#مراس_الدعجـاء
الكاتبة هـبـه | هدهد💛
لا تنسون التصويت والمتابعة + تعليق يسعدني بالفقرات شباباتي 💛
وهمـي ماسـولفـته لاحد
خـاف يحسبني اشتـكيله
✤———————————————————✤
ليلة من ليالي أيار .. الهادئة
شوفوا بدون سلام خلي احچيلكم سالفة ، مرات تندم أشد ندم على قرار تاخذة بدون تفكير
-أي مثل حالتي هسه، حزام الكاميرا ملفوف على رگبتي وواگفه بمكان أظلم بعيد شوي عن الشارع الرئيسي الفارغ بهالمكان.. شلون انثولت وأجيت؟؟؟
خلي أوصف الكم المكان، گدامي سيارات سباق تتحضر حتى تنطلق وانا شنو دوري؟ أصور.. شوفوا هسه لو أهلي يشوفوني بنص الليل طالعة اصور هالسباقات الغير قانونية أحلف الكُم رأسي يزين بوابة المدينة برحابة
اتچيت على الشجرة البعيدة عن الشارع، أكيد ابتعد قابل اريدهم يدوسوني وأموت !
قربت الكاميرا لعيني وزومت العدسة على مجموعة شباب يتهاوشون وانا بداخلي اتمنى اعرف الموضوع الي يسولفوه .. كون انُ اني اراقبهم من فترة واصور سباقاتهم بحماس وأنشرهم على حسابي
اكيد أغوش وجوههم.. محد يعرف منو اني ولا حسابي .. عبالكم ما تهددت؟ يوووه شگد مريت بهالسوالف بس محد يگدر يهدد شعره مني مو ثقة بس صلافة زايدة
وگفت من مكاني إبتعد من الشجرة شوية بهدوء لمكان أقرب حتى أصور، داهمتني صوت البريكات مال السيارة والتواير وهيه تنرسم بقسوة على اسفلت الشارع وبعدها أنطلقت السيارات ومعاها ركضت لـ مسافة آمنة وبديت التقط بعدستي كم لقطة
صوت السيارات أطرب مسامعي ونزلت العدسة أراقب السباق بحماس.. أصلًا محد يهتم لأهتماماتي طول عمري.. من يوم ما فضلت السيارة على اللعابات والباربي وأهلي غاسلين ايديهم مني .. ما يعني هذا أنُ اني مو أنثى بس هم أحب كُل شي بي حماس .. أهلي أختصروا السالفة بـ "المسترجلة" شلون ووين وليش؟ ما أدري
أصلًا من يوم بديت أتلقى الرفض على كُل شي أقتنعت اسوي هالسوالف من ورة ظهرهم ، صحيت من غفلتي وتوقف النفس بريتي واني أشوف وحدة من السيارات تنزاح من الشارع بقوة وتتجه ناحيتي .. تجمدت بس بعدها تذكرت، لو أموت هنا عمري ماراح أحقق احلامي ولا راح اكون ألي أريد!!
معقول راح تنتهي سالفتي الي مابدت لسه؟
بسرعة ركضت لجهة ثانية ورميت نفسي واگعة حيل بالگاع وآني أتنفس بصوت عالي وأنيت بوجع من تشخطت رجليناتي من الوگعة .. بالجهة المقابلة انصدمت السيارة حيل بالشجرة وتگلبت وتهشمت واگعه على جهه من جهاتها
كممت حلگي اشهك من أنفجرت السيارة بصوت عالي خلتني اصيح واني أغطي راسي خاف يصيبني شي
تقربت بقية السيارات وحسيت بأشخاص يحيطون المكان وصياح وعياط ونبرات رجولية تهتف بـ اسم واحد
-عماااااااااااااد!!!
نسيت نفسي من الخوف لحد ما شفت انشغالهم وبسرعة ركضت لجهة بعيدة خايفه من الموقف وخايفه على نفسي من كمية الشباب اللي بالمكان ، بين ما أركض لبعيد سمعت شخص گال
- هاي منو؟
وشخص يصيح بي .. بعدها ركضت واستجمعت كل قوتي وگدرت أوصل لفرع بيتنا، وگفت استجمع قوتي وأنفاسي وأفكر بالحادث الي يبين جدًا قوي .. رن موبايلي بجيبي ورفعتة وبسرعة طلع أسم آخر شخص ردتة يخابرني هسه.. رفعتة اخفي توتري ونبرتي المهلوعة وجاوبت
- الو ها عيني
- سويتيها مرة ثانية مو؟؟؟
- لا شبيك .. طلعت أتمشى اشتم هوه وأشتري كم شغله ناقصاتني
- تضحكين عليه مو؟؟
- شبيك ليش تتهمني؟؟ من يمته أجذب عليك اني ياعيني؟؟ .. المهم راجعة يلا
سديت الموبايل بأستعجال وركضت للسوبر ماركت الي بالفرع واخذت كم شغلة وركضت للبيت .. وانا ببالي الصار
بعد شهر
..
