ملاك: (واقفة فطواليط دايرة يدها على حنكها مفقوسة وكتشوف فديك💩 للي تماك عيات تبرك على لما وكان مقطووع وهي متأكدة المرة اللولة كان لما راه جوج مرات!!!!!)
الله يا ربي مكفاش المشاكل فين كنت طحت فهاد الفضييييحة كتر... فين ندير وجهي صباح فين يجي لا يوسف لا السيد أوييييييييسييلي استغفر الله
(مشات كتقلب على شي قرعة تكون عامرة بلما كانت غير قريعة صغيرة للي شرات باش تشرب دوا وهاديك مغدير وااالو عيات تقلب ووالو رجعت لطواليط وبقات واقفة وكل مرة تجرب واش جا لما ولا لا)
تفوووووو مجاتني نحطها غير داابا.. (جاتها لبكية وبقات هيق هيق هيق تجمع كووولشي عليها وفاض الكاس... سمعت تيليفونها كيصوني مشات بالزربة لقات بريڤي شافت فالساعة كانت 1 دالليل جاوبت)
الوو
حمزة: مالكي املاك ؟!
ملاك: (قلبها زدح وجلست فداك السداري بقات ساكتة شحاال)
علاش كتصوني علية
حمزة: مقدرتش منصونيش عقلي حبس قبيلة
ملاك: حمزة نعل الشيطان نتا راك مزوج اش باغي عندي انا
حمزة: هاد زواج ممعمرليش العين انا كنت باغيك نتي
ملاك: (غصة وحلت فحلقها) كنا وكنتو صرنا وصرتي مزوج حتى حاجة مغتبدل واخا طلق مستحييييل نرجع معاك الثقة للي كانت بيناتنا تهرست وعمرها ترجع كيف كانت
حمزة: (بقا سااااكت شحاال) غتفهميني
ملاك: بلعكس غير غنحقد عليك انا كنشوووفك واحد شمااتة تخلا على وحدة كانو ناويين يتزوجو علاش على شي حاجة تاافهة
حمزة: تافهة!!!
ملاك: اااه تااافهة والخايبة انه ماشي حتى شغلك بحال شي واحد دخل فحياتك وقالك علاش ماماك سميتها نجية خاصها تكون فاطمة
حمزة: (بترجي) ملاااااك
ملاك: عفاك احمزة نتا فغنى على هاد المشاكيل وذنووب وحتى انا (بغات تضعااف ولكن..) مثلا مثلا شنو بغيتي مني نتيق فيك ورجع نبغيك وتجي عاود وتقولي انا تسرعت وهادشي مداخلش لراسي!!! شنو زعما كتفكر نهبط من قيمتي ونكون ديك العاشقة ديال راجل مزوج
حمزة: مزال تتبغيني؟!
ملاك: نكذب عليك الا قلت اه (ضرها خاطرها) وعفاك كما نتا عندك مرتك ودخلتي فعلاقة جديدة للي خاصك تلتازم بيها حتى أنا هكاك
حمزة: كفااااش!!!!
ملاك: كيف سمعت.. (قطعت وبزقت عليه)
المرض كيف دااااير زيدني حتى نتا
(بتنهيدة تفكرت باها ومها كانت علاقتهم قدوة ليها كفاش باها كيبغي مها وحتى مها كيفاش تحدات وبغات باها ولكن دابا كولشي تهرس حلت داك لباب وخرجت لبالكو كتبكي جاتها قااااسحة بزااف واكترية خايفة يكون طلاق للي عتابراااتو من حق الام ديالها من هاد الخيانة مسحت نيفها وعينيييها ضارت حيت جذبتها ريحة زوينة عارفاها ديال الشيشة لقات اورطيغا كيشوف فالشاريع وشاد شيشة الكترونيك)
اورطيغا: هو حسن دخلي وتسدي عليك
ملاك: (غوبشت وتمات باغية دخل)
اورطيغا: (بهدوء) غير باش حتى واحد ميحل فمو عليك تماك ساكن عزري غيشوف بنتك تتطل كولشي غيفهم غلاط
ملاك: (حتى شافتو هضر معاها مزيان عاد حركت راسها باه ودخلت سدت عليها لباب دوزت الريدو وتكمشت فبلاصتها راسها ضرها غير تفكرت الفضيحة للي كتسناها طواليط طار عليها نعاس...)
اصبحنا واصبح الملك لله..
زهرة: (منعست مشاافتو بقات غير جالسة فبلاصتها واخيييرا شكها كان فمحلو وحتى مرت شيخها نبهاتها واحد نهار كان رشيد وباه كيهضرو بالشلحة وباه كينصحو ينوض يتزوج باش يولد الولد قلبها ضرها معندها فين تمشي وفين تجي معندهاش #عائلة للي مبقاتش قابلاها!!!! بناتها كبرو ودارت نساااب والحفاد واش فهاد العمر عاد غتنوض تطلق وفين غتمشي لا فلوس لا صنعة واخا عارفة راجلها يقتلها ويقتل راسو وميطلقهاش!!
للي حارقها غير كفاش عطاااتو خاطرو اه كانت كتقولو الا بغيتي الولد نوض تزوج ولكن مكانتش كنقولها لا من قلبها لا من عقلها غير لسااان وصاافي ولا كانت باغية تسمع ديك والله منتزوج وحدة من غيرك باش يزييييد يصبرها على الايااام ويبرهن ليها ان اختيارها ليه كان فمحلو سمعت دقان فلباب مجاوبتش)
الجد: هدا انا ابنتي حلي لباب
زهرة: (ناضت دارت شال على راسها مأفأفة ولبست بينوارها وخرجت بنفس النظراااات ديال الحقد للي تملكووها) شنو بغيتي
كان اول مرة تهضر معاه بهاد الطريقة كانت ديما مثال ديال الاحترام التسامح والمحبة والوجه البشووش براسو جاتو قاااسحة واخا مقبلهاش فالاول ولكن مع الايام بدلت نظرتو ليها واهتمامها بيه منين ماتت المرحومة وكانت كتوقف معاه فكولشي لدرجة رجعت هي مولات الري وشوااار وكولشي يدووز على يدها فديك الدار..
الجد: بنتي نعلي الشيطان
زهرة: (فحلقها بزاااااف دالهضرة ولكن مزال وجهها غالبها وماقدرتش تخرجها لراجل قد باها) اممم
الجد: مع الوقت غتفهي علاش رشيد دار هاكاك راه كولشي فمصلاحتكم نتي وبناتك رشيد خدم ودمر ودار رزقو ماشي بحال خوتو للي انا ومنبغيش يديوها بااردة داكشي كيبقى ديالكم ابنتي، غير صبري مع الوقت كولشي كيدوووز
زهرة: مكاينش الوقت الحاج.. المحكمة للي جمعتنا انا ولدك غتفرقنا
الجد: وعلاش؟!
زهرة: (بحرقة ومعصبو) لا والو غير مالقيت مندير قلت نطلق نجرب الحياة وانا مطلقة كيف دايرة!! (بنظرات باردة) أاااااااااااااعمي ولدك عارف انا مغنقبلش يدخل علية الضرة ومدااام دارها وتحدااني بحال قالي سيري فحاااالك من داري وانا داكشي للي غندير
الجد: هو مغيدخل عليك حد نتي هي لي غتبقاي مرتو ومولات دارو وماين بناااتو ومولاتوحتى هاد الدار وما فيها
زهرة: (كتظحك بالفقسة) بناتو؟! هادشي للي كان معقدكم خاصكم الولد
الجد: بنتي رشيد دار غير لحلال
زهرة: (زاد استفازها) وحتى انا غندير غير لحلال ياك ربي محرمش طلاق ياك هاكا كاين فالدين الاسلامي؟!!!!
الجد: (تنهد) الله ينعل الشيطان ابنتي مضيعووش حياااتكم و و هو راه تزاد عندو ولد لبارح ومو ماتت الله يرحمها..
زهرة: (محست حتى خبطت لباب عليه زاد أزمها كتر وكتر قال يمكن غلط وتزوج ولكن ولد ݣااااع؟! لقات راسها هزت صاك كتجمع حوايجها ودموووعها على خدها.. لبست جلابتها دارت الاسدال ديالها لبست صابووها مشات لماريووها هزت فلوس هزت تيليفونها وخرجت من تمااك عيات ترغبها مرت شيخها وااللو مقبلتش مشات من الجهة الأخرى فين مدوزش على القهوة وهي معااارفة لا فين تمشي لا فين تجي.. وكانت هادي اول مرة من بعد سنوااااااااااااااات تخرج بوحدها...)
ملاك: (ضرباتها الفيقة هزت تيليفونها كانت 8 ديال صباح مشات كتجري لطواليط مقررة تهبط تسري بيدو ديال لما 5 لتر هي للي تفكها، جربت لما لقاتو رجع عاد رتاحت خوات لما وعطرت بسانيكروا للي خوات نصو عاد خرجت من تماك كان لبرد رجعت لفراش مكمشة شعلت الكونكسيون بقات طالعة هابطة حزنت حيت خاصها ترجع للدار ولكن معندها ميدااار رجعت ناضت جمعت لفراش فاش نعست لبست بانطوفتها للي جات بيها من الدار معرفت واش تخرج ولا تسنى يوسف فين تخلي الساروت بغات تصوني على يوسف خافت تزيد تصدعو اكتر شافت كانت 8 ونص خاص تمشي لخدمتها باش المدير ميتقلقش منها ويديرلها خاطرها باش يشوفلها شي فوغماسيون ولا اي حاجة مهم تغبر من تماك صوناو على يوسف مجاوبش، خرجت من الدار مع كتسد لباب ضارت لقات وحدة تماك هابطة من درووج كتشووف فيها تفكرت كلام لاخر منين قال دار عزري يعني باينة شنو غيشوفو عليها والهضرة لي تقول عليها)
سلام
...: (طولاتها وهي كتعبر فيها من راسها لرجليها) وعليييكم السلام
ملاك: (غوبشت) ياك لباس
...: شوفي نتي واش لباس ولا لا
ملاك: قو*** علية حتى نتي عاود هاد صباح بقيتيلي غير نتي شنو باغية نتناتفو هاد صباح مرحباااا
...: (بقات كتشوف فيها حتى جابت ليها الظحكة) هههه
ملاك: خرا (تمات هابطة من تماك بالزربة ركبت طموبيلتها الدنيا عاامرة بحكم لافاك قريبة بزااف، من تماك شدات طريق لصفرو صونا عليها يوسف جاوبت دايرة سبيكر)
كنت صونيت عليك ومبغيتش نعاود نصوني خفت تكون ناعس
يوسف: فينك واش خرجتي؟!
ملاك: اه ماشية للخدمة تعطلت ومعرفت فين ندير سوارت غير سمحلي نكمل الخدمة ونجيبهم ليك
يوسف: خلينا من سوارت، نتي واش صبحتي مزيان!!!
ملاك: (كتسبو فخاطرها حيت هاد الاهتمام ديالو كان عاجبها ولكن هو اختار...) الحمد لله الحمد لله شكرا بزااف ايوسف وسمحلي على لبارح عارفة راسي كنت قاسحة شوييية معاك
يوسف: شوية؟!
ملاك: هههه شوية ديال بزااف انا هي هادي
يوسف؛ حلوة على قلبي، ومنين سمعت ظحيكة لباااس ولكن خاصك تعرفي حاجة انا ديما موجووود فوقما حبيتي تهضري تخوي قلييبك انا كاااين بحال كيف كنا فاللول
ملاك: مييغسي والله
يوسف: كنعنيييها املووكة انا موجود فأي وقت
ملاك: عارفة عارفة وراك وفيتي ݣااع معايا (زفرت) الساااعة الله وصاافي
يوسف: مهم بلا متعذبي راسك انا بلاتي ندوز عندك ناخد الساروت
ملاك: متعذبش راسك
يوسف: لا بالصح باغي نجي.. ونيت نشووف خديجة
ملاك: ههه ديرني طريق
يوسف: راك عشيرتي زعما نتي للي تفهميني
ملاك: هه واخا.. ياله باي باي داخلة على باراج.. (قطعت هو صديق زوييين ولكن كانت كتمنى ما كتر كانت باغية هاد الاهتمام ومعاه حتى الحب.. 40 دقيقة وصلت لصفرو حيت طريق عامرة وهي اصلا كتمشي بشوية، نيشان لخدمتها مهمهاش شنو لابسة بحكم مكاينش التيتيز غير
الشرف والمزوجين للي خدامين معاها...)
~~~~~~~~~~~
كانت خديجة خرجت تبعت مها للي رغبتها ترجع للدار وحتى زهرة رجعت حيت ملقات فين تمشي ومبغاتش تزيد بنتها مريم مشاااكلها جاتها قاسحة تجلس فدار نسيييب داخت معرفت شنو دييير وصلت لخبار لمريم للي عيات تهضر وكتحاول تهدن ماماها وكان اخر حل هو تجي عندها لصفروو اما باقي لبنات خباو عليهم الموضوع..
