فوط + كومنتار فضلا ولييس أمراا
خذات نفس عمييق وهزت عليه
ادم : لميس وشراكي حبيبتي ؟؟
لميس : بخير ونتا ؟ يخي مارحتش لأماكن التسلية والملاهي؟
ادم : ماجيتش باش نتسلى يخي قتلك عندي خدمة ... وانتي خالفتي وش قتلك ؟؟
لميس : اوهووو ولاه نقدر ندير حاجة فوق كلمتك ؟؟
تبسم ورفع حاجبو الايسر من مراوغتها بيسك تعرف مليح كيفاش تسلك روحها
ادم : وي عندي ثقة فيك
عضت لميس شفتها بتأنيب ضمير بيسك جملتو كان عندها طابع قاسي على قلبها
لميس بحزن : وانا ثاني
قالتها بحزن كبير لاحظو عليها ادم من نبرتها تبسم اكثر علابالو بيها متهورة بصح سريعة التأثير تعمد يقول ذيك الجملة باش يخليها تندم على كذبها
ادم : توحشتك
لميس :هههههه مافاتتش مامبا على روحتك نص يوم ديجا توحشتني؟
ادم : وش رايح ندير من شدة حبي ليك مانقدرش نبعد عليك
لميس : منين راك تجيب في هاذ الهدرات عيشك
ادم : كي نكون نهدر معاك يخرجو وحدهم من حلقي ايا مالا باي ماتنسايش تتعشاي باش ترقدي
لميس : اووكي بااي
كوبا عليها شاف بحدة في صاحبو اللي كان رايح يهدر قطعها في النص
ادم : بللع
حمحم سراج وهدر بجدية
سراج : لاه متعقبتش لوين راحت ؟
ادم : علابالي نتقلق كي نعرف وين راحت ونولي من نص طريق .... وعلاقتنا مزالت في البداية مانيش حاب نولي للنقطة الصفر وين كنا
سراج بسخرية : اووووو نفهم من هاذا انو الشبح تنازل ؟
ادم : سراج شوف الطريق قدامك وزيد في الفيتاس وشد ذاك الفم سينو نريبلك سنيك داصرتك بزااف
بعد مدة وصلو للمدينة المطلوبة شاف فيها سراج باعجاب
سراج : لاه مدينة الخطيئة جميلة كيما الخطيئة بحد ذاتها
ادم : ماعندناش وقت لخطيئتك ياصاحبي عندنا مهمات كبييرة
_________________________
حطت يدها على كرشها تزير عليها وهي تحس بالمغص تكات على الفوتاي حطت يدها على كرشها تمسح عليها بحركات دائرية
لميس : ماتديرش فيا هكذا عييشك مزال عنددي بزااف حوايج مهمين ومزلت ماوصلتش لهدفي ماتكونش عنيد وعاون مماك ها ؟؟.... سامح ماماك على الشي اللي راه تديرو ونتا في كرشها ... بصح مماك ماهيش صديقة سيئة ... علابالي يا صغروني بلي انا مخادعة وكذابة وكللشش بصح مانيش خاينة ... اصبر يا ماما شوية برك وساعتها نعتني بيك انا وباباك نديروك في عينينا حتان تجي للدنيا و.............
