سداد وبنت ألعرب
البارت الرابع والخمسون
بقلم الكاتبة الزهيريه الزهيريه
كذب من قال ان كل طير على شاكلته يقع
فأننا والله قد وقعنا على قوم لسنا منهم وليسوا منا
ولو سقطنا إلف سقطه ما وصلنا لدنو أنفسهم
الق/ مرات من تكون غرگان تتعلق بگشايه وآني من سداد أخذ آبني خلاني بدون عقل واتخبط ما اعرف شنو أسوي بحيث أريد طريقه بيها أتواصل ويه سداد وهو أخذ ابني وراح لاربيل يعني بقى گدامي بس أتواصل ويا بالموبايل وبالفعل اخذت رقمه من جيهان واتصلت بي وهو من رد عليه خفت لا يغلق الخط بوجهي لهذا ترجيته انه ما يغلق الخط بوجهي ويسمعني
سداد/ شوفي يا بنت الناس إي كلام راح تگولي صدگيني راح يدخل من الإذن اليمنى ويطلع من الآذن اليسرى وعليه لا تعبين نفسچ وتحچين وفري حنجرتچ اكو عندچ ناس سولفين وياهم
الق/ الله يخليك سداد والله نگطع على أبني بعد ما أتحمل رجعه ألي وشنو تطلب أني حاضره وما ارفضلك طلب
سداد/ ألق احنه دى ندور بحلقه فارغه هاي التوسلات نفسها من توسلتي بيه في سبيل ما أشتكي عليچ ولعبتي عليه وبقيتي الحمل وآني تدرين ليش چنت ما اريد الطفل حتى لا يصير مذبذب بيني وبينچ لأن اني مريت بهذا الشي ويه زوجتي السابقه هم يوم تاخذ يبرق بنتي ويوم ترجعها
الق/ سداد بروح أبنك والله دى أموت اذا مترجعه إلي خليني يمك بالبيت حتى لو خدامه لأبني وكل شي ما أريد منك
سداد/ ما اعرف إنتي ليش تنطين قيمه وقدر لنفسچ اكبر من حجمچ هو إنتي في بغداد من اجيتي لبيتي شنو چنتي غير خدامه لو شنو هسه آي كلام ما يفيد بعد نحچي بي بعدچ صغيره روحي ازوجي وراح تحلفين عشره بدل أيليا مع السلامة واتمنالچ السعادة
الق/ وغلق الخط بوجهي والظاهر حضرني لإن أبد بعد ما احصله حتى من إتصل بي ومن لوبت گلبي إتصلت بجيهان وطلبت منها تروح شوف أيليا
جيهان/ والله ألق حاليًا ما اگدر اروح لبيت أهلي لان صارت مشكله چبيره ويه سداد وصلت مرحله إنه أبويه طردني من بيته
الق/ وظليت أحلف بجيهان انه شوف طريقه بس طمني على أبني وبس إنتهى الإتصال بينه نهارت أعصابي وتخبلت يعني شنو نگطع كل إتصال إلي بأبني خلاص بعد ما أشوفه سداد آخذه وراح تبقى حسره بگلبي شوفته مثل ما گال سداد
ومر أيام وآني لا نفس تهدئ ولا گلب سكنت ناره وانقطعت عني اخبار أبني نهائيًا وبعد مرور أسبوعين وأني هذا الوقت كله لا ارد على سردار ولا ارد على رغد ولاحتى من تجي وتريد شوفني ما اطلعلها وحتى بنتها آني أحبها ومن تجي مو اطلعلها وآني مبلغه بيبي تگللها بعد ما أخلي بنتها يمي بيبي تگلي خطيه بنت رغد من امها تروح وتاخذها ومتخليها تدخل تموت بچي ولچ يمه ألق الطفله تبچي على عليچ شنو ذنبها وآني اجاوبها لعد من نحرمت من أبني بسبب أمها شنو ذنبي
وبيوم اجى سردار للبيت وجدو صاح عليه ومن دخلت شفت سردار گدامي سلمت عليه وردت أطلع بس
سردار بده بالكلام/ شبيچ ألق ترى ابنچ ما راح عند غريب ابنچ يم آبو وسداد من النوع ألي يخاف على اطفاله من الهوى الطاير وهسه يكونون معتنين بي أحسن اعتناء لآن هو أصلاً مخلي ايليا يم خالتي
الق/ أني أعذرك لان الراح أبني مو إبنك بس لو إبنك چان ما گلت هيچ