زهرة: (جا راجلها يهضر مخلاتلوووش غير للي نسات كتهضر وتقول مهضرتش وحتى هو مزاد معاها حتى حرف اول مرة يشوفوه حاني راسو واول مرة يشوفوها كتغوت عليه بحكم علاقة الاحترام والهبة للي كان دااير عاود خرج هو وباه وبقات هي كيهدنووها دخلت لبيتها عاود سدات عليها)
خديجة: الحمد لله بعدا مكانتش سيهام وولادها يتشفااو ويديو ما يعاودو
مي حلو: (حركت راسها باه.. كتخمم عاد منين يعرفو راه بغا يجيب الولد باش يعيش معاهم...)
اورطيغا: (فاق على صونيط الحاج للي وقف بحال شي عسكري خاصو يمشي على حساب شي كموند كبييير بغاه شي صاحبو فكرو ان كولشي خاص يكون مقاد وفالوقت وأكد عليه ان عندو بريم فهاد البريكول، ياله هابط فدروج تفكر الوراق والكاشي ديالو عندو فالدار صونا على يوسف باش يقول البنت للي جاب تفتحلو لباب حتى كيصدمو خدات سوارت وومشات لصفرو حيح ومخلا فيها غير للي نسا وتغدد عليها مخلي يوسف حشماان حيت عارف الحاج بحال كيتسنى اورطيغا غير يغلط باش يديرو العقوبات)
...: (طالعة فدروج هازة معاها باݣيط وميكة فيها حليب وباكية كيري وبيض سمعاتو كيصعصع) امالك عاود؟!!
اورطيغا: (ساااخط شاف فيها وهو كيفكر) عندك شي مطرقة فالدار
....: اه عندي علاش؟!
اورطيغا: جيبيها (جات تهضر وهو يتخضر عليها) جيبيها الله يسهل عليك من بعد ونهضرو
...: (طلعت بالزربة مشات جابتها دغيا هبطاتهالو باينة مكره مع عطاتهالو بدا كيعطي لباب الخشب حتى خلعها)
دابا يجيييو عندك ݣاع الجيران
(والو مكيجاوبش غير كيضرب بديك المطرقة فالوسط دلباب وجناب مدة متهنى حتى فرع لباب بقا كيزيد حتى بيدو حتى شخشخوو وتجرح فيدو دخل بالزربة بقا عندو ساروت ديال داك لبيت فين مخبع ورااقيه هزهم سد باب لبيت خرج من تماك كان لقا الجيران دلتحت طلعو يشوفو هاد زديح)
وفاااا بروووجلة ردي لبال مغنتعطلش
وفاء: واخا
اورطيغا: (للجيران) سمحونا على تبرزييط (تخطااهم وتم خارج بالزربة ركب طموبيلتو كيلعن ويسب فملاك ونيشان لبنسووودة..)
~~~~~~~~~~~
ملاك: (جاوبت مريم للي عرفتها جات فتاكسي كبير ودارت معاها تلاقا بيها فالمحطة استئذنت من المدير وخرجت بكري تسناتها غير جات حداها عنقتها) شتي المصيييبة للي دار بابا واخا مبقيت كنحمل نقولو بابا كرهتووو
مريم: نعلي الشيطان احبيبتي ماشي هضرة كتقال كولشي يتحل بالعقل
ملاك: اشمن عقل خلا وكان تشوفي ماما ماشي غير تكرهييه عذبها فحياتها
مريم: ملاك اه مامانا لحبيبة وكنبغيوها وتطلب عينينا نعطيوهالها ولكن احبيبة راه هداك كيبقى بابانا وعلينا بالاحتراام شنوما بغا يوقع
ملاك: منحتارمو ميحتارمني هو ماشي غذر غير ماما رله حتى حنا
مريم: معليش معليش نمشيو للدار ونهضرو ولكن عفاااا حبيبة متهضريش هاكا قدام ماما بلا منزيدوها حتى حنا بالصح حالتها مخاصهاش تسمع هاد الهضرة
ملاك: كنت باغيااك غير فوقاش تجي
مريم: لا حول ولاقوة الا بالله العلي العظيم (صاݣت بيها للدار) مبروك عليك الطموبيل
ملاك: مبقات فرحة لوااالو
مريم: هههه كترة الهم كظحك هادي نتي كتقولي هاكا شنو خليتي لماما؟!!
ملاك: غنخرجو من الدار ونكريو انا وياها فشي قنت ومنبقاوش مع واحد خاااين بحاالو...
مريم: ملاااك.. حسابلك انا مبقاش فية الحال للي بكييتو ولكن شنو غنديرو
ملاك: نخرجو نكريو انا وياها
مريم: وفنظرك ماما غتخرج
ملاك: (بزفرة) عارفة... عارفة...
مع وصلو للدار كان صقييير غير خديجة للي جالسة دايرة يدها على حنكها غير شافت لبنات ناضت كتسلم عليهم وتعاود ليهم على زهرة للي مخلات فباهم غير للي نسات لدرجة حتى بقا كيبكي باهم وخرجو الجد من الدار
ملاك: واخا نشوفو بعيني هداك يبكي؟! ياك ديما مبكينا ومزير معانا ومعها ودابا ناض مزوج عليها على غدر كدااير!!
مريم: (خرجت عينها فيهاا) ملاااااااك
ملاك: انا هادشي طلعلي فصحتي صافي نخرجو نكريو انا وياها نعيشو بعدا مرتاحين فراسنا وحنا ضايرين بيها غير ذياااابة
خديجة: (تقرست وشافت فختها ومكرهتش تسولها واش بالصح أذيييتك وكنتي كتبغي يوسف لهاد الدرجة!!!!)
مريم: ماما فبيتها
خديجة: امم.. اه معاها مي حلو هي للي كتكالميها شوية جاب الله سيهام مكيناااش
مريم: امم
ملاك: وتكون مالها غتخلعنا
خديجة: غير مبغيتهاش تشوف ماما هاكا
مريم: (مشات دقت فبيت مها) ماما انا مريم (رجعت دقت حلت ليها مرت حنينها دخلو وسدو لباب من موراهم)
ملاك: مدخلوكش معاهم؟!
خديجة: لا كنت بقيت كنتسناكم، نحطلك تغداي؟!
ملاك: (جلست منرفزة فوق كرسي) مفياااش
خديجة: فين بتي البارح!!
ملاك: راك كنتي دايرة معانا المباشر زعما معارفااش ولا خاصني نبقا نعطيك الاخبار بالتفصيل
خديجة: علاش كتعامليني هاكا املاك!!!
ملاك: (ناضت كتݣمݣم بكلام ممفهومش جبدت تيليفونها كان كيصوني لقاتو يوسف جاوبت كتلحنها ) وييي يوسف.. (طالعة لسطح)
اورطيغا: (شاعل) واش نتي بنادم ولا حيوااان علاش خديتي سوارت معاك
ملاك: (تصدمت رجعت كتشوف النمرة وشنو سمية للي مقيدة فيها ورجعت التيليفون لودنها) يوسف؟!
اورطيغا: دابا تحطي سواارت فينما كنتي جيبيهم ولا نجيك فينما كنتي وبربي ما نزݣلك هاد نهار
ملاك: (مستغربة) شكون نتا بعدا واشمن سوارت
اورطيغا: (ياله جا يجاوب وهي تهضر)
ملاك: مسينا على الله عاود!! نتا باينة فيك شي شفااار الله يغبر لمك شقف يا لكلب تفووو كترتو (قطعت مستغربة عاد تفكرت سوارت للي بقاو عندها والسيد كان من طرف يوسف خرجت عينها ولكن تكالمات بحجة انه ماشي من حقو يهضر معاها بديك الطريقة خلات حتى يعاود يصوني وتسمعهوملو مزياان..)
حمزة: بسسسسس
ملاك: (شافت فسطح منين جاي الصوت خنزرت كان قريب ليها)
حمزة: شنو واقع معاك؟!
ملاك: ديها فرااسك
حمزة: شنو واااقع؟!!
ملاك: خرا مبقيت كلقى حتى بلاصة نجلس فيها فخاااطري
(هبطت كتنݣر رجع صونا يوسف جاوبت ولكن مهضرتش غير كتصنت حتى تسمعو)
يوسف: الووو ملاك!!
ملاك: وييي يوسف شكون داك الكيدار للي هضر معايا قبيلة
يوسف: اورطيغا، قوليلي فينك نتي واش خرجتي من الخدمة؟؟
ملاك: اه فالدار
يوسف: غير سوارت محتاجهم السيد
ملاك: واش الدار كانت ديال داك العزي؟!!!
(سمعاتو كيسب وهو يتقطع الخط بقات كضور فعينها حتى رجع صونا عليها)
يوسف: ملاك الا صلاحلك خرجيلي سوارت انا ندوز ناخدهم
ملاك: صافي غير تقرب انا نخرج عندك من الجهة الأخرى...
مريم: دابا اماما للي وقع وقع نتي شنو بغيتي ديري شنو مريحك
زهرة: (دايرة زيف حياتي لواياااه فوق راسها ومربعة فوق النموسية) الديرة مديرت الله
مريم: ونعمة بالله انا ماشي كنقولك باباك مغلطش غلط وبزااااااف وندم عرفتي صباح كيهضر معايا وكيبكي
زهرة: (غير ساكتة ساهية فقنت)
مريم: عفاك اماما متبقايش هاكا ياله معايا للدار ترتاحي وفكري مزيااان
زهرة: (ببحة) سنيييت على عمري من شحاااااال هادي ابنتي
مريم: علاش كتقولي هاكا من قبل واش مكنتيش ݣاع مرتاحة واش مدار معاك حتى حاجة زوينة تشفع ليه
زهرة: دار ابنتي حوايج زوييينة ولكن هادي خلات كولشي قبيييح وحتى حاجة مبقات عندها معنى
مريم: والله اماما الا فاهماااك ولكن
زهرة: انا كيبانلي غنخرج ندير الميناج ومنبقاش هنا
مريم: وزعما حنا غنخليوك اماما الله يهديك شنو كتقولي هضري امرت حنيني
مي حلو: ابنتي راه حتى السيدة ماااتت الله يرحمها
زهرة: واش انا همي فالسيدة واش ماتت ولا حية انا همي فالولد
مريم: انا نربيه
زهرة: ورااجلك؟! ولا ولات عندكم عادة لبنات رشيد تخرجو على زواجكم؟!
مريم: ولوحوووه اماما شنو ذنبو هو؟!
زهرة: والا بقا فيك اختي انا ولا هو
مريم: الله يهديك اماما واش كاين شي واحد يجي بلاصتتك ولا حتى فظفرك
(تسمع الدقان حلات مي حلو كانت ملاك)
سيري املاك من بعد
ملاك: (دخلت مشات عنقت مها) كيف بقيتي؟!
زهرة: الحمد لله ابنتي فين بتي لبارح
ملاك: فلوطيل
زهرة: (حركت راسها باه بقات كتلعب ليها فشعرها حيت تكات على حجرها حتى دخل رشيد حيت كان لباب محلول ضورت وجهها حيت ولات عادة عندها تحتارمو قدام الزايد) سيرو خرجو انا باغية نتكا شوية
رشيد: زهرة قدام بناتك ومرت با نعلي الشيطان
ملاك: مالها هي للي ناضت تزوجات من موراااك
مريم: ملاااااك
رشيد: نتي عليك بالاحتراام ومدخليش راسك فهادشي للي كبير عليك وانا راه باك متنسايش هادشي
زهرة: ملاك!! بنتي!!!!
ملاك: (تنادم معاها الحال ولكن مكتجي توزن الكلمة حتى كتلقاها خرجت وهادي مشكلتنا فاش كتكون معصبة)
رشيد: زهرة الله يرضي عليك (بترجي...)
زهرة: غدا غنهز حوايجي نمشي فحالي مبقات عشرة بينا ارشيد
رشيد: (بقا غير كيشوف فيها) انا والله مبغيتك تربي الولد
ملاك: (نقزت) اشمن ولد؟!!
