كانت لميس تتبسم وتضحك بلا سبب ميش موالفة هاذ الكلمات الحنينة وهاذ الحركات والكلمات المليانة عسل وغزززل بيسك حاجة جديدة عليها ملي تزوجت وهي موالفة غار العياط والهواش والتكسار قطع لحظتهم الرومانسية مضيفة الطيران اللي دقدت الباب جات تبعد لميس على ادم لزها ليه كثر معنقها بجنب وهويلعب بشعرها عطى الاذن للمضيفة باش تدخل تحت تذمر لميس اللي حشمت دخلتلهم الشيريو اللي كان معمر ماكلة من كل الانواع بقات لميس مبرقة عينيها فيه ولعابها قريب يسيل بقات المضيفة تعدل في الطاولة وتشعل في الشمع ماصبرتش لميس قعدت تنغز في ادم باش يصرفهم
شاف فيها وهو شاد الضحكة على منظرها الطفولي امرها تخرج قبل ماتكمل توجاد قفزت من بلاصتها راحت للطاولة تخزرلها بعينين يبرقو
ادم وهو ماشي جيهتها : مكملتش حتى زينة الطاولة
لميس وهي توكل في الكباب : معليش وصلت الفكرة حتى وكانت ميش مزينة راهي رومنسية يكفي الماكلة اللي فيها صحييت
شبك ادم يديه فوق الطاولة وهو يتفرج فيها كيفاه توكل
ادم : لميس باش نكون واضح من اللول ديري مليح في بالك بلي ميش راح نخليك اطلاقا مكان لاه ترجعي لتهوراتك وتمردك اللي يخرجني من حبال عقلي صح بدينا من الصفر بصح شخصيتي هي نفسها والفي من ضك
لميس وهي تلوح في لقمة كبيييرة في فمها : شوف مانيش حابة نكسر راسي ونهبط المورال لعمري خليني فرحانة بالماكلة هاذي اللي قدامي قبل ماينوضلي هبالي ونتضاربو كي العادة و..................
مكملتش هدرتها حطت يدها على فمها وناضت تجري للحمام لحقها يجري لقاها غلقت الباب بالمفتاح من داخل خرج قلبو من بلاصتو وهو يسمع فيها تستفرغ ناض يخبط في الباب خايف عليها
ادم : لمييس حلي الباب لميس حلي الباب لا تطيحي ثم
غسلت وجهها بوهن حست روحها اللي صح ميش مليحة قريب تطيح تكات ع الحيط ومدت يدها رايحة تحل الباب تمدت يدها في الفراغ وجات طايحة في الارض غايبة ع الوعي سمع لوخر خبطة قوية حس قلبو خرج من الخوف عليها بلا ما يخمم دخل في الباب كسرو لقاها مرمية في الارض
-----------------------------------
ناضت لميس وهي بين احضان ادم ماتفكرت والو غار انها كانت في الحمام جات رايحة تنوض لزها ليه كثر
ادم : ششش مافتتتش مامبا ساعة على نومك ريحي مزلنا ماوصلناش
لميس : رايحة لل..............
ادم بحدة : مانعاودش كلامي مويا جينا
هزتلو راسها بايه ورجعت لحضنو مستحلية لمساتو على شعرها وربتتو علىى ظهرها بحنانة
لميس : كيفاش خرجتني من الح........
