بين ًسًـــلاسل العادات

آلَبًآرتٌ 6

بًسِمً آلَلَهّ آلَرحًمًنِ آلَرحًيَمً

#بين سلاسل العادات_ وحكم القدر

بقلمي: kefayah

كرزاتي لتنسون المتابعة للحساب💔 +التصويت والتعليق بين الفقرات +قراءة ممتعة 🌼

‏وين انروح
ياروحي وبدينة انشيل ضبة اجروح

عريان السيد خلف♡

♕________________________♕

-وين تريد توصل

-للكاتبة الله

-حمزززة كافي سويتها بدون ملح عدك مرة روح عيش حياتك وابتعد عن سلمى لاتليصها علينه

-احبنها والله احبنها محد يفتهمني

-شتحب حمزة لاتسودني زلمة متزوج ومرتك حبلة بعد شتريد راجع على بت صغيرة يمك حذاك

-اريدها.. اريد اتزوجها راح اموات لا ليلي ليل ولا نهاري نهار

-لا اله الا الله رجال متززززوج البت بعدها صغيررة من سابع المستحيلات اهلها ينطوها الك خوية حمزة لاتخربني وي عيالي انداراك سبع فدوات عوفنا بحالنة

-اخ خوية اخ كلها ضدك يحمزة أشفت من دنياي محاربيني وين اروح بس كلولي طلعت روحي من الدنيا واهلها من يوم التزوجت اندفنت دفننن..

طخموني (غشوني) وي هاي الماتتسمة ازوج بت عمك ازوج بت عمك يابة مااريدها انگلبت الدنيا على راسي بت العم لابن عمها هاي تقاليدنا طز بيهم ارتاحو هسة ..

هند اهلج غصبوني.. المرة والزلمة ثنينهم مغصوبين ماالهم حگ يقررون ويامن يعيشون ترى اني ماطايق روحي من ورة هاي العيشة بس هسة غير جنت ميت ومن شفت سلمى رجعت عشت زوجيها الي اغديلج فدوة..

-اخ منك حمزة البت مو بحلك بغدادية هاي ماجايسها تعب ليش تريد تمرمرها وياك عوفها

-ماعونفها واخذها لو بيني وبين الموت شعره

حجيت ردت نصحت كلشي مافاد سوة البراسة حمزة وحام على بت العالم خلاها تهذي بية هذيان مراهقة وشافتة حسن الطول وسنونة تضحك..

فتح السالفة وي اهلي ومثل ماتوقعت محد بيهم ايدة ولا وكفو وياة ومنا جماعتنا ازيد من اهلي رفضو رفض قطعي بس للقدر والاصرار كلمة..

حاولت سلمى تنتحر واهلها تخبلو ومنها وزوجوها غصب عنهم حتى لاتجيبلهم العار بس خيروها اذا تزوجتي حمزة مانعرفج ولاتعرفينه وهي ماكالت باطل رضت اي ترضة عبالها راح تعيش بعالم وردي بس للاسف ماصار هيج..

اهتزت علاقتي وي عيالي بسبب اخوي وعملتة لان جان يتردد الي ويلگاها عدي وحسبوني الي ايد بالسالفة واني الكم الله ياغافلين ماجنت محسبة هيج حساب عبالي اخوي ميت علي..

گطعت علاقتي باخوي وحتى اهلي مايخليني رجلي اروحلهم حقه لان خسر اختة الصغيره..مشة الوكت بسرعة حبلت وجبت سجاد وبنفس اليوم جابت سلمى حياوي انكسر خاطرها من محد من اهلها وصلها ولا شاف ابنها مرت الايام والسنين واحنا واحد مايعرف الثاني..

صار عدي مهند وسجاد وعبدالله عمرة اشهر وبيوم اجاني مهند يركض ويأشر على الباب ابتسمت بوجهة اشجعة يحجي..

-ها يمة كول

-اباب اباب

عفت البيدي ورحت اشوف منو الجاينة بهتت ملامحي وانصدمت من شفت اخوي حمزة واگف بالباب تسالمنة سلام حار من بعد سنوات فرحت بكل حواسي بس مادامت الفرحة بعد الكلام السمعتة..

-سلمى بيها سرطان وهسة هي بين الحياة والموت تريد تشوف اخوتها..

جان هذا الخبر مرعب وفاجع مايدخل بالعقل ماهي الا ساعات وشفنة الصاقعة سلمى ذيج البنية صاحبة البشرة ناصعة البياض والشعر الطويل والرموش الثخان ماباقي لسلمى القديمة اثر عبارة عن هيكل عضمي باقية..

نزلن دموعها من شافتني بلحضتها انجنيت عقلي فصل لا اليخلوني اتقربلها ولا الزمها مسحت دموعي وبقيت منصية راسي اسمعلها من حجت ..

-هند اطلب منج طلب وهذا الاخير اتمنى تنفذينة ماعندي احد غيرج بهلدنيا اخواتي كل وحدة ملتهية بروحها ضليتي بس انتي..

ماگدرت انطق حرف جمدت بمجاني بس عيوني تصب دم مو دمع اصعب موقف مر علية بحياتي كلها.

-بنيتي هند نوڤ صيريلها ام لاتخلينها تنحرم من حنية الام لاتعوفين جهالي هند محد يرحم اريد اروح واني مطمئنة من صوبهم داريها ادري بيج حنينة جهالي بامانتج داريهم مثل جهالج.. امانة بركبتج لاتخلينهم يم مرت ابوهم ويصير بيهم اسوء مني

-الله كريم خية ان شاءلله تكومين وتربينهم وتحصدين خيرهم

-هه شي مستحيل يتحقق صيحي حمزة احاچية

طلعت اذرف بدموعي وردة وذبلت اباوع لحمويني حالهم يبچي العدو يباوعون لاخوي بحقد يريدون ياكلونة باسنونهم حقهم يعتبرونة السبب بحالتها ماطولت ساعات وانطونا خبر هد حيلنة هد..

