فوط +كومنتار
بارت طويل ... ونحبكم تقراو للخر كملو للاسئلة اللي طرحتهم وجاوبو عليهم فضلا وليس امرا والكرونيك مستمرة ميش رايحة نحبسها مبقاش وتخلااص
لميس بصدمة : ميش بهاذ السرعة
بقات تخزر في الطوموببيل اللي مقابلتها بصدمة مالحقتش 10 دقايق ملي هربت حاولت تشوف شكون داخلها ماقدرتش كان الزجاج فيمي واصلا هاذي متحتاجش تفكير اكييد هو بقات تخزر في الطومبيل والدموع في عينيها مالقات وش تدير شغلت الطومبيل ورجعت للخلف بسرعة حبست على طومبيل وراها بقات تشوف بعدم تصديق مكانش مفر اليوم ميش راح يغفرلها لغلطتها وتخلصها غالية دورت الطومبيل للجيهة اليمنى عارضتها طومبيل اخرى راحت للجيهة اليسرى كيفكيف بقات محاصرة بين ربع جوايه بقات تستنى في مصيرها خرجت من الطومبيل وهي تخزر في الجوايه في ربعة بعدم تصديق سمعت باب طومبيل كي تحل غمضت عينيها بقوة مستعدة لعقابها علابالها اليوم ميش رايح يفوتهالها حست بجهامة واقفة مقابلتها استغربت من سكوتو حلت عينيها بالشوي وبعدها كلها بصدددمة ميش مأمنة بعدها ضحكت بسخرية
لميس بسخرية : هههه متفاجئتش من الحركة تاعك هاذي
طلع حاجبو فيه وشد يديه ورا ظهرو يخزرلها بشماتة
سامر : ما فدتيني في حتى حاجة وينو الملف الاسود !؟
لميس : قتلك من قبل والله ماتديه
سامر : هاذ المرة راجلك اللي يدافع عليك مكاانش نتي اللي هربتي من حاميك وحصنك بإرادتك
لميس : حاجة متخصكش ديجا منيش فارغة شغل لالعابك السامطة هاذي
جات رايحة شدها من ذراعها بقوة
سامر : نتي الللي بديتي اللعب معايا وخدعتيني واللعب معايا مايكونش بلا دفع لازم تدفعي ثمن تحايلك عليا
تأففت وجبدت يدها منو بقوة ودارت للمرة الثانية حبست على صوت تعرفو مليح
ميرا : وين بيها ختي العزيزة ... اليوم نحطو النقاط ع الحروف قتلك ماتطيريش للسما بزااف بيسك يتقصو جنيحاتك
شافت فيهم لميس بشماتة ميش مأمنة اللي هاذي عايلتها الحقانية
شدتها من شعرها بقوة ولميس تدز فيها تحاول تتحرر من قبضتها
ميرا : نهار اللول قتلك ادم ليا بصح نتي غلضتي راسك وتزوجتي بيه اليوم راح تدفعي ثمن غلططتك غالي بزززااااف
لميس : بعدي يديك الموسخة عليا ... وادم خليتولك ليك والدليل هاني هربت روحي راني خليتولك طول وعرض روحي جربي اديه يلا قدرتي عليه
عطاتها ميرا كف قاوي دار وجهها للجيهة لخرى تجرحت شفتها شدت لميس خدها بألم دارت ليها عينيها رصاص انقضت عليها كي الاسد على فريستو شدتها من شعرها بقوووة تجبد فيها مسحت بيها الارض وعطاتها كف احر من اللي عطاتولها لصقت فيها كي القملة ماطلقتها وميرا تعيط وتبكي
لميس : كلللبة نتي ماحبيتيش تحشمي على اصلك ياوحد الساقطة تجي واحدة ماتسواش كيما نتي تمد يدها عليا ياك .... ارواحي لهنا اليوم نحيلك دين باباك الحلوف ونخرج مكبوتات سنين اللي كنت شاداها عليك ياوحد #$##
ضربتها بعنف خرجت فيها غشها باباها يجبد فيها ماقدرلهاش كانت لاصقة فيها لصقة عمية ... ماحست بروحها كان وهي طايرة في السما على قبضة قوية شدتها من خصرها وهي مزالها تفرفط
لميس : اطططلقني االطلققني عليها ياوحددد الكلبة الرخييسسة ليوم نربييييك نتي تضربيني نتيييي..... تمدي يدك اامدودة عليا ياوحد الموسخة !!؟؟!