- ها يمه شبيج؟؟ والنبي دا أقرأ
- عبالج ما أشوفج حاطه الموبايل بالكتاب مو؟؟؟ تريديني أكسره على راسج؟؟
- بس فتحته توني صديقتي تريد التلخيص راح ادزه إلها واسده
- كل ساعة نفس الغوانه مو؟ يعني هيج انتِ كل التلخيصات عندج وهنه ما يكتبن شي؟
- اي يمه شدخلني بيهن ، فشله اگللهن ماعندي
- يالله يالله دزيلها لصخيمه وسدي واقري سريع ترى اگول لأبوج وهو يتصرف وياج ماشي؟ راسي راح ينفجر بسببج يامصخمه
- يمه غير اقرأ على اليوتيوب محاضرات شلون اذبه
- يبوووو، دمشي أمشي اقري بالتلفزيون هسه أبحثي گدامي باليوتيوب واقري يالله وموبايلج ممنوع .. هم سنه ثانية وهم تسخت والله اگطع التوثية على ظهرج اذا رسبتي وفشلتينه
عضت شفايفي بملل على نفس السالفة ، اني سادس اعدادي .. أدبي وياريت حتى المدارس تنقرض ولا شفت السادس المصخم الملطم الله ياخذه وياخذ المدرسة والمديرة والوزير والتعليم كله
دا إقرأ.. او بالاحرى أسخت بالقراية، مليييييت مليييت مو سادس ضيم أظلم ، يعني وين اكو تزفيت سنتين وانوب كل ما أقرأه منا انساه منا گبل
لزمت الدفتر اشخبط بي واني ادري معدلي مايصعد عن الستين لو أبلع الكتاب واخزنه .. ادري تگولون تبالغين بس والله عقلي الي مثل الجوزة ما يستوعب ابدددًا ، أمي تروح وترجع تقارني بگرايبنا الي مطلعة طب .. شلون أفهمها هاي يمكن حتى المقدمة حافظتها
يعني عقلي ما يستوعب ابدًا شسوي؟ التعريف بنص الامتحان اگطم بي أكثر من حاجبي، التعليل اعل بي عل وما يطلع واترس الورقة تاليتها تجيني محمرة مصخمه
غلست عليه ماما ولهت بأخوي الصغير ووگفت ذابه الكتب وطفرت للحديقة أفتر بيها ، اباوع من الجهتين مال البيت والمضيف ماكو احد وبسرعة فتحت باب الشارع وطلعت أتمشى للسوبر ماركت الي بطرف شارعنا حتى اشتري نمنميات أتسلى بيهم، زحت ظفايري الثنين عن متني وخليتهم وره ظهري وزحت گذلتي القصيرة بسبب الحر
دخلت وشفت الرجال العجوز كالعاده هو الي يبيع وگاعد ورة مكتب المحاسبة ، رفعت أيدي وگلت
- الله بالخير ابو علي
- الله بالخير عمو ، شلونچ شعجب بينتي؟ صار فترة ماكو
- لو تشوف شلون حاطيني بالبيت وسايگين عليه بالرزايل علمود الامتحانات عمي جزززعت
- اقري عمو هو شبقالج بس أمتحان وتخلصين
- يوه عمو والقرآن الكريم قريت بزززعت وجزززعت من گد ما قريت بحيث أحس راح اشيب واني بعدني بشبابي، من گد ما رزلوني حتى زهرة شبابي فطست
- غير ندور مصلحتج يابنتي
- تاليتي اتزوج وزوجي يخون بيه واخلف 5 جهال وانجب
- ولازم تدرسين حتى ميصير مصيرج هيج
- الله كريم الله كريم
فتحت الثلاجة واخذت ببسي 2 ونساتل وتقدمت وآني احچي
- عمو هاي شگدوتها الببسيه؟ بعد بعد سووها ام المكع ، ليش هيج ليش؟
- شدخلني اني يابنتي غير المصنع هيج سووها
- دشوف هسه راح اخذ 2 .. لو ماخذه بطل بيسي مو أحسن ؟
- اي اخذي عمو اخذي
- صدك شلون الحجيه ماصار جواز سفرها؟ يمته يصير مو بزعتنه الحكومة الخايسة يعني هو جهاز كم ورقه يختمونها ما بيهم
- اي والله عمو تعبنا وهي تعبت تريد تروح للعمرة بس الجواز ما يصير
- امددداه وامددداهم والله بس يردون فلوس لو منطيهم جان ثاني يوم جايبي
- بعد شنسوي
- اي والله شتسوي عمو ، لو بيدك جان سفرتها بدون باسبورد بس الحظ مو بيدنا
- النا الله
- والنعم ، هاك عمو هذا جبس ليز اريدة.. صاير ماتجيب ابو الفلفل ليش؟ يعني مو تعرف بيه ما أحب غيره ، والاندومي بس أخضر اكو؟ ماتجيب اصفر لو برتقالي ياعمووو
- اكو كوري مدري صيني هناك بالرفوف جبته
- لا عمو هذا ايراني يلعب النفس ضحكوا عليك وخلوك تشتري وطلع يفشل طعمه
- بعد شسوي ياعمو
- هسه أقنع الجهال يشتروهن كلهن تدلل
- خلف الله عليج عمي
طلعت بعد ما عبيت علاگه كاملة حتى أتسلى بيهم بالليل وسليت عمو ابو علي شويه، وبطريقي شيكت على الجهال مال المنطقة وگلتلهم على الاندومي وسگت عليهم .. مساعدة ومحبة للغير من يوم يومي
رجعت وگفت بالباب مال البيت متصنمة اشوف بابا واگف ومبين عصبي ومخنزر ودمارات گصته مبينه وهو يخابر .. لو اترزل لو اترزل