راحت سلمى وعافت وراها فراشتين بيدمن عافتهم ومنو الهم من بعدها اناضر لطفلها بعمر الخمس سنوات يبچي مثل طير المذبوح تگطع گلبي على منظرة حاير باختة الرضيعة مايرضة واحد يتقرب عليها يحس الناس ذئاب مفترسة...

حرت شلون اتعامل وياة جان ذكي هادء، واعي، حذر
كلشش رمقني بنضرات شك وكال..

-انتي شتصيرين منا

-اني عمتكم هند

هز براسة كانة يعرفني ومن لحضتها مال الي اهتميت بيهم طيلة ايام الفاتحة مشت الايام والجهال بقو عد ابوهم بس گلبي ماينطيني امنهم عد مرتة الخبيثة خاف تسويلهم شي..

صرت اروح لبيتهم يومية وگلبي ينمرد على حال الجهال محد بحالهم ولا جنهم موجودين جنت محسبة هذا الحساب احمد حاير بأختة الرضيعة هو يرادلة واحد يحير بية.. وبيوم لكيتها تفرفح من البجي واخوها يرضع بيها مي نزلت دموعي وشبت النار بية طگت روحي من الوضع وتعاركت وي اخوي..

-الله اكبررر عليكم هاي الامانة ولكم حراااام طفلة تبجي النهار كله ماتشتريلها حليببب

-شسوي كليلي فلوس ماعندي منين اجيب الشركة وطردوني منه يادوب اجيب مسواك للبيت تريديني اخلصها حليب وحفاضات

-وشنو رايك تريدها تموت من الجوع

-شسويلها اخذيها الج وربيها وانتم عدكم خير من الله

-اخذها يوم يومين؟

-چا شني

-انطينياها اسجلها باسمي واحطها بعيوني والله

-هه انتي صاحية شلج بيها هاي ربيها وكبريها اي بس ما اسجلها باسمج

-اكبرها واسويها مرة وتجي تاخذها مني وتتيتم مرتين وترجع للضيم

-لاتسولفيها هاي حتى لو اني ارضة اهلي مايرضون وانتي تعرفينهم زين ماصايرة عدهم بتهم تعيش وي الغرب

-اني عمتها ياغرب ورجلي خالها

-اي بس ولدج محرمين عليها

-راح يعتبرونها اختهم لاتخاف

-شوفي هند هي احسن تاخذينها لن هنا محد بحالها وهي صغيره بس اكلج من هسة البت ترجع النه اول وتالي بس تكبر ترجع الناس شدكول عليها جانت وي ولد عمتها بيت واحد عايشة تعرفين الناس كلشي تحجي بعد ياهو اليتزوجها حتى ولدج مايرضون بيها

من تكبر ترجع النة ""

رضيت بهذا الشرط العيشني بقلق مستمر طول عمري بقى كسرة ضهري اخوها طلبت منه اخذة وي اختة..

- حياوي مانطية جبير ويعتمد على روحها لاتسولفين سالفتة هذا عوفية هسة الناس شدكول ذاب جهالها عد العالم

سكتت محتارة شلون اخذ اختة منه بس جنت مضطرة اخذها واعوفه.. حاجيت زلمتي وگتلة على وصية اختة بس جنة مامقتنع..

-اختكم ماتت بحسرتكم عاد نفذو وصيتها حتى بگبرها تتعذب على جهالها خليها ترتاح بگبرها

-هند اني مامعارض اربي بت اختي بس اني اخاف من اهلج ياخذونها لو ابوها

-لاتخاف اهلي زعلانين منه وهو لو بية خير ماعافوة بغداد كل هاي السنين اخوي مامرغوب بية من ورة سوالفة وزوجوة غصب حتى يعقل اوووف بس ماكو فايدة

-سوي اليريحج وجيبي بت اختي احسن ماتموت من ورة مرتة الس*

جبت نوڤ يمي وضل حياوي شاغل تفكيري احس بتأنيب الضمير علية بس مابيدي شي على الاقل انقذ واحد منهم واعيشة بخير... صار عمر نوڤ سنة صارت روحي من الدنيا وكل فترة اخذها لاخوها يلعب عليها وذاك اليوم كاعدين وتكسر الباب من الدگ..

-ياستااار جاية جاية

فتحت الباب وجمدت بمكاني ويبس الدم بعروگي من المنظر الكدامي حمزة لازم حياوي من ايدة مثل الطير المذبوح وجهها مزورگ ومشخط حجيت بفرزع وخوف..

-خوية شبية حيااااوي منو المسووي بية هيج

-اخذية وخلصيببينة منة ومن مشاكلة مااايگعد راااحة

-شكو ليش هيج حالة ابنك ااااحجي

-تعارك وي جهال المنطقة وكتلوة

ذبة يمي وراح ولا مهتم اخذت حياوي غسلتله وعقمت جروحة ولبستة من ملابس سجاد..

-يمة منو الضربك

سكت ماحجة وبقة يلعب وي اختة الجنها طير الذهب بجيت واني اشوف حنيتة عليها شضاملكم الزمن يايمة من بدايتكم ضيم وطلايب شلون نهايتكم .

-جوعان

هز راسة مدنگ جان عكس جهالي خجول وهادء ابد مايحجي تگول اخرس بس حقة شاف امة تنهار گدام عينة وهو طفل واختة ابتعدت عنة لو معاملة مرت ابوة وياة وتفرقتها اله الجنت اشوفها بعيوني..

صبيتلة اكل ميت جوع بالاسبوع ماماكل ضل حياوي يمي ابوه ماسال علية لا بالشهر ولا بالشهرين تأقلم وي الوضع بس جان يفز باليل" ويصيح لاتكتلوني "هنا تاكدت جان يتعنف ..

