم نسوان ميزت بيهن امي وعمتي ام مجتبى يصيحن ويلطمن بدون وعي طلعت مني صرخه مفزوعة واني اتقرب الهم
- شكووووو منوووووو مااااات لييييش تبجوووون؟؟؟؟
انجريت من بنت عمي ريام وهيه فاقدة تبجي وتحچي
- ماااات ولج مااات اخوووووي
صفر عقلي ووگع گلبي من الفزع وهمست
- مرتضى ؟
هزت راسها تبجي وحضنتني منتهيه واني دموعي طلعت ابجي مع شهگاتي على ابن عمي الجبير الي جان مثل اخو الي ، بقيت ابجي وياهن واشوف الناس داخله وطالعة علينا وعمي ماكو .. زين بابا وين؟ وحيدر ؟؟؟
عفت ريام وركضت اطلع من باب الحديقه وشفت اكوام من الزلم بره وحاولت اميز واحد منهم ماكو كلها غريبين عليه ، انجريت من ايدي وشفت اخوي حسنين واكف وعيونه حمر ومبين باجي
- حسنين وين بابا؟ وحيدر؟؟؟؟
سحبني يدخلني وگال
- دخلي هسه بعدين تعرفين
- بعدين شنو؟ شبيك حسنين بابا وين؟
مسح على راسه ووجهه بعدها گال
- صاير انفجار ارهابي يمهم وكلها حالتها خطره حتى ابوي وحيدر بالمستشفى هسه ، بس 11 شخص من الي وياهم ميتين
حسيت كلماته زرفن اذني وبچيت بصوت عالي وهو حضنني يهدي بيه وشويه وعافني وطلع لبرة، حطيت ايدي بفزع على راسي ما اتخيل بيوم اعيش بدونهم شلون؟؟
انفتح الباب ودخلت دعاء تبجي بصريخ وتلگنها النسوان يهدن بيها على مود ابنها الي ببطنها واني واگفه ابجي بصفحة وحدي وتفكيري ببابا وحيدر وخطية مرتضى الي مايستاهل وراح بشبابه وهو جان منتظر اول طفل اله!
شگد ما اگللكم عن الفزع الي عشته بهذيج الايام ما أگدر
من دخلوا تابوته للبيت حتى يودعونه
من امه فقدت وعيها وشالوها للمستشفى ورادت تنجلط
من تشتت خواته الي يشوفن عائلتهم هيج وضعها
من ابوهم مايرضى يرجع من يم گبره وهو الي دفن اول فرحة اله
من مرته فاقدة بس تحاول تتماسك حتى ماتخسر اول بذره حب الهم
بس ماگدرت تتماسك واغلب وقتها فاقده الوعي وعايشه على الكانونه والمغذي
من اشوف مجتبى حابس نفسه وعايف الدنيا وراه بسبب حزنه على فقدان اخوه الوحيد
واحنه.. احنه الي مانعرف بابا وحيدر بيا حال وهمه بين الحياه والموت
تشتت عشناه وحزن وحداد قاتم
والي زاد الطين بله من عرفنه انُ راح يضطرون يبترون رجل بابا!
