وتيرة الاعرج

الوتيرة الاولى

وتيرة_ الاعرج
بقلم : حوراء السعيدي

لاتنسون التصويت من النجمه+التعليق
بين الفقرات + ومتابعة لحسابي .." 🍂hawraalsaidi

الماضي شيء فوق الإرادة
فوق القلب ، فوق المشاعر لذالك لا ينسى

بغداد صباحاً ..

نزلت أمشي سريع لأن اتأخرت على دوامي وانا ادردم بگلبي عليّ ما نخلص من المحاضرات الصباحية دخلت للمستشفى أستوقفني صوت الممرضة ..

- دكتورة اتأخرتي ودكتور سامر بقى يحجي

نزعت جنطتي من كتفي لزمتها بايدي ضايجة ومالي خلك جاوبتها وانا متوجهة الغرفتي

-وجدان: اوف اوف أغادير اليوم السائق عطلان وبالضيم ، حضرت نفسي للعمليات وبديت بشغلي والحمدلله نجحت العملية
كملناها بنجاح

اكو مرات مرضى تحسهم من صدك متمسكين بالحياة ومايريدون يفارقونها أخذت چاي وگعدت راسي أحسه يريد ينفجر عليَّ صارت عيوني تتلفت بالمكان الأنا بيّ أبتسمت بتعب ..

ممزوج بفرح هذا المكان شگد تحملت علمودة تحملت الويل والاه والمصايب كلها بس علمود أوصل اله واحقق حلمي ، والحمدلله گدرت احققه وما أستسلمت والفضل يرجع لله ثم الإخواني ..

رجعت الغرفتي وبدأ الشغل مثل كل يوم طلعت المريضة وگعدت أكتب شغلات روتينيه اندك الباب رديت وانا مدنكه :- اتفضل

أجاني صوته وهو يگول ..

سلطان: تسمحيلنه ندخل دكتورة

بسرعة رفعت راسي وگفت متفاجئة بجيته لأن الصبح شايفته شيسوي هسه هنا
وجدان: سلطان شتسوي هنا ؟

- هذهِ بمكان ماترحبين بيَّ

- غير الصبح شفتك راح تخبلني أنتَ

- اگعدي اگعدي لا تموتين

گعدت ضايجة بس ماضايجة لأن اجاني للمستشفى لا ضجت لأن تصرفاته صايرة كلش باوعتله ..

- اي سلطاان

- شو تنترين نتر

- چا عوزك بعد تجيب فراش وتجي للمستشفى

- چا شسوي

- مو حچينه الصبح بالموضوع

- ما اگدر ما اگدر بطلي احسن حـل

شگد چنت ضايجة بس ضحكني من گال بطلي رديت عليّ وانا بعدني اضحك ..

- هسه انا اتحملت الظيم والظلايم والكتل والحجي والغلط وسوالف أبوي كلها أنت خافنك صاير شيء العقلك

-سلطان: وإلي يغار شلون

-وجدان: هذا مكان عملي ماجايه اتونس لو أتعرف على احد ، وكلمن يحب ويغار مثلك بعد بطلت الوادم

- قللي كلام ويا الدكاترة

- يا سالفة الدكاترة الما تخلص

كض وگام وگف ضايج ماعاجبه طلع ويا طلعته دخلت دكتورة وياي تداوم ظلت تباوع وراه نوب هذهِ شبيها ، تبسمت بوجها لأن فشل تشوفني گالبه خلقتي عليها ..

-وجدان: هلا بيج دكتورة زمزم اتفضلي

-زمزم: هلا بيج حبيبتي وجدان شلونچ

- الحمدالله بخير

- عساچ .. اگلچ

- گولي

- هذا إلي طلع من غرفتچ منو ؟

- منو تقصدين دكتورة

- ولچ هذا ابو قمصلة السودة

عرفتها تقصد سلطان :- ابن عمي

- فلك طره موش رجال

- يااا

- ولچ خيه روحي راح تطلع ولد عمي يخرعون تلعب نفسچ إذا تباوعيلهم والدكاترة هنا يامتزوج ياخاطب يا هم مو حلو

- دكتورة مع احترامي الحضرتچ بس بطبيعتي ما احب الشخص إلي يحچي بالجمال لأن كلنه ندري الإنسان حلاته بروحه وباخلاقه مو بشكله ، الراح يدوم صاحب الگلب الطيب وأبو روح الحلوة مو مو الشكل ولا ابو المادة

ردت وهيَّ تعوج بحلگها ..

