✌🏻الجزء 1✌🏻
ملاك: (هازة كفوفها لسما كدعي وهي كتنهد) ياااا ربي حبيبي وهاد نهار عفو علية من هاد الوحدانية، ها نتا كتشوف كولها فين كيتمعشق خوتاتي كاملين تزوجو لبنات للي عرفت وللي معرفتش وانا غير مبروك عليك مبروك عليك حتى اما بغيت يتقالي مبرووك...
(دورت راسها كتشوف جيهة لباب واش كيشوفها ولا كيسمعها شي واحد خفضت صوتها كتر)
بغيت غير شي واحد يكون معقول وزوين ولباس عليه مطالبة واالو من هاد الدنيا يا سيدي ربي حبيب اه ويكون طويل وبيض صااافي..
(سمعت عياط مها ناضت بشوية) الاحد اركاابي
( زولت لباس صلا جمعت صلايتها طواتها حطاتها فوق النموسية ديال مها، علقت حوايج صلا وطلت على لمرايا هزت عكر ديال بصبعها ملست على راسو وطلات لشنايفها باش متجيش معيقة ونفسو دارتو لحناكها كتماصي بيه غير حشمت ديرو فوق عينيها او بالمعنى خافت تجي معيقة فالمكياج مسحت صبعها فيديها باش يمشي اثار العكر شافت فلمرياا ودارت يدها على خصرها)
هادشي غير عكر وكيف ردك اما الا مشيت لكواافورة ويلي ويلي لعروسة تنوض ونجلس انا بلاصتها...
(لبست قفطانها للي عاد خدماتو ليها ماماها وهي كدندن داها وداها والله ما خلاها... عاود رجعت لمرايا وكنشوف باعجاب فراسها) السر السر نازل علية غير تبارك الله علية وصاافي يا ربي منتعينش تأ.. وكان غير كان بابا يقرا علية شوية دالقران دغيا كتشد فية العين
(طلقت ظحكة على راسها فكت شعرها من لبانظة نزلت براسها نفضلاتو وعاد هزت شعرها بحال حضرت، غير شافتو فلمرايا وهي تعوج فمها)
ولكن منخافش على وجهي غير هاد شعر يشد علية العين ويشدها وعلى قبيلة كاااملة تفو خرجت عليه..
(كتشوف فشناتف للي طايرين لفوق) ماشي بالضرورة تحتارموني ݣاع هاد الاحترام ݣلسو شوية واش معندكم نفس غير نهز عيني فلمرايا توقفو فرحوني شي نهار وبقاو ناعسين يخخخ
( شعرها كان رطب ومرولي من لتحت شوية ولكن دوك بيبي هير للي كيكونو فالمقدمة كانو ممصنفش ما هوما روطب ما هو حرش ديما مشنتفين بزااف.. دهنت زيت الورد عليه مشطاتو وجمعاتو سفنجة ولكن دوك شناتف عندهم رأي اخر)
غير للي يݣرج باباكم عاود
( نعست دوك شناتف بمقيبطات لوات شال فالݣرونة مخلياه مرخوف عليها جا مع القفطان للي كان ثليجة فلݣرونة ولبيج لبست شربيلها شافت اخر مرة فلمرايا تبسمت مع راسها هزت تيليفونها وخرجت لقات مها جالسة مع مرت حنينها كيتعاودو ولكن الصوت كان غير مهموس...)
مي حلو: على سلامة فين تعطلتي ازين
الام: (تبسمت مع بنتها) هانتي اللون للي معجبكش جاك على مزيناتوو مرة خرا تبقاي تبعي هضرتي
ملاك: اه جا زوين، انا اصلا كولشي كيجي علية زوين
الام: (ميقت فيها وظحكت) هي غضبري على عريس ههه
مي حلو: انا بعدا ݣاع منسخا بيك تزوج اربي كيف تكون هاد الدار بلا بيها
ملاك: تكون كي بغات تكون انا بعدا نسخا بيكم جملة منوليش ندور راسي لجيهتكم
الام: زيدي تحركي ونتي للي ضربك ضااربك على زوااج رزقك يجي يجي
مي حلو: ݣاااع الا مالقينا للي يديك نزوجوك لخْلِيفٓة ولد ختي شهوة منو
ملاك: لواااه ايخان (مها خرجت عينها فيها) واخا نبقى بايرة منديييش
مي حلو: علاش اش ناقصو
ملاك: لا والو ناقصو غير الطولة والبيوضية ولفلوس
مي حلو: هانتي (هزت يدها وفرقت صباعها)
شوفي صباع شي طول من شي،
(وثناتهم)
وهنا كيرجعو قد قد
الام: لا حول ولا قوه الا بالله العلي العظيم
ملاك: هههه عندك امي حلو بلاصة لعقل
الام: بجوج معندكم عقل (دوزت نمرة راجلها كتصوني عليه علماتو راه كملو باش يجي يديهم لعرس.... خرجت مي حلو غير دازت ملاك حدا مها) دايرة عكر
ملاك: (خرجت عينها) لاا
الام: سبحان الله تزاديتي معكرة
ملاك: راه غير القفطان فلكرونة وتعكس على وجهي وطلع السر علية
الام: طلع الباكوور مسحي داك زبل من وجهك
ملاك: راحنا ماشيين لعرس ماشي لݣنازة وزايدون ݣاع لبنات كيماكيو انا جاتني فشوي دلعكر
الام: انا مك للي كبر منك عمرك شتيني خارجة دايرة هاد لعجب
ملاك: واااحتى نشوفك خارجة إماما راه 28 عام مافيها باش شوية..
الام: مجاتش فالعمر ابنتي جات بالحشمة وكان خليتي حتى نوصلو لدار العرس وديريه حدا لعيالات ماشي تخرجي بيه للزنقة وقدام باك
ملاك: والله مباين بزاف
الام: انا كنصحك ونتي ديري للي بغيتي (خرجت وبقات كتشوف حتى بغات تمسح شنايفها وهي تراجع مشات لبست عباية كحلة وتبعاتهم خرجو وصلو الطموبيل وهي تحني راسها باش ميقشعهاش باها نيشان ركبت حدا مرت حنينها اللور..)
وصلو لدار العرس للي كان خو مرت عمها شحال كانت كتكراشي عليه ولكن منين سمعت انه مباغيش وحدة خدامة محملاتوش سلمو على الناس وجلسو فالصالون فين كاين غير لعيالات،
بقات غير كدور عينها أغلبية بنات العائلة مزوجات وعاد للي كاين صغار عليها بوليداتهم بقات غير هي للي مزال متزوجت حتى من خوتاتها مزوجات للي على برا ولي فمدينة اخرى، وكنت العادة جاها السؤال المعتاد المكروه مزال متزوجتي؟!!!
ملاك: (بظحكة صفرا) مزال
....: ايييه اوا معليش صبري وكان واخا راك ابنتي كبرتييييييي
ملاك: ههه نصبر مالي جالسة بالجوع ولا فزناقي راني الحمد لله فدار با معززة مكرمة خدامة على راسي (مكانتش مها حداها) اش غيزيدني زواج الا كان بحال زواج الدّل (ووركات على الداال)
....: (تقرصت) علامن كتلوحي الهضرة ابنت الزهرة؟!!!
ملاك: ملحت على حد مالكي اخالتي حادة غير مقرووصة انا غير قلت معندو باش يفيدني زواج الا مكانش شي زوااااج بقيمتو نيييييت اما الا جينا نشوف حقا خاصني نتزوج غير حيت كبرت (دارت إشارة زعما لا حول ولا قوه الا بالله العلي العظيم) الله يكبرنا على طاعة الله ورسوله وربي الا كان مكتب علية منتزوجش راه خيييير ولا نعتارضو حتى على كلام ربي
....: (دارت ابتسامة استهزاء) من الخير اااه بالصح
ملاك: (تعصبت ولكن بقات محافضة على الهدوء) داكشي للي كاين اخالتي حااااددة
....: اممم فين مك
ملاك: مشات الكوزينة (باغا تنفاجر عليها وفيها ميسمعها الهضرة ولكن هاد السيدة بنت عم باها معروفة بصداع يعني غتكبر المشكل وغتبقى هي الخيبة للي محتارماتش كبر منها ناضت من حداها.. هزت تيليفونها شافت فالساعة ودخلت الفايسبوك طالعة هابطة كتبرد الفقسة حتى جاها ميساج من عند بنت خدامة معاها)
*الزين غدا غنخدمو نهار كامل ديري بحسابك وعلمي مالين الدار*
فرحت كيعجبها تبقى فالزنقة كتر واخا غتلقى مشكل.. طفات الكونكسيون وتطلقات الموسيقى اكيد الشعبي للي ناضت تشطح وهي بقات غير كتشوف فالمعزومين كتبسم كتلاحظ للي ماكيين وجوههم الي مزوجات واش ظاحكات واش ناشطات واش مغبونات غير كدور عينها وكتسنى بفااارغ الصبر امتى يتحط لغداااا وكانت الريحة ديال الدغميييرة كتعطعط وكتشهي!!... جات مها عندها غمزتها باش تجي ناضت من تماك تبعاتها لبيت فين كانت شي مرا غليضة وقصيرة تبسمت حيت قصر منها كانت لابسة كولشي بيض والذهب ذهب ذهب... سلمت عليها بإستغراب وعرفت لبلان فيه شي عريس تبسمت بخجل واخا هي اصلا محشمناش
الام: اوا هادي هي بنتي ملاك (تبسمت مع بنتها) هادي خالتك نجية للي ساكنة فبني ملال
ملاك: (مرققة صوتها وكتنعم فيه)
لباس عليك اخالتي!!
(كتفكر غير فصهد بني ملال ولكن معليش لكليما فالذمة)
نجية: (كتعبرها بعينها مزيااااان) تبارك الله الزهرة والدة غير الزين
ملاك: (تبسمت) الله يطول فعمرك اخالتي
الام: اوا خالتك نجية بغاتك لولدها احمد الا كتاب
ملاك: (معجبتهاش سمية كتفكر كيف دلعو ولكن هانية بقات محافظة على الحشمة باغية تعرف المفيد وتشوف تصويرتو وشنو خدام)
نجية: اوا ولدي راه زيييييين رجال بغا شي وحدة زينة وحشومية
ملاك: الله يجيبنا فصواب اخالتي...
نجية: مهم ولدي كاين فالطالياان (قالتها وكطولها)
الام: انا نمشي نطل على الكوزينة هانتي ابنتي هنا..
ملاك: (فنفسها... الله غنمشي ناكل بيتزااا نابولي وباسطا ونغني مع زوجي لعزيز بيلا تشاااو اااح على روووما والرومانسية... طلعو لقلوب فعينيها حتى صدمتها)
نجية: ولكن كاااايݣول يرجع حدا ميمتو
ملاك: علاش؟!! (بلا متحس)
نجية : واش يدير فبلادات الناس يرجع وراه داير علاش يرجع بخييرو وخميرو
ملاك: اهااااه (شافت فالباب بدات احتمالية متقبلش كطلع)
نجية: بحالا معجبكش الحال
ملاك: لا مقلت والو ههه علاش يعجبني الحال ولا لا
نجية: شتي ولدي راه لباس عليه رزقو يعيش بيه دواااااار
ملاك: وشنو مشا يدير فالطالياان؟
نجية: (عوجت فمها) الموهيم.. انا نصورك باش يشووفك نتي عجبتيني يعني غتعجبيه (جبدت تيليفونها تصورها)
ملاك: (دارت يديها على عدسة الكاميرا وبقات متبسمة)
كفاش تصوريني وريني زين لعزارا بعدا عاد نشوفو قضية تصوريني
نجية: (جبدت تيليفونها عندها) كفاش نوريه ليك ههه راه رااجل علاه مزال نتي باغية تخيري وتختاري
ملاك: (هزت حاجبها) اه مزال، مزال نعزل ونتشرط ونكركب بنادم للي مجانيش على هوايا
نجية: (خنزرت فيها) شتك بحالا كترادي معايا؟!!
