#مراس_الدعجـاء ♥️
لا تنسون التصويت (النجمة) والمتابعة واهم شي تعليقاتكم الحلوة شباباتي🔥♥️
واگطع اظنوني وحنين الـروح لو حنت لهلها
لـ عريان السيد خلف 💙
✤———————————————————✤
اخذت فلوس وطلعت اشتري شي من ابو علي واني كل بالي وي موبايلي
توني تقدمت اريد أعبر الشارع ما احس إلا وسيارة تقدمت بسرعة وصار صوت عالي وفتحت عيوني مصدومة وخايفه من شفت رجال جبير بالعمر يطلع منها ومعصب يصيح
- سلااامات؟ عيونج وين؟؟؟؟؟
- ليالي: العفوا ما أنتبهت
- دروحي روحي وانتبهي مرة ثانية
صعد واني للآن ما مستوعبه الصار بس الحمدلله ما متت بحادث سيارة وتدعمني سايبة مثل الي صاعد بيها .. اوووف ياتفكيري
عدلت بجامتي الصفرة الي نفس لون تيشيرتي وتقدمت للسوبرماركت وتعدلت نفسيتي من شفت الجبس المفضل عندي .. الفلفل ، طفرت اخذ 8 وادخل للمحل بدون ما انتبه لاحد
- الله بالخير عمو
نزلت الجباسة على الميز ورفعت عيوني بس استغربت محد موجود ! وين راحوا ؟؟ ضليت أتلفت بكل مكان وآني اصيح
- عموو؟؟؟ عمو ابو علي؟
بقيت واگفة بمكاني بعدها شفت الباب انفتح ودخل شخص بس مو عمو ابو علي!
- انتَ منو؟
رفع الشخص عيونه إلي بأستغراب وبعدها ابتسم
- انا علي
فتحت شفايفي بتعجب لان ماعمري شفته بس بعدها گلت بجمود
- اخذت هذني ، حاسبهن
- مو تدلل الحلوة
- حلوة بعينك تأدب
- اااا ؟ شبيج معصبة؟
- بكيفي هسه حاسب الغراض أريد أروح
- اعصابج بس ، الحساب 6 الاف
- هاك
اخذتهم منه ونظراتة ابداً مو مريحة شكلة ابو نسوان بجدارة ، طلعت واني اكل بالجبس ومستمتعة بالشارع والناس الي بي ، شفت بعد وقت وبسرعة ركضت جبت السكوتر وحركت للساحة مال السباقات أستغل الوقت لان للان ما اعرف اذا اكو سباق ثاني او لا
تقربت گدام سياج الساحة والشارع بارز گدامي والعجيب أكو اشخاص ما اعرف شنو يسوون بالمكان بس عبالك دا يجهزون لـ شي، عفت السكوتر بمكانه وتقربت من شخص قريب من مكاني وسألت بعد ما تحمحمت ورفع راسة
- احممم أخي ممكن سؤال ؟
- تفضلي أختي ؟ بشنو اگدر اساعدج؟
- بس أريد أعرف شنو دا تسوون؟ اكو سباق راح يصير؟
عقج حواجبة مستغرب يباوع لهيئتي من فوك لجوة وگال
- ليش؟
- اا ، مو شسمه اخوي يتسابق هنا لو أمي عرفت تگطع النعال على رأسه واريد احذرة
- اممم، لا الساحة اليوم محجوزة وماكو سباق للسيارات
- زين لمنو محجوزة؟ هي مو للسباقات مخصصة؟
- أي بس تنحجز اذا يريدون يسوون بيها تحديات لأطراف قليلة بينهم بدون تدخلات من أشخاص غير، يعني يتسابقون سباقات خاصة
- اممم جميل، زين لـ منو محجوزة؟؟
- خصوصيات ما اگدر احچيها ، أنصح تروحين لان اكو هنا شباب مو زينين وخاف يأذونج
- ليش يعني؟
باوعلي لثواني وزفر
- خويه روحي مالي خلگج
مشه وبقيت أغلط علية بداخلي بس ما ارتاحيت للترتيبات اكيد اكو انَ بالموضوع ، طول جياتي للساحة ماكو سباقات خاصة!.. ما اعرف ليش اجه ببالي الشباب الي جانوا يتهاوشون هذيج الفترة بالساحة وكلامهم ببالي حيل ، تركت المكان ورجعت أتمشى للبيت
بذيج الليلة ما گدرت اطلع لان بابا وحيدر أخوي الجبير رجعوا.. يعني الحصار مشدد صار وحيدر يتخبل اذا طلعت خصوصا بالليل ، وانا جفيت شري لان ما الي خلك اتهاوش وياهم واذا يعرفون طالعة يكسرون الكاميرا على راسي ويشنقوني من ظفايري
طلعت من غرفتي واني اسمع هوسه برة وأصوات قوية مال حفر وما اعرف شنو ، تقدمت لماما وهي گاعده توكل علوش
- شنو هالاصوات ماما؟ هوسه وراسي يوجععععنييييي شككككوو!
