وتيرة الاعرج

الوتيرة الحادي عشر

وتيرة_ الاعرج
بقلم : حوراء السعيدي

حبايبي لاتنسون التصويت من النجمه+التعليق
بين الفقرات + ومتابعة لحسابي .." 🍂hawraalsaidi

فتحت عيوني اون من الالم مصخن جسمي نار شفت مليكه كاعدة يم راسي تبجي  ..

-عمر: ليش البجي حبوبه

-مليكه: ولك البارحه مانمت من حرارتك سوده عليه

عدلت كعدتي بس جسمي مكسر سحبت ايدها بستها ..

- هسه احسن لاتخافين

- عمير لاتجذب عليه

- والله احسن .. وين ارسلان

- شمدريني بهل الدايح وين شايفته انه مكروده

انفتح الباب جان ارسلان دخل كعد بدون حتى مايسلم استلمته مليكه ..

-مليكه: وتالي وياك انتَ

-الاعرج: شبيج حبي شمسوي

- مسوي روحك فقير وانتَ الشيطان يتعلم منك

- حبي موزين عليج العصبيه

يحجي ببرود ومامهتم ضلت تحجي عليه وهُوَ اما يسكت اما يكلها حبي موزين عليج ويخبلها

-مليكه: انعل سلفه سلفاك جايبني حبي ماحبي انه وين احجي ولك توووب تووب

-الاعرج: اوف اوف يامليكة قلبي من حبي الج غير هسه انتِ لاكيتلج واحد يتغزل بيج

رجعت تحجي عليه كام وكف يم الباب يريد يطلع دزلها بوسه بالهوى وطلع هزيت بايدي بيأس منه شويه ودخل خالي كُميل بس شكله مكلوب كلاب خصوصاً من گال ..

-كُميل: اول مره اشوف عار يتمرض

عرفت ارسلان حاجيله كلشي بس ماردت افتح الموضوع كدام مليكه ..

-عمر: ليش مو بشر ما اتمرض

سكت مارد طلعت مليكه كعد بصفي ..

- مو بشر حيوانات انتم

- شبيك خالي

ماحسيت غير بالجكارة طابعه بايدي سحبتها
من جوه ايده ..

- شنو السالفه خالي چا هُوَ هيج

- حرك الجكارة اذاك وحسيت بالوجع چا شلون كدرت تحرك روح بنيه

الصمت جان ردي الاكثر الاسئله لان ماعندي
اي جواب رجع گال ..

- تحبها ؟

شجاوب اكله اي اكله لا وانه مادري شنو مشاعري بالضبط بس الي اعرفه انه ماكسرتها بس كسرت نفسي وياها ..

- لا ما احبها

- جبان

- خااالييي

- اذا ادري متقربلها بعد يشهد ربي ياعمرررر انه الي راح اوكف بوجهك واكسر ظهرك

- ماتقرب الها بعد لان خلص شغلي وياها

تفل عليه وطلع بقيت كاعد وحدي لزمت جهازي دخلت على رقمها سديته بأي وجه اخابر بعد الي سويتي ماينغفر انه استغليتها ونيروز وادري بيها شكد ماهيه انسانه نظيفه وگلبها طيب بس من تنجرح من شخص مستحيل ترجعه لحياتها حتى لو بيوم سامحته بس اتمنى اذا بيوم عرفت السبب الي انجبرت عليه تكدر تسامحني ..

******
طلعت من الغرفه بعد ماصار عندي فضول اعرف مقصد كلامه وكفت وصوتي يرجف ..

-غرام: شنو تقصد بكلامك

-كُميل: هااا

- شبيك وين صافن

دار وجهه وتحمحم وهُوَ يگلي ..

- احم .. خالي ادخلي جوه للغرفة وباوعي لنفسج بالمرايه

- مافهمت ليش

- هسه روحي

اباوعله حتى مايباوعلي شبيه هذه دخلت للغرفة وكفت كدام المرايه اباوع بخلقتي شكو هُوَ بس وجهي مزهمر احمر من البجي ردت ادور ارجع اله وفتحت عيوني على منظري الحجاب مرفوع وطالع من مابين رقبتي وصدري صخام صخمج غرام شكد فشله وين صخامج عبايتج شبيج شبيج ..

