سداد وبنت ألعرب
البارت قبل الاخير
بقلم الكاتبة الزهيريه الزهيريه
الوداع لا يقع الا من عشق بعينيه
اما ذاك الذي يحب بروحه وقلبه
فلا ثمة انفصام ابداً
الق/ أني بخلال ما عشت بمرحلة حياتي وآني أصلًا مو چبيرة عمر بس مصايب الدنيا خلت عقلي اكبر من عمري وأني حياتي ما چانت طبيعيه بين اب وأم وعائله لا بقيت الدنيا تكفخ بيه لهذا صرت اي شي أريده ومن آول مره ما احصله أظل أعيد المحاولات حتى آوصل لهدفي وأحصل ألي أريده وآني من نقطعت عني اخبار أبني قررت أتواصل ويه آي شخص آله علاقة بسداد ويأثر عليه وأجلت هذا الموضوع الى ما أروح على أبويه وأرجع
ومن رحنه وچنت بعدني أوكل أبويه واگف يمي سردار ظلينه ننتظر الضابط فرقد واجى
فرقد/ طبعًا هنا اكو تجارة مال أعضاء ولأن همه مرضى وكلهم بلا عقل ما يعرفون شنو يصير بيهم وهنا ألي يذبوا آهله وما يجون عليه ينباع تفسيخ لإن ماكو احد ورا اما ألي يراجعون آهله عليه يتم الإتفاق ويه أهله ويشوفون يا عضو يريدون ياخذون منه وينطون نص المبلغ لأهله
سردار/ يعني انت بنظريتك سيدي مثل حالة رياض أخذوا منه كليته بدون ما يرجعون لاحد لو شنو
فرقد/ أحتمال واحتمال لا يكون منو دخله للمستشفى هنا يكون تم الإتفاق ويا
الق/ سيدي يعني هسه راح تشتكي عليهم وتاخذهم
وهو باوع عليه بنظره حاده
فرقد/ وآني أشتكي عليهم شلون قابل هو ابويه لو واحد من طرفي هاي انتوا تقدمون شكوى بالموضوع يمنه بالمركز واحنه نطلع عليهم إما اني شنو دخلي بالموضوع وآني حتى طلعتي وياكم هسه مخالفه للقانون لان طالع وياكم بدون كتاب رسمي لهذا من تشتكون لا تجيبون سيرتي وإنه طلعت وياكم
وخلصت أكل ابويه وبقى من الآكل اكو ثلاجة أو بالمعنى ما يسمى ثلاجة لإن الثلاجه مالها راس ولا رجل عبالك كنتور وحتى كهرباء ما مشكلين عليها أما الريحه البيها أجلكم الله تكتل ولبس سردار علاليگ بيده وطلع الآكل التالف وخلينه الأكل الجديد بمكانه
وطلعنه من المستشفى وفرقد يگول/ بالحرام زريبه مال حيوانات مو مستشفى هاي
وفرقد ركب سيارته وراح وآني وسردار رجعنه للبيت بس بطريق الرجعه
سردار/ شبيچ الق شو احسچ گوه متحملتني ترى أني ما قصدي شي لا ادافع عن سداد ولا شي بس دى اگلچ ابنچ ما راح بعيد ابنچ يم ابو
الق/ اگلك سردار إذا احچي ويه أمك تگدر تدخل وتحچي ويه سداد بس يجيبلي أبني والله روحي طگت عليه بس أريد أشوفه
سردار/ شوفي أمي اذا حچت ويا راح يعاند وما يقبل يجيبه لان يظن أنه اني إلي طلبت من أمي تحچي ويا
الق/ زين ما تعرف أحد يگدر يأثر على سداد والله سردار راح أموت على شوفة أبني
سردار/ إلي يگدر يأثر على سداد مليون بالميه همه اثنين اوزجان الله يرحمه وكوجر لان هو تقريبًا بعد كل الأطراف إلي ساعدتچ ومن ضمنهم جيهان
الق/ زين وين بيت كوجر آني أروح عليه
سردار/ من حظچ السيء آنه چان كوجر من مده قليله ساكن في بغداد بس إنتقل قبل سداد لأربيل
الق/ الله يخليك سردار شلون أوصل لكوجر
سردار/ صدگيني اليوم راح أحاول بكل الطرق حتى احصل رقمه وأرسله الچ
