كانو اخر لقطات العرس ملاك مشات جلست حدا خوتاتها هاربة منو، العرسان ناضو باش يمشييو تحت تصفيقاتهم خديجة جرت ملاك من يدها خرجت معاهم كيظحكو مشاو برا ركبت خديجة وهي كتوصي ملاك على شي حاجة يوسف واقف مع مو وختو
خديجة: علاش متسمعيهش مراد شنو بغا، كيبان ولد الناس راجل دالوقت للي تعولي عليه
ملاك؛ مفهمتش منين كتجيبي هاد الهضرة، مهم تهلاي فراااسك مزال مقالك فين غتمشييو
خديجة: ههه مزال (لحقو خوتاتها لوخرين بداو يشدو فيها يوسف ركب وهوما يسكتو.. ودعوووهم وكسيرا يووسف) ههه غير بشوية
يوسف: شنو بشوية الله يهديك ابنتي وانا شهوور وانا نتسنى هاد اللقطة...
ملاك: (تمت داخلة مع خوتاتها كيظحكو على خديجة ويوسف للي مزروب لقاو حتى الناس كيوقفو يمشييو)
مريم: داز عرسها غزاال
ملاك: و شكون شااافوو
مريم؛ قولينا املاك فين غيسافرو خديجة وراجلها
ملاك: معرفتش حتى تقولكم هي (هربت بقاو تابعينها تقولهم مابغاتش، مشات لطابلة ديال مها مكانش هو ناضو يمشيو أمينة رغباتهم يبااتو)
زهرة: راكي عارفة الراجل عندي وعاد العائلة كاينة مجاتش نخليهم..
ملاك: ماما نبات انا وفاء باش غدا نمشيو مع خديجة لمطار ونجيو
زهرة: شوفي مع باك ابنتي
ملاك: اوا راه راجلك قبل ميكون بابا عفاك اماما رغبييه عفااك
زهرة: (عارفة بنتها هاربة من داك العمورية للي فالدار) دابا نهضر معاه الا بغا فين تبقاي
ملاك: لععععععززز، فالدار للي كارين انا وفاء
أمينة: يالهو معايا لداري نييت
ملاك: (مبغاتش) بلا منعذبووك اخالتي
أمينة: ما فيها عذاب بالفرحة علية ابنتي (ناضو حتى هوما والغالية كتودع المعروضيين حتى هي خسرات عليهم يباتو ولكن رفضو بلباقة وشكروها على حسن الضيافة وعلى العرس وبداو يركبو فالطموبيلات ملاك قلبت على طموبيلتو مكيناش اذا مشا فحاالو ولا مشا عند شي وحدة أخرى!!
زهرة قنعت رشيد للي بغا بصعووبة وحيت رطبت شوية معاه بغا..)
وفاء: اورطيغا مشا؟!!
أمينة: مشا مع صحابو قبيلة (ركبو مع ملاك فالطموبيل لدارها وتفكيرها فيه وصلو حطات الطموبيل وطلعو الدار)
دخلو ابناتي دخلووو جابكم الله هاد نهار تونسووني..
ملاك: (كانت باغية دوش صهدو وعرقات هاد نهار)
خالتي واخا ندوش
أمينة: وعاد تسولي الدار داركم ابنتي
ملاك: (تبسمت معاها هزت بيجامتها تيشورت وسروال واسع ودوبياس دخلت للحمام كتشوف فيه كاين برودويات ديال رجال هزت باندووش كحل لقات هاد الريحة كتكون فيه مرة مرة فيه استنشقتها مزيااان وعاد كاين تستيفة ديال الفوطات فلݣري.. دخلت دوشت دغيا بغات غير تحايد داك العرق نشفت راسها وشافت فلمرايا طالقة شعرها للي فازݣ وكل تفكيرها فيه نشفت شعرها مزياان باش ميقطرش عاد جمعاتو سفنجة وهبطت منو شي شعيرات جايها زويين خرجت من الدوش سامعة صوت أمينة كتهضر فتحت لباب للي كيشوف فباب برا لقاتو هو واقف حدا لباب غير تشااوفو رجعت للحمام بالزربة قلبها كيضرب)
أمينة: سير سيييير حتى لغدا صباح واجي
اورطيغا: (واخا ثانية باش شافها ولكن هز حواجبو بجوج بقا غير كيشوف حتى تسد باب الدار فوجهو مسامعش حتى شنو كانت كتقول مو...)
اورطيغا: (عجباتو فلميكاب والتكشيطة ولكن منظرها هاكاا خارجة من الدوش واخا ببيجامتها مستورة ولكن داك شعر للي باقي فازݣ وجامعاه مخلية شي زغيبات نازلين خلاه غير حال عينيه على وسعهم، تم دااير راجع فحاالو كانت وفاء للي علماتو انهم بايتين مع مو داكشي باش جا كان بغا يشوفها ولكن كانت احسن صدفة هو يشوفها هاكا!!! هز تيليفونو صونا عليها مجاوبتش هبط لتحت جلس فطموبيلتو دابا بغا يهضر معاها وربي كبيييييييير كتب ليها ميساج)
"انا فلباركينغ لتحت هبطي عندي"
ملاك: (قرات لميساج ومزال كترجف مابغاتش يشوفها هكااك معجبهاش الحال، والجانب السافل فيها كيقول العكس حطت التيليفون) واش هدا حمااق!!!
أمينة: بناتي تصبحو على خير الا خصاتكم شي حاجة ها الكوزينة ولا نوضوني انا فهاد لبيت
وفاء: لهلا يخطيك اطااتي غير سيري ترتاحي تصبحي على خير
ملاك: (تبسمت) تصبحي على خير
أمينة: قدامكم الخير ابناتي.. (مشات داايخة بنعاس وهوما جالسين فالصالة عاطياهم مخاد بليزور ناضت ملاك سدت لباب)
ملاك: شنو هاد طاتي مطاتي نتي عاود
وفاء: ههه وشنو نقولها؟!
ملاك: (كتعيبها) نننن...
وفاء: سمعتها كتقولك غير خرجي راه مشا واش اورطيغا ههه
ملاك: (بعصبية) اه
وفاء: ومالكي معصبة
ملاك: (رجع صونا عليها هي مزال مقلقة على شنو كان وقع فالعرس كل مرة كتلقاه مع بنت ويكملها بتسلام بالوجه حلت لباب دلبالكو دخلت وسداتو من موراها)
الو
اورطيغا: بغيت نشوفك
ملاك: فين؟ واش حمق؟!!
اورطيغا: حمق حيت بغيت نشوفك؟!!
ملاك: اوا ومك؟؟
اورطيغا: دخلت لبيتها تنعس
ملاك: ولو.. مصاالحش..
اورطيغا: فينك دابا
ملاك: (بنفخة) فلبالكو
اورطيغا: خارجة بشعرك عريان؟!!
ملاك: (عاد تفكرت ولكن هي فلكاطريام وكولشي ناعس وحي كلاس كولها داخل سوق راسو طلت لقات طموبيلتو خارجة من لبارك بعدت راسها) علاش جيت هنا؟!
اورطيغا: راه دارنا ابنتي!! (سكت الطموبيل) وكنت باغي نشووفك غير مي الله يهديها شادة معايا الضد!!
الغالية: (حتى داز العرس عاد لاحظات حاجة كانت مسولاتش عليها فاللول حيت قالت حيت كانت خطبة وداكشي بيناتهم وعاد مزروب ومع مكانتش باغية مسوقاتش ولكن فالعرس!! مجمعة مع ختها)
ملاحظتيش مت المتعووسة مجابتش معاها حتى واحد من فاميلتها
اخت الغالية: حتى واحد من جيهتها مكاين!!