ركضت على البيت ودخلت واني مستغربة، رحت لغرفتي وشفت أختي آو بالأحرى البلوة مالتي.. كالعادة لابسة ملابسي وكاشخة على اخر حبابة ، تخوصرت وصحت
- نععععممم خيييير؟؟؟؟
- نعامة اي والله مو بنت
- كيييفييي نعامة تعضج وتخليج تصيحين ان شاء الله ، شكووو لابسه ملابسي؟
- يوووه هسه واذا قبل شهر منو لبست حذائي بالسفرة؟؟
- غبببرررة من طلعنة مو گلتلج اشتري من القميص ترى بعدين مانطيج قميصي بس رفضتي؟ لو تهيلگتي؟
- اني؟؟ يمته هالحجي؟ هسه نمونة واذا لبستة داده ماراح أقرضه
- لج رسل الهيلك مو علية حركاتج خووووش، تنزعي قبل لتطلعين لا اشگه على راسج
رسل:- يوووه دهسه شبيج ياعيني غلسي
- ممنوع ، نزعي لا اشگه
- يووووووبووووو، لتخبصيني ليالي يالله دفضيها ست محاسن
ليالي: چؤ .. يااااللللللعععع
- لحد يلحدج يالخايسة
- ديلااا
- مگبرة
- تگبرج
- لياااالي الصيف الكئيبة انتِ
- اصير ليالي الشتاء هم.. ليالي الدنيا انا
- دطيري لج
- خلص سماح البسي اليوم، أصلًا راح البس نظاراتج
- لا بله
- وداعتك حبيب ئلبي
- شگددد سخيفة
- مو بسخافتج
يوم جدًا عادي وهالهوشه بسيطة مقارنة بكل يوم تصير من الشعر؟، طبعًا أعرفكم عني .. انا ليالي .. الصيف والشتاء ، وهاي اختي الوحيدة رسل الساحرة الشريرة .. ضرتي على گوله ماما
دائما نتهاوش لو على أقل سالفة .. اكيد بابا ميقبل ويرزلنا ، احنه ماعدنه سالفة غير المشاكل وبابا حلالها وبرزايلة يسكتنا، تركتني وراحت تجاوب موبايلها الي يدك واكيد ماننسى عبارات الحب والغزل ونفس الاسطوانة
أختي رسل متزوجه عن حب وتموت عليه وهو يعشقها من جانوا بالجامعة واول ماتخرجوا تزوجوا .. احب علاقتهم والتفاهم الي بيناتهم رغم سوالفها الطايح حظها هنا بس هيه حنونه ومتفهمه وحبابه وي الكل عداي .. اتشاقه من يوم يومنا هنيج بس ما أنكر نحب بعض حيل ومانرضى الغلط على اي وحده منا
تركتها تخابر وطلعت للمطبخ ادور جدريتي الصغيرة حتى اسوي بيها اندومي ، معشوقي الاول والاخير، حطيت مي حتى يفور واني ادندن واغني .. شفت بابا يطلع من الباب الي يفصل بين بيتنا وبيت عمي
جان وجهه بارد وثگيل وهو يمشي ومن شافني أبتسم
-ابو ليالي: ياهلا بلولو شلونج بابا
- هلا حبيبي بابا الله يقويك
- حبيبتي ، امج وين؟
- جوه بابا
- ماشي
تركني اطبخ الاندومي ودخل ، استوه واخذته وطلعت للصالة آكل واني اشوف فلم اكشن على ام بي سي 2 .. وكالعادة عاداتنا وتقاليدنا تطلع لقطة ادبسز والريموت يختفي ويدخلون اخوي وابن عمي سوه ويافشلة الفشلة
- هذاااا الريييموووت ماهووووه والله
ضليت امعمع بمكاني وهمه غلسوا وسوو نفسهم مشايفين ودخلوا لجوة لغرفة اخوي
زلغت خدودي من الفشلة ويا گاع انشگي وبلعيني ، يعني الى متى؟؟؟؟
رحت ركض اطفي التلفزيون حتى لا يلعبون بيه جوله بسبب هالمستهترين نازعين المستحى والدين الجلاب
نزلت للحديقه بعد ماغسلت المواعين مال الاندومي ، شغلت المي ورشرشت الزرع واني مبتسمه على جمالهم .. بأثناء ما ارش حسيت على حركة وراي ، التفتت وشفته .. الشخص الي يخلي گلبي يمعمع مثل الطلي من النبض
- ها هلا بالغاط وين ماوين ، لاتسأل لا تگول
- هلا ليالي ، والله شغل وجامعة وتعرفين الظروف.. شلونج ؟
- بكل خير ، انتَ شلونك؟
-مجتبى : الحمدلله يارب ، مالج نيه تطلعين من السادس لو داچه السالفة ؟
- انطيها الك من الاخير مجتبى؟ داچه دچتين ونص
- عود ليش ماتقرين؟
- والنبي بزززعتوها لروحي شبيكم مو دا اقرأ يوووه، أنت أصلًا دوده كتب ولازك عليها لاتقارن السالفة
- شبيج ياعمري تعرفين منتظرج على نار حتى تطلعين وتدخلين جامعة وتعتمدين على نفسج واحنه أصلًا مانريد شي منج غير تنجحين يا ليالي
- لك شباوي مالي خلك راسي حينفجر من الدراسة ، والله أقرأ گد ما اگدر وفوك طاقتي هم
- شگد تتوقعين معدلج؟
- 60 انعم الله
- لا لعد داچه السالفة صدك
- أدخل أي شي وانجب قابل تتوقع اطلع طب مثلًا ؟ ترى أدبي
- هو لو دخلتي علمي جان هايهيه
- شقصدك؟
- ما اقصد شي ، يالله انا ماشي
- بس شسمه!
