سداد وبنت العرب

البارت الثامن والاربعون

سداد وبنت ألعرب
البارت الثامن والاربعون

بقلم الكاتبة الزهيريه الزهيريه

عد بي حيث كنت قبل ان التقيك
ثم أرحل

الق/ شگد صعبه من تتكبر على شخص وتطرده من حياتك والاصعب انه دور الدنيا وترجع تحتاجه وهو ما يمانع من مساعدتك هذا حالي چان ويه سردار اني طردته وأشتكيت عليه ومن طلبت مساعدته ما قصر أبد  ومن اتصلت بي وحچيتله المشكله كلها

سردار/ شوفي ألق اني كم مره اجيت عليچ وگتلچ يا بنت الناس عوفي سداد أنتي ظليتي مصره على موقفچ يعني إنتي هسه خسرتي المشيتين والحلو اجتي الچ مشيه زياده أكثر من مره گتلچ ترى سداد ما راح يقبل بشي غصبن عليه آبن خالتي واعرفه انتي سجنتي وتهمتي  وهسه تردين توگفي بالمحكمه وهم غايتچ تسجني وتردي يتقبلچ عادي اكو عقل ومنطق يقبل بهيچ وضع

ترى اني بختچ بابنه إلي مات في وقتها من تهمتي چان ما صار وقت هوايه من متوفي ابنه لهذا ما طول خلگ وياچ بس هسه لا يموت وما يقبل أبن خالتي وأعرفه

هسه آني ويا واحد ما يحچي ويه الثاني لهذا آي كلام مني ويا يتخبل منه بس هو هواي يحب أمي وهي تگدر تآثر عليه واوعدچ انه راح أخلي أمي تحچي ويا عسى وعلى تگدر تطلع بنتيجه ويا

وكلام سردار نوعًا ما هدئ أعصابي بس الخوف موجود ولليل أتصل بي وگلي حاچيت امي بالموضوع وهي راح تحچي ويا وتتصل عليه بس ما يرد

ولنص الليل رجع إتصل بيه سردار وگال خلاص أمي أتفقت ويا وباچر الصبح يجي واني توسلت بسردار انه يجي عليه من يوصل يمهم حتى احچي ويا وبالفعل ثاني يوم إتصل عليه وگلي راح آجي عليچ سداد موجود في بيتنه

واجى أخذني سردار ودخلت ويا لبيتهم من باب المطبخ مو باب الصاله وسمعت كل كلامه ويه سردار ومومه وشفته مصمم يسجني دخلت عليهم ودنگت وبست حذائه بس في سبيل ما انسجن وبس رفض وراد يطلع بس اني ظليت لازمه أيده وإني عبالي خايف من القضيه بس طلع يريد إنزل الطفل هنا بعد ما عندي شي اضحي بي بس الطفل ووافقت

لإن سداد ما راح اگدر اسكته الا بتنفيذ طلباته وهذا چان طلبه الوحيد من وافقت رجعنه دخلنه لصاله وهو گعد خله رجل على رجل وأني گعدت واول واحد حچى هو

سداد/ هسه اتفقنه ينزل الطفل ونخلص ولا اشتكي عليچ ولا تشتكين عليه وبس ينزل الطفل اثنينه نروح للمحكمه ننطي تعهد بعدم التعرض واحد لثاني وخلاص وكل واحد يروح بدربه  وآني ما عندي وقت اليوم العصر اجي عليچ هنا الگاچ يوم خالتي مومه وناخذچ إني وياها ونروح على مستشفى أهلي وآني ادفع كل التكاليف العملية وينزلوا الچ

مومه/ لا أبني سداد اني ما أروح هاي إزهاق روح جريمة قتل وشلون ينزلوا الها وهي بعد يومين تدخل بشهر السابع وأني على تالي عمري أروح أشارك بجريمة قتل طفل شبيه واخسر دنيتي وآخرتي ولك يمه خلي عقلك براسك صدگ الله يهجم عمرك وبيتك  عليه خلي يجي وخلي عينك بعين الله وأصرف عليه وشوف ربك شلون راح يجازيك والله شنو كاتبلك شوفه

سداد/ خاله هاي مو جريمه هاي يعتبروها طلقة الرحمة لان مشوه وهي عدها تحويل لمستشفى الولادة انه مشوه وينزلوا اله ينطوها ماده تقتله وبعدها يقطعوا وينزلوا قطع احسن ما يجي مشوه ويعيش حياته منبوذ لكونه مو أنسان عادي