الغالية: داكشي للي شفنا فالحنة هوما نيت للي جاو عمامها عيلاتهم وجدها ومرتو وجارتها ولدها ومرتو
اخت الغالية: يمكن معندها حد
الغالية: ومالها كابرة فمحيبق!! ميمكنش ميكون عندها حد شي خال شي عم تالف ݣاع الا قلنا معندها لا خوتها لا واليديها!! فشكل هاد القضية
اخت الغالية: حتى لمن بعد وسولي مرت ولدك
الغالية: داابا (هزت تيليفونها)
اخت الغالية: غير واش عند شي عقل اختي ولا متتكسابيييه
الغالية: (مجاوبهاش) علاه؟!
أخت الغالية: واش ولدك عريس وفليلتو ونتي تنصوني عليه
الغالية: (عوجت فمها) زعما راه غيدشنها لية راها سنين دزواج غير بدلت اللول بولدي وصاافي اححح على ديك الكية عمرها تبردلي ولا طفا حتى يدي مول الأمانة أمانتو
اخت الغالية: نوضي اختي تنعسي نوضي راك عييتي وخليك من هادشي هوما مكتااابين لبعضيااتهم وللي وقع وقع..
~~~~~~~~~~~~
غيثة: (من بعد مقطعت مع ادم للي كيشكر فيها ويتغزل فيها وهي غير ساكتة غير كتنعم وتظحك مرة مرة حطت التيليفون من بعد مديمكيات وجهها ودوشت لابسة غوب دونوي فبيتها وغير كتنهد، اليوم شبعت بكا على شنو قال ليها اورطيغا والغوتة للي دار ليها صونات على ياسمين)
شنو وقع بيناتكم
ياسمين: يمشي ي*** اخر مرة اغيثة تعاودي تجبديهلي فالهضرة هداك غير حمااار ميسواش كبرناها ليبيه وحسب راسو شي حاجة
غيثة: وقولي شنو وقع؟!
ياسمين: واش متأكدة هو للي قالك تعرضيني؟!!
غيثة: (بلعت ريقها) اه، علاش؟!
ياسمين: السيد تسيف بحال غير هو للي راجل فهاد الدنيا وحاسبني انا للي لاسقة فيه الݣزاار لاخر هادي هي رضينا بالهم والهم ما رضا بينا
غيثة: شنو قالك؟!
ياسمين: هادشي نيت بلا حشمة تيقولي انا تنعتابرك غير نزوة ودااازت بااينة طايح فشي **** وجاي تيترجل علية تفوووو كرهت نهار للي عطيتو وقت فيه
غيثة: واش قالك طايح فشي وحدة؟! حيت أنا عارفااه دابا متيهضر مع حتى شي وحدة
ياسمين؛ يمشي ي*** من بعد ونصوني عليك حيت بالصح عصبني داك المريض..
اورطيغا: كنت باغي نشوفك غير الوالدة الله يهديها وصافي ..(مهضرتش خرج من الطموبيل) اول مرة نتوحش نعس فبيتي
ملاك: (تبسمت) علاش اليوم بالظبط
اورطيغا: (دار يدو فوق صدرو) شفت التووتووز وريتي سخفت
ملاك: (طلت لقاتو هاز راسو ولكن هو مشافهاش)
اورطيغا: مديريش معايا زوين وتخلي لباب محلول نطلع نشوف مزياان
ملاك: واش حمق؟!
اورطيغا: حمق حيت بغيت نشوفك
ملاك: اه، خاصك تحتارم الخصوصية ديالي شوية
اورطيغا: لا مابااغيش
ملاك: كفاش مباغيش مهم انا بغيت نطفي ننـــ..ــنمشي نعس
اورطيغا: (دار تيليفون بين كتفو وودنو شاعل ݣاارو على مشعل هز راسو صاط الدخان) تطفي نطلع نطفيك
ملاك: بففف
اورطيغا؛ وااا بنادم راه الا مهضرتيش مغنعرفش شنو عندك فداك الراس
ملاك: معندي والو
اورطيغا: (بهدوء) وشنو مقلق الزين
ملاك: حتى حاااجى عيانة وبغيت نتكى
اورطيغا: مبقيتيش تتبغي تهضري معايا
ملاك: (بقات سااكتة حيت الا هضرت غير غتبين غييرتها وهي كانت موحشااه ولكن هو كل دقيقة كتلقاه مسالم مع وحدة بلبيز وشطيح والظحك مكانتش متوقعة هاكا منو)
اورطيغا: هداك لمرييوة علاش باقي تيطووف بيك كل مرة واقف معاك باغي يشد فيك شوية جاي كاري ففاس حداك!!! ياك لباس؟!
ملاك: (يعني رد البال وعقل عليه) ولد الجيران وصافي وغير صدفة
اورطيغا: (هنا عصبااتو بالبرود والكذووب) ولد الجيران عادي يبقى يتزلل عليك
ملاك: متهضرش معايا بهاد الطريقة
اورطيغا: (زاد فنبرة الصوت) وكفاش بغيتي نهضر كل مرة لاسق فيك و..
ملاك؛ (بعصبية) شكون كيهضر بعدا للي كل دقيقة مع وحدة فشكل ونتا كضور من هادي لهادي شتي نتا خاصك تحمد الله جيت راجل اما وكان تولدت بنت بهاد الخفة للي فيك وكان راك متقوبة ولا جايب لمك شي كرش من الزنقة...
(خرجت عينها مصدمة من الهضرة للي خرجت من فمها بلا متفكر مزيااان دارت يدها على فمها رجعت طلت لقاتو باقي هو هو داير التيليفون فودنو)
مكنتش قاصدة نقول هاكا والله م.. (حيدت التيليفون من ودنها قطعت وجلست فالكرسي هااربة ومصدوومة من الكلام للي خرج منها بلا متحس...)
يوسف: (من بعد موصلو للدار حست براسها حشماانة وجاتها فشكل واخا ماشي بنت ولكن جاتها الرهبة للي محستش بيها حتى فزواجها اللول سد لباب وعنقها من اللور حاط راسو على كتفها)
واخيرا
خديجة: ههه علاش اول مرة نبقاو بوحدنا
يوسف: لا ولكن دابا ضااامن غناخدو راحتنا ومعندك فين غتهربيلي
خديجة: يوسف واخا كنت ديجا مزوجة ولكن ههه مخلوعة شوية
يوسف: (وقف اونفاص معاها) طبيعي راه أول خلوة لينا وعفااك متعاوديش تجبدي الماضي داكشي لحناه اللور دابا كاين انا ونتي قبل مكاين واالو كاين غير انا وياك مستقبلا
خديجة: (تبسمت عاضة على شنافتها باينة فوجهها جبدها عندو معنقها مغرقها حناان للي افتقداتوو من شحال هادي وحتى اثوتنها للي تدفنات أعواااام معاه)
يوسف: الا مكنتيش مرتااحة معنديش مشكل باقي الوقت أنا للي تيهمني هو نتي تكوني مرتاحة..
خديجة: انا ندخل نبدل حوايجي
يوسف: (كان بغا يهزها ولكن عارف ميقدرش غير غيحشم راسو حيت خديجة تبارك الله واازنة وطويلة، تمت داخلة لقات فوق النموسية كولو ورد احمر شافت فيه عاجبها الحال بقا متبسم هز بريكة كيشعل شمع للي فلبيت وطالق ريحة زوينة هزت غوب دونوي للي حاط فوق النموسية ودخلت للدوش غيكذب الا كان قاد يشد راسو عليها كتر داك الستريس للي فصباح كولو تبخر منين بقاو الراس فالراس....)