الق/ وصلني للبيت وهو راح ظليت گاعده على نار شوكت يردلي خبر
وأني بمرور الوقت صاروا الأطفال يزيدون عندي وصرت أبتكر طرق انه ما يعرف يروح للحمام اعلمه وألما يعرف الكلام أعمله على النطق وأعلمهم على الامور الحياتية وبنفس الوقت قدمت خارجي ثالث متوسط
وبعد يومين من اتصالاتي والملحه مالتي على سردار جابلي الرقم وبس استلمت الرقم گبل سجلته بجهات الاتصال وأتصلت بي وما دگ هواي وجاوبني واحد
وسألته/ انت كوجر
كوجر / نعم تفضلي اني كوجر منو ويايه
الق/ آني ألق ودخيل الله ودخيلك سداد أخذ ابني وما يقبل يرجعه أليه هسه ما أريد يرجعه أريد أشوفه بس
كوجر/ شنو ابنچ آخذه سداد هو غير مات قبل سنه والبركه بيچ شنو بابا انتي مخبله لو جايه تستهبلين عليه
الق/ لا آني ابني ما ميت وقبل كم يوم اخذه مني وتگدر تسأله
كوجر/ والله آني ما أعرف أنتي على شنو دى تحچين بس احچي ويه سداد وأشوف وانتظري مني خبر
الق/ وانتهى الإتصال بينه وأني أدعي من الله أنه يرحمني ويجيبلي سداد أبني
وعلى ثاني يوم إتصل بيه سردار ورحنه للمركز حتى نشتكي على المستشفى ألي بيها ابويه والمشكله أنه اني قاصر لهذا ما يصير أقدم شكوى لازم الوصي عليه يقدم وهنا صدگ نفعلت گمت أصيح بعلو صوتي / يعني شلون اذا قاصر وما بالغه ابويه ياخذوا تفصيخ بالمستشفى ما عدنه أحد الله غضب علينه ومخلينه مگطوعين من شجره شنسوي واذا ما عدنه احد نموت
وبعدها نفتح الباب مال الضابط فرقد وطلع واحد ما لابس زي شرطه چان مدني وصاح عليه ومن تقربت يمه گال / تعالي دخلي هنا ودخلت ويايه سردار والضابط فرقد موجود بس ظاهرنه آنه احنه ما نعرفه
وهذا المدني الصاح علينه گال / تفضلوا گعدوا واحچوا شنو مشكلتكم
الق/ سيدي آني ابويه منغولي وعمي ذبه بالشماعيه وآني چنت ما اعرف ابويه وين بس من 3 أسابيع وأول زياره من رحت عليه ودى اسبحه شفت جرح بخاصرته وللعلم أبويه ما مسوي اي عمليه جراحية وظليت اسأل وإي شخص أساله يگلي هذا لو زارعين اله كله لو مستاصلين منه كله ومن سالت مدير المستشفى شنو هذا الجرح يگول انه احد المرضى معتدي عليه بالسچين ومو بس هو أكو مرضى غيره كذلك تم الاعتداء عليهم
فرقد/ سيدي إذا زارعين اله كله لازم اكو متبرع ومكان العملية وين بس ما معقوله تكون عملية زرع هاي ألا تكون عملية استئصال
وهذا الي فرقد گله سيدي چان جوابه/ فرقد أريد اليوم تطلع عليهم كبسه بالليل وتاخذ وياك قوه وتحاصر المستشفى من كل الجهات وشوف كلام البنيه صحيح وطلعلي ابوها حولوا على الطب الشرعي للكشف عليه واريد من تروح تاخذ فريق طبي حتى مبدئياً يتم الفحص الأولي وشكو مريض هناك يتم فحصه مبدئيًا
الق/ وبعد هذا التبليغ طلعنه بس أنتبهت انه هذا الولد المدني چان بعده شاب صغير وسألت سردار هذا منو حتى ينطي أوامر لفرقد وهو فرقد ضابط
سردار/ هذا من الشوؤن حتى لو رتبته صغيره يبقى أعلى من أي رتبة عادية