لبست عبايتي وطلعت شفته بعده واكف على نفس الوكفه ترردت احجي شكد فشل هسه شيكول عليه عضيت شفتي بقهر واحراج ..

- ءء شكراً

دار وجهه ..

- على شنو خالي

- لان طلعت شريف

مجرد حجيت هيج ماطول بصفنته ثواني وهُوَ انفجر بالضحك من كثر ماضحك بقى يكح ..

- شكوو تضحك فوك ماتشكرتك

- هههههههههههاي لا لا مو هيج

- لعد

- لان كلتي طلعت شريف ليش خالي قبل شنو جنتي ماخذه فكرة عني

- ما ادري

- تعاي تعاي خلي نسولف

رحت وراه امشي كعدنه بالصاله وبدأ يسولف بكل جديه شفت شخصية تختلف عن شخصيته الكوميديه ..

-كُميل: لا تفهمين كلامي غلط خلي اكمل والج المساحة تحجين براحتج

هزيت براسي ..

- انتِ بنيه شابه وحليوة وبداية عمرج انه مامحلل عليج وكل كعدتنا سوه غلط بغلط بس انه ماكدر اعوفج وحدج كلشي يصير لا تفكرين مستعطفج لا بس انه مارايد الحرام لا الج ولا الي لاتغرج شخصية كُميل الي شفتيها تراني اعرف بالحلال والحرام
الزواج الحل الوحيد النه

درت وجهي مهضومه بس مو من كلامه بالعكس كلامه كله صح بس مهضومه من وضعيتي ..

-غرام: بس انه ما اريد اتزوج

- غرررررام

كمزت من مكاني على صوته ..

- ء هاا

رد بهدوء عكس من صاح بأسمي ..

- تره انه خوش رجال وداعت عيونج الي يلمعن معروف باصلي وفصلي وهااا كرريم مو بخيل وانتِ شفتي يوميا اجيبلج اكل جاهز على حسابي من فلوسي

- تحسسني جايه اخطبك

ماشوفه غير حط ايديه الاثنين على وجهه وصار يسوي حركات بطني انشكت من الضحك عليه

- اوي اوي اخجل جايين يخطبوني

حجيت وانه فاطسه ضحك اول مره اضحك هيج
من زمان ماضاحكه من كل گلبي ..

- كاافي عليك الله ههههههههه

- هاي شنو هاي غير جايه تخطبيني شبيج ام عيون الي يلمعن

- ليش تسميني هيج

- شنو

- تسميني ام عيون الي يلمعن

وكف يعدل بملابسه ويمسح بايده على لحيته ..

- والله ياخالي عيونج بيهن لمعة خاصه

خجلت من كلامه اكتفيت بابتسامة رجع گال ..

- راح انطيج وقت تفكرين بيه براحتج بس مو اهواي

طلع من الشقه بقيت وحدي لميت رجليه لصدري حاضنه نفسي .. ليش مايفهم ما اريد اتزوج هُوَ مامجبور بيه اجت امي على بالي ياترى شنو حالتها هسه اختي شنو وضعها مشتاقتلهم وگلبي ميت عليهم مر الوكت هيج بس بجي ونوح واشتياق الاهلي والايامي قبل ..

وكُميل مارجع للبيت وانه النوم طار من عيني بقيت كاعدة صارت الساعة بـ 4:30 الفجر وانفتح الباب دخل بطوله شافني عكد حاجبه وباوع للساعة ..

-كُميل: كاعدة شو

-غرام:ما اجاني نوم

- وليش ما اجاج النوم

- ما ادري

رجع صفن وانه هل الصفنات مالته ما ارتاحلها ويصفن بوجهي ..

- مضيع شي بوجهي

- انتِ ليش تحبين تفتين گلبي

- ليش شمسويتلك

- انطقي هل الجوهرة وريحي گلبي رحمة لجدج محمد

- وانه كتلك بقراري وما اتراجع عنه قراري ثابت فكرت وشفتها ماترهم

عصبيته بهل اليوم خلتني اموت من خوفي وانه اشوفه يتقدم باتجاهي وعيونه انملت غضب ..