~~~~~~~~~~~~~~
اورطيغا: (صدمااتو بديك الهضرة بقا غير كيشوف هز راسو مكطلش رجع التيليفون لجيبو هاز حاجبو كيحاول يركز فكلامها حتى تبسم عيا يهيب ويتخضر على الناس وجات وحدة عيا يتنمر عليها وشحال كرهها فاللول عطاتو عصيييير فكااس كبير ومدفݣ ݣاااع... رجع هز راسو مكينااش ركب فطموبيلتو راس كيقولو طلع لوح مها من تماك وراس كيقول صافي هادي هي التالية
محس غير بدا ميتكرشخ بالظحك كيتخيل راسو بنت ونيت بهاد الخفة كان على الاقل يكونو شي 4 ولا 8 دلولاد ظحكااتو بهاد الهضرة وتم صايݣ حيت من مور هاد الهضرة للي تقاالت مصالحش التيليفون والا بقا تماك غيطلع واخا تكون مو للي بغا يكوون...)
ملاك: (صيفطات ميساج) راه غير فلتت ديك الهضرة ماشي ديالي انا ماشي للي كنقول هكاك مهم غير زلقت
اورطيغا: (هز حاجبو حاط التيليفون بهدووء ممجاوبش)
نتي زلقت ليك بالهضرة انا غنزلقو ليك نيشان..
(تبسم وهو كيتخيل راسو ممستوعبش كلام خارج من عندها ولكن ظحكااتو وعقل كيقنعو باش ياخدها بعصبية...)
~~~~~~~~~~~~
ملاك: (كضرب فمها بشوية منين سمعت الطموبيل ديمارات شافتو مشا ومعاودش صونا صيفطات ميساج والو مجاوبش ولا رجع صونا)
ويلي ويلي على هضرة قلت يا سيدي ربي!!!!!!
مشااااااا الراجل مشاا انا للي طيرتو
بفف خلي مك هاكا غتبقاي خضرة مكتعرفي لا تهضري لا تزمري تفوووو تفوووو...
(معندهاش الوجه للي يصوني عليه ولا يعاود يكتبلو)
شنو غنقول ولا نكتب بففففف هو للي عصبني نهار كامل وهو من وحدة لوحدة
تفووو مكانش خاص نهضر نسمع بعدا غير شنو كان بغا يقول تفوو علية كنت دافعة كبير حسن...
اش داني نزل لهاد الهضرة هو راه بالصح ولكن نخليها غير بيني وبين راسي...
~~~~~~~~~~~~
يوسف: (خرج من الدوش للي برا مخلي خديجة فالدوش لي فبيت نعاس، لابس شورط بديالو لقا مو مصونية عليه دار مود أفيوون دخل للكوزينة بهدوء حل الثلاجة هز ريدبوول فتحها كيشرب متكي على البوطاجي متبسم غير بوحدو عاود هبط على الكانيط كيشرب.. حطها فلابوبيل وخرج من الكوزينة مشا للدوش غسل سنانو ودوز الخيط بين سنانو.. خرج وقصد بيت نعاس لقا خديجة واقفة حدا لمرايا بشعرها الفازݣ ولابسة داك غوب دونوي مع بينوارو وكتدهن لحمها.. طلعها وهبطها باعجاب كبيير من رجيلاتها ليمولي فخاضها كانت كولها على بعضها سيكسي سد لباب وعينيه كيغلييو طافي الضو مخلي غير دوش شميعات للي دايرين جو شااعري....)
بالصحة حبيبة!!!!...
ملاك: (دخلت للبيت لقات وفاء ناااعسة.. ݣاع داك لعياا ونعاس للي كان فيها طااار متنكرش خاافت تكون هادي هي التالية مكانش خاصها تقلل الاحترام عليه معجبهاش الحال واخا عارفة غتكون ردة فعل ديالو خاايبة ومغتعجبهاش ولكن هي اصلا محملتش رااسها كانت فاارضة احترامها عليه وكتلومو على تخسار الهضرة وبغييرتها فقدت السيطرة على الكلام للي خرج من فمها وكانت كتقولو غير بينها وبين راااسها!!!)
بفففف ياااا الله ولكن راه بالصح وكان جا بنت وكان راه والد شي فرقة دالكورة!!!
تفو تفووو مكانش خاص نقولها (شافت فوفاء كانت ناعسة معندها معامن تهضر وحتى وكان لوخرا فايقة مكانتش غتعاود ليها...
تكات فالسدااري كان كولشي ماشي مزياان وبدا يهضر علاش بقا كيسولها علاش... هزت تيليفونها مصيفط ليها ومجاوبهاش طفات الكونكسيون معندها ݣانة حتى تشوف كفاش جات فتصااور حطاتو فوق الطبلة وغمضت عينها باغية غير طفي أفكارها باش تنعس من بعد مكانت هي للي مظلوومة فهاد الرواية قلبت كولشي مكانش خاصها تخسر الهضرة وطيح من قييمتها....)
~~~~~~~~~~~~
يوسف: (أذن الفجر وهو جالس فلبالكو فوق الكرسي حيت مابغاش يصدعها وكانت ياله دوشت ونعست فبيتهم،
كان جالس مرخي ومرجع راسو اللور متبسم من داكشي للي وقع يمكن تكون هادي أول مرة كيحس بهاد النشوة لكبيييييرة واش حيت شحال وهو مشهييها ومتمنييها ولا حيت شحال هادي مكان مع شي وحدة ولا حيت هي عرفااتلو ولا نيت رجع كيبغيها وهادشي للي كيحس بيه داابا معاها...
مكانش ناوي تكون المدة دالخلوة بيناتهم طوييلة واخا هكاك باقي حاس براسو ملهوووف عليها عجبو الحال بزاااف وقف مشا يتوضى حيت الا بقا على هاد الأفكار غيمشي غير يفيقها من نعاسها...)
~~~~~~~~~~~~
أصبحنا وأصبح الملك لله...
أمينة: (فاقت بكري شوية سخرات العساس يجيبلها لفطور هي عمرت غير أتاي حتى صونا حلات دخلت داكشي للكوزينة كتقاد لفطور وتستف فطباسل وللي خاصو يتسخن كتسخنو، وهي تخرج وفاء) صباح الخير زين
وفاء: صباح الخير خالتو كيف صبحتي
أمينة: الحمد لله ابنتي ونتوما رتاحيتو شوية ياكما أنا للي فيفتك
وفاء: لا لا، الحمدلله، انا مولفة كنفيق بكري.. (مشات للدوش وهي بقات كتقااد حتى صونا تيليفونها)
أمينة: (كان الحاج للي صبح عياان وخاصها ضرووري تمشي حيت هي للي كتعنى بيه ومدام عيط الا خاصها تجي.. مجاتش تخرج لبنات وأصلا مدام كاينة بنت زهرة الا الدار فأمااان خافت غير ولدها يجي.. مشات للبيت نعاس تلبس حوايجها ومشات لبيت فين ناعسة ملاك مكرشخة ودوك زغيبات تشنتفو وناعسة معذبة خاشية وجهها تحت لوسادة ومعنقة وحدة صغيرة)
ملااك ملاااك
ملاك: (قفزت) نعام (جلست) نعااام
زهرة: باسم الله عليك ابنتي شوفي انا غنمشي عند عمك الحاج هانتي هنا نتي وصاحبتك جالسين فالدار خودو راااحتكم
ملاك: (بحرا توݣضات) هاا!!! حتى حنا نوضو نمشيو اخالتي
أمينة: لا بقاو فالدار ورتاحو على خاطركم انا نعاود نصوني عليك سجلي نمرتك عندي (عطاتها التيليفون كتسجل النمرة)
ملاك: والله اخالتي معليش نمشيو
أمينة: والله لا مشيتي، صافي ابنتي الله يرضي عليك سمعي الهضرة، كولشي واجد فالكوزينة حطو فطوركم وكولشي فالثلاجة انا مشيت ابنتي....