- انتقلوا جيران جديدين ودا يسوون تصليحات وانخبصنه
- ليالي: هسه مايگدرون ينصون الصوت ؟؟
- لا مو هو دي جي؟ لتصيرين غبية يا أمي ترى كبرتي !
- رحم الله والديج ماما
- امشي تريگي اكو بيض طگ
- اووووك
رحت واني شايلة الصينية للصالة واتثاوب من النعاس ما شابعة نوم ، رجلي مرفوعة البجامة عنها وشعري مهلوس بس مسويتة كبة
گعدت اكل ووگفت بعد ماخلصت وغسلت الصينية واتجهت لغرفتي حتى أبدل لان راح اروح لبيت خوالي انا وماما ومن أمس أتفقنا ، غيرت ملابسي ورتبت اغراضي بالجنطة وانا اسمع ماما تصيح
- صخيمه لييييالي دفضيها اجه اخووووج
- جااااايه جااااايه
بسرعة رشيت عطري وطلعت لان راح يسوونها زقنبوت علية اذا تأخرت ، عاداتنا وتقاليدنا .. ركضت برة واني اشوف عمال هواي ببيت الجيران الي مقابيل بيتنا بالضبط وعقجت حواجبي مستغربة لان هذا البيت ما جان بي أحد من سنين بس حارس عايش بي!
جان بيت ضخم وحديقته تبين من السياج ومكون من طابقين بس كبير .. أستغربت ليش بعد هالسنوات أنفتح !! ومنو راح يسكن بي؟ صاحني حيدر حتى استعجل وصعدت بسرعة وتحركنا متوجهين لبيت خوالي وانا متحمسه حيل لان احبهم حيل حييل
بعد طريق طويل واكثر من ساعة وصلنا لبيت خوالي الحمدلله... بيت يجنن ومليان حُب ، شگد ما احچي شگد انا احس بالامان والراحة هنا ما اگدر لان ما ينوصف جمال البيت
دخلنا وحيدر صاح جملته المعتادة
- الله بالخير يا آهل البيت
ابتسامتي شگت حلگي وعبرت اذاناتي من طلعوا بأبتسامات بشوشه يرحبون بينا ودخلونا جوة بالاستقبال وصاح خالي
- نور البيت بيكم ياهلا
- ماما: منور بوجودك حبيبي خيي
جانوا گاعدين خوالي اثنين وزوجاتهم والبنات لسه ما دخلن وانا منتظره على نار يجن ، شوية وحيدر استأذن وطلع بعد ما تعذر بالشغل وسلم وطلع
قدموا الضيافة واني گاعده على جهه اتبوسم ومنتظرة الفرج، باوعلي خالي الجبير وگال
- ياهلا خالو لولو شلونج شخبار الدراسة
- الحمدلله خالو، والله على الله الدراسة
- الله يقويج بعد خالج
رفعت عيوني من انفتح باب الاستقبال الداخلي ودخلن البنات وعيوني بدت تطلع قلوب مشتاااقتلهن حيل ومن زماان ما شفتهن ، دخلن اثنين كبار ووحدة صغيرة ، غسق وبتول ورقية
-السلام عليكم
طفرت اسلم عليهن ولزززززكت بغسق حيل حاضنتها هاي اعز صديقاتي ويضحكون البقية علية، سحبتني وگعدنة ركن بالاستقبال نسولف ونبسبس
- ليالي: لج حقيرة مشتااااقتلج گلبي متگطع عليج وين ما وين؟؟
- غسق: حياااتي اني اكثر والله شسوي تعرفين ادرس جنت وما جايينكم من زمان
- ما جبتي موبايل للآن ، وشكو تكسرين هذاك ياغبرة؟؟
