سداد وبنت العرب

البارت السابع والثلاثين

سداد وبنت العرب
البارت السابع والثلاثين
بقلم الكاتبة الزهيريه الزهيريه

غالبًا الحزن لا يكسر أمرأه
إنما يسيطر عليها شيئًا فشيئًا
الى ان تبرد مشاعرها وتتغير طباعها

الق/  أكثر الأحيان نكون نندم على شعورنه إتجاه شخص  وحتى نتعجب على نفسنه شلون حبينه هذا الشخص  لأنه تكون صدمتك بي ما يتحملها عقل وهذا چان شعوري ويه سداد يعني شگد چانوا يحذروني ويگولولي سداد ما يوم يقبل بيچ هاي الجمله چان دائماً يكرروها عليه بس سبحان الله السمع مو مثل الشوف من هجم عليه سداد وچان يريد يشمرني من فوگ الدرج  هنا تأكدت انه كلامهم صحيح ومن دفرني من فوگ الدرج أتأكدت انه مستحيل بيوم سداد راح يقبل بيه تحت اي ظرف من الظروف

ومن دخلت للمستشفى واني بحاله يرثى وجبروا أيدي أخذتني مومه لدكتوره النسائيه وطبعًا الحلو بالمستشفى الاهلي لكون بفلوس شلون يتعاملون وياك برحمه وبمحبه وبعدها يقطوك قطه معدله ومن دخلنه يم دكتورة النسائية گامت وگفت وهي تگول لمومه / عنچ خاله ارتاحي اني هسه أخليها تنام على السديه

ومومه تهز بيدها ما مقتنعه بكلام الدكتوره وإني الدكتوره جابتني يم سديه ونيمتني عليها وهي تسألني شبيچ

جاوبتها مومه/ بيها حصبه وجبناها يمچ عيني غير حامل وگعت من الدرج وجبناها خاف الطفل بي شي

الق/ الدكتوره خطيه فشلت كل شي ما حچت وطلبت مني إرفع ملابسي حتى تاخذلي سونار واني هم رفعت ملابسي عن بطني وخلت جل وظلت تمشي الجهاز على بطني وهي تعگد بحواجبها وبعدها وخرت الماوس الي چانت تمشي بيها على بطني وچان تگول

الدكتوره / بلا زحمه عليكم هسه آجي

الق/ وعافتنه وطلعت وظلينه اني ومومه وحده تباوع على الثانيه مستغربات شبيها

مومه/  هاي شبيها شنو شافت وعافتنه وطلعت خاف انتي حامل بچلب واحنه ما ندري اگلچ هاي على أساس تفهم ساعه تمشي الجهاز على بطنچ وهسه تلگيها راحت تسأل دكتوره ثانيه يله جاوبنه

الق/ وسبحان الله عبالك مومه تعرف الغيب لان صحيح الدكتوره رجعت واكو وياها دكتوره ثانيه وهاي الدكتوره الثانيه هي اجتي أخذت الماوس وهم خلت جل وگعدت تمشي الماوس على بطني بعدها گالت بلا زحمه عليچ نامي على صفحتچ اليمنى وهم ظلت تمشي الماوس ورجعت طلبت مني أنام على الجهة اليسرى وهم نفس الوضع تمشي بالماوس ورجعت گالت نامي على ظهرچ وهم رجعت تضغط على بطني بالماوس بحيث قلقتنه حتى اجتي مومه وهي تسأل الدكتوره عيني شنو دى شوفين گولي النه

والدكتوره بعدت الماوس عن بطني وگالت الي تعالي واني گبل عدلت ملابسي وگمت وگالت

الدكتوره / خلي أكون صريحه وياكم الطفل ما بي شي والوضع طبيعي والوگعه ما مأثره عليه أبد بس اني كوني دكتوره چنت افضل انه الطفل لو نازل أفضل اله ولامه

مومه/ ليش شبي

الدكتوره / اني بالسونار شفته هو بالأسبوع التاسع وبس وضعه يوحي أنه مشوه لان عباره عن كتله كامله واحنه ما نگدر نزله هنا نحولكم لمستشفى العلويه هي تنطيها علاج يسوي عدها اسقاط وبعدها من تگوم تنزف ويصير عدها توسع يسولها كورتاج وينزلوا إلها لإن حتى اذا أجى للدنيا راح تتعذبون بي نزلوا من هسه وان شاء الله العوض على الله

الق/ بعد كلام الدكتوره طلعت ابچي وبعد ما انطونه التحويل لمستشفى العلوية واجينه يم الاستعلامات ورادوا كشف وصل الحساب ولكون ما عدنه گالوا لمومه روحوا راجعوا الحسابات وتحاسبوا وجيبوا وصل يله طلعون ومومه صاحت على سردار وهو دخل تحاسب ويه الحسابات وهنا چانت الصدمه بالحساب يعني الرقم چان چبير  حتى خطيه مومه فزت وهي تعاركت ويه أبو الاستعلامات

مومه/ أدري هو خليتوا مغذي وابره شنو انطيتوها أكسير الحياة وهي تجبيس أيدها قابل طبگتوها مرمر ومخلين دكتوره حتى ما تفتهم وتطلبون هيچ سعر الله كون ما يسلطكم لا على مسلم ولا يهودي

الق/ وخطيه أبو الاستعلامات يگللها خاله مو يمي الموضوع وچانت تريد تروح تشتكي يم مدير المستشفى بس سردار ما  قبل وطلعنه وأني ميته بچي ولما صعدنه بالسياره مال سردار يله أنتبه عليه آني ابچي ومن سال ليش ابچي شرحتله مومه الموجز كله