الق/ ورجعت للبيت وبعدني على آمل انه يجيني خبر من كوجر وبالفعل لليل إتصل بيه كوجر واعتذر مني ونقلي حچي سداد أنه شوكت ما يجي لبغداد يجيب ويا أبني وتشكرت من كوجر لكون تعبته ويايه
بس بقى الشك بداخلي وآني اگول ويه نفسي آنه كذب ما يمكن سداد يجيب ألي أبني وهذا كلامه مجرد تخدير لا اكثر
وبعد إتصال كوجر بيه بيومين وچنت دى اطلع الأطفال لأهليهم إجى سداد وجايب ويا ابني ومستحيل چنت اصدگ عيوني معقوله سداد يجيب ألي أبني بحيث حاضنه أبني وابوس بي والمفاجآه گال يبقى يمچ وباچر اجي أخذه وانوب من راد يروح سداد گام يبچي على ابو تخبلت هاي شوكت گام هيچ يتعلق بابو وسداد رجع عليه واخذه مني وظل يبوس بي وايليا سكت وآني عبالي راح ياخذه بس هو طمني انه بس يسكته ويرجعه إلي
واخذه وگعده ويا بالسيارة وايليا حاضن ابو وسداد وصاح عليه وانطى ألي وهو بسرعه حرك السياره وراح وآني اخذته ودخلته للبيت وجدو فرح من شافه وظل يبوس بي وآني انطيته لجدو ورحت توضيت وصليت ركعتين شكر لله
ومن رجعت لصالة يم أبني سألت جدو / اگلك جدو اني ما چنت مصوره في يوم سداد راح يجيب أبني ألي
جولان / بابا أنت بعدچ طفله تاخذين الأمور بحيل صدر اني شايف وعايف يعني شگد أريد اعيش أكيد ما راح اعيش بگد عمري الفات لهذا من گتلچ انطي أبنه واكو مثل يگول طاطي حتى تعبر الريح واحنه لكون سكتنه وانطينا ابنه سكت يعني امن لهذا بعد راح يأمن شوكت ما نگله جيبه يجيبه
ولليل آني نايمه وايليا نايم بحضني لان تعب گد ما بچى اتصل بيه رقم آني كاتبه عليه سداد
سداد/ الأنسان يكون متربي على نمط لهذا أشوفه من الصعب يغير آلي اتعود عليه وآني من صغير اهلي عدهم النزعه القوميه مال ألعرب والاكراد لهذا آني چان راسغ في دماغي انه لازم أزوج كردية وما اخذ عربيه أبد ومن خانتني آريا صرت اشوف انه البنيه الفقيره ماديًا هاي طمعانه بالفلوس بس بحق ألق بدلت كل نظرتي وأيقنت إنه الظروف هاي حجة الأنسان الفاشل بدليل ألق بنيه فقيره ودى ثابر حتى تنجح بالدراسه وتشتغل وتعين ابوها واخوها
وإني ابد ما مركز على شكل ألق ابد بس اليوم انتبهت على كل تفاصيلها ومن رجعت للفندق تمددت حاولت هواي انه انام بس النوم ما يجيني وبقيت للعصر وبعدها طلعت ورحت كملت شغلتي والى ساعه 11 بالليل يله رجعت للفندق وظليت اتگلب بفراشي بس هذا الوقت كله أبد ما غابت ألق عن بالي ليش ما اعرف وأگول ويه نفسي يمكن إنه نعجبت بيها لكونها تدرس وتشتغل
وهذا حالي وما انتبهت على الوقت وقررت إتصل بالق واسأل على أيليا ومن اتصلت جاوبت ومبينه وحده چانت نايمه ومن سألتها على أبني أيليا
الق/ عفيه ساعة 1 وثلث بنص الليل هسه يله ذكرت تسأل عليه كلنه نايمين حتى أيليا وعلى العموم هو بخير ونايم تأمر بشي
سداد/ آسف ما انتبهت على الوقت لان إني اظل گاعد بالليل يعني عندي الليل كله عشه
الق/ انت تگدر تنام بالنهار وتگعد بالليل واخير الشهر تستلم راتبك كامل قابل مثل ألق لازم تنام من وكت لان عدها شغل الصبح