زهرة: (كانو عرضووهم عائلة بنسليمان لغدا مع عائلة يوسف ولكن عتاذرو حيت الدار مزال عامرة بالعائلة وميمكنش يديوهم كاملين وأصلا العرسان غيساافرو خلاوها حتى يرجعو ويتجمعو.. جمعت دوك الكادويات للي جاو للعرس حتى تديهم ليها وللي مضوبل يبقى حتى يمشي كادو لشي عرس اخر... مشات زهرة خرجت من بيتها كتجمع مع العائلة كانت نعيمة غتمشي اليوم باش يرجعو هي وراجلها وبنتها تسالمت معاها وودعتها وفاطمة حتى الغد ليه غادي تسافر للجنوب مزال مكملت الكونجي ديالها اما مريم رجعت لدار ها مع راجلها ووليداتها وعݣوزتها للي مرضت... صونات على ملاك)
ملاك: (كانت كتفطر هي و فاء طايرة ليها) صباح الخير
زهرة: صباح الخير بنتي
ملاك: (عاودتلها شنو وقع) جاتني حشومة نبقى
زهرة: اوا كملو فطووركم خلي لولدها الساروت راه عندو المحال تماك غير تحت الدار واجيو فحالكم
ملاك: اممم صيفطتلي خديجة ميساج باش نمشي عندها بلاتي نسات شي لعيبات ومصلاحش ليها تخرج تجيبهم ومقدرتش تقولها لراجلها
زهرة: اااه اوا هكاك متعطليش ابنتي
ملاك: واخا ماما (قطعت وااش غيكون ناعس واش غيكون فالمحال ديالو؟!!!)
وفاء: بالصح!!
ملاك: (حركت راسها بلا متقدرش ترجع الا مهضرتش مع اورطيغا كرامتها كنقولها خاصو يعتاذر حيت خلاها تخرج داكشي من فمها!!!)
~~~~~~~~~~~~
خديجة: (خارجة من الدوش لابسة ديباردور ستان مع شورطوو بلا سوتياان، وكتمسح شعرها بالفوطة هو كان جالس لابس غير شورط ديالوو.. تبسم داير ليها إشارة تجي حدااه)
لا واااالو صافي براااكة حتى لغدا
يوسف: (تبسم) عاد قلنا باسم الله
خديجة: (وقف ماشي عندها) بالصح ايوسف تقسحت
يوسف: حسيت بيك احبيبة (عنقها وجلسو فالفوتوي جارها لعندو كيلمس شعرها)
واش كنتو نتي وو...
خديجة: (مكيعجبهاش الحال تفكر فهادشي) ياك قلتي نساو داكشي للي فات
يوسف: ناسيه غير.. راه كنتي مزيرة بحال...
خديجة: يووسف عفااك
يوسف: عادي نهضرو فهادشي ديالنا انا وياااك احبيبة
خديجة: (شافت فيه) وااخ
يوسف: عجبني الحال لا ماشي عجبني (تبسم) تغرمت
خديجة: هه (كانت باينة فيه) مغتقوليش فين غنسافرو خلاص
يوسف: اممم شنو الاحتمالات ديالك؟!
خديجة: ههه اولا ماشي شي بلاصة للي فيها الڤيزاا
يوسف: اممم كاينة (ناض لبس تيشورت ديالو) زيدي
خديجة: اممم منظنش شي دولة عربية حيت منين تتعاودلي فاش كتكون عندك خدمة فيهم متيكونش عندك شي حب ليهم باش ترجع مرة أخرى
يوسف: اااهمم زيدي
خديجة: ههه وااامعرفتش قولي نتا
يوسف: هي بلاصة زويينة بحال شكل المالديف سميتها..
خديجة: ههه وااا قوول
يوسف: زانزيبار
خديجة: (بقات كتشوف فيه تصدمت)
فين؟!!!
اورطيغا: (صبح نااعس فاق عرقاان بكترة الزمت للي كيكون فاواخر شهر 8 مشا دخل للدوش دوش بما باارد كما موالف وهبط نيشان مشا لمحلبة يفطر عاد توݣض صونا على مو للي لقا ابيل منها)
الوالدة
أمينة: احبيبي فقت؟!
اورطيغا: اممم (سمع صوت مفتاحة) رجعتي للرياض؟!
أمينة: اه جيت قبيلة الحاج كان عيان شوية
اورطيغا: ووو لبنات مشاو؟!
أمينة: انا حسابلي غتسول عليه هو كيف بقا
اورطيغا: وراه غنسول عليه، (شرب من أتاي) كيف بقا؟!
أمينة: مزيان غير كلا داكشي ميدم لبارح وضرو شوية
اورطيغا: لبارح لقا الهوتة
أمينة: ماشي غير هو
اورطيغا: (هز حواجبو عارف تحت راسها شي حاجة) مهم انا نكمل فطور ونجي عندك
أمينة: عنداك اولدي الله يرضي عليك تمشي لدار فالسعادة حتى يمشيو لبنات
اورطيغا: نكمل ونجي عندك (قطع مكمل فطورو غير كيتفكر شنو قالت كيظحك بحال لحمق متحلف عليها بينو وبين نفسو مع مقولة البادي أظلم!!!
وكان واحد اخر قالهالو شي دري ولا بنت وكان دفنو فبلاصتو ومتبردلووش ولكن هي) ههه (حتى الطريقة باش قالتها معصبة غيراانة جابتلو الظحك..
جا عندو صاحبو كيهضرو على دوك الطلبة خلص عليه الفطور وتمو ماشيين بجووج الطلبة بداو يرجعو كيقلبو على لكرا حيت مبقى والو لبداية السنة الدراسية وخاصو يريݣل أمورو.. داز على الدار للي كتبنى كانت ماشي فالأشغال، مشا ركب فطموبيلتو ومشا عند مو لمدينة لقا الدنيا عاامرة ومفتاحة عارضة عائلة الغالية لغدا مراد مقلبش على مو نيشان مشا لبيت الحاج على متلحق حيت شاف فغيثة للي قلب وجهو عليها مباغيش حتى يسلم عليها على داك تبرهيش للي دارت لبارح..)
أمينة: (مشات للكوزينة هزت طبسيل كتقاد فيه الماكلة) نجااة قاديلي ابنتي بسطيلة صغيرة ديال 2 دالناس
نجاة: واخا عْزِيزْتِي
مفتاحة: (دخلت لقات أمينة تماك دايرة دجاجة فطبسيل وكتغلفها)
لمن هاد الماكلة أمينة؟؟
أمينة: لضيافي
مفتاحة: وهاد ضياافك غيجيو هنا؟!!!
أمينة: لا عندي فداري
مفتاحة: (مخسرة وجهها) اوا هاد العراضة راه مخصوصة لبنتي الغالية وعائلتها ماشي للناس لبرانيين
أمينة: (مزيان) مزياان
مفتاحة: واش نتي متتحشمي متتفهمي؟!!