-زمزم: اهوو وجدان أنتِ من جماعة الأخلاق وهالسوالف .. اگلج شنو الفايدة عنده أخلاق وماعنده مادة شلون الواحد يعيش

-وجدان: يعيش محد يموت من جوعه

غيرت السالفة ورجعت على سلطان ..

- اكلچ هذا ابن عمچ متزوج

أستغفرت بگلبي الله يگضي هاليوم على خير رديت وروحي صارت بخشمي

- أي خاطب

- حرامات فاتني شبيچ أنتِ ولا تحچين ولا تگولين

- شحچي هههههههههههه أمشي وأگولن عندنه زلام للزواج شبيچ خيه

ضحكت وطلعت گالت ترجع الشغلها مر اليوم مثل أي يوم بالتعب كل يوم هيچ ماتلحك الشيء خلص وگت الدوام ، ومحتارة شلون الگالي سيارة توصلني البيتي ..

طلعت من المستشفى اباوع بالشارع السيارة المأجرتها من تعطل بالضيم اضل بدونها وگفت سيارة گدامي ونزل الجامه يحچي كاز على أسنانه ..

-سلطان: ولچ وجدان تعاي اصعدي

ضليت واگفه بمكاني ولا عبالك اسمعنه رجع يحچي ونفس الحالة مارديت شفته نزل وعيني صارت على سيارة وگفت بسرعة صعدت بيها اباوعله كام يخزر بيَّ ..

وصلت للبيت نزلت اركضن عبالك واحد يركض وراي ، صدك لو گالو الخوف يعدل الشوف دخلت البيتنه صارت بوچهي اختي الوحيدة زمُرد ظلت تباوعلي متعجبة لأن فحطانة بعدنه واگفين وچيت علينه بطوله وعيونه تتجادح من العصبية ..

صرت وره زمُرد تحميني وهيّ تضحك صحت بصوت وانا وراها مچلبه بيها خافن يلزمني ..

-وجدان: ديربالك تتقربلي

صاحت زمُرد وهيّ بعدها واگفه بنصنه ..

-زمُرد: لا تگلولي رجعتوا اتعاركتوا

- هو يسوي مشاكل

رد بحدة وعصبية ..

-سلطان: ولچ چاااا اناااا شگلتلچ وسويتيلچ زززعله

-وجدان: تگلي لا تكثرين سوالف ويا الدكاترة

- أي وشني شبيه كلامي لازم متعجب الست الدكتورة

- أي وابو فاضل ماعجبني

عافتنه زمُرد وراحت ضلينه وحدنه واگفين عيني على الباب اخافن يدخل واحد من اخوتي ولو هم عندهم علم بكلشي لأن ابن عمي سلطان ..

وهو منطيهم علم بكلشي بس المشكلة بس الجابر وعمران بقية إخواني ماعندهم علم بشيء ، واذا دروا مايرحموني لا هم ولا أبوي هم مايدري ..

- وجدان

- هااا

- ليش ماعاجبچ كلامي فوگاها بعد .. ولكم هسه من الزم هالبنيه واسحلنها أحد يگلي ليش

- سلطان غيرتك زايده والغيرة الزايده تخرب من داومت لليوم أنتَ مطلع روحي

صفن بوچهي يمكن قسيت بالكلام وياه بس هو هم تصرفاته صايرة كلش رد عليَّ بهدوء عكس ملامح وچهه الچانن يبين عصبي ..

