من اليوم وطلع كل يوم نحط بارت واحد فقط وحسب الظروف ايضا
!!!!لميس بصدمة : ادم
تكلمت بصوت خافت ميش قادرة حتى تهدر الاستفراغ استنزفلها طاقتها ماقدرش ادم يسمعها ولا الاصح مشافهاش بلي وراه
بقات تشوف فيه بنظرات رعب وخوف جامي شافاتو يتضارب مع واحد من قبل بهاذ الوحشية السيد ملامحو ماعادتش باينة الدم مغطي وجهو ومنفوخ بقات تخزر بصدمة هاذا هو جانبو لوخر اللي ديما يحذرها منو ؟؟ رجعت خطوة للخلف ترجف شي من الخوف وشي من البرد ولبستها خفيفة ستجمتعت قوتها وعيطت بكل قوتها شادة طرف بيجامتها بيديها
لميس : اااااااااددددم
خلا يدو في الهوا بعد ماكان راح يسددلو بوكس خلاف طلقو طاح جثة بلا روح ووقف مقابلها شاف ملامح الصدمة اللي على وجهها تدارك الموقف وعملتو متوالها بلاما يخمم عنقها بقوة وهي ماكانتش من المعارضين بعدت عليه ومدت يدها تمسح على لحيتو بحنانة وهي تشوف في من الغضب وعروق رقبتو البارزين وعينيه الحمورة
لميس : كاالمي روحك .... خير وش صرا ؟ كشمما دارلك ؟ وش هاذ الحالة ؟
ادم : والو برك كان يضرب في مرتو بوحشية عطيتلو درس مسقم مايزيدش يهز يدو عليها
لميس : برااافو هاذا هو حبيبي زوجي قرة عيني
ضحك على ردها كان متوقع تدي موقف منو من المنظر اللي شافاتو مسح بيدو اليسرى على اليمنى وهو يشوف في ذاك الراجل بحقد مزالو مابردش قلبو لمح لميس بذيك البيجامة قاعدة متوال المرا هاذيك تهدئها وتعاونها شد على قبضتو بقوة موش حاب يزيد يدقدقها هي مزالها شادة في عقليتها مالغري علابالها بلي يهبل كي يشوفها لابسة القصير
لميس : معليش حبيبتي يخي لباس ؟؟ متخافيش ميصرالك والو مي لازمك تشكي براجلك من تعاملو وعنفو ليك
هزتلها لوخرا راسها بايه بلاوعي وهي تشوف في ادم عجبها تدخلو وتصرفو واخلاقو ورجوليتو ....... استغربت لميس من شرودها دورت راسها لوين تشوف لقاتها تخزر في ادم باعجاب مبين من عينيها وزاد على ما بيها هو كونو عريان وزيد بعضلاتو اللي عشقتهم هي اي واحدة تشوفو بذاك المنظر تطيح فيه عضت على شفتها بغيرة حلت عينيها على وسعهم كي شافتها ماشية باتجاهو لحقتها تجري بالشوي
" مارسي ليك بزاااف ع الشي اللي درتو من شوي كون ميش نتا كون واحد ماسلكني من بين يديه "
هزلها راسو بايه وتخطاها متوجه للميس حضنها من عنقها قرب همسلها في وذنها
ادم : راجلك راه بزااااف عيااان ومحتاج لحضن دافي باش يرتاح وضك نحيللك **** على اللبسة اللي خارجة بيها
لميس : بفففففففف جبتها جبتها مبعد عميتها اني نحضنك مالا
قلبتو عينيها ومشات متقلقة مافهمش وشبيها نوغمالمون هو اللي يتقلق خارجة في وسط الناس ببيجامة بيستي وشورت
=======================
في الصباح ولاول مرة في التاريخ ناضت لميس قبل ادم حطت يدها على خدها وبقات تتأمل فيه بكل حب تتفحص في ملامحو الحادة بكل دقة وحواجبو المعقودين وانفو المحدب وعينيه الغاضبين رغم انو راقد بصح ملامحو القاسية ماتبدلتش رجعت عينيها لذاك الوشم اللي عجبها بزااف مدت يدها تتحسسو مبعد تراجعت بيسك هو عكسها علابالها اي حركة خفيفة تنوضو
ناضت بهدوء من بلاصتها مشات للكوزينة كشما توجد توكل كانت ميتة بالجوع بدات تخمم في حاجة تعرف تحضرها تنهدت بيأس بيسك علابالها ماتعرف تدير واااالو
وجدت الفطور المعتاد اللي كانت توكلو في لوس انجلوس مع زوج كيسان قهوة وطبعا هاذ الشي بعد ماقلبت الكوزينة رأسا على عقب .... كانت تحط الطباسا في البلاتو دارت باش تزيد تهز الطبسي لوخر تخبطت بالسلة اللي فيها الماعن المغسولة جابتهم في الارض مفتتين مخلفين صوت كبييير
كان كلشي مليح عند ادم غار بعد ماسمع صوت التكسير ناض من سريرو يجري حفيان وشعرو داخل بعضو من النوم بعد ماهز سلاحو في يديو توجه للكوزينة لقا لميس حاطة يديها في زوج على خصرها لابسة الطابيلة ومعلقة المنشفة تاع الطبخ على كتفها بطريقة مضحكة
لميس : سامطين كنا عايلة لطيفة لاه تكسرتو لاه هاذا زعما كي قلت اليوم يوم حظي راني في المالديف بصح نتوم فزدتولي يومي تشششه
مسح ادم على جبهتو وتنهد بيسك خلعاتو خبا الفرد
ادم : وش كاين هنا لميس ؟