أمينة: علاش نحشم وشنو نفهم متنسانش امفتاحة كما عندك الحق نتي فهاد الدار عندي انا!! ومتسنايش مني نجي ناخد منك الإذن شي نهار
مفتاحة: خاص خويا يدير حل لهادشي
أمينة: والا تي سيري بعدي من خوك خليه يرتاح ونتي غير عاݣدااهم علييه السلامة يا ربي!!! الخير تبارك الله موجود ومدفݣ ونتي حارقااك دجاجة تبقييستر وكان غير ماشي بنت الخير نقولو جيعاانة (مسحت يدها بسربيتة) نجاة بنتي خفي يدك شوية.. منخليش ضيافي يتسنااو
(خرجت من تماك مشات غسلت يدها عاد طلعت لبيتها اما لوخرا غتنفاجر ومرضاااتش قدام المساعدات للي طالقة الهبة ديالها فهاد الدار...)
الغالية: غيثة زيد دخل ابنتي
غيثة: ماما خاص رجع للدار
الغالية؛ (مشات عندها مستغربة) ماالك؟!
غيثة: (مزروبة) لحريق فكرشي خاص نمشي صافي حتى ترجعي نتي وصفاء (بقات كتعيط عليها مها والو مجاوبتش خرجت مقجوووجة من تماك كتبكي كفاش مشافش حتى فيها ولا سلم ولا عتاااذر نيشان مشات تحزن فبيتها احسن ولا تبينها للكل..)
اورطيغا: (جالس فبيت الحاج للي كانو حتى ولادو لوخرين جا حداه شريف) فين
شريف: خدمتي هاد صباح؟!
اورطيغا: لا مكايناش شي حاجة المحال من بعد ونطل عليه شي كموند للي تماك خاص يخرج المارشي
شريف: ودير حساابك شهر جاي السلعة غتبدا تدخل كتيرة على حساب رمضان
اورطيغا: وييه ولكن خاص نسافر شي يامات نديفولا شوية
شريف: سير نيت هاد ليامات شنو تتسنى سير بدل حتى نتا شوية الجو المحال ديالك انا كل نهار نطل عليه
اورطيغا: (داكشي للي كان ناوي) ان شاء الله
شريف: داير شي بلان فراسك؟!
اورطيغا: (حرك راسو بمنعرف، شاف فالحاج) ياله انا نمشي لباس عليك الحاج
شريف: نديرو شي قهيوة بلاتي؟!
اورطيغا: صافي الالو بيناتنا فلعشية ونتلقاو.. الحاج على سلامتك
الحاج: جلس اولدي
اورطيغا: تابعني شي خدمة خاص نقضيها
سعد: (بأمر) غدا عندك كموند كبيرة
اورطيغا: لا معنديش
سعد: انا تنعلمك دابا، غدا الفجر لقاك فبن سودة (بلا كيشوف فيه) متعطلش عاود
اورطيغا: (بديك تخنزيرة شاف فالحاج) على سلامتك الحاج انا غنغبر هاد السيمانة
سعد: والكوموند ابنادم؟!
اورطيغا: خدام عندك انا؟!!!!
سعد: كفاش خدام عندي!! الواليد هضر مع هاد ل
اورطيغا: هاد شنو ل!! (ماشي عندو وشريف ورشيد دخلو فالوسط)
الحاج: واش انا وسط منكم ونتوما تتغااوتو واش متتحتارمونيش واش باغيين تقتلوني قبل الوقت
سعد: هو للي داير فيها صعصع كلمة جوج يتهجم على بنادم بحال ش
اورطيغا: (تعصب ولكن منين دخلت مو بعد مباغيهاش تخلع واخا مكرههاش متبقاش ساكنة معاهم ݣاع)
أمينة: شنو واقع؟؟
اورطيغا: (رجع اللور معصب مكرهش غير يوصل لداك سعد) والو انا مشييت
أمينة: (وقفتلو فلباب) شنو وااقع الحاج؟!! واش انا ولدي نبقى تبغيو ونزاوݣو يجي هنا وفالتالي يخرج شاد فخااطرو الا مكانتش عندو معزة عندك قولها ميعاودش يحط رجلو هنا لا هو انا
سعد: (هنا عرف غيكون هو الظالم حيت عارف باه كفاش كيبغي مرتو واخا براسو عمرو شاف منها شي حاجة خايبة، شاف فباه للي مخنزر فيه)
مكاين والو الآلة أمينة راه غير تناقشنا على شي حاجة دالخدمة
اورطيغا: (خرج معندوش مع هاد النفاق واخا بقا كيعيط ليه الحاج تبعاتو مو كان الطوب دالاعصاب) انعام انعام انعاااام
أمينة: مال مك جالس تنعم علية شنو وقع؟!!
اورطيغا: والو شنو باغية الوالدة!!!
أمينة: شنو قالك داك راس لبغل
اورطيغا: والو الوالدة واالو..
أمينة: اجي احبيبي تسخرلي (هز حاجبو ياله باغي يتݣرع عليها حيت ماشي وقتو) دي لبنات للي فالدار لغدا
اورطيغا: (بقا كيشوف فيها كيصوووط) متعطليش...
خديجة: (معرفت فين جات هاد سمية للي قالها وصلهم لغدا خرج هو يجيبو هزت تيليفونها كتبتها فgoogle باش متبانش مكلخة خرجت عينها هي دولة إفريقية ماشي كما كانت متوقعة.. خرجت دغيا من الباج حيت تم دااخل.. تبسمت)
يوسف: حبيبة اجي تغدااي
خديجة: حم واخ.. (نااضت فصمت مزال مصدوومة حيت منين حيدت من بالها اوروبا كانت كتقول ربما تركيا ماليزيا.. لوا يدو على خصرها ومشاو جلسو كياكلو) امتى عندنا الطيارة؟!
يوسف: 9 يعني غنمشيو قبل
خديجة: (حركت راسها باه كتاكل.. تسقمت مفهمتش علاش خاسر فلوسو على دولة إفريقية شنو المميز فيها عمرها تخيلت تمشي لتماك وكان داها بعدا لمراكش ولا اݣادير ولا الحسيمة للي عمرها وصلات ليهم..)
يوسف: خديجة حبيبة مكليتيش؟!!
خديجة: غير فية نعاس شوية
يوسف: (تبسم) حنا مزوجين باش نعسو
خديجة: ههه واش حمق راك شفتي شحال تقسحت متفكرش ايوسف هاد نهار..
يوسف: (بفرشيط هز بطاطة ومد ليها كتاكل) واخا حبيبة الا بغيتي نمشي نشري ليك شي حاجة من فرماسيان
خديجة: لا لا بلاش بغيت غير نتكى شوية
يوسف: كولي بعدا (بقا كيوكلها كانت باينة عيانة مخلاهاش تنوض حتى وكلها بغات تجمع داكشي مخلاهاش حدها مشات غسلت يدها وفمها ودخلت تكى كتسمعو كيجمع داكشي غير دخل لبيت وهي تغمض عينها هاااربة منو...)
~~~~~~~~~~~
وفاء: (صونا تيليفون ملاك للي دخلت لبيت اورطيغا كتشوفو وتبرݣݣ فيه..) ملااااك خالتي أمينة كتصوني عليك
ملاك: (خرجت بالزربة مشات هزاتو) وي خالتي.. بلاش عليك والله.. لا ماشي هكاك غير حنا كنا ماشيين.. ههه.. واخا خالتي.. شكرا.. بسلامة.. واخا...
(قطعت)
مصيفطانا لغدا
وفاء: مسكييينة شحال ضريفة سعدات للي غتكون مرت ولدها
ملاك: (كتعيبها مخسرة وجهها) هننننن...