وحيدر الي بالگوه لگوله متبرع لأن كليته تالفه ومتدمره.. حالتنا جانت ما اتمناها لعدوي والله
دخلت مع حسنين وماما المستشفى بعد شهر من حادثهم هناك وممنوع الزيارة لان جانوا بالعناية المركزه، رسل ما گدرت تجي اليوم وگالت باجر تجي لأن مريضة اليوم
فتحنا باب الغرفة الاولى وطلعت مال حيدر ودخلنا ملهوفين واشوف امي ركضت تحضن حيدر الي جان بحالة مزريه من جروح وايده مكسوره وتعبان وضعفان حيل ، نزلت دموعي وركضت بصفهم احضنه هم بس براحة خاف أأذيه
- حيدر يمه بعد روحي شلونك يا حبيب امك
ابتسم الها يحاول يطمنها وگال
- بخير بعد روحي يالعافية ، شلونكم انتو ؟ شلونج حبيبه اخوها؟
- مشتاقيلك حيدر والله ، الحمدلله على سلامتك يابعد عمري
ابتسم يشدد على حضني وبقى يسولف ويشاقي امي ويطمننا مابي شي ولشويه وتركته وطلعت رايحه لغرفة بابا وكلي خوف من انُ اشوف سندي والشخص الي اعيش تحت ظله بطمأنينة مكسور
فتحت الباب الي عرفته لغرفته وشفته متمدد ونايم ، نزلت دموعي وبچيت وتقربت يمه امسح على وجهه التعبان ، جانت اكو خدوش بوجهه وايده بيها جرح بس ملتئم
فتح عيونه ومن شافني أبتسم وسحب أيدي الي على جبينه مقربها يم حلگه ويبوسها
- حبيبة ابوها الي مشتاقلها حيل
شهگت احضنه من ايده واحچي
- بابا حبيبي الحمدلله على سلامتك مشتاقيلك ، الله يلعن الي كان السبب بحالتك يارب
رفع ايده يربت على راسي وهو مبتسم مايبين ضعفة ابد
- زين اني بابا لتشيلين هم
- بابا اطلع مانريد شي غير سلامتك والله
مد ايده وهو يبتسم وعدل الچربايه وصار بوضعية الگاعد ورفع عيونه الي وهو يبتسم وسحبني اگعد وحضنته بدون ما أشد علية
- بابا ما اتحمل اشوفك تعبان هيج
- ابوج قوي حبيبتي وما يتعب بسهوله، كل شي فدوه للوطن
جنت حاضنته بكل حيلي ونسولف وهو يحاول يخليني اضحك وما اشيل هم وشويه ودخلت امي وحسنين وهنا بچيت من شفت نظراتهم لبعض وشكد بيها اشتياق
يمكن ما حضنته وما سولفوا هواي بس عيونهم تسولف
بقينا كل اليوم هنا لحد ما طلعونه بالليل لان المرافق وياهم حسنين
وهيـچ مرن شهرين ونص
..
گعدت وبدلت للجامعة الي غصب عني دا اروحلها بسبب امي هالفترة لان كل واهسي خربان ، تريگت جاي وصمونه وطلعت .. شغلت السيارة وانفتح الباب الي گدام بابنا وطلع منه عثمان.. صار فترة ما لمحته ، لابس گلبية نيليه ونظارته تلمع لمع
هو من شافني تصنم شويه وبعدها تقدم مني ونبرة محايدة گال
- هلا ليل
- مو ليل اسمي يابشر
- هسه ردي السلام راسج مدوحس
- ممكن تسكت عزيزي ابو شوارب عوج ؟
رفع ايده يعدل شواربه يتأكد عبالك منهم عوج لو لا.. ابتسمت على الموقف ورفعت حواجبي
- تتأكد منهم عوج مو؟
- يابشر شككتيني بنفسي حتى ، اي شلونج؟
- شلوني تتوقع؟
- مثل ال.. الحصان عبالك
عوجت حلگي على حچايته وخزرته .. هو ابتسم
- وجه الثور
- النعامه
- ايعععع ، هم هذا تشبيه؟
- ما عاجبج؟
- چؤ .. غبي التشبيه محد صاحي يشبه بشر بالنعامه لان ماكو اي اوجه بالشبه! بعدين ذكرتني الدنيا الصبح شكو شعندك طالع؟
- ليش تغارين عليّه؟
عقچت حواجبي احاول استوعب كلمته بعدها طگيتها بضحكه مصريه بدون وعي
- بربك سوالف 2009 تصرفهن عليّه؟
- مو شكول وحده عاقله وربج
- خلينالك العقل خيو
- انا مو اخوج وعدلي حلگج متشوفيني احجي وياج بلهجتي؟؟ ترى لهجتي عراقيه واني عراقي ليش محسستني دا احجي وياج غير شي؟
- لان ما اگدر اتقبلك حيل ما عاجبني
- لا هاج عبالي صرتي حبابه كلت احجي وياج
- من يومي حبابه اني متحتاج تقيمني
- اممم
- ومأماءه لتضل تخبط حجي
- شگد صلفه رحمة لمحمد
- أصلًا ماكو احبب مني
- مبين الرقاصة المصرية
شهگت من گالها ورجع بالي للطلبية .. يمكن توني الآن بهذا المكان أستوعب أنُ الطلبيه الهُم راحت واله بالخصوص .. لو تسألون على موقفي اگللكم متمنيه صاروخ يشيلني من مكاني بدال هالفشلة ، رفعت ايدي أعدل گذلتي وحچيت بثقه متصنعه
- نعم؟ شداتقصد بحجيك؟؟
رفع طرف شفته بأبتسامه غليظة وكأنه يثبت كلامي غلط واعرف كلش زين عن الموضوع، صفنت بنظارته الي ظامين عيونه وصاير انعكاس الشمس عليهم وما يبينون وللحظة ما اعرف شحسيت .. يمكن خجل!
