~بعد اسبوع~
الدكتور: وبس كذا الحين بنكتب له خروج وقدامه العافيه ان شاء الله ومثل ماقلنا لكم لا يحاول يتكلم كثير لين ترجع احباله الصوتيه مثل قبل
راشد: يعطيك العافيه يادكتور
الدكتور: هذا واجبي
فالح: يالله راشد شغل السياره وخذ اغراضه وعلاجاته من الصيدلية وانا بخلص الاوراق ونجي
سند جلس على طرف السرير: شايف فرحتهم فيك ماكان ليلنا ليل ولا نهارنا نهار فقدناك
تميم كتب بالورقه: يخليكم لي يارب
سند: ادري انك ممكن تسال ليه ماجاء ابوك او حتى فكر فيك انا اقول لك بكل بساطه حاول يحولك عنده بمستشفاه بس احنا رفضنا وارسل اكثر من دكتور لك بس للاسف مافكر يجي بنفسه ويشرف على حالتك
تميم بحزن: من متى اعتبرته ابوي من طلعت على الدنيا كنت اشوفك انت ابوي انت وخالي تركي
سند: ماعليه يغفر له انه حاول يساعدك لاتنسى انه حالف مايدخل الديره ذي
تميم: لاتحاول تبرر له
فالح دخل بالكرسي: يالله عليكم قالبينها سوالف واحنا نشتغل قم انت وياه يلا
سند يساعد تميم: لا يكثر بس تراي اكبر منك بخمس دقايق
فالح: ذليتني على هالخمس دقايق
سند: ياخي اسكت ازعجت صمت الغرفه بصوتك تراك بمستشفى
فالح: بعد بس خلني ادف تيمو
سند صفق: يالله نزلت عليك الحنيه بعد عنه انا بدفه خلاص تعبناك لازم ترتاح وتستعد تخدمه بعدين
فالح: انا اقترح نجيب له ممرض
سند بحده: تميم مافيه الا العافيه وعنده احنا نقوم فيه ونشيله الفكره ذي شيلها من بالك
فالح: والحين كيف الطريقه ابوه اكيد بيقول تعالو
سند: يالله لازم تنكد عليه يعني ساعدني نرفعه للسياره ولسانك ذا ابلعه
راشد: ولد ارفع زين شف وجهه صار احمر
سند: فالح انت مامنك فايده بعد عنه
فالح: تميم صار لك شي؟
هز راسه تميم بايه واشر على ساقه
راشد: خلاص فالح اركب خلنا نحرك ونروح تلقى امي جالسه على البوابه من الفجر
سند: خير عاد ما ارضى على ميشو
فالح: نجلدك ترا
~مشاعل~
جالسه على الجلسات اللي قريبه من البوابه وتهز رجلها بتوتر
حذفت جود اللي بيدها وثبتت رجلها: بس خلاص وترتيني معك تميم والحمدلله بخير واخوانه معه
مسحت على وجهها: استغفرالله ببالي افكار ماني قادره اتطمن منها اخاف يصير عليهم شي وهم ماجو
جود: تعوذي من الشيطان وقومي سوي لهم شي دافي ياكلونه اذ جو ولا خلي غُند تساعدك ماتشوفينها ماشاء لله هي اللي مهتمه بفارس اكيد بيكون عندها خبره
مشاعل: والله مدري ياختي كل ذا بجهه وحاتم بجهه اخاف يجي ياخذنا ويعذبنا معه ويتعب تميم زياده
جود: مشاعل الى متى وانتي متحملته ضربك واهانك ومع ذلك ساكته معليش لين هنا وبس اذ ماراح تتكلمين انا بتكلم عنك وبقول لتركي تراك كبيره عمرك بالاربعين عيب علي والله اقعد انصحك مفروض انتي اللي تنصحيني انتي ادرى بنفسك وببيتك ومصلحتكم عيالك الحيـ
مشاعل قامت: قلتيها حياتي يعني مالك دخل فيها دام اني صابره وساكته
لحقتها جود: ذي مب حياه كل يوم ضرب واهانه وغير كذا يطردك
مشاعل: جود رجاَ لاتتدخلين بحياتي شوفي حياتك انتي وزوجك اللي ماتدرين وين ارضه
جود: بعد كل هذا العمر تعايريني
مشاعل: اووه الحين بتكبرين السالفه اسكتي ياختي
جود: مشاعل وش ذا استوعبي ترانا كبار وكل وحده عيالها اطول منها
سكرت باب المطبخ بوجهها: معليش ياجود تراك تقهرين مابي ازعلك بشي
~ناصر~
سكر باب المكتب بقوه وحذف الاوراق على مكتب سلطان
سلطان: ايش ذا
ناصر بتافف: اوراق استقالتي من الشركه
عقد حواجبه: والسبب؟ ماكملت اسبوع على بعضه
تافف: لو سمحت وقع على الاستقاله بمشي وراي خط
سلطان: استقاله مره وحده يامسلم توك امدا تشتاق لاهلك تحمل
كشر: الزفت ذي اللي مخليني اشتغل معها ماغير تتميع مقدر اتحملها
ضحك بقوه: كله بس عشان لبنى هذا هو اسلوبها والكل اول مايتوظف يشتكي منها الا انت مقدم استقاله المهم الورقه وهاه قطعتها قدام عينك بفصلك عنها تماما واعتبر هديه لك مني اطلع الحين لشقتك وبكره واللي بعده لا تجي ارتاح بعد رفعت الضغط اللي جتك