- اووووف ليالي لتذكريني عبالي اذا كسرتة يجيبولي الايفون الجديد بس عرفوا اني عمدًا كاسرته وما يقبلون يجيبولي عقاب كم شهر تخيلي؟ حنتحرررر باقيه على الهواوي الزفت مال ابوي القديم
- هو اذا ارگعج بالحايط هم واحد مطي يگلي ليش؟
- لييييييش؟
- لج غبرررة متجوزين عندج ايفون مابي شي ومن سنتين جايبته تكسرينه شكوو؟ ما حامدة ربج وساكتة
- اووووف أسكتي لتبجيني وتهيجين المواجع
- غبرة واني ابقه هيج منتظرتج وبدون تصخيم تواصل؟؟
- يالله ان شاء الله هالشهر اجيب اذا ما جابولي انتحر واخليكم تتحسرون عليه
- لتصيرين فاهية كلمة والثانية انتحر شتنتحرين انتِ؟؟؟ جهنم وگبر يلفج وفاتحة يومين وسبعة واربعين وحول وفضت راحت وحمار الي يتذكرج بعد خوش؟
- والله انذر بس اموت اخليهم يوزعون اندومي ولفات فاهيتا ما يصيرون معدان ولازگين بالمفطح والبيذنجان
- انجبي شگد تفكيرج خايس
- يوووووه عاد بس انتِ بقيتي ما رزلتيني ، صدك اگلج امشي لغرفتي نرتاح هناك ونسولف براحتنا
- يالله بالاحسن
وگفنه وطلعنه لغرفتها وبراحة ذبيت نفسي على جربايتها واني استنشق عطرها الطيب بكل مكان
- ليالي
- ها
- اگلج للآن تطلعين بالليل؟؟
- أكيد داده أكيد ، شغلي هذا
- شغليشش متفهميني؟؟؟ ولج لو يلزموج والله يسوونج وصله مشگگه
- چؤ، محد يگدر يلزم شعرة مني بعدين لتخافين وماخذة احتياطاتي
- شلووون انتِ جريئه هيج؟ لو منج اموووت ولا اخطي خطوة برة
- يوه هسه شمسويه عبالك دا انهب ترى هو تصوير
- حجي يفيدج داده، شلون راح تقنعيهم؟؟
- اني ليالي الحرباء واتلون واسمعهم اليردونه والعب بعقولهم واتلون حسب لونهم مو الونهم وياي
- دطييييري لج عبالها بفلم ، لج بابا هذوله نعل يوكلونج اذا لگوج بالليل طالعة عبالهم انهزمتي
- سدي السالفه غسق لا اجي ادفنج
- ولي ولي
- دكلي خ*** واحجي عدل
- زين ليالي اگلج
- گوليلي؟
- هم شفتي حلوين؟ يعني هيج عضلااات وحركااات وهيبة
- لا اچفص ببطنج ترا مصختيها؟ اني أصور السيارات هذا شغفي الوحيد غسق وابد ما أفكر بهيج اشياء بعدين هو ياهو يباوع لخلقتهم؟ كلهم يتباهون بسياراتهم وبس
-اووووف ليالي لتصيرين عقدة هسه واذا؟ امنيتي اتزوج شخص هيبة وعلى اكتافة نجووووووم
- ضابط؟؟ ايعععع صدك ماعندج ذوق!
- شبيهممم الضباط داده؟؟؟؟ يخبلووون
- ما اوصيج صيري ملطلطه وأبقي بأحلامج الوردية
- اوووف شلون احلام تشك شك
- اثگلي لا بالنعال
- عبالك ولد شلون ما تتحرك مشاعرج فهميني؟؟
- ما اهتم بخزعبلات مثل هيج مو ما أحس وبالعكس عندي مشاعر بس اطلعها للي يستاهلني بالحلال وتعرفين أصلًا انا مخطوبة
- غثثثثة ماخذه هذاك الابلك ولج فلا ارتاحلة لا خلقة ولا اخلاق
- ما اسمحلج غسسسق!