- يابنت الناس صح بعده ماصاير شيء بينه رسمي بس انا أعتبرچ حرمتي من اليوم الدخلتي بيّ گلبي

- شوگت يصير الشيء الرسمي بينه

- ماضل شيء أن شاء الله هالفترة .. ادخلي بدلي واكليلچ لكمه وبطلي سوالف التزعل مالتچ شكبرچ بعد تصيرين دكتورة وهالله هالله

ضحكت شلون يحچي هزيت براسي ودخلت جوا الغرفتي وبيومها هم اهلي ماچانوا موجودين حتى ماسئلت عنهم هو منو بحالي غير جابر وعمران الواگفيلي بكلشي حتى دراستي هم الوگفولي بيها ووگفوا بوچه أبوي لأن معارض اكملن دراستي ..

صار الليل چانوا مسيرين علينه أخواني ونسوانهم ماعدا الچبير أخوي ما اجه دخلوا علينه بيت عمي عياش أهل سلطان گعدنه وصارت العالم تسولف سكت الكل لمن عمي گال كلامه وصدمني صدمة عمري الكبرى ..

-عياش: احنا جاينكم بطلب وأن شاء الله ماتردونه عبن احنا أهل

باوعت السلطان طبيعي چان وملامحه ماتبين أكو شيء حاله من حالنه إلي گاعدين ..

-سالم: گول خوية واعتبر طلبك تم أن شاء الله

ضحك عمي
- والله ياخوية ما تگصر احنا جايين وطالبين زمُرد السلطان

بسرعة عيوني صارت على سلطان مصدومه بينت اثار الصدمة عليّ عيوني تتنقل بينه وبين إخواني الصار حالهم مثل حالنه متحيرين وگف عمران بنص اللهول وانا لا حول لله ولا قوة ..

-عمران: الله بالخير عمي

-عياش: الله بالخير والعافية أبني

- الله يحفظك عمي جيتك وطلبك على الراس بس زمُرد ما نگدر ننطيها السلطان

رد عمي عليّ وعيونه صارت على أبوي ..

- ليش أبني شناگصة

- مابيّ شيء ونعم منه بس ياعمي سلطان رايد وجدان

أتوجهت أنظار الكل علينه انا وسلطان دنكت راسي ودموعي تغلغلت بعيوني وصار المصايح مال أبوي وعمي أبوي صوته صار يرج بالبيت رج وكلامه چان هنا أشبه بسهام تمرد بگلبي ..

-سالم: ولك شتحچييي أنتَ من شوگت ابن عمك رايد هالغبرة

-عمران: بوووووية لاااا تگووول عليها غبرة تررراهااا بنتك

- تعلمنييي الحچي ولك

- محشوم بوية بس اختي ومن حقي ادافع عنها وما ارضى عليها

كبر الحچي بينهم وصياحهم يزيد ماينقص ماسكتوا لما سلطان حچه ..

-سلطان: بوية انا ما الي نفس بزمُرد حالها حال اختي شلون تريدني اتزوجها

ضل عمي يصيح بوچه سلطان ..

-عياش: ولك تتمعشك ورانه وانا المتباهي بيك گدام الوادم

- شمسوووي ناهبلي وحدة بنيت عمي اريدها بالحلال

- چلمتي هي التمشي غصباً عن الكل

من شاف كلام عمي هيچ طلع وطلعوا وراه وخرت ابن اخوي الچان نايم على رجلي اختنكت من كلشي ماحس غير انجريت من حجابي چان أبوي ظل يعت بيّ عت گطع شعري لا ضلت مسبه لا ولا كلمة تعتب عليّ ..

-سالم: ولچ انا تاليييي عمررررييي وحدة مثلچ تنزل راسي

ركضوا بس جابر وعمران يريدون يفكوني من جوا ايده صاح عمران ..

-عمران: بوووية عوفهاا شنييي اتخبلتت علينه

گوه فكوني منه وقبل لا يسحبوني منه فر وچهي بطراك خله الدم يتطافر شهكت من الوجع وشاغت روحي چان لابس محبس شك خدي من حلاة روحي الفرفحت دفعته بكل ماعندي من قوة وركضت شاردة الغرفتي ..

سديت الباب عليّ خافن يهجم بعد ويموتني گعدت وره الباب ابچي بشوغة بس عليمن بالضبط مادري اخخ على الرجال الحبيته من صغري وكبرت وانا حبه يكبر بداخلي وهسه يروح مني والاختي مو للغريبة ..