ملاك: (مبردة) خالتي راه من حقي نعرف حتى انا معامن غنكمل حياتي
نجية: ولدي زييين مرتو اللولة حمااقت غي حيت طلݣها
ملاك: اااااه مرتو اللولة؟!! علاه فايت فيه زواج؟!
نجية: (ببرود) اه فايت مزوج جوج عيالات وحدة ماتت وحدة طلقها
ملاك: اممم (فنفسها) علم الله التالتة كيف غتصيفطوها
نجية: شوفي ابنتي هو معليه والو راه برزقو غيبقى يجي يزورنا جوج دلمرات فالعام ومعايا ميخصك خير وحتى شقا غتشقاي غير علية وعليك
ملاك: سمحيلي اخالتي مكنتزوجش لعيالات
نجية: ها!!
ملاك: ياك نتي باغياني نكون عروستك نتي نخدم عليك ونبقى معاك اشمن ربح عندي فهاد البيعة وشرية
نجية: اش راكي سايرة تݣولي
ملاك: شوفي بلاااا متفرعي لية راسي من قبيلة وانا مرطبة معاك ونتي مخرجة عينيك فية بحال لبومة وجالسة تعبريني بحال غتزوجيني لشي امير قالك بخيرو وخميرو ييخ مزال مبغيتو تنقارضوو (خسرت وجهها) قالك ميخصك معايا خير لا باااينة!! عليها وحدة صيفطتوها لربي والتانية طلقتوها
نجية: (طلعت فيها وهبطت) هاكا غتبقاي بايرة
ملاك: اللهم بايرة ولا نعيش مع شعشبونة بحالك خلاص علية الا كان شي زواج فحال هاكا مبغيتووش
نجية: وااا ديريها فين تجيك ابنت الزهرة
ملاك: دااارلي نيت للي مخلية لغدا دجاج محمر وجاية ندي ونجيب مع بوونتة ( شافت فيها مخسرة كمارتها خرجت وزدحت لباب كتقلب على مها تعاود ليها وعاد جعرت منين لقات لغدا تحط والناس بدات تغدا طلعت للكوزينة لقات مها جابسة كتعاون وكيوجدو فتحضير الطبق الثاني لحم بالبرقوق واللوز)
الام: بنتي اجي حدايا حتى نحطو حنا وكولي معانا فين السيدة للي كانت معاك
ملاك: (مقدرتش تهضر حيت كانت الكوزينة عامرة ولكن جاوبت مكرهة) راها لتحت
الام: اممم (من شوفات بنتها باينة معجبهاش الحال طمرت حتى جات نجية وقفت عليهم بصوت عالي)
نجية: واااا منين ولدتي هاد الجنية البايرة نسيتي تربيها الآلة زهرة
ملاك: (وقفت) ولدتها من ط(دارت مها يدها على فمها)؟!!!!
الام: سكتي نتي (قوست عينها فنجية وتبسمت حطت المغرف، وربعت يدها وشوفاتها حارين فيها) عرس الناس انجية حرام يتقلب بجنازة تااقي الله فعمرك وسيري تغدااي
نجية: واش عارفة مݣالت بنتك ولا نتي مولفاها طبيعة
ملاك: (مقدرتش تبرد اعصابها وقفت ياله ماشية لجيتها جبتها مها عاود من يدها) طلقيني عليها اماما والله متبقى فيها
....: ماشي هضرة هادي الآلة نجية لبنت مابغاتش صافي ماشي تجي تقولي كلام على لالة زهرة
الام: (بحزم) ملاااااااك خرجي من هنا، ونتي انجية يا تخرجي بروووحك يا واحد فينا للي يخرج من هاد الكوزينة (لوخرا شافت كولشي ضدها هزت يدها دخلت صباعها تحت فولارها ونتفت نواضرها للي نصو بيض نصو حمر)
نجية: ها هي الا بقات فيكم (تمت خارجة كتنݣر حتى العرس مبقاتش فيه...)
الام: للي معاه ربي ميخاافش.. (ضارت عند بنتها) شنو وقع باش جاية لمرا تحلف علية انا للي عمر وحدة مهزت الراس فية هادي جاية تنتف نواظرها علية!!!
ملاك: والله اماما مدرت والو هي جلست علية لواه خاصك تخدميني ونتي غير بايرة ومعرفت شي هضوور بحال انا الا متزوجت هاد ولدها غنموووت انا اصلا مبغيت لا زواج لا زبل عااااايشة حياتي هاكا حسن
الام: سكتينا من هاد الهضرة وهي مزال عندي معاها الهضرة بقاي حدايا هنا متمشيش (جلست فالقنت ملاك مغبنة صحتها كترجف حيت مجاوباتهاش ومضربتهاش معاودتش هضرت تسربا لغدا ولعيالات بداو يمشيو عاد تجمعو صحاب الدار وحطولهم يتغداو ملاك دغيا نسات وبدات تاكل.. كملو جمعت معاهم وبقات جالسة حتى جا باهم يديهم دارو معاهم باش لغد ليه يرجعو يحضرو لحنة لعريس وحتى اليوم الموالي عاد يمشيو يروحو لعرووس..
مشاو فطريق هي غير كتسمع باها ومها كيهضرو بقات كتشوف فالسرجم وصلو للدار كانت عامرة كنا ديما 2 عمامها بعيالاتهم وعاد باها.. كرهت هاد العيشة المجموعة واخا الدار كبيرة الا ديما كتحس براسها غير ضيفة معندها بيت فيه خصوصية مكتلبس على خاطرها ومعمرها عقلت تجبدت فالسداري كيف بغات احترام لعمامها وجدها وضياف للي على طووووووول... غير وصلت دخلت لبيت مها سبقت باها باش تبدل على خااطرها لبست بيجامتها وبقات حتى جات مها للي عاودت ليها شنو وقع وزادت من عندها... )
ماما واش ماشي بزااف على هاد العيشة؟!!
الام: (تنهدت) وشنو المعموول؟!!
ملاك: بابا ݣاع معندو حتى رزق جامعو نشريو فديور الضحى ومنبقاوش فهاد زحاام انا والله حتى عييت ودوك لبز مكيخليونيش نعس حتى ل12 دالليل عاد كيبان ليهم الظحك واللعب شحال من مرة مشيت للخدمة ناااعسة غير الشاف ديالي شحال من مرة غوت علية منين كيلقاني مكملة نعاسي فلبيرو
الام: وشنو ندير ابنتي علاش انا مكرهتكش تزوجي باش حتى نتي تكوني بدارك وحدك وديري وليدات
ملاك: اوا ونتي؟!!! وهاد تمارة؟!!
الام: انا ولفت ابنتي كوووووونت نهضر ونغضب ولكن دابا ولفتهم وولفوني وخدمتهم مشرووكة ابنتي حتى هوما ولفو بيناتهم
ملاك: آش جاب السكنة للخدمة
الام: ابنتي انا وباك وصلنا لخزييت على هادشي مبغاش قالك مو كتمووت وتوصيه على خوتو ميتفرقش عليهم
ملاك: والعذاب للي عايشين فيه (بزفرة) انا غدا غنتعطل الخدمة كتيرة
الام: قوليها لباك ابنتي
ملاك: بابا غير كيسمع مني الخدمة كيقولي جلس فداركم بلا متصدعيني عرفتي اماما والله مكرهت شي انتقال من هنا
الام: بوحدك؟!!
ملاك: يالهي معايا
الام: هههه واش كظحكي علية ابنتي ولا على راسك فين غتمشي
ملاك: بغيت نمشي غير #فاس ياك بعيدة على #صفرو غير ب30 كلم.....
اصبحنا واصبح الملك لله...
فاقت ملاك على صوت الريڨي ديالها ناضت وهي شادة فراسها كما العادة منعستش بكري عاود..
حطت رجلها للارض ودغيا قفزت رداتهم للسداري طلت بانلها شي واحد ناعس تحتها وحطت رجليها فراسو تأفأفت زحفت بقاعها حتى لاخر السداري عاد وقفت جمعت فراشها ولمطت الطلميطة قدات لوسايد هزت كاشميرة ديالها حيت كان الجو خريفي، ووسادتها وخرجت لوسط الدار كانت الحركة فيها حيت كولشي كيفيق بكري مهضرت متكلمت نيشان مشات لبيت مها دقت مجاوبها حد عرفت لبيت خاوي دخلت كما العادة مكرهة من هاد المعيشة للي واخا كبرت فيها مقدرتش تولفها مكترتاح غير فالخرووج لدرجة كانت اجتماعية وشعبية مع كولشي الا مع الناس للي ساكنة معاهم واخا كولشي كيبغيها.. هزت من لماريو حوايجها كان تريكو واسع كحل فيه رسمة مظلة بالابيض سروال بويفراند دهنت إكخو فقط لوات شال كحل شافت فلمرايا وهي مخنزرة تمت خارجة من بعد مهزت صاكها دازت لبست ڤانس وخرجت من لباب بلا متعلم حد ولا حتى تفطر معاهم.. شافت الجو كان مغيم عݣزت دخل جيب جاكيط ديالها حنات راسها وتمت زايدة غير خرجت من الحومة دازت من حدا القهوة ديال باها وعمامها زادت حشات راسها فالارض كتقلب على تاكسي غير لقات ركبت ونيشان للسونطر ديال مدينة صفرو فين كاينة خدمتها...
ملاك: خويا عفاك التجهيز..
(جبدت تيليفونها صونات على لبنت للي خدامة معاها)
فينك امدام... هاي هاي على الناس.. بصحتك الآلة اشمن قهوة؟!! اممم #بيرلا إوا مزيان انا نسبقك للخدمة (قطعت بقات مراقبة طريق حتى حطها قدام المديرية الجهوية للتجهيز والنقل جبدت 10 دراهم عطاتهالو رد ليها 3دراهم خداتها وهبطت دخلت كتلقي التحية من هنا وتبتاسم مع هادا وهادي، بحال كانت فدارهم فحبس وخرجت للحرية.. دخلت المكتب فين كاين 4 ديال لبيرويات كانت هي صغيرة فيهم جلست وكرشها كتغرغر بالجوع.. هزت تيليفونها فتحت الكونكسيون لقات ختها مصيفطا ليها اوديو فلواتس غتجي هاد لعشية وغديرها مفاجئة لدارهم تبسمت عاجبها الحال ردت عليها)
بغيتي تسكتي لماما لقلب اش غتفاجئي بعدا يقادو ليك غير لبيت فين تنعسي نتي وراجلك..
(عاود صيفطات ليها اوديو)
الصاطة متنسايش دوك لبياسات للي وصيتك عليهم وفلوسهم راهم واجدين ختك عندها لفلوس كي الروز..
(دخلت صاحبتها جايبة معاها ساشي فيها الرايب وملوية فيها املو حطاتولها فوق لبيرو.. طلت عليها وشنو فيها)
جات معاك شي فاطر فبيرلا وشي يضرب لمسمن على قلبو
حكيمة: وبااااز الآلة قولي غير شكرا والله يرحم الوالدين اربي ديك الخلصة ديالك فين ماشية
ملاك: باغية نشري حديييدة اختي
حكيمة: على ظهري
ملاك: حمدي الله نتي بعدا جاتك غير فلفطوور (تبسمت وشافت فعزيز للي كتغدا معاه) تبارك الله على السي عزيز
عزيز: ههه ياك بعدا
ملاك: خاصك تزيد صداق للمدام
عزيز: بلا نتعمريها عاود (هز شي ضوسيات) ديري بحسابك كولشي رجع اللور بقيتي غير نتي (تم خارج)
حكيمة: هههه وجهك مقزدر
ملاك: فاش بقيت؟!