حمحمت اگطع تواصل عيونه وهو وبقى على وضعه بس رفع ايدة لشواربه ، تمتمت بس عرفت يسمعني
- عوج ترى ومكيف عليهن الاصخم
عض طرف شفته وضحك على كلامي ، أنتبهت للوقت وتراجعت للسياره بسرعة واني احجي
- أخرتني عن الدوام لحد
بقى ثابت بمكانه واني حركت بأتجاه الجامعة
..
بطريقي لـ الكافتيريا تلگاني محمدوه كالعاده ، مشى لجانبي وترك جماعته وگال يبتسم
- ها ضلعي شلونك مشتاقين
- يمته صرت ضلعك؟
- ديلا عاد ست ليالي فضيها وبسطي حلكج
- خل أبسطك اول وبعدها أبسط حلگي
- هههههههههه ولج افتحي يعني أبتسمي
- مرادفاتك عجيبه
- امممم واعجب هم ، صدك ملاحظة مريم صايره متسولف وياج هواي؟
- وانتَ حاط كاميرات مراقبة علينا؟
- شلووون لعد؟
- لتصير خفيف وصير جدّي وأعترف لا يأخذها الاحسن منك
بهت وجهه وحط أيده على مكان قلبه
- كلامج صاير يطلع من حلگج مثل البيكيسي يمعوده هووووب جرحتي احاسيسي
- صدقة توك تحس؟
- أهخ قلبي الصغير تحطم
- دنجب لتصير خفيف
- حاضر
جرها بضحكه وطلبنا اكل واخذناه وگعدنا على طاولة فارغة حتى ناكل ، سحب لفته وگعد ياكل بشراهة واني هم ماگلت لا بديت اكل واحنا نتبادل الحديث التافه ، سحبت كلينكس أمسح حلگي من خلصت وشربت مي
- شرايج اعزمج على عشه؟
- وين؟
- شرط انتِ تختارين المكان بس ..
- مادام بيها بس لا ربحت
- خليني احچي ليييالي
- دحچي وفضها
- تجيبين مريم وياج
- چؤ غلط هالخطوه ، تاخذها لازم وحدكم وتعترف بدوني ، جايبني شكو ضرتها؟
غص بأكله وكالعادة يضحك ويغص ، ضربته على ظهره لحد ما بعد ايدي وهو يفرك المكان بوجع
- گبر خليني اموت ولا اعيش تالي عمري بفقرات بالظهر عمي
- دروح روح صوچي
- لا بس حلوة ضرتها فكري بالموضوع
- محمد وحق محمد الي سموك عليه أمسح بيك الكافتيريا رايح جاي عشر مرات هسه ، بعدين اني مخطوبة
فتح عيونه متعجب وطبك حواجبه بعدها ضحك
- يا أثول الخذاج؟
- مثل الثوله الحتاخذك
- وحدة بوحدة مو؟ دحجي هسه
- اممم أبن عمي
رفع شعره مرجعة لوره وجهه بعدها صفن شويه
- اكره علاقات الاقارب
- شدخلني اني
- تحبينه؟
- اممم
- جدا حلو ، خطيه أمه داعيه عليه هواي
- اسكت احسلك
- سكتنا سكتنا متقبل على حبيبها ام حلك
رفعت عيوني قبل لا أجاوبه أنتبهت لشغله وما ردت يشوفها أبدًا
- اگلك شوف
- شنو؟
- خلي نطلع بالحديقة مليت هنا خنگه
أستغرب من طلبي بس بسرعة سحبته لغير جهه وطلعته واني اسولف احاول الهي لا يباوع لجهه ثانية ، تمشينا بالحديقه وهو حتى الذبان عيب عليه .. گعدنا بجهه وسولفتله بشكل سطحي على الي صار بعائلتنا بالفترة الاخيرة
- محمد: وشلونه ابوج هسه؟
- يگول زين بس اعرف هو محطم لأن جان يعشق شغله وسرحوه منها والأسوء راح يگضي بقية حياته بكرسي متحرك او عكازات لأن بتروا رجله
تنهد يفرك وجهه وحسيته صدك خوش مستمع