- شنو؟
- هيج ماكو شي
هز رأسه وطلع، جان ببالي نگعد نسولف عن غير مواضيع مو بس الدراسة التزفيت.. احنه مخطوبين من الطفولة لبعض، على أساس بس يتخرج نتزوج وتخرجه بعد سنتين ، عن نفسي اكيد ما أتزوج لحد ما اتخرج بس الي يقهرني ابد مايسولف وياي عن أي شي غير الدراسة ويروح
يووه انا هم مدري شبية صايرة عاطفية ومستهترة بس يمكن هرمونات ، خلصت رش الزرعات وطفيت المي ودخلت للبيت وبس صعدت شفت حسنين أخوي الثاني إلي بعمر مجتبى وبنفس الجامعة بس غير تخصص جان يلعب بلي ، بسرعة طفرت يمه واحجي بهدوء
- حسنكي حباب خلي ألعب وياك بس گيم
- ولي منا لا ادفرج
- حباب فدوه شبييييك
- أمشي اقري يالله لا أصيح لأمي
- يبوووو عليكم وعلى السادس والقرايه الله ما ياخذه واخلص
عفته ورحت لغرفتي وأحس بملل لأن موبايلي مو هنا وراح انجلط واتأزم لأن مو طبيعي احس صايرة مدمنة على الموبايل ، فريت بالغرفة وفجأة تذكرت سالفة.. صار فترة ما مسوية عناية ومقشرات وهالسوالف
طفرت على الثلاجة اطلع ماسكاتي والمقشرات وجبت مراية ، أول شي غسلت وجهي وبعدها زلت شعر وجهي وغسلت مرة لخ وقشرتة على الخفيف بمقشر مخصوص للوجه .. بعدها حطيت زيت لشعري وغطيتة
رتبت حواجبي .. جانوا طوال بس احب اكصرهم واسويهم مناسبات لوجهي مع انُ هواي اترزل من ماما بس يالله عادي ، طلعت بجامة خضرة طوخ ودخلت للحمام وما طلعت ألا واني مسوية لنفسي جلد حديد
خلصت وجبت ماسك الطين وفردته على كل وجهي وايديني وبعدها شلته ورطبت بعد ماحطيت سيروم ، رطبت شفايفي وسويتلهم سكراب خفيف قبل الترطيب ، رطبت ايديني وجسمي وحسيت براحة مو طبيعيه
توجهت على المراية اشوف وجهي .. جان أبيض ومتوحد اللون ومع الماسكات صار أحلى.. اكيييد يصير هيج اذا مشترية كل أنواع الغسولات والسيرومات وصارفة علية كليه ونص ومن غير جلسات التنظيف الي اسويها كل اسبووع بالبيت
أحس عندي وسواس قهري بالنظافة لازم اذا دخلت للحمام اغير جلد من المقشرات ، تركت شعري مصيبة الله السودة نازل على ظهري .. شعري طويل بس مو هنا المشكلة، المشكلة ثخين وملولو مو حيل حيل وبي طعجات ماتروح واني انسل بيهم أحبه يصير نازل ولازم أستخدم السشوار
جففت شعري واكيد گذلتي التسل سل وتبقى طايرة والمشكلة اگول اطولها بس كل متطول شويه ارجع اعدلها واگصها
خلصت واخر خطوة تعطرت وعطرت شعري وطفرت للجرباية، جربايتي العزيزة بعد روحي .. نمت بعدها نوم عميق
—
طلعت من الامتحان واني الحمدلله نص ونص ، يارب اجيب بالخمسين يارب يارب ، شمرت الكتاب بالمدرسة بعد ما شتمته وطلعت .. المدرسة قريبة على بيتنا بفرعين فأرجع لحالي بس هالمرة بابا منتظرني ، دخلت للسيارة
- ها بابا بشري شلون الامتحان؟
- الحمدلله زين
- ترفعين راسي يعني؟
- دايم راسك مرفوع بابا وهاي عندك محامي ومُدرسة وعسكري مثلك بعد شنو
- غير انتِ آخر عنگود البنات يابابا وفرحتي بيج أحلى
- هلو هلو بابا ، بعتهم علمودي
- هههههههههه ولا تبطلين سوالفج
- ان شاء الله ابطلهم من أعجز ، يمته تلتحق انتَ وحيدر؟
- هذا الاسبوع ان شاء الله بالثنين
- لا بابا حشتاقلك بتوحشني
- بعد گلب بابا ، تريدين نطلع افرج واشتريلج ؟
- ايييي والله شوفني بابا حتى مايطلعوني ولا يسألون علية اهلك واهلي
- خيولون اني اطلعج
- الله يخليك الي حبيبي
- ويخليج الي
طلعت مع بابا لمطعم ونزل الاكل ، اكلي المفضل يماااي
- احبك بابا من تعرف ذوقي
- هههههههههه المصلحجيه بس يم الاكل