دارت ليه وهي تتبسم : مكاين والو برك وجدت الفطور ضكا غمض عينيك كأنك ماشفت والو واقعد هنا ترونكيل
هدرتها وهي تدز فيه من ظهرو لطاولة الفطور ... جابت وش بقى من الفطور حطاتو وقعدت
لميس : مانيش مليحة في الطياب اطلاقا كل وش نعرف ندير هو هاذا اندومي ررد بالك تتأفف منو ولا تضحك عليا هاني باش نقلك
تبسم بلطف وبدا يوكل بلاما يهدر كلمة حلت لميس عينيها على وسعهم بصدمة
لميس بصدمة : بنينة ؟؟؟
ادم : وي
استغربت هزت مغرفة كلات اول لقمة حطت يدها على فمها وراحت تجري للحمام استفرغت ورجعت ليه نحاتلو الماكلة من بين يديه
لميس : يخااااه عليك يعييييف حاشا رزق ربي
مد يدو ينحيهولها بعداتو عليه
ادم : معليش عجبني
لميس : يععع ماتفكرنيش عيشك لاضك نزيد نولي نتقيا طعمو كي الموت
ادم : يكفيني انك نتي اللي درتيه
شافت فيه باستغراب كان يخزرلها بهيام تصرفاتو هاذي مبقاتش عاجبتها حاساتو مبالغ بزااف الحب ميش هكذا ناسية اللي ادم فات مرحلة الحب والعشق
لميس : مانزيدش نطيب مرة اخرى
ادم : لاه ؟؟
لميس : باش ماتوكلوش وتموت على جرتي
قرب ليها خطف بوسة سطحية من شفافها
ادم : ماشي قتلك انا نحبك ومتقبلك كيما رااكي ؟؟
لميس : بصح حبك الكبيير هاذا وهاذ الاهتمام ديما يحسسني اللي انا مقصرة معاك بزاف وديما انا العنصر السيء فهاذ العلاقة
ادم : وشكون قالك هكذا انا يكفيني انك تكوني معايا وماتبعديش عليا هاذا هو طلبي الوحيد مويا جينا ماني طالب منك واالو غار حبك الصادق هذا
ختم كلامو ببوسة اخرى مليانة حب وحنان فصلتها لميس كي دزت ادم من صدرو وراحت تجري للحمام تستفرغ كامل وش في كرشها لحقها ادم مفزوع من حالتها هاذي حكملها شعرها بيد وباليد لوخرا يمسح على ظهرها بحنان حتان خلصت تكاها على صدرو وغسللها وجهها وفمها هزها في حملتو وداها للغرفة حطها فوق السرير مد يدو لخدها يمسح عليه بحنانة وهو يخزرلها بنظرة مليانة خوف عليها
ادم : لباس ؟؟ استرحتي ؟؟
لميس : لباس لباس الحمد لله تقلبت ليستوما تاعي من السفر برك
..................ادم : وجهك اصفر نروح نجيب الطبيبة ونرجع باش نع
قاطعت هدرتو كي ناضت من بلاصتها بحماس
لميس : راانا في المالديييف ادم جينا باش نبدلو جو ونعومو ماشي باش نمرض
راحت تجري لادريسينغ بفرحة جبدت قشها وقشو
لميس : نعومو ونستمتعو نولي لبااااااااس علياااا هاك قشك خلينا نروحو
لبسو في زوج قشهم لمح ادم قش لميس وهي خارجة برار جا رايح يحكمها من كتفها جات يدو في شعرها رجعها ليه ناضت تعيط
لميس : ااااي وش بيك وجعتني شعري
ادم : وش هاذ اللبسة
لميس : لبسة العومة نشاله طامعني نعوم في الليكات والسروال
ادم : كون نحيتيهم وخرجتي وخلاص لاه تزيدي تثقلي في روحك بنص ميترة قماش
................لميس : ايه صح عندك الحق ضك
شدها من ذراعها بقوة كي لمح هدرتها الجدية من نيتها كانت تحكي بصحها
ادم بحدة : شوفي نهدركلمة منعاودش تروحي ضك تبدلي هاذ الشقلالة اللي عليك
..............لميس : لاه تش
ادم بالعياط : لميييييييس قلت مانعااااودش
خبطت رجليها في الارض بغضب ومشات تبدل قشها سمعاتو يهدرلها بصوت مسموع اشبه بالعياط
ادم : وماذا بيك لبسة ماتفففصلش جسمك صينو واللله غار ديراكت للمطار
بدلت قشها وعقبت عليه روندة ماتدورش قلقانة قريب تكلاطي فاجئها مرة اخرى بصح بحضن كبيير وحط ذقنو فوق كتفها
ادم : علابالك بيا غيااار ومنحملش واحد يشوف فيك خزرة انحراااف ديزووولي
لميس :اوكي بصح باش يكون في علمك اخخرر مرة تعيط فيا صينو قسما بالله نردلك الصاع الصاعين وساعتها تشوف لميس المهبولة تاع الصح
هزلها راسو بايه طبع بوسة على عنقها الابيض وخرجو حاكميين يدين بعضاهم قعدو في الشط
لميس : هيا نروحو نعومو
ادم : نن اني عيان والله ماني قادر
لميس : امممم خوااااف عرفتها ... ماتعرفش تعووم
ادم بسخرية : هههه نعرف نعوم بصح نكررره البحر
لميس : لاه تكرهو ؟ وش الشي اللي خلاك تكره البحر ؟
قعدت مقابلاتو ضامة يديها لصدرها تخزرلو بتركيز اما هو تبسم ابتسامة حزينة شاف في الارض شوية وبعدها وجه نظرو ليها مسح على شعرها بخفة
ادم : ماشي حاجة مهمة برك مجرد مااضي
.......♥♥يتبع