سداد وبنت العرب

البارت الثامن والثلاثين

سداد وبنت العرب
البارت الثامن والثلاثين

بقلم الكاتبة الزهيريه الزهيريه

ألق/ يگولون دائمآ الأنسان مخير مو مسير وصحة هذا الكلام كله كذب وليش يگولون مسير وهو كل شي ما بيده مثل حظي اني جبت حياتي كلها مجبره ما يوم چان اكو شي مخيره بي هو فقط يوم هروبي  ويه هيثم
وحمد لله چان قرار غلط ودفعت ثمن هاي غلطه كلش. غالي لان غلطي جر عليه ويلات ومن ضمنها سلط عليه سداد

وأني مؤمنه آنه الآنسان خطاء بس خير الخطائين التوابين واني غلطي ما چنت اعرفه هيثم الناقص غيره ورطني بي بس في نفس الوقت ماكو غلط يستحق عليه أقتل طفل بريء واني بالبداية ما چنت اريد أنزل الطفل بس إصرار سردار عليه خلاني أوافق على تنزيل الطفل

ومر على جلسة المحكمة ما يقارب اسبوع وبعدها أخذني سردار على المستشفى العلوية ويايه مومه وقبلوا لا سردار ولا مومه يدخلون گالوا من نحتاجكم نصيح على أمها تدخل يمها هسه ماكو داعي وانوب اني مثل النعجه الثوله ما اندل وكل شي ما أعرف أريد آخذ باص حتى ادخل لدكتوره وگفت يم شباك الباص وگتله على أسمي وكتبه بالباص وأخذت الباص ما نطيته فلوس وهو صاح ورايه تعالي وين رايحه انطيني فلوس الباص گتله ليش هو بفلوس

أبو الباص/ لا عيني مجانًا على روح الحكومه

الق/ أصبر خلي هذا الباص يمك وهسه اطلع اجيبلك فلوس واجي

وعفته وطلعت قريب على الاستعلامات وشفت مومه وهي شافتني اجتي عليه وطلبت منها فلوس وهي انطتني ورجعت دخلت انطيت الفلوس لابو الباص وأخذت باصي ودخلت وتعالي لزمي سره على الدكتوره وما يقارب ساعه ونص وصل إليه الدور ودخلت وشافت الأوراق مال المستشفى الأهلي الراجعتها والسونار

گالت الدكتوره/ إنتي مبلغيچ انه الطفل مشوه ولازم ينزل لهذا نريد توقيع زوجچ ألا بموافقته يله نزله وهم طلعت على مومه وبلغتها كلام الدكتوره

مومه/ هسه أخلي سردار يوقع على العملية وظليت واگفه يم الاستعلامات  الى ما إجى سردار وبلغ أبو الاستعلامات انه يريد يوقع على عملية الإجهاض ودخله يم هذا الي يفتح طبله للمريض وطلب من سردار جنسيتي وجنسيته وعقد الزواج

سردار/ عيني اني زوجها واوقع الك حتى تنزل الطفل لكون مشوه بعد الجناسي والعقد شسوي بيهن شنو راح تعقد النه مره ثانيه

ابو الطبله / اخويه استاذي حبيبي مولاي عيناي المستشفى جهه حكومية تمشي بكلام حضرتك والله تگلي هاي زوجتي المستشفى تريد كتاب صادر من جهة حكومية يثبت هاي زوجتك مو حچي

سردار/ أدري يعني تموت البنيه لما أثبت لحضرتك انه زوجتي هسه دخلوها من تسقط الطفل أجيب مستمسكات مالتنه واجي

الق/ وأستمر النقاش والجدل بين أبو الطبله وبين سردار ما يقارب عشر دقايق  واجوي امن المستشفى وبعدها طردونه كلنه من المستشفى  طلعنه نجر اذيال الخيبه ومن صعدنه سيارة سردار وبده يغلط ما بقى أحد ما غلط عليه

مومه/ أبني جيب العقد من عمها وخلي تنزله الطفل مشوه شسوي بي

سردار/ يمه تحچين صدگ وين الگى عمها هسه وهي حتى جنسيه ما عدها آخذها عمها وحتى إذا موجود وانطاني نسخه من العقد شنو أورط روحي بعقد مزور

وبعدها وصلنه للبيت وبعدها گعدنه بالصاله وبعدهم يتناقشون بموضوعي آخرها گال

سردار/ اذا بقى الوضع هيچ اني اعقد عليها يم سيد وأخذ العقد للمستشفى وخلي تنزل الحمل وبعدها نفسخ العقد