حكيمة: حقا مقلتش ليك المدير علمنا السيمانة جاية عندنا فورماصيون فمكناس ولا كازا مزال نبات بالظبط كولها فين غيمشي
ملاك: سيمانة!! حلفي بالله
حكيمةة: مالك فرحانة انا بعدا مغاداش غندخل نقولو بنتي بقيتي غير نتي وداك خينا
ملاك: انا بعدا غادية ايييتوووب واخيييييراااا
حكيمة: ههه سيري احبيبة تمتعي محدك صغيرة غير غديري وليدات غيتقصو جناحييك
ملاك: لقيت باهم بعدا اودي خليها على الله.. خاص غير بابا ميعكسليش
حكيمة: ان شاء الله ميعكسش
ملاك: حقا مقلتش ليك لبارح شنو وقع لي فلعرس.... (بقاو مجمعين الخدمة كتكون قليلة كولشي مشا بقات هي كتكمل شي حاجة عاد رجعت للدار...)
مع دخلت للدار لقات ختها وراجلها جاو والمفاجئة كانت حاملة وكرشها واخا صغيرة ولكن باينة فرحت ليها بزاااف حيت عارفاها كانت تحماق وتحمل وشحال دوزت عند الاطباء وحتى دوا العرب...
بقات كتشد فيها وفرحانة وفوسط ابتسامتها قلبها تكمش وخلعة خلات معدتها كترجف تفكرت العمر كيمشي وهي باغيا ولاد وشي عريس مزال مكتاب للي كانو جاوها شي 5 ضروري كيكون شي ديفو يا على مانضتها يا مكيعجبهاش هو يا طلع شمااتة واخا كانت #كتبغييييييييه وخلاها ومشا..
حنات راسها من بعد محلات ابتسامة خفيفة سلمت على حميد وسولت على احوالوو وباركات ليه وهي تجرها تعنقها مرت حنينها للي حسات بيها وقرات افكارها
مي حلو: (جبدتها كتهمس ليها) كولشي عند الله قريب الهبيلة غير صبري
ملاك: (تبسمت) مبقا صبر هههه ان شاء الله امي حلو مكاين والو.. نوض انا نبدل قبل ميدخل بابا
مي حلو: سيري ابنتي الله يرضي عليك
ملاك: (ياله سدت باب لبيت وهي تفتحو ختها) الناس يا ختي تقلوو
نعيمة: هه (لمست على كرشها) شوية
ملاك: (حطت يدها على كرش ختها) معرفتيش شنو عندك؟!
نعيمة: ولييد الا كتاب
ملاك: بوزنطييط وصااافي جيبيه اختي كيشبه ليك ماشي عزي بحال بااه
نعيمة: ههه ياك لمك يسمعك حميد يشنق عليك زعما راكي عزيزة عليه
ملاك: وحتى هو عزيز علية ازمر غير كلمة الحق وصافي بغيتيني نكذب
نعيمة: الله يمسخك
ملاك: ههه (كتبدل حوايجها)
نعيمة: مزال مهداك الله تجي عندي شي تسافيرة
ملاك: لحزقااااااا اختي
نعيمة: يا ختي غير فين كتجمعي هاد لفلوس 4 سنين مكتصرفيش منهم
ملاك: (دارت يدها) خمسة وخمسين السلامة كتحسبيلي
نعيمة: باااز
ملاك: اختي بغيت نشري شي حديدة نتي عارفة من نهار كنت كنقرا أمنيتي نشري شي حديدة
نعيمة: الله يسهل عليك احبيبة
ملاك: اميييين.. قوليلي نتي مزال هنا
نعيمة: ماشي بزاف غدا غنمشيو لفاس نضربو شي دويرة ومن موراها مكناس باش نشوفو دارهم اوا ومن بعد رجعو شي سويمينة هنا ونمشيو
ملاك: بالصح!! (فكرت فيها) انا عندي غيينيون لمكناس مزال معرفت بالظبط يمكن مكناس ولا كازا مهم المدير غيرد علية الا مكناس لصقي فية نمشي معاك
نعيمة: لصق فيك ههه كوني هااانية
ملاك: عرفتي نبغيك تمووتي وتلسقي فية حتى تحشميهم راكي عارفة بابا مكعرر فهاد القضية بكي وسخفي قولهم كنتوحم عليها واالو هاد السيدة تبقا معايا
نعيمة: ههه عاد الا عرفك باغية دفعي ميطاسيون
ملاك: اختي راه تقهرت بهاد العيشة ديال السردين وكان غير كان عندي بيتي بوحدي نصبر ولكن راه بزااااف
نعيمة: (بتنهيدة) عاارفة للي كاين وكان اصاحبتي ضربتيها بشي تزويجة
ملاك: ومال اختي رجال دايرين صف برا راه واالو القضية ناااشفة
نعيمة: غااا صبري راكي مزالة صغيرة
ملاك: ههه اه مزال كرضع صبعي
نعيمة: دابا تزوجي وتولي ترضعي حاجة اخرى
ملاك: شكون!!
نعيمة: صبعك ههه..
ملاك: ها!!!!!
نعيمة: هههه مهم منين يخوي حميد الكوفر غنخلي ليك لعيبة ديالك تماك حتى ندخلها بوحدها
ملاك: كفاش صبعي؟!!
نعيمة: ههه انا مشيت..
اصبحنا واصبح الملك لله...
كما العادة ملاك دارت روتينها الصباحي للي كل نهار كيعصبها كتر وكتر ولكن مكتقول والو حيت باباها صعيب اولا وتانيا مها كظل تصبرها وتالتا حيت كتحشم من ناس ديال الدار حيت حتى هوما معندهمش ذنب فهادشي وصية حداها للي مرة دعي معاها مرة دعي فيها....
لبست حوايجها كانو عاديين سروال تريكو فولارها سبرديلة وصاك مشات للخدمة بلا متقولها لحد لدرجة ولات عندها عادة وحلاوة عندها تخرج كتسلت بلا ميشوفها حد شي مرات كتخيل انها عايشة بوحدها وكتخرج بلا ميقولوا شي حد فين ماشية ومنين جاية شافت فلباب للي اونفاص معاها كما كتقولو الباب للي كانت كتشوفو جنة ورجعت كتشوفو جهنم.. كملت طريقها خدات تاكسي ونيشان لخدمتها.. عرفت ان الفورماسيون كاينة فمكناس قنعت للي خدام معاها وكان مرشح وبقوة حيت عندو تجارب تمشي هي ويرشحها للمدير وحيت عزيزة عندهم كاملين بعفويتها وتقشابها وحتى خدمتها ملقاتش مشكل رجعت للدار فرحانة لقات كولشي كيوجد باش يمشيو يحضرو للحنة ديال لعريس وحتى رجال معروضين
ملاك: (متكية فوق النموسية) ماما راه غدا غنمشي لمكناس
الام: تالفة!! فاس ماشي مكناس
ملاك: لا ماشي على حساب العرس انا غنمشي على حساب الخدمة عندي فورماسيون سيمانة تماك راه شحال وانا كنغيط بيها
زهرة: بينك وبين باك
ملاك: والله الا صدقتي شماتة معندك كلمة (جات بغات نضربها وخبعت وجهها)
نعيمة: ههه غير كظحك
زهرة: توريني فهاد لبونتة
ملاك: نتي للي والدااني قصيرة زعما كفاش خوتاتي كولهم طوال الا انا متفاهماتليش هاد القضية
زهرة: راه قلت ليك لقيناك غير حدا لبركااسة
نعيمة: ونااااري واش كتسكتي نتي.. ماما شوفي بغيت تمشي ملاك معايا لمكناس، اصلا من لهيه دايرة باش نرغبكم عليها
عفاك رغبي بابا يخليها (كتمسكن وحاجة يدها على كرشها كتماصيها) راكي شفتي خالتي تماك بوحدها وكتنعس بكري تمشي غير تونسني والله كنقنط وحتى حميد غير كيوصل تماك كيخرج عند صحابو
الام: (دوروها فالوسط) نقولها لباكم ابناتي
ملاك: علاش نتي ݣاااع معندك كلمة عليه!!!
نعيمة: سكتيييي... اه عفااك غير قوليهالو هامتي شنو بان ليك غدا ندوزو العرس معاكم ومن بعد نطلعو لمكناس حنا هي تخدم وترجع تجلس معايا
ملاك: اهااه حتى هادي مزيااانة
زهرة: حتىىىىىىى نهضر مع بااكم...
نعيمة: صافي مزيان...
(ملاك لبست جلابة لوات شال على راسها شافت ختها كتماكي وجهها.. بقات كتشوف فيها هدا قانون فدارهم نهار تزوجي خرجي حتى عريانة ديري للي بغيتي الا كان راجلك راضي ولكن محدك تحت جناح واليديك غتمشي بقانوونهم هوما، ممنوع تحيدي فولارك ممنوع زناافي والدوراان الا في حدووووووووووود ممنوع المكياج ممنوع صحاباااات وخيطي بيطي...
ناضو خرجوو مشاو حضرو المناسبة للي كانت مها متخوفة ينوض صداع عاود ولكن ديك الجنس مجاتش اما ملاك كانت كتقلب عليها حيت حتى مشات للدار عاد تفكرت شي كلام كان خاصها تقولها تزيد تقليلها السم..
رجعو للدار قبل ميدخل باها ينعس جمعت حوايجها للي اغلبيتهم من للي جابت ليها ختها هزت من بزطامها 500 درهم حطاتها تحت حوايج مها، وهادي عادة كل مكتخلص كتعطي لمها فلوس وزادت حطت ليها 200 درهم دارت بحساب انها غتكون فاس يقدر تخرج وتبغي تشري شي حاجة..
دخل باها تفافات حيت كتعطي لمها بلا خبارو ماشي حيت مغيبغيش ولكن هو عندو فكرة أن مها ممحتاجاش وكولشي كيوصل حتى لعندها وكولشي كيعطيه ليها وهي كتبغي تعطيها حيت كتفرح وكيعجبها الخال واخا رفض امها ولكن عارفة من لداخل ان مها عاجبها الحال...)
ملاك: بابا
الاب: (رشيد) قالتلي مك غتمشي لمكناس
ملاك: اه على حساب الخدمة انا مبغيتش ولكن فية النوبة باش نمشي نحضر لشي اجتماعات الا بغيتي متمشيش نشوف ندير شي شهادة ولا معرفت
الاب: وميصلاحش تبقاي تمشي وتجي
ملاك: بابا هاكا قلت ندير ولكن نعيمة لسقت فية وبغاتني نمشي نبقى جالسة معاها عند دار ناسها ومع الحمل معرفت ولات عاطياها غير لبكى قلت متخليهاش بوحدها الا بغيت نتا زعما
الاب: اممم اوا رد لبال لراسك ابنتي وفوقما صونيت تجاوبي الله يرضي عليك
ملاك: اه ضروري ابابا (باستلو كتفو)
تصبح على خير
(خرجت من تماك هازة كويشتها ووسادتها.. باها ماشي شي واحد قاسح ولكن خاصك تلتازم معاه بالشروط ديالو باش يكون معاك مقاد.. مشات للبيت فين كتنعس لقاتهم مزال مجمعين حطاتهم فالجنب قلبت على ختها بعينيها مكيناش هي وراجلها وعيب تمشي لبيتهم دق عليهم.. بقات كتفوه وعينيها نايمين هزت تيليفونها طلقت لويفي دخلت لواتس لا ميساج لا والو للي كانت معاه تفاارق معاها بسبب تافه وفنفس الوقت جاااارح بالنسبة ليها وتخطى الحدووود..