سردار/ عوفه آني أسجله بسمي وآني أصرف عليه

سداد/ لا ينزل الطفل وانت روح أزوجها وهي تجيبلك طفل إني شنو بيك

الق/ وشگد حاولوا ويا بس قراره واحد ومن رفضت مومه تجي ويايه دخلت هلات وطلبت من سداد انه هي تروح ويايه بس سردار ما قبل ورفض رفض قاطع

سداد/ خلاص آني راح أتصل باختي جيهان هي تجي وتروح وياها يعني بس مجرد الموعد مال اليوم راح يتأجل على باچر وآني قدمت شكوى ضدها راح اطلب من الضابط فرقد انه فقط يأجلها من ينزل الطفل اسقط الدعوه عنها نهائيًا

الق/ يعني من شفته عادي عنده يگطعون طفل بس في سبيل يتخلص منه حقدت عليه حقد بس الله اليعلم بي  وهو گام طلع بس انتبهت على هلات أبد ما نزلت عينها من عليه بعز مصيبتي شنو معقوله سردار إلي يلگفاها هي وطايره ما يشوف هلات أبد وقطع حبل أفكاري من

گال سردار/ گومي اوديچ على بيتكم يا بنت الناس والها رب يحلها

طلعت ويه سردار ورجعني للبيت بس شنو آني ميته بچي والله چنت احسب يوم يوم حتى تقرب موعد ولادتي وهسه أجى سداد خيب كل آمالي وجبت الطريق كله ابچي لما دخلت للبيت ومن دخلت يم بيبي شفتها گاعده ورافعه ايدها لسما وتدعي وتگول/ ربي رفعت أيدي فارغات لآن حملي على ظهري إرفع حملي عن ظهري مثل ما رفعت السموات أنت انطيتيني ولد بس عقل ما عدهم شنو حكمتك انت اعلم بيها يا علام الغيوب

وأني گد ما نفسي مثقله والنفس گوه اجره خليت راسي على رجل بيبي ودموعي صب وظليت أكرر دعاء بيبي

بيبي/ ولچ ألق شبيچ بعد حبوبتچ منو كدر خاطرچ

الق/ بيبي نسدت بوجهي  يعني اني ما رايده شي بس طفل من انسان حبيته من كل گلبي ليش صعبه گولوا اني غلطت الله يسامح البشر على اخطائه البشر ما يسامح ليش

بيبي/ بعد حبوبتچ انذري لله ركعتين وشوفي ربچ شلون  يحلها اذا خير يجيبه الچ واذا شر يبعده عنچ

الق/ صدگ اتوضيت واجيت ابچي وادعي من كل گلبي ونذرت أكثر من نذر ودعيت من الله يخليلي الطفل

وبعدها گمت سويت الغده وصبيت للكل واني أوكل أخويه وهو يضحك صدگ حسدته واگول يا ربي لو خالقني منغوليه ولا ناصحه وكل شي ما بيه على الأقل منغوليه ما أحس بشي وما على گلبي هم

وبقيت ذاك اليوم وبليلته مزهوره مثل السمچه لما طلع الصبح وتقريبًا حدود الساعه 9 الصبح اندگت الباب گلبي نسبني حسيت كأنه احد من طرف سداد او هو سداد نفسه والله ما خيب ظني إجى جدو عليه ويگلي هاي البنوه إلي اجت ذاك اليوم تريدچ عرفته يقصد على جيهان اخت سداد لآنه هو رغد يعرفها

گمت آخر رجل واقدم رجل دخلت شفتها سلمت عليه

جيهان/ يله حبيبتي واياچ وبالچ تذكرين گدام سداد آنه إني اجيت عليچ قبل ما أريده يعرف وجيبي التقرير الي سوته الچ الدكتوره والسونار

الق/ بگلبي گلت هسه إني بيا حال وهي ظلت تنتظرني لما بدلت واخذت التقرير والسونار وطلعت ومن طلعنه من البيت شفت سيارة سداد وهو بيها يسوق إني صعدت وهي صعدت ليگدام يم أخوها وطبعًا السكوت سيد الموقف لما وصلنه يم مستشفى وچان  اهلي نزلت وآني رجليه وحده تضرب بالثانيه ومن دخلنه طلبت جيهان دكتوره نسائية ودلونه عليها واخذنه باص وألي چان يدفع سداد

ظليت صافنه شوف الشر شگد يدفع عليه والخير ربع ماكو احد يصرف عليه وطبعًا ممنوع يدخل هو لذلك دخلنه بس آني وجيهان وچانت الدكتوره وسطت عمر وشرحنا إلها الوضع والدكتوره عگدت حواجبها وهي تباوع على السونار وتباوع على التقرير