- لا تخليني احطج تحت الامر الواقع

- كلتت ماريد اتزوج ليش ماتفهم

- وانه اكلج تزوجين وتزوجيني انه مو غيري

- مو اذا كاعدة ببيتك معناها تتحكم بيه

- مامتحكم لا تخوطين بصف الاستكان

- وكلامك هذه شنو مبرره

- باجر راح نروح لمكان جهزي نفسج

- وين ؟

- من نوصله تعرفين ادخلي نامي هسه

دخلت واسب باليوم الي صرت بيه وبالدنيا نمت وقهري ياكل بروحي ..

للصبح كعدت خلي ابدل همزين من شتغلت شتريتلي بفلوس الشغل كم قطعة ملابس دخلت للحمام سبحت وبدلت طلعت هاي كله ركض بركض اخاف يشوفني عدلت حجابي باثناء ماجاي اعدل بيه اباوع لشكلي شصاير بحاله السواد جوه عيوني وجهي شاحب هه قابل القهر يروح خالي ابلاش حتى ضعفت بقيت كاعدة بمكاني انتظره يصيحلي مرت ساعة ودك الباب عليه طلعت وسئلته وين رايحين ونفس جواب البارحه من نوصل تعرفين ..

مشت السيارة تقريباً بالساعتين خفت بداخلي وين ماخذني هذه الى ان وصلنا لبيت انجذبتله من فخامة تصميمه وسيارتين واكفات يم الباب من ذني الراقيات فتح الباب كُميل بالمفاتيح الي بايده ..

-غرام: هذه بيت منو وليش انتَ تفتح الباب

-كُميل: بيتي الثاني

- بيتك شلون يعني

- هسه تفهمين كلشي

دخلنه جوه عيوني تراقب بجمال الحديقة شلون مرتبه ترتيبها عجبني انفتح الباب الثاني جانت مره موجبيرة كلش يعني زينه وجهه بشوش ابتسمت بوجهنا حضنها كُميل ويبوس بيها ..

-مليكه: ولك بسك وخر

-كُميل: اموت على ريحتج يمه فوك ماابوس بيج

ضحكت هيه دفعته من كدامها اجت عليه ..

-مليكه: هلا بيج يمه

ابتسمت بوجها بهدوء ..

-غرام: بيج اكثر خاله

- بعد روحي شنو هل الجمال اللهم صلي على محمد التفتت الكُميل الي واكف يباوعلنه بتك عين ..

- ولك صلي على النبي انتَ هم وياي

-كُميل: شنزلت علينه زليخه شبيج يمه هُوَ انتَ راح تزركينها بعين تكتلينها

- چبح لهل وجه  .. تعاي يمه تعاي وكفتكم على الباب

دخلنه جوه صار بوجهنا ولد شاب ماشايفته قبل ..

- حياهم الله

بقيت ساكته لان ما اعرف شرد من احد يكلي هيج كلام اصير فاهيه كلت بگلبي هسه كول السلام عليكم شتخسر عاد مادري حس مادري شلون گال ..

-عمر: السلام عليكم خويه

-غرام: عليكم السلام

كُميل: ها عمير الكلب شلون صرت

شبيه هذه هيج يحجي وياه ابتسم الولد ورد عليه ..

-عمر: احسن خالي

كعدنه واشوف المخازر بينهم شويه واحد يهجم على الثاني انفتح باب احد الغرف وجان نفسه الاعرج طلع  بملامح ماكدرت افسرها بس جانت ملامح حزن مجرد شافنه تغيرت ملامحه ..

-الاعرج: هاي شنوو منو عندنه

-كُميل: لازم اخذ اذنك يلا اجي لبيتك

غمز لـ كُميل وهُوَ يگله ..

- لا اذني احتاجها اسمع بيها

رجع التفتت الي مبتسم بوجهي ..

- اهلا وسهلا

رديت بتوتر احس بخوف من هل الشخص حتى بطني مغصتني..

-غرام: شكراً

كعد هادئ قليل يشارك بالحديث اله من احد يسئله فزيت من مراقبتي اله على صوت كُميل ..

-كُميل: غرام خلي اعرفج على هل الجحوشه حشه امي طبعاً

شوفي هاي امي مليكه شمعة بيتي وروحي من الدنيا اباوعلها مبتسمه والله شكلها محبوب وهُوَ جان يحجي وعيونه عليها رجع باوع للولد وهز بايده ..وهذوله ولد اختي هذه عمر ولا يعرف بملامحه البريئه وهذه ارسلان تعرفينه مايحتاج اعرفج عليه ..