مريم: خرجي نتي
ملاك: واش والد معاها؟! هههه اااه قول مراضيش بينا حيت حنا غير بنات
(بقات كدفعها مريم حتى خرجتها وهي مزال كتهضر)
باغي لولاد صحة على ظهر ماما مسكينة للي دارت على قبلك شحال من حاجة
رشيد: (بتعصب) انا كنت خااايف عليييكم واش انا دااايم ليكم
ملاك: والولد هو للي دايم لينا ابابا؟!! خايف علينا ونسيتي راه رزق بيد الله
مريم: (بغات تطرشها) سكتييييييي
ملاك: (بعصبية) منسكتش خااااايف علينا لهاد الدرجة كتب ليها داكشي للي خايفو يتشرك ماشي تقهرها هاكاااك
مريم: غتسكتي ولا نضربك
ملاك: (كانت غصة فحلقها خرجت من تماااك صونا عليها يوسف جاوبت بعصبية وصوتها كيرجف بلبكى وهي خارجة) شنووو!! (ضارت شافت فخديجة)
هاهي خديجة غتجيب ليك سوارت صوني عليها
(قطعت وتمات خارجة تابعاها مريم زربت ممسوقاش ليها خرجت من الدار لاخر للي كان يوسف بطموبيلتو كيتسنى غير قشعها خرج من الطموبيل تابعها حتى شدها من ذراعها... بعصبية ودموعها على خدها)
طلللللق منييييي
يوسف: ششش (هز يدو لسما) تكلماااي شنو وااقع مالكي؟!
ملاك: (بقات غير واقفة كتبكي حتى عنقها وهي غير واقفة بحال شي خشبة كتبكي رخف منها دغيا ورجع داير يدو على كتافها كيزعزعها باش تهز راسها فيه تهضر حتى وقفت خديجة حداهم للي شافت كولشي.. بعياء) صافي نمشي فحالي
يوسف: معندك فين تمشي طلعي الطموبيل انا جاي
ملاك: (كانت باغية غير فين تهرب مشات الطموبيل وهي تقشع اورطيغا تمااك وتمت زاربة دخلت للحومة حتى شدها من ذراعا شافت فيه)
ملاك: حمزة!!!
حمزة: (معصب) شكون هداك؟!!
ملاك: (بقات غير كتشوف فيه حتى من دموعها نشفو.. بعياء) شنو
حمزة: واا شكون داك خينا (رجع شاف فيه كانت ختها واقفة معاه ولكن ماشي وقفة ديال جوج غرباء) شكون هداك؟!
ملاك: ونتا سوق مك
حمزة: (جرها لبلاصة مظلمة حيت سمعو هضرة ديال بنات قرااب وقف مقرب ليها وحتى هي ستحلات ريحتو اصلا كتحمقها ريحة درجال، بقات جامدة هو كيشوف فالحيط للي اونفاص معاه وهي تحت منو هازة راسها فيه) ملاك شكون هداك للي كنتي معاه
ملاك: خطيب ختي خديجة
حمزة: (حنا راسو كيشوف فيها) والتعنيقة شنو محلهااا!!!
ملاك: عادي حتى نتا عنقتني واحد المرة ومكان حتى حاجة بيناتنا زعما حلال عليك وحرام عليه هو
حمزة: (ضرب يدو مع الحيط كانت اول ردة فعل عصبية من بعد السبان ديالها ليه) نصبر لكووولشي منك حيت أنا للي كنت شماتة معاك ولكن هاد الهضرة نقتلك عليها لاش معنقة داك خينا!!!
ملاك: (بتنهيدة وكانت غير مبالية) غير قتلني عادي
حمزة: (عض على شنافتو) مكنتيش هاكا!! تعنيقة ݣاع املاك!!!
ملاك: واا سير عند مراتك احمزة وقيلني عليك نعنق شكون ما بغيييت
حمزة: ا لا انا كنطلق أميمة حيت مبغيتهاش ومعرفتش نبغيها، وحدة للي معششالي فراسي وفقلبي هي نتي مكنت بغيت نقولك والو حتى نسالي الاجراءات معاها (بقات كتشوف فيه) ديك الساعة غرجعك لية
ملاك: (ميقت فيه) وشكون قالك انا غرضى رجع ليك كتحلم وااقلة!!
حمزة: انا عااارف، حيت طال زمان ولا قصااار غتعرفي شحال بغيييتك وكنت حمار منين ضيعتك
ملاك: (بقات غير ساكتة بعد منها خطوة) بعد
حمزة: (رجع بخطوة اللور) سيري للدار ماشي من عادتك تبقاي فزناقي فهاد الوقت وتعانقي
ملاك: اولا ديها فراسك وماشي شغلك فية تانيا نعنق شكون ما بغيت تالتا طلق مطلقش انا مستحيل نرجع ليك.. (فلحظة نسات كولشي واش تفرح ولا شنو دير تخلطت عندها الدعوة طلت على خديجة لقاتها مشات من الدرب لاخر للي كيخرج للدار جات ماشية وهو يشدها من ذراعها)
حمزة: سمحيلي املاك
ملاك: (جبدت ذراعها ولكن بهدوء ومشات فحالها حاسة بخطواتو من موراها فلحظة تبسمت حست بيه بالصح كيبغيها ومنساهاش بدات ديك الطاقة السلبية كتمشي شوية بشوية غير قربت للدار وقفت والغصة رجعت ليها)
حمزة: (بقا مدة واقف) مغدخليش خلاص؟!
ملاك: (تبسمت ومضارتش عندو حدها جاوباتو)
دخل سوق راسك
(دخلت للدار زاربة باش متفضحهاش الابتسامة كان صقييير باينة باها خرج طلعت السطح قبل ميشوفها شي واحد قربت لجهة سطحهم كتسمع فمو كتهضر معاه يهز عشاه حيت خدام الليل.. رجعت لبلاصة فين كتجلس واش تفكر فيه ولا فحريرتهم ولكن فضلت موضووع مها مزال متقبلت موضوع زواج باها حتى زادهم بالولد للي تولد...)
اورطيغا: واش بعقلك تتقلب على برهوشة فهاد الليل صافي خلي **** ضبر ل*** وياله نمشيييو
يوسف: (جاه ميساج هز تيليفونو كانت خديجة علماتو راه ملاك فالدار كانت فسطح، رجع التيليفون لقجر) بقات فيا ديك الحالة للي كانت فيها فشكل
اورطيغا: بانلي اخويا يوسف خاصك تعرف بعدا نتا شنو باغي واش هي ولا ختها؟!
يوسف: (هز حاجبو وشاف فيه) بانلي لحشيش دار المزيان معاك
اورطيغا: ههه حمار فطريق وغيتنكرى من هادشي للي نتا فيه
يوسف: سمع (شدو طريق لفاس) ملاك عندي عزييييزة وغالية بحال شكل غيثة عاد عندها واحد العقل زوييين بحال شي صديق مقرب عندك بزااف
اورطيغا: ههه لا باينة عقل زوين (هز سوارت كيلعب بيهم) جبتينا فااابور وانا اصلا مبدل الباب كامل
يوسف: (تفكر خديجة للي شحال مشافهاش زادت صحاحت وزيااانت كان باغي يشووفها يجلس معاها ويهضرو باغي بكتاشف كفاش كتفكر وكتهضر، وهو يلسق اورطيغا يجيو سوارت واخا اصلا ممحتاجينهومش)
اورطيغا: اجي بعدا وبغاولك الدار؟!!!! زعما قلتيلهم
يوسف: قلت ليهم بغيت نتزوج ولكن مزال مقلت التفاصيل
اورطيغا: غيبغيييو ان شاء الله اكترية الوالدة (بقاو ساكتين بجوج حتى تشاوفو وطرطقو بالظحك)
ههههه داخل فحرب اخاااي يووسف مع لالة الغالية
يوسف: هه هادي هي حلاوة الدنيا تقاااتل على شي حاجة ونتا عارف ديك الإنسانة تستاهل وباغيها
اورطيغا: البونتة ولا ختها!!! (دار مخنزر فيه) هههه مكتهضمليييش صراااحة
يوسف: بلعكس ضريييفة بزااف وعندها نيشان نيشان وتتوقف مع الواااحد
اورطيغا: اممم ههه مهم حطني انا فالسعادة
يوسف: متمشيش لدارك
اورطيغا: هاديك تيديني ليها نعاس اما هادي تيديني ليها التوتوووز تيتسناني فيها
يوسف: وااايلي ولالة مينا الا جات ليها على غفلة ولا الحاج؟!
اورطيغا: عارف وقتهم الوالدة تتعلمني اصلا.. باش منعاود لا نتحرج لا انا لا هوما
(حطو ولاخر كمل طريقو وفنفس الوقت كيهضر مع خديجة فطريق كتعاود ليه شنو وقع..)
~~~~~~~~~~~
جالسة مريم خديجة وملاك مربعة يدها فالقنت ممجمعاش معاهم وهوما كيهضرو ابيل فيديو مع نعيمة وفاطمة (ختها للي فكندا) كيهضرو فالمشكل هو باهم عزييز عليهم ولكن هادشي للي دار معجبهمش وبقات فيهم مهم واكترية كيعرفو القصة مزياااااان وباش ضحات معاه
مريم: ماما معندها فين تمشي ميمكنش على شحال صبرات وفالتالي تخرج من هاد الدار خاص تضمن حقها
خديجة: انا لوكان تجي على هضرتي تصبر متخرجش ياك داك الولد ماتلو مو نربيوه راه كيبقى خونا
ملاك: اشريييفة راه راجلك لقيته مزوج عليك وجايب الضرة ونضتي متينا فالطرقان تبكي وتنوحي حتى طلقتيه ولا نتي بنادم كتحسي وماما خشبة
خديجة: (تجرحت) ملاك شوفي شنو كتقولي
ملاك: كنقول للي كاين ولا نسيتي وقفتها معاك حتى هي
خديجة: منسييتش ولكن ماما راه بابا كيبغيها وهو مقادرش يعيش بلا بيها واش مكتشوفيهش شحال بكى وندم اه بقات فية وبزاااف وملقيت ليها جهد وحتى هو الله يسمحليييه شنو نديرو لوحوووه!!!
مريم: مالكم نتوما وليتو بحال المش والفار
ملاك: حيت معنديش مع المنافقين (وقفت وخرجت)
خديجة: لا حول ولا قوه الا بالله العلي مهم خليونا فهضرتنا...
دازت أيام زهرة بقات على موقفها ورشيد معياااش من طليب ورغيب مريم رجعت لدارها ومها مابغاتش تمشي معاها، ملاك مكتفرقش على مها وكلمة فمها الا بغيتي تخرجي انا قادة بيك ونخدم عليك ونهزك فوق كتافي..
زهرة: (كضحكها وهي كتعمرها وتحاول تقنعها باش يخرجو من الدار) اديييك فليفلة مال مك على هاد توسويس
ملاك: وشنو تقبلي تربي ولد من ضرتك تقبليها على راسك ازهرة!!!
زهرة: (بتنهيدة) ملاك باكم راه فكر فيكم وخاااف عليكم
ملاك: يمشي يزمر وكان خاف يكتب لينا كولشي
زهرة: سيري خرجي اديك السوسة
ملاك: هانتي طلقي راه يخرجلك بزااف دلفلوس نبيع الطموبيل ونحرݣو انا وياك لبرا
زهرة: هههه ايييه زيدي
ملاك: وانا كنقلب على حل معاك نتي قابلي الدار وانا نخرج نخدم عليك ازين ونضبرو على شي ݣور مكاين غير زعورية والعين زوورق
زهرة: ههه الحل ابنتي هو تخرجي هاد السوووق هداك راه باااك عرفتي وكان با (سكتت سارطة لسانها) باك كيبغيك بزااف ابنتي نتي وخوتاتك أنا للي كنعرفو منين صبر لهضرتك وهضرتي وردها بكا على عينييه راه كيبغيييكم
ملاك: (بتنهيدة) بقا فيا الحال بزاااف اماما مبقيتش كنقد نشوف فيه كنحس بيه خااني كتر مخانك نتي
زهرة: هههه والله مكاين للي كيفوج علية قدك سمعي ابنتي انا معندي فين نطلق مكتاابي نخرج من هاد الدار ميتة نيشان لقبري حيت معندي فين نمشي وحتى لخرووج منقدرش
ملاك: زمر نتي عاود علاش كتقولي هاكا
زهرة: (ضرباتها لكتفها) طليييه شتك زغتي لا!!!
ملاك: ضبري رااسك انا بعدا بقاتلي شي 2 سيمانات غنمشي لفاس ديبلاصمووو انا علمتك
زهرة: معندي منقوولك ابنتي الله يسهل عليك ولكن شاوري باباك بعدا ولا غنتقلق منك انا بزااف وبراكة من داك الهضرة الخاوية والسم للي كتسمعييه حيت هاد المرة غنووضلك انا
ملاك: هانتي بقى اقتراح واحد ياله معايا فاش نكون ماشية لفاس ياله معايا، أمنها تهناي من ديك زمر ديال مرت عمي مغتاخديش راحتك هنا ومنها ترتاحي وتفكري على خاطرك
زهرة: (حلت لمجر للي حداها جبدت وراق حطاتهم فوق النموسية) باك كتبلي الارض ديال الزيتون للي عندو فلبلاد
ملاك: (هزت لوراق للي كاتب ليها بيع وشراء 5 هكتار وفيها حتى دار) هااااااااه وحنا؟!