- لتحسسوه هو يحتاجكم لا عاملوه مثل قبل كلكم بس خلو شخص واحد يساعده بالأشياء اللي ميگدر الها واحتياجاته الخاصه ، مثلًا اخوج .. انتِ وامج سون نفسجن طبيعي وياه هو اذا شاف اختلاف او تعاملونه على أنُ ضعيف راح يتأزم اكثر
ابتسمت لنصايحه وهزيت راسي
- من وين تعرف هاي النصائح ؟
- أعرف شخص من اصدقائي تعرض لحادث وانشل جزئه السفلي .. تأزمت حالته النفسية اكثر من بدينا نساعده بـ نيه يطيب بسرعة بس هو اخذها من ناحية ثانيه وانُ هو محتاج وگطع علاقته ويانه كلنه
صفنت بكلامه وأحس فعلًا لو مريت بهيج تجربه ما أريد أشوف الكل يساعدني ... الوضع صعب
- شبيج صفنتي ؟
- دا افكر بشي
- شنو؟
- غلس ، عندك بعد محاضرات ؟
- لا ليش؟
- هيج واني هم عندي وحده مو مهمه .. خلي نطلع للبيت
هز راسه ووگفنا طالعين بأتجاه البوابة .. اجه ببالي مجتبى وتذكرت صار فتره ماشفته لان منعزل بغرفته ببيتهم وقررت اول ما ارجع اروحله لأن وضعة مو عاجبني ، ودعت محمد وصعدت سيارتي متوجهه للبيت وبالطريق عدلت هندامي حتى مباشرة اروح لبيتهم
نزلت وعفت أغراضي بالسيارة وتقدمت من بابهم افتحة وادخل ، چان اكو صمت مزعج ماكو اصوات ابدًا تعمقت بالبيت وشفت محد موجود كلها بغرفها يمكن، فتحت باب غرفة البنات وشفتهن گاعدات بكذا جهه
- السلام عليكم
رفعت ريام راسها تجاهي هيه ونرجس وابتسمت الهن
- ليالي: مشتاقتلجن بنات شلونجن؟
ردت السلام وگعدت يمهن جانت حتى نرجس ترد بطبيعيه لان محد اله خلك يتهاوش بهالأوضاع ، بعد ما مرت نص ساعة وگفت وسألتهن عن مجتبى وردت ريام
- بغرفتة كالعاده بس يطلع منها للحمام يسبح ويرجع .. حتى الدوام يروح اله كل اسبوع مره وراح ينفصل روحيله حبابه اقنعيه كلش متدمره نفسيته وما ياكل حتى
- هسه رايحه اشوفه ، عادي تحضرين اله اكل ؟
هزت راسها وطلعت وياي وهي راحت للمطبخ واني لغرفتة ، دگيت الباب بس ماكو رد ومن فتحته شفته متغطي كامل .. هو ما جان ينام بالنهار ابدًا لذلك حزرت هو مايريد يشوف احد ومسوي نفسه نايم
تقربت منه احاول ابعد البطانيه عن وجهه بس ثبته حيل بأيده ، مسدت على راسه وهمست
- مجتبى هاي اني
صمت دار بالغرفة للحظات وبعدها بعد البطانيه وجانن عيونه حمر عبالك مر بدوامة مال بجي من ساعات ، ماتحملت شكله ونزلت دموعي عليه ، صدمني من مد ايدة وسحبني لحضنه محاوطني وجرني وياه على الجربايه .. الوضع ماجان مريح ابدًا.. بس ماگدرت اطلع من ايده لذلك سكتت
رفعت ايدي امسد راسه على كيف وحچيت
- ليش هيج تعذبه گُلي؟ ترى دموعك عذاب اله وهو چان يريدك سند لخواتك وأمك بدال ما تعزل نفسك .. مانع الاكل ليش؟ تريد تموت؟؟ وينه مجتبى القوي الي نعرفه؟
قابلتني عيونه والقرب الي بيناتنا جان يوتر ، وحچه بهمس وصوت رايح
- ما اگدر ليالي ما اگدر.. احتاجه
- شنو الي بيدنا؟ ادعيله شباوي وارجع مثل قبل ماراح تستفاد شي بهالحزن ، واحنا نحتاجك ترجع مثل قبل و...