الق/ بس مومه رفضت الموضوع رفض قاطع وآني تعبانه وما بيه حيل وتجبيس ايد موتني گمت واني اسحل بروحي للمطبخ اخذت مي وحسيت شخص صار ورايه ألتفت شفتها چانت هلات وبعدها

هلات / أنتي شنو من بشر لزگتي يمنه كرامه ماكو سداد ما يريدچ وانتي هنا ذابه بلاچ علينه شوكت تنگشرين من يمنه أنتي والنغل مالتچ راح تورطين سردار وياچ لان سداد راح يسجنه اذا ما تطلعين منا من البيت

الق/ وقع كلامها عليه بس الله اليعلم بي بذيچ اللحظة صدگ كرهت سداد ومن كل گلبي بعدني ما جبت الطفل وحصل لقب النغل بجداره من اجيبه شلون يعني من اني وصغيره يصيحولي بنت المنغولي هسه من أجيب الطفل راح أصير أم النغل يعني ما سويت شي بس بدلت زيد بعبيد تبدل بس اللقب من منغولي الى نغل

اني في وقتها ما جاوبتها رجعت للاستقبال متت بچي گعدت ولميت رجلي وخليت وجهي بيهن وايدي على راسي وآني أعاتب ربي واگله ربي فدوه لعينك رحمتك وسعت هاي الدنيا كلها ليش ما وسعتني لان اني غلطت وانهزمت ويه هيثم وتهمت سداد دى تعاقبني ربي اني ما عندي غيرك بس انت الجئ آلك طلعني من هاي المحنه على أهون سبب

ولكون چنت مشغوله بمناجاة ربي حتى ما حسيت على الباب من نفتح وما حسيت غير على أيد على أيدي وخرت ايدي ورفعت راسي شفت سردار واگف گدامي

سردار/ شبيچ الق تبچين لكون ما نزلوا الحمل

الق/ لا بس آني ابچي على عمري ألي صفيت كل شي ما عندي لا بيت ولا أهل وگاعده عند الناس

سردار/ خاف زعلتي لكون گلت أعقد عليها يمعوده مسحي دموعچ شايفتني كاتل روحي عليچ حتى ازوجچ الله يدولبچ أكثر ما أنتي مدولبه على گولة هاي العجوز

ألق/ من چان يحچي طريقته چانت ضحك بحيث دموعي ويه ضحكي

سردار/ شگد فطيره أنتي بابا اضحكي وخليها وين ما تصفى خلي تصفى شنو كاتب ربچ يصير ترين ألق اني من النوع أبد ما أدقق بوجهه بنيه أبد بس هاي أول مره انتبه عليچ عيونچ في حين لونهن بني بس حلوات وكبار وشكلچ بي براءة

الق/ بصراحة تفاجأت بكلام سردار بس هو ظل يباوع بوجهي بحيث ارتبكت منه بس آني قررت آنه بعد ما ابقى وياهم وهلات حقها تغار على زوجها لهذا گتله/ سردار اني بعد ما اگدر ابقى يمكم أريد اطلع منا

سردار/ وين تروحين ألق واني ما اعرف عمچ وين حتى اوديچ عليه وحتى حملچ بعده ما نزلتي وايدچ بعدها مجبسه

الق/ اني عمي مالي دخل بي اذا چان موجود او لا إما حملي راح أبقي واعوفها على الله هو ارحم بحالي آما أيدي ومن تتحسن عود أني أفتحها

سردار/ تحچين صدگ شلون تتوقعين اخليچ طلعين وهذا حالچ ومن تتحسن ايدچ الله كريم عود أشوف شنو أسوي

الق/ الله يخليك سردار بعد ما منها مجال أني أريد أروح منا خلاص خلفله الله على والديكم ما عفتوني بالشارع والله يجازيكم عني
وبعد ما شافني مصره ما حچى شي بعد وبعدها بحدود ساعه اجتي مومه وسألتني اذا صدگ أريد اطلع
واني أكدت إلها طلعتي وهي استسلمت لأمر الواقع انه هاي رغبتي

وبعدها مر 4 ايام أني وسردار كل ما يصير نقاش بينه ينتهي إنه سردار يگوم يصيح عليه وما يقبل اطلع منهم وبهاي الاثناء مر على حادثة كسر ايدي 17 يوم ومومه جبرت سردار على ان يطلعني من يمهم بعد ما شافتني مصره وما اقبل آي نقاش