أكيد زمُرد ماراح اتوافق لأن تدري واحد رايد الثاني انا وسلطان انفتح الباب كمزت من مكاني خايفة وارجف عبالي أبوي بس طلعت اختي دخلت وسدت الباب وراها ..

بايدها ادوات تعالجني بيهن صارت كبالي وعيوني عليها تعقم بجرح ايدي بس ماتحط عيونها بعيوني ..

-وجدان: سمعتي عمي شگال

هزت براسها
زمُرد: اي

حضنتها ابچي مااگدر اشوفن اختي ويا الرجال الاحبنه صرت اسولفلها ودموعي تشرح وضعي قبل لساني ..

- أنتِ أكثر وحدة تدري شكثر احبن سلطان

- اي

- فدوة لا تخلينهم يجبرونچ انا اموتن والله

سكتت وانا سكتت وياها بس صوت نوحي مسموع وخرتني عنها ، وگفت تفرك باصابع أيدها منزله راسها

- ليش منزله راسچ زمُرد

- اسفه وجدان

- عليمن وليش

ماردت عليَّ عافتني وطلعت ظليت صافنه بمكانها واباوع وراها ، ليش گالت هيچ رحت جدام المراية اباوع الوچهي الشوهه أبوي خدي مشگوگ ألتفتت على صوت الشباچ يندگ عرفت منو صاحب هالدگة ، فتحته بس شافني عيونه توسعت على حالي ..

-سلطان: وجدان ؟ منو مسوي بيچ هيچ

مارديت بس دموعي التنزل

- مو جاي احچي وووياااج لااا تضلين ساكتة وتشلعيننن گـلبي

-وجدان: أبوي

حط ايده على راسه بقهر ..

- غضب الله عليّ لأن درى رايدچ مو ؟

- اي

باوعلي بعيونه وحچه وهو يسد الشباچ ..

- الجرح بخدچ بس أنحفر بگلبي

حچه ذني الحچايات وراح گعدت اندب بحظي ليش أبوي دائمًا هيچ وياي انا بنته بس ماحسيت بهالشيء بيوم يميل الاختي أكثر مني گضه عمره ضدي جاب عمره يكتل بيَّ ..

مرن اليومين ورجعوا عمامي وأملي بزمُرد ورفضها لهالزواج چان سلطان موجود بس ماحط عينه بعيني ، فتحوا الموضوع وانا أسمع ألهم صاحولها ولازمه گلبي من قرارها بس انا چان گلبي واثق بيها أختي ماراح تعطن وتغدر بيَّ دخلت گعدت سئلها أبوي عن موافقتها ..

-سالم: بوية زمُرد عمچ رايدچ الابنه وانا ماعندي اعتراض عبن ما الكه أحسن من سلطان أنتِ شتگولين

ظلت عيوني تباوعلها ومنتظره جوابها بكل خوف وقلق رفعت راسها باوعتلي وباوعت الأبوي اليباوعلها وواثق من جوابها .. وهنا أنطت قرارها الكسرني وخلاني بحالة صدمة اختي تغدر بيَّ وهيَّ تدري بكلشي ..

-زمُرد: بكيفك بوية أنتَ إلي اتشوفه انا راضيه بيّ

- لا بنتي احنه نريد نسمع موافقتچ

موافقتها مثل السهم الدخل بگلبي ..

- موافقة

جمدت بمكاني من إلي سمعته چان بس جابر موجود ومعاني وچهه صارت ماتتفسر مثل حالي گامت من مكانها ورحت وراها احچي بقهرر سديت الباب بخذلان ..

-وجدان: ليششش ليششش مووو اناا أثق بيچ ليشش سويتييي بيَّ هيچ

-زمُرد: أطلعي برا وجدان

- احچي فدوووه

- تريدين تعرفين ليش وافقت بهذا الزواج

هزيت براسي دموعي بعيوني تنزل ..

- اي احچي

- لأن انا أحب سلطان من زمان وأنتِ اجيتي وأخذتي مني

صدمة بعد صدمة مسحت عيوني بايدي غوشن ضحكت مامصدگة كلامها ..