- اتشرف بيهم

-عمر: خالي انتَ ليش تضوج من شكلي البريئ

-كُميل: تسكت لو اطلع خياساتك

-الاعرج: جايينه حامي كوم عمر صبله ماي مثلج

همستلي ام كُميل ..

-مليكه: تعاي وياي يمه

هزيت براسي ووكفت اعدل بعبايتي على راسي مشيت وراها دخلتني لغرفة مبينه غرفتها من اثاثها اشرتلي اكعد كعدت بمكاني واجت كعدت بصفي ..

- كُميل حجالي كلشي يخصج

جمدت حركتي من كلامها ليش حجالها تجمعت دموعي بعيوني ..

- خاله بس انه ..

- يمه اسمعيني

هزيت براسي ووضعي كله تخربط ..

- ابني رايدج على سنة الله ورسوله بالحلال ومايصير يايمه كعدتكم غلط سوه وصدكيني كُميل گلبه صافي ونظيف ويحب الخير وهُوَ رايدلج الخير مايكدر يعوفج لان يكول صارت من مسؤؤليتي

- خاله بس انه وضعي يختلف ما اكدر اصير زوجة اله

- رايد الستر الج مايريد منج شي وداعت الراحو ظلم

باوعتلها بتسائل ..

- منو الراحو ظلم

اتجاهلت سؤالي وهيه تكمل كلامها ..

- هسه شكلتي يابعد عيوني هُوَ طلب مني احاجيج

- لا خاله ما اريد اظلمه وياي وانه ما اريد اتزوج

حجيت هل الكلمات ودموعي نزلن حضنتني وهيه تواسي بيه وبمصيبتي ..

- انه اريدج مو بس هُوَ .. حجالي اهواي عنج الي صارلج راح يتجازون عليه اذا ماخذتي حكج بالدنيا راح تاخذي بالاخره امام رب العالمين

حجيت من بين دموعي ..

- بس انه ما اريد اتزوج ما اريد ليش محد يفهمني

رفعتني من حضنها باوعتلي بنضرات ..

- انتِ بس لا حسبالج ابني يريد يتزوجج علمود شي ثاني .. اذا هيج بالج يايمه ف احب اكلج غلطانه مو ابني الي يفكر هيج رايدلج الستر وتكونين بحمايته غير هل الشي ماكو وابني واعرفنه

- خاله بس هُوَ مامجبور بيه

- غصباً عليه عيل يعوف وحده مثلج اله ماعنده عقل

صارت تحجي وتحاول تقنع بيه بهل الزواج بس انه عقلي يكلي كولي موافقه وصيري تحت جنحانه اكيد هُوَ الوحيد الي راح يكدر يحميني وبنفس الوقت ضميري يكلي لا لان هُوَ مامجبور بيج غرام واذا اتاذه بيوم من الايام ف السبب راح يكون سببج زفرت نفس بحسره احسه شك گلبي باوعتلها منتظره جواب مني ..

-غرام: خاله راح اوافق بس بشرط

-مليكه: اعتبريهن كلهن موافقين عليهن

- لا بالاول اسمعيني

- احجي يمه

- راح اوافق على هل الزواج لان انه ماقبل بالحرام ولا عمري تقربت اله او سويته وصح كلامكم كعدتنه كلها غلط بغلط بس انه ..

فركت اصابيعي بتوتر من كلامي گالت ..

- انتِ شنو بنيتي احجي لاتستحين اعتبريني مثل امج

- انه ماراح اصيرله زوجة مثل اي اثنين مزوجين مجرد اصير على اسمه وهُوَ يكمل بحياته مالي اي حق عليه

- الي تريدي يصير

- اسئلي كُميل

- بدون ما اسئله مالج علاقه بيه كتلج ابني واعرفنه
هسه شني الي افهمنه موافقه

غمضت عيوني وكل حسرة تطلع مني تهدم جبال ..

- اي خاله موافقه واتمنى قراري صح ومااتندم عليه
بس انه ما اريد عرس

- ليش يمه

- العرس موالي خلي زواجنا يتم بالشرع والقانون بدون اي مراسم زواج

- براحتج يايمه

طلعنه من غرفتها شفناهم بعدهم على نفس كعدتهم يسولفون صارت انظار كُميل عليه نزلت راسي كعدت بصف امه ..