- عليه هاي؟ منو لعد يمردغ رجلينك كل فترة؟
- يعني لو تمردغيهم على گولتج بالسنة حسنة صرتي تحبيني؟
- شلون لعد ما أسوي هيج بس الك لان انت مميز عندي
- اكلي بابا
جان يضحك وياكل ونتداهر سوه ، علاقتنه اني وبابا من زمان مميزة وحتى رسل تغار مني هههههههههه واحب اداهرها .. بابا اسمه فضل ، اول واكثر رجال اعشقة بحياتي ، يفهمني حيل ومتفهم لافكاري
خلصنه وشربنه جاي وطلعنه بوجهنه نشتري ، الي مايعرف اني احب الملابس واعشق الملابس وعشقي الملابس .. الكنتور 6 ابواب حينفجرر من الملابس بس لازلت احب اشتري واكدسهم تكديس .. اشتري نوع ملابس بستايل البسة فترة ويروح واهسي وارجع اغير الموديل والستايل كامل
طلعت بعدها اني وبابا شايل كومة علاليك واني بيدي جبس ليز حجم كبير وببسي وعلبة العصير مال بابا لان خطيه تعب ومابي يشيلها واني اشيلها ببدالة
ليالي:- عاشت ايدك بابا ماتشوفني شلون صرت كئيبة من السادس الاسود ضيم وهسه خوش ونستني
- تدللين بابا ، شو شربيني من عصيري متت عطش
رفعته وقربته يم حلگه وشرب ، ابتعد وكملنا مشي .. فتح السيارة وحط الملابس بالجنطه وحرك السيارة
- بابا خاف ماما تعصب عليه اذا شافت هالملابس لإن تگول الكنتور مكسور
- ماطول اني عايش محد يعصب عليج حبيبة ابوها .. نشتريلج كنتور بعد اذا تريدين
حضنت ايدة وبسته من خده حيل وهو يضحك
- بابا اذا ماجبت معدل زين شسوي؟ تعصب مني؟
- ادخلج اهلية امري لله ، مبين من سؤالج ضامنة السالفه
- شسوي يعني والله والله صعععععب وماكو حذوفات وراح انجلط
- تفائلي بالخير بابا
- الله بالخير ونعم بالله
وصلنا ودخلت مع بابا العلاليك ودخل هو يرتاح واني عفت الغرفة بهوستها بالاغراض ونمت بملابسي من التعب
-
الفجر گعدت واني الفرحة ماسايعني .. بعد ماكو سادس!!! گلللللييشششش، طفرت وشفت موبايلي على الكومدي بصف الجرباية اخيرًا نور عيوني حبيبي بشوفتة صار فتررررة بدونه
اخذته وربطت شعري غسلت ورحت للمطبخ ابحوش على اكل وميته جوع ، شفتهم خالين ماعون بي قطع بيتزا ماما مسويتها مع ببسي معشوقي ، الحمدلله يارب الحمدلله مانسوه
حطيت البيتزا بالفرن تحمي وطلعت ثلج اخلي بالكلاص حتى يصير الببسي مجرش وكما أعشق ، طفى الفرن وخليت البيتزا بماعون وأكيد من الثول انچويت شويه
صعدت للغرفة وشغلت موبايلي واني اكل وابحث بحسابي واشوف شنو آخر الاخبار وفتحت حسابي وشفت كووومة اشعارات، حسابي مشهور نسبيًا بي اكثر من 100 الف متابع
محتوياتة عن السباقات والسيارات المخصصة للسباقات عامةً، الحساب غير معروف الهم اذا كان بنت او ولد وهذا اكيد لصالحي حيل، نشرت ستوري اسأل عن اخر الاخبار الي صارت وعن النزالات وجذبني مسج كاتب
-"سباق سيارات راح يصير بساحة الـ***، البي ام دبليو ام ثري تفوتك والله نارية وراح يتواجدون متسابقين هواي "
بقيت ارمش شوية وأستوعبت الساحة بعيدة عن بيتنه بس عشرين دقيقة!! وبي ام!! لا !!! لا أكيد أكيد اروح ، اخذت سكرين للرسالة وشفت التاريخ الي دازة بعد 10 ايام .. ممتاز
شغفي الخفي بالسيارات.. محد يعرف هالجانب مني، مرة فتحت الموضوع مع امي ومباشر واجهتني برفض تام للموضوع وللآن اتذكر من گالت
- السيارات شنوو؟ شبيج انتي؟ وين اكو بنت تشتغل بسوالف السيارات؟ اگعدي واسكتي
ومن يومها أسوي كل هواياتي من ورة ظهرها، ادري غلط بس مو حرام الي دا أسوي.. مجرد أصور سيارات ومستقبلًا أريد اجرب كل احلامي، شغفي بيهم وبكل شي يخصهم .. محركات والسرعة وهالسوالف تجذبني