وتحدد بيوم ألي أفتح الجبس من أيدي هو نفس اليوم الراح بي من يمهم

سداد/ مرات أكو موقف نشوفه نگول هذا شي مضر النه ونكرهه بس سبحان الله صدگ الآيه آلي تگول تكرهون شيئًا وهو خير لكم أني شگد چنت كاره آنه ما لگيت إي دليل ضد آريا أبد وحتى أيست بيوم الگى شي ضدها همزين اكو ويايه فرقد شاهد والا صورت نفسي بيه حاله نفسيه لإن چانت ذكيه خفت كل دليل ضدها وصارت تلعب بكيفها لا ومن القباحه ألي عدها آنه تشتكي عليه

وبيوم إلي فرقد أتصل بيه رحت عليه وبقيت أنتظره الى ما إجى ودخلنه مكتبه وگال / رقم ابو الدجاج چان يتحول إلى رصيد من رقم ومطلعين بياناته آنه الرقم بأسمي

وطبعًا شلون صدمتي ما تصدگ أبد شنو الرقم باسمي
سداد/ أنت متاكد سيدي شلون تراسل من رقمي هذا شي مستحيل

فرقد/ كاكا ماكو عتب عليك فهمنه أنت كردي يعني لازم من احچي وياك أفهمك كلمه كلمه
كاكا أني ما گلت من موبايلك گلت الرقم مسجل بأسمك بعد الرقم انت غيرك تستعمله هذا شي ما نعرفه

سداد/ سيدي أنت تگول أبو الدجاج شنو قابل أني اراسله واحوله رصيد ليش مثلًا عندي علاقه ويا بالخاص

فرقد/ آني اعرف انت ما تراسله بس حتى أوصلك المعلومة من طلعت الرقم وطلع بأسمك ما معقوله اني مثل كاكا سداد وأفكر مثلك لهذا طلبت من شركة الاتصالات انه تگلي آخر برج من أبراج الإتصالات تحول هذا الرصيد وصاحب الرقم البرج مالته بيا منطقه
الرقم ألي مسجل بأسمك حول رصيد من برج بمنطقة اليرموگ إما رقم أبو الدجاج بمنطقة بوب الشام يعني عرفنه همه وين هسه نگدر نجيبهم اثنينهم وشوف شلون واحد راح يبيع الثاني گدامك
وما اگدر اجيبهم الا لازم بشكوى منك حتى أجيبهم ونقيد اعترافاتهم هنا عن طريق المركز

سداد/ وآني هم قدمت شكوى ضدهم بالزنا وطلعت بعد فرقد هو يشوف شنو يسوي ومن قدمت شكوى الى ما رجعت للبيت الشاغل تفكيري شي واحد هو أخيرًا راح أشوف ابو الدجاج أريد أشوف بشنو أحسن مني

ومر تقريبًا يومين وأتصل بيه فرقد وبلغني إنه تم توجيه مذكرة ضبط وإحضار الى أريا ويسر ابو الدجاج وهمه اثنينهم موجودين يمه بالمركز وهذا الكلام اني نقلته حرفيًا عن لسان فرقد واول واحد بيهم استجوبه هو يسر

فرقد / انت متعرف ليش موجود هنا هسه آني أبلغك انت متوجه آلك تهمه إنه أنت چنت على علاقة بوحده متزوجه وزوجها تهمك بالزنا مع زوجته وثانيًا انت متهم بمقتل الطفل أيليا ابن سداد وطبعًا ما اگلك شنو عقوبتك لأن هذا راح اعوفه على القاضي

يسر/ سيدي والله اني ما إلي دخل هي ظلت تجي عليه لسوگ وتغريني

فرقد/ عيني يوسف الصديق ابو هي راودتني عن نفسي هذا الكلام ثابت عليك بمحادثات يعني إذا تحذف من يمك نطلع كل شي عن طريق الشركه الإتصالات إضافة انه هي أعترفت عليك انه أنت تبتزها وتاخذ منها فلوس وحاليًا هي ما عدها وأنت تهددها

يسر / سيدي هاي كذابه اني ما آلي شغل بيها هي ذابه نفسها عليه وحتى عفت بيتي ورحت بغير مكان أشتريت وگعدت في سبيل أخلص منها

فرقد/ هذا الكلام كله أقنع بي نفسك قبل ما تقنعني بي
هي كلامها كله عن بدليل رسائل وإتصالات بينكم
ومن شفت ما منه مجال جددت مدة 4 أيام يبقى على ذمة التحقيق