وكان اتاني واحد كيرفض تكون بيناتهم علاقة زواااج بهاد السبة..
محست حتى نعست جالسة حتى فيقها عمها قادات نعاسها ولكن بدا كيطير وهي كتفكر فالإكس كفاش حلمت معاه بالحرية والاستقلال لدرجة وافق على شروطها كاملين مقابل يتعاونو على زمان ومكانتش رافضة المهم كانت غتستااقل وتعيش الحب معاه حتى صدمها برفضو فاااخر دقيقة وهوما مخطوبين..
دارت السيري للي متبعة بقات كتفرج فيها حتى نعست...)
اصبحنا واصبح الملك لله..
ملاك دازت للخدمة خدات الأوراق من عند المدير عطاها فين غتمشي ولي غيكون كولشي على حساب الخدمة خرجت نيشان ركبت مع ختها وراجلها مشاو لدار العرس للي كانو كيركبو فالطموبيلات ركبت معاهم ماماها ومرت حنينها،
مشاو ناشطين والمسافة كانت قصيرة بحكم صفرو وفاس بيناتهم 30 كلم ،
بقاو متبعين الطوموبيلات حيت غيمشيو لدار لعروسة هي اللولة عاد من تماك يمشيو للقاعة.. مشاو معاهم #لبنسودة هبطات مها ومرت حنينها وهوما بغاو يضربو دويرة حتى يبغيك يمشيو للقاعة ويعلموهم
نعيمة: ناري فين ساكنة!! بعيييدة صدقت مكنعرفش فاس والو
ملاك: (ميقت فيها) لا غير قريتي 3 سنين فظهر المهراز وصافي
نعيمة: هههه هانتي قلتيها قرينا (كتعاود لراجلها) بابا 6 دلعشية كيخصنا نكونوها حدا القهوة ديالو مشغلوش واش تكون شي ماتيير مهمة فلعشية ولا لا مهم 6 يشوفنا
حميد: ههه وايلي
نعيمة: والله مرة مرة للي كنا كنسلتو لتاجموعتي ناكلو صلاد فروي اااح تشهيتو احميد بزااااف
ملاك: حتى انا
حميد: ختك كتوحم ونتي لاش
ملاك: تعز فية صلاد فروي اراجل ختي لعزيز
حسن: لا لا بلعكس بالفرحاات اخت مرتي لهبيلة ههه
ملاك: (تبسمت كتشوف فشواريع فاس... فاس والكل في فاس للي قلبتي عليها تلقايها.. مشاو لتجموعتي جلسو فوحدة من دوك لقهواي للي تماك وكولشي تخصص صلاد فروي طلبو 3 وبقاو مجمعين)
حميد: دابا نتي ساهلة دفعي وراقك القنصلية طلبي ڤيزا، غيقبلوك
ملاك: حتى انا فكرت فيها واكترية منين نعووومة حاملة دابا نقدر ندفع نجيبها مع لولادة
حميد: حتى مي غتجي لعندي باش تقابلها اجي معاها ومنها ديفولاي شوية متعرفي ضبري على شي راجل تما
ملاك: الا هو مضبرش علية منقلبش عليه انا اوا صااافي داكشي للي بقا
نعيمة: اجي حقا سمعت سيهام مرت عمي كتقول على شي خطبة
ملاك: اماسي خطبة هاديك راها مزعزعة، عرفتي هاديك مو فاش تمات خارجة قالتلي كتبيلي نمرة تيليفونك فورقة وشحال كتخلصي
نعيمة: هههه يمكن غير فضول منها
ملاك: الله يهديك انعيمة وكان غير هضرت مع راس طارو دولدها كنت غنݣر بلا ميسول اصلا ميشمش من عندي ريال ونيت نسولوا باش نشوف الا عندو شي براكة يسلفهالي باش نشري شي حديدة ساعة بجووجنا كنا داخلين على طمع
حميد: هههه معندك مديري بيه الراجل للي ميصرفش عليك معندك مديري بيه انا كنتعجب للي باغيها تخدم عليه
ملاك: منهم عداااد اخااي حنييد غير الله يلاقيني مع شي بوكو حبة بحالك
نعيمة: (خنزرت فيها نعيمة)
ملاك: )بغات تقادها) ويكون غير ولد الناس وظريف, مالكي كتخنزري؟!
نعيمة: باااز... (كملو مشاو يكريو تكاشط يحضرو بيهم نعيمة دازت لكوافورة دارت ميكاب خفيف جايها زوين انا ملاك اكتفت بعكر خفيف احتراما لقرار مها عيات ختها فيها غير تحمل ولا دير ايلاينر ولكن مبغاتش كانت مقتنعة بقرار مها هي مكرهتش ولكن معندها غراض باش تفادا شي صداع ولا مشاحنة بينها وبين مها وعلى والو... عيطو ليهم مشاو للحي بقاو فالطموبيل حميد طلع عندهم..)
نعيمة انا نمشي نجيب روشارج ونجي
نعيمة: خلي حتى يجي حميد
ملاك: لا لا حشومة مكيبغيش يشد من عندي درهم
نعيمة: ههه وداكشي لي كيعجبك نتي
ملاك: ههه حيت مزال غنبغيه فشي حوايج اهم من روشارج د10 دراهم، وايلي نضيعو وجهها على 10 دراهم!!
(خرجت كانت الدنيا عامرة بزاف قلبت على شي حانوت والو دارت الدورة السيكتور لاخر مشات دارت روشارج بقات كتخرب فتيليفونها حتى تساطحات مع واااحد غير بعدت راسها شافتو برد ليها لما فركابي رمشت جوج مرات وقلبها غيسكت كتشوف واحد داير كمامة وداير نايڤية على راسو فيدو هاز سيف ولا موس كبير مفهمتش داك لعجب مهم طويل ولاوي بحال فواطة فيها الدم، والدم باين جديد..
صوتها بدا ميرجف)
عفاك غير مضربليش وجهي (مدتلو تيليفونها) هو للي عندي والله غير هاكو وخليني نمشي راني غير يانا للي عند ماما (بغات تبكي)
عفاك اخويا انا معروضة غير لعرس هنا مكنعرف حد هنا....
ملاك: (مقدرتش تهز عينها فقط كتشوف يدو للي هازة داك لمووس وبقايا ديال الدم فيدو طبعت معاها شي سخونية غريييبة مع صباع رجليها حتى عينيها ضببو وصوتها كيرجف) عفااااك اخويا مضيعنيييش
....: نتي بنت الحومة؟!
ملاك: (حاضية غير يدو) لا خويا انا غير معروضة اصلا اول مرة نجي لحي بحال هاكا
...: (متقل فهضرتو للي كانت مخضرة) كفاش هاد بلان عاود حي بحال هاكا!!
ملاك: والله اخويا متفهمني غلاط (مكتشوفش فيه.. بغات غير تبكي ساعة والو تحجرو عينيها حاضية غير داك لموس ولكن صوتها قاضي غرااض.. مداتلو التيليفون) هاكو خودو
...: (شدو من عندها تبسم التيليفون لافيشور كولها مشخشخة) هدا زيدي عليه 20 درهم وشريها باكية ماركيز
ملاك: والله مكنكمي
....: (عض على لسانو مخسر وجهو مد ليها التيليفون) شريييه محدووو رخييص
ملاك: شنو هو؟!
شخص: اورطييݣا.... (Ortèga) ياله اصاااحبي
....: (ياله ضار يشوف شكون عيطلو ملاك خطفاتلو التيليفون من يدو هزت جلايلها وعطاتها بجرية وحدة كتجري بحال شي واحد عاد مطهرينو.. تبعها حتى ضربت الدورة ضار فحالو وتم ماشي عند للي عيطلو...)
~~~~~~~~~
ملاك: (محبست جرا حتى لحدا دار العرس قلبها كان غيسكت شافت فتيليفونها) الحمد لله يا سيدي ربي هادي والتووبة هادي والتوبة الحمد لله الحمد لله..
(جاتها السخفة ياله بانت ليها مها جاية جيهتها دارت ابتسامة ممبينة والو والا مبقات لا مكناس لا والو..) ماما
الام: فاااين كنتي اديك ؟!!!
ملاك: (بحرا كتهضر) مشيت درت روشارج وجيت كنجري خفت تكونو مشيتو
الام: بانتلك الروشارج غير هنا الحماارة خلعتينا عليك راه راجل ختك مشا يقلب عليك
ملاك: هو ديما روطار عمرو لحق شي حاجة
الام: ها!!!
ملاك: والو والو انا نقول لنعيمة تصوني عليه راه علمتها قلتلها غير ندير روشارج وصافي
(بحرا كترد النفس عاد قدرت دور تشوف داك السيكتور مناش هربت على الله يبانلها تشوف غير كمارتو ساعة واالو غير برااهش للي تم كيشطحو على انغام الدقة العيساوية للي بدات ركبت فالطموبيل كولها فين كينݣر عليها ولكن هي معندهاش الطاقة باش تهضر معاهم ولا تشرح بقاو متبعين موكب العرس للي مشاو مباشرة لقاعة العرس للي كاينة فطريق موزار كانت قاعة زوييينة من الدخلة للي كانو السرباية تعرضو المدعوين كاملين بالحليب وتمر معمر ملاك غير كتدور عينيها ضنات غتكون شي قاعة غير عادية بحكم السيكتور ماشي شي حاجة ولكن بانلها العكس قبل مدخل القاعة دازو على الدقة المراكشية وعلى عيساوة جوج فراقي واحد حدا واااحد وكلها كيحنت التاني وجريدة كانت كولها ضوااو دخلو للقاعة كان عالم اخر كولشي واقف مع الدخلة ديال العروسة كيديرو صواابهم الا هي جلست كتشرب حليب وترد الروح بيه دازت على كاسها وكاس ختها ومها..
باقي بين عينها غير ديك اليد للي هازة داك الموس وصباعو للي فيهم دم قديم وعلم الله ديالمم.. بلعت ريقها كتخيل لوكان قتلها ولا دار فيها شي فضيحة بقات غير كتحمد الله.. تهزات العروسة بالعمارية بقات متبعاها مكتصفق موالو غير حاضيااها مقوسة عينها فيها هنا طيح هنا طيح.. عاد تمو العائلة جالسين حداها فنفس الطابلة بقاو مجمعين وهي غير كتشوف..)
نعيمة: العرس كولو بااااݣص تي نوضي خضري عينيك وجيبينا شي عريس فاسي
ملاك: (تبسمت نص ابتسامة.. هزت راسها كتشوف الناس مكستمين والحالة وكااااين التيتيز) اودييييي
نعيمة: ههه خارجة من الاعماق
ملاك: بحال داك شكل ديال شي مش حداه صندوق دالسردين ومقادرش يهز شي وحدة
نعيمة: هههه حالتك صعيييبة اوا نوضي شطحي متعرفي
ملاك: لهلا يحيييه نوض نكوز ل20 باش يطلع لي واحد
نعيمة: ماشي كوزي يا البعر ولكن غير باني فالصووورة على هاد لسان للي طول منك غتبقاي هاكا
ملاك: بلاش منو ݣاع... عندك شي عكر (طلبت العمر بحال طالبة ݣارو)
نعيمة: ههه اه نوضي معايا لطواليط حتى انا نقاد راسي...
اورتيݣا: ديالكم داك العرس أجمي؟!!
...: ديال بنت القادوسي ممعروضش ولا!!
