وتيرة الاعرج

الوتيرة السادسة

وتيرة_ الاعرج
بقلم: حوراء السعيدي

حبايبي لاتنسون التصويت من النجمه+التعليق
بين الفقرات + ومتابعة لحسابي .." 🍂hawraalsaidi

وصلت لباب بيتي دكيته بقيت واكف منتظر احد يفتحلي لباب اشم ريحة طبخ امي الي طالعه لباب البيت شكد مستفقدها بالدوام الاكل مو مثل اكل بيتك انفتح الباب وگلبي رجف بشوفتها ..

عيونها السود تضحك مثل روحها حضنتني
حجت بهدوء ..

-حنين: شتاقيتلك دلغام

ضحكت بيني وبين نفسي ماتبطل هل الشي تلفظ اسمي بهل الطريقه من طفولتها نفس التصرفات ماتغير اي شي بيها زفرت نفس مغمض عيوني ..

-درغام: بلائي الجميل

ابتعدت عني تضحك لازمه ايدي بايدها ..

- طولت هل المره

- شغل وعيونج السود

- بعد لاتطول هيج

- حاضر شنو راح نبقى هنا الشمس سمطتنا

تخصرت وتحجي بضوجه وزعل ..

- هسه شبيك تحمل الحراره علمودي هاي لو غيري جان كتلها اتحمل التيزاب علمودج

- ها حنين اشتغلت سوالفج هُوَ كافي شمس الدوام ومحمد مسلوك سلك بالحر هسه خلي ندخل وعود بعدين اشتغليني براحتج وباليعجبج

دنكت شلت جنطة دوامي ماخطينه بس خطوتين وطلع صوت طلقه ويا صوت الطلقه صوت صرخة حنين سحبتها الصدري صرنا وره الباب

- حنين ابقي هنا لا تتحركين

عفتها وطلعت للشارع اركض بس مالحكت على شي السيارة شخطت سريع ومااحكت اشوف شي منها منو ذوله مكان بيتي مو الكل يعرفه خصوصاً احنه بعض الضباط قليل الي يعرف مكان بيوتهم بسبب خطورة شغلهم هزيت براسي وانه اتوعدله

ذكرت حنين عفتها وحدها رجعت الها اركض وكفت من شفت اهلي واهلها ملتمين عليها تقربت الهم وگلبي ميت من خوفه كعدت بصف غياهب

-درغام: حنيني رفعي راسج ماكو شي

لارد .. بلعت ريك بخوف من شفت الدم الي نازل من رجلها رجفت كلي مديت ايديه عليها كوه رفعت راسها مغمضه عيونها دفعتني غياهب وهيه متخبله على اختها ..

-غياهب: ش شنو هذه .. التفتت عليه .. درغام شبيهاا اختي وشنو هذه الدم

ردت اجاوبها وحجه عمي سلطان بصياح ..

-سلطان: مووو وكتتت هذه الحجيي ولكم بنتي راح تموت وخرري غياهب

بعدنه كلنه وشالها رحت كدامه فتحت باب السيارة حطها بيها وغياهب صعدت يمها

-سلطان: درغام انتَ لاتسوق شوف حالك

-درغام: مابيه شي عمي وخلينه ناخذها للمستشفى النزيف راح ياخذها

صعدنه بسيارتي متوجهين للمستشفى غياهب تخبلت علينه بالسيارة بس مشكلتها ماتبجي تحجي بروح رايحه ومفرفحه بس ماتنزل دمعه منها وهل الشي يخليني اتاذه عليها ..

منو ذوله وليش حنين معقوله يريدون ياذوني بيها ضربت على الاستيرن بقوه اذا الزمه مارحمه اله هيه كلشي ولا اذيتها ادفع عمري فدوه الها بس ترجعلي ضحكتها وصلنه للمستشفى نزلت بسرعه انه شلتها ماهتميت لنضرات عمي سلطان الي جانت عليه دخلت لداخل المستشفى ..

دخلوها الدكتور بقى يفحص بيها رفع راسه الي ..