مو انُ ما احب سوالف البنات لا!! أوك اكيد أعتني بنفسي والبس بس مايضر انهُ انجذب لهيج سوالف.. من يمته السيارات للرجال فقط؟ مستحيل أمتنع عن شي احبه بسبب تفكير هيج مجتمع فاسد
عائلتنا صدك منفتحة ومترابطة بس مو لدرجة مثل هاي .. للان اكو عرج قديم بيهم واكيد اني الي راح اگطعة وأشوفهم
تصفحت بموبايلي شوية وجاوبت كم مسج لحد ما مليت وشغلت فلم سباقات اتسلى بي وبقيت هيج لحد مانعست مرة ثانية ونمت
—
بعد يومين
گاعده مع بنات عمامي 2 وجنتهم ورسل نسولف
بنفس الوقت محد بالبيت غيرنا وامي وعماتي طلعن
طفرت رسل تگول
- اگللجن محد ناوي يعرس شي نريد نردح
-ريام: يوه هسه لو مجتبى بي حظ يتزوج بس قافل إلا يتزوج من يتخرج فقط.. لك مو بطيت گلبنه
-ليالي: ديلا انجبي خلي براحتة شدخلج بي ؟
- يمه يمه متقبل على الحب مالتها اوي
- انجبي ريااام احسلج ، شعندي متزوجه هسه؟ اتخرج نهائيًا يالله اتزوج ماريد اتزوج هسه
-نرجس: لا عيني اخونه نزوجه بعد سنتين من يتخرج
- زوجوه لعد عيني منو لازمكم
- غير انتِ خطيبته
- گلت الي ببالي ما أتزوج قبل لا أتخرج لو شنو يصير
-دعاء: دسكتن سكتن شكو تتهاوشن، يالله عادي حبيبتي هم حقج لتتزوجين لحد متتخرجين
-ليالي: بس انتِ تفهمين دعاوي .. هنيال مرتضى عليج والله
-دعاء: بعد روحي ، احلى مرت حمى بالكون
-ليالي: دنجبي هسه بعدنه ما سمينه بالله
-دعاء: بسم الله يالله
- السخافة تگطر
- رسل: بنات شبيكم هسه خلي نتونس
- ريام: خلي ندز على حبشكلات يالله ونتونس
- ليالي: اني اروح للسوبر ماركت اكتبن بورقة شنو تريدن وانطني فلوس
- نرجس: سمعت بيها دياحة كيفت
- ليالي: اديح شعندي شغل عمل شغاثج انتِ؟
- ريام: هاج هاي 5 جيبي اندومي وحبشكلات يالله قبل لا يجون أهلي
آخذت الفلوس واني مزعوجة من الغثة نرجس ، تغاااار تغار غيرة على اخوها مني واربعة وعشرين ساعه تتهاوش وياي ام عطوب المشلعة الخايسة المطية، غثه مال واحد يحطها ويدوس ببطنها
ام عطوب ، تمشيت طالعة بالفرع واني معصبة ووصلت للسوبر ماركت ودخلت ، جان اكو شباب يشترون وما أهتميت وتعديتهم واگفه يم ميز المحاسبة مال ابو علي ، رفعت أيدي إسلم
- الله بالخير عمو
- الله بالخير هلا عمو هلا
باوعتلهم ورفعوا عيونهم من سلامي ونظراتهم مستغربة ومشيت اخذ 6 اندوميات وبطلين ببسي ونساتل وسطرتهم على الميز
- اريد هذني، ماعدكم جبس ليز حار ابو الفلفل؟ لو هم ماجبت عمو؟
- لا عمو لولو ماجبت والله ، اكو جبن وكتشب وخل
حسيت بفشلة من دلع اسمي كدامهم وما تجرأت أرفع عيني بس بينت نفسي ما تأثرت وحجيت واني ابعد گذلتي القصيره عن گصتي
- خوش راح اخذ خل، اكلك عمو ماخلصتوا الجواز؟ لو الهتلية ما خلصوه لسه
عضيت لساني من حسيت بضحكة مكتومة من وراي والتفتت اباوعلهم ورافعة حاجبي ، ولا واحد باوعلي منهم ويسوون نفسهم ملتهيين باللي گدامهم مال الوجع.. گلبت عيوني بملل وباوعت لعمو من حجه
- اي والله عمو طلع الحمدلله وخالتج تسافر الاسبوع الجاي
ماتحملت وصحت
- صلاااواات محمدية ، ينراد بعد هلهولة مو؟
الضحكات المكتومة رجعت من وراي هالمرة .. باوعت بسرعة وشفتهم منطيني ظهرهم وأصلًا ما اهتميت
- يالله عمو حاسبني وضيف عليه 5 جباسة ليز خل حجم صغير ابو 500
- 5 نساتل الف وربع و6 اندوميات الف ونص وليز الفين ونص وببسي بألف
- يعني شگد ؟ ناسية الرياضيات عقلي مايستوعب واحد زائد واحد شگد من ورة السادس اعذرني
- ستة وربع
- يحح عمو وهذني ما انطني بس 5