اورتيݣا: (شاف فيه ديك الشوفة ديال بنيتك وكمل كيمسح شعرو بالفوطة)
هو هدا انا مشيت كولشي يتسد مزياان وغدا لقاكم مع 6
(بقا كيتمشى على رجليه حتى خرج للشاريع.. فين كاينة قهيوة، تماك حاط الموطور ديالو ركب فيه دار الكاسك ديمارا وكعط خلا غير الصوت موراه...)
~~~~~~~~~~~~
زهرة: ملاك مالكي معجبتينيش
ملاك: والو غير عييت وصافي واخا نخرج جريدة اماما
زهرة: حطي قاعك الارض قالك تخرجي غيكونو غير لعزارة للي معمرينها
ملاك: اوا داكشي علاش بغيت نخرج
زهرة: (خرجت عينها فيها اصلا عينيها للي كيبانو حيت لابسة لتام)
نعيمة: جعت
ملاك: نتي جاية غير على كرشك
نعيمة: بااز الآلة بحال أنا للي من قبيلة وانا ناكل فالحلوة..
زهرة: اللقوى شوهتووني يا بنات الهم...
(كملو العرس مع 12 دالليل خرجو برا) ماما واش بالصح غترجعو لصفرو؟!
الام: اه ابنتي نعسو فدارنا وراك عارفة باك راه سيمانة وهوما يطلبوه يخلينا نجيو هنا
نعيمة: وشحال والناس كيرغبووكم تباتو عندهم
ملاك: لعساااك اماما معندك فين ترجعي لداك الحي تمااك غير لكلوشارا والله ومااتمشي حتى نعيط لبابا
الام: سكتي حشومة نص ديال هاد الناس للي هنا من تماك
نعيمة: ناري ويسمعووك ازمرة
ملاك: (هزت كتاافها) معارفين واالو (ودعت مها للي رجعت لفاس مع عمها ومرتو ومرت عمها ومرت حنينها...
وهي بقات مع ختها وراجلها للي قررو يبقاو فاوتيل هاد الليلة وغدا عاد يمشيو لفاس مكانش عندها مشكل مدام راجل ختها للي غيخلص عليها مشاو لbarcelo للي كاين فالسونطر دخلو وهي كضور عينها عارفة راجل ختها طااالق اللعب ومهلي فراسو وفختها داكشي باش كيعجبها تخرج معاهم مرة مرة) باين غيكون غالي
نعيمة؛ نعام؟!!
ملاك: والو والو..
نعيمة: بففف عييت ظهري غيتقسم
ملاك: قوليلي واخا غنسواك للمرة الألف على ميجي، حميد دغيا تقبل..
نعيمة: ملاك زعما نتي اول وحدة كدافع على هاد الموقف واخا نتي ختي صغيرة الا خديتها من عندك مكنتسناش بنادم يتقبلها ولا لا حيت اصلا ماشي شي حاجة للنقاش بالظبط ديك القضية خط احمر حتى واحد ممنحقو يتناقش وداك عريس الغفلة راه قالتها لي ماما
ملاك: (قفزت) شكون؟!
نعيمة: معرفت هداك للي دابز معاه بابا عرفي راه معندك فيه خيير
ملاك: شي مرات كنقول كنتسرع دغيا كندابز خاصني نبقى نهضر مع بنادم بشوية
نعيمة: معندك متفهمي اختي صافي موقفاش الدنيا
ملاك: صافي سكتي راجلك جاي.. قالك مواقفاش الدنيا نتي باتي معنقة راجل وانا قوليلي مواقفاش الدنيا
نعيمة: هههه
حميدة: نعووومة ترتاحي شوية؟!
نعيمة: اه عييت بزااف
ملاك: انا بغيت نجلس شوية هنا معليش
حميد: اه خودي راحتك غير متخرجيش برا (مد ليها كارت ديال باش تفتح بابها) حدا شومبر ديالنا نيت، محتاجة شي حاجة اختي؟!
ملاك: لا لا لهلا يخطيك اخويا غير سيرو ترتاحو.. (هوما طلعو وهي بقات كتشوف مكاين غير لݣور والناس لكلاص هزت صاكها للي دايرة فيه بيجامتها وبقات كدور دخلت المطعم للي كان فيه ضو خفيف وشي حاجة قليييلة للي كتاكل قشعت كاين شراب تما خرجت بقات ماشية حتى خرجت فلابيسين كان مقاد زوين ضو خفيف فيه كل مرة كيتيدل موسيقى كلاسيكيه كاين بنادم للي جااالس تماك للي واقف.. تمشات منيشة على كرسي للي كيكون من شبكة معلق فحديدة وكيطيطش بيك جلست فيه حاطة صاكها حداها كتسمع الظحك وكاين لي ناض كيشطح على انغام الموسيقى، للي كيشرب كانو عينيها غير كيسكانيو مكيهداش كتبرݣݣ واااحد بواااحد...)
ملاك: (شحال كيعجبها تكتاشف وتعرف الناس كفاش كيحسو وهوما ملعقيين مكرهتش تكون حتى هي ملعقة ولكن ماشي لدرجة الهوس همها هو تشري طموبيل ديالها ومن بعد تشري دار هادي هي قائمة ديالها بقات كتشوف وفنفس الوقت تفكرت شنو وقع معاها وغير ربي للي حفظها من لݣريسااج تبسمت منين الشفار ظحك على تيليفونها جبداتو كتشوف معندهاش فالتيليفون شي حاجة يعني يكون غير كيقضي الغراض وكانت ياله خداتو سباب تشخشيخة للي فيه هو نهار تفارقات مع صاحبها للي غير تفكراتو عبست كانت حتى ولفاتو وقلب عليها.. ضورت عينها شافت واحد كيشوف فيها حتى هي بقات كتشوف فيه حتى تم جاي عندها حشمت وطلقت رجليها للأرض باش الكرسي يحبس من التحرك)
....: بوحدك؟!
ملاك: حم اه علاش؟!!
...: معرفتش قلت نجي نجلس حداك ولكن خفت تكوني مع شي واحد
ملاك: لا.. انا بوحدي (بقات كتحنزز فيه شنو لابس تريكو بيض لاسق عليه فوقها ڤيست سروال دجين وݣاط مبووݣص بقات غير كتحنحن واهم حاجة زهر بالداخل ديالها دارت ابتسامة عريضة🤡)
مد يدو عندها...
يوسف: انا يوسف
ملاك: (تبسمت ومدت يدها) ملاك
يوسف: مشرفين أنسة ملاك (ضار من مورااه جر كرسي وجلس حداها)
جاني فضول شنو مخليك جالسة بوحديتك هنا
ملاك: (تبسمت) عادي جلست وصافي ضرووري نكون مع شي واحد باش نجلس
يوسف: لا لا ولكن معرفت بغيت نعرف وصاافي
ملاك: معرفتش ههه معرفت منقول جيت هنا عجبني الجو وبقيت جالسة ممحتاجااش تفلسييف احم زعما عادي
يوسف: اممم نتي من فاس؟!
ملاك: وكان كنت من فاس شنو غيجيبني نجلس لوطيل
يوسف: (حك على حنكوو) سؤال بليد ياك
ملاك: ههه شوية
يوسف: (تبسم) منين نتي
ملاك: ههه صفرو
يوسف: غير فالدوورة مجريين عليك مالين الدار
ملاك: ههه بحال داكشي
يوسف: اشمن موصيبة درتي عاود
ملاك: (ظحكاتها الطريقة كفاش دغيا دخلو فالموضوع وفنفس الوقت كتشوف دوك سنينات وتبوݣيصة وزعورية بحال شي مودل لبناني ولكن هدا كان زايد نغزة حيت بخلاصة الزين الفاسي)
واالو غير هوما للي ظالميني ومكيفهمونيش
يوسف: نتي غير ديريها قد راسك وقولي متيفهمونيش
ملاك: حتى نتا معاهم زعما قلت نتا هو للي كتفهمني
يوسف: (شاف فيها سكت وتبسم) شنو مخليك بوحدك
ملاك: اولا انا مع ختي وراجلها هوما طلعو يرتاحو وانا جيت هنا تانيا ماشي عيب نجلس بووحدي مرة مرة الواحد تيبغي يديفولا غير مع راسو
يوسف: اممم نقطة تاالتا
ملاك: ههه معرفتش نتفكرها ونقولها ليك
يوسف: انا نتسنااك.. باقية نتي غدا هنا
ملاك: لا غدا غنكون فمكناس ان شاء الله
يوسف: علاش؟!
ملاك: (تبسمت) وعلاش باغي تعرف
يوسف: غير خفت عاود تهزي راسك وتقول بعد غدا انا مشيت لكازا
ملاك: ههه لا حدي مكناس ومن موراها راجعة لصفروو ان شاء الله...
جات سرباية مقربة ليهم طابلة مسحتها بزيف و رجعت للكريسة للي فيها طلبات الزبائن حطت موخيتو وبلاطو خشب صغير فيه انواع فرماج مقطعين قطع صغيرة وبلا ديال نودلز..
السرباية: شي حاجة اخرى موسيو!!
يوسف: ملاك شنو تاخدي
ملاك: لا شكرا (حطت يدها بامتنان على صدرها)
يوسف: (شاف فالسرباية) انا نولي نعيط عليك..
ميغسي..
(هز عصي السوشي كلا من النودلز وتبعها بنوع ديال الفرماج ملاك كتشوف فيه كفاش كياكل )
منين عينيك فيه نجيبو ليك
ملاك: هههه لعشا للي كليت انا حسن من هاد ايندومي
يوسف: هههه (هز شرب من العصير ). شنو كليتي
ملاك: كنت فعرس (لعبت بحواجبها بحال كتقلي ليه السم بقا كيشوف فيها وهو كيتبسم حتى حشمها وحنات عينها) حم..
يوسف: (رجع كياكل) هي معرݣاها مزيان
ملاك: امممم
يوسف: بالصحة لالة (هز بفرشيطا فرماج ومادو لجيهة فمها) نشركو طعام.. (تبسمت مدت يدها هزت الفرماجة وكلاتها بقا كيشوف فهاد الحركة وتبسم) اوا
ملاك: اوا زيد عليها ايوا وشري حليوة
يوسف: نعام!!
ملاك: والو غير تفكرت شي حاجة
يوسف: هه (جاتو فشكل مكتسولوش الاسئلة للي ديما كتطرح عليه) بون انا يوسف
ملاك: بالصح!!
يوسف؛ ههه هاكا قالولي منين كبرت
ملاك: سبحان الله ݣاع مبيناش فيك
يوسف: ههه نتي بزااف.. (كياكل واخد راحتو) قريتي فاس؟!
ملاك: اه 4 سنين خديت فيها الإجازة
يوسف: فاش؟!
ملاك: علم النفس
يوسف: اممم عليها
ملاك: عليها شنو؟!
يوسف: رتاحيت معاك فالهضرة
ملاك: ممكن (تبسمت فخاطرها كتخيل راسها فالعمارية معاه ومرة مرة كتصبع لنجية ومرت ولدها)
يوسف: انا كنت ايكونومي خديت الماستر.. ودابا تنقرا العام الثاني ديال القانون
ملاك: علاش!!