-الدكتور: ما نكدر نعالجها

-درغام: شنووووو ماتكدرر تعالجهااا جااييي تنزففف

- الرصاصه الي بيها جايه مقصوده وبهل الحاله مانكدر نسوي اي شي اله تجي الشرطة تحقق بالموضوع

لزمت راسي حاير هو صح كلامه بهيج حالات مايكدرون يتحملون المسؤولية بس اباوعلها النزيف اخذها

- دكتور انتَ عالجها وانه احلها شوفها والله النزيف راح ياخذها مني الله يخليك

مارد عليه وبقى ثابت على كلامه حسيت فقدت اعصابي تعاركنه انه وياه ودخلو ابوي وعمي والكادر الطبي الموجود كوه طلعوني بره ..

-جابر: ولك درغام تخبلت شبيك

-درغام: يابه جاي يكلي مايعالجها ولمن تجي الشرطة تروح منه

رفع اصبعه بوجهي وهُوَ يحذرني ..

- ممنوع تحجي حرف ولا تدخل جوه هسه احلها

- ماااادخل ماااادخل بسسس حلوووهااا

دخل ابوي يمهم وانه بقيت واكف يمكن لو ماطالعتلي ماصار كل هذه وياها يمكن لو مابقينه نحجي يم الباب ماصار ولا اتأذت ..

******
-غياهب : تعارك درغام والدكتور وصارت هوسه كوه لزموه جان متخبل اكثر منه لان النزيف جان قوي تدخلو خوالي وابوي يلا انحلت بقينه كاعدين منتظرين لأن دخلوها للعمليات ..

صارت نضراتي تتنقل على درغام واكف وجهه محتقن احمر من العصبيه وخالي يحاول يهدي بيه اثبتت عيوني على ابويه الي واكف وواضح شكد تعبان رحت عليه ..

-غياهب: ها يابه تعال اكعد لاتبقى واكف شوف شصاير بيك

طلع الكلمة بتعب منه ..

-سلطان: اختج

- ان شاء لله مابيها شي ادعيلها وعلى كيفك ويا نفسك

هز براسه ساكت ماطول دقائق وانه اشوف كل جسمه صار يرجف لزمته احاول اسيطر عليه بس هيه وينها القوه الدنيا جايبتني تكفخ صحت بصوت على درغام وخالي صاحو على الممرضات دخلو يفحصونه بقيت على كعدتي ماكدر حيلي باد كله وكفت لازمه بالحايط ورجليه ماحس بيهن ..

غمضت عيوني وايدي على جهة گلبي افرك بيها حسيت النفس ضاك اختنكت
ياربي اله همه كلشي اخذ اله ابويه واختي لايتأذون ماكدر اتخيل حياتي بدونهم ماعندي بالحياة غيرهم همه قوتي وضعفي ..

فتحت عيوني شفت خاله وجدان جايه من بعيد وصلت يمي حضنتني ..

-وجدان: اسم الله عليج اهدئي حبيبتي

-غياهب: اختي خاله

- مابيها شي هسه ترجعلنه لاتفكرين بشي ماما

صارت تمسد على شعري بايدها بحنيه مو شي جديد عليها دائما هل الحنيه نشوفها منها اسمعها تبجي بهل للحضه فكرت شيصير هسه لو انه مثلهم واكدر ابجي يمكن راح يخف ولو شويه من العذاب الي انه بيه ..

الي وصلني لهل مرحله بحياتي ماراح اكدر اسامحه رفعت نفسي من حضن خالتي صارت عيوني على الممر الي كدامنه شفت شي مثل الخيال خطف فركت عيوني بايديه ورجعت ركزت على نفس المكان ماكو احد شبيه صرت اتهيأ اشياء ..

اجت رساله على جهازي من نفس الرقم التابع للمجهول نفسه ابتعدت عن خالتي وكفت بجهه فتحتها جان كاتب بيها ..

-المجهول: تمثليني بقوتج بس للأسف داخلج حُطام

كتبتله وايديه يرجفن بس مو من الخوف من الهبطات الي اكلتها ..

-غياهب: منو انت ؟

ماطول وهُوَ يرد كلعاده ..