- جيبيها عمو وبعدين جيبي الباقي ماكو مشكلة
- لا ايعععع ما اخذ بالدين علمود ما اجيبهم بعد ترى ويبقن بذمتي واروح للنار علمودهم
حمحم شخص من الواگفين وگال يوجه كلامة الي
- هاج اني ادفعهم
رفعت حاجبي وباوعتله صفح وگلت
- ليش ششايفني مجدية؟
- لا العفوا بس-
- من محد يطلب منك افضل تبقى ساكت
انگلب وجهه وتفشل ورجع ليورة وفتحت جنطتي بيها الفين وطلعتهم، اكره الحشريين وشكلهم مو راحة ابدًا ابدًا
- شوف عمو هاي راح ادفعلك واطلعهم من عيونهم وخصوصًا ام عطووووب الصخلة نرجس
- بت عمج ؟
- اي اي هيه المطية تريد تزوج اخوها
- ياهو هذا عمو؟
- هذا الخاطبني شباوي تعرفه
- اي عرفتة عمو .. شبيها تزوجوا
- لا شتزوج بعدني صغيرة من أتخرج أتزوج
- عفية عمو أحسن
- اي والله
اخذت العلاگة وقبل لا اطلع صاح ابو علي
- ها عمو
- بعدلج سبعمية عمو اوگفي
- خليهن عمو بلكي يحتاجهن احد
وطلعت ومن كل عقلي اني مسوية صدقة ، رجعت للبيت اتمشى وادندن وهذا اليوم اللطيف مر بسلام وهدوء
-
اليوم هو اليوم المنتظر .. يوم السباق .. وأكيد اني أطلع حتى شنو؟ أصور يعني شسوي مثلًا ؟
محضرة ملابسي الي عبارة عن تيشيرت اوفر سايز ازرق وبنطرون واسع رياضي اسود مع شفقه وكاميرتي لازم، حرصت على أنُ ما إبين حتى اصور براحتي
الساعة بالعشرة بالليل والسباق بده من ساعة وتأخررررت لإن أهلي گاعدين.. ماما راحت تنام ونومت اخوي الصغير الحمدلله وحسنكي طالع وبابا وحيدر التحقوا .. صح اذا عرفوا حتكون نهايتي خصوصا على ايد امي بس يالله عادي الحياة تجارب
نزلت بعد مابدلت على السريع وربطت شعري وضفرتة لورة حتى مايعيقني ، اخذت الكاميرا وفلتت بهدوء حيل من الباب الثاني الي صاير ورة البيت ، حرصت اتجنب الكاميرات والحمدلله طلعت بسلام
صار فترة طويلة ماطلعت ولا صورت .. من بعد هذاك الحادث وحتى الصور ما نشرتهم من الخوف ومن بعدها حتى اخبارهم ما سألت عنها لان خفت يعرفوني خصوصًا من انتبهو كم شخص الي لذلك فضلت اسوي نفسي ما عرفت ولا شفت احد
اخذت السكوتر مالتي وانطلقت بي بالشارع أحاول أوصل بسرعة ، حتسألوني أخاف ؟ أكيد وبكل ثقة اگللكم لا .. الكلاب الي بالشارع اذا شافوني يشردون .. مرة من جنت طفلة جان اكو كلب حراسة عدنه وجنت اعاملة معاملة الحصان ومنها تعلمت اروض بالكلاب واخوفهم .. ماما بهذيج الفترة كل ماتشوفني توديني للحمام تسبحني لان بنظرها صرت نگسه منهم
يووه عاد شلون طفولة واني اسولفلكم ، رفعت عيوني عن الطريق وشفت أضواء واصوات عالية وأحلى صوت اسمعة بحياتي .. صوت السيارات وهيه تزمجر بصخب ، اخذت زاوية بالمكان وحرصت محد يشوفني حتى لا اتفشل او يصير شي .. ضميت السكوتر بزاوية حتى لا ينباك وتتشلع اذاناتي بسببة
عدلت عدسة الكاميرا ووگفت بهدوء اتقرب كل شوية واي سيارة توگع عيني عليها أخذ الها لقطة، جان اكو صخب عالي وهتافات للشباب وسيارات عجيبة وتجنن .. من مواصفات تشك شك، تقربت شوية بعد ووضحت الي الساحة المليانة شباب وهتافات وصوت أغاني عالي وكلها تتباهى بشغلها.. لحد ما مرت ساعة او اكثر بدون ما أحس
خنست بزاوية وضميت الكاميرا من سمعت شباب يتمشون بجهتي وشخص معصب اسمعة يصرخ بطريقة ممفهومة وشباب حوالية يهدونه ، وصاح على واحد منهم
- شنو دا تحجي أنتَ ها؟؟ يتحداني النذل وارفض مو؟؟؟ والله اكسر راسة وراس كل شخص يطلع وراه هم بس لتخاف اندمة واكسر رگبته هنا
- مجيد لا تتحداه ترى تعرف أنت منو وراه ومو تغشم نفسك..