- خفت خفت
- دنجبي هسه
- ما اعرف شلون ما تفكرين مثلي؟ يعني نعيش علاقة حب ونتزوج بالنهاية! الله
- يمكن لان ما اميل لهالاشياء حيل ومهتمه بهواياتي ولا بحياتي حيز لهيج مشاعر تافهه مثلج
- رحم الله والديج وصل سهمج
- تدللين
- المهممم ليالي صدك شنو تتوقعين معدلج؟ ولج بعد كم يوم النتايج عزززه بعيني
- مزفتة الله وكيلج ومبينه هذيج وينها الكتلة تنتظرني من امي .. تتذكرين العام واحنا مكيفين بالشهادة المحمرة؟؟ السنه يحمرون جلدنا مو الشهادة
- لتخوووفيني لا ان شاء الله زينه لان هالسنه حطوني معهد وصخام ، اذا رسبت يطلعونهن من عيوني
- اوف تعبت من هالزفت السادس حتى بالاحلام يجيني
بقت تعدل بمكياجها ونسولف وكل شوي سالفة تجر سالفة لحد ما وگفت
هي وصفنت شويه وباوعتلي بتردد
- ليالي
- خيرج؟
- أريد اگلج شي بس مو تعصبين علية فدوة
- مبينة لعد السالفة داچه واحطج وافرش بيج الگاع
- هسه شبيج عادي بس انتِ معقدة ما اريد اسولفلج
- دحچي لا اطلع جعفر الي بداخلي
- لا يمه راح احجي ، شسمه انا مكرشة على شخص
- هلو؟؟؟؟ شنووووو؟؟؟؟؟
- مكرشة ما راسل شبيج ؟؟
- كرشوا عليج العفاريت والجن والجناني
- شبببيج ادبسز خلي اكمل حچيي
- دكملي كملي
- فـ شنو هو ابو نجمة على اكتافة
- ضابط؟
- اممممم ، بس شنو يملخ يطك بالگاع
- الفاضج عدليها لا اعدل معاني وجهج
- والله احجي الصدك!!
- اي وين عرفتي؟
- هو بالانستگرام شفت حسابة
- اي؟
- دزلي طلب وللان محتارة اوافق لو لا
- لج بلاااااااء اغبر انتِ؟؟؟
- انچبي لتكسرين خاطري شبيج
- افلشه تفلش هم، هذا الملطلط اذا وافقتي عليّ اكسر راسج ، گلتلج صيري مؤدبة لان عيب هالتصرفات وولد لا تقبلين بالحساب!
- دنچبي ليييياليييييي انتِ مو امي وبكيفي
- ماشي اني مالي دخل بعد
وگفت اريد اطلع من غرفتها بس بقت لازمة ايدي وتحاول تصالحني
- باعي غسق احنا صح نفس العمر بس تصرفاتج مال زعاطيط!! وين عقلج؟؟
- خلص ما راح اقبل بس لتزعلين ما اگدر لزعلج
- امبييييتها البامية شگد تنفخ
- شبيج قابل مچذبه؟ ما احب غيرج
- اذا كشفتج مسويتها فد يوم اجنزج وما احجي وياج ابدددد
- لا والله ما احجي مع ولد أصلًا
- عفية صيري حبابة غسقسق
..
گعدت من النوم افرك بعيوني ولازلت نعسانة لان سهرت أمس بالليل مع غسق والبنات وبقينا نسولف وناكل وهواي خربطنا وتونسنا، باوعت لمكان غسق نايمة بسابع نومة ووگفت اطلع للحمام اغسل واتجهت للصالة من سمعت صوت ماما ونسوان خوالي
- ليالي: صباح الخير
ردوا علية وگعدت يمهم وچانوا يتريگون وتريگت وياهم ، جانوا يسولفن سوالف معتاده ومن خلصت عفتهم وطلعت للغرفة اخذ موبايلي وحاولت اگعد غسق بس قافلة على نومتها
طلعت للحديقة وشفت خالي الصغير "محمد" يصلح بسيارتة كالعادة مفصخها تفصيخ وجان للصراحة واحد من الاشخاص الي يخلوني احب السيارات اكثر ، تقدمت اباوعلها وگلت
- عشششت شلون محرك حلو تعديلك كُلش يجنن عليها
- هههههههههه للآن تحبين السيارات ؟
- عشقي والله ، تحتاج مساعدة؟
- شتعرفين؟
- اوووه تستهين بيه؟
- شوفيني شطارتج
- هي كلها تجنن بس الويل ما عاجبني ابدًا
- ليش؟
- مخرب المنظر ويحتاجلة صبغ!