بقات تفرفط وتدز في روحها وميرا ناضت تبكي وتعدل في روحها مابقى فيها والو لا وجه يصلح لا شعر .. لا والو .... وجها مخبش ومجروح من كل بلاصة .. و شعرها طالع في السما ومقططع ..... يديها عليهم اثار العض ماخلات فيها واالو ..... ولميس مزالها تغلي في بلاصتها فاقت على القبضة كي تشدت عليها وقرب همس في وذنها
ايفان : هدي روحك فراشتي الزرقا
الزوج كلمات هاذو كانو كفيلين باش يسكتوها كأنو سطل ما بارد تكب عليها خارت قواها في ذيك الدقيقة شافت في يديه اللي محوطين كرشها طاحو دموعها بصمت ورا بعضاهم كي لمحت السيكاتخيس في يدو اليمنى تأكدت من شكوكها .... دزاتو بكل قوتها وبعدت عليه شافت فيه بصددمة اما هو كان واقف بكل شموخ متوالها يخزر فيها ببرود بعدت عليه ترجف بعد الشي اللي سمعاتو ميش قادرة حتى تشوف في وجهو بقات تخزر في الارض واادموع عالقين بين شفارتيها
لميس بغصة : وش تحوسو عندي ؟!
سامر : الملف الاسود
ميرا : ادم
ايفان : نتي
بقات تخزرلهم بالدور من واحد لواحد لهاذ الدرجة مكانش الانسانية !؟! .... كانت في موقف لا يحسد عليه ... مالقات وش تدير كانت محاصرة بيناتهم علابالها ماهمش ناويين على خير .....
(اتخليوها 4 طوموبيلات )
بلعت ريقها بخوف ورجعت خطوات للخلف وهي تشوف فيهم شدها باباها بقوة وحط بابي مشوار على نيفها وزيرها باش ماتتحركش وهي تفرفط بين يديه غالقة نيفها ميش حابة تستنشق خبشاتو من يدو واالو
زيرت على مفتاح الطومبيل اللي كان في يدها اليسرى رشقاتو بكل قوتها في يدو وبعدها في كتفو خلاتو يتوجعو في بلاصتو بعدت عليه وهي تنهج جات راح تجري تهرب شدتها ميرا رجعتها من شعرها بقوة عطاتها بكف قااااوي تمايلت رايحة تطيح شدت كرشها بقوة بيد تمنع صغيرها من طيحة خايبة
طاحت في الارض واليد لوخرا سبقت بيها في الارض عيطت بقوة شي من وجع يدها اللي تملصت وشي من وجع الطيحة ... هزت راسها على الرجلين اللي وقفو مقابلينها هزت راسها بصدمممة
•••••••••••••••••••••
شافت في الطالون اللي كان في وجهها هزت راسها حلت عينيها بصدددمة كانت واقفة متوالها بجمود بكامل صحتها وقفت بصعوبة مقابلتها وهي تخزرلها ميش مصدقة الشي اللي تشوف فيه حطت يدها على فمها ميش مأمنة
لميس بصدمة : م...م...مايا !!؟!!