مرت الايام والسنين حياوي ونوڤ صارو قطعة من روحي حالهم حال جهالي سجلت حياوي مدرسة ونوڤ صرت احرص عليها من كلشي حتى من ولدي المعتبرينها اختهم.. ماكلت لنوڤ بالصار بسبب حياوي الجان يخبص الدنيا لو فتحت الموضوع جان حاقد على ابوة ومايرضة اجيب سيرتة ...

عشنا باقي ايامنا مرتاحين ووليداتي سدو مجان ابوهم بس الزمن اخ يالزمن خايفة من المصايب الضامها الي جنت ادري كلش زين مو هاي النهاية
وفعلا جانت هاي البداية بس...

**

-مو باجر السبعة شعدهم اليوم متحزمين حزام

شروق:-ما ادري بس راح يبحوشون

سجى:-ساعة السودة راح تصير بالنعل بس كون يعوفون انمار بحاله

رغد:: مااعتقد يحجون بانمار السالفه اكبر

كلها مجتمعة بالصالة كل ثنين من البنات يتنبأن بموضوع وشراح يصير گاعدة على اعصابي وياهن عفتهن وطلعت اريد اسمع كلامهم ردت اعبر من باب المطبخ وصارن التفات واسراء كدامي منعني من الطلعة..

-شبيجن وخرن اارريد ااافوت

التفات:-ارجعي انهبدي بغرفتج لاتتزوملين يلا

-شني اتزومل شبيج انتي وخري اريد اطلع اختنگت

دفعت التفات وردت اطلع جرتني اسراء ولوت ايدي فتحت عيوني على وسعهن خفت لا تدخل وحدة من البنات واتفشل اخواتي يعاملني معاملة استحي احجي عنها بس گدام الناس شوية يغيرنن تعاملهن وياي حجت بهمس مقربة فمها من اذني..

اسراء:-حضج اطيحة اذا ضليتي هنا واتهمج بشرفج اذا فكرتي تراوين شكلج القذر لخطيبي لرحمان

-هههههه مو جان حبيبي

ياريتني ماگلت هالكلمة ولاحاولت استفزها هجمن علية ثنينهن ملخني تملخ كل هذا بالسكتة حسيت گلبي وگف بسبب الخفقان المزمن عندي وگعت بالگاع گلبي راح يوگف صرت اجر النفس جر ابتعدن عني يلهثن يگول جانن بمعركة، حلگي يبس اريد ماي يرويني ماكو بهاي الخبطة دخل فراس (ابن عمي) فتح عيونة بصدمة من شافني..

-هاي شكو شبيج شريقة

اخذ ماي من السنك وغسل وجهي همست بصعوبة مدنگة راسي منحرجة منه..

-انطيني ماي اشرب

شربني ماي وگومني هز راسة وهو يباوع لاخواتي الواكفات يعاينلي ابتعدت عنة واستندت على الحايط امشي وسط استغراب وذهول الكل بحالتي عفتهن ودخلت للغرفة سبيت روحي الف مرة انعل ساعة السودة الدگ گلبي بحب شخص عضيت ايدي ندم على حبي الخادع الوصلني للنبذ والكرة من قبل اهلي..

-حتى الچلب وفي اما انت اقل من چلب مابيك خير حقير الله ياخذك وياخذني واخلص

لملمت روحي وختلت بالزاوية هادئة مايبدر مني حركة مرت دقايق و اجن البنات يطلعني وياهن حديثهن ولمتهن مالي بيها نصيب استغربت من اجت نوڤ واخوها.. هنا عرفت شراح تصير من كارثة كاشخة ومبتسمة ماتدري شراح يصير بقينة احنا البنات بالمطبخ وهما بالاستقبال يسولفون..

رغد:-امشنة ولجن خل نسمع شيحجون.. عليجن هو الله

سجى:-اي ولجن خل نمشي سوة على الواهس

رغد:-يلة يلة

تسحبنة وطلعنة نستمع لحديثهن گعدت بصف الحايط مخلية اذني علية بدا بالنقاش امي وگطعت گلبي من حددو موعد خطوبة اسراء من حبيبي.. كلبي صار يرعد ولساني ثگل طلع من الاستقبال وجهة مغيم خزرني وهز راسة نافي الصار يحاول يفسرلي ما اله علاقة دنكت عيوني مااربد اضعف كدامة مشة يخسف بالگاع..

مسحت عيوني الغوشن وحاولت ابين طبيعية وسط جموع البنات وفرحة اسراء ونضراتها الي كل شوية ترفع بحاجبها همستلي بشماتة وحقد..

-ها سا*شفتي النهاية بعينج صار نسيبج رحمان احترمي هذا الاسم لا العب بيج فلك واخرب ومستقبلج مفهموم

هزيتلها براسي اي فعلا هذا الراح يصير منا وغاد ماريد مشاكل اكثر من المشاكل الصارت الي بسبب هذا الحب تجاهلت الموضوع ورجعت استمع لباقي الحديث انخمش گلبي من سمعت الكلام.. اعتلى صوت حياوي وثواني دخلن البنات يتراكضن رجلية ماشايلاتني ردت بس اگوم اشوف شصار..

احمد:-نوڤايتي اروحلج فدوه لاتخوفيني عليج
اكعدي فتحي عيونج شوو اكعدي

نزلن دموعي من المنظر الكدامي حياوي مخلي نوڤ بحضنة ومتسودن عليها كمل عمي حديثة وحچة جازم الموضوع..

ساچت:-خلاصة الحجي نوڤ تعيش بيت ابوها وانت يا حياوي وين ماتريد تروح محد الة دخل بيك لانك ولد وانت حر برايك

ذب حياوي نفس زهكان ورجع يمسح بخدود نوڤ التفت على عمي راد يحجي وسكت مسح وجهة ورفع اصبعة مأشر ؏ عمي..

-اختي وياي تضل وتكمل حياتها بيت اهلها الربوها نوووڤ عدهاااا ااااام واخووان وعائلةةةةةة لييييش تريدووون تفرقوهاااا عنههههم لييييش !!