-المجهول: ممكن جحيمج

بقيت صافنه بالرساله منو هذه وشيريد مني وليش مخفي هيج شنو هل الاحداث الي جاي تصير من كم يوم حياتنا جانت هادئه وبعيده عن كل هل التوتر الي هسه احنه بيه شيقصد جحيمج ؟

انه حتى علاقاتي قليله وسطحيه منو ممكن يتجرأ هيج يسوي صفنت واجه ابالي شخص واحد بس هُوَ بس الي يسوي هل الشغلات وللعب بس هل الشخص اختفى من سنين كأنما الأرض انشكت وبلعته ..

عفت كلشي ودخلت الابويه جان نايم وعلى راسه ممرضه واكفه تسوي بالمغذي رفعت راسها شافتني وجهت سؤالها الي ..

-الممرضه: شتصيرين من المريض

-غياهب: بنته

- عيوني انتبهو على المريض لأن مريض السكر مايتحمل هبطات قويه

عيوني صارت على ابوي الي نايم ورجعت باوعتلها حجيت بعدم فهم واستغراب ..

- سكر ؟

- اي نعم والدج مريض بالسكر ومن زمان

عافتني وطلعت بقيت واكفه بمكاني ليش مانعرف بشي احاول استوعب كلام الممرضه دخلت خالتي

-وجدان: شبيج غياهب

-غياهب: خاله بابا مريض بالسكر

تغيرت ملامحها مثل الي اتفاجئت وفاجئتني اكثر بجوابها وهيه تگلي ..

- ادري

- هه شلون يعني تدرين فهميني

- من كم يوم جابو النه متخربط بدوامه وهم عرفت صدفه ومن رجع لوعيه ماقبل احجي شي الجن

- واو

- ماراد تخافن وتقلقن عليه

- واو مره ثانيه

سحبتني من ايدي طلعنا بره وكفت ولازمه ايدي حجت بهمس ..

- باوعيلي غياهب

- ليش مو انه اثق بيج شنو راح نستفاد من يصيرله شي ونعرف متأخر

صارت تحجيلي وتبرر الموقف وانو ابويه الي طالب هل الشي منها كلمة اسمعها وكلمة لا ما ادري شصار بيه بهل الوكت بس الي ردته اشوفها اي لازم اشوفها عفتها تحجي وطلعت اركض من المستشفى

ماهمني احد الكل انضارها صارت عليه وجهي نار تطلع منه سمعت صوت درغام يصيح بأسمي وراي مالتفتت اركض طلعت من المستشفى صعدت تكسي واتوجهت للمكان الي بسببه ماعشنه براحه ..

وصلت نزلت وكفت كدام الباب اباوعله هل شهد على دمار اهوايه ناس صرت ادك الباب بكل ماعندي قوة وحركة گلب بس أريد احد يفتحه انفتح الباب جانت حبوبتي هيله باوعتلي مستغربه من حالتي ..

-هيله: شمالج حبوبه

رديت عليها بهدوء عكس العاصفه الي بداخلي ..

-غياهب: زمُرد موجودة

بعدها ماراده عليه وطلع جدي وجهه ينفض غضب ..

-سالم: زمُرد امج عيب هل الحجي

ابتسمت باستهزاء وافر بايدي ..

- شبيك حجي انتَ اخر واحد يحجي بالعيب وهاي عن يا ام تحجي عنهاا شكد بطران انتَ

عفتهم ودخلت جوه ادور عليها الى ان لكيتها كاعدة وكدامها صحن فواكه تاكل وضاربه الدنيا چلاق وصابغه الشعر واللبس احسن لبس لابسه زفرت نفس وانتچيت على الباب ..

-غياهب: تاكلين الف عافيه هني ومري

-زمُرد: حنين

صفكت بايدي مبتسمه ..

- انتِ حتى ماتميزين منو غياهب ومنو حنين ولايهمج هسه اعرفج عليه وياج غياهب

- شكو جايه هاده

- شبيه تسئليني شبيه اخ يازمُرد گلبي ناره ماتطفه منج

اجت تقربت يمي لزمتني دفعتها اشمئز من قربها وملمسها الي ..