زهرة: ومالك مك نتي
ملاك: وشنو طالعلي انا من هادشي كامل!!!
زهرة: ههه (جات ضربها وهربت ليها) الله يمسخك يا الكلبة دابا نتي هي ضرتي نيشان
ملاك: هههه وطلعتي بخبييييزتك الزعرة هاي هاي على الارض انا واكلني قلبي عليك ونتي من مورايا كديري فمستقباالك
زهرة: هههه
ملاك: بصحتك الآلة وووو هانتي طلعتي لباس عليك شوفي بيعي كولشي منحرݣوش لبرا نمشيو بوراقنا حسن وبعزنا
زهرة: سيري تمشي.. (بقاو مجمعين حيت ملاك كتهرب تبقى مع خديجة للي ولات عاطياها الحب والغرام مع يوسف وقدامها)
~~~~~~~~~
يوسف: (بقا شحال كيوجد الهضرة ففمو وهوما كيتعشاو مجموعين) حم
(حط المعلقة حدا الطبسيل وهو موشوار مسح فمو ورجع مطوي شاف بين باه ومو)
انا قررت نتزوج
(كولشي شاف فيه)
غيثة: يااااااي وشكون هاد سعيدة الحظ
ام يوسف: اسكت نتي.. (هزت حاجبها) اوا اولدي غير جيتي ونويتي مقلتيلي واالو
يوسف: هانا تنقولها الوالدة انا بغيتكم كاملين تكونو مجموعين ونقولها
أب يوسف: الله يسخر اولدي هدا هو نهار لكبير عندنا
يوسف: امين الواليد شي 10 ايام هكاك ونمشيو عندهم نخطبو نرسييو معاهم وشي سيمانة ندير لاكط
ام يوسف: اوا دير لاكط نيشان علاش تخطب ݣاع
يوسف: واا هو مكرهتش (كولشي ظحك) ولكن خاص نديرو صواب ونكبرو بعروستي
اخ يوسف: هدا هو نهار لكبير اخويا نشوفو وليداتك حتى نتا
غيثة: انا عندي ميعاد هدا سر معارفو حد اسمها ملاك الآلة الغالية.. (خرج يوسف فيها عينو) ههه ماماااا
ام يوسف: الغمة بعدي مني حتى نتي (لاحت السربيتة والمعالقة)
بنااااقص من شي عشا
(طلعت ويوسف وباه كيعيطو ليها واالو.. يوسف بقى كيضور عينو هدا عاد مزال معرفت والو...)
ملاك: (طلعت لسطح لقات حمزة تماك وحتى هي كانت عارفاه كاين جات هابطة منفخة)
حمزة: سسسسس
ملاك: (ضارت جامعة الابتسامة) مالناااا
حمزة: اجي
ملاك: (ربعت يدها وتكات على الحيط) واش انا حتى فسطحنا مقادرة نجلس فخاطري بزااف هادشي
حمزة: (تبسم ووربع فوق الحيط كيشوف فيها بحب) نتعذب انا علاش تعذبي نتي
ملاك: (عيباتو مخرجة سنادرها) أنننننننننن وسيييييير تزمر
حمزة: (نطقها بلا صوت) توحشتك
ملاك: (بقات كتشووف فيه وتمات باغية تهبط شادة الابتسامة بصعووووبة)
حمزة: ملاك جااوبيني فالتيليفون (شافها كالعادة ممسوقاش هبطت تبسم وبقا شحااال تماك...)
~~~~~~~~~~~
خديجة: ملاك اجي (مشات عندها) خالتي نجية مع ماما
ملاك: وعلاش؟!
خديجة؛ معرفتش دقت سولت على ماما نيشان ودخلت لبيتها وسدو عليهم لباب
ملاك: اممم (بقات كدور عينها واش جا يخطبها عااود ولكن هي مزال مسمحااتو بقات غير كتشوف.. بغات تأكد من قضية الإجراءات ديال طلاق واش بالصح بداها)
سهام: توما ݣولو ليا مال الدار تݣلبت ساسها على علاها مبقيت نعرف فيها والو
خديجة: اش باغيا تعرفي امرت عمي عاد جيتي خليك غير تسخني بلاصتك (ملاك مشات وخلاتهم كتخرب فتيليفونها)
سهام: من نهار جيت مك غير سادة عليها حتى من الماكلة مكتاكلهاش معانا شي مرات مكنشوفهاش باليوماين!!!!
خديجة: راه قلنا ليك امرت عمي مريضة وطبيب قالها ترتاح
سهام: مريضة!!!!! ݣاع كنمرضو ومكتشدوووش علينا فبيتنا بحال هاك
خديجة : ياك شغل قاسماه معاك امرت عمي
سهام: اماااشي على شقا واش هو غيغلبني انا نهزكم كااااملين ومنهضرش (خديجة هزت حاجبها فيها) ولكن غير تبااان واش انا من نهار جيت مجمعت معاها موالو توحشناها
خديجة: ههه حتى هي توحشاتك طبيب قالها متحركش من بلاصتها غير تبرا راه غتخرج
سهام: سبحال الله مريضة علية انا، ومرت قربيش دخلت عندها
خديجة: حقا خاصني نقاد لعشا (مشات للكوزينة حيت كما العادة غتبغي تجبد ليها لسانها علاش وكفاش!!
تمت داخلة ملاك) هاي هاي لالة ملاك فالكوزينة
ملاك: معرفتيش علاش بغاتها ديك العوجة دنجية
خديجة: معرفتش
ملاك: (خرجت ديبلوكات حمزة كتفكر تصوني ولا لا فالتالي حطاتو ممبلوكياهش.. صوناو عليها غيثة) شنو بغات هادي عاود
خديجة: شكون؟؟!
ملاك: الوو غيثة صاڤا!!.. الحمد لله.. نتي مزيان... هههه اش كتقولي.. (خديجة حطت الموس كتشوف عارفاها من يوسف) هههه واش هو قال انا؟!... لا ماشي انا... والله ما انا الآلة انا من اللول قلت يوسف غير ami وصافي.. والله هههه ظحكتيني علاش متقتيش.. اممم معليش والله هانية.. وصراحة عارفة ولكن هو مزال مقالي قولي باش نقولك... يمكن خلاها ليكم مفاجئة.. واخا باي باي.. (قطعت جمعت الظحكة معوجة فمها)
خديجة: شنو بغاتك
ملاك: حتى هي كان كيحساب ليها يوسف معايا (تبسمت باستهزاء) السيدة فرحانة وكتزغرت
خديجة: حم يمكن منين كانت كتشوفك معاه فاللول علاش مقلتيلهاش ختي هي للي بغاها ماشي نتي؟؟
ملاك: (بدون شعور تبسمت باستهزاء طلعاتها وهبطاتها وخرجت من الكوزينة ولكن جاتها مستفزة بهاد السؤال...)
يوسف: (رجع من الخدمة نيشان لدارهم لقا غيثة فالجردة كانت مع شي صحاباتها جالسين مجمعين غير شافتو ناضت كتجري لعندو عنقاتو وكالعادة بدلع وغنج) الزين فين الوالدة!!
غيثة: الفوق من لبارح مخرجت من لبيت هههه قولي واش ماشي ملاك هي لعروسة؟!
يوسف: لا
غيثة: وشكون؟! عرفتي تحشمت عيطت ليها تنبارك عليها وهي وتقولي ماشي انا وظحك وانا ونقولها نوون نتي
يوسف: (خرج عينو فيها) واش حمقة؟!
غيثة: ومعرفتش حسابلي هي حيت نتوما شحاال من شهر ونتوما ensemble
يوسف: مغديريش عقلك اغيثة (تم ماشي وتبعاتو شداتو فذراعو) شنو
غيثة: وااا قولي شكوون زعما رجعتي لياقوت؟!! انا عارفااك مستحيل نرجع ليها وأصلا مبقاتش هنا
يوسف: خت ملاك هي لعروسة (تم ماشي وهي بقات مستغربة معرفتهاش، ختها!!!! تفكرت هي كانت معاهم فايفران وحتى فالعرس للي دار فهرمومو ولكن معقلتش عليها بزااف تمات ماشية عند لبنات بملامح مستغربة وبزااف)
...: امدرا عرفتي شكون سعيدة الحظ
غيثة: قالي ختها دملاك
...: واات!! اشنو تيخربق هاد خوك؟! كان مع هاديك وغيتزوج ختها
غيثة: وكان كانو بزوج مكانتش غتهضر معايا لبارح هاكاك وهي كظحك بلعكس كان عاجبها الحال، والله براسي مفاهمت
....2: انا عقلت عليها حتى هي دايرة الزيف، هههه مال ذووق يوسف هاد الايام
غيثة: براسي مفهمتش عقلي وقف معقلتش عليها انا كان تيحسابلي ملاك
....1: اودي لا هاديك لا ختها فين يبانو قدام ياقووت
غيثة: لا عفاااك بلا مقارنة مدام غتولي مرت خويا منبغيكش تطيحي منها هو أدرى، يوسف ماشي شي واحد صغيير باش مغيعرفش ولا علاش كان غيتفارق مع ياقووت غير الا لقا عليها شي حاجة معجباتوش
....1: باااز بحال مكنتوش صحابات نتي وياها
غيثة: اه وغتبقى صاحبتي ولكن خويا بوحدو وهي بووحدها متفاهموش الله يعاون لكل واحد
...2: (كتخرب فتيليفونها) كانت عندي صورتها فديك اللقطة فاش بدات تتلوز فعرس إلهام.. اممم وانا نفهم خوك باغي طرووفة ههه
...1: هه وريني ورييينيي نشوفها (جبداتو بقاو كيتفرجو فيها كان فيديو، ولكن عاطية بظهر) امممم غير شيييخة وصافي شلحة ياااك!!
غيثة: عطيني نشوف (شدت التيليفون صيفطاتو ليها فالواتس ومسحاتو ليها قلبت واش مزال باقي فشي قنت)
...1: شنو تديري؟!
غيثة: (قلبت واش كيدخلو عندها واخا كتمسحهم رجعت مسحت لفيديو حتى من Google photos ورداتو ليها) راني قلت ليك اصاحبتي راها غتولي مرت خاااي عرفتي الا هو ساق الخبار وعرف شنو عندك فالتيليفون فين توصلو اكترية راه رجع عصبي بزااف
...1: (عوجت فمها) اممم.. قوليلي اورطيغا مبقاش بان
غيثة: وعلاش تتسوليني انا
...2: هههه عاود تتنكري، راه كولشي عايق بيك طايحة فيه غير هو الزين راه مع واحد البنت تنعرفها
....1: للي خدامة فسونتر دابيل؟!
....2: هييييااااااااا باش عرفتيها!!
....1: لبارح هو حط plat فالانستغرام ديالو وحتى هي حطاتو فسطوري ديالها شي 5 دقايق مسحاتو
...2: التسليييييم منك ههه باينة كانت بايتة معاه
غيثة: (كتحاول متبينش واخا ملامحها تغيرو) علامن تتهضرو؟!
...1: عقلتي لبنت للي كانت فالعرس معانا فهرمومو للي بقاو كيظحكو قالو بحال شي ݣاورية ديك طويلة
غيثة: اممم
...1: اوا هي للي معاه
غيثة: مزيان.. شنو بانلكم نخرجو قنطت فالدار...
يوسف: (كيتسنى مو تخرج من الدوش جات لعندو نااافخة والشوفة ناقصة فيه)
بالصحة والراحة لالة الغالية
(مخلاتوش يبوس ليها راسها)
ههه راني بغيت غير نتزوج ماشي غنهرب
ام يوسف: شويني فيييك على تهرب واخا تمشي لفينما بغيتي وراك ورااك
يوسف: هه وشنو مقلقك؟!
ام يوسف: هاد الموضوع تجي تشاور معايا فيه انا اللولة نعرف اصل لبنت ومفصلها عاد تلوحو فالطبلة
يوسف: اممم وشنو اخر
ام يوسف: نهضر معاها نعرف كيف دايرة وكفاش تتفكر راه ماشي أي وحدة تستاهلك وتستاهل دخل لافامي ديالنا
يوسف: هوما عائلة محافظة معندكش كفاش ديري تهضري معاها حتى تصويرتها معنديش باش نوريهالك
ام يوسف: ياك!
يوسف: اه.. نهار الخطوبة ان نمشي شاء الله وتشوفيها وتهضري معاها كيف ما بغيتي
ام يوسف: دابا انا نبقى هاكا حتى الخطوبة واااخ ولكن شنو خدامة وشكون هي وبنت من وشنو كيعمل باها ومها وشنو وزنهم فهاد لبلاد
يوسف: هي مخداماش جالسة فالدار وهي بنت صفرو هادشي للي تنعرف عليها وبنت مأدبة وضريفة وماشية جنب الحيط
ام يوسف: صفرو!! هي شلحة؟!