قبل لا اخلص كلامي اندگت الباب ، طفرت بسرعة افتحه وهو بقى بالجربايه، فتحته وطلعت گدامي ريام لازمه صينيه بيها اكل وهيه مبتسمه گالت
- خليّ يخلصها فدوه
ابتسمت بوجهها وهزيت راسي ودخلت بعد ماغلقت الباب ودرت وجهي اله، چان صافن عليه واني اقدم الاكل تجاهه، سحبته اخلي يگعد بعدها حجه
- ما اريد
- اذا ما أكلت أزعل منك تره!
سكت وهز راسه ، قدمت الاكل يمه وبده ياكل بهدوء
- شرايك نطلع اني وياك؟ نغير جو؟
- ما ألي نفس بالطلعه
- بس اني اريد اطلع
- أكلي وياي
- اكلت قبل لا اجي
- حتى لو شويه
شفته مصر ومديت ايدي للفواكه واخذت لالنگي وگشرت الي واله ، خلص ووگف يغسل وسحب ملابس من الكنتور ودخل يسبح، أخذت مواعين الاكل ووگفت اوديهم للمطبخ.. اخذتهم مني ريام ومقبلت اغسلهم
بقيت يمها اسولف مدة ورجعت للغرفة اشوفه ، چان ممشط وگاعد يلعب بالموبايل ومن دخلت عافه وباوعلي ، گعدت يمه بس هو سحبني من ايدي وصرت لازگه بي
- مجتبى ؟
- هممم
- شدتسوي؟
مد ايده لوجهي يرفعه وحجيت بتوتر
- شبيك ؟
ماحجه وتقرب مني وصار حيل قريب وانفاسه تطخ بوجهي
- ليالي
- ها؟
- احـبـچ
فتحت عيوني على وسعها من أعترافه وقبل لا أستوعب تقرب مني حيل بطريقة قذرة ما لازم تصير ألا بين زوجين .. دفعته بسرعه ووگفت أحط ايدي على رگبتي
- تخبلت انتَ؟؟؟
- ليالي ترا اني خطيبج
- ما يحق الك تتقرب مني بهيج طريقة إلا اذا تزوجنا او بيناتنا عقد شرعي!
- راح نتزوج بس تتخرجين
- من اتخرج ونعقد شتريد تسوي سوي ما امنعك بس هالحركات ما أحبها هسه
مد أيده يمشيها على خدي وهمس
- بس اني احبج ومتمني قربج يمي خصوصًا هالوقت الي اني بي حيل متدمر
- واني يمك وماراح اعوفك بس بيناتنا حد محد يتعداه مجتبى
جر نفس وهز راسه وگال
- احب اسمي من بين شفايفج
ابتسمت وأبتعد وخلق بيناتنا مسافة ، رفعت راسي وگلت
- من باجر تداوم وما راح تضيع هالسنه لو شما يصير ماشي؟ ترى ازعل منك والله
- أحاول
- ما اريد تحاول أريد أشوف أفعالك
- ماشي
تثاؤب واني هم للصراحة تعبانه لذلك وكفت وودعته وطلعت للبيت وأني أفكر بالي صار ورغم عدم رغبتي بي بس سكتت نفسي وفكرت بأنُه هذا خطيبي وعادي .. غلقت بابهم وتمشيت للبيت ، رغم اكو باب بيناتنا بس تكاسلت ادخل للبيت وانوب اطلع لذلك طلعت گبل اخذ غراضي من السياره
باوعت من الباب مال السيارة لگدام وشفت الموستنج تطلع من الباب مال الجيران وتتحرك بعيد عن الشارع .. وللحظة ردت الحگه واتوقع يروح لسباق او شي بس دست على حماسي ومشيت للبيت
دخلت وشفت امي تنظف بالبيت وهيه مبتسمة ، حجيت واني اتقرب منها
- دايمه هالبسمة بعد روحي ماما
- هلا يمه الله يقويج ، روحي بدلي وارتاحي اليوم بالليل يطلعون اخوج وابوج
- الحمدلله يارب ، يالله ابدل واجي اساعدج
- ماعندي شي ماما خلصت ، ارتاحي انتِ
هزيت راسي وگبل بوجهي للحمام سبحت وتدثرت بالديباج وغطيت بنوم عميق
..