ادم بحدة : قتلك ريحي روحك وغمضي عينيك ارقدي
تأففت وبعدت عليه عاطياتو ظهرها باش ترقد جرها ليه وضمها من بطنها حاط راسو على رقبتها باش يرقد
''''''''''''''''''''''''''''''''''''''''''''''''''
في بلاصة اخرى وسط مدينة لوس انجلوس في مطعم من المطاعم الراقية نلقاو زوج متحالفين الراس للراس
ميرا : وش راك ناوي تدير خاطر هوما سافرو يستمتعو بوقتهم ويقضيو شهر العسل تاعهم وحنا هنا مزلنا مادرنا حتى ابرة في خيط علاه هاذا هو اتفاقنا ؟ نخليوهم يعيشو في سعادة ؟؟
ايفان : كالمي روحك ميرا رايح يصراو بزااف حوايج بصح ميش ضك نسيتي بلي معطينالهمش كادو زواجهم وحنا ماناش قليلي ذوق مالا خلي هاذا هو الكادو تاعهم هو انو نخليوهم يستمتعو بشهر عسلهم شوي وبعدها نتحركو راني موجد وحد الكف للميس ماتتخليهش وحتى هي ماتقدرش حتى تتخيلو ولا تصدقو
ميرا : وشنهي هو ؟؟
ايفان : خليه للايام يجي نهار اللي تعرفيه
ميرا : شوف ايفان انا مانيش من الصابرين مانقدرش نتحمل تواجد لميس مع ادم قلبي راهو يتمعس من الداخل يلا معلابالكش
ايفان : محسوب حاسبتني انا اقل منك حتى ضك اني متمني تكون هي اللي متوالي ضك ماشي نتي
ميرا بحقد : مفهمتش لاه تحبو هاذيك العاقة اللي ميش متربية وش المليح فيها باش تحبوها كامل لهاذ الدرجة سيرتو نتوم الزوج ؟؟
ايفان وهو يتفكر في اول لقاء فيهم ويحكي بابتسامة : بيسك عندها كاريزما خاصة .... عندها حاجة داخلها معلاباليش شنهي تجذب بالخف تدخل للقلب
حست ميرا بغصة في حلقها حابة تبكي وقلبها قريب يطرطق من الغيظ ديما لميس تسبقا في كلش وتديلها كللش هي الوحيدة اللي تحسسها بالضعف وانها ماتسوا والو ضربت الطاولة بقوة وناضت
ميرا : اخر فرصة ليك ايفان يا تتحرك يا نتحرك وحدي ونظن ميش راح يعجبك هاذ الشي
هزت صاكها وخرجت شاف في ظلها ترشف من القهوة وهي يتبسم بخبث
''''''''''''''''''''''''''''''''''''''''''''''''
من لوس انجلوس نروحو لموسكو عاصمة روسيا بالضبط لعايلة كانغراس نلقاو فيروز وسامر في الحديقة الخلفية للقصر يتبادلو اطراف الحديث بعد ماطلت شوي شمس في وسط ذيك الثلوج والجو البارد
فيروز بقلق : سامر كشما كاين اخبار على لميس ؟؟
سامر وهو يشرب في الكاس اللي من يدو ضحك بسخرية على كلامها : خخخ كأنك قلقانة عليها زعما نسيتي بلي تزوجت واقيل
فيروز : مالغري على تصرفاتها وعنادها تبقى بنتنا سامر ماتقدرش تنكر هاذ الشي .. ... يادرا عايشة مليح ولا
سامر : وش يهمني انا عايشة مليح ولا لا ومكان لاه تلعبيلي هنا دور الام الحنينة ماوالماتكش فكريلي في الملف الاسود باش ندمرو ادم ونكتسبو الشهرة ونحطمو جميع شركات ادم لوينو وتولي شركة كانغراس في الصدارة
فيروز : انا اني خايفة على بنتي ونتا تقليي الملف الاسود ؟؟ ماوصلتش كسوحية قلبي لدرجة نغامر ببنت كرشي اللي درناه غلطة وانا ندمت اللي مديناها لواحد كيما ادم
تبسم سامر بسخرية على مرتو وطيبتها المفاجئة يقدر يتقبل طيبتها هاذي اذا كانت لميرا بصح لميس مستحييل
سامر : وشمن مصلحة تفكري فيها ضك فيروز صورادها ولا قصورها ولا مرتبتها الاجتماعية ولا وشنهي ؟؟؟
فيروز بانفعال : ربيي يهدييك ا سامر لاه حنا وش خصنا حتان نفكر هكذا ماناش قل منهم برك نمت انها واقفة في قمة الجبل وتخرزلنا من الفوق وحنا نبكيو
سامر بضحك : هههههههاههاهاهاه نظن لازم نخافو على رواحنا من هاذ الحلم ماشي عليها راهي تشوف فينا من الفوق وحنا التتحححت