وفاء: هههه ياله لبسي لبسي راه غيجي اورطيغا
ملاك: (داكشي لي دارت مشات لبست كسوتها لوات الشال من بعد مدارت عكر خفييف بقات كتسنى حتى تدق لباب ناضت مخلوعة اخيييرا غتشوفو وغتبرر كلامها، ولكن مدام جا الا مدا مجااب ولا اعجاب لكبير بيها غيخليه يغمض عينيه، حلت لباب بوجه بشووش كانت ساشي محطوطة حدا لباب جمعت الابتسامة طلت براسها كيبان ليها ياله داخل المصعد بقات غير كترمش وتشوف فيه حتى غبر ضرها خاطرها بزاااف تمات وفاء جاية)
وفاء: مشا؟!
ملاك: (هزت الساشي) اه هو تسخر جاب السخرة ومشا.. (عطاتها ليها) هاكي سخنينا هادشي باش نتكااو شوية..
وفاء: واش دابزتو عاود؟!!
ملاك: لاا (حيدت شالها بفقسة وغير حشمت تبكي) واا سربي ازمرة فية الجوووع...
أمينة: (جاتها القنطة فالرياض كانت مولفة اجواء العرس وداك اليوماين للي دوزت مع زهرة، وعاد منين دابزت مع ديك العاقسة اذا كولشي غيقلب كمارتو عاود وحتى هي مافيها للي يبقى فحرب دارت بناقص من شي غدا ولا شي جمووع وجلست مع الحاج للي تغدا ونعس هزت تيليفونها صونات على ملاك)
ابنتي وصل عندكم مراد؟!
ملاك: (بفقسة) اه لقيتو حاط لغدا حدا لباب لهلا يخطيك اخالتي
امينة: (بتنهيدة، عرفاتو مشا بلا خااطر وعاد منين قالها غيغبر سيمانة) ماشي شي حاجة ابنتي
ملاك: كيف بقا عمي الحاج
أمينة: الحمد لله ابنتي الحمدلله
ملاك: الحمد لله على سلامتو خالتي فين نخلي ليك الساروت؟!!
أمينة: هانتي تماك حتى يبرد الحال ابنتي وخليه غير عند العساس حيت مراد مكاينش فالمحال.. انا فالليل نجي لتماك
ملاك: واخا خالتي (قطعت معاها بانتلها مافيهاش داك النشاط للي كان فيها اوطوماتيك فكرت تكون ضارت بيناتهم شي حاجة هي ومراد.. ولكن علاش هي ياك كان كيقلب غير على السبة باش يهضر معاها ودابا حتى الشوفة مشافش فيها!!! بقا فيها الحال بزااف نورمال هي للي تقلق على داكشي دلبارح ماشي هو!! بقات كتاكل وعقلها ممعاهاش)
وفاء: ملاك ياك معليش نمشي معاك لداركم
ملاك: بلعكس غتونسيني
وفاء: ومالكي؟!
ملاك: واالو (هزت تيليفونها كتشوف امتى خرج من الواتس من لبارح فلعشية مدخل ليه عوجت فمها مشات لانستغرام لقات شحال من واحد حاط تصاورو ولكن غير مطاݣيينو ماشي هو للي لايحهم بقات كتحنزز فيهم كما العادة وتزومي على تصااورو وحدة فيهم تبسمت حيت كان باين ظهرها وهو متبعها بعينو)
علاش مجاش مهضر معايا؟!!!!
وفاء: واش اورطيغا ؟!
ملاك: زمرا نتي مالك مركزة معايا؟!!!!
وفاء: هههه مفهمتش علاش كتهربي السيد عاجبتييه وعاجبك علاش هاد التلفة شدو الارض شوية وتفاهمو
ملاك: شنو هاد عاجبتيه عاود!!! واش هو قالك شي حاجة؟!؟
وفاء: بااينة
ملاك: اجي نتي عمرك تصاحبتي معاه؟!!!
وفاء: ههه وعلاش كتسولي؟؟ (شافتها خنزرت) لا لا سي پا مون ستييل
ملاك: (ميقت فيها) تشتاااقيه ومتوصلي ليه (كتعيبها) قالك سي پا مون ستييل لقيتييه
وفاء: ههه وينو جاتها النفس عليييه
ملاك: سيري سيري تخ** (ناضت كتجمع الطبلة غسلت دوك الميعنات والماكلة للي شاطت جبدت طوايس دارتهم فيها ودخلتها الثلاجة للي كتشعل بنقا اصلا الدار كاملة كتشعل بقاو مجمعين كيشوفو تصاور خرجو من الدار عطاو الساروت العساس دازت من حدا المحال طلت وبالصدمة لقاتو تمااك شاافها مكانتش متوقعة يكوون بغات غير طل كنوع من الفضوول وعاد جات عينيه فيييها تشدت قطس)
اورطيغا: (كان كاااعي كمش عينيه فييها، وببطئ دارلها بإشارة تدخل عندو كان المحال خااوي...)
ملاك: (دخلت للمحال حشماااانة مرضيااش على شنو قالت فالليل ولكن ملامحها غيير ومخرجة عينها) شنو!!
اورطيغا: (بقا كيشووف فيها.. نطق بجدية) اجي املاك معايا
ملاك: قولي شنو بغيت هنا وفاء كتسناني برا
اورطيغا: اجي معايا لداخل، وفاء تسنايها اختي (دخل وهي عطات لوفاء الساروت إلا بغات تسناها فالطموبيل ودخلت تابعااه فنفسها مال هاد زمر جدي هاكا!!! وقف بعيد متكي على البوطاجي مكروازي رجليه ومربع يدو وملامحو جامدين بحال كما كان فاول مرة عرفااتو، شافت فصاكادو ديالو عااامر هو نيت للي خدا فاش مشا لرباط بلا متحس قالت)
ملاك: مسافر؟!
اورطيغا: امم.. اه
ملاك: (مسخااتش بيه) مزيان.. شنو كنت بغيت تقولي؟!
اورطيغا: (جاي عندها) كفاش بلانك تتشبهيني بلبنات و اش ديك الهضرة دلبارح الباسلة!!!
ملاك: (خرجت عينها بلعت ريقها مرضياااش) نتا عارف شنو كنت بغيت نقول مقصدتش خرجت هكاك بلا منحس
اورطيغا: بلا متحسي!!؟ غير الحزقة للي تتخرج بلا دفييع، يعني شحال وهاد الهضرة تدور ليك فبالك!!!
ملاك: مكدووورش (بقات مغووبشة حيت حتى هو تسيف ولكن زمتها)
اورطيغا: اممم
ملاك: (تحرجت) انا مقصدتش ديك الهضرة
اورطيغا: وشنو قصدتي؟!
ملاك: (زفرت قلبت وجهها باينة فيها ممرتاحاش تم جاي جيهتها، هو براسو طايرة ليه وقف اونفاص معاها هزت عينيها فييه)
اورطيغا: (بهدووء وملامح جاامدة) وكان قالها واحد اخر دري ولا بنت كنت غندير حوايج معااه خاايبة!!
ملاك: سمعني، انا مقصدتش معرفتش كفاش خرجت نتا عصبتني لبارح وقل..
اورطيغا: هادشي للي بغيت نعرف فاش عصبتك انا؟!