- ها أمي يالله اجييت
عدلت شعري الي جان بوضعية ذيل الحصان وتعطرت واني اباوع لشكلي لآخر مره ، لابسة تيشيرت اسود بردن طويلة مع بنطرون عريض بنفس اللون .. فجأه خابرونا اصدقاء بابا وخوالي انُه راح يجون يتحمدون بالسلامة لان بابا طلع من المستشفى هو وحيدر
صح مرت عن وفاة مرتضى 3 أشهر بس بدينا نعيش حياتنا والحزن ما لازم يستمر بس تبقى غصه بگلوبنا .. اهله مستحيل يتخطون الحادثه الي جان سببها الدواعش الانذال الي ضيعوا ارواح آلاف الاشخاص الي بعمر الورد
اولاد واباء وابناء وسند ..
بابا فقد رجله صح بس يگول سهله جدا
بالنسبة للي فقد اخوه وابنه وابوه
مره فتحت كتاب من كتبه الي يحب يكتب بيهن اشياء متنوعة وشفت كاتب بعد الحادث مالته
" قد أكون خسرت عملي وبُترت قدمي وفقدت ما كنت أحب .. وابن اخي وتأذى ابني لكنني الآن بخير
بعد ذلك الفزع والانفجار والاشلاء التي تناثرت من اصدقائي علمت ان خسارتي لقدمي سهله جدًا
بعد رؤيتي لصديقي ابو ناصر وهو يسحب اشلاء اخوه من تحت الانقاض ويتم دفنها علمت ان اجمل شيء هو الشهاده في سبيل الوطن
وقدمي سبقتني بالشهادة
ومازالت أمنيتي استشهد ويارب ارزقني بها "
من قريتها للآن وبگلبي غصه، الله ينتقم من داعش يارب
دخلت للمطبخ ماما ورسل يحضرون بالحلويات والزلايط والمقبلات وطالبين الاكل من بره بس ماما سوت كم صنف هم
رحت للچاي والگهوه اسويهم وبسرعة خلصت مع آخر لمسه وهيه الهيل
طلعت للاستقبال الخارجي ارشرش العطر وشغلت بخور وسديته ، الدنيا المغرب راح تصير وهمه يجون بوقت العشه ، الباب الخارجي جان مفتوح ومديت منه راسي محد بره فدخلت وغلقته
دخلت جوه واجاني اشعار مسج ، فتحته وطلع ما مسجل بس عرفته لأبو الخرعات عثمان ، كاتب بيها
- شعنـدج كاشخة ؟
- شدخلك؟
- ثوله
- غثيث
- غبرة
- دروح لا أطلعلك
تركت موبايلي على جهه وطلعت مع امي مبتسمة على سخافة الموضوع ، تلگينه خوالي كلهم من اكبرهم لاصغرهم
تقربت احضن غسق بفرح وصارت ليله من العمر ، بعد ما أكلنا وحلينا اخذتها وصعدت لغرفتي واخذت موبايلي وياي ، اول ما دخلنا فتحته شفت اشعار مسج من شخصين ، طنشت اشعار عثمان وفتحت أشعار رسالة مجتبى وچان كاتب
- گاعده ؟
رديت عليه
- أي
- منو يمكم؟
- خوالي
- أها خوش
سديت موبايلي وانتبهت لنظرات غسق الي مليانه خباثة ورفعت حواجبي
- شكو ؟
- تراسلين منو يالهيلك وحلگج فاكته هيج؟
- الحب
- اويييي عييينيييي ، خلي اشوووف
قبل لا أمنعها لگفته من ايدي وفتحته لإن ببساطة حتى الرمز تعرفه ، تنهدت وشمرته عليه
- ايعععع فهاوه ماحبيت
- شتحبين انتِ ؟ انجبي
- لج لازم يدلع اسمج ويعترفلج بالحب مو هيج فاهي
- هو شسمه..
- شمصخمه إعترفي؟
- اعترفلي اليوم
صفكت وشهگت طافرة
- بربج؟؟ شلون ؟
سولفتلها كل شي وهيه ضربت راسها
- عزه العزاني وشلون يتقرب هيج؟
- دا اگلج لأن ما وافقت .. أصلًا هو بدون وعي سواها
- باعي مو ضدج اني بس مالازم هيج يصير حرام واني اشوف الافضل لاتبقين وياه بمكان وحدكم خاف يشوفوكم وتصير مشاكل ونعرف عائلتهم شلونها
- ان شاء الله بعد متنعاد لتخافين
- تعرفيني شگد احبج ؟
- اموت عليج
- اي وهذا الرقم منو؟ كاتب "أطلعي" ؟
- جوارينه هذا غثيث دا اتهاوش وياه كل ما أشوفه
- امممم جديد هذا؟
- اي نقلوا قبل كم شهر
- اوك تعالي اسولفلج سالفة ..