يوسف: غير تخصص تيعجبني وصافي بغيت نعرف حقوقي ههه
ملاك: اممم مزيان
يوسف: الراس شحال ما عمر مزياان
ملاك: صراحة انا كان همي غير نخدم وصافي تكون عندك كرطونة تخدمك
يوسف: وي عرفتها غير منين خديتي الإجازة على 4 سنين
ملاك: ههه العام اللول كنت دايرة العربية معجباتنيش داكشي باش بدلتها، والاجازة خديتها بمونسيو (كذبت) وغير ف3 سنين
يوسف: اممم وعلاش مبغيتيش تكملي فهاد التخصص اجي شنو خدامة بعدا
ملاك: فالتجهيز
يوسف: وشنو علاقة علم النفس بالتجهيز
ملاك: عندها علاقة انها كتعتابر إجازة وداكشي للي كان مطلوب فالخدمة
يوسف: (دار تعبير فوجهو انها لا علاقة وكمل الماكلة)
ملاك: (ضورت راسها ولسانها كياكلها باغية تعرف خدمتو ولكن مزعمتش تسول)
يوسف: (مسح فمو بموشوار) الحمد لله.. متأكدة ملاك مبغيتيش شي حاجة
ملاك: تأ
يوسف: اوكي.. فين خليناها
ملاك: (طانزة) فقرايتي وعلاقتها بخدمتي هه
يوسف: (تبسم) ماااا متتبغيش دخلي فكرة انه الانسان تيقرا شي تخصص ويخدم خدمة للي معندهاش علاقة بقرايتو
ملاك: يمكن داك الانسان كيكون ملزم ومعندوش اختيار ونسبة الحظ باش يخدم قليلة داكشي باش الواحد كيبغي غير يلسق فأي خدمة مع الدولة إجزاة علم النفس اقصى طموح فيها استاذة للي هي اصلا ولات صعييييبة وشرووطها #ممقبولاش...
يوسف: نتي من داك النوع للي تيقولو لبلاد معطاتناش وكدا
ملاك: (زفرت ومن تعابيرها كانت جدية) اممم بلادي كنبغيها وعمرني كرهتها ولكن صعيب ديما تاخد للي بغيتي فيها اكترية منين مكتكونش كااالة صحيييحة
يوسف: معرفتش انا تنقول للي قرا وعرف كفاش ييوصل غيوصل
ملاك: ولكن ايوسف ضروري خاص تكون خلفية للي دعمك كتكون مبنية عليها دوك الطموحات ماشي كنعمم ولكن الأغلبية كيقراو يخدمو وبعاتدو يقراو غير باش يعمرو راسهم (تبسمت)
يوسف: (قوس عينو فيها كانت اول وحدة بلا مباشر وبلا حتى متعرفوو مزيان كتقولو غير حيت نتا عندك باك واصل داكشي باش وصلتي) ممكن
ملاك: هه (هزت حواجبها كتلعب بيهم وهادشي فيها قعيدة) كاينة ماشي ممكن
يوسف: (كظحكو بتعابير وجهها) علاش مكملتيش فعلم النفس ودرتي كابيني ديالك كنتي غتوصلي
ملاك: انا كنشكيلو بالعݣر وهو كيقولي اش خبار دراري ههه
يوسف: ههه معاك بالصح
ملاك: ودغيا حكمتي علية غنوصل متعرفني انا كلي عقد ميمكنش نداوي شي واحد وانا براسي خاصني نداوا هه
يوسف: حنا كاملين تنحتاجو مرة مرة نمشيو لطبيب
ملاك: مقلتش العكس ولكن انا غير كفوووؤة باش نكون مختصة نفسانية ماشي حيت العقد ولا شي حاجة اخرى ولكن معنديش الطاقة والقدرة نسمع لشي واحد ويفرعلي راسي بمشاكيلو، انا بغيت غير نخدم وصافي يعني حبا فالمادة لا غير
يوسف: (بقا كيشوف فيها وفهاد الصراحة) المادة ماشي هي كولشي
ملاك: ههه عاود!! لا اسيدي ماشي هي كولشي ولكن هي كتر من النص (تبسمت وحركت راسها كتأكد كلامها)
يوسف: ممكن
ملاك: هه.. (طيراتو انه تقرص)
يوسف: عجباتني الصراحة ديالك
ملاك: ممكن هه
يوسف: (بقا كيظحك) بون.. تتعرفي فاس بزااف يعني جايلاها
ملاك: ماشي بزااف أغلبية كنت من لفاك لصفرو قليل فين كنا كنسلتو مرة مرة
يوسف: كنتو؟!!!
ملاك؛ انا وخواتاتي وشي مرات بنات الجيران
يوسف: شحال عندك من ختك
ملاك: (مدت يدها مفرقة صبعانها) خمسة
يوسف: خايفاني نعينكم هه
ملاك: ههه لا وانا الساتة
يوسف: تبارك الله خوت دراري؟!
ملاك: لا غير بنات
يوسف: مزيان كولكم فصفرو
ملاك: بقيت غير انا فالدار بربعة بيهم تزوجو وحدة فكندا والتانية بلجيكا وزوج فالمغرب وحدة فأزرو ولوخرا فمارتيل
يوسف: والخامسة
ملاك: (بابتسامة حزينة) الله يرحمها
يوسف: اه سمحيلي الله يرحمها
ملاك: امين.. كانت ماتت صغيرة ولكن انا من ديما كنحسبها مع الفرقة
يوسف: صعيبة
ملاك: معرفتش، صراحة انا مشفتهاش كنت مزال متزاديت ولكن ماما كانت كتهضر عليها بزااف داكشي باش ديما فبالي .. ديما كنحسبها كاينة (قبل ميسول) ماتت بسخانة
يوسف: (متأسف) الله يرحمها
ملاك: اميين.. ونت؟!
يوسف: انا عندي خويا كبير مزوج فاس وختي صغر مني.. حقا شحال فعمرك؟
ملاك: ماشي حشومة تسول بنت على عمرها!!!
يوسف: عادي الواحد كيتقبل السن ديالو واخا يكون قرب للربعين!!!
ملاك: ها!! (بلا شعور) بزاااف عليك تتكون عندي 40...
يوسف: هههه غير ظاحك معاك ناري نتوما لبنات حتى لعمر وكتبغيو ديما تبقاو صغاار
ملاك: ماشي مسألة نبقاو صغار ولكن تأ... مهم انا عندي 27 عام طالعة ف28
يوسف: وايلي مبيناش فيك
ملاك: (تبسمت) عارفة كولشي كيقولهاالي
يوسف: أهم حاجة يكون الواحد متصالح مع ذااتو
ملاك: هاااء عيقتي (جات بغات تنوض وهو كيموت بالظحك هو دار يدو بجوج لجيتهتها بلا ميقيسها)
يوسف: حبسي حبسي ههه والله كتباني صغييورة كيوووت ولكن عندك عقل كبير وزوين تبارك الله
ملاك: (تبسمت) عارفة
يوسف: (صونا تيليفونو مباشرة ضار كيشوف فجنابو هز جاوب) فين اعشييري.. اه بالصح.. انا بقيت مع واحد (شاف ملاك وتبسم) الأستاذة نسيت راسي معاها..
(ملاك فرحات ولكن مبينتش حدها دارت ابتسامة ديال الخاطر وقالت وجهها كتشوف شكون هاز التيليفون وكيهضر معاه)...
صافي اعشيري غدا نكون تم.. (قطع)
صاحبي كان معايا نسيتو وانا تنهضر معاك
ملاك: ياكما تقلق
يوسف: لا مبيناتناش هاد لخصاايل مدام جلست وخديت راحتي الا عاجبني الحال، ياكما ديرونجيتك الآلة ملاك؟!
ملاك: لالا..
يوسف: مزيان اوا فين خليناها
ملاك: معقلتش
يوسف؛ خدامة فصفرو؟!
ملاك: اه
يوسف: كنتي قلتي غتمشي لمكناس كونجي؟!
ملاك: لا عندي غيينيون تماك شي سيمانة ومنها نجلس مع ختي
يوسف: اممم يعني ساهلة تهبطي لفاس
ملاك: علاش؟!
يوسف: باش نتلقااو
ملاك: ههه معرفتش على حساب
يوسف: الا مجيتيش انا نطلع عندك فين عندك لوطيل ولا غتجلسي مع ختك
ملاك: مزال معرفت بالظبط شنو ندير
يوسف: بون غناخد نمرتك باش حتى انا نعرف شنو درتي
ملاك: نمرة!!!!
يوسف: وصافي متدفعيش شبابك غالي علينا راها غير نمرة
ملاك: (خيبت كمارتها فيه بمعنى بنيتك!!)
يوسف: (تبسم) 06
ملاك: ههه (فتات نمرتها عليه صونا عليها فلبلاصة طلعت نمرتو وهي تشوف الساعة كانت 4) اويلي 4 دصباح
يوسف: (تأكد) اه
ملاك: (وقف) نمشي نعس ناري عنداك يكونو قلبو علية وملقاونيش
يوسف: كانو غيصونيو العالمة
ملاك: بسبابك تعطلت
يوسف: ههه نشوفك غدا؟!
ملاك: معرفتش شنو غيديرو لوخرين
يوسف: مهم انا صونيت عليك متنسايش قيدي نمرتي عندك واخا
ملاك: واخ.. (وقفت وهو يبتسم..)
.
يوسف: اووو (كيشوفها طولها وكيتبسم شافت فيه مخرجة عينها بمعنى ياك لباس) صافي، نوصلك لاشومبر
ملاك: (تبسمت) لا. تصبح على خير
يوسف: تصبحي على خير حتى انا غنمشي للدار
ملاك: جلس تبات
يوسف: دار باك لقديمة
ملاك: هه غير بغيت ندير صواب وصافي (شيرت بيدها) باي باي (ضارت وهي فرحانة خرجت عينها كتعوق فوجهها بالفرحة ) يا ربي من ديما كنت كنطلب الزيين ونصلي وندعي وخرجلي هاد الخير وييييلي وكان كنت كندير قيام الله استغفر الله وكان راه هبطلي سيدنا يوسف.. (مشات طلعت لشومبر منقزة دروج مفرنسة بدلت حوايجها وبقات كطل من شومبر حتى كيبان ليها خارج غير على رجليه قطع طريق وركب مع شي واحد تبسمت وهي كتشوف وكتشطح بقزيبتها رجعت الناموسية تلاحت فيها طايرة فسماااا...)
ملاك: (ناضت طلقت شعرها وتكات كتلعب بخصلات شعرها من لتحت وتبسم وعينيها كيبريو اول مرة واحد يهضر معاها بلباقة كان باين انسان واعي ومثقف ولباس عليه وزعر كتفكر باتسامتو ومني كيظحك ليها وسنيناتو ولباسو حتى طريقتو فالماكلة وكفاش كان كيشوف فيها وهي كتهضر واعجابو بطريقة تفكيرها هاد 2 سوايع للي جلست معاه حسات براسها فعالم اااخر هزت تيليفونها بالغلط دخلت للكاميرا حتى كيبانو ليها دوك شناتف طالعين ونيفها اكبر عضو فوجهها خيبت وجهها خرجت دغيا ورجعت دخلت les contrats قلبت على نمرتو وكتفكر بابتسامة إلحاحو باش يعاود يشوفها وباش حتى تقيد نمرتو حمقاااتها كتشطح بقزيبتها واخا ناعسة) يس يس يس
ناااري انا غير الا ظحكلي شي واحد كنتزعط بففف ولكن هادا راه يخليك مزعوووطة فيه واخا معرفت شنو يدير..