سردار/ والله عاذرچ وآني أكثر من مره إتصلت عليچ بس إنتي ما تردين لهذا اجيت بخصوص والدچ صار اسبوعين ما رايحه لهذا اجيت عليچ تروحين عليه
الق/ اي ان شاء الله يوم الخميس أروح عليه
وسردار ظل يباوع عليه متفاجئ مني بس بالحقيقه آني صرت ما أحس بشي من راح أبني تقريبًا گلبي تحجر
وبس طلع سردار اتصل بيه بس كالعاده ما جاوبته واجى يوم الخميس وهو إجى من حدود ساعه 9 واني چنت من قبل بيوم محضره غراض بحيث بس إجى سردار بدلت وطلعت
ومن صعدت ويا بالسيارة بس سلمت وهو ظل يباوع عليه وهو يسوق
سردار/ ترى لو حزنانه على ميت هم ما تحزنين هلگد شبيچ لخاطر ربچ ترى ابنچ موجود مو ميت لا سامح الله لعد سداد شيگول ابنه عمره سنتين ونص ودفنه بيده
الق/ صدگ تفاجأت بكلامه وجاوبته/ ما شاء الله اليوم صاير محامي لسداد الله يخثر لبنكم
سردار/ مو محامي بس المعنى إنه حمد لله ابنچ بخير وسلامه
الق/ بس ما جاوبته لإن احس كل طاقه ما عندي أجاوبه
وهو ما اعرف بيمن إتصل بس من وصلنه للشماعيه
چانت اكو سيارة عالية واگفه ومن نزلنه إني وسردار اكو واحد نزل من هاي السياره العالية ومن تقربنه عليه ظليت اباوع عليه آني هذا شايفته بس ما أذكر وين وهو بقى يحچي ويه سردار بس من گله سردار سيدي
اذكرت هذا منو هذا الضابط فرقد بس ما عرفته لإنه چان لابس مدني وآني كل ما أشوفه هو لابس زي الشرطة
فرقد/ آني راح أدخل وياكم سردار أريد أشوف شنو دى يصير جوه لإنه كلامه مو منطقي تدري ليش لإنه لو صحيح هاي الحادثه صارت بالمستشفى چان توثقت عن طريق تواصل الاجتماعي وحتى اذا ما توثقت من داخل المستشفى راح تتوثق من خلال أهالي المرضى ألي تعرضوا للاعتداء بس قبل ما أدخل اگلكم من هسه هنا مليون بالميه عدهم تجارة أعضاء والمدير عضو بيها
سردار/ وليش عضو ليش مو هو زعيم العصابه
فرقد/ لا هاي عصابات دولية ما يگدر يديرها مدير مستشفى لازم ألي يديرها يكون مسوؤل بالدوله حتى الاعضاء تطلع بحمايته وشبيك هذا مدير المستشفى من ينكشف يقدموا كبش فداء لو يطمطمون السالفه ويطلعوا خارج البلد هسه خلي ندخل
الق/ وفرقد يمشي واحنه نمشي ورا الى ما دخلنه للمستشفى الشماعية وگفنه شويه بالاستعلامات وبلغنه ابو الاستعلامات انه عدنه مريض ونريد نشوفه وجايين زياره اله
وأبو الاستعلامات گال روحوا للمدير ونمشي بقيادة فرقد والمدير چان گاعد بمكتبه من دخلنه وسلمنه عليه وعرف احنه جايين زياره أعترض على العلاليگ ألي شايليها اني وسردار
فرقد/ صح لازم نمشي على القانون انطوا العلاليگ بالاستعلامات وتعالوا وآني انطيت العلاليگ العندي لسردار وآني وفرقد رحنه ويه هذا الي شفنا بالمره السابقه وظلت حسره بگلبي ما عرفت هذا شنو شغله وكل سؤال يوجه فرقد اله جاوبه ما اعرف آخرها فرقد ضحك باستهزاء وگله أنت متأكد من نفسك إنه تشتغل بالمستشفى لان كل شي ما تعرف عن المكان ألي تشتغل بي
وصلنه لنفس الغرفه الشفنه بيها أبويه بالمره السابقه ولگيت ابويه نايم گعدته وهو شافني گعد على السرير وآني گعدت يمه وظليت أبوس بي واجى سردار ومن ردت اخذه للحمام وگفه فرقد ورفع الفانيله ليفوگ وشاف الجرح