الدكتوره / حبيبتي أنتي متأكده انه راجعتي دكتوره لو خاف رايحه على بنچرچي

ألق/ لا والله رحت دكتوره وحتى چانت بمستشفى اهلي يعني مو مستشفى عام

الدكتوره/ عيني هاي الدكتوره الظاهر متخرجه من جامعه أهلية يعني ذوله إلي معدلاتهم قليله ويرحون يدخلون جامعات اهلية ويدخلون اقسام طب وهندسة وهو مجموعه على الجامعات الحكوميه معهد ما يجيبله وعليه كل سنه يتخرجون الالاف  من الدكاتره والمهندسين الفشله ومن يتخرجون الناس الي توگع بيها مثل هاي الدكتوره الفاشله الي ماخذه الچ سونار وتگلچ الطفل مشوه حبيبتي هذا المي عندچ عالي بحيث مسوي عندچ زلال ولكون المي هواي ما  يبين عدها الطفل كامل بدل ما تگلچ المي عالي ولكونها فاشلة تگلچ الطفل مشوه گومي تعالي اخذلچ سونار روحي نامي هناك

الق/ گمت ورحت نمت على السديه وآني دموعي صب بين الفرح وبين الحزن وما مصدگه ألي سمعته واجتي هي خلت الجل على بطني وتمشي الماوس على بطني
واگفه يمها جيهان وتباوع وياها على الشاشة

الدكتوره / هاااا شگلت الطفل ما بي شي بصحة جيده وكامل كل شي ما بي گليلي ينزل عليچ مي

الق/ اي دكتوره يعني مرات اشك بنفسي إنه اني مدرره على نفسي

الدكتوره / لا حبيبتي هاي نسبة المي عندچ چبيره ومن يكبر الطفل يبدي ينزل المي وهذا نزول المي راح يستمر عندچ لشهر التاسع وما راح تولدين طبيعي راح تولدين عمليه لان عندچ ضيق بالحوض وأنتي حاليًا بشهر السابع أول اسبوع بي وأنتي حامل بولد وهسه اكتبلچ فيتامينات ومعليچ بحچي البنچرچي الي رحتي عليه طفلچ مو مشوه

الق/ ظليت دموعي صب ابچي على حظي الي ما نصفني لو غبائي گمت والدكتوره تگلي شنو هاي دموع الفرح

وجيهان ظلت تباوع عليه وبعدها طلعت واني گعدت مقابيل الدكتوره وشويه ودخلت جيهان وهي تباوع عليه وتهز براسها

جيهان/ بلا زحمه دكتوره اذا نريد نزل الطفل شلون

الدكتوره/ شنو تنزلوا ماكو تنزيل گولوا قتل تريدون روحوا بعيد عني هاي جريمه

الق/ وجيهان طلبت من الدكتوره تحولني للطوارئ ويخلولي مغذي لان ما أكل
ظليت متعجبه عليها شبيها هاي شنو مغذي ومن طلعنه من يم الدكتوره سداد چان بالباب ومن شافنه سال

جيهان/  حولونه على الطوارىء وضربتها ابره لازم ننتظر ساعه او ساعتين أو احتمال يوم كامل ما نعرف

الق/ وعفنا ودخلنه للطوارئ وجيهان انطت لدكتوره موجوده بالطوارئ الورقة المكتوب بيها المغذي وگالت الدكتورة روحن يم ذيچ الممرضة وهي تخلي إلها مغذي  ورحنه على الممرضه وشاطت روحي من خلت الكانونه ونيمتني على سرير وشكلت المغذي وراحت وأني سالت جيهان ليش طلبت من الدكتوره تخليلي مغذي

جيهان/ شوفي آني چنت ولازلت معترضه على قتل الطفل سواء چان ناصح او معوق تبقى هاي روح الله خلقها وهو ياخذها مو احنه لهذا راح نبقى وقت ساعتين أو اكثر وبعدها اطلع اگله نزلته وهي راح تبقى تحت المراقبه يوم كامل وانتي انتظري بعدي وانطيني ورقمچ من نصير بعيدين عن المستشفى إتصل بيچ وما احچي اي شي بس راح اگول هاي اني وسداد راح نرجع معناها احنه بعيدين وانتي أطلعي روحي لبيتكم
وراح نبقى على تواصل هسه سداد ما يعرف يتصرف لان مر بمشاكل وظروف بس الله اليعلم بيها بس بعد فتره يهدئ واكيد راح تكون نظرته للموضوع غير هسه