فيروز : رااني نقلك من فوق الجبل وتشوف فينا التحت نبكيو يعني تفكر في الانتحار
سامر : شوهت اسمنا اصلا موتها خيرمن حياتها مقدمتلنا والو من غير القلقات طفلة عاقة كيما هاذي ماعندي ماندير بيها
رما جملتو عليها وناض ميش عاجباتو ملامح الحيرة اللي على وجه فيروز اللي موش موالفها
_____________________
هزها من فوق السرير ماشي بيها للكرسي تاع الطيارة بيسك كانت هابطة حست بيه كي هزها ولأول مرة تنوض وتفيق بروحها شاف فيها تخزرلو بطريقة معرفش يفسرها كانت تخزر لملامحو وهي تتبسم وحدها تايهة مفهمش وشبيها اول مرة يشوف هاذ النظرة منها حطها فوق الكرسي ربطلها الحزام وقعد بجنبها شدلها يدها علابالو تخاف كي تعود الطيارة طالعة وكي تعود هابطة
ادم : كشما ضيعتي في وجهي ؟؟ نمدلك تصويررتي
فاقت بروحها بعدت عينيها عليه مافهمتش لاه حلالها تتفرج فيه وفي وجهو كأنها اول مرة تشوفو
لميس : اا لاااطيف وش ندير بتصويرتك الله يسترنا ماخصنييش نشوف وجهك كل يوم نندب بتصويرتك المدودة هاذيك يخي حالة يخي مديها في روحك بزاف
حط ادم يديه على عينيه يضغط عليهم ندم اللي هدر يقول كلمة تردلو جورنان يلا مانطقتش من فمها تنطق من جنابها هاذ الطفلة
ادم : صاي مهدرنا والو
حطت الطيارة فكلها لا سانتير دار لينات تاعو تولهتلو عانداتو هي ثاني حطت ليناتها فوق شعرها وعدلت شوشتها اللي كانت قصتها مرة اخرى غرة كورية شاف فيها ادم وهز حاجبو الايسر ومد يدو لشوشتها يخزرلها زاد لمح شعرها اللي زاد نقص طولو مرة اخرى فهم اللي كانت تمشيلو في الخط برك كي قاتلو منزيدش نقصو متولهلوش كي كانت مدايرة الشابو
ادم : وكتا قصيتي شعرك ؟؟ وزيد شوشتك لاه خضيتيها هكذا
لميس وهي تضربلو في يدو : اووووف نحي يدك من قبيل وانا نعدل فيها
ادم : لمييييس ماشي قتلك ماتزيدي تقصي منو وااالو وزيد هابطة على عينيك بزاف تعميك
لميس : وش دخلك انمي يخي شعري ولا تعميت نتعمى انا ونتا وش وجعك .اااااااي
حطت يدها على فمها بعد ماضربها بظهر يدو
ادم : لسانك احكمي فيه صينو المرة الجاية هو اللي يتقص ماشي الشوشة ااخر مرة تستخفي بيا لميس تزيدي تقصي منو 1ملم تشوفي
لميس : اوكي زوجي قرة عيني ... وين رانا ؟؟
ضحك على هدرتها وشدها من يدها داخل للمطار
ادم : ماتطلقيش يدي باش ماتضيعيش
لميس بضجر : اوووف ادم قلي برك وين رانا قووووول
كي عرفاتو اللي موش رايح يجاوبها سيرتو بعد ما شافت ملامح البرود طلق يدها بعد ماوصلها وين يقعدو المسافرين وخزر فيها بتحذير
ادم بحدة : استنايني هنا ضك نجي نروح نجيب لي فاليز ونجي تتحركي من نحشلك رجليك اني نعرفك فيك وحد الدودات يزغدو
هزتلو راسها بايه وشافت فيه وهو رايح
لميس : يحتاج وحد الربع ساعة هكذاك باش يقدر يجيب لي فاليز ندور شوي ونولي لبلاصتي قبل مايجي
مشات تتجول في المطار وهي تحاول تعرف وشمن بلاصة راهي من اللباس المحلي للدولة اللي راهي فيها بقات تدور وحد نص ساعة حست بنسمة باردة شهقت كي فاقت بروحها اللي طولت راحت تجري في المطار كي المهبول اللي هرب من سبيطار المهابل
لميس : ويييييلييييي اليوم يذبحني ويشنقني ويقعطني
حبست في بلاصتها كي شافت ادم واقف في البلاصة الي خلاها فيها عضت على ضفارها بقوة تخمم وش تدير علاابلها اليوم يرفسها خاطر علابالها بروحها بلي هي اللي غالطة هو قاللها ماتتحركيش من بلاصتك وهي غلضت راسها
.........♥♥♥يتبع