راحت للحمام تجري تستفرغ كل اللي في بطنها هوات في الارض بتعب وهي تبكي بلا توقف ... تبكي بقوة ع الشي اللي راه يصرالها ... ع اللي عايشاتو .. تبكي ومعلااباهالش السبب ورا كل ذيك المشاعر تخلطت عليها من الجوايه كامل مبقاش قادرة تتحمل حاسة انها ولات ضعيفة .... ملت من الشي اللي تعيش فيه من ضغوطات ..... صحبتها ... راجلها ... حملها ... المافيا اللي تحوس تلقاها ... قرايتها ... حلمها ... خدمتها ... مالغري عندها كلللشي تحوس عليه بصح ما حققتش الشي اللي تحوسو هي مادارت حتى حاجة يالوكان صغيرة
وقفت بصعوبة شافت وجهها في المراية كانو منفوخين وحمورة غسلت وجهها بالما البارد وخرجت تعبانة تمشي بوهن سمعت طبطيب الخدامة في الباب
" مداام اكي لباس ؟ ماخرجتيش من غرفتك من الصباح "
لميس : اني لباس .. وش كاين ؟؟
" مدام كاينين زوار طالبين يشوفوك "
لميس باستغراب : شكونهم ؟؟
" ماعلاباليش مدام ماقالوليش بصح مادام مسيو ادم سمح لهم يدخلو معنتها تعرفيهم "
استغربت لميس من هاذ الشي .. شكون رايح يزورها في هاذ الوقت المتأخر
لميس : اني جاية
راحت للدريسنغ تلبس حاجة وهي تتنفس ببطء تحاول تخفي دموعها وانتفاخ عينيها هبطت للصالون وقفت بصدمة كي شافت باباها وخوها ... عضت على شفتها بغضب وهي واقفة بثبات تشوف في باباها بكره شافت وجهو اللي تفاصا من الضرب وجهت نظرها لخوها اللي توحشاااتو بزاااااااف اما هو قطب حواجبو باستغراب من الكدمات اللي في جسمها والجروح اللي عليه مالغري كانت نسبيا بدات تبرى
راحت بخطوات متسرعة تحضنو فاجئها كي بعدها عليه يخزرلها بحدة وبلوم وعتاب
أمير : متوقعتش منك هاذ لميس .. وش الشي اللي وصلك لهاذ الدرجة من اللؤم
عقدت لميس حواجبها بصدمة ميش فاهمة هبطت عينيها للارض تحاول تتمالك نفسها تقوي نفسها باش متبكيش رفعت عينيها بعدها تبسمت بسخرية في وجه خوها وشافت بعدها في الخدامة بلطف
لميس : تعيشي جيبيلنا قهوة والجو
هزتلها الخدامة راسها بايه ... مشات لميس قعدت فوق الفوتاي شافت في وجه باباها بسخرية
لميس : معلاباليش منين جاتك هاذ الجرأة والوجه الصحيح باش تجي لعندي لهنا بعد وش صرا
.............سامر : لميس بنتي ان
لميس : مانييش بنتتك
..............أمير بالعياط : اعرفي كيفاش تهدري مع بابا و
لميس : هاذا مايخصكش ..... وش تحوس ؟
سامر بحزن : لاه درتي هاذ الشي لباباك
لميس : وش تحوس عندي عييشك
سامر : انا مادرتلك وااالو ياك نتي اللي وقعتي على على عقد زواجك بارادتك لاه راكي تديري فينا ضك هكذا ؟؟
!!!!!!!لميس ببرود : وش درتلكم انا
رماتلو كلماتها ببرود وهي توكل من طبسي المسكرات اللي متوالها
أمير بالعياط : لميس ماتهدريش معانا بهاذ لافاصون تعرفيني نكره البرود تاعك هاذا معايا اتكلمي بوضوح ماتخلينيش نغلط معاك
شافت فيه لميس وعينيها تشكلت فيهم الدموع مفهمتش وش بيه خوها بعد طول الغياب وعندهم وقققت ماشافوش بعضاهم يهدر معاها بهاذ الطريقة والفضاضة هو الوحيد اللي يحبها في هاذ العايلة مفهمتش وش بيه حتان راه يكلم فيها كأنو واحد من الاعداء
بلعت لميس ريقها ترتب كلامها بيسك توقف عاجزة احبتها تقدر تواجه الكل بصح العباد اللي تحبهم لسانها يتقطع
لميس : مفهمتش وش راكم تقصدو ؟