- شقصدك ياكلب؟ أخاف منه اني مو؟؟؟؟
- لك لا مو هيج قصدي لتفسر من مكانك وهديلي روحك
- شوو دولي عني وعوفني
- شبيك مجيد؟؟؟
- أشرب من دمه ودمهم
- هواي وراه مستحيل تسويلة شي ماتعرفه لأخوه؟؟؟ ولك يموتنا وما يهتز منه جفن، تتذكر الحادث لو اذكرك شصار بهذولاك؟؟
- دكل نعل وولي من گدامي، اخوه مسافر هسه
عافهم الي اسمه مجيد وطلع متجه خارج المكان ولحگوه بسرعة، الحمدلله بقيت بمكان معزول لأن لو شافوني اكيد حتصير مشكلة وشكلهم مايطمن أصلًا.. بس زاد فضولي الي راح يذبحني فد يوم ... عدهم تحدي؟؟؟ اوف واني شكو فضولي صعد؟
خلصت تصويري وطلعت بالسكوتر للبيت واني افكر بالسالفة وقررت أبحث بالسالفة وشيصير خلي يصير .. عيوني تجولت بالشوارع والظلام ، شگد متعودة عليها لدرجة لو أغط بيها ما أخاف
نزعت الشفقة وعدلت شعري وبقيت أتمشى بالسكوتر وادندن لحن اغنية سمعتها قبل فترة .. وفجأة صار من وراي ضوة قوي وسيارة عدت بصفي بسرعة جنونية فززتني ، وگفت للحظات اتابعها واني اشوف البي أم دبليو!!! يمه وحدة من احلامي .. لو أطير ما الحگها وهيه تحركت بسرعة عالية
بعد لحظات وصلت لفرع البيت وحرصت اتختل حتى لا سامح الله اشوف احد من أهلي او يعرفني وبسرعة ركضت واني شايلة السكوتر ودخلت من الباب الخلفي واني إسمي بالله على كيف .. عود أخاف ؟ لا بس اتمنى محد گاعد لان مابيه اترزل ونعست
ركضت للبيت ودخلت والحمدلله كلها نيام.. عبرت الدرج بصعوبة ودخلت لغرفتي وقفلتها وتنهدت بصوت عالي واني انزع حذائي
- يالله .. همزين محد گاعد
غيرت ملابسي لشي خفيف وفليت شعري وانسدل بتجاعيد بسبب الظفيرة على ظهري نايم .. طلعت للمطبخ اشرب مي وأكل شي لان المشوار جوعني حيل، أصلًا يمته اني ما جوعانة ؟؟ كل الوكت ميته جوع
لگيت تمن ومرك بس عفته لان مابيه أحمي.. أوك عجزهم قتلهم أدري بس مااابييييه أحمي ، شربت مي واخذت موزه وصعدت بعدها أتجهت للكاميرا وبسرعة أرسلت الصور لموبايلي وفتحت حسابي أنشرهم بعد ماعدلتهم شوية
الساعة 12 بالضبط ، بدت اللايكات تجي وآراء عالية على التصوير وبعض أصحاب السيارات شكروني على التصوير .. تركت المسجات تتراكم لان كالعادة أبدًا ما ارد على المسجات.. اي مغروره
لا جذب بس يعني ما أحب اسولف مع الشباب .. أكره اسولف وياهم.
بعد لحظات غطيت بنوم عميق
-
گعدت بعد ما انرفست ببطني من قبل مدلل البيت القزم .. الفصمة الي عمرة 4 سنوات وخباثتة الشيطان موارثة اله
- ليالي: علوش اذا ما توخر اخليك تبچي هنا
- علوش: ماما دالت خلي تدعد لا اكتلها يلة (ماما گالت خلي تگعد لا اكتلها)
- اريييييد انااااام
- دووومي دووومي
- بلوة على شيطانك يالاغبر ، گللها راح تگوم خوش
- يلة يلة
- اگلك منو جوة؟
- محد بث ماما
- خوش روح ابدل واجي
طلع يقفز من غرفتي ووگفت غسلت وبدلت وطلعت للصالة ، جانت ماما گاعده تفلس لوبية وعلوش يلعب بالايباد وملاعيبة مطشرة
- صباح الخير
- صباح النور، يا صباح هذا ادنيا الظهر
- مايفرق ماماتي
گعدت يمها اداهرها واتريك چاي وصمون وجبن ، أنتبهت البيت يصوفر
- حسنين وين؟
- طالع مو تعرفين بي ميركد بمكان
- هنياله عمي مو اني الفگر گاعده بين أربع حيطان
- هذاك بيت عمج اطلعي يم البنات تونسي منو كامشچ؟
- ايع ماما مليت اريد افرفر للسناتر والمولات لمطعم هيج
- امبيتها البامية شگد تنفخ ، صار مايعجبج غير المولات
- ماما شبيج مو زين نتثقف ونصير من هذولة النازوكيين ونلبس ماركات وسيارتنا تاهوو ونطك بالعلج ومايعجبنه العجب
- غدددي شگالولج علينه وتاهو شني؟ شبيهه السوناته متعجبج؟؟
- يبوووووو عللللى حظظظظج ليالي
- امداج لتصيحين وأمشي اغسلي المواعين بالسنك دامج خلصتي
- شلون حظ قابل شمتوقعة اني؟
- دمشي لج
- ماشية ماشية ، إلا اكسرهن كلهن وشوفي
- كسري وشوفي
عفتها وشلت صينية الريوك ودخلت للمطبخ غسلت المواعين ، كل واحد يتريك بصينية ما شاء الله ، خلصت بسرعة واخذت فلوس وطلعت اشتري شي من ابو علي واني كل بالي وي موبايلي
توني تقدمت اريد أعبر الشارع ما احس إلا وسيارة تقدمت بسرعة وصار صوت عالي وفتحت عيوني مصدومة وخايفه من...
✤———————————————————✤
مجرد بداية بسيطة 🙈🔥
الحماس حيبدأ من البارتات الجاية انتظروني ..
التنزيل كل يومين بارت 🔥✨
شخصية البطلة تجنننن احبها ✨✨
سولفولي توقعاتكم بالأحداث ؟ شنو راح يصير؟
شنو توقعكم للبطل؟ هل هو مجتبى ؟؟؟🙈
ليالي (صاااكة صاااكة) 🔥😭
حرفيًا شگد ما امدحها ماگدر اوفي بحقها
جمالها كوم وشخصيتها كومين ثانيين صريحة صرييييحة وتخبل
الإنستقرام: iwantmeto
- لاتخرج من دون التعليق وأبداء رأيكِ والتصويت لُطفًا -
دُمتم بِودّ