فرقد/ هذا مو جرح هذا عمليه وإني متأكد مليون بالميه إنه مستأصلين كليته أخذوا للحمام وآني راح أنتظركم هنا لمًا أتأكد من شغله واخذنا للحمام لأبويه وبدينه نجلف بي وسبحنا ولبسنا وطلعنا ومن رجعنه لنفس الغرفه ما لگينه فرقد بس لگينه العلاليگ مالتنه جايبهن ابو الاستعلامات
وبعدني أوكل بأبويه دخل
فرقد وگال / مثل ما توقعت اكو اكثر من مريض عدهم جرح عملية إضافة بعض النزلاء فاقدين غير أعضاء منهم هنا شبكة تجارة الأعضاء بشرية
سداد/ آني بعد وفاة ابني صار گلبي متحجر صرت ما أحس بشي ومن دفنت أبني بيدي ولبست الأسود بعد ما نزعته أبد لهذا من عرفت بأبني من ألق وچنت واگف يم جدها اباوع عليه يجنن قررت لو اسويها دم ما اعوف الطفل الها وجدها چان ذكي كلش حل الموضوع بطريقه مرضيه بالنسبه إلي بحيث من رجعت للفندق وهو ويايه ما صدگت نفسي واخذت أغراضي من الفندق وطلعت وردت أرجع لاربيل بس ذكرت هذا بعده رضيع ورحت لصيدليه واخذت اله حليب ورضاعه وبطل مي وسويت اله رضاعه ورضعته واخذته بعدها لأربيل وهو گد ما بچي تعب ونام
بحيث الليل كله أمشي بالسياره وللفجر وصلت أربيل ويه اشعة الشمس الأولى دخلت بيتنه وهو من نزلته من السياره گعد ومن شافني گام يبچي ومن دخلت بي للبيت نزلت أمي وأبويه على صوت صريخه ومن شافوني أسكت بي تعجبوا ومن سلوني عليه اگللهم هذا أبني ما يصدگون وأي شخص يشوفه يگول هذا أيليا ويقصدون على ابني ألي توفى وبوقتها إتصلت على جيهان ردت منها تجي
ومن اجتي جيهان استلمتها أكس مربع بحيث حچيت كل شي گدام امي وأبويه وهي ظلت ساكته ما عدها اي جواب وأبويه طردها من البيت وأمي اخذت أبني وغسلتله بس ملابس ما عدنه ورجعت لبسته نفس ملابسه وهي تگلي بين ما أشتري ملابس اله بس شنو بس يبچي ويصرخ وأمي تگلي / آول ايام راح نتعب ويا هواي لانه متعلم على أمه واذا ترضعه من صدرها معناها يعتبر مفطوم
سداد/ إي ترضعها من صدرها هي گالت ألي
وأول يوم لليل صخن تخبلت عليه شلون أموت اذا صار بي شي اخذته ورحت بي للمستشفى وبين المغذي والعلاج نوعًا ما صار أحسن وليله كامله يله طلعنه وامي ويايه والليل كله نتناوب عليه على الكمادات حتى تنخفض حرارته
وبعدها ب10 ايام تعود علينه وحمدلله وشگد حاولت جيهان تصالحني بس اني خلاص بعد ما أريد احچي وياها وبعد ما خلصت هاي ال 10 ايام چنت ماخذ بيها اجازه حتى ابقى يم أبني ورجعت لدوامي ومن رجعت لدوام ترجيت المدير حتى يقبل إنزل شويه من وكت على مود ابني
وبيوم رجعت من وكت دخلت للبيت لگيت ليو بحضن أريا تخبلت سحبت أبني منها
أريا/ شبيك سداد ترى بس خليته بحضني لما تجي عمتي
سداد/ شكو جايه لهنا اني موگلت لا تجين لبيتنه بس صحيح عينچ گويه
اخذت يبرق وأبني ويايه وصعدت فوگ لغرفتي وأني خليتهم گاعدين على السرير ودى أبدل ملابسي ونفتحت باب الغرفة ما خطر على بالي إنه اريا راح تصعد ورايه لهذا ما أنتبهت منو دخل ما حسيت غير ايد على ظهري تتلمس بي ومن التفت چانت اريا تخبلت دفعت أيدها قوي
سداد/ انتي متستحين حمد لله المستحه زايعتها
وهي اتقربت عليه وحضنتني بقوة وهي تگلي ما تريد تنام بحضني مثل قبل
ودفعتها بكل قوتي وإني اگللها ليش ابو الدجاج ما شبعچ روحي ولي طلعي أستحي شويه