(مشات كتقلب فلواتساب تفكرت الشفار منين ظحك على تيليفونها وهدا مقال حتى كلمة خايبة)
لمݣرد بوه للي فيه لفهامات شو سيااادو الشفار بن الشفار لاااخر
(قلبت تصويرتو كان دايرها بقات كتزومي كان ظاحك لابس لبلدي استنتاجات كان فشي عرس ولا شي مناسبة تبسمت لا اراديا ياله خرجت من التصويرة وهو يصيفط ليها)
Coucou
(خرجت عينيها ولقاتو كيكتب)
باينة كنتي تتبرݣݣي فتصويرتي
ملاك: هههه (ظحكت ودارت يدها على فمها)
يوسف: شديتك قيطي
ملاك: ههه تيقتي راسك كنت غير دايزة
يوسف: اممم لواتس عندك مارشي
ملاك: تصبح على خير
يوسف: غدا نصوني عليك
ملاك: اوك
(خلاتو كيكتب وخرجت من لكونكسيون عاضة على شنافتها)
بففف تحصلت... هه عادي عادي الا متشديت الي م نتشد غدا
(ناضت مشات لطواليط عاد بقات كتبرݣݣ فالشومبر للي كانت خطيرة جهة كطل على الشارع وبالظبط كتشوف فالبرج وجهة اخرى كطل على لابسين دارت شهيق عمييييييييق حتى حست بريتها دخلها لهوا عاد زفرت متبسمة كانت غير بديباردور واخا بارد الحال شوية.. سدت السرجم، ولكن شكون كيحس بشي برد دخلت الحمام شافت راسها فلمرايا كتقاد شعرها دايرة الفرقة وكتخبع الݣصة من مور ودنيها، وتبسمت كتعاود شي هضرة قالتها وكتشوف كفاش كانت كتبان مرة ظحك على راسها مرة تفكرو وتفرفر رجعت لبلاصتها شعلت التلفازة دارت MBC2 قطعت الصوت طفات الضو وبقات غير كتشوف 1 2 3 وهي تنعس...)
~~~~~~~~~~
اصبحنا واصبح الملك لله
ملاك: غير فاقت هزت تيليفونها هو اللول كانت 9 صباح تعجبت كفاش فاقت بكري واخا مخداماااش وكان ممكن ترتاح وعاد ناعسة حتى ل5 بقات فبلاصتها كتقلب على شي طوف زوينة تحطها فلبروفيل بقات كتشوف مطولا مترددة تحط وحدة واقفة ولا جالسة.. فالاخير خرجت خلات نفس لفوطو للي كانت من ݣوݣل تصويرة ديال وحدة عاطية بظهر جالسة على كرسي كتشوف فلبحر بالبيض ولكحل طفات الكونكسيون ودخلت كتعاود تقرا الكونڤيرساسيون القصيرة للي دازت بينها وبين يوسف وكتفرنس بوحدها.. معرفتش واش تصيفطلو ولا لا ولكن فكرت انها احسن هو يسول.. عاود شعلت الكونكسيون كتمنظر فلفايس حتى صونات ختها..
وي...
نعيمة: فايقة؟!!
ملاك: من قبيلة عاد فقتو نتوما
نعيمة: حميد فاق بكري ودابا جا فيقني قالي نهبطو نفطروو لتحت
ملاك: صافي انا لبس دابا.. (ناضت ياله بغات تجمع فراشها وهي تلوحو على الارض بغات تجرب حياة الترف شوية ومتجمعش اول مرة فراشها لبست شنو كانت لابسة لبارح حيت جابت غير بيجامتها) عنداك غير يكون هنا يحسابلو معندي ملبس... (تفقست ملقات حتى عكر خرجت عند ختها دخلت مدرمة دارت ايكخون وعكر خفيييف رشت من عطرها وخرجو هبطو لتحت فين كاين بوفيه مفتوح ختارو شنو بغاو ومشاو حدا بيسين تحت إصرار ملاك للي بقات كدور عينها واش يبان ولا لا....)
نعيمة: (شافتها بحال كتقلب على شي حد) مالكي؟!!
ملاك: والو حقا امتى غنمشيو مكناس؟!
نعيمة: ياك نتي حتى الاثنين عاد خدامة؟!
ملاك: اه
حميد: غير نتغداو نمشيو الوالدة كتسنانا فلعشا
ملاك: منزيدوش زعما شي نهيير
حميد: علاش آنسة ملاك؟!
ملاك: غير نتسراو فاس وصافي عجبني الجو فيها
حميد: الجو للي فاس هو للي غتلقاي فمكناس وحتى تماك غنخرجو نساري ختي فين بغات
ملاك: اممم بعدا نعيمة كتشكى مكتخرجهاش وكتبقى غير مع صحابك..
نعيمة: (مسختها وفرشتها بقات غير كترمش)
حميد: هههه ختك مكتسترش لا لا هاد المرة نخرج لكبيدة
ملاك: اوا هكاك تهلا فيها النفسية ديال الحامل ماشي هي العادية
حميد: بدات الفيلسوفة (كملت فطورها حتى صونا تيليفونها وطلع باسم you بقات كضور عينها متقدرش تجاوب حدا راجل ختها قجاتو ودارتو تحت الطابلة باغا تجاوب ولكن.. حتى قطع) تفو
نعيمة: مالكي؟!
ملاك: مبقاش عندي مع الكاشير وكليت منو معجبنيش.. (ختها رجعت كتجمع مع راجلها وهي عقلها طااير معرفت كيف دير تسلت غيبقاو عليها فين غادية) نمشي لطواليط
نعيمة: حتى انا نمشي معاك
ملاك: زيدي سبحان الله طواليط كتبانلك غير معايا.. (مشاو دخلت جلست فوق لاشاص صونات عليه ومجاوبش)
ياكما تقلق يا ربي ميكونش من داك النوع!!! تفو هاد الماركة دغيا كطير..
(ياله بغات تخرج رجع صونا عليها كتهضر بشوية)
الوو..
يوسف: صباح الخير
ملاك: صباح الخير
يوسف: قلت غتصبحي ناعسة
ملاك: هه وعلاش صونيتي علية ولا زكارة باغي ضيعلي نعاسي
يوسف: ههه شي يصبح خدام شي يصبح ناعس حتى لهنا ممتافقش
ملاك: ههه
يوسف: صاڨا ملوكة
ملاك: (مفرنسة) الحمد لله ونت؟!
يوسف: الحمدلله (جاو شي ناس كيهضرو معاه وهو كيهضر بلونݣلي وكانت مسرحة عندو) واخا شويش ونهضر معاك املاك
ملاك: اوكي (قطعت وهي كتفرنس)
احح على شويش
(حتى سمعت الدقان من عوايدها مكتعاودش لخوتاتها خرجت لقات ختها كتميق ليها)
غير واحد كنعرفوو ازمر
نعيمة: ومالي انا شنو قلت هه
ملاك: مكاين والو غير معرفة وصافي
نعيمة: اممم معريييييفااااا
ملاك: وصافي انعييمة متمرضيناااش ياله خلينا راجلك بووحدو دابا صور ليك بيه شي وحدة واخا وجهو متشوف فيه حتى وحدة موحمة
نعيمة: بااز (ضربتها لظهرها) بزااف عليك الكلبة، من ديما كتخبي علينا حقا فلويكاند غتجي خديجة ومريم
ملاك: بالصح مزيااانة والله توحشتهم مكرهتش حتى لبقرة ديال فاتي تجي طالعة فعماين مدخلت المغرب.. ماشي بحالك نتي كل شوي هانتي مقلزة عندنا طيحتي بقيمة اوروبا
نعيمة: ههه لبيي داوروبا ازين ماشي هو ديال كندا...
خرجو من الاوطيل قبل 12 باش ميتحسبش عليهم نهار اخر نيشان هبطو لرصيف بقاو ضايرين نعيمة شرات شي حاجة لحماتها ومنساتهاش بالخليع ريجيم والحلوة الفيلالية حيت عزاز عندها، اما ليها دارت حتى ترجع مرة اخرى وتاخد معاها مشاو لشي رياض تغداو ضربو تصيورات ملاك حطات فسطاتي فيديو قصير على لماكلة مبينة فيه الرياض وجزء من رصيف حيت طلعو لفوق كياكلو فأجواء فاسية 100٪..
فلبلاصة منين شاف سطوري صونا عليها يوسف ناضت من حداهم مبعدة جاوبت
ملاك: وييي (كتلحنها)
يوسف: اشمن رياض فين راكي
ملاك: هه مقريتش سمية علاش؟!
يوسف: انا وشي ناس جايين لتماك
ملاك: ناس؟!!
يوسف: كروب دالخدمة بغاو يجيو لتماك (عجبها الحال منين برر ليها) راكي عارفة اي واحد براني تيجي لفاس تيبغي يشوف هادشي ديالنا
ملاك: اممم
يوسف: تغديتي ولا مزال؟!
ملاك: لا كليت
يوسف: بالصحة.. نشوفك؟!
ملاك: انا مع راجل ختي ماااا...
يوسف: اه قلتيلي تتحشمي منو لبارح صافي ماشي مشكل امتى غتمشي لمكناس؟!
ملاك: دابا شوية
يوسف: انا نطلع عندك ياك معندكش مشكل؟!
ملاك: اممم (جاوبت زعما ممسوقاش) اهاااه..
يوسف: صافي مهم نكمل مع الناس ونهضر معاك (قطع شير لدراري باش يجيو كانو تجار من دبي 2 مغاربة مصري وخليجي بغاو ياخدو السلعة وكان التعامل مع عائلة يوسف... مشاو لرصيف كما موالف مع الناس لبرانية كيوريهم المآثر التاريخية ديال مدينة فاس العرييقة رصيف كان عاالم ثاااني من للي شافوه فوسط المدينة غير كتوصل لرصيف كظربك ريحة الجلد مخلطة مع خليع شباكية تريد... واكيد الحلويات الفاسية للي معروفة بحلوى مولاي ادريس للي كتكون منوعة بين النوݣا ڤاني شكلاط بيسطاج فريز زنجلان لوز كاجو... واكيد كرم البياعة للي كدوز من حداهم كول واحد فين كيمد ليك تذوق حتى تخرج من داك السيكتور شبعان سوا عندك ولا معندكش فلووس وهادشي مخافيش على ناس فاس اهل العزة والكرم وحسن الضيافة..
وبلا منساو حلاوة لسان للي معروفة عليهم بامتياز على الصعيد المغربي.. موصلو للرياض حتى الطاقم تقداو من خيراااات فاس..)
~~~~~~~~~~~~~
ملاك: منمشيوش نشوفو شي حويجات فالبرج؟!
نعيمة: حميد صالح؟!!
حسن: اه بغيتي تشري شي حاجة؟!
ملاك: اه.. (مشاو البرج بقات كدور ومدير شي فيديوهات زعما شولينغ تايم.. حتى لقات شنو بغات كانت اول مرة تاخد لبيسة كلاص فيست طويلة مع سروال ديالها سانبل فلماغو ولاكن جاي مع طايتها زوينة مع بودي بيض ساامبل خدات شال طويل فلماغون ولبيج وميني بوط طالون فلبيج)
نعيمة: خودي صوييك معاه
ملاك: (طالع ليها الدم كانت اللبسة غالية) حتى لسويقة كيكونو رخااس تماك اصلا غنحايد لبوط اويلي غير بوحدها 500 درهم مالوو كيمشي بوحدو ومزينينها قالك حقا برومو الله يمسخهم
نعيمة: ههه باااز صرفي على راسك شوية
ملاك: راه بغيت نشري طموبيل انعيمة وكنبعد على لكريدي يعني ميوصل شهر 12 حتى نشريها
نعيمة؛ ولكن احبيبة حتى المظهر راه مهم.. من نهار عقلت عليك نفس ستيل سبرديلة كابيتشو سروال دجين مشبهتي لينا فوالو وعاد قد هاك خاصك الطالو شوية ....
..شدو طريق لمكناس بالظبط لويسلان قبل ميدخل حميد للحي ديالو مشا تقدا مزيااان من لحم خضر فواكه حتى ريڤيطايمة دخلو للدار معرضة ليهم مو وفرحانة بحمل نعيمة للي كانت خايفة من مسألة شي واحد مكيودلش حيت مدة زواجهم كانت 6 سنوات وعاد كتب الله.. دخلت ملاك معاهم صم بكم عمي حدها كتبسم كتحشم بزااف منها زادت تجمعات العائلة وكانو غيدوزو العطلة مجموعين بقات جالسة مع ختها..