فايز:-شوف واسمع اختك كبرت وصارت حدثة(بالغة) ضلتها وي ولد عمتها هاي احنة مانرضة بيها ولا نرضة تربة وي عيال عمتها من زمان چنا نحچي على ابوك الله يرحمه يجيبكم لهنا بس ماچان يسمع منا يكول صغيرة بس هسة كبرت شوف بوية حياوي من هذا اليوم تگعدون بالبيت هنا صير زلمة البيت من بعد ابوك لن نويصر ماعلية انتكال

ساچت:-لا عاب حلگك اخيتك خليها جدام عينك هنا واخواتك هم بركبتك وهاي مثل امك بعد

هز حياوي راسة مستهزأ وهز بيدة وجهت نضراتي لناصر شوية وينفجر من العصبية بسبب مدح حياوي وذمهم الة..

ساچت:-ها بوية نسمع چلمتك وندري بيك خوش وليد واحنة مانريد الطلايب وتصير هوسة سولفت السالفة لعمتك (هند) وردت الماي لمجاريها لاتعرقلها يبوية اختك هذا بيتها من اليوم

هز راسة حياوي موافق على كلامهم وجهها ينطي الوان، الحيرة واضحة علية حقة الموقف الي هو بيه ابد مو سهل شلون راح يعيش بيت دخلة مرتين بحياتة مرة من چان صغير وامي طردتة ومرة من مات ابوي گعدت نوڤ ودخلت بنوبة بكاء حار شلون يسكتها لزمته من قميصة وصاحت بصوت عالي

-طلعنننني مناااا اخذنننني لبيتناااا اررريد مامااا اخذننني الهاااا

-هسه اخذج بس اسكتي والله هسة اخذج

-جذابين حياوي هما جذابين مو راح نروح لبيتنا وذولة الحقراء الجذابين بعد مااريدهم حتى لو اخوالي بعد ماريدهم

الجو حمة كلام نوڤ علية العتب مامعتبرينها طفلة بنضرتهم هي مرة كاملة اشرلهم حياوي بمعنى اسكتو واخذ اختة المنهارة وطلعو كلها طلعت وراهم..

ساچت:-نويصر امشي وياهم بساع ردو مو تبطون

-امرك عمي

راد يصعد بس حياوي ماخلة اشرلة عمي ساچت الا عافة صعد وياهم تمشة ساچت بخطوات رزنة لحياوي رتب على جتفة وهز راسة..

-جيبو غراضكم وتعالو مو تبطون

ماجاوبة حياوي صعد وشغل سيارتة البيت صار صنطة واحد يباوع بوجهة الثاني كلها مقهورة ومتأثرة الا اخواتي وامي احسهن متحلفات شلون يستقبلنها وتعيش وياهن...

گلبي ناااار وخاطري مكسور على روحي وعلى غيري رحت توضيت وتوجهت لوحدة من الغرف قفلت الباب وطلعت القرآن گعدت اقرا وكل شويه دموعي ينزلن سديته ودخلت بنوبة بكاء وشكوى لرب العباد
واحجيلة. الصار..

**

نوڤ"

الكلام السمعتة من المستحيل اصدگة هاي عائلتي اي اكيد اني عندي اخوان يحبوني عندي سجاد ومهند وعبدالله نصي الثاني وماما اكيد هذا حلم هسة اگعد منه مسحت وجهي بردن الكوت حجيت والعبرة خانگتني ..

-حياوي احنة بعد مانرجع الهم مو

انتظرت جواب منه بس اجت الاجابة من غيرة
خزرني ورفع شعرة باصابعة..

-ناصر : لاععع راح ناخذ غراضج ونرجع لبيتنه هذا مو بيتكم بيت عمتج

-انچبببببب هذا بيتناااا وهاااي مامااا

-وحق علي لو غلطتي ثاني مرة حلگج اشگة

احمد:-حلگمممن تششششگ گووول حلگمممممن

ناصر :-ماتشوفها تغلط علية شني اني بگدها صاير وياها

بلعت ريگ خايفة من اصواتهم العالية مو وكتها ليش اغلط هسة وخليت حياوي يتعصب خزرني بالمراية وجر حسرة..

احمد:-اسكت عنها هسة هي بيا حال

التفت علية ناصر يباوعلي بنضارت استفزتني جدا..

نوڤ:-لااااا مااا يسكت خلل يحچي اااني اررريدة يحجي

احمد:-نوڤ اذا اتحبيني هدي مشي عليج ام البنين واهل البيت

نوڤ:-مااا ارررجع هذذولي اااهلي واخوووتي مااا عووفهههم مااا اعوووف سجااااد ماعووف مهننند ولا عبييد ماعوفهم

احمد:-مانعوفهم خلص بس اسكتي افتهمت اسكتي

امسح وجهي وترجع دموعي تنزل من جديد بقة امل بداخلي امي اكيد راح تبقيني يمها اكيد متعوفني اكيد هي امي الحقيقية مستحيل اعوفها وهي متعوفني..

الطريق طويل وكل ما اسئل حياوي سؤال يجاوبني ناصر ويخليني اعيط واشلع بشعري واخيرا وصلنة لبيتنة نزلت اررركض التفتت لحياوي بقة برة مدخل بس الحقيرر اجة وراي وكفت من گال..

-اذا امج هههه... قصدي عمتج تحجي راح ترجعين وياي ماتضلين هنا بس تسمعين منها تتحركين

درت وجهي عنة و رحت امشي واتعثر ادور ؏ الحقيقة بكلام امي، واگفة بالمطبخ وگفت اتنفس سريع اباوع بعيونها متأكدة راح تجذب كلامهم وابقى وياها ..

-ما.. ما احج..

ناصر:-عمة اخوج ساچت گال نوڤ منا ورايح تعيش بيتنا شوفي احنة گنالها انتي مو امها بس هي ماتصدگ احنة من زمان المفروض نگللها بس ابوي مايرضة بس هسه كلشي اختلف نوڤ راح تجي ويانة يلة ها نوڤة شوفي هاي مو امج ههههههه يگول انتي عايشة بمسلسل بس يلة شتسوين..