يوسف: اه
ام يوسف: وفاين عرفتها؟!
يوسف: عرفتها صدفة وصافي
ام يوسف: لدابا معطيتنيش كلمة مقادة بنت من هي باها شنو خدام شنو عندهم وشنو لييهم
يوسف: عندهم الله ناس محتارمين مربينين بناتهم (جات تهضر ) لبنت رزينة وعجباتني وجاتني على الݣانة باها عندو قهوة هادشي لي عارف عليهم
ام يوسف: وشنو دابا انا باغيني نشري الحوت فلبحر
يوسف: هههه راه أنا للي غنتزوج ومغنشريش الحوت فالبحر غنشري بنادمة معاها راحة بالي ونستااقر وندير وليدات نخلي مرااا فالدار تربيلي ولادي وتهلا فية هادشي للي مهم عندي
ام يوسف: (بقات كتشوف فيه) لا انا هادشي مقابلاهش
يوسف: منتزوجش الوالدة؟!
ام يوسف: تزوج ولكن انا هادي معارفة والو عليها اصلها وفصلها ياقوت كنت تنعرف عليها كولشي السادة والفادة (شافت الابتسامة ديالو كتمشي) جيبها غير شي نهار غير شي سوييعة بعدا نشووفها وندي ونجيب معاها فالهضرة انا احبيبي قلبي عليك داكشي باش بغيييتك تختار للي تستاهلك
يوسف: انا عطيت الكلمة لباها السيمانة جاية غنمشيو ان شاء الله وانا عارفك مغتخلينيش بووحدي
ام يوسف: راني هضرت اولدي جيبها بعدا
يوسف: راه مغتجيش انا براسي متنشوفهاش.. اه واحد النقطة مهمّة انا كنآمن بالمكاتيب ولكن غتجيني قاسحة منك الا مشيتي معايا ومفرحتيش لية وحتى الا معجباتكش شي حاجة حتى نخرجو من عندهم عاد قوليهالي لبنت انا باغيها (وقف)
انا نقضي شي شغل ورجع غدا ان شاء الله نخرجو ناخدو صواب الخطوبة وبغيتك تكبري بيها... (باس ليها راسها وتم خاارج مخليها دااايخة تالفة ومفقوووووووووووصة...)
اورطيغا: (صونات ليه مو باش يجي يتعشا ضرووري مع العائلة كمل خدمتو طلع للدار حيت المحال قريب ليها دوش حايد ريحة لحم ودمايات لبس حوايجو للي أغلبية كيلبس سبوور تعطر ومشا للمدينة القديمة دخل كيبانلو العشا ماشي غير مع الدار تقريبا كاينة العائلة فيهم للي كيبغيه وللي كيكرهوو كما هو كيحس... بقا كيقلب على مو عارف القنت ديالها جالسة حدا الصينية ديال اتاي يعني مضطر يسلم على ديك القشلة كاااملة) الوالدة واحد دقيقة
مفتاحة: جلسو وهضرو هنا حدانا ماشي غير يسلم ويهرب
مينا: انا جايااا اولدي
مفتاحة: (بقات غير كتخنزر الوحيدة للي متشداتش ليها من بين عريسات خوتها وعرايسات العائلة كاملة والوحدة للي كتغيير منها كفاش كيبغيها خوها وحتى ولدها...) اتبقيييييييستر
اورطيغا: (كيهضرو بشوية حدا النافورة للي كاينة الوسط) مقلتليش كاين هادشي كامل
مينا: هادو راه عائلتك
اورطيغا: اشمن عائلة انا عائلتي هي نتي (خرجت عينها فيه) ووووالحاج وشفيق وشي حاجة...
مينا: شفتك بحلا مبقيتش تبغي تجي هنا ياك لباس؟!
اورطيغا: ممساليش الوالدة ممساليش (بانتلو شي تيتيزة بقا مسكاني فيها وكانت مور مو نيت باش متعيقش) شكون كاين هنا؟!
مينا: ولاد عم الحاج جاو من فرنسا
اورطيغا: اممم مزيان
مينا: شوف الحاج كيسول عليك بزااف ومعجبوش الحال منين قطعتي رجل
اورطيغا: صافي صافي انا غنبقى نتعشى عاد نمشي
مينا: اوا هكاك الله يرضي عليك، انا نتكلم لعمتك... (مشات مزروبة لداخل مباغياش تفوتها شي هضرة اما هو بمشيتو المخضرة للي مايلة "الهيب هوب" ماشي غير بتقاالة عندها وشوفاتو عليها وهي كتبسم وصل عندها نيشان سلم عليها بليبيز واخا مكيعرفهاش يمكن يكون شافها فصغر شي 2 دلمرات ولا 3 حيت مكيجيوش بزاف ومنين كيجيو هو مكيكونش تماك...)
اورطيغا: زين
ليلى: (ظحكها دارت شعرها من مور ودنيها) هه صاڤا!!
اورطيغا: (معندوووش مع الفرونسي) الحمد لله، معقلتيش علية؟!
ليلى: لأحححح
اورطيغا: اااححح اقلبي.. (بقات كتفرنس كيشوف فيها متبسم دايرة بحال شي ݣاورية زعورية والعنين زورق والطولة تفكر هاديك للي غتكون كتسنااه، غير هادي عندها هادشي طبيعي ولوخرا خادمة على راسها ولكن عندو مبدأ فراسو للي واجد هو هداك ميضيعش النعمة) اجي نوريك لاطيراس لفوق
ليلى: هه ديجا شفتو
اورطيغا: ماشي بحال كيف غتشوفيه معايا
ليلى: ههه اوكي (طلعو لسطح مكرهش يقولها انا نسبق ونتي اجي من موريا باش مبتبعولوش العين عاود ولكن.. دار يدو من مور ظهرها كيوريها بصبعو تبسمت لهاد الخفة كاملة لي فيه ضارت شافت فيه وكانو مقربين) معقلتش عليك
اورطيغا: (قريب منها) اورطيغا ونتي
ليلى: (باستغراب) اورطيغا!! سميتك هاكا
اورطيغا: انا نعاودهالك ازين بحال شي خرافة
ليلى: ههه
اورطيغا: هاد لبلان ديال اورطيغا واخا قلييل فين تنشرحو لشي واحد، فاش كنت صغير كنت باغي نحرݣ كنت طايش شوية درنا انا ولاد الحومة نطلعو لفنيدق مشينا لحدا باب سبتة بقينا عاصرين تماك تنتسناو شي دخلة ولا شي حاجة لسقو فيها وانا قاااني على واحد معاه شي صاحبو ولا معرفت حتى عرفت سميتو واحد شوية مشيت شديت فيد لݣاوري وهو بقا كيغوت علية وانا ت papi papi
(ظحك وهو كيتفكر الواقعة وحتى هي)
جاو البوليس ديالنا مفهمووش انا كنت تنقرى سبليونية شوية درت راسي ماشي مغربي وتنبكي ونطق شي كليمات والراجل تيقول ماشي ولدي تجمعو علينا داونا لبوليس عصرووني قلتلهم سميتي اورطيغا انا ولد هاد مع تصرفيقة اللولة ݣريت فكولشي وقلبتها عربية
ليلى: هههه
اورطيغا: صافي عطيتهم نمرة الوالدة جاو من فاس خداوني بقاو تيظحكو علية وتيعيطولي اورطيغا مطلعينها علية هكاك صحابي فاش عاودت ليهم لبلان وبقات علية سميت اورطيغا وحتى انا ولفتها
ليلى: هههه وعلاش كنتي باغي تمشي لاوروبا
اورطيغا: (دار يدو من مور ظهرها كيلعب بصبعو حيت مدارات حتى ردة فعلها انها مبغياش) ومزال باغي ولكن غير مسافرة
ليلى: امممم
اورطيغا؛ مهم شنو سميت الزين بعدا
ليلى: ليلى
اورطيغا: العربية عندك نقية
ليلى: ههه ضرووري هي باش تنهضرو فالدار وفلقرايا ضروري تنتبعو اللغة ديالهم
اورطيغا: مزياان.. (بقاو مجمعين تحت انظار للي كانت بعيييدة حضيااهم يدو مكيرساوش وحتى هي ستحلاتها خدا نمرتها وهبطو حيت ضرووري يمشي عند الحاج... دخل عندو المجمع رجال ومعندوش مع هاد جماعة جلس حدااه عطاه الرابور ديال الخدمة كما ديما حاول يتسلت ومخلاهش كولشي تجمع تعشااو وكيحس براسو بحال شي عسكري خاصو غير يدير الواجب عكس ولادو للي جالسين ظاحكين معليهم حتى مشاكيل فمحلاتهم عكسو هو للي كل مرة خارج مشكل...)
ملاك: (حيت باها بات هاد الليلة فبيت مها مقدرتش تدخل عندهاا بقات الليل كامل مديرونجية حتى جاها ميساج من عند حمزة فيه cc غير طلعلو الميساج وصل صونا فلبلاصة ناضت من فراشها دازت من حدا خديجة للي كتفرنس للتيليفون وهي كتميساجا وخرجت نيشان لسطح بلا حركة جاوبت) الوو
حمزة: واخيييرا
ملاك: علاش صيفطتي مك عندنا
حمزة: (كان متكي فوق نموسيتو) امتى؟!
ملاك: قبيلة
حمزة: شنو قالت؟!
ملاك: معرفتش شوف نتا؟!
حمزة: خفتيها تجي تخطبك!!!
ملاك: اه حيت مبغيييتش وعنداك تمشي ديرها
حمزة: علاش؟!
ملاك: مزال عندك الكمارة تقولي علاش؟! ياكما حسابلك احمزة انا كنتسناك غير نتا!!! دماغي عاااامر وخاطيني هاد تخربيق وتبرهيش
حمزة: أنا للي كنت كنتسناك وباقي كنتسناك عارف راسي غلطت ولكن بزاااف ولكن معطيتنيش الوقت نهضرو ونشرح ليك شنو بغيتيني نوقف فوجه با وانا براسي معنديش كفاش ندافع
ملاك: امممم قولي باااك هو لي... مهم معندك متشرحلي
حمزة: عندي وعندي بزااف ولكن منين جربت نبعد عليك لقيت راسي ضااايع ومستحيييل نعاودها ولا نخليك لغيري
ملاك: (تبسمت) مستحيل اصلا نعاود نعطيك فرصة واخا تقلب على راسك
حمزة: ههه نتقلب غير حني شي شوية
ملاك: موووووووستحيييل
حمزة: عفاك املوووكة والله مهنيت فراسي حتى دقيقة (سكتت) عطيني غير فرصة وللي آمرتي بيه وبغيتيه غيكون واهم حاجة غنسكنو بعيييد على كوولشي وللي رتاحيتي فيها هي للي غداااارر
ملاك: (بقات كتسمع تفكرت كلامو قبل مستحيل يخرج حيت غير هو للي عند واليديه ودارهم تقريبا بحال الدار فين عايشة يعني كبييييرة وباه مرفح) صعيب نعاود نتيق فيك ونتا اصلا مزال حتى مطلقتي صعييب نبني علاقة على ظهر وحدة نتا عارفني مزياااان للي منبغييهش لراسي منبغيهش لبنت الناس
حمزة: نتي عارفة هي للي بناتها على ظهرك
ملاك: لا نتا للي مكنتيش راجل معايا ولا بغيتي تفهمني نتا غير لعبة للي جات تلعب بيك
(زمتاتو بقا غير ساكت)
متبقاش تخربق علية فالهضرة احمزة
حمزة: ملاك سولي مي ݣاع انا دفعت لطلاق هي مسألة جلسات وصافي انا وديك السيدة كنا غير فصداع نتفاهمو نهار ونجلسو شهر مدابزين
ملاك: صداع ونتوما مزال مدرتو حتى العرس!
حمزة: مقدرتش نساك باش ندير العرس ونفرح
ملاك: للي سمعك يقول هاد السيد كان كيتسطى علية وهو على حساب حاجة ماشي شغلو فيها لا نتا لا باك حتى هو، تفارق معايا انا هاد الخزعبيلات مكدخلوش لراسي
حمزة: عرفتي ... الحلم ديالي نولد معاك شي بنيتة و لا وليد (تبسم) وكان كنتي نتي ندير العرس وانا نهزك فالعمارية بالفرحة
ملاك: (تبسمت ولكن مكتبينش) اممم
حمزة: عطيني غير فرصة والله ثم الله انا معاك بنيتي كنبغيك بزاااااف املاك
ملاك: بسلامة (قطعت وبقات كتنقز بالفرحة شحال زوينة تلقاي للي يبغيك وتحسي بيها وحتى هي كيعجبها منساتوش 💯 رجعت حست داك الاحساس للي كانت كتحسو بيه معاه معرفت واش تيق ولا شنو دير ولكن مبدأ حتى يطلق بعدا.. رجعت كتسلت لبيت لقات خديجة مزال فنفس الوضعية)
خديجة: (شافت فيها ظاحكة) امم الناس ولاو كيتسلتو
ملاك؛ ،(مجاوبتهاش حيت تصنفات فقائمة الخائنين وصعيب تسمح ليها دغيا.. هي بغات غير اعتذار نااابع من القلب انها خبات عليها ولوخرا مكيناش فهاد العالم....)