- شنو ببالج؟
- أسود اكيد يطلع يملخ
- هههههههههه خوش نصيحة حطبقها لان من جبتها ما عاجبني بس التهيت بالتصليح
- عادي أصورها؟
- اكيد أخذي راحتج
رفعت موبايلي اخذ كم لقطة ، خالي واحد من القلائل الي يعرفون حبي للسيارات بس اكيد مايعرف عن التصوير وحسابي لان عدهم هالسوالف عيب وميصير
بعد فترة من سوالفنا دخلت جوة وشفت غشق كاعده ودا تتريك ، كعدت يمها وگالت
- صباح الخير
- ليالي: صباح النور، أگلج ماتملين من الكعدة؟
- كلش بازعة روحي من البيت
- خلينا نطلع لمكان شي نغير جو
- ما ادري اشوف أمي
كملت غشق الاكل وراحت تغسل المواعين وتحاچي امها حتى نطلع شوية وبعد دقايق رجعت وهي مبتسمة وامها موافقة بس نرجع سريع
طلعنا بعد ما انطيت خبر لماما وأصرت اخذ علوش وياي يتونس ، مخرب الطلعات هذا المهم طلعنا للحديقة القريبة من بيتهم وجان الجو يخبل تمشينا واخذنا صور وتونسنا صدك
- غسق: اگلج هذا الولد بس يباوعلج
- ليالي: ياهو؟
-غسق: الي لابس زيتوني
- ليالي: ايع متشوفين شكلة؟ نعل على حظي الله يفگس عيوني اذا باوعتله
- غسق: لتتنمرين على خلقة ربج
- ليالي: خلي يولون من وجهي ما اتنمر عليهم بس لو گدامي لساني ميلزم نفسه شبيدي؟
- غسق: هههههههههه عزه صدك متستحين
- ليالي: منطيتج المستحى
وگف علوش من اللعبة وتقدم يركض تجاهنا
- علوش: اگلج لولو اني دوعان -جوعان-
- ليالي: شتريد؟
- علوش: خلي نشتلي من الاسواق هناك
- تعال
سحبت ايدة ومشينا اني وغسق وعلوش ودخلنا للاسواق القريبة ، طفر علوش يختار نمنميات واني اخذت جبس وفستق وغسق اخذت نساتل وببسي وطلعنا بعد ما حاسبنا
- غسق: تحسين مستعدة للجامعة ؟
- ليالي: هي الجامعة شنو؟ مدرسة مختلطة بس مال مثقفين شكو استعد الها؟
- غسق: وثول لتفكرين هيج لازم نتعلم الاتكيت وهيج ونتثقف زيادة
- ليالي: دسكتي لا اهفج بطراك نتثقف انوب
- غسق: ضلي بأسلوبج هذا وظفايرج حتى يضحكون عليج
- ليالي: طز بيهم ، ظفايري لو اموت ما اغيرهم واسلوبي محد مطلوب منه يحبه ، لج باعي بابا الشغلة اذا غلط نغيرها بس مو نتغير كلنا!! اصحي ترى 4 سنوات وبعدها ما تشوفين خلقتهم شكو تتغيرين؟
- غسق: وتتحملين 4 سنوات يعيبون عليج؟
- ليالي: اشك حلگه الي يعيب
- غسق: ما ادري بكيفج
كملنا مشي وبعدها رجعنا للبيت ، بقينه يمهم يومين وبالثالث رجعنا لبيتنا ومرت فترة لحد ما طلعت المعدلات اخيراً وطلع معدلي 70 ، بهذاك اليوم ماصدگت انُ طلع هيج وحتى جان عندي افكار انُ ارسب، بعدها صارت المشاكل تتهافت علية لان ما اريد ادخل قانون
- أم ليالي: ولججج يمه هو شنو يفيدج غير القانون وتصيرين محامية؟ تريدين شنو تدخلين؟
- ليالي: إعلام أريد أدخل وهذذا قراري
- أم ليالي: شنووو أعلام شنووو؟؟؟؟ ولج شيفيدج هذا؟
- ليالي: خلص هذا قراري لا تضغطين عليه يا أمي ما اريد قانون
- أم ليالي: تدخلين قانون وبس
- ليالي: ما أدخل والله أكرهه ما أريد