صوتي رااايح ودموعي تنزل بغزارة ، منتظرة جواب يهدم روحي اباوع بعيون امي عسى ولعل تجذب كلامهم الخطف روحي واسرني عدهم سحبني من ايدي بقوة من امي هزت براسها..

روحي انسحبت من اكدت كلامة صح سحبني بقووة خلع ايدي وامي ساكتة صرخت بصوت عالي جرح حنجرتي..

-هذوووولي اهللللي والله اااااهللللي عوووفوووني يمهممم مامااا ااننني بنتتتتج لاااا تعوووووفيني

اباو؏ لامي محجت شي بس دموعها تنزل بغزارة وهذا الوغد يسحل بيه سحل رگبتي انكسرت واني دايرتها ؏ امي انتظر منها كلمة دموعي نزلن حرگن خدي صرخت بصوت ملياااان قهر، حرگة، خذلان احس تگطع انياط گلبي..

-ليشششششش مامااا ليششششش اااااني بنتتتتتتج لاتعووووفيني ااااروووح وياااهم

طلعني بالساحة ودفعني گدامة يضحك متشمت على شنو ماعرف دار وجهة ورجع يدخل للصالة..

-راح اجيب اهدومج خو مو كلساع جايين

رحت علية حيلي مهدود وگلبي ممرود اضرب على ضهرة وابچي بحرگة..

-كلبببب حقييررر لتدخللل ارررجع لاهلللك هذولي اهلللي ررروح اااطلع من بيتننننة يلا ووولي

دار وجهة علية طبك اديناتي سوى وخنگني بيدة ماحسيتة الا داخل بنص الصالة وحياوي فوگة يضرب بية بوحشية بقيت بمكاني ابچي وارجف اضافري اكلهتن من الخوف حسيت طعم الدم بحلگي وذولة يتعاركون واحد يضرب الثاني محد من اخواني موجود نهض ناصر وجهها كلة دم من شفتة راسأ انغمى علية..

-قال جحا في ذات نهار اني ليس لدي حمار وسأعود الى البيت الان لاشتري بعض المخلل والبيتنچااان

نوڤ:: هههههههههههههههههه حمااار حماار منين سويتها مخلل وبيتنچان

عبدالله:-هاي قبل حمار بس بعدين بدل راية من دخل للسوگ شاف الطرشي واشتهاة

غصيت بالضحك ولزمتني الكحة حنجرتي تجرحت شربني حياوي مي دافي ورجع يرزل بعبدالله..

عبدالله:-اهو هسة شلون منسولف من وراك هو بس اليوم خلينة براحتنة

باوعت بوجوة اخوتي يعني بعد مااشوفهم بكل وقت شلون ابتعد عنهم واعيش وي عائلة ثانية ماعرف شي بيها طكيت بالبچي مسكتت الا من نغزني گلبي اخذني سجاد بحضنة يمسح بوجهي ويبعد خصل شعري والباقين محاوطيني..

سجاد:-بيمن تريدين احلفلج مانعوفج ابد كل يومية نجيج وناخذج نشتريلج ونطلعج ويانة
وحياوي وياج مايعوفج ابد

- اريد ابقى يمكم لاتنطوني الهم حبابين عليكم الله لا تعوفوني اني اختكم

احمد:-محد راح يعوفج نوووڤ كااااافي اسكتتتي انتتي مو طففففلة خلصتيهاا بچي

ختلت بحضن سجاد مچلبة بملابسة سكتت شوية والمكان صار هدوء بس حسرات حياوي تنسمع رفعت راسي الة وعدلت گعدتي من حجة ..

احمد:-خل نفترض انتي بقيتي وي حمزة شلون راح تعيشين ها كولي ؟ لج اني شسوو بيه جانت مرت حمزة مطلعة ضيم الدنيا بية واذا ماانفذلها طلب تشمرني بالشارع لليل الا تطببني

-وحمزة شلون يرضة

-مااريد احجي علية وهو ميت لايحل ولايربط شدكول الخاتون يصدك لو انتي باقية وياهم مو حالج هذا

سجاد:-شوفي نوڤ هاي حياتج رحمة من رب العالمين يمكن دعوات امكم هاي لان لو عشتو وي مرت خالي راح تعيشكم بجحيم

-بس اني ما اريد اروح

سجاد:-امي من اطوج الها شرطو عليها من تكبر ناخذها وامي رضت لان ماعدها حل

احمد:-نوڤايتي اني وياج ابد ماعوفج وذولة الادبسزية هم مايعوفونج كل يومية يمرون عليج احنة مامسافرين نوڤ لاتكبرينها صيري عاقلة ارحمي بحالي اروحلج فدوه

سكتت بالعة الغصة لزم ايدي حضنها وكمل كلامة والكل يستمع الة..

-نوڤ حبيبتي رب العالمين رحمج من ابوي عافج عد اختة، ترى مرتة تعيشج بجحيم المفروض تحمدين الله وتشكرينة لان عشتي اجمل سنين عمرج 16سنة محد مرزلج ولا مشتغل عليج ولا مقصرين وياج بشي محسسينج بعدج طفلة..

احنا مانگدر نبدل الحقيقة بس لازم نتقبلها ووين ماراح ترحين راح يبقى عندج سند حتى لو اني مامموجود عندج سجاد عندج مهند عندج عبدالله عندج ام تحطج برمش عينها

مهند:-اعتبري روحج متزوجة بس بدون رجل واخوج وياج هههه بعد شتريدين

رفعت عيوني خازرتة ضربني ؏ خدي وعبداللة جر گصيبتي..