ناصر: والله ماتقصر يابو عوض فكيت ازمه
سلطان: اطلع للبيت الحين بس وانت طالع حط ورقة الاستقاله بالزباله
~راشد~
راشد: عاد ياعيال لازم نعوض سعد سياره اخر موديل
فالح: لا سلامات وش اخر موديل انا بنفسي ما اخذت اخر موديل
راشد: اخونا مسوي فيها حادث وعادمها طبيعي بنعوضه
سند: مالنا دخل اللي يدفعها حاتم ومن جيبه ريال ينطح ريال
فالح: اصلا احنا مانعرف السالفه كلها ونبي نعرفها منك كامله
تميم سفهم
راشد: تميم نبي نعرف اللي صار بالتفاصيل
اخذ تميم الورقة وبدا يكتب
تافف فالح: يوه الحين يطول يكتب
سند: فالح وش ذا صاير مستفز ان ماسكتت مثل دايم بفتح الباب وارميك معه حركات طفوليه كبرنا عليها خل اخوك بحاله
مد تميم يده واعطى سند الورقه"طالعين ناخذ شاهي نعناع على الجمر وبنص الطريق طلعت علينا شاحنه لفيت انكسر الدركسون وصار اللي صار"
راشد غير الموضوع: علاجاتك اول ماندخل تاخذها من حظك كلهن الظهر
~ بدر~
دق باب بيت مشعل بقوه
مشعل: طيب طيب
بدر استند على طرف الباب: يلا خلصت؟ ودنا نمشي هالحين عشان نلحق الموعد
مسح على راسه بتوتر: خلاص احس ماودي اروح كنسلت
تخطاه بدر ودخل البيت: اقول خلك صامل مافيه وقت نكنسل اي شي
رده مشعل:البيت فيه محارمي ارجع وراك
بدر غمض عيونه بصبر:ماعليه مافيه الا امك وغرفتك بعيده عنهم
مشعل:طيب بسرعه
بدر:مشعل تراك مريض لازم تشد شوي على نفسك عشان تتعالج
مشعل: ترا العله فيني انا ماهي فيك ولا في ناصر
بدر سحب شنطة السفر من جنب الدولاب وبدا يحط ملابس مشعل فيها: يعني بضنك لو ماهميتنا كان سوينا كذا؟
مشعل جلس على السرير: مقدر تعبكم والله بس انا مابي اتعالج
بدر: عط نفسك فرصه المره ذي بس وقم طلع لي سجل العايله وهاته والبس عشان نطلع
مشعل: خل يصبر علي ناصر انا اوريه
~المزرعه~
صوت البواري خرق هدوء المزرعه بغير عادته راشد اللي اكره ماعليه الانتظار ولو ثانيه
سند سحب يده: بس انزل وافتح البوابه
راشد: خير انزل اصغر واحد فينا هو اللي ينزل تميـ سكت لما تذكر وضع تميم: اسف والله نسيت اعذرني ياخوك راح على بالي
فالح: انزل بس ولايكثر
سند: انزلو يلا انا عندي مشوار خفيف وبرجع
راشد: تراك مانت عاجبني وراك شي اكيد مصيري اعرفه
سند: اقول انزل بس ولاحد يدق علي انا اذ خلصت جيت
فالح ساعد تميم ينزل: راشد نزل الاغراض كلها تحت وانا بساعدك ندخلهم انحنى لتميم: مرتاح بالجلسه ولا اعدلك
هز تميم راسه بالايجاب
فالح دفه لداخل المزرعه وهو ينادي: يـــمـــه الشيخ وصل
طلعت مشاعل من المطبخ بسرعه ولحقتها إلهام ومسكها فالح بسرعه: انتبهي يمه لا تحضنينه بقوه
مسكت وجهه تتامل الذبول اللي صار ساكن ملامح وجه ولدها رفع يده يمسح الدمع اللي استقر خد امه وهو يحرك راسه يمين ويسار حضنته مشاعل وصار صوت شهقاتها يتردد بالمكان كله وشاركتها الهام
بعدها فالح عن تميم: يمه الله يسامحك اوجعتيه شوفي وجهه انعفس من الالم يلا تميم الحين وقت علاجاتك
مشاعل رفعت يدها تمسح دمعها برجفه: اول لازم ياكل
فالح: مايقدر ياكل بس بنحط له مغذي
مشاعل: بياخذ بس شوربه ماراح تضره
فالح: والله مدري
تميم اشر لإلهام تقرب مشت بخطى ثقيله وحضنته: سلامتك ياخوي ذوقتنا مرارة فقدك وانت حي يرضيك واحنا نبكيك ليل ونهار اصلا لا ليلنا ليل ولا نهارنا نهار
رسمت بسمه خفيفه على وجهه
راشد دخل: ياعالم مو من جدكم لكم ربع ساعه واقفين ماصهرتكم شمس نجد اللي ماترحم اقلها ارحمو المسكين اللي توه طالع من شر
~المجهول~
فتح الباب بهدوء وهمس: ادخل حياك
: انت عارف انا ليش جاي عطني الزبده بسرعه
: اصبر اضيفك وتاخذ حقك كضيف بعدها نتكلم بالموضوع
: اعتبر فنجالك مشروب واخلص كلنا ندري اني المفروض ماقرب صوبك خطوه بس الظروف تحدنا عطني الظرف اللي عندك وبمشي
: هه تحسب اني بعطيك الظرف من دون مقابل ابي منك.........
طارت عيونه من الصدمه: مـسـتـحـيـل
(لَأّ تٌـجّـعٌلَوٌ مًؤلَفُـتٌـيِّ تٌـلَهّـيِّکْمً عٌنِ أّلَصّــــلَأّةّ)