صارت مشاكل هواي وماما ما تريد تحجي حتى وياي لان بنظرها افضل شي الي القانون ومدا تستوعب انُه اني مرتاحة للاعلام وشي اريدة ، بابا تدخل وعمامي يريدون يقنعوني وحتى خوالي!! مريت بضغوط نفسية جبيرة وصرت مكتئبة حيل وحتى أكل بطلت اكل وياهم وضعفت حيل وقربت المدارس والسنة تبدي وأمي رافضة الإعلام
بيوم من الايام بالليل طلعت للحديقة وأحس كُل الضغط والمشاكل تجمعت على رأسي وما تحملت وبديت ابچي واني حاضنة نفسي
ورة لحظات حسيت بخطوات وراي وبقيت متصنمة وخلست بدون حركة ولا صوت ، سمعت صوتها تحجي
- آم ليالي: شبيج ماما؟
بقيت حاضنة نفسي ودموعي تنزل ما أعرف ليش رغم اني وحدة جنت لو تنگلب الكرة الارضية ما ابجي بس الضغط يجبر
تقدمت من عندي وكعدت يمي على الكرسي وحضنتني وانفجرت وقتها ابجي وهيه تبجي وياي وتطبطب علية
-ام ليالي: عمت عيني عليج يمه لا تبجين والله اني بيدي اقدملج عليها
- ليالي: ليش لعد رفضتي من البداية ؟
- ام ليالي: والله يا أمي ماردت تدخلين هيج مجال لان القانون بي مستقبل وراتب وتعتمدين على روحج بي
- ليالي: هسه قبلتي؟
- ام ليالي: اي والله بس لا تبجين وتعالي اسويلج اكل تاكلين
رفعت عيوني الها وبوستها وبست راسها واعتذرت منها لإن هيه هم شكلها تعبان وانحلت السالفة على خير وقدمت لكليتي مال الصحافة والاعلام وانقبلت الحمدلله
..
بعد هالايام بديت اتجهز للجامعة وخبصت البيت كله لأن أريد أتعلم اسوق ولو أعرف أسوق بس أبعد عنهم الشبهات حتى أخذ راحتي وفعلًا بابا وحيدر وحتى حسنكي كلهم بدوا يعلموني على السواقة وتعلمت وضبطت الوضع رغم عمي ابو مرتضى ما راضي حتى على تخصصي بس بابا كاللهم الي تريدة بنتي يصير
بيوم من الايام بالليل
جنت گاعده العب بالتليفون وخابرني رقم غريب ، شويه ورديت
- ليالي: الو؟
- السلام عليكم ، عدكم طلبية ؟
- ليالي: وعليكم السلام ، اي بس بأسم منو؟
- بأسم ليالي ؟
- ليالي: اي عيني
- الطلب مدفوع بالرصيد ، ممكن بس تدزين اللوكيشن بالضبط؟
- ليالي: صار ثواني
- اليوم بالليل يوصل لباب البيت
- ليالي: ان شاء الله
غلقت الخط ودزيت اللوكيشن واني متحمسة لان بهالطلبية موجود فساتين وملابس هواي وغراض محتاجتهم
طلعت واني اشوف محد بالبيت وماما يم بيت عمامي وحسنكي كالعادة غاط بالبلي بغرفتة وبابا وحيدر بالدوام ، سويتلي معكرونه واكلتها وباوعت افلام وشيكت على حسابي وراسلت صديقاتي وسويت كومة اشياء
صار الليل ودز المندوب رسالة انُ الطلبية وصلت لباب البيت وتم استلامها ، دزلي صورة الطلبية فوك الرصيف مالتنا ورحت غيرت ملابسي وطلعت اخذها
عيوني تجولت بكل مكان گدام الباب بس ماكو!! عبالك اختفت ، بقيت ادور واباوع بكل الاتجاهات بس ولا اكو إثر ، منا ومنا ولا اكو، رفعت موبايلي ادز رسالة للمندوب
- ليالي: ماكو الطلبية؟
بقة شوية ودز رسالة
- لا موجودة اختي دوريها حطيتها على الرصيف وحتى الصورة موجودة فوك
- ليالي: يابة والقرآن هسه طلعت ماكو
- خاف احد أخذها من بابكم؟