- وخررري ايدج عنييي لا تلزميني

- شبيج ماما

- ماما ؟ ههههههههه بصراحه عاشت ايدج ضحكتيني غصب عني بس سؤال يعني انتِ هم تحسبين نفسج أم وحالج حال الأمهات

رجعت كعدت بمكانها وتحجي ..

- ابقى امجن سواء قبلتن اولا هذه الشي غصباً عليجن تتقبلنه لو لازم وجدان عرفت تلعبها صح وخلتجن تكرهني

- كاافييي اصحييي على نفسجج بطلي غيرتج منها بس تدرين شي نعتبرها هيه امنا لان سوت الشي الي انتِ امنا الحقيقية ماسويتي وخليها ابالج الام الي تربي وتتعب مو الي تخلف خلي هل الشي قاعدة

صرت احجي بانفعال طلعت كبت السنين الي بداخلي حطيت عيوني بعيونها ..

على الاقل هيه لليوم تحترم وتحب ابويه فضلت راحته من مصايبج على راحتها وسعادتها لليوم من نحتاج حضن الأم هيه الي تلمنه بحضنها وجدان الي كاعدة تحجين عنها بالسوء صارتلنا كلشي بالوكت الي لازم انتِ تسوين كل هذه بسسسس لاااا انتِ مشغولا بحقدج وسمج وغيرتج وعداواتج ..

عيوني صارت تحركني راسي شرايينه احسها بدت تريد تنفجر من الالم رجعت اكمل بكلامي بتعب ..

رفعت ردن القميص طلعت الاثار الي خلتهن بيه من سنين شوووفييي شووفيي بسببج استحي البس شي قصير يظهر هل القرف الي خليتي بيه رفعت شعري من ركبتي وأشرلهاا شووووفيييي هنااا شخليتييي بكل مره جنتي تحركيننن بيه شي
جنتيي تحركيننن روحيييي قبل جسسددييي

كعدت على ركبي منهاره فقدت السيطرة على نفسي صرت كُلي ارجف همست بغصه ..

-غياهب: كسرتيني وانه طفله وحركتي روحي وانه طفله بحياتي ماراح اكدر اسامج

مسحت وجهي بايديه الترجف عدلت شعري وكفت وانه اتصنع القوة والثبات درت بكل جسمي للباب شفت جدي وحبوبتي واكفين ساكتين شيحجون مثلاً طلعت وروحي محتركه وصلت لباب الصاله وصار بوجهي درغام ..

-درغام: ليش اجيتي هنا شتسوين غياهب

-غياهب: غضبي

عفته واكف وطلعت من البيت كله امشي بالشارع ضايعه شكد ما الانسان قوي يجي يوم وينهار وبهل الساعة حتى قوه ماتبقى عنده توقفت رجليه صار بأذني نفس الصوت اي هُوَ نفس الصوت بطفولتي جنت اسمعه من يگلي أولــريش ..

نفس النبره نفس نطق الأحرف صرت اتلفت بالشارع ماكو احد عقلي راح افقده شجاااييي يصير ياربي لزمت شعري بايديه صرت اعت بيه بكل قوتي وكفت سيارة كدامي جان درغام لزمني حاضني يمنع حركتي ..

-درغام: غياهب اهدي بعد اخوج

بقى لازمني بين مارخت حركتي لان انتهيت راح جاب بطل مي ورجعلي شربني وانه على سكوتي وهدوئي بس اكو شي خانكني نار بصدري كام يغسل بوجهي ويلوم بيه لان اجيت لبيت جدي ..

-درغام: غياهب

-غياهب: مابيه شي

- احنه شمتفقين شحاجين مو كايلين ماتجين هنا لان تسوء حالتج وتفقدين ليش تجيبين الاذيه لنفسج ياخويه

اتجاهلت كلامه ..

- شلون صارت حنين

اسمعه تحسر گال ..