ضحكت وسط دموعها ميش مصددقة بقات تضحك ودموعها يطيحو مدت يدها ترمات في حضنها عنقتها بقووووة وهي تبكي بلا حبسة عكسها هي اللي مابدلتهاش العناق ..... هي واقفة متوالها بعد ماكانت طريحة الفراش بعدت عليها وهي ساعة تضحك وساعة تبكي شافت في هندامها بإستغراب كانت متغيرة بزاف شعرها مصبوغ وقصير لكتافها بعد ماكان يوصل لخصرها مدايرة فوقهم لينات لابسة كوستيم كلاسيك شيييك ع الاخر كانت تبان سيدة اعمال برجوازية تخزرلها ببرود تام
لميس : يااااا ماياااااا منيش مأمنة علابالك رجعععتي تمششششششي الحممممد لله ياااربي
شافت حولها بغير تصديق كانت ميرا مربعة يديها وتخزرلها بشماتة وباباها يخزرلها بحدة وحقد كبير وايفان كان متكي على كابو الطومبيل يخزرلها ببرود تام
لميس باستغراب : مايا وشبيك !!!؟
هزت مايا حاجبها فيها بطريقة معرفتش لميس تفسرها ولا تحللها
لميس : كيفاش جيتي لهنا !!؟؟
ضحكت مايا شطر ضحكة وهي ضامة يديها لصدرها وتدور عليها
مايا : وشبيا !!؟ كيفاش جيت لهنا ؟؟! كيفاش وليت نمشي ؟!! ..... علابالك لميس نتي طوول عمررك غبيية اللي يجي يستغباك ويلعبهالك
بقات لميس تخزرلها باستغراااب كبييير مافهمتش علاش راهي تهدر هاذي الهدرة نظرة صحبتها كانت متغيرة بزاااااف كأنو هاذي انسان اوخر ماشي مايا صحبتها
لميس : نتي ماكيش مايا .... لالا
حبست متوالها مايا وشدتها من ذقنها طلعتلها راسها ليها
مايا : هههه وي عندك الحق انا مانيش مايا انا لورا سالفادور
لزت على فكها بقوة غارسة ظفارها في خدها مخلفة جراح على وجهها وهي تزير على كل كلمة تخرج من فمها تهمس في وذنها
مايا : يا لميس الصغرونة .... انا مانيش مايا اللي كنتي تعرفيها ذيك الجايحة البهلولة ... انا بكل بساطة تحايلت عليك ونتي لطيبتك الزايدة أمنتي كان كلشي خطة باش نستدرجوك ونتخلصو من ادم لوينو عن طريقك نتي .... انا يا ملكة ادم ماكنتش مشلولة برك كنت نمثل عليك نتي كنتي فريسة سهلة المنال وتأمني كلشي ينقالك ... مثلا امنتي بلي ادم هو اللي كان سبب شللي .. بصح ياحبيبتي لا مافيا راجلك صابتني .. ولا بالاصل تشليت .. خروجك من دار باباك كان مخطط ليه ... اغتصابك كان مخطط ليه ... الحادثة تاعي مخطط ليها ... زواجك مخطط ليه ... وجودك في مكان الحادثة مدبر ليه.... سبقك الصحافي تاع المافيا في لوس انجلوس تحت تخطيطنا كلللشي مايجيش في بالك مخطط ليه .... وبفضلك نتي ضك نوصلو لمرادنا ونحققو انتقامنا من راجلك ... وعن طريق من ... طبعاا عن طريقك نتي شوفي بعينك عايلتك مارحمتكش ... بصح حتى هوما اغبياااء حطو يدهم في يد عدوك وساهمو فيه قتلك بصح نساو حاجة " عدو عدوك هو صديقك " بصح نساو انو "صديق اليوم هو عدو الغد " مجرد ما نخلصو مهمتنا نتخلصو منهم كي الحشرة ... شدينا كل واحد من هدفو واللي مستحيل يتحقق
طلقت يدها اللي كانت راصة على خدها مخلية لاتراس تاعهم في وجهها وهي تخزرلها بشر في حياتها لاحظتو لميس فيها انا لميس بقات غار تخزر فيها
مايا : تؤتؤتؤ وش تغييضي !!؟؟ مالغري مادرتي والو وماضريتي حتى انسان وكنتي حنينة الطيبة تاعك ماشفتها في حتى واحد بصح العالم سيئ يا سينيورة لميس العالم هاذا ما يستمرش بالخير ....بصح مع الاسف كنتي نتي الطعم اللي نستعملوه باش نصيدو القرش تاعنا .... كنا علابالنا بلي نتي الوحيدة اللي تدخلي لقلب ادم بيسك كان يحبك من طفولتك ...