رجعات كل صباح كتلقاه كيتسناها سوا كان خدام ولا لا متهنى حتى خلاها تبسم ليه ومبقاتش كتعايرو وتسبو فاش كتشوفو، وحتى التيليفون مكيقطعوش عليها رجع داك الحب والكلام زوين بيناتهم واخا مبينالو انها مزال مسمحاتلو وكاع الهضرة كتكون غير من طرفو، الا لدابا ماشي معاها مزيااان وتأكدت من مها انه كيطلق حيت جات مو كتعاود ليها انهم مبغاوهش يطلق ولكن هو والو مشا دفع فالمحكمة وزاااطم على هضرتهم كاملين هادشي زاد شجعها كتر وكتر وعاد عرفت ان حتى طليقتو متفاهمة معاه على طلاق..
صبحت فصباح مشات للمطار حيت ختها نعيمة غتجي بلا راجلها ونيت تحضر لخطوبة خديجة تلقات ليها وفرحت بزاااف ببنتها وكانو حتى عائلة راجلها معاها حيت غيمشيو لمكناس هو اللول عاد تهبط نعيمة ويلحق راجلها عندهم باش يحضرو للخطوبة ويرجعوو لمكناس حيت غيديرو سبوع... توادعت معاهم وبقات تماك حتى خلط عليها جا يسلم عليها بليبيز وهي تهز حاجبها فيه وهو يبعد كيظحك
حمزة: قلت زعما تنساي. لا تكوني موحشاني
ملاك: اش غنسى!!
حمزة: صافي مقلت والو.. ندخلو لكافي
ملاك: واخ ولكن منتعطلوش خاص نمشي نجمع حوايجي
حمزة: مزال راسك قاسح بلاش منها هاد المشية
ملاك: راه الخدمة والمشكل عطيت الكلمة يعني ماشي لعب دراري صغاار
حمزة: جاتني سيمانى بزااف وعلاش نتي بالظبط عارف ماشي من عوايدك تمشي
ملاك: اولا ماشي شغلك تانيا محتاجة نبدل الجو شوية وتالتا خاصني نبقى نخرج حتى انا
حمزة: اممم، من بعد ونتناقشو... الامور فالدار رجعت مزيان؟! (معاوداتلو والو غير استنتاج لحالتها كيف كانت وأصلا مو عوداتلو على المشكل حيت هي وزهرة صحابات)
ملاك: صاااڤا.. كولشي بيخير الحمد لله..(جلسو وبقات كتشوف فيه زوييين وهي كتحماق على الزين ليوضية وزعورية ديال شلووح ولكن مكتبينش وديما هازة خنافرها عليه) فين وصلتي مع مشاكل ديالك
حمزة: انا طالق كولشي للمحكمة للي جا يهضر معايا تردو وبقات جلسة وحدة حيت بزوج بينا متافقين
ملاك: ووو شنو ݣاع هاد المشكل للي يخليك طلق شوف يمكن تبقاو شي حل طلاق ماشي سااهل
حمزة: محبيتهاش.. مقدرتش نولفها فهاد المدة كاملة علاين عام واالو وديما صداع صدااع قلت نحدو هنا محد مزال مكاين والو بيناتنا
ملاك: وهي؟!
حمزة: تفاهمت معاها فهادشي قبل مندخل للمحكمة والفلوس للي طلبتها غير يخرج صداق غنعطيهم ليها
ملاك: اممم.. اشمن فلوس
حمزة: فلوس بغات فلوس.. مكيهمش الا دوك لفلوس نشري بيهم راحت بالي جمونفووو
ملاك: اممم
حمزة: (شد فيدها) انا باغيك نتي املاك
ملاك: (شافت فيه ببرود) حايد يدك احمزة (جبدهم متبسم وهي عكسو) اخر مرة
حمزة: مزالة قاااسحة
ملاك: انا ماشي سايبة
حمزة: اممم نتي لالة لبنات ولكن واحد الديكور معجبنبش منك املاك ومبغاتش يتهضم لية
ملاك: (حط الݣارصون الطلبية) ها لما جا، شرب ودوزوو
حمزة: تنهضر بالصح
ملاك: انا حواااااااايج هوما الا نتا عندك غير حاجة وحدة، وإيييلا بديت نهضر مغنسكتش ومغنوصلوش لشي حاجة مزيااانة (تبسمت) اللهم خلي البير مغطي
حمزة: ههه صافي صافي انا ساااكت (كان هاز ساشي حطو فوق الطبلة) غنساافر سيمانة ولا كتر على حساب سطاج يعني راس العام مغنكونش هنا
ملاك: شنو هادشي
حمزة: بتي كادو وصافي مترديهاش فوجهي (شدت الساشي بابتسامة طلت بعينها كانو بزاف دلبواطات وحطاتو جنب الكرسي) ميغسي واخا مكانش عليك تعذب راسك
حمزة: مكرهتش ندوزو معاك (زفر) عرفتي وكان كنتي نتي للي مرتي نسمع فسطاج وفكوولشي ونكون معاك
ملاك: ههه فالسبعيام دلباكور اه سمعتك، ولكن الايام لوخرين متنظنش
حمزة: ههه خاصنا نزربو
ملاك: وشكون قالك غنرضى بيك مزال مقررت لصلا شنو ندير معاك (وقفت) مهم انا خاص نمشي
حمزة: مزال الحال مشربتيش حتى عصير ديالك... شربيييه عاد سيري........!!
ملاك: شربو نتا نييت
حمزة: بحال متقتيش فية؟!
ملاك: مهم تعطلت احمزة ضرووري خاص نمشي
حمزة: توصليني فطريقك؟!
ملاك؛ ومخايفش على عمرك
حمزة: موت وحدة للي كاينة اللهم معاك
ملاك؛ هههه بسلامة (هزت الساشي واخا بقا كيعيط ليها مضارتش عندو حتى بعدت دارت ليه باي باي من لبعد وكان متبسم حيت عارفاااه جاي بطموبيل حتى هو، وهي كتدير الماكسيمو باش متكونش شي خلوة بيناتهم حيت مزال معارفة راسها شنو بغات واخا تلاقاتووالا مزال غصة فقلبها من جيبيهتو... ركبت فطموبيلتها قلبت الساشي كتجبد بواطات وحدة فيها باغفان Si rouge باينة دوريجين، بواطة عامرة شكلاط والتالتة كانت طابليط Samsung تبسمت حيت كانت كتقولو فالليل كتبع المسلسلات والتيليفون كيديرونجيها مكتفرجش على خاطرها،
والرابعة كان فيها فنجال ديال القهوة مستيلي مكتوبة فيه Malak بالغطاية ديالو والطبسيل ومعلقة صغيرة ذهبية عجبها بزااف ردت كولشي اللور جبدت شكلاطة كلاتها وشدت طريق صونا عليها يوسف جاوبت وهي كتصوݣ)
وي
يوسف: شحال تتلبس خديجة فرجليها
ملاك: (عرفاتو كيتقدا ليختها حيت دايرين الخطوبة بعد يوماين) اممم 39
يوسف: ونتي؟!
ملاك: مالي انا؟!
يوسف: شحال تتلبسي
ملاك: وعلاش كتسول
يوسف: وهضري دغيا (مبغاتش) ملاااااك
ملاك: مفهمتش علاش كتسولني
يوسف: دابا غير قولي
ملاك: (مشقلبة عينها) 36
يوسف: هههه بورطكلي وصافي
ملاك: هه بحال داكشي نيت
يوسف: ياله شوية ونصوني عليك (قطع رجع عند مو كملو تقدية ديال الخطوبة للي كانت ديال لفرييع حتى من الحنة تمر معمر الفاكية كولشي خدااوه مقاد مصااوب من الملاح.. واخا مو متقبلاتش ولكن مسايراااه تموووت وتعرف شكون هادي للي لاسق فيها ومضيع خاطر مو.. تمو ماشيين للدار)
ام يوسف: علم الله فهادشي للي مزطمني فيه ايوسف
يوسف: ههه لعروسة لية نتي علاش غتزطمي؟!
ام يوسف: كفاش لعروسة ليك اشوينيييفيييك على هضور نتا مخبعها علينا مقدرتي لا توريها لا تجيبلي اصلها وزايدون واخا تكون مرتك راه غتولي مرت ولدي يعني عرووستي
يوسف: اصلها قلتو ليك مفهمتش شنو باغية تعرفي كتر ان شاء الله تعاشريها وتعرفي كولشي
ام يوسف: حتى يوقع الفاس فالراس؟!!
يوسف: اعوذ بالله، الله يهديك الوالدة انا داخل على زواج على لحلال ماشي داخل الحرب
ام يوسف: زواج والحرب بحال بحال بزوج بيهم خاصك تخميمة والف تخميمة
يوسف: حتى هاد السيدة راه خممت وخممت عاد نوييت وتقدمت ليها
ام يوسف: (مخسرا كمارتها معاجبها والو وصلو للدار دخلو شنو جابو بمساعدة المساعدة لي عندهم كولشي وااجد) اوا دابا شنو منعلمش لحباب
يوسف: فهاد الخطوبة غنمشيو غير حنا والحاج بنسليمان حتى نتفاهمو مع الناس على العقد وديك الساعات للي بغيتيه ديه
ام يوسف: والعرس؟! راه هضرتك مغتمشيش وليييد وااحد للي بقالي غنعملك العرس بغيتي ولا كرهتي
يوسف: هديك ضياعة دلفلوس زايدة فية وفديك بنت الناس
ام يوسف: مالك نتا مخصووص!! هي للي جايبها منعرف منين وحتى الخدمة مخداماش
يوسف: لا حول ولا قوه الا بالله العلي العظيم عاود!!! مهم انا خارج نمشي نطل على الدار واش كملو صباغة تبغي شي حاجة
ام يوسف: بغيتك غير دير عقلك هاد الساعة..
ملاك: (دخلت للدار نيشان لبيت مها لقاتها كتشوف الحلوة وتقلبها حيت عطاتها لشي وحدة للي قداتها ليها) ماما
زهرة: بنتي جيتي؟! تلاقيتي ختك نعيمة؟!
ملاك: (عاوداتلها كولشي ومتحمسين ومتشوقين امتى يشوفو حفيدتهم وحتى بنتهم للي غيجيو نهار الخطوبة، جلست حداها باغية تسولها حيت منين كانت جاية قشعت نجية خارجة من عندهم عاود) حقا قبيلة شفت نجية خارجة من عندك؟!
زهرة: فوقاش؟!
ملاك: عاد شوية منين كنت انا داخلة، واش صافي رجعتوو كتهضرو بحال اللول؟!
زهرة: اوا الله يسااامح الدنيا مدايمااش الواحد ميشدش فخاطرو ويمكن قبيلة غير جات جابت شي حوايج وصيتهم عليها مشفتهاش
ملاك: اممم وياك راجلها مبغانااش
زهرة: راني قلت ليك ابنتي هي معليها والو وراها غارقة مع شي مشاكل ديال ولدها وطلاقو، مهم شوفي سيري خرجي تسخريلي لعند مبارك مول لمااعن باك راه وصااه ناخد للي بغيت ومنها جيبي شي كيسان ..