- خابرني ابوي كال طلعوها من العمليات والحمدلله احسن حالتها

- اخذني الها

- صار

كومني راد يمشيني للسيارة رفضت صعدت وحدي والف تفكير براسي شنو هل الحياة شنو هل الاشياء زين هم اكو انسان حياته اصعب من حياتي هم اكو انسان اذيته أكبر من اذيتي ليش الدنيا كل يوم ضاربتني بشي أقوى من شي رجعت راسي على الجامه مغمضه عيوني ..

******
-حنين: فتحت عيوني اون من الم رجلي باوعت بالغرفه ماكو احد بس خالتي انتبهت عليه اجتني

-وجدان: الحمدلله على سلامتج خالاتي

- خاله وين غياهب

- هسه تجي حبيبتي انتِ شلون صرتي

- بُبكاء .. رجلي تأذيني

- هسه تجي الممرضه تنطيج مسكن

طلعت ما ادري وين يمكن تصيح للمرضه صار تفكيري ليش ماكو احد لا ابويه ولا اختي وحتى درغام ولا واحد بيهم نزلت دموعي اكثر ليش عايفيني وشصار خاف درغام صارله شي

انفتح الباب دخلت خالتي مالحكت اسئلها شي نطوني المسكن غفيت ما ادري شكد مر وكت كعدت رجلي زينه شفت غياهب كاعده بصفي تباوعلي بس وجها شاحب ومبينه تعبانه ..

-حنين: غياهب

حضنتني لصدرها وتبوس براسي ابتسمت ..

-غياهب: خفت عليج

- انه زينه لاتخافين بس وين جنتي من كعدت مالكيت احد بيكم

- صارت عندي شغله كملتها واجيتج

- وبابا

صارت تعدل بشعري بس ماتخلي عيونها بعيوني ..

- هسه يجي بابا جان كاعد هنا والله منتظرج بس هسه اجاه اتصال يكمله ويجيج

- متاكدة بس هيج

- اي والله شبيج

- اممم تدرين انه فدد فررحانه

- ههههه ليش عود

- لان سويت عمليه وراح تدللوني اوفف رحم الله والدي الي ضربني وحتى دوام ما اداوم

كفختني على راسي بخفه وهيه ضايجه ..

- انجبي انجبي لاتصيرين ما ادري شلونج گلوبنا رادت توكف من الخوف عليج

- حضرة الضابط وين صارله شي

- لا الحمدلله

- لعد وينه ماداري عني

- دلغام على كولتج

- اي

- يعرفج ام بطن راح يجيب اكل ويجي

- اويييي غياهب شكد احبه صديقي الصدوق هذه

- الله يثخن لبنكم داده

- احم تغارين منه اعترفيي اعترفيي

- دنجبي بلا

ضحكت بسكوت ادري بيها تغار بس ماتحجي لان تدري بعلاقتنا انه وياه شكد قويه طبعها هذه تغار على الاشياء الي تخصها بس مشكلتها ماتحجي انفتح الباب دخل درغام اتنفست براحه لان مابيه شي حط الاكل ودفع غياهب من مكانها وكعد هزت بايدها ماعاجبها وكعدت كبالنه ..

جرني بخفه من خشمي مبتسم ..

-درغام: شلونها چفوصي

-حنين: شعليك

- افا ليش حنيني

- اسئل نفسك حضرة الضابط

- اشتعل الضابط يروحلج فدوه الج ولعيونج

حجت غياهب وهيه كاعدة بمكانها ..

-غياهب: ترره انه هنا لا تروح على الترابي زايد اخي

رد عليها وهُوَ يغم بيها بايده ..

-درغام: شعليج ام السان المكصوص

-حنين: همستله .. من كبرت صارت تلفظ الاحرف صح

- ادري بس اريد اضوجها

- ضربته بخفه على ايده .. لاتضوج اختي لا اش .. صفنت على چفصتي عضيت شفتي وهُوَ قلص عيونه يباوعلي

- اشكيني مو

من كل عقلي هزيت براسي اضحك وغياهب تعضلي من وراه باصبعها لان چفصت

-درغام: هاي من تزوجين عود هم احجيها لزوجج

حجيت بحماسس ..