ملاك: ماااممممم معرفتش مهم انا، أنااا... غنمشي
اورطيغا: (برزااانة) ملاك، اخر مرة نسمع منك هاد الهضرة
ملاك: (غتمووووت مرضااتش تبان بحال هاكا) اخر مرة اصلا تسمع مني... (دار إشارة بصبعو حدا وجهها وهي تسكت)
اورطيغا: مزال تنعاودها ليك لبارح كنت فالعرس على حسابك نتي كنت باغي نشوفك نهضر معاك طاحو شي بلانات مبرهشين (كيشوف بعيد، وهي رجعت خطوة اللور مربعة يديها كتسمع بجدية)
لحقت عليك للدار باش نفهمك مكنتش بغيتك تنعسي ونتي مقلقة مني
ملاك: مكنتش مقلقة
اورطيغا: (تبسم بلا خاطر) كنتي غير غيرانة
ملاك: (بتعالي) انا نغييير ههه مسكييين
اورطيغا: ماشي تنقلل منك ولكن حبييتك ونتي تتغيري...
ملاك: (حست براسها تزنݣت وذابت مع كلمت حبيييتك) انا مكنغيييرش...
اورطيغا: انا بعدا (صغر عينيه) تنموووووت، لدرجة نتقتل ومنحنش
ملاك: احم (قلبت وجهها كترمش)
اورطيغا: ملاك (صونات مو) صبري، (جاوب) ازييين (ملاك جات خاارجة شدها من ذراعها كيتبسم)
ملاك: طلق مني
اورطيغا: صبري اديك الوزغة راه مي مي (ورااها مكتوبة lwalida) صبري...
هههه واخا..
شنو بغيتي
ملاك: (خافت تعرفها من صوتها وعجبها الحال تخلطت عليها الدعوة)
اورطيغا: (جمع الظحكة)
راه قلنها ليك الف مرة!!!!
(ملاك جبدت يدها حيت قسحها وهو شادها معصب)
وااا صاحبتي نتي للي راسك قاااسح (كيسمعها كتشكي ليه شحال قنطت وهو عارف غيكونو عاود عزلوها تماك كان حداه سطل ضربو برجلو حتى تقبو من الوسط وحلاتلو رجلو تماك ملاك شدت الظحكة بالسيف حيت باين الموضوع جدي ومجاتش تظحك فهاد الموقف وهو حاني كيفك رجلو منين مبغاتش زاد زدح رجلو مع الحيط حتى تهرس سطل)
ديريها زوينة وياله معايا...
لا منمشيش لتماك، غنمشيو سيمانة فينما بغيتي وسيمانة تبقى ديالي نمشي انا لداك القنت..
صافي.. جاوبيني انا نساينك..
واخ.. وااخ
اسيري اشمن بنت (شاف فملاك) هادي بنت دارهم مسايبااش
ملاك: (كضور عينها باغية ظحك وتفرنس كتفكر غير باها عاق بيها كتجمعها واخ هاكاك من عينيها باينة عاجبها الحال)
اورطيغا: انا نساينك الوالدة متعطليش...
(قطع)
طلعلي هادشي ***
ملاك: اوااا حتى نتا تبقى تختار ألفاظك ونتا معايا الله يخلييك
اورطيغا: (كيشوف فيها ديك الشوفة ديال بنيتك)
ملاك: بقا كتشوف فية اااه نتا
اورطيغا: (تبسم قالب وجهو) حتى نسالي ليك مزياااان (جلس فوق الكرسي داير ظفارو فموو مكمش عينيه فييها) امتى عندك الكونجي؟!
ملاك: مغنشدوش دابا
اورطيغا: (بغمزة) علاش؟؟ غترتاحي!!
ملاك: (فهمات سفالتو) حيت معمرتش والناس سابقيني
اورطيغا: (حرك راسو باه، هي مزال كتسنى تبرير على لبارح وحتى على هاد تسافيرة الي معرفت منين نزلت عكسو هو للي كيفكر فحريرتو هو وموو)
ملاك: ياله بسلامة حقا امتى نعطي للسيد فلوسو؟!
اورطيغا: من بعد (وقف هز صكادو ديالو بغا يجبد بواطة حمرا، ولكن شافها ماشي فوقتو حيت مزال دايرة حدوود ومبعدة عليه حط الشكارة فوق الكرسي ومشا جيهتها بحال كيتحلف عليها)
ملاك: شنو!!!
اورطيغا: غتمشي لصفرو دابا؟!
ملاك: (بعدت اللور) اه
اورطيغا: ملاك.. (جا يهضر وهو يسمع صوت شريف كيعيط ليه) بقاي هنا...
(خرج عندو قبل ميدخل هو)
ملاك: (عاد زفرت وهي حاطة يدها على قلبها للي بغا يسكت بكترة مكيخبط...)
ملاك: (مشات جلست فالكرسي كتفكر شنو غدير راه كتحس براسها كضعف قدااامو وشادة راسها غير بالسيف، عاد لبارح قررت تنساااه وها هي دابا معاه وكتفرنس بحال مناقصها خير!!!
اه سمعات شنو قال لغيثة ولكن علاش اصلا كان منفارد مع لوخرا هادشي وهي كاينة حداه اما منين متكونش علم الله شنو كيدير!!! شخصيتو كتجذب كما جذباتها هي للي كانت كتكرهو من الاعماق، فافاها صوت لغوات برا ناضت من مور الحيط كتصنت علييهم)
اورطيغا: راك غاالط فية اشْريييف من غدا منحطش رجلي هنا رزق بيد الله ما بيد حد
شريف: اش وصلنا لهاد الهضرة اخويا
اورطيغا: (بعصبية) شريف نتا عارفني كداير نفسي هنا (دار صبعو فوق نيفو)
شريف: سمع نتا بحالك بحالنا كولناا خدامين وكنتخلصو و نتا اكتر واحد فينا كتخدم وبالضووبل
اورطيغا: صححها انا تتخدم بحالي بحال الخدامة وتنتخلص على تمارة للي تنضرب باش تحايدو فكرة ان بااكم تيصدق علية ولا تيعطيني كتر من رزقي
شريف: علاش انا تتجمعني معاهم؟!
اورطيغا: (معصب) قلب علية اشريف هاد الساعة
شريف: مغنخليكش بووحدك الحاج راه ضار فسعد مزيااان وسمعو للي خاصو يس..
اورطيغا: بيناتهم يقيلوني غير انا ومي وسعد غيبقى تيقلب علية حتى نوصلو لموااصل شحال وانا باغي نتواصل معاه ليهم
شريف: متبقاش دخل شي فشي نتا من ديما فاش تتعصب تتبقى تخرج راسك بحال عمرك عرفتينا وعاد تتزيدني معاهم... وانا عمري درت شي حاجة خايبة معاك
اورطيغا: (هز حاجبو) مغنتسناكش حتى دير اشريف
شريف: هدا هو كلامك!!
اورطيغا: قلتلك قلب علية هاد الساعة حيت فمي غيخرج كلام مغيعجبكش
شريف: (بقا فيه الحال) واخا
اورطيغا: (خلاه تماك ودخل لقاها كتصنت دغيا وقفت مقاادة وهو مشا البوطاجي عاطي بظهر مغلغل هي غير كتشووف معرفت واش تمشي ولا تواسيه راه خوه وضاار فيه اعسااك هي ولكن فهمت منين يكون معصب مكيعقل على حتى وااحد صونا تيليفونو جبدو جااوب)
وي... زعما!!!... لا لا ماشي مشكل.. غير هو واش قاد على شي سفر؟!!...
ماااا انا كنت بغيتك تمشي تفوجي وترتاحي ماشي تمشي تقابلييه...
علاش نحشم قلت شي حاجة مكينااش.. بففف صافي للي بان ليك الوالدة... انا فالمحال.. اممم راك جاية!!.. لا نشدو طريق اليوم.. فينما بغيتي... واخ.. (قطع لاح التيليفون فوق البوطاجي ضار لقاها وااقفة، مسح على وجهو)
تتشوفيني معصب متجييش تعنقيني نتي!!!