- لا زمُرد تشاقين شوفي خيه اذا تشاقين انا مو بحيل هيچ شقه والله روحـي خلصانة

- لا عليمن اشاقة هذهِ حقيقة صارلي سنين دافنتها

- شتحچين ولچ زمُرد انااا من سنين أحبنه

- لااا تچذبيننن أنتِ ماحبيتي .. لأن چان يلبيلچ كلشي ومهتم بيچ ولأن چان أبوي ماله خلگ الچ ولا اله علاقة وبس جابر وعمران مهتمين الچ ومن يروحون الدوامهم يصير بمكانهم

- هالكثر شايلة حقد وكره بگلبچ إلي طول هالسنين واليوم طلعتي

دفعتني على الحايط عيوني مفتوحة بصدمة من تصرفاتها هذهِ مو نفسها أختي صارت تحچي حچي يوگف الشعر ..

-زمُرد: ايي اكرهچ ومن زمااان چنت أموت أشوفكم سوا وانتوا تسولفون وتضحكون لو من يباوعلچ وتباوعيله اناا بسس إلي استاهله السلطان

رجعت دفعتها بايدي بإهمال كل حيلي باد مايساعدني بعد أعين بروحي مسحت عيوني التارسهن دمعي ومشيت وگفت يم الباب كل هذا الصار وإلي سمعته جمر گـلبي باوعتلها بأنطفاء ..

-وجدان: مع كل الأسف عليچ ماتوقعتچ بيوم هيچ تغدرين بيَّ ، ويطلع كل هذا الحقد بگلبچ رغم چنتي دائمًا أبوي مفضلها عليَّ ويميل الها بس ماكرهتچ لو حسستچ بيوم بهذا الشيء

نزلت راسي اهز بيّ بهدوء وأنكسار ..

" بس هو ما غلط الگال الطعنات تجيك من أحبابك مو من الغربة مشكورة ومهنايه بيّ "

......

-جوهرة: وين راح هالولد وينن ، راح يجلطني شلون بيَّ انا

-جابر: كافي يا مرة تراه مو طفل

- صوچك أنتَ أنطيته عين وخليته هيچ يستهتر

- احسن ما اصير مثلچ واظل أوهوس وين راح ووين اجه ، وتعاي اگلج طبعًا ما اخاف عليّ هذا " سبع الهورة "

سكتت عنه أدري بيّ لو شما أحچي واگولن يضل نفس الحچي واطلع انا الغلط صار الظهر وهو مالافي للبيت للعصر يله دخل علينه لزمته من أذانه كام يكمز وگلبي ميت خوف ..

-درغام: شبيها جوهرتنه منو مضوجها هالمرة شمسوين

جوهرة: والك عين تحچي بعدد .. وين چنت ؟ هاا

ضحك جابر يأشرلي بايده ..

جابر: ولچ عوفي الولد

- خلي يحچي بالاول وين چان دايح من الصبح

- احچي بوووية وين چنت

-درغام: يمة اذاني گامت تصيح الغوث هسه عوفيها واحچيلچ وين چنت

عفته يفرك بأذنه كسر گلبي بس اريدنه يتعلم من يطلع يحچي يگول مو يعوفنه متبهذلين وحايرين وانا شعندي هو بس هالوحيد اموتن اذا يصيرله شيء ظل يسولفلنه وين چان خلاني ادگن على راسي ..

- انتوا تعرفون صاحبي مجاهد .. هو وابن رجل امه متعاركين ذاك كوم شك كتابة مال العربي وامتحاناتنه ماباقيلها شيء هو ضايج كتله انروح انسويله فركة أذن

أبوه چان مدنك بيده كتاب بس سمعه رافع راسه وحچه مهتم للسالفة ..

-جابر: أي وليدي كمل شسويتوا

حك وره شعره وادري بيّ من يسوي هالحركة يا مسوي مصيبة شكبرها يا عنده شيء ..

- ماسوينه شيء بس كتلناه

دگيت على راسي ..

-جوهرة: الك طرني كون ولك أنتَ ماتعقل ماتجوز من سوالفك وأنتَ أبوه ماتحچي وياه

گلت هسه يگتله يسويله فركة أذن يرزله يخوفه بس كلشي ماكو ..