مرت الليلة على خير وسوالف ومواقف اليوم ببالي .. تونست ويي غسق حيل حيل لحد ما مشوا بنص الليل لان عدهم دوامات وماگدروا يبقون
ورجعت حياتنا بعد هاليوم طبيعية ، بابا ما خلى رجله تكون عائق وصار يطلع بالعكازات ويتحرك كل يوم يروح يم عمي يگضون اليوم سويه ويواسون بعض وحيدر رجع طبيعي وگدر يكمل دوامه رغم رفض أمي بس قنعها
واني وحسنين كالعاده نداوم
..
گاعده بالحديقه واتصفح بملل موبايلي وشفت علوش يركض بأتجاهي من بره ووجهه يضحك وعرفت من هيج تصير ملامحة جايب مصيبه وياه
- لولوو لولووو دحططتها "شخطتها"
عقجت حواجبي بأستغراب
- شنو؟ شسويت يمصخم؟
- هدا الجيلان و الشياله مالته الطويلة "هذا الجيران والسيارة مالته الطويلة"
صفنت أستوعب كلامه وحسيت گلبي يوگع بنص رجلي من الهبطة ، شخط الموستنج ؟؟؟؟؟؟؟؟
- السوده شخطتها؟ أحلف ؟؟؟
- وله "والله"
لطمت وطفرت أركض لبيتهم اسحله وياي شدخله هالمصخم هنا؟ عتيته وأشرت
- وين؟؟ ويييين؟؟؟
سحب ايده يركض للباب الوره واكو خطوط مسطرات هواي وممخلي بيها عزه العزاني ، عافني وركض واني افكر شسوي؟ هسه اكيد شافني بالكاميرات مال بيتهم وراحت علينه ، وشويه وابجي على سيارتي المستقبلية
سحبت موبايلي واخذت نفس واتصلت عليه ، رن هواي يالله رد
- ها ليل؟ شعجب متصلة اكو شي؟
گحيت وتنحنحت وگلت واني احاول أسوي صوتي طبيعي
- أنت وين عيني؟
سكت حسيته مستغرب بس جاوب
- بالبيت ليش؟
- أطلع اني بطارمتكم
مارد وسديت الموبايل أنتظر وافكر جنازتي شلون حتنگال؟ شهيده السيارة ؟ انتقلت الى رحمة الله ليالي بذنب مو ذنبها بس هيه صارت ببداية المدفع
طلعني من تفكيري عثمان من طلع وهو يلبس بالشحاطة وطلع يمشي مستغرب مني ، وصل گدامي وحجه
- ها شبيچ؟
- الناس تسلم أول
- وحق أبو فاضل مو فاضية سالفتج وصاير شي اكيد
- يعني أرجع لأسلوبي هذاك؟
- أرتاح اكثر لان جاي توتريني احچي شكو؟
- شبيك عبالك دا إعترفلك؟
صفن ورفع حاجبه وضحك
- أرفض اكيد اذا هذا الموضوع دروحي يالله
- أسكت وأسمع هسه الموضوع مايحتاج تعصب عادي خلي روحك مرحه وخلينا حبابين ولطيفين وجوارين گلب على گلب
- شكوووو هيو فضيها؟
سحبت نفس وأشرت على الشخوط وهو من شاف ايدي تأشرهناك وثبتت عيونه عليهم جحضت وباوعلي بصدمة
- ليل؟
ركض يتفقدها وتحول وجهه 180 درجة وعصب ويحقله صراحه
- ليش هيج فهميني شصار ؟؟
- بالغلط اخوي الصغير جايكم ولاعب هنا ومشخطها ، اذا تريد اني اعوضك
سحب شعره وحسيت على لحظات راح يبجي من گد ما عزيزه عليه ، التفتلي وگال
- عينج هاي مبينه مو؟
رفعت حواجبي بأستنكار وگلت
- لا بالله
- اي اي مبينه عينج
- حتى لو سيارتي المفضلة واموت عليها بس ما أحسد لان اعرف مستقبلي عندي مثلها لذلك أسكت لتصير دراما كينج
- عفوًا؟
تقرب مني وحسيت راح يجيني راشدي على الطاير فبسرعة طفرت أركض لجهه ثانية
- وربك لو تموت ما تلوحني خوش، واذا خسرت بيها بيعها الي
- ابيعها ؟ لو تنطيني كليتج خوش؟ هم ما ابيعها
- ايع شگد اناني
- اناني شنو؟ سيارتي ياناس شكو ابيعها؟
- عادي اشتري غيرها سهله
- ليل لو احطج وادفنج هنا هم واحد حيوان يگلي ليش؟
- ليش يمه؟
- تعرف روحها الحيوانه
- هيييو ترا والنبي اهجم عليك وانسيك حليب امك ياللبناني
- شعدها بروسلي
- انتَ وبروسلي وجون سينا واهلهم ماتگدرولي
- مو حيوانه
- والحسين انتَ عثه
فلتت للبيت من شفته يركض بأتجاهي ، وبوقتها دزلي رسالة كلها حب ومابيها غلط أصلًا ابد ابد مليانه حب لطيف وخفيف
وختمها ببلوك
..