ملاك: نعيمة ختي اما غنمشي لوطيل حسن
نعيمة: علاش؟!!
ملاك: اختي الدنيا عامرة والله كرهت ديك النعسة فالصالون عاود وراكي شفتي كولشي جا ميمكنش يخرجو شي حد من بيتو على حسابي صافي نمشي لوطيل وغنبقى نجي عندك كل نهار غير نعاس للي يديني ليه
نعيمة: لا .. بابا مغيبغيش
ملاك: وشكون غيقولهالو شفتيه غير كل نهار كيصوني ابيل فيديو صافي راه غير نعاس للي فلوطيل عفاك والله شحال وانا كنتسنى هاد الفرصة وهنا كنحشم مغناخدش راحتي غنكدها عليك وغنمرضك حتى تكرهي علاش جبتيني معاك
نعيمة: عارفة راسك
ملاك: (خرجت عينها) اه
نعيمة: (بقات ساكتة مدة) صافي وااخ
ملاك: انا نشوف لوطيل للي عاطييني غالبا كيعطيو فندق ibis غعرفو حميد فين جاي
نعيمة: اممم ومتقوليش غتمشي هاد الليلة باتي هنا غدا عاد سيري
ملاك: واخا... (بقات غير صاقرة حاضية تيليفونها مولاش ݣاع صونا عليها حتى تنوات تحط لعشا تعشات الخدامة كتجمع خرجت الجردة مع ختها ولويساتها.. غير كتسمع حتى جا وقت الفرج وعطاوها تنعس وزهرها جا مع لبز عاود مبينت والو حدها ريݣلت الريڤي وحاولت تنعس واخا مكرهتش يوسف يصوني عليها ولكن باش تصوني هي لا..)
~~~~~~~~
اصبحنا واصبح الملك لله...
ملاك: (غير صونا تيليفونها فاقت اصلا كانت كانت ناعسة معذبة لبست حوايجها من سكات خرجت للحمام دهنت ايكخون ودارت عكر خفيف تحسبا الا جا على غفلة،
خرجت كانت شوية دالحركة بغات تسلت ولكن طاحت فعݣوزة ديال ختها للي حلفت ليها متخرج حتى تفطر وملاك معندهاش مع الفطور مور لفياق خاص حتى دوز ساعة او اكتر.. خرجت شدت تاكسي نيشان لمولاي يوسف فين نعت ليها حسن، ومن حسن حظها الاوطيل مكانش بعيد بزاف على الخدمة.. دخلت عرفت براسها ونيشان لقاعة الاجتماعات فين غدير اجتماع ديالهم..
دوزت صباحها جابو ليهم غدا للي عبارة عن صونويتش وكانيط للي كلا وللي مكلاش حتى يخرجو برا هي كلات صونات على مها هضرت معاها شوية كملو الاجتماع خرجت فضلت تمشا على رجليها شوية، كانت اول مرة تجي لمكناس مكمشة على صاكها دايرة احتيطاتها وفنفس الوقت مبهوورة فجمالية هاد لمدينة صونا تيليفونها جبداتو بالفرحة حسابها يوسف ساعة كانت ختها مجاوبتش بحجة مكتجاوبش فالزنقة بقات مكملة كتشوف لحوانت وصلت KFC تشهات داك دجاج زعمت ودخلت جلست شادة الموني كتقرا الاسعار ومشوكية من داك لغلا داك سطل دجاج كانت كتقول الا طار شانو غيكون ب50 درهم ساعة لقات باك فيه 3 دطروفة للي ب70 بقات كدور عينها جاها السرباي)
مزالة كنشوف اخويا..
(مع دار مع جمعت الوقفة خرجت)
هذا غير نهار اللول وشحال خسرت فيه حتى رجع ليه من بعد..
(وصلت لوطيل عرفت عندها حجز باسم المؤسسة على حسابهم ولكن ممعاه لا فطور لا غدا لا عشا.. عرفت من صاحبتها انهم مخصصين ليها ميزانية ديال 100 درهم فنهار حتى ترجع ويعطيوها ليها عجبها الحال طلعت الشومبرة كانت زوينة كطل على السونطر ديال مكناس ومع بقا كيظلام الحال كان الجو غزال صونا تيليفونها كانت ختها...)
وي نعيمة.. عاد خرجت من الخدمة وتمشيت كنت ناسية التيليفون صيلونص.. بالصح راكم لتحت مزيان بحرا نطلع باليزتي.. واخ انا هابطة...
داوها للدار معاهم تعشات تماك وباصرار منها وصلها راجل ختها لوطيل.. (هزت تيليفون ها قرباتو لوجهها) دلات شلاقمها مفهمتش نهار كامل ما صونا موالو
ملاك: حتى يانا دغيا كنولف تفوو..
(متقدرش هي تصوني شعلت التلفازة)
وكان غير شريت شوية ديال سقاطة ندوز بيها الوقت.. ولاد لحرام هاد رجاال الله يعطيهم الغراق من الطرف للطرف
(ريگلت الريڤي دارت تيليفونها يتشارجا وبقات متبعة فلم حتى نعست..
دازت يوماين مكاين لا حس منو لا والو وهي نفس الروتين صباح كتخدم كتغدا فالخدمة ولعشية كدوز ختها عندها اليوم دارت معاها باش تخليها بغات دوش وترتاح شوية صبح الجو مغيم احسن جو عندها ولكن مزال دافي لبست كابيتشو فالكحل طويل شوية مع سروال بوي فراند وڤانس فلكحل مع شال فالكحل وصاكادو وجهها دهنات ليه ايكخو وعكر خفيف خرجت لخدمتها بلا فطور كما موالفة كتحسب فدماغها مبقالها واالو وتشري لطموبيل خاص للي ييعرف الحديد باش متقولبش وعاد باها واعدها يعاونها وصلت للخدمة.. وصل وقت لغدا عرض عليهم واحد غيدوز فترقية مشاو لقصر الدجاج كل 3 فدجاجة بلعيبات دياولها روز شلاضة فريت صوص، كلاو نشطو رجعو الاجتماع ضربت 4 سالاو وتمو خارجين.. مع كانت ديجا دايرة ليزيات طلقت موسيقى وبقات كتمشى وكدندن مع راسها)
يوسف: (عيا يكلاكصوني عليها ويخرج راسو كيعيط) ملاااااااك ملاااك..
(والو هي مكيناش فهاد العالم شافها كتهضر بوحدها ومرة مرة تحرك راسها عرفها كتمزك.. قلب فين يحط الطومبيل والو الدنيا عاااامرة مكان غير يوقف دوزيام بوزيسيون هبط بالزربة وقف عليها حتى تساطحات معاه.. )
ملاك: ( مع غوبشت هزت راسها فيه تصدمت مخرجة عينها) يووسف؟!! (مزال الموسيقى خدامة وعلى جهدها)
يوسف: اجي ركبي معايا
ملاك: (بصوت عالي) شنووو قلتي!!!
يوسف: (تبسم حط يدو فوق ودنيها زعما باش تطفيها جبدت التيليفون من جيب السروال حبست الموسيقى وهي مصدوومة فرحانة ومفقوصة حيت لابسة هاكا ومديراش عكر حيت مشا مع لغدا شافت فيه كتعض على شنافتها باش يحمارو) اجي ركبي معايا
ملاك: فين؟!!
يوسف: الطومبيل منين خرجتي من الخدمة وانا تنساينك من تما وانا تابعك
ملاك: اااااه..
يوسف: واجي ركبي
ملاك: (مترددة) ضرووري ؟!!
يوسف: مغنااكلش غير على ملقى فين نحطها ونزلو
ملاك: انا نتسناك ولا نتبعك
يوسف: حشومة نخليك تسايني ولا تبعيني غير طللعي متخافيش
ملاك: انا نساينك هنا (شيرت بيدها حدا مول الزريعة)
يوسف: شوفي انا مزال ممغدي (كانو واقفين قراب حدا KFC ) مهم باش منبسلش عليك كتر مبغيتيش تركبي معايا دخلي تسنايني تماك انا نحطها فشي بلاصة ونجي عندك دغيا
ملاك: (فرحت من كلاويها ياله جات تهضر وهو)
يوسف: ياك عارضااني بعدا
ملاك: (بنصف ابتسامة) مرحبا (حنات راسها ودخلت كتندب اه باغية تشوفو ولكن تعرضو وهي حارمة رااسها) اووهو حتى لهنا منتاافقش احّييييي خلاتها ماما واش أنا للي نعرض
(شافت فلموني)
يا ربي ميبقالهمش دجاج.. بففففف
جا عندها جلس مقابل معاها ولباغفااان ديالو عاطية. برݣݣت كتشوفو لابس كلاص ومقاد الحالة بحال قرا افكارها وهو يظحك
يوسف: موظفة اخر زمن دابا نتي غتقضي مصالح الناس انا نجي المكتب هاكا لقاك نحسبك غير تتسناي باباك ولا ماماك
ملاك: (لعبت بحواجبها) هاديك غير نعمة انني كنبان صغر من عمري
يوسف: ههه (طل براسو معوجو) عجبني ستيل ديالك
ملاك: (فرنست)
يوسف: عرفتي جيت طااير عندك باش منفلتش وقيتة دخروج الموظفين
ملاك: (بلا متحس) علاش تلفات ليك نمرتي؟!!
يوسف: لا عندي.. غير بغيت نديرها ليك مفاجئة
ملاك؛ اممم
يوسف: بحالا معجبكش الحال
ملاك: لا بلعكس زوينة.. مزيان
يوسف: 3 ايام مهضرناش
ملاك: اه بالصح واقلة كنتي مشغوول اجي ياكما مزوج ههه
يوسف: باش عرفتيها
ملاك: (جمعت الظحكة) حلف بالله
يوسف: مكنتش بغ (شافها وقفت) فين غادية؟!!
ملاك: معندي مندير برجال مزوجين
يوسف: ههه زربة خااايبة هادي جلسي (كتشوف فيه شااكة) هه جلسي أملاك
ملاك: (جلست ولكن مترددة) واش بالصح انا مكيعجبنيش الحال نكون فهاد الموقف واخا غير صدااقة معندي مندير بهاد تخربيق
يوسف: وحتى انا ضد داكشي كوني هانية ماشي أنا للي نتزوج ونخرج نتزلل باغدون على هاد المصطلح ولكن كوني هانية
ملاك: (عاد رتاحت ولكن متصرطاتش ليها يغبر هاد المدة كاملة) اممم مزيان
يوسف: ضارني الجووع من لفطور وصلت مع لكليان المطار شديت طريق لعندك
ملاك: شنو خدام؟!! زعما ماشي تطفل غير بغيت ن...
يوسف: عادي سولي انا اصلا كنت غنعاود ليك.. الالة انا خدام فالصناعة التقليدية مع الواليد داكشي ديال الاواني الزليج...
ملاك: (باينة فيه كتر ولكن ماشي مشكل زلايجي المهم هو تحسين النسل وباينة لباس عليه هدا هو المهم وعاد زعر) مزيان فين عندكم المحل
(وقف عليهم السرباي شافتو كيشوف فيها وفنفسها هدا مصر ودايرها بالصح ويلي للي جمعتو فسيمانة غيفرتكو لية هدا فساعة) حم انا غير موخيطوو عفاك
يوسف: لا انا الجوع للي فية ديال بالصح (دموندا اغلى طبق ومعاه شي مقبلات هي عينها غير فلموني كتجمع الثمن شحال جا حست بالسخفة والبكية محست حتى نطقتها منين مشا السرباي)
ملاك: شفتك بحال داخلني على طمع!!