إما آريا بقت يومين على بالحجز وما حققت وياها حتى من استجوبها چنت بارد حتى ظل تخمن شنو يريد مني
ومن شفت خلاص بعد ما منها مجال أكيد هسه ستوت وأعصابها تلفت اكيد من استجوبها تنزل التانكي

ومن جابوها لمكتبي چانت منهاره واني تعاملي جاف وياها أكثر حتى ارعبها اكثر ومن بلغتها شنو تهمتها بالبدايه نكرت بس من گتلها على إعترافات يسر ضدها وشلون الواتساب مليان محادثات بينهم وكلها سحبنهن وهي تخبلت شلون أعترف يسر عليها تخبلت وصارت تخرط هواي حچي من ضمنها إنه چان واعدها يزوجون بدبي

فرقد/ صدگ متت من الضحك وجاوبتها/ اني بحياتي ما شفت وحده غبيه مثلچ بابا يا دبي تزوجون بيها اما هذا تسفيط حچي الواتساب وصارف عابچ مليار بالحچي على راح نسافر واسويلچ عمليات تجميل هذا كله چذب ماكو واحد خسر غيرچ وهو بس حققت ويا باعچ

آريا/ سيدي شنو باعني يسر يحبني ويبيع الغالي على مودي

فرقد/ وبوقتها سداد اچى وگتلهم خلي يدخل يمي ودخل اثناء التحقيق وهو گعد ويباوع بس على آريا وساكت وهي تبچي من گتلها/ آي صح يبيع دجاجة على مودچ آني بالنسبة عني كملت القضيه والادله موجوده كلها من ارقامكم ومحادثاتكم وهاي كلها راح احولها على القاضي وهو بعد يحكم بس طالما الكل الأدلة موجوده اكيد تروحون لو إعدام لو مؤبد

سداد/ هنا شفتها ذليله شگد ذلتني اجتي عدالة السماء وذلتها وهي من گال فرقد جملة الإعدام والمؤبد اجتي عليه وگعدت بالگاع وتربعت وهي تبوس برجلي وركبي وتبچي وتتوسل بيه

اريا/ سداد احلفك بتراب أيليا طلعني منا سامحني وشتريد آني حاظره

سداد/ هسه ذكرتي أيليا ولچ مو مات من شكلچ الزفر آني بالنسبه عني ليش اسامحچ هسه كل القضايا راح اربحهن أول قضية مال الزنا من تطلعين انتي الزانيه مو اني وقضية يبرق اربحها لان انتي راح تسجنين شلون ينطوچ حضانه هسه كافي شفتچ وانتي هنا تبوسين قنادر

وعفتها وطلعت وما ابتعدت عن مكتب فرقد ومن طلعوها من يمه رجعت إله وچان نقاشنه حول موضوع
انه لازم تتنازل عن حقوقها واتفقت ويه فرقد انه اريد ينرفعون محكمه وچانت اكو غايه بنفسي وهي إنه أشوف ابو الدجاج وطلبت من فرقد هذا الطلب وهو صاح على سلام وبلغه انه يريد يجيب يسر من الحجز وظليت گاعد الى ما دخلوا والله تعجبت عليه على شنو هي باوعت عليه آني بالطول أطول منه وبشرته سمارها غامق وضعيف بحيث حتى عظام وجهه بارزه ادري بشنو احلى مني بس الظاهر المتعود على الزباله يبقى طول عمره بالزباله وهذ ا چان حال آريا وكملت كلامي وطلعت للبيت واني أغلي أريد اخذ حق روجيدا وايليا منهم كون أشوفهم معلگين بالمشنقه

واني قررت ما أبلغ إي أحد بالصار بالمركز من موضوع اريا وابو الدجاج حتى أبقى ضاغط على سردار بموضوع تنزيل حمل الق وظليت الح عليه انه قبل الجلسه لازم ينزل الحمل وهمه ما يعرفون آنه آريا بالسجن يعني راح إضرب عصفورين بحجر واحد

بس تجري الرياح بما لا تشتهي السفن لآنه مر على سجن اريا وابو الدجاج 14 يوم واجاني اتصال من فرقد يگول / عيني كاكا سداد حجزتلك غرفه ويه نسيبك حتى واحد يونس الثاني بالسجن

سداد/ يا نسيب اني نسابتي بأربيل وليش انسجن

فرقد/ لان تم القاء القبض على نزار عم ألق بمركز شرطة منطقة.... وبعد التحقيق ويا يگول سداد هو الي گلي خرب البريك مال السيارة

يتبع/ تحية لكم من القلب الى القلب
دمتم في امان الله وحفظه