وسحبتها من أيدها وطلعتها خارج الغرفه وقفلت الباب وظليت ويه أطفالي أنتبهت عليهم وحمدت الله وشكرته لأن عوضني عن أبني أيليا المات بولد ثاني وكل شي يجي من الله حلو بس لا يجي من بني ادم لان أبن أدم يخازي ما يجازي
وبعد مرور 3 أسابيع إتصل بيه كوجر واتواعدنه يجيني يريد يحچي ويايه وأني اقرب صديق الي هو كوجر هو يعرف الفوگايه والجوايه لهذا انتظرته واجاني بالليل ودخلته للبيت وهو شاف أيليا تخبل عليه ظل يبوس بي واني ما عفته إلا تعشه ويايه وبعدها دى نشرب الچاي
گال كوجر/ سداد آني جايك بموضوع ولكون احنه اخوه أدخلت وما أريد تردني
سداد/ اذا اگدر تدلل بعيني
كوجر/ ان شاء الله تگدر اني البارحه اجاني إتصال من رقم غريب ومن رديت طلعت بنيه والله تحچي وتبچي وتگلي آني بشاربك آني سداد أخذ ابني مني والله ميته على شوفته أريدها من الله ومنك واعتبرها صدقه عن رووس اطفالك خلي يجيبلي ابني أشوفه لو 5 دقايق وياخذه والله ميته على شوفته
سداد/ هاي ألق يعني بعدها تلح
كوجر / سداد أنت تعرف شنو معنى الحرمان من إبنك لإن جربت هذا الشعور أعتبرها صدقة عن روح إبنك الله يرحمه وخليها شوفه واخذه منها
سداد/ خلاص آني راح أروح لبغداد عندي شغل هناك واخذه إلها شوفه ولا يهمك كوجر بس شوكت ما أعرف أحتمال هذا الأسبوع واحتمال الأسبوع الجاي يعني مو شي مؤكد
وعلى هذا الإتفاق قبلت آخذه إلها دقايق أشوفه وأخذه منها وبعد يومين من اتفاقي ويه كوجر رحت لبغداد وشلون رحلة چانت متعبه بشكل خصوصًا ويه طفل وما وصلت لبغداد غير حدود 12 و 45 دقيقه الظهر وردت أروح لفندق بس فكرت بحال ليو أحسن شي آخذه لامه وهم تغسله وتبدله وبالفعل رحت على بيتهم وقريب ما دى أوصل شفت 3 سيارات حديثه ببابهم وشفت ألق لابسه صايه وحجاب وكل شويه طب طلع طفل او طفله منغوليه وتصعدهم بوحده من السيارات وبعدها السيارات راحن تعجبت هاي شنو
نزلت من السياره وبيدي أيليا وهي رادت سد الباب بس من شافتني اجتي تركض على عليه واخذت أيليا وظلت تبوس بي وتحضن بي
سداد/ هاي جبته الچ شوفي وأخذه
الق/ شكرًا إلف رحمه على والديك الله يجعلها بميزان حسناتك
سداد/ أنتي شنو عندچ اكثر من اخ منغولي
الق/ لا بس اخ واحد عندي ليش
سداد/ قبل شويه شفت طلعتي أكثر من واحد ذوله اخوتچ عبالي
الق/ هااااا فهمت لا مو اخوتي ذوله بيهم معاقين مثل ما شفت واكواب شي ما بيهم بس آني اخليهم يمي لما يوجعون اهلهم واسلمهم إلهم مقابل ينطوني مبلغ مالي كل شهر أصرف بي على اخويه وأبويه وعلى نفسي وهاي الفتره دى أقره لإن اريد اقدم ثالث خارجي
سداد/ بصراحه اكذب إذا اگول ما عجبتني توها راح تدخل عمر 17 وهي تشتغل وتصرف على أبوها وأخوها المعاقين وتدرس وهاي چانت اول مره أدقق بتلاميح الق عيونها كبار بني وجهه بي طخة سمار وهي مو طويله اما جسمها حلو كلش متناسق ودائمًا اقارن بينها وبين آريا وطبعًا كل وجهه مقارنه ماكو واني چنت ناوي بس شوفه لايليا اخذه بس على هذا كلامها
گتلها/ راح أبقي أيليا بمچ اليوم وباچر آجي اخذه
يتبع/
تحية لكم من القلب الى القلب
دمتم في امان الله وحفظه
أختكم الكاتبة الزهيريه الزهيريه