-جابر: عفية عليك إبن أبوك سبعي

-جوهرة: اگلگم شني انتوا تضحكون عليَّ لو ناصبين عليَّ

-درغام: لا يمة ليش ماتگليلي مثل أبوي وتشجعيني

- ولك عليمنننن اشجعنكك على صخامك ومصايبك  .. اجوا أهل الولد شنگللهم

- انگلهم ابنكم هيچ سوا وأگتلنه گدامهم

- ويحطونك ويجنزونك

ضحك ويا أبوه عفتهم دخلت للمطبخ شايطه روحي  وضايجة من تصرفاته الولد جاي يكبر وخوفي نفسه ماتغير وهو طبعه إذا يشوف صحبانه ضايجين من شغلة مايسكت وهذا عمره صغير وهيچ شلون بيچ ياجوهرة اذا كبر مايسكت حتى لو هم سكتوا عمر صغير بس عقله وتصرفاته مال كبار ..

مجاهد صاحبه الروح بالروح ووليد فقير أبوه مات وأمه اتزوجت وعاش وياها هيَّ ورجلها بس مشبعينه ضيم وابني يحس بصاحبه يجيني دوم مقهور عليّ سمعت صوت يم الباب درت وجهي شفته رجعت دايره عنه بزعل ..

-درغام: ممكن نتعرف

-جوهرة: بطل سوالفك عود يريد يقشمرني

- اشكد احبنچ فلك طرك مجاهد

- چا ياهو چان يتعارك علموده

- المثل يگول يايمة من حبك لاشاك

- والله وكبرت وصرت تنطي امثال .. وهسه شرايد صلحة ما اصالح

- عمت عيني أعوفچ وأنتِ زعلانه

درت وچهي اله احاولن افهمنه ..

- يمة درغام انا مو ضد توگف ويا صحبانك بس ضد المشاكل إلي اتسووها ما اريدلكم الأذيه الوادم ماتسكت عن حقها إذا الها حق يمك

خذه أيدي يبوس بيها ويمسح بدموعي ..

- يمة دموعچ غالية بس أنتِ هم أفهميني الولد أعزه أكثر من روحي وتدرين شلون عايش هو ويا امه ورجلها

- يايمة والله من خوفي احچي هيچ

- لا تخافين وهسه اريدن غده گتلني الجوع

- ابو بطن روح غسل بين ما اصبلك

- احبنچ جوهرتي على گولت جابر

طلع يضحك ضحكت على سوالفه مايبطلهن بس يگلك إذا كبر إبنك خاوي وجابر هيچ مسوي وياه ودرغام جاي يكبر وعقله عقل أبوه  حميت الاكل وصبيته حطيته بالصينيه شلته اريد اطلع وسمعت صوت عمي يصيح بنص البيت وبصوت عالي ..

لزمت گلبي وحطيت الصينيه بالكاع اكيد درى بالصار انا ليش اكله يايمة عوف المشاكل سترك ياربي دخلت للهول شفت عمي واگف وجابر واگف كباله باوعت بعيوني ابني ماموجود تنهدت براحة بس ماطول وهو داخل علينه رجليه گوه وگفت عليهن راح تعلك مثل كل مرة ..

-سالم: ولك أنتَ تبقى بهالاستهتار

وگفتي صارت وره عمي أشرتله يسكت بس وين يسكت درغام صرت أملخ بخدودي بس اريدنه يسكت ..

-درغام: ليش جدي شمسوي

گام عمي يصيح ويحچي بصوت عالي ..

- سلامتككك مامسوووييي شيء بس مكسرينن الولد

- شنو هالچذب شوگت سوينه هيچ احنه بس گتلناه صح مامكسرينه تلگه أبوه مكسره واجه ذبها براسنه

- انعل والديك على هيچ تربية سگط يا سگط تردلي جواب وتچذبني فوگاها

- جدي مو أراددك جاي احچيلك الصدك مال كسرناه هذهِ السالفة كلها چذب بچذب لو أبوه طلعها لو هو كسره وذبها براسنه

كل هالهوسة والحچي والصياح وجابر ساكت ماحچه شيء اله لمن عمي گال ..