ملاك: و ياله خرجي نتي وختاري شنو بغيتي ولا مزال باغية دفني راسك فهاد الحبس
زهرة: هههه واش لمك معييتيش ونتي كتخرضيني على باك
ملاك: مكنحرضكش بغيتك تخرجي حتى نتي تشوفي وتختاري للي بغيتي تشمي شوية ديال لهوا
زهرة: راه الجلسة فالدار أنا للي شرطتها ولا نسيتي، سيري وديري معايا ابيل فيديو جيبي داكشي زويين وعنداك تدي ختك معاك خليها تقاد حالتها
ملاك: لا منديهاش (خرجت من تماك مخدات حتى شي حاجة مفيدة من عند مها يعني مهضرش عليها... مشات هزت طموبيلتها، ودارت شنو قالت ليها مها ودازت تقدات شحال من حاجة رجعت كان ظلام الحال غير وقفت وقف عليها باها مخنزر مزال الاجواء بيناتهم مكهربة بزاااف)
حم بابا (باستلو يدو)
تسخرت لماما
رشيد: (كان ديجا معصب من نفور مرتو اتجااهو) اخر مرة تخرجي بلا شواري
ملاك: راه تقديت لماما ماشي خرجت كنتسارا
رشيد: ومزال زايداها بتخراج العينين
ملاك: (خرجت عينها) مخرجتهمش
رشيد: (بعصبية) تحركي للدار ولا نعميهم ليك
ملاك: راه عندي تقل نهزو بوووحدي
حمزة: (كان جالس فالقهوة مع صحابو نااض من بعد محضاهم باين باها كيغوت وكيشوفها بوحدها كتخرج تقدية من الكوفر)
رشيد: لا مزيان تبارك الله والله يا مك هاد الخدمة للي مزيغاك نخرجك منها ونجلسك فالدار نوريك تخرجي تكري
حمزة: السلام عليكم عمي رشيد كيعيطو ليك لدااخل، (رشيد داير يديه من مور ظهرو مخنزز من بعد معصبااتو بردان الهضرة للي ولا فيها بزاف وعاد ضدو فقضية مها)
حم كاين فاش نعاون
رشيد: غير سير اولدي انا غتوصل مع هاد جدام السخرة للدار
ملاك: (مراضيااش كانت باقية كتخرج من الطموبيل كريطنات الكيسان)
حمزة: بحال بحال اعمي رشيد انا اصلا كنت ماشي للدار نوصل معاها (بقا كيهز معاها خلا ليها شي حاجة خفيفة زدحت باب الطموبيل وتمت ماشية حمزة كيشوف فباها للي دار مخنزر من صوت الضربة بقا كيݣمݣم عارفها فلييفلة مشا من موراها غير ضارو الحومة فين ساكنين)
حمزة: سسس اديك شنيييولة
ملاك: بعدني احمزة
حمزة: مالكي مع باك عاود؟!
ملاك: يمشي يزمر
حمزة: اهيااااا شوية دالاحترام!!!
ملاك: نتا وياااه سيرو تزمرو الا لقيتو فييين (بقات كتزرب وهو معذب بتقل وحاول غير يوصل لعندها وشدها حدا باب الدار) حيد احمزة متمرضنيش حتى نتا عاود
حمزة: شنو وااقع
ملاك: واالو غير معرفت بنتلو فديك العصاارة عاود وجا قااصدني انا خرجت نتسخر لماما..!!!
حمزة: نعلي الشيطان املاك كما كان الحال باك هداك
ملاك: ونتا مااالك!! وزايدوون انا وبابا ونتا اش دخلك
حمزة: هه (بحرا كيشوفها مع قصيرة وتقل للي هاز) داك لسااان..
(هزت راسها فيه بتحدي)
خاااصو شي م (تحل لباب وخرجت خديجة) حم (رجع مبعد كتر)
خديجة صاڤا!!
خديجة: (تبسمت) الحمد لله اخويا حمزة ونتا لباس عليك؟!
ملاك: صافي احمزة شكرا حط داكشي حنا ندخلووه
حمزة: (مسمعش ليها دخل حطو فوق لبلاكار للي حدا لباب دسبابط وشي لاخر فوق الكرسي تم خارج شاف فملاك)
انا نهضر بلاتي معاك، جاااوبي..
(خنزرت فيه مابغاتش خديجة تعرف راه رجعت معاه وهي اصلا مزال كتفكر، دخلت وهو بابتسامة ودع خديجة للي عجبها الحال مع دخلت لقات مريم وولادها تماك جلست عاونوها فالسخرة وجات مها كتقلب كولشي جاها هو هداك وكانو الترتيبات مقادين وجدو كما كيوجدو لأي خطوبة من قبل من ديما كيبانو فمستوااهم مكيتكلفووش ومكيفرطوووش...)
كولها تلاح فبلاصت، زهرة ورشيد تافقو على هدنة على مدووز الخطوبة دبنتهم عاد يفكو حريرتهم وبرغيب باش قبلاتلو واخا اصلا فدماغها داكشي للي كانت غدير ميمكنش تخسر فرحة ديال بنتها واكترية لقاتها طايرة بالفرحة..
خديجة: (متكيين فلببيت) ملاك غدا نمشيو للصالون
ملاك: ممسالياش غدا ماما مسخراني عاود
خديجة: عفاااك ياله معايا تختاري معايا شحال من حاجة
ملاك: راه ماما مخلات فين سخراتني نخلي السخرة ونمشي نشد الركنة معاك فالصالون (مابغاتش تزيد فيه) وغدا نعيمة غتجي مغنحضرش ليها حتى فاش غيوصلو راه من الخدمة للسخرة شوفي مع مريم واش تمشي معاك راها تبغي
خديجة: اه اه شحال وليتي قاسحة
ملاك: (سكتت مركزة مع حمزة فالشات) اممم
خديجة: عرفتي احسن حاجة درتيها هي رجعتي ل..
ملاك: (ضارت فيها) واش مريضة اصاحبتي راه سطولة عمرو حدانا (كتشوف فولاد عمها للي ناعسين حداهم)
خديجة: هههه والله حتى فرحت ليك
ملاك: معندك لاش تفرحي حيت اصلا مكاين والو عقلي معامرش غير بداك تخربيق.. (ضارت للحيط مخلية vu لحمزة ودارت سيري للي كتفرج فيها فالطابليط..)
خديجة: منين جاتك الطابليط
ملاك: شريتها بفلوسي...
~~~~~~~~~~
اصبحنا واصبح الملك لله..
اليوم نعيمة وراجلها غيجيو ويجيبو بنتهم اول مرة، وباش فالغد ليه يحضرو للخطوبة مع دخلو للدار وكان مستقبلهم باها وجدلها هز لبنت وهي دخلت كان حولي فوسط الدار وكولشي عنقها وصلاو على نبي فرحانين ببنتهم وحفيدتهم ذبحو الحولي وتجمعو على كاس أتاي والحلوى تحط لغدا وكولشي نااشط نعيمة لحقات على خديجة للصالون ورجعو بجووج بييهم
مريم: (غير حيدت خديجة الشال بقات مبرقة عينها متبسمة دليل على الاعجاب) تبااارك الله بان فيك الصالون جيتي غزاالة وكايح عليك السر ماشاء الله عليك
نعيمة: ههه قلتها لها حتى انا قلت نمشي ندور بالحالة ولكن قلت حتى يقرب سبووع وندير شي حاجة وااو فمكناس
مريم: حتى انا نمشي ههه
خديجة: ههه خليوني انا نبان زوينة عفاااكم
مريم: ورااك بااينة نتي هي لالة لعرووسة، ورديتي تبارك الله صحتك والوجه تنور ولحنيكات طلعو وجاوك لميش غزاالين
نعيمة: مولاي السلطان غتخليه بلا عقل (بقاو شادين فيها وهي فرحانة غير كظحك عجبها راسها وزادو خوتاتها طلعولها المعنويات كتر وكتر دخلت ملاك معطلة وشالها عوج كملت السخرة للي بقات ليها وعاد الطيابة للي دارت معاها ومشات لمول دجاج زادت شي حاجة ولحم وديسير، سلمت على نعيمة وشدت لبنت للي جابت ليها كورميط ديال ذهب)
نردولك احبيبتي فسااعة الخير واا نوضي الزمرة جيبينا شي زعر وطويل وشنو اخر كتقول
مريم: ههه وبيض ولباس عليه
خديجة: (غمزتهم) هو نيت راه اونفاص معانا (كتبسم)
نعيمة: الاااا متقوليش رجعتي مع حمزة ياك نتي للي مبغيتيش تكملي معاه فاللول
ملاك: مرجعتش هاد زمر غير كتسبق الأحداث هو لاسقني وانا مبغييتش
مريم: توما مالكم بجوج وليتو بحال القط والفار!!! أبعدا فسليت كتكون عقل واحد متافقين علييه
ملاك: (عوجت فمها)
نعيمة: خديجة ورينا خطييبك شنو سميتو حقا
خديجة: سيدي يوووسف هه (جبدت تصويرتو ووراتو ليهم)
مريم: عندك ومخبعاه علية بنت الهم!! (مشات حدا نعيمة كيحنززو ويبرݣݣو) هاي هاي على الزييين وباااين كلاص السيد
نعيمة: (كتزوومي فيه مزيان) ماشي هدا للي كان معاك فلوطيل داك نهار املاك؟!
ملاك: (صدمتها) اشمن اوطيل؟!
نعيمة: فمكناس وهو نيت ديال نهار العرس وللي سهرتي معاه ففاس
ملاك: هه هانتي على لبرݣاݣة.. هو هداك
مريم: واش نتي للي عرفتيهم؟!
ملاك: هههه اه أنا للي عرفتهم بجوج...
خديجة: (معجبهاش هاد الحديث) اوا المكاتيييب وصافي
نعيمة: لا لا بلاااتي.. واش هو للي كنتي كتقوليلي عجبك وعرفتيه مفهمتش واالو!!!!
خديجة: (معجبهاش هاد الحديث للي ضااير) المكاتب وصافي
نعيمة: لا لا بلاتي نفهم!! واش هو للي كنتي كتقوليلي املاك عرفتيه وعاجبك وكذا!!!! (بقات كتشوف فيهن كتسنى منهم جواب) مفهمتش!!!!
ملاك: حتى انا مفهمتش
خديجة: (بعصبية) شنو للي متفهمش!! ملاك نتي زدتي فيه لا؟!
ملاك: (باستفزاز) مثلا!!!
مريم: بشوية هضروو.. شنو واقع بيناتكم؟!
نعيمة: (شهقت) متقولولييييش كان مع ملاك وشوية بغا يتزوج خديجة
خديجة: هو مكانش معاها كان معتابرها غير ختو وصافي من اللول مكانتش عينو فيها ولا حتى عاااجبااه
ملاك: (بقات كتشوف فختها معرفتش علاش بقا فيها الحال) اهاااه عندك الصح
خديجة: (بعصبية) كتهضري بحال انا خطفتوولك
ملاك: (ببرود) سمعتوني البنات انا قلت هاكا!!! (زادت فنبرة الصوت) والا على لغوااات حتى انا كنعرفلو ونفوووتوو لهييييه.. سمعي اخديجة هبطي كواريك معايا بلااااا منحطووولك فسطل وللي جا يطل
خديجة: اش غتحطي واش عندك متحطي!!!
مريم: (وقفت فالوسط) سكتوووو واش حماقيتو
ملاك: محماقيتش تبعدني عليها انا عطيتها التيساع تبعدني.. ياك انا مقلت والو، نعيمة للي عقلت، واه انا كنت مع يوسف مقلنا واالو ولكن هي كانت عارفة نيتي معاه وشحال كنت كنعاود عليه وحيت انا من اللول حديتهم ليه، مشا عندها.. عادي
خديجة: (مشات لجيهتها حيت استفزااتها ومريم وونعيمة وقفو فالوسط) حتارمي راسك لوكان بغاك وكان جا عندك ميشووفش غيييرك هدا اصلا الا فكر فيك شي نهار
ملاك: ههه نعاودلك هضرتو منين كان كيسولك واش مقالت ليك والو ولا فاش كنت كنجي ونقولك راه عاجبني مزالة حاااسبة انا بقا فيا الحال حيت مشا عندك!!!
خديجة: متحمقينيش املاك يوسف كيعتابرك ختو وحتى نتي مكان عندك غراض فيه
ملاك: (بعصبية) وسيري ت*** نتي وهدا للي وامل خ*** وجاب يتزوجك (كيدخل باها ومها يشوفو هاد الغوات علاش واصل لبرا محست غير باها جمع معاها بتصرفيقة على حساب تخصار الهضرة)
رشيد: لاااا مزياااان تبارك الله
ملاك: (بعصبية) مضربنييييش معندكش الحق ضربني
رشيد: (بغا يزيد يضربها وكولشي شادو زهرة طارت سدت لباب ميدخل حد) والله يا مك حتى نذبحك
ملاك: (كتشهق ولكن بلا بكا) مدرت والو علاش ضربني!!! نتا كتحݣرني بزااف مكتحملنيييش حيت جيت مع الحق
زهرة: اويلي استغفر الله سكتووو... رشييييييد
رشيد: والله حتى نعاود لمك ترااابي يا الضاااسرة مزيان تبارك الله مربي سلݣوطة عندي كتطيح الهضرة وتخرج عينها فية
مريم: (دايرة يدها ففم ملاك باش تسكت) صافي ابابا راك دخلتي فوقت كنا كنتناقشو بالظحك وملاك زلقات ليها الهضرة وصاافي نتا عارفها شحال كتحتارمك وكتبغيييك
رشيد: (كيخنزر فيها) والله وكان ماشي الناس للي برا حتى نوري ليمااااك مزياااان الحݣرة
زهرة: بعد لبنت ارشيد
رشيد: واش هي مبان ليها صداع غير منين الناس كاينين وغدا خطوبة ختها
ملاك: زعما غرت هادشي للي بغيت تقول (ردتها مريم اللور قبل متبلزها عاود)
مريم: بابا سير بدل ساعة بأخرى هي معصبة ونتا معصب مكاين لاش!! الشيطان الله ينعلو ويخزييه حضر
رشيد: (بتهديد) مزال رجعلك
ملاك: (بقات شادة فحنكها كتشهق بلا بكا وبحرا مطلع نفسها ولكن بالصوت وكتخنزر اونفاص ليها وكتفكر وكاين افكار سلبية للي كدور فراسها، عيات الام كتسول شنو طرا فهموها كانو كيظحكو مناقشين بالظحك وملاك خسرت الهضرة وجات فودن باها اما خديجة دارت قرب براكة غير شوفات خوتاتها فيها ميمكنش تزاد حتى مها..)