-حنين: اكله اشكك واشك ابوك بس يضوجني

شو ماحس غير هُوَ وغياهب غصو بالضحك يعني شبيهم انه شنو حجيت صحتت بيهم ... شكوو تضحكون شحجيتت

-غياهب: حنين انتِ بعدج تحت تأثير التخدير اسكتي والزمي السانج ماضلت چفصه ماچفصتيها

عاد صدك سكتت من شفتها تخزر بيه رادت توكلني ماخلاها درغام كعد يوكلني وكل شويه متناكرين دخل ابويه باسني براسي ..

-سلطان: الحمدلله على سلامتج بنيتي

-حنين: الله يسلمك حبيبي

صاح درغام وهُوَ يغني عود صار يلم بالأكل
ويلحن بهل الكلمة ..

-درغام: حبيبي وحبيبي ياحبيبي حبيبي وياحبيبي

ضربه ابويه على راسه يلا سكت بقوني بالمستشقى بين ماتاكدو ماعندي مشكله ورجلي سليمه وخرجوني بس ماخذوني لبيتنه خاله جوهره ماقبلت لان غياهب وابويه دوام ومايكدرون يبقوني وحدي

وصلنه للبيت مجهزيلي مكان بس ماقبلت انام بقيت كاعدة يمهم وصار الحديث عن الي صار ..

-سلطان: الكامرات مالاكطه اي شي شفتها بنفسي

-درغام: هاي مال طلقه تايها كلاوات عمي لان بنفسي شفت السيارة من شخطت من باب بيتنا بس مالحكت عليها

-جابر: تتوقع منو اله مصلحه يسوي هيج وليش حنين الي انصابت مو انتَ

-درغام: هذه الي مدوخني

ضلو يتناقشون وغياهب ساكته تباوعلهم بدون ماشاركت بشي لليل كلش راحت غياهب وابويه وطبعا الف وصيه يوصون عبالك مخليني عند غرب رجع درغام بعد ماطلع وياهم للباب اجت خاله جوهره كعدت يمنه ..

-جوهره: درغام شوف والعباس ابو فاضل انه هل السالفه مامرتاحتلها

-درغام: يجي وكتها ونعرف منو مايبقى شي مضموم

- ولك انتَ تريد تسودني

- ست الحبايب هو لو مستهدفني جان ضربني الي ماضرب هل الفاهيه

-حنين: هسسسه انتَ وامك تحجون شكوو تخليني بنص واحترم نفسك انه مو فاهيه

-درغام: ليش الفاهيه حلوه ترى

-حنين:لاتكووول الفاهيه

-جوهره: مو اكوملك هسه عوف الفرخه المزنجر

-درغام: اخبل ومحمد صح مزنجر والشمس حاركتني بس ابقى حلو

ضحكنه على سوالفه لان من يضل يحجي هيج يفطس الواحد ضحك غصباً عليه ردت انام رادت تساعدني خالتي ماقبل كالها روحي نامي انه اخذها راحت خاله وخالي اصلا من راحو اهلي راح نام ..

-درغام: يلا كومي

-حنين: وشلون اكوم غير انتَ تساعدني

- شو مابيه حيل كومي وحدج

- راح اصيح خاله عليك والله

- لا جذب اشاقه كلشي ولا امي لا عبالكم كبرت وماتصلخني بالنعال وتملص اذاناتي

- غير انتَ وكح

- نعال امي شكد عزيز

- هههههههههههه كلششش عزيز

كومني واحنه نضحك وكل شويه كايل نعال امي بعد روحي العزيز دخلني للغرفه الي محضرتها خاله الي تمددت غطاني وهم جر خشمي بايده ..

- اهوو بطل هل السالفه

- نامي يلا من تحتاجين شي دزيلي رساله او خابريني

هزيت براسي وطلع من التعب غفيت نمت مرت ايام على نفس الروتين واهلي كل يوم يمي وماكدرو يوصلون لأي شي يخص الحادث كعدت من النوم باوعت الساعة بعد وكت هف وين اروح لزمت جهازي دزيتله رساله كتبتله .. كاعد ؟

مارد بقيت كاعده بمكاني دقائق واندك الباب ..