شريف: (خرج من المحال، هو تبع خوه غير باش ميبقاش فيه الحال على كلام سعد ولكن علاش يدور فيه هو؟! صونا على يوسف للي مزال تيليفونو خارج الخدمة مشا لقهوة للي اونفاص مع المحال بقا جالس بووحدو شاف صاحبة ملاك تماك جالسة بوحدها ناض من تمااك مشا عندها) باغدون نتي صديقة ملاك!!!
وفاء: (تبسمت حيت عقلت عليه) اه
شريف: (مد يدو) شريف خو مراد
وفاء: مشرفين انا وفاء.. (دارها إشارة فالكرسي الخاوي واش يجلس) اه جلس
شريف: (جلس) صاڨا؟!!
وفاء: الحمد لله ونتا؟!
شريف: الحمد لله رتاحيتو شوية من العرس؟!
وفاء: اه الحمد لله
شريف: مزيان، نتي ساكنة فاس؟!
وفاء: اه
شريف: ولكن ماشي بنت فاس
وفاء: لأ تازية ولكن شحال وانا هنا تنكمل قرايتي
شريف: فين
وفاء؛ دوزياماني ماستر
شريف: مزياان متشرفين
وفاء: (تبسمت)
شريف: (جا يهضر صونا تيليفونو كان ادم) باغدو (جاوب) وي ادم انا فقهوة**** ااهااه نتسناك هنا.. واخ (قطع جاه السرباي خدا براد ديال أتاي) متنصدعكش!
وفاء: نوو..نووو... (كانت كتسنى ملاك)
شريف: (جا يهضر معاها صونا تيليفونو وقف) باغدوو هادي مكالمة مهمة (خرج برا يجاوب) على سلاااامة امولاي السلطان
يوسف: ههه فيين
شريف: اوا لباس منين تظحك لباااس
يوسف: ههه مع 8 دوز عندي وصلنا للمطار
شريف: واخا سيدي
يوسف: ياله تلااح (قطع)
شريف: (ظحكو حيت قال شنو بغا وقطع ولكن راه عرييس واش غيساليلو هو!!! حس بقنطة كبييرة، دخل لقاها كتهضر فالتيليفون كانت زويينة ولكن الزين مبقاش عندو أهمية بزاف عندو حيت دوزو ولقاه فااالصو وأصلا مباغي دابا والو باغي غير ميبقاش بووحدو بقا واقف حتى قالتلو يجلس يعني ماشي مكالمة خاصة كملت وبقاو مجمعين فمواضييع عادية عاااامة... تم داخل ادم للقهوة)
وفاء متشرف بمعرفتك جا صاحبي بلا منديرونجيك
وفاء: (تبسمت حركت راسها باه) مشرفين
شريف: (وقف ومشا لبلاصة اخرى جلس مع صاحبو مجمعين هضرتهم على صداع للي ناض حيت حتى هو كان تمااك)
ادم: تنشوف اورطيغا وقح شوية لا!!
شريف: وقح!! علاش؟!
ادم: كان خاصو يحتارم سعد حيت كبير عليه ويدير اعتبار للحاج للي مريض وللي كبرو وتهلا فيه
شريف: غير نتا شفتها هكاك أما هو مدار والو بلعكس وبيني وبينك داكشي بين الخوت عادي يتنااقشوو اما قضية كبرو وتهلا فيه راه عادي حيت هو واحد منا
ادم: (فهم المعنى وفهم ان شريف فصف اورطيغا)
اه، عندك الصح...
اورطيغا: تتشوفيني معصب متجييش تعنقيني نتي ؟!!
ملاك: هاااااء
اورطيغا: شنو هاد هاااء مترحمي متخلي رحمة ربي تنزل وعاد يبقى فيك الحال من الفوق
ملاك: (هزت كتفها) سييير عندمن بغيتي
اورطيغا: (عوج راسو فيها) انا بااغييك نتي
ملاك: (شقلبت عينها) ولكن نتا متااح للجميع
اورطيغا: ههه انااااا الله يسمح ليك
ملاك: مالي كذبت غير ماشي ونتا ماد هداك الحنك للي شايط عندك
اورطيغا: اممم (دابا فهمها)
ملاك: (تيليفونها صونا كانت مها ونيت تهرب) مهم انا خاص نمشي تعطلت وماما كتصوني باش نرجع
اورطيغا: مزرووبة لهاد الدرجة
ملاك: (ببرود) اه
اورطيغا: (حرك راسو باه راسو غيتفرݣع بالمشاكل ومن جهة مباغيهاش تمشي ولكن هو براسي مغيبقاش فاس) انا غنساافر
ملاك: طريق سلامة
اورطيغا: (هز حواجبو بجوج كردة فعل اما هي كتغلي من لدااخل ديالها، مشا حداها مقرب رجعت اللور حتى تساطحات مع الحيط) مال مك على هاد لقسوحية
ملاك: اولا بعد شوية الله يخلييك خلي مساافة
اورطيغا: (زاد مقرب وحاني راسو كتر هي مبغاتش تقيسو باش يبعد حيت غيزيد يقرب) غادي نساافر وعقلي غيبقى معاك
ملاك: بعد امرااد شوية
اورطيغا: (قرب يدو لذقنها هاز راسها) مكرهتش نديك معايا
ملاك: (تزنݣت كتشوف فشنايفو وديك اللحية مخليااهم، كتعيا تهرب عينها منهم باغياه غير
يبعد ولا غتشوه وغتبوسو اللولة... هربت من تحت يديه) متعاودش دير هاكا امرااد
اورطيغا: (ضار ببطئ) علاش مباغيانيش نقرب منك؟!
ملاك: (سؤال دلخ** بقات ساكتة بحرا كترد النفس)
اورطيغا: (متكي على الحيط) مباغياش نقرب منك؟!
ملاك: مفهمتش هاد تقرب؟!
اورطيغا: انا باغي نكون معاك، نتي شنو باغية املاك؟!!
أمينة: مراااد مراااد!!!
اورطيغا: يااااااا الرب العااالي
ملاك: (تخلعت) ويلي ويلي ويلي مك
اورطيغا: هه مالها غتاكلك
ملاك: سير خرج عندها دغيا قبل متجي (شافتو واقف مشات كدفعو من ظهرو) سييير
اورطيغا: متقيسينييش الله يخليك (كيقلدهت) حتى انا متنبغيش للي يقيسني ومنقيسوش
ملاك: (ميقت فيه) بالفرحات عليك نرضى ونبغي حتى نشووف فييك اعسااك نقييسك
اورطيغا: ههه (غير كيظحك كتبسم حيت كتعجبها ظحكتو منين كيتغمضو عينييه خرج حيت واصل لواحد العصبية ومعاها غييير، خرج لقاها باغية دخل وقفلها فلباب) نعام
أمينة: شكون معاك؟!
اورطيغا: قلبتيها بوليس؟!!!
أمينة: نتا بهاد الخفة خاصك قشلة تهجم عليك
اورطيغا: ههه أأأأ الوالدة فين باغيا تصيفطيني؟!!
أمينة: حيد من لباب
اورطيغا: سيري للدار انا جاي
أمينة: (دفعاتو ودخلت باغية تشووف هاد لبنت للي مخليااه رااازن ساعة مكاين حتى حد هو براسو مفهم والو غير كيدور عينيه حتى طواليط محلول لباب جر مو لبرا) سيري للدار انا جاي نتحاسب مع الدري ونجي..
#يتبع