ألق/ وظلينه نسولف وبصراحة چانت انسانه راقيه جيهان وهواي سألت عن حياتي السابقه وحچيتلها كل شي بصراحه وحتى هي تعجبت شلون اني حامل واگدر اطلع مصرف ألي ولاخويه وشجعتني انه ما أستسلم ابد واحاول أكمل دراسه وأكون مستقبل ألي وظلت تقارن بيني وبين آريا زوجة سداد السابقه

واخذتنه السوالف وما حسينه بنفسنه مر هواي وقت وراحت جيهان ورجعت بعدها بنص ساعة

جيهان/ اخذت منه فلوس على أساس انتي اجهضتي ودفعت حساب المستشفى وهنا مجرمين بين المغذي وبين فحص الدكتور اخذوا 120 الف حتى بعدنه ما اخذنه علاج منهم وهاچ هاي بقية الفلوس الچ اصرفيهن على نفسچ وابنچ وانتي شنو تحتاجين اتصلي بيه على رقمي مع السلامة واتمنالچ الموفقية بحياتچ

الق/ وانطتني الفلوس وتبادلنه بالأرقام وسلمت عليه وراحت وأني بقيت بحجة انه دى انتظر حماتي هسه تجي ومر تقريباً نص ساعة واتصلت بيه جيهان فهمت من كلامها أنهم خلاص صاروا بعيدين عن المستشفى واني گمت وطلعت من المستشفى ورحت للبيت وسبحان الله رجعت مو مثل ما طلعت ونعم بالله حشى رب العالمين يعوف احد وفرحتي ما تنوصف وبالأخص من عرفت الطفل ما بي شي ودخلت على رقم سردار حظرته حتى ما يجي او يتواصل ويايه ويعرف بعدني حامل ويبلغ سداد اما سداد أني نهائياً ما عندي رقمه
وقررت اعيش حياتي وبعد ما اريد ارتبط وأربي ابني واعتني في بيت جدو وأخويه

وبعدها أتصلت بالمحاميه وبلغتها انه تلغي  القضيه المرفوعه ضد سداد وسردار وهي چان جوابها انه اذا اني ما حضرت الجلسه تسقط الدعوه وبلغتها إنه راح ادز بقية المبلغ المتفق عليه ويه رغد بس هي ما قبلت وگالت خلاص القسط الأول كافي لكون القضيه ما كملت واجى موعد المحكمه ولكون ما رحت سقطت الدعوه أما اني ظليت متواصله ويه جيهان

وصارت مو بس صديقه مقربه صارت اخت وتنصحني وتعلمني وتصبر بيه على ظروفي  وتشجع بيه أكمل دراستي ووعدتها بس أولد أقدم على خارجي وآني الناس لكون شوفني أعتني ببنت رغد وهي منغوليه صارت النسوان الي موظفه والي عدها حاله مثل حالة بنت رغد منغوليه يجيبوهم يمي وصار عندي 12 طفل والفلوس خير من الله كل هذا الخير على عين أخويه لكون مداريته وقررت أروح على عمو نزار واسأله عن أبويه اريده اجيبه يمي واما عن سردار مر أسبوعين من حضرته  وبيوم دگ رقم غريب عليه ومن جاوبت طلع

سردار/ شلونچ ألق بس گليلي شنو البدر مني وحضرتيني

الق/ ماكو شي بس أني حبيت إبتعد عن كل الناس لا أكثر

سردار/ شوفي يا بنت الناس خلينه اصدقاء ونحچي دائمآ ونطمئن على بعضنا البعض واذا بيوم حسيتي أنه تريديني وموافقه على زواجچ مني اني راح أكون سعيد بوجودچ بحياتي اما اذا لا ما حسيتي بشي اتجاهي نبقى أصدقاء لا أكثر

وافقت على انه نبقى أصدقاء وما گتله آني حامل ابد ومر شهرين وما صار بحياتي شي يذكر نفس وضعي  بين الأطفال العندي وبين الحمل والبيت وسداد كل ما يخطر على بالي  اذكره من چان يخطط يموت الطفل ومن دخلت بشهري صير عندي أوجاع موتتني وبيبي تگلي هاي تشاليع الولاده وكل الأيام مره تنطيني زيت الخروع لو بيض ني وتخلي عليه شكر وتگلي شربي وما اعرف بيبي منين جابت هاي الوصفات بس ما فادتني والاوجاع تزيد ومن اجتي رغد العصر ومن عرفت الأعراض العندي گالت هاي اعراض الولاده

وهي ظلت مصره ما عافتني ابد إلا اخذتني على المستشفى ومن دخلت بس اخذولي سونار گبل حولوني على صالة العمليات

يتبع/
تحية لكم من القلب الى القلب
دمتم في امان الله وحفظه

أختكم الكاتبة الزهيريه الزهيريه