شافت ملامح لميس المصدومة والمستغربة تبسمت بشر
مايا : اااااا علاه راكي متفاجأة علاه ماتشفايش على روحك كي كان يضربك امير وهو يضربو ... كنتي تتخباي وراه وتتحماي بيه .. وتلعبي بين يديه .... من بكري كان يدافع عليك ونتي قد الشبر ... سقسي باباك المصون علاه معلابالكش !؟
شافت في كرشها البارزة وتبسمت شطر تبسيمة مدت يدها تمس كرشها
مايا : هيهيههيهيهي شوف شوف ا ايفان .. خخههه رايح يجي وريث امبراطورية لوينو
نترت لميس يدها من على كرشها وبعدت خطوات للخلف تخزرلها بصدددددمة كبيييرة وهي غا تبكي بصمت ميش مأمنة عقلها ميش قادر يستوعب انو هاذي صحبتها
كانت لميس غار تبكي وخلاص ميش مصدقة الشي اللي يصرا ماتصدمتش كي جاتها من ختها وباباها كثر من ماتصدمت من صحبتها اللي حطت فيها كامل ثقتها وضحات بحياتها مع زعيم مافيا علاجالها هي ... ف ... في الللخر .....
بقات تخزر في الارض بشرود تفكرت كلام ادم
"نتي ضك ماكيش وحححدك ... نتي ضك مرا متزوجة هازة في رحمك حياة اخرى ... حاملة ابني اللي مالازم تقيسو حتى ذرة سوء حتى لو كانت رايحة تموت صحبتك .... وزيد شنهي تخاطري بحياتك وحياة صغيرك على جال صديقة ماتعرفيش حتى نواياها. !!!!!! "
لميس : اك سامع وش راك تقول ؟ مااايا صحبتي وقفت معايا في الوقت اللي مكانتش عايلتي تخلات عليا ، متديرش حاجة تأذيني صداقتنا قوووية متهدرش عليها بهاذ الطريقة سمععت
لميس : علاه !!؟
مايا ببرود : كيفاه علاه يخي قتلك
شدتها لميس من كول لافاست تاعها وهي تبكي بقوووة وتعييط وتخض فيها
لميس : لااااااااه ..... لاه درتي هاذ الشي !؟ فاش ڨستك انا !!؟. قووليلي وش درت باش نتعرض لخيانة ساااامة كيما هاذي !؟! انا انا .... انا .... رميت روحي في جحيم الزواج غار علاااجااك !! قتلت روووحي علاجال باش نأمنلك تكاليف علاجك ... كنت واقفة معاك في كل خطوة نحيها من لحمي ونعطيهالك كنت مدايراتك كيما اختتتتتي وكثر .... تزووجت بزعيييم مافيا علاجااالك ... وقفت في وجه راجلي علاجاللك ... عرضت زواجي للخطر على جااالك .... فرررطت في روح صغيييري اللي مزال مجاش للدنيا على جالك نتي ..... كنت حاطاتك نص روحي ... علاه طعنتيني هاذ الطعنة القاسية يا مايا علاااااااه .... علاه استغليييتيني وخدعتيني هكااا يا مايا علاه ... كنت معاك حنينة وطيبة وعاقلة طحت معاك بالنية والقلب الصافي ونتي ... نتي وش درتي .!!؟؟؟!