- هو إلي ....

راد يحچي وهنا جابر صاح بصوته الرج البيت صاروا هو وعمي أصواتهم عالية ..

-جابر: بوووووية

-سالم: هاا ولك جابررر تعلييي صوتك عليَّ علمود هالزعطوط الماعنده تربية

- مربي أحسن تربية والكل يشهد

- كل يووووم جايبلك مصيبة

طلع عمي وانا گعدت مهبوطه ركضوا لزموني أثنينهم يغسلون بوچهي حچيت وانا ابچي ..

-جوهرة: شكتلك يايمة هذهِ تاليتها الوادم ماتسكت

-درغام: متعود يمة جدي من يوم يومه هيچ

باوعتله مقهورة أدري بيّ ينقهر ومايبين لليل رحنه البيت عمي بعد كلشي صار دخلنه البيته لأن اتعودنه وصار إلي صار بسالفة وجدان وسلطان رجعنه واچذب إذا اگول ما أنقهرت عليها وجدان طيبة ماتستاهل إلي صار وياها طلع جابر مادري وين بقينه متگابلين انا وابني

اتأخر وهو ماراجع راح درغام ينام گعدت وحدي ابچي افكر لشوگت عمي يبقى بهذهِ التصرفات انفتح الباب دخل جابر اجاني خايف ..

-جابر: شبيچ جوهرتي ليش تبچين

-جوهرة: لشوگت عمي يضل يتعامل ويا إبنه هيچ حرام عليّ

ذب حسرة ..

- شبيدي شكثر حچيت وياه مايفيد أبوي وتدرين بيّ

گعد يسولف وياي ويهدي بيَّ ويگلي هو هذا ابوي وتصرفاته ..

......

-سلطان: طلعت من بيت عمي ابو وجدان راجع البيت أهلي وهناك صار الحچي واتعاركت عفت البيت كله وطلعت مثل المخبل أمشي بالشوارع تفكيري بيها انا شسويت انا اليوم كسرتها فوك كسرتها من أهلها بس مجبور أسوي هالشيء ..

يومين ماداخل للبيت صاح اذان المغرب وگت غروب رفعت راسي بضيق گدامي جامع دخلت أصلي توضيت أخذت تربة وگفت أصلي بين ما كملت سجدت الربي بگلب حاير ومكسور ..

- ربي أنتَ أعلم بكلشي تدري إلي سويته مو بيدي وأنتَ ماترضى تشوف عبدك مظلوم رايد حوبة كسري وكسرتها منك

رفعت راسي الخنكه ذبحتني اول مرة دموعي تنزل .. الظلم مؤذي شگد ما چان الإنسان قوي بس من يلوحه يتأذه طلعت من الجامع قررت أشوفها اخر مرة

رجعت المنطقتنة وگفت گبال بيتهم عيوني صارت على شباچ غرفتها  خذني رجليّ ما أهتميت أحد يشوفني گلبي رايد شوفتها دگيته بخفه ما أنفتح رجعت دگيته مرة ثانية أنفتح وياريته ما فتحته ولا شفت حالها ..

-وجدان: ليش أجيت عريسنه

-سلطان: مجبور وعيونچ

- كلها تصيح مجبوورة .. شنو الجبرك ؟

- ما اگدر احچيلچ

ماتباوعلي ولا تحط عيونها بعيوني وهالشيء چان أشبه بالموت بالنسبة الي ..

- ليش ماتباوعيلي مثل قبل كرهتيني وجدان لا تعذبين بيَّ أكثر تراني مهدود الحيل والخلقچ 

-وجدان: رديت بغصه عليّ ..

- العيون إلي صارت الغيري تحرم عليَّ

جاوبني وحاله ماچان أحسن من حالي ..

- وهالگلب تحرم عليّ حرمه غيرچ

سديت الشباچ وانتهى آخر كلام بينه درت وچهي اريد ارجع وگمزت من الواكف بالباب ..

للحكايا بقايا ..

تابعوني انستا قلبي : hawraalsaidi

قناة التلگرام : Harahir