- ليالي: ما أعرف هسه انتظر أشوف الكاميرات
تركت موبايلي ودخلت للبيت ورحت للكاميرات اشيك الطلبية بس انصدمت على حضي الاغبر المندوب موديها للبيت الي مقابيلنا مو لبيتنا!! هسه شلون؟؟
بقيت بمكاني أفكر أخاف البيت بي زلم لو شنو شلون أروح ؟ يعني ما بقى إلا جوارين ما نعرفهم وجديدين ماماخذة ميانه وياهم وينطيهم الطلب؟ نعله على الشيطان
قاطع تفكيري صوت مسج اجه لموبايلي وفتحته لگيت رسالة جايتني بالواتساب من رقم غريب كاتب
- السلام عليكم
اخذت صفنه طويلة أحاول أعرف هذا منو؟ الصورة الشخصية مموجودة حتى ، رغم إستغرابي رديت
- ليالي: وعليكم السلام منو؟
- طلبيتج بالغلط إجت لبيتي وما أعرف مكانكم ياريت تبلغيني اذا انتو من الجيران؟
صفنت واني أحاول ما الطم لطم لأن الطلبية بيها اشياء خاصة وما لازم يشوفهم عزة بعيييينيييييي يح يااااا فشششلةةةةة .. هديت نفسي وجاوبت
- ليالي: اي خوية احنا البيت الي مقابيلكم تگدر تطلعها تحطها بالباب؟
- ماشي عيني
بقيت أراقب الوضع من الكاميرات الي مقابيل الباب وشفت باب الجيران ينفتح ويطلع شاب من الباب لابس گلبية وشكلة مواضح وهو شايل الطلبية وعبر الشارع وتركها بباب بيتنا وراح..
طفرت ركض بعد ما تأكدت من انُ محد برة واخذتهم يا فشلتي مستحيل اخلي احد من هالبيت يشوف وجهي بعد لو اموت حتى بجنازتي اگللهم يحطون صورة بيها وجه مشوش مثل الفلاتر حتى اغطي خيبتي
صفنت شوية هو مايعرف شكلي أصلًا!! لحد لفج يالغبرة هو شمعرفة بيج؟
دخلت وبوجهي لغرفتي واني احس بأحراج وخجل من نفسي لان البوكس مفتوح... فتحتة ويااااارييييت ما سويتهااا والي طالع آول شي هو أخر شي تمنيت يصير بالبوكس يطلع وهو وصلة الرگص المصري الي جبتها لعرس صديقتي
شهگت اللطم وازلغ بخدودي من الفشلة
- صخااام ولطااام عزززززه شافها يبوووووووو
حتى واهسي راح من الطلبية وضميتها بالكنتور واني كل شوية اكفخ نفسي واغلط على المندوب الاثول ، گلتله بابنة يمه نخله ليش موديها لبابهممممم؟!!
بس لحظه ، همه هم حاطين نخلة يم بابهم
امداج ياغبرة
-الغبييي الاغبرررر شلون يفتحها؟ ، يعني هسه شلون إشوفة بالشارع؟ ياربي
تناسيت الموضوع وماجبت سيرتة لاحد حتى ما اتصخم من الفشلة ومرت الايام عادي وبدت الدراسة الجامعية وأحاول اتأقلم وياها بكُل حيل
نزلت من السيارة مالت حيدر اكيد گدام البيت ركنتها ورفعت عيوني وثبتت على شخص واگف مقابيل البيت..
✤———————————————————✤
يا هلا شبابات روحي 🙈🔥
اكيد ما تبخلون عليّ برأيكم الحلو وتعليقاتكم بين الفقرات التموت مثلكم 🫶🏻🔥
البارت الجاي 🙈🔥🚫
رأيكُم بليالي؟ وشخصيتها؟ (🔥🚫)
هوت هوووووت عندي
الشخصيات الجديدة الي بدت تظهر؟
مشهد المعدل والتخصص الي عارضوها بي؟
رأيكم بهواية ليالي؟
اكيد اكيد الموقف المحرج مال الطلبية 😬😭
لو انا مكانها جان ماطلعت بعد من البيت هههههههههه
توقعاتكم 🔥؟
وما ننسى رأيكم الكامل بالبارت
دُمتم بِودّ قلباتي