أمير : اهاااا هاذ الشي اللي صرا كامل ونتي معلابالكش .... علابالي بلي بابا حب يزوجك بصح ماجبركش بالقوة باش توافقي انتي اللي غراتك الاموال الطائلة والمكانة العالية
رمالها كلامو بحدة بلا ما يهتم لمشاعرها كان كل وش شاغل بالو هو يماه اللي في السبيطار من الصدمة وباباه اللي عضامو مكسورين ... شافت فيه لميس بصدمة ميش مصدقة اللي هاذ الكلام من خوها وهو اكثر واحد يعرفها ويحبها وهي مستعدة دير كلش علاجالو
لميس بعياط هستيري : وش تعرف نتاااا باش راك تهدر اه ؟؟ انت بالذات معندكش الحق تحاسبني ماكنتش معايا كي احتجتك انصعت لأوامر باباك وصدقت كلامو ومافكرتش في الشي اللي تعيش فيه اختك ونتا اكثثثثثر واحد علابالك شحال يكرهوني ونتا شاهد على معاملتهم ليا انت ... بالذااات ... معندكش الحق ... تحاسبني ... سامع ؟؟
قالت كلامها الاخير بتقطع وهي تضغط على كل كلمة تخرج منها باش يستوعبها
بقا امير غار يتفرج فيها من شدة عياطها اللي فزعو وفزع كل من في القصر حتى يارا اللي كانت راقدة .... بقا يخزر ليها وبالضبط في عينيها اللي رجعو حمورة من القلقة وجسمها اللي يرجف من الغضب وحدة ملامحها جامي شافها تعيط هكذا في حياااتو كانت ديما لميس الباردة اللي تجاوب ببرود وثقة ماشي بانفعال
أمير : مالغري اللي عشتيه يخليك تستعملي نفوذك وسلطتك باش تشردي عايلتك ؟؟
سكت شوية وكمل يهدر باشمئزاز وهو يشير بيدو عليها وهو اصلا موش راضي بالشي اللي رايح يقولو
أمير : ماشي ميرا اللي ماشي مليحة وسيئة ... نتي اللي كنت تخبي هاذ الشر في قلبك انت الاسوء
شافت فيه بابتسامة خفيفة وجسمها يرجف كيما الريشة
لميس ببرود : صحيت امير مارسي بزاااف
شافت يارا حالتها اللي كانت متفرحش وهاذ الشي ماشي مليح لصحتها ولا صحة لبيبي راحت تزرب ليها يبس أمير في بلاصتو كي شافها تفكرها كي كانت تجري وتلعب مع القطوط وقت كان صاحب ادم عندو سنييين ماشافهاش شافها قاعدة في الكرسي المتحرك محتار من حالتها ولا الشي اللي صرالها .... حكمت يارا يد لميس تمسح عليها بحنانة
يارا : لميس وشبيك ؟؟ لاه راكي ترجفي هكذا ؟؟ علابالك بلي هاذ الشي ماشي مليح لصحتك
تبسمت لميس لليارا بالسيف شافت في الخدامات وهي تحاول تحكم في روحها وقوتها قدر الامكان
لميس : وصليهم للباب
شافت فيهم نظرة اخيرة وخرجت حبست في نص الدروج ودارت لأمير اللي كان خارج
لميس : مانقبلكش تجيني كي تعرف غلطتك خاطر ميش رايحة نسااامحك
دارت كملت طلعت مخلية امير يخزرلها بحزن وهي تطلع في الدروج شافت فيه يارا نظرة كلها لوم وعتاب واشمئزاز من الشي الللي دارو تنهد وخرج
بقات يارا تخمم في اللي راه يصرا وسيرتو في الجنين بيسك من ورا وش راه تدير مستحيل يبقى بخير بأعمالها راهي تقمر بحياتها وحياتو خايفة علييه بزااف لأنو ولد ادم وخايفة اكثر على لميس وصحتها نفسيتها اللي بدات تتدهور لأنو اللي عاشاتو واللي راهي تعيش فيه ضك فات الاسوء وراح يزيد الطين بلة اذا عرف ادم
هزت يارا تيلفونها مستعدة تعيط لادم خاطر مكانش فايدة اذا كذبت عليه بيسك رايح يعرف يعرف وهي تعرف اللي يجن جنونو اذا عرف من شخص اخر مايرحمهمش في زوج ويجرح لميس بزااف وهي ميش رايحة تقدر تتحمل وجهو الحقيقي اللي راهي تمر فيه يكفي من الاحسن تخبرو وتحاول تهدئو وتشرحلو الوضع
......♥♥♥يتبع
طلعولي هاذ البارت نزيدكم واحد اوخر