ضحكت وجاوبتها/ وأنتي حاسدتني على الراتب وأنتي ما مضطره تشتغلين ليش ما جدچ يصرف عليچ
الق/ الله يخليك انت دماغك صافي بالعافيه عليك أروح أنام أحسن يريد جولان يصرف عليه حتى ثاني يوم تلگاني بالشماعيه يم ابويه
سداد/ صدگ كلامها موتني ضحك خليتها تروح تنام لإن نهيت الاتصال وياها وآني چنت اريد احچي وياها بس ما نطتني مجال ونمت الفجر وگعدت الساعه 10 الصبح وبعد ما سبحت ورتبت نفسي ورحت على ألق حتى آخذ أيليا واطلع لأربيل
ومن وصلت لبيتهم ودگيت الباب طلعتلي الق ورجعت دخلت للبيت وآني دى أنتظرها طلع أخوها تقربت عليه وخطيه صدگ نكسر گلبي عليه وجهه بريء واذكرت من چنت أعيرها باخوها وأبوها
وطلعت ألق جايبه أيليا وهي تگلي/ كملته تبديل وحفظته وحتى رضاعه سويتله
سداد/ آخذت أيليا منها وهي سحبت أخوها من يمي ومن سألتها ليش سحبتي اخوچ
الق/ لآن منغولي وأخاف تلعب نفسك منه اني بالنسبة عني أفتخر إنه هذا أخويه
سداد/ لا نفسي ما تلعب بس آني قبل من چنت احچي عليچ اتقصد حتى أستفزچ لا أكثر
وطلعت فلوس من جيبي وانطيته وخطيه هو كلش فرح والق چانت تريد ترجع الفلوس عليه بس آني ما قبلت أخذت ابني وركبت سيارتي وانطلقت نحو إربيل
ومن وصلت البيت هلكان من الطريق ومن أبني لهذا گبل نمت وگعدت الفجر أبني ماكو نزلت لگيته يم أمي نايم هو يبرق وظليت گاعد ما اعرف إتصل بالق لو لا بس بعدين لغيت الفكره
والق حدود الساعه 8 ونص إتصلت عليه وهي تسأل على أيليا طمنتها انه هو بخير وبعده نايم هنا حبيت اتعرف عليها أريد أعرف شلون چانت عايشه في بيت عمها وظلينه ما يقارب النص ساعة نسولف وهواي حچتلي احداث بحياتها بس
ألق/ حياتي حافله بالمآسي أعذرني مو وكتها لان الأطفال بدوا يجيون
سداد/ بس عندي سؤال اخير قبل ما تروحين أريد اسالچ بالله وأريد جاوبيني شنو نوع علاقتچ بسردار
الق/ ما عندي اي علاقه وهو اخ عزيز عليه والله يشهد عليه ساعدني هواي لو ابويه چان صاحي ما يسوي ويايه مثل ما سوه سردار
سداد/ تحبي
الق/ يعني شنو تحبي من يا نوع من الحب تقصد عليه انت
سداد/ حب عشق فهمتي عليه
الق/ لا آني بعد قررت أعيش حياتي لأبني واخويه وأبويه وسردار عرض عليه اكثر من مره الزواج بس أني رفضته راح يبقى بالنسبه ألي إخ وبس
سداد/ اريد اسالچ وجاوبيني إنتي هم حبيتيني احچي الصدگ
وحمد لله ما انطت اي جواب بسرعه غلقت الخط بوجهي وتبدلت نظرتي عن انه أخذ كرديه ولأنه ألق (بنت العرب) غيرت نظرتي كلها
يتبع/
ملاحظة/ طبعًا هذا البارت قبل الاخير وباچر بأذن الله البارت الاخير ينزل وبسبب التعليقات السلبيه وهاي التعليقات تعبت نفسيتي قررت بس اختم القصة سداد وبنت ألعرب راح تكون الاخيرة وبعد ما أكتب اي قصه في حين عندي هواي قصص تفيد الناس وتوعيهم لكن الكلام بعد ما يفيد وبعد البارت الاخير بيوم راح احذف كل القصص الي نزلتهن واغلق كل مواقعي وآني أشكر الي چانوا يشجعوني وأتمنى چنت خفيفة الظل عليكم
تحية لكم من القلب الى القلب
دمتم في امان الله وحفظه
بقلم الكاتبة الزهيريه الزهيريه