-اخ اخ شبيكم احنا بيا حال ولووو من وجهي

عبدالله:-انا بيا حال والدفان يغمزلي احوو احوو احوو يلة نوڤ گابليني الطمي وطلعي حرگتج

هزيت بيدي خبل يلطم ومن كل عقلة يسحل بية يريدني الطم وياة..

سجاد:-عوفها هاي فاهية اني وياك نلطم

تگابلو يلطمون سوة ومهند صار ثالثهم يهوسون ويدبچون بالگاع..

سجاد:-وين رايح يمسعود دخذني وياك احوووو

بقو يلطمون مثل النسوان شكد مامنكسرة ومنهارة ضحكت ونسيت لصار لفترة..

منهد:-اوكفو اوكفو مسعود هذا منين ولكم

سجاد:-رجال محترم شواربة توصل لصرتة بس خطيه اوووف ياربي

عبدالله:-يبووو اندعم وماااات ومرتة ضلت تصيح وراة وين رايح يمسعود دخذني وياك يبوووووووو

سجاد:-على كيفك عيوني انت اني ماگلت مات ، مسعود باك ذهب مرتة وكاللها رايح للسوگ شتريدين اشتريلج ملابس وطلع راحت تركض وراة وتصيح وين رايح يمسعود دخذني وياك مصدگة روحها الفطيرة

نوڤ:-وبعدين

گعد بالگاع تربع مقابيلي وذب حسرة

-لگت المسعدة ذهبها مبيوگ ورجعت صاحت يبووووووو

احمد:-ارعن فضحتنا

سجاد:-ماكو ارعن غيرك

بقينة الليل كله سهرانين نضحك ونسولف ونقضي هذا اليوم سوى صبحت او بالاحرى صبح بيتنا ؏ اسوء يوم صار ويانة التوتر واضح جدا ؏ الكل حاولت ما ابچي حتى لا اضوج امي واخواني ابتسمت ومارست يومي بين ريوگ وضحك بس الرجفة البصوتي ذيج وينها واضحة، خايفة خايفة من المجهول..

طفرت من مكاني، شفت سراوي اجتنه حضنتها وعصرت اعيوني امنع سقوط دموعي

سرى:-راح تخلصين من عبيد وسوالفة لا والنوب راح يشتاقولج ويحبونج بالزايد و يصيرون يدللونج ههه

ابتسمت بدون مااجاوب واحس صدري نار تاكل بية ماعرف شسوي شحجي شكول بعدني ممستوعبة الصار كل شوية واگول يطلع حلم

-شلونج نوڤ

التفتت لعادل مرتجي ؏ عتبة باب المطبخ والجكارة بيدي مشتغلة..

-زينة

رجعت اودع بيتي واهلي كل شوية احضن شخص بيهم شلون افارگهم مضت ساعات ونزل حياوي بيدة جنطتين كبار هنا حسيت الهوى انگطع گلبي وگف بهلحظة تاكدت هاي الحقيقه المرة شلون اتجرعها واني بس طعم الحلو بحلگي..

احمد:-يلا امشونة

طلعنا كلنا سوى لكاني عادل صاير الفص الابيض من عيونة احمر دنكت راسي ورحت صعدت ودقايق معدودة وبدت رحلتي وي المجهول ..

**

سفانة""

كلها تشتغل وتحضر للسبعة شي تطبخ شي خبرت كملت وياهن ورحعت اكنس الحوش كله وصخ والمصيبة جبير محد ترضي تكنسة..

رضية:-تعاي سفانة اغسلي المواعين

-راح اكنث الحوش خل وحدة من البنات تجي وياج

رضية:-اي عفية من غبشة واني اصيح الحوش نضفنة النسوان تجي تلگاة بوصخة ماكووو

ادية تجمدن من البرد وصلت لنصة واندك الباب رحت افتحة وابتعدت مسافة مدنكة راسي ..

-صيحي البنات خليهن ينگلن صناديگ الماي

نزلت راسي بدون ما انتبة لملامحة مثل كل مرة ورحت اهرول اصيح البنات يجن وياي..

-هيووو امشن انگلن صناديگ الماي

سجى:-وعلي مابينة حيل ضهورتنا انكسرت من لف الدولمة

تمددت سجى بحضن رغد وهدى تلعب بموبايلها الجابة الها "عباس "..

-ماتكومن هثة

-لاعع

عفتهن وطلعت لكيته ماموجود طابك سيارتة بالباب بيها صناديگ ماي نگلتهن للبيت بقة صندوكين رجعت عليهن وانضربت بصدرة عطرة ترس ريتي ترس

-ها اسف المعذرة

ابتعدت عنة اوضاعي متخربطة انربط الساني مارديت علية رحت اجيب الصندوگين ولمحتة يخابر داير وجهها لابس دشداشة سودة ولاف الجراوية يفر بسبحتة ويسولف من بعد دقايق االا حسيت ؏ روحي وتذكرت وعدي لنفسي وخرت عيوني منه ورجعت شلت الصندوگين طبگ..

-چا وين البنات ماتصيحيهن

-خلثت هاي اخر شي

فتح عيونة وعض ؏ شفتة السفلية كملت طريقي رجلية ترجف شبية هسة خرب بالحظ انة من اشوفة بالتلفزيون تنگلب اخلاقي الا بالواقع..

-شلوون تشيلينهمم كلهههن وحددج

-عادي مثار شي

خليتهن بالمطبخ ورجعت اخلص كنس الحوش والولد طابة طالعة بس ماهتميت..

-عوفي البيدج من يروحون ارجعي اكنسي

گمت من مكاني منحرجة عرفت قصدة عيب ادنك اصلا اني كملت رحت دخلت جوة يم البنات يلفن بشالاتهن..

رغد:-يمةةة شني غورلة ولج سجيوة راسج صار اكبر من جدرية ابو فانوس

سجى:-يووة شبيج وياي

رغد:-انزعي القراصة حبم قلبي

سجى:-ماااا

-خايبة وجعاءء التوجعج لاتخزينة ذبيها

عافتهن ومشت بعد سجيوة تهتم لواحد بقن البنات يعدلن كملن لف شالاتهن واني بعدني على ملابسي لاسابحة ولا مبدلة...