- اتفضل

دخل واكيد بوجهه الابتسامه صح ملامحه حاده على كولت حبوبه تكول الجنوبي تعرفه من ملامحه بيها حده بس هُوَ بالاكثر يكون مبتسم ..

-درغام: شو كاعدة شعندج حصاد من الصبح

-حنين: كعدت من وكت لان البارحه نايمه من وكت

- وين تريدين افرفرج بشوارع باريس الصباحيه

- ديلا بغدادنا احلا من باريس وكل العالم

همس بكلام بس فهمته ..

- هم صح احب بغداد وفلان

- شنوو شكلت

- هيج هيج اكول يله خلي نطلع نفرفرج بشوارع باريس سنيوريتا

وكفت ساعدني وجايبيلي هاي العكازه امشي عليها طلعنه نمشي بالحديقه ارتاح بوجوده ماحس بتقييد وياه وهل الشي من طفولتي متعلمه عليه ..

- اممم دلغام

- عينه

- اذا تتزوج هم تبطل تحبني وتدللني وتتغير عليه

- يجوز اي

وكفت اباوعله لان جنت مفكره الاجابه مو هيج ..

- صدك تحجي

- اي چا وين اكو وحده ترضه رجلها يحجي ويا غيرها

- بس انتَ تعرفني قبلها

- ياهيه

- شبيككك مرتك

- هاا اي بعد هيه تصير الكل بالكل

- دمعت عيوني ومن كل عقلي كتله ... لاتتزوج

ضحك بصوت لزمني يمشي بيه وبعده يضحك نرفزني صحت بيه ..

- ليش تضحك شحجيت انه

- ما اتغير عليج للموت لاتصيرين طفله بكلشي تصدكين

رجعت وكفت اباوعله عيوني بعيونه رأساً دار وجهه ما ادري شيهمس بينه وبين نفسه رجعت احجي وياه

- كوول والله حباب

- هههههه والله

- ليش تضحك ليش

- اضحك بس لليشبهج

ابتسمت بارتياح وانه اكله ..

- مطور بالغزل

- اخ ربي امشي امشي راح انجلط من انطه لغياهب مانطاج شويه

مافهمت شيقصد رجعنه للبيت لان جوعانه كعدت يمه بالمطبخ وكف هُوَ يسوي الريوك لان خاله بعدها نايمه

-حنين: انه ماحب الچاي اريد عصير

-درغام: وبعد

- ووو سويلي بيض عيون

- ووووبعد

- لاتحطلي زيتون اسود احب الاخضر

وكف يباوعلي خازرني ضميت وجهي بين ايديه واباوعله من فتحات اصابيعي

- شبيك دلغام هسه غير اني مريضه

- شعلتي شيب الخلفني بس تتأمرين

- لعد منو يسويلي واني مريضه

- دحجي عدل ام حلك اليلزك

سكتت كاتمه ضحكتي وهُوَ وكف يسويلي عصير
وكل مايلتفت ويباوعلي يخزرني ..

******
-غرام: دخلت والخوف متملكني بداخلي اجيت ويا رجال ما اعرف شي عنه بس ماعندي غير حل دعيت ربي يطلع رجال يخاف ربه فزيت من افكاري على صوته ..

- اسمعج

دنكت راسي وكلي حسافه على كلشي بحياتي اذا احجي راح يصدكني اذا طلب اثبات لكلامي شنو اثباتي وانه ماعندي غير مصداقيتي بكلامي رجع حجه وهُوَ يسئلني ..

- صفنتي خالي

- ما اكدر احجيلك والله

- شنو تضحكين عليه انتِ

- وكفت وحجيت بتلعثم .. م ماكدر ماكدر راح اطلع من بيتك بس فدوه لا تسويلي شي

ضل ساكت وصافن بيه لثواني اخاف اباوعله ..