-كُميل: ها يمه

-مليكه: ان شاء لله خير يمه

ماكدرت اباوعلهم منحرجه وخجلانه من هل الشي گال كُميل ..

- يلا حضرو نفسكم لزواجي

رد عليه الاعرج ..

-الاعرج: الباقيه بحياتك خالي

صاحت مليكه بيه ..

-مليكه: فال الله ولا فالك وعليمن يمه الباقيه بحياته راح ياخذ وحده ماكو منها جمال واخلاق وحشمه شنريد اكثر

-الاعرج: على كيفج حبي لا يطكج عرج

كتمت ضحكتي شلون صارو يداهرون بالحجي هيه وياه بقو يتداهرون لحد ماطلع ..

******
الحمدلله بده بابا يتحسن اندك الباب رحت افتحه اتفاجئت بالواكف ..

-غياهب: انتَ ؟؟؟

ضل يتلفت ورجع ثبت نضره عليه ..

-الاعرج: ليش اكو احد غيري ششوفين انتِ

- اتفضل شرايد

- اجينا نتحمد لحضرة الوالد

- واو

- اي

- بس بابا صار احسن بعد وكت لزيارتك

- اشغال .. راح تبقين ضيفكم واكف يم الباب

ردت ارد واجانه صوت درغام ..

-درغام: حياك الله

التفت لدرغام سلمو على بعض عفتهم دخلت جوه لحنين سمعت اصواتهم دخلو وصوت ابويه يرحب بيه ..

-حنين: منو اجانه

-غياهب: صديق درغام

- هاا علي لو مجاهد

- ولا واحد منهم

- لعد منو

- شكد تلحين كتلج صديقه

- بسس لا هذه الي شفناه بالمستشقى

- امم اي

- احووي شكد صاك

- ايععع منيله جهرته جهرة مجرمين

- غياهب شو اسكتي هو انتِ منو يعجبج

- اكلج

- كولي عيني

-غياهب: نيروز احسها مو على بعضها

اخذت تفاحه وكعدت تكصص بيها وتاكل واختي واعرفها ضامه شي ..

-حنين: يعني شلون مو على بعضها

- هُوَ انه ليش سئلتج علمود تنطيني جواب مو تسئليني يافهيمه

- مادري ماحاجيتلي شي يجوز هيج تعبانه

- اهاا كتيلي تعبانه

- هسه شكو تباوعين بهل الطريقة ذاك بيتهم وروحي الهم اسئليها رجاءً لاتدخلوني بالنص

وكفت اسوي ضيافه للخطار وفعلاً نيروز وضعها ماعجبني لازم اشوفها واحجي وياها معزتها بمعزة حنين صح اصغر منه بسنتين هيه بس ويانه من الطفوله خوفي عليها مثل خوفي على اختي ..

دخل درغام والصلف كبل راح لحنين وهاي فتحت حلكها مترتين على كولتها سر سعادتي هُوَ ..

-درغام: چفوصي شلونج

-حنين: زينه دلغام

- فدوه اروح

-غياهب: احم الضيافه جاهزه

-درغام: ضلي انتِ ضلي تنطيله ما ادري منين وتخربين بكلشي

ضحكت اخذ الضيافه وطلع صعدت بدلت لازم اشوف نيروز ذيج الفترة ماكدرت لان وضع ابوي مايسمح وخطار بس هسه الحمدلله نزلت لكيت حنين بعدها كاعدة وعيونها بالجهاز ..

- حنين انه رايح لبيت خالي عمران اذا بابا سئل كليله راحت الهم

- خلي اروح وياج

- لا ابقي يمكن يجي احد بس اشوف شوضع البنيه

طلعت همه موكلش بعيدين علينه فرق شارعين باثناء ماجاي امشي شفت عمي الجبير ومثل كل مره ماسلمت مايستاهل وصلت لبيت خالي همه مخلين كامرات ببيتهم اكيد هسه شافوني دكيت الباب طلعتلي خاله حياة ..

شكد احب هل الانسانه واحنه علاقتنا بالاصل بس ويا بيت خالي جابر وخالي عمران بقية خوالي سطحيه على كد السلام ماحسهم حنونين مثلهم ..