طلعت لسطح بكات حتى تفشت جاتها حݣرة من باها بزااف ومعرفتش علاش ردوها غارت من خديجة علاش مفهموهاااش!!!
هزت تيليفونها هضرت مع حمزة شوية تبدل الجو مابغاتش تبين ليه انها مقلقة ولا تعاود، ولكن كانت محتاجة غير تغزلو فيها ويهضر على احلامو معاها تحس ان كاين شي واحد عندو ملاك مهمة فحياااتو...
حمزة: غير يكملو إجراءات طلاق انشاء الله ونتفك غنديرو خطوبة ولاكط نهار واحد على منوجدو للعرس
ملاك: ياك مبغيتيش العرس
حمزة: معاك باغي كولشي ومن هنا نقولهالك مكاين لا تأجيل لا والو باغي لولاد من شهر اللول زعما حنا منأجلوش وربي هو للي كيرزق غير متجيش من عندنا حنا
ملاك: (حركت راسها باه كابتة تنهديتها) حتى انا هكا كنت باغية، ولكن كفاش خطبة ولا كط ياكما لقاوني نابتة فشي محبق وكنتسناك غير نتا تجي عندي
حمزة: ههه نابتة فقلبي، (تبسمت بلا خاطر)
من مور العرس نيشان نمشيو لشي بلاصة نعيش مع الزين ديالي مزياااااااااااان عاد رجعوو
ملاك: امم
حمزة: مهم غير غنخطبك غنقلب على شي دار للكرا على ميسهل الله فشي دويرة ولكن غتكون بعيدة من الحوومة بغيت نستاااقل ونكونو بعاد
ملاك: حسن حتى انا كنت مبغيتش نسكن فهاد الحومة
حمزة: للي آمرتي بيه غيكون احبيبة (غير كتنهد) واش راكي فسطح
ملاك: منين بديت معاك الهضرة وانا فيه
حمزة: خسااارة وكان كنت تماك نقز لعندك
ملاك: خسااارة، ولكن عارفة فيك غير الهضرة
حمزة: كتحدايني؟!!! (بقاو كيهضرو ويتمعشق فيها حاس بيها باااااردة معاه بحال غير كتسمع ليه باغي يعطيها فرصة تسامحوو ميبركش عليها وكان متأكد نهار على نهار غيبين ليها شحال باغيها من قلبو ومعقول معاها، قطعت منين مريم طلعت لعندها لاوية عليها كاشميرة ومطلعة اخرى فيدها)
هبطي امريم راه البرد عليك
مريم: هاكي شدي لويها عليك حتى نتي (خداتها منها، وجلست حداها فوق الكرسي) عاوديلي من اللول
ملاك: (تنهدت عاودات ليها من نهار عرفات يوسف فلوطيل الخرجات الهضرة فالتيليفون كولشي، كانت اول مرة تهضر بصراحة وتعاود لشي واحد شنو كاين يمكن يفهموها ويفهمو علاش مقلقة) فهمتي دابا
مريم: من عندي هو للي غالط داخل بين لخواتات كيتعزل فييهم
ملاك: لا ماشي هو حيت حتى مرة مقالي كنعجبو ولا كيبغيني ولكن انا كنت كنعاود كولشي لخديجة حتى فاش تصاحبو عرفتها منو هو ماشي حتى منها
مريم: (تفكرت نهار كانت بغات تخرج عندو وكتأكد عليها متعاودش لملاك وعقلت على جملة من خديجة منين قالت ليها ""راه همزة ومنبغيش يطيرولي بيه"") دابا جاوبيني بصراحة واش نتي كتبغيه املاك؟!
ملاك: لا ولكن كان عاجبني وكنت كنتسنى من عندو زواج ماشي صديق كما قالت كنت كنتسنى منو يدير شي خطوة حيت خدمت عقلي معاه ولقيتو مناااسب
مريم: ودابا
ملاك: شوفي هو عزيز عندي ولكن (بتنهيدة) معجبنيش الحال امريم، والله جاني بحال الغذر منها هي هو للي بعيد علية منين عرفتي تقلقت علاش خبااو وقلبت عليه، شحال بقا كيرغب ويبرر ويطلب سماحة
مريم: حتى انا معجبنبش هادشي مبغيتش نوصلو لهاد لموااصل مبغيتكش تحقدي على ختك املاك مبغيتيش شي واحد يدخل بين الاخوة ديالنا
ملاك: حقدت وللي عطا الله عطاا..
مريم: يمكن ربي مدارلكش فيه خير متدييش فباالك
ملاك: فهمووني انا ماشي غيرانة منها على يوسف (بغات تشرح ومعرفتش تخرج داكشي للي عندها فخااطرها)
مريم: والله حتى فاهماك اختي ولكن ودابا صافي هو جاي يخطبها
ملاك: واا تربح بيه ولكن تنساني انا وتضرب على نمرتي
مريم: شوفي واخا نتي صغيرة فينا ولكن عارفة قلبك كبير
ملاك: دابا قلبي كحل مريم نتي عارفاني مكنسامحش دغيا ومغنبركش على راسي نسااامح
مريم: وتبقاو هاكا عرفتي شحال بكات صافي خليها هي خرجت من طلاق وهدا بانلها الضو للي غيعتقها وتبرهشت فهادشي صراحة ضرت فيها ولكن دابا مبقات هضرة معاها
ملاك: صافي امريم عفاك واش تعشاو بغيت نهبط غير نعس
مريم: ونتي متاكليش
ملاك: لا.. شوفي منين كل واحد يشد قنت قوليهالي نهبط...
اصبحنا واصبح الملك لله...
زهرة: (نوضتها معاه) متعاودش تحط يدك عليها
رشيد: راها ضسرت بزااف ازهرة مبقاتش كتحشم ولا تحتارمني وليت زائد ناقص عندها
زهرة: فهم لبنت هي مابغاتش للي تشركني فيك ومبغاتش للي يشركها فيك... لبنت راها كبرت ماشي ديال الضرب كاين بزاااف باش تعاقبها ولكن ضربها ونتا اصلا مفاهمش حتى علاش كانو كيضهضرو ولا يتناقشو
رشيد: هضري معاها نتي ازهرة تحتارمني وتوقرني انا راني باها
زهرة: سير دابا قضي الغراض الناس مع 1 غيكونو هنا وبعدها عليك
رشيد: ان شاء الله.. (خرج من تماك مشا لبيت فين كاين باه وخوه كيفطرو.. ناضو لعيالات كل وحدة وشنو كتقضي من غير ملاك للي غير شادة كرسي كتخرب فتيليفونها حتى شافت ماين حمزة داخلة قلبها ضرب تبعاتها غير بعينيها هازة بلاطو مغطي باينة جايبة شي حاجة منين عرفت الخطوبة كانت هادي هي عادتها دخلت للكوزينة من بعد بقات كتعيط على زهرة)
ملاك: ماماااا مااماااا... راها فسطح اخالتي نجية نعيط عليها
ام حمزة: انا نطلع ليها ابنتي (طلعت، وملاك عضت شنافتها شافت فلواتس حمزة مزال مدخل الواتس حيت كان خدام الليل ممكن يكون مزال باقي نااعس، تبعاتها كتصنت عليهم)
اوا دابا منين عرفنا بحمل لبنت نطلقووها ونضيعوها ونضيعو فحفيدنا؟!!
زهرة: وولدك اش كيقول فهادشي
ام حمزة: تصدم صباح قالهالو باااه سمعتهم كيتغاوتو ولكن باه قالو ها السخط ها رضى حفيدي ولا حفيدتي مبغيتهم يترباو بعاد علية
زهرة: ما عندي ما عدا من هاد الكلمة الصراحة راجلك ماشي شغلو اه منبغيو حتى حد يتربى بعيد على باااه وهو فالحياااة (تفكرت ربيب للي رشيد قالها يتربى بعيد غير باش تسمح ليه وهو يتكفل بيه رمشت بالزربة كتطرد الافكار..) ولكن كولشي كيتحل بالعقل
ملاك: (مخرجة عينها مصدومة كتر ودارت يدها على فمها)
زهرة: اوا وفين هي لمرا؟!
ام حمزة: راه جابها دابا للدار
زهرة: هضرو انجية مع ولدكم بشوية راه حتى هو غيبغي ولادو يكونو معاه وهضري مع عروووستك جبديلها الودنين راها غتولي أم تنسى داك لهبال عليها شوية
ام حمزة: انا مكنت باغية ݣاع هاد زواج من اللول كنت متمنيا تتناسب معاكم
زهرة: كتااب.. المكتاب انجية، مهم نتي رطبي مع ولدك
ملاك: (هبطت بالزربة وعينيها مضببين ممتيقاش حتى كتبغي تفرح، وتخرجلها شي حاجة من الجنب مشات لبيت مها سدت عليها قبل متجي شي وحدة من لبنات بقات كتصوني عليه بالنمرة المرة الأولى التانية والو مكيجاوبش..
جلست متأزمة كتر وكتر سااهية عينيها نشفو من دمووع ندمت علاش عطاتو شي فرصة وظحكت على راسها.. حست بالخنقة والإهااانة، تدق لباب مسحت بيدها على وجهها حلت لباب كانت خديجة ختها)
خديجة: ملاك..
ملاك: ق**** علية نتي عاود (دخلت البيت هزت باليزتها كتجمع حوايجها تحت أنظار ختها هزت وراقها وكولشي للي تحتااج)
خديجة: فين ماشية
ملاك: (محاملاش تهضر معصبة معصبة حتى راسها غيطرطق لثاني مرة غتجرأ وديرها وممسوقااااااش لشنو يوقع لقاتها مها خارجة باليزتها خرجت عينها)
زهرة: أفين ماااشية بالسلامة؟!! (ياله بغاو يتجمعو عاود دفعت بنتها لبيت) دخلي دخلي (سدت لباب) مال مك فين ماشية واش كل مرة هازة شطايطك وخارجة والدة انا عزري مسخووط؟!!
ملاك: (بانفعاال) منهضرش وهادي هنا
خديجة: صافي صافي، انا نخرج
زهرة: اش هاد لقباحات مع ختك حتى نتي دابا يسهل عليك الله ابنتي
ملاك؛ واش حسابلك انا غايرة من هادي (شافت فخديجة) خرجي نهضر مع ماما حيت نتي مبقيتش كنتيق فيك
زهرة: اويلي استغفر الله مالكم وليتو هاكا (خرجت خديجة كتبكي) واش بعقلك تبكي ختك وهي عروسة
ملاك: سمعي اماما (تنهدت ورجعت ليها الشهقة ولكن بلا بكى) خليني نمشي عفاااك اصلا غدا غنبدا لفاس خليني نمشي عفاااك
زهرة: (خرجت عينها) لا
ملاك: (كدور عينها باش متبكييش وحلقها فيه غصة كبيرة وبحرا كتقدر تنفس، محست حتى نطقتها)
حمزة صدقت مرتو حاملة وانا ويااه هاد ليامات كنا كنهضرو عاود بغيتو وتقت فيه
(هنا طاحو دموعها من عينيها ونيفها وكطلع شهقة كبييرة)
وكان كيهضر لية على زواج ومنعرف شنو.. عفاك خليني نمشي اماما والله حتى غنموووت الا بقيت هنا
زهرة: (بقات كتشوف فبنتها وكفاش مقهورة ومغبوونة)
اليوم خطوبة ختك
ملاك: (بقات غير كتبكي قربت مها ليها كطبطب على ظهرها)
خليني نمشي (باستلها يدها كترجاها بغات تجر باليزتها)
زهرة: صبري بعدل ابنتي حتى لغدا وسيري الله يرضي عليك مبغيتكش تخرجي ونتي هاكا بقاي هنا نعسي نقولهم مريضة غير متمشييش ونتي هاكا ومزال خاصنا نهضرو...
ملاك: مبغيتش نهضر
زهرة: تكاااي حتى واحد مغيجي يصدعك...
#يتبع