رغد:-خاب سجيوة وياج ريحة

سجى:-خية الريحة للمستريحة انة منيلي

رغد:-احوو بدة التغمبل والتهمبل يلة طلعي خليني اخلي منها شويونة بس

سجى:-هاج بس شوية مو هواي اموتج اذا اكثر من رشتين تخلين

انطتها العطر رشرشت روحها ترشرش وسجى انصرعت اجتهن رضية ترزل بيهن على صوتهن العالي طلعت للصالة اروش كل شوية وحده ناخيتني على حاجة طلعت ؏ الصوت البلحوش..

دخلت عمتي هند ولدها ونوڤ وجهها مايگصة السيف ومصبوغ احمرررر .. راد يطلع وچلبت بية ترجف وتبجي وتصيح لاتعوفني..

-ماعوفج وحق هو الله

رضية:-شبيج يمة نوڤ احنة اهلج منين تخافين وانتي كبرتي عيب تبجين

اخذتها شروق تمسح بدموعها خطية تكسر باب الگلب الصار وياهن مو هين،اجتني امي جرتني من ايدي ونترت بية..

-امشي اسبحي ولبسي ثوبج الجديد وشالج وياة وخلي شوية حمرة كون ماتبين وخلي ريحة من مال رغيدة هاي المفلوكة

فتحت عيوني مصدومة من طريقة كلامها وين احنة بعرس حتى اخلي حمرة..

-شكو ليش

گرصتني من ايدي طيريت وذرة صرخت بالسكتة احس الوجع بگلبي دمعن عيوني شوية وابچي..

-لاتضلين فاهية شلون بيج اختج الصغيرة تزوجت وانتي نمتي على گلبي من ورة فهاوتج رغيدة ام الگمل خطبنها ويتوسلن بامها علمود ترضة وانتي ضلي النسوان تخدم عليج

هضمني كلامها حيييل احس جمرة بگلبي من القهر عفتها ومشيت جرتني من ردني وحجت بحدة ..

-سوي مثل ماگلتلج امشي

رحت عيوني مغوشات ليش تعيرني باختي مسوية مكسورة وكل شوية معيرتني، رحت طلعت ملابسي وسبحت لفيت شالي وخليت من عطري الريحتة على كدي ماتنشم..

سجى:-ها ولج امج كالت خل تاخذ من عطرج
اوكفي انطيج

-شكرا ماريد عندي عطر

-مو هي گالت

-اي عبالها خلثت عطر

-ها خوش روحيلها كالت خل تجيني

عفتها ورحت الاستقبال النسوان مجتمعة بعد بس الملاية تجي وتبدي القراية شافتني اشرتلي اروحلها جانت كاعده وي نسوان تسولف..

-هاي بنيتي سفانة

-الله يحفضها الج شكد عمرها

-هههه خية انة ماعرف بالعمر بس هيج بعدها ماطابة العشرين

غمضت عيوني بقهر شوكت تخلص هاي السالفة وارتاح امي تحس ان التتزوج سوت انجااااز عظيم ومو بس امي هيج تفكر تفكير الاغلبية هذا...
البنية عدنا اذا دخلت العشرين ومحد ياخذها بايرة يسمونها وشكو قسمة تجيها يزوجونها خوفن تضل طول العمر ؏ گلوبهم..

-سفانة نااادرة واسئلي ياهي التريدين عليها ومؤدبة وعالقة يمة بنيتي الله يحرسها ماكو باخلاقها وندارتها

-اي اي مبينة بس ما گلتي دارسة لاء

-اي والله ياخية كملت البكوليا مدري شسمها وبطلت بعد تعرفين المدارس يمها ولد وناس تحجي كعدت هذا هو شتريد اتصير دكتورة حتى هي الوضايف وينها هي

-اي والله ياخية لا عاب حلگج

عفتها ومشيت مااتحمل اكثر من هذا القهر راح تصير عندي عقدة صارت تلعب نفسي من ذكر كلمة زواج التمت النسوان وبدت القراية بعد ما طلعت كعدت يم شريقة المگابلة نوڤ وگاعدة .. حسيتها داخلة بصدمة لاحركت ايد ولا رجل بس عيونها تحركهن امها حاضنتها وتسولف وياها بس جانت هاااادئة حرف مانطقت يمكن تريد تستوعب الصار حجيت بهمس ..

-اكلج شريقة شلون نوڤ تضل يمكم وي اخواتج وامج العگارب

-شحدهن يحاچنها واخوها موجود انتي شايفته يسوي دهر عليها يخافن منة

-اوففف اووف شلون بيها اهلج ما ينجرعون بعلي

-اسكتي خية مابينة حيل للطلايب لايسمعنج

سكتنا من مرت اسراء تخوز بينة بحقد استغفرت ربي وطلعت برة الجو باااارد لفيت جاكيتي الصوف علية زين وصرت بباب الديوانية وبالصدفة سمعت صوت همس بين نسوان ثنين حتى ماشفت شكولهن لان واگفة برة..

-ها خية هسة شگلتي تخطبينها لحميد لاءء

-لاء اخطبها لسلام شگلتي حسيتها عالقة توالمة

-ها هية خوش ماختاريتي تفيدة البت على گدة ايدج ..

تيبست بمكاني واحس بحرارة تطلع من وجههي معقولة ذني يحجن علية اي اي علية مساع شافني يعني عجبتهن واكيد اهلي راح ينطوني بلعت ريگ خايفة من الفكرة شلون اتزوج وگلبي وعقلي مو ملكي..

**

-يلا يخلصينة ولج راح نتأخر بعد مايطببونة

-نوڤ: يلا شبيج مانتاخر خلصت

-اي عفية يلا نمشي گبل لاتگعد اسراء

لبست حذائي وطلعت اهرول مابينة حيل تكعد هاي الغثة وتسممنا من الصبح..