-حياة: منين الشمس طالعه اليوم يالكاطعه

-غياهب: ههههههه والله ياخاله حقج بس بعد تدرين بالظروف وماكو مجال الخطار لليوم واحد جاي واحد رايح

دخلنه جوه وهيه تسئلني على بابا وحنين لان صدك من زمان ماجايينهم من ذاك اليوم المشؤؤم ..

- نيروز وين خاله

باوعتلي بحزن عرفت اكو شي ..

- جوه بغرفتها وياريت تشوفينها شبيها راح تموتني صارلها فترة على هل الوضع حابسه روحها بغرفتها

ابتسمت بوجها وانه اطبطب على ايدها ..

- ان شاء لله لا يضل بالج

دخلت فتحت الباب شفتها نايمه ومغطيه روحها كلشي ماطالع منها ..

-غياهب: هييي نيروز شنو نايمه

ماردت عليه شلت الغطه منها باوعتلي بانزعاج ..

-نيروز: اهووو غياهب عوفيني

- دنجبي وكومي شنو هل الحاله الي انتِ بيها كوومي

كومتها كوه كعدت وكعدت كبالها اباوعلها البنيه ذبلانه عن قبل ..

- شبيج حبيبتي ليش هيج وضعج

- مابيه شي مجرد تعب

- سوالفنه ذني الله يسلمج

حسيتها جانت محتاجه هل الشي شخص يضغط عليها تطلع الي بداخلها صارت تبجي بجي فضيع وحاطه ايدها على حلكها تمنع صوتها يطلع ..

- نيروز باوعيلي شو شبيج ليش هل البجي لا تخبليني

نامت على رجلي ..

- غياهب انه تعبانه

- زين من شنو احجيلي انه مو اختج

- انه رجعت غلطت بعد ماجنت ماخذه حذري

مافهمت عن شنو تحجي بالضبط ..

- اممم حاولي تفهميني بشنو غلطتي بسس لا اديب الحيوان رجع تواصل وياج

- لا شهل قندره حتى رقمي ابوي غيره من زمان

- لعد شبيج لا تخبليني شكو هيج حالتج

كعدت تمسح بدموعها ورفعت شعرها القصير يجي طوله جوه من اكتافها ..

- حبيت شخص

- نعم ؟؟

- اي

- منو هل الشخص

- تعارف من اول كلاص عصير

- هههههههههههه لا بله شهل تعارف

- ههههههه والله شبيج ما اشاقه

بدت تحجيلي وكل كلمة تطلع منها جانت كفيله تشرح كل مشاعرها ..

الرجوع الى قبل 3 سنوات ..

امشي بحذر صرت حذره بكلشي من بعد غلطتي بمراهقتي ويا اديب وشلون ضحك عليه وشلون وصلت فقدان الثقه بيه من اهلي كلشي جان ابالي وكفت اشتري شي اشربه طلعت فلوس من جنطتي ردت ادفع واجه صوت ولد هادئ مثل شكله ..

-عمر: الحساب عليه

-نيروز: لا شكرا مايحتاج

التفتت للي يبيع كتله ..

- عمو شكد السعر

- الف

قدمتله خمسة الالاف جانت بايدي ماعندي خرده گال ..

-البائع: ماعندي خرده عمي

- هاا يلا عادي عمو ماريد

صرت امشي سريع دخلت للجامعة كعدت ماعندي احد لان فاقدة الثقه بالكل بعد الي تعرضتله ..

انحط بصفي عصير رفعت راسي شفته نفسه الولد الي شفته يم ابو العصير ..

-عمر: تفضلي

-نيروز: شكرا ماريد

- الجو حار واكيد عطشانه

- كتلك ماريد عيوني شكرا الك

- بس مايصير اعتبري دين هسه بعدين رجعيلي الالف

صرت اتأفأف من وكفته گال ..

- راح تطكين بكد ماتأفأفتي يمعوده

- رجاءً عوفني واخذ عصيرك وياك

- تره صرفت الف ربع ينطبح ربع والالف بيه اربع رباعه

كتمت ضحكتي ..