- ابقي هنا من تشوفين نفسج جاهزه تحجين اسمعج خالي لاتخافين من شي

- وانتَ

- شبيه انه

- وين تبقى

- الله أكبر هم بيتي وهم ما ابقى بيه شطلعت هاي تورطت ساعدتج ما ابقى ارتاحي راح تبقين وحدج بس ياويلج تلعبين بذيلج وياي اكصه الج

دار وجهه يمشي ذكرت مرته وينها صحت وراه ..

- وين ام الجهال لعد

رفع ايده على لحيته يمسح عليها ..

- ببيت اهلها .. حكه صدك نسيت اسئلج شنو اسمج

- ءء غــرام

- اها يلوك خالي يلوك انه رايح ومثل ماوصيتج على فكرة احب اعرفج على نفسي اسمي كُـميل

هزيت براسي ساكته طلع من الشقه واضح قفلها
من بره صرت افتر بالشقه بس مالمست شي منها مهما يكون هل الاشياء مو ملكي مو من حقي ومايصير هيج تعلمت من امي

اعترف خايفه وضايعه ماعرف شنو مصيري مستقبل مجهول دخلت للغرفه مبين بيها بس رجال كاعد لعد مو كال متزوج ماكو شي يوضح متزوج قفلت باب الغرفه عليه كعدت حاضنه نفسي ومرت اليله وانه غركانه بدموعي وافكاري

لثاني يوم كعدت على دكة الباب كمزت من مكاني همزين مدخله عبايتي وياي مانسيتها بالصاله من نزعتها لبستها وسترت نفسي فتحت الباب جان واكف يفر بمفاتيج ..

-كُميل: ها انجلينا شقررتي

بقيت اصفن شيحجي هذه وين ورطتي روحج ياغرام مبين واحد مايمشي عليه شي ولا ينضحك عليه كمزني بصوته ..

-كُميل: ماتحجيننن لسانج انوكل خالي

- شتريد

- سويلي اكل جوعان

سكتت انه اعرف بس شغلات الخفيفة لان جنت قبل ادرس ومرات ادخل ويا أمي للمطبخ اغسل المواعين بلعت ريك والله هذه مبين مخبل ..

-غرام: ما اعرف

- شكد جذابه وحك الزهره تعرفين بس كولي ما اريد اسوي راح اسوي انه بس ماتاكلين بس الي

- اصلا مو جوعانه انه

دخل للمطبخ وصار المراكع على فلس والطبطبه هذه ريوك هيج لو يطبخ مال وليمه شيسوي يمكن يحرك البيت بقيت كاعدة بمكاني ساكته وساعه يغني ساعه يلطم احلف عليه مو صاحي طلع من المطبخ بايده صينيه كعد كبالي يباوعلي بنص عين ..

شتميت ريحة الاكل وبطني كامت توجعني بس
انه كتله موجوعانه عود خلي يفيدني الكبرياء ..

-كُميل: تاكلين

-غرام: لا

- جنت اشاقيج من كتلج ما تاكلين

- ماريد بالعافيه

- بكيفج هُوَ هذه الي يسوي زين ضلي

صار ياكل ويحجي وياي ..

- ما الله هداج تحجيلي

صار لازم احچيله واتمنى يصدكني لان الواضح ماراح يعوفني اله يعرف علتي واول وتالي راح انجبر احجي يمكن يكدر يساعدني ..

- راح احجيلك

جان مدنك راسه ياكل ويجاوبني ..

- اسمعج خالي

صرت افرك ايديه بتوتر مشاعر التوتر والخوف اتملكني استجمعت قوتي كلها ..

- ءء انه

- لا تحجيلي كلمه كلمه اتدابل من هل السالفه احجي براحتج ولا تتقيدين او تخافين

هزيت براسي ونزلت دموعي حجيت
من بين دموعي ..

- انه مغتصبه

راد يحط الاكل بحلكه مجرد سمعني حجيت هيج رجعه للصحن الي كدامه عاكد حاجبه تركزت نضراته بيه وهُوَ على وجهه علامات الاستغراب

- مغتصبه ؟ ...

للحكايا بقايا ...»

شنو توقعاتكم للبارت القادم

جميلاتي من تكملون قرائة البارت لاتنسون متابعة حسابي الانستا 🌼

Instagram: hawraalsaidi