-شروق: يمتها طلع حياوي

-من الصبح طالع خطية مشط شعري الا راح

-بس تدرين الشال لايگلج والله

-اي كلها تكول

عدلت شالي الشامرتة شمر بديت احبة واقتنع والفضل لحياوي اكيد باوعت بوجه شروق وابتسمت تمشينا للمدرسة وحدة لازمة بيد الثانية،طول الطريق شروق تكرر عبارة ..

-اكلج خاف ارسب ويبطلوني

-اهووو ليش يبطلوج ترى انتي شاطرة واذا انتي ترسبين شدگليلي

-لا انتي تنجحين حياوي كعدلج كعدة خطية تعب وياج ماعليج تنجحين

-ان شاءلله كلنة ننجح

وصلنا للمدرسة وكل وحدة راحت لقاعتها جان امتحان فيزياء والاخير خلصت من وكت الاسئلة جانت زينة.. شروق تتاخر يلة تطلع رحت اشتري من الاسواق البصف المدرسة اشتريت وكعدت على الرصيف اكل..

المكان هدوء والجو بية نسمة هوى باردة صفنت اسئل نفسي معقولة خلص الشتة وهسة احنا بالصيف!!

معقولة بليلة وضحاها تغيرت حياتنا!شلون تعايشت وي الحقيقة؟وعفت عالمي الجميل المتناسق..

مر اكثر من تلث اشهر بس يكول عمرر تطشرنا اخوتي وامي بصفحة واني بصفحة من بعد جر وعر رضينا بالموجود واكيد حياوي الة دور جبير لو مو هو موجود ماعرف شلون اعيش وي هاي الناس الغريبة..

نزلت دمعة من عيوني مسحتها وتحسرت بصوت اشتاقيت لاخواني رغم الجمعة والسبت نبات يمهم بس بسبب الامتحانات مارحتلهم بس هما اجوني كم مرة..

مديت ايدي لرگبتي وصرت اتأمل بالگلادة الجابها الي سجاد اربع فراشات كل ثنين مجلبات سوى ابتسمت لااردي احس بيهم وياي فزيت من تخيلاتي من طبگت سيارة بصفي خليت ايدي على صدري اتنفس بقوة نزل ووزع نضرة بكل الاتجاهات ورجع باوعلي گلبي صار بلعومي شعندة جايني صارلي شكد مشايفتة شيريد مني هسة..

-نوڤ اريد احجي وياج

بلعت ريگ ورجعت ليورة من تقرب:-كول احجي شتريد

عادل: -ماترهم امشي وياي

-وين

-بالسيارة

-ما

خفت من نضراته وصعدت بصفة بالصدر درت وجهي على الجامة خايفة مترددة مشاعري متغالب عليها الخوف منة... تحمحم وحجة بصوتة الخشن المرعب بالنسبة الي..

-شلونج

-زينة

-دومج

سكتت واحس بانفاسة عالية تشنجت بمكاني ماحركت لاايد ولارجل زين مني واتنفس.. طگيت سن بسن من گال..

-تزوجيني؟

گطعت نفسي وبقيت ساكتة لفترة درت وجهي من عصر زندي قوي..

-اخخ

-ليش ساكتة

-شكول

-كولي اي نتزوج

-لا لا ماريد اتزوجك

طگن عيونة بوجهي وقوة ضبة ايدة احسها انقسمت نصين نزلت دموعي حاارات عاگد حواجبة وحاد سنونة زدت بالبجي الا عافني مسح على وجهي ومضت دقايق هادء..

-سرى راح تتزوج

-شنو منو

-مثل ماسمعتي راح تزوج ابن خالي اذا سجاد فك النهوة واذا مافكها يتزوجها.. حضري روحج لعرسها خوش اكشخي

-انت تدحجي

-اممممم مثل ماسمعتي

-بس ليش

-شنو اليش

-بس سرى ماتريد تزوج لا ابن خالها ولا سجاد

-لعد تريد حياوي

-اي اي تريدة

-ازوجهم بيدي بس بالاول تتزوجيني

فتحت عيوني على وسعهن اخذت دقايق الا استوعبت كلامة ..

-مو تريدينهم يتزوجون اتزوجيني واجمع سرى واخوج سوى

-هاا شنو

-انتي مو تحبينهم ضحي علمودهم

فزيت من اندكت الجامة فتحت الباب وجلبت بيد شروق امشي و اختض من كلامة شلون نجتمع بمكان واحد واني اخاف واموت خوف من اشوفة.. طول الطريق ساكتة حاولت شروق وياي بس ماستجابيت بعدني مصدومة..

وصلنة رحت سبحت سوت شروق النة غدة كعدنا ناكل وشوية ودخل حياوي دنك باسني وكعد ويانة يسئل بينة.. اكلت شوية ورحت اشوف موبايلي اشتراة الي سجاد وطايرة بية لكيت مكالمات هواي من سرى بلعت ريك واتصلت بيها ثواني واجة صوتها تبجي..

-شبيج سراوي

-الجمعة خطبتي من ابن خالي

-صدددك

-اي اي والله لج نوڤ راح ااموتتت

نطقت الكلمة واختفت اسمع بس صوت شهكاتها احس گلبي تمزق من القهر سرى صديقتي المقربة كلش ماكدر اشوفها تدمر حياتها والحل بيدي سديت الاتصال منها واتصلت كلني اختض مثل السعفة اجاني صوتة احس راح اوكع..

-الوو..

-الوو اني..

يتبع 🔗🔗..

توقعاتكم عيوني ولاتنسون التصويت
وعلقو بين الفقرات 😔😔...
حبايبي ليش ماكو دعم ترى من تتفاعلون مراح استفاد شي بس اكمل بالكتابة اتمنى منكم دعموني بكتابة هاي الرواية البيها قصص متعددة وضريفة لطيفة 😞..

دمتم بحفظ الله ♥