مسحت دموعها وبعدت عليها تنهدت بقوة وهي تصفقلها
لميس : صحييييتي ياالالة معللليش نستعرف بيك عطييتني كككككف قاوي صح .... قابلتي الوفاء بالخيانة ... الصدق بالكذب .... الحب بالحقد .... بصح برهنتيلي بلي مكانش كلللبة رخيييسة ماتسواش شكارة زباااالة قدك يا وحد الخاااينة الغدارة المنافقة ال$$$$## تفووو عليك ياوحد الرخيسة
حكات كلامها بحققققد كبيييييير تلقات اقكبر ضربة من اقرب الناس ليها
شافت فيها مايا بحقد كبييير ومسحت من على وجهها وهي تتبسم ابتسامة مختلة .... مدت يدها ورا ظهرها جبدت سلاحها ركحتو صايي ذرة الصبر اللي كانت عندها محاتها لميس .... شافت فيها لمييس وهي تبكي بصمت شدت على كرشها بقووو فات عليها شريط حياتها .... الحلم كان رؤية حقيقية تنفذ بحذااافيرو ميرا طعنتها مي وجعتهاش من ختها بيسك ميش حاجة غريبة بصح مايا اللي عنقتها بعدها دفعتها من الدروج .... تبسمت بمرارة كي تفكراتو اددم مكااانش ... ادم ميش راح يحميها هاذ المرة كيما كل مرة ... هاذ المرة اذا عيطت ميش راح يسمعها ... الحلم يتحقق ضك بالدقسقة والثانية حتى انو الحقيقة كانت مؤلمة اكثر من الخيال
طاحت دمعة اخيرة سخونة تبسمت كي تفكراتو جات تصويرتها بين عينيه ضمت كرشها بقوووة زيرت على عينيها بقوة كي سمعت صوت الطلقة حلت عينيها اخزر لجسمها مزالو قطعة وحدة وابنها مزالو داخل كرشها شافت ناحية مايا اللي شدها ايفان اخر دقيقة طلعلها يدها للسما
ايفان : $#$##$ وش رااااكي تديري ماشي مدايرين اتفاااااق ... يكفي اللي مقبيل ونتي تضربي فيها
مايا : بعععععد بععععد نتا عليا مكان مدخلك اليوم نقتلها الرخيييسة هاذي تبزززق عليا اناااااااااا
ايفان : اذا قاستها رصاصة ميش راح نفوتهالك وننسى انك اختي
مايا : تسما علاجال وحدة ماتسواااش تخسرها مع اختك اللي من لحممك و دمك؟؟!! وخوك الللي مااات نسييييتو
ايفان بهمس : $#$$ بللللعي رايحة تفضحي كلش وديجا هيا نروحو قريب يطب علينا ادم وتشوفي ساعتها لنجوم في عز اللليل
كانت لميس تتعرض من صدمة لاختها .... يعني هاذا خوووها .... هاذا اللي حاول يغتصبها .... هاذا اللي كانت تحكيلها عليه وهي تضرب في سمها وتصبر فيها زعمماااا ... كيفاه يكون الانسان بكل هاذ الشر
حولت نظرها لباباها اللي كان شاد كتفو اللي ينزف وهو قريب يقتلها بذيك النظرة بعدها ميرا اللي كانت واقفة تتفرج ببرود مدارت حتى ردة فعل
شافت فيها مايا بنظرة ترعب بعدت ايفان عليها وراحت ديراكت خبطتها بعنننف ورا رقبتها جات طايحة كي الجثة مسكينة
......يتبع 💜💜💜
وش تتوقعو يصرا ؟؟!
الجماعة اللي كانو يقولولي رتحي مايا وين راكم !!؟
شكون كان شاك في مايا من قبل !؟
شكون تصدم كيما لميس في مايا !؟؟
وش رايكم في البارت .... هاذ البارت جاني ثقيل بزاف كتبتو مرتين وفاصيتو مقدرتش نوصل نصور الافكار اللي راهم في راسي ... في راسي راسمتهن بطريقة الهامية كي كتبتهم كانو ميش محمسين
وماتتحيروش الكرونيك نكملهااااااا ماتبقاوش تفتيو من عندكم بلي حبستها برك خلاصتلي الكونيكسيون هاذا مكان 😍😍