- تره هُوَ الف شبيك كتلت نفسك

- ماجايبه بسهوله تخيلي اشتغل وانه طالب جامعة وهسه صرفته عليج

- اي اشربه انتَ مو بحاجته انه

- لا مايصير انه بعد شتريته الج

مارديت عليه من شافني هيج عافني وراح وانه ميته من العطش ومشتهيته لزمته بايدي مبتسمه كعدت اشرب بيه ..

بعدها صرت اشوفه كل يوم بالجامعة بس هُوَ جان مرحله اخيرة ما ادري شلون كدرت انطي مجال يدخل لحياتي ..

الرجوع الى الحاضر ..

-غياهب: حبيت التعارف بس شصار ليش وضعج هيج

-نيروز: صار شي مامتوقعته ومنه خصوصاً

- اي ؟ شنو تره موتيني

- تقرب الي بدافع شي واحد

- شنو

- الانتقام

صفنت بوجهه استوعب كلامها ..

- انتقام ؟ انتقام شنو

بدت تحجيلي كلشي صار من راحتله وشلون حجالها كلشي ..

- غياهب هُوَ استغلني

- بس تبقى نقطة مفقودة الانتقام من منو ؟

وكفت تفتر بالغرفه وهيه حايره ..

- ما ادري ما ادري غياهب راح افقد عقلي من جهه مقهوره لان استغلني وكسرني ومن جهه اريد اوصل لنقطة فهم بخصوص اي انتقام وليش ومن منو وانه شنو علاقتي بهل الشي

- راح نفهم كلشي بس نيروز حاولي تكونين طبيعية كدام اهلج بدو يشكون اكو شي خليج قوية وارجعي لطبيعتج وماكو شي ينضم لابد يظهر كلشي

باوعت من الشباك الدنيا ليل صارت وكفت لان اتأخرت كلش من العصر جايه ..

-غياهب: انه هسه راح ارجع للبيت وانتِ مثل ماوصيتج هل الـ عمر اكيد وراء شي بس اتوقع هل الشي جبير وخطر لذالك حجالج وبعدج عن طريقه

طلعت صارت بوجهي خاله حياة ..

-حياة: وين رايحه ولج

-غياهب: خاله لازم ارجع للبيت اتأخرت

- هسه خالج يضل يحجي بس يدري رحتي

- والله ما اكدر غير مره ان شاء لله

طلعت والشارع يصوصي بقيت امشي طلعت من اول فرع دخلت بالفرع الثاني مباقي شي واوصل لبيتنا بس اتوقفت عن المشي من شفت سيارة وكفت سوده باوعت كلشي ممبين منها عكدت حاجبي صار خيال من وراي ردت التفت وانحط شي على وجهي فقدت التوازن وانه ادفع بيهم غمضت عيوني فاقدة ..

فتحت عيوني ماشوف شي بس سواد عيوني مغوشه شويه شويه بدت تتوضح الرؤيا عندي واحد واكف لابس سواد بسواد منطيني ظهره لاف للثام على وجهه ركزت بيه هل الهيئه مو غريبة عليه ..

معقوله هُوَ لا مستحيل هُوَ خلاص راح دار وجهه الي لابس مناظر سود والدنيا ليل شبيه هذه ابتسمت بأستهزاء ..

-غياهب: شبيك داده لابس سواد بسواد

جان اكو كرسي وره لباب كعد عليه ومايرد عليه بس يهز براسه اتأفأفت بعصبيه ..

- يول شبيك خنيث رابطني تعال افتح الحبل واشوفك النسوان شتخلف ولو امي مابيها حض مثلك بس الي رباني خوش رجال

جسمه صار يهتز الواضح يضحك اجه يمشي باتجاهي وبايده نفس الكرسي الي جان كاعد عليه كعد كبالي وعطره كفخني هذه العطر مو غريب عليه بلعت ريكي شجاي يصير ياربي  زادت دكات گلبي ..

- منو انتَ ؟

نزع النضارات من عيونه وشال الي على وجهه توسعت عيوني بصدمة من الصدمة حتى عيوني توقفت عن الرمش ...

للحكايا بقايا ..»

توقعاتكم للبارت القادم ..!

لاتنسون متابعة حسابي الانستا 🌼

Instagram: hawraalsaidi

للاسف حسابي مارجع بس ماريد اتأخر بتنزيل القصة بحال سويت قناة جديدة انشرها الكم هنا قلبي وشكرا من القلب للناس الي تلمستلي العذر .