سردار/ آني أشوف لو تنزلي وتخلصين يا بنت الناس يعني هو أنتي شنو متأمله من سداد گليلي واحچي ويايه بصراحة وخلي نحسبها اني وياچ حساب عرب

الق/ ما منتظره شي من سداد أبد

سردار/ إنتي شفتي شنو سوه سداد يا بنت الناس يجيچ طفل مشوه وين تودي وخلي نكون صريحين وياچ لازم عمچ  نعرف هو وين حتى تروحين يمه لإن يمنه أكثر من هيچ ما تگدرين تبقين سواء إذا نحسمت القضيه لسداد آو أريا بكل الاحوال  إنتي لازم شوفين حل لنفسچ وبعدين تعالي اگلچ ألق حتى في حال عرفنه عمچ وين هو مطلوب للدوله بتهمة قتل اوزجان الله يرحمه وهو چان هدفه قتل سداد شنو الحل بالنسبه الچ

الق/  ما اعرف بس أني الطفل أريده حتى اذا ما يقبل بي سداد

سردار/ لچ عيني وين تروحين بي خلي عقلچ براسچ عد أقلها تحيرين بس بروحچ مو تحيرين بروحچ وياچ طفل مشوه اخذيها نصيحة مني نزلي الطفل واخلصي

الق/ شفت كلام سردار صح وبلغته إنه إني موافقه أنزل الطفل وسردار بعد ما حچى شي وصلنه للبيت ومومه بعد ما خلتني اصعد فوگ لإن وضعي كسيف لا يسر عدو ولا حبيب وخلتني أنام بالاستقبال وذاك الليل بطوله ما نمت وأدعي ربي يهيئلي طريق للخلاص من كل هذا ومر يومين واجى موعد المحكمه وأخذني سردار

وبوقتها وصلنه متأخرين وهنا شفت سداد ثاني حسيته شيطان حتى نظرته مختلفه وچان يباوع عليه نظراته كلها كره والعجيب نكر كل صله اله بيه وحتى من تقدمت للقاضي وگلت سداد زوجي هو نكر وخله الكره بملعب سردار لإنه گال هي زوجة سردار مو زوجتي
بوقتها شكو حب واعجاب چان بداخلي لسداد مات

والقاضي حسم القضيه طلب اثبات يثبت أني زوجة سداد لو سردار وطلعنه وأني أغلي بداخلي وهو طلع بعدنه واريا اجتي على سردار

آريا/ اني اعرف إنه انت ما آلك علاقه بالخادمه بس انت ليش ما نكرت وتعال اثنينه نثبت للقاضي إنه هاي الخادمه حامل من سداد

سردار/ عيني اني مالي شغل بأي أحد واي شي يصير هذا بيني وبين سداد ما إله حق احد يدخل بينه عندچ شي ضد سداد انتظري قرار القاضي

الق/ وعفناها وطلعنه من المحكمه وسردار يفور وينطفي عكس ما چان يظاهر گدام آريا وبس وصلنه للبيت دخل يرعد على أمه شلون سداد سوه بي هيچ
بوقتها گتله لسردار انه ليش ما يجيب العقد مال زواجنه من عمي نزار

سردار/ البعيده غبيه لو مطيه دى اگلچ انتي مو زوجته شلون أجيب العقد من عمچ ألي ما اعرف وين نگبر وحتى اذا عمچ موجود شنو اجيب ورقة إدانتي بيدي وأقدمها للمحكمه حتى انحكم على تزوير واغتصاب قاصر يعني شنو اشيل الليله كلها بدل سداد

الق/ والحل شنو اني ما أريدك تضرر

سردار/ الحل الوحيد إنه ينزل الحمل قبل ما تجي موعد الجلسه الثانيه

الق/ خلاص أنزل الحمل مثل ما تريد

سداد /  أصعب موقف تمر بي هو موقف الاختيار وخصوصًا لمن تختار بين إمرين وآحد أصعب من الثاني أني من وعيت على الدنيا سردار أخويه أعتبره وماكو اعز من الاخ بس سردار غدرني لهذا چانت عندي صعوبه بين أقبل بواقعي من ناحية الق وبين سردار وحيره چان عندي منو إختار وأريد واحد احچيله إلي بگلبي اختنگت بعد ما مر على جلسة المحكمه يومين لهذا اختاريت فرقد ومن اتصلت عليه جاوبني

فرقد/ كاكا سداد بيوم الي ما تتصل بيه أفتقدك واگول شعجب ما أتصل بيه كاكا سداد واكيد انت حفظت رقمي أكثر من رقمك

سداد/ سيدي اني صرت ما اعرف المن أشكي صرت أخاف من آقرب الناس إلي اما انت تسمعني لو تقدملي النصيحه لو تسكت يعني ما تاذيني وما الك مصلحه تاذيني

فرقد/ احچي كاكا أسمعك بس رحمه على أهلك تدري من احچي وياك تنقل كل الطاقه السلبيه إلي وأني ما ناقص البيه مكفيني

سداد/ سيدي أني من گتلك زوجتي اشتكت عليه انه اني زنيت ببنيه ما كذبت وأريد أخلص من مشكلة المحكمه تهمت بيها سردار أبن خالتي هو ألي ورطني هاي الورطه تدري

فرقد/ شوف كاكا اني لا وياك ولا ويه إي آحد لان شنو مصلحتي وياك لو يه غيرك لكن سردار عندك نسبة شك بي گلي

سداد/