- ها ليل؟
- شبيك أنتَ؟
- شبيه؟
- شو اراسلك ماترد؟؟ وين موعدنا؟
- يوه نسيت عايف الموبايل بالسيارة
- أحلف عليك أثول
- لسانج لا أبلعه الچ
- خفت كلش دارجففففف ، يالله منتظرتك يمصخم
غلقت الموبايل ووگفت بالانتظار ، اوگفو اشرحلكم الصار .. بهالفترة الي راحت صار ابو الخرعات صديقي .. أكيد تعجبتوا مو صح؟ هو أثول وهواي نتهاوش بس ما أعرف شلون صارت وتصادقنه وصرنه نسولف هواية
تعرفت عليه اكثر واكثر.. طلع حباب شويه بس
صار يشرحلي عن السيارات اكثر واتعلم اكثر ، عرفت عنه اشياء هواي مثل انُه جان يحب وحده وبعدها تركوا بعضهم ورجع للعراق .. جانت لبنانيه وللآن متعجبة عليها شلون باوعت لوجهه
بس ولو لا حظ للجميلات
المهم، عرفت عنه هوسه بالسيارات وهذا جان من صالحي لان هوس متشارك
ما گلتله على سالفة التصوير لإن ما أحس اريد اگله
دايم اسولفله عن مجتبى وينصحني بعلاقتنا
وما اطبق أكيد لإن ما أحس اريد اطور علاقتنا زيادة لحد ما نتزوج او نعقد بعدها اطلع مشاعري
وصلت سيارتة المحتحته الصاكة گدامي وأبتسمت الها مو اله
اليوم وأخيرا راح اسوقهاا.. حلمي الحمدلله
هذا جان الشرط الي أجلته قبل من اعتذر.. هيهي احب استغل الفرص
فتح باب الصدر وصعدت وهو حرك متجه لساحة فارغة لان العينتين رفض اسوقها بمكان عام لا أدعمها، أصلًا الاغبر يشكك بقدراتي
وصلنا لساحة أعرفها حق المعرفة.. جانت شبه فارغة ، نزلنا نبدل المقاعد وصعد عندي الادرينالين حيل ، لبست حزام الامان وباوعتله مبتسمة
- انصحك قبل لا نبدأ نصيحة؟
- الله يستر ، احچي
- حط حزام الامان
حطه وقبل لا يحچي شغلتها وحركت بسرعة مُفزعة .. صاح اسمي بصوت عالي بس ما أهتميت وزادت ابتسامتي من حركت المقود بسرعه ولافت بينا السيارة لفه كاملة وصوت المحرك يزمجر بوسط اذاني وأحس راح اگوم أهز من الحماس
- والحر مو صاحية انتِ بس أثق بيج
ضحكت حيل وحركتها وهو مبتسم.. تعجبت من ابتسامتة وبقيت احركها بسرعة وارسم بصمة التواير بالشارع
بس حماسي زال وتبدل بقلق من شفت مجموعة سيارات تدخل من معبر الساحة للداخل ومن عرفتهم عرفت الخير ما يجي وياهم
✤———————————————————✤
صورة حصريًا من ليالي 🔥
المشكلة عندي كومه صور لأحداث بس ماگدر اطلعهم 🙈
يمكن بالمستقبل ؟ ما عندي علم
-
هلا هلا حبااايباتي
لاتنسون الانستگرام | iwantmeto
واكيد اكيد آرائكم الي احبها 🫣 🔥
البارت من أعماقي انكتب وحيل تحمست بكتابتة
لاتبخلون علية بكلماتكم الحلوة ابدًا ♥️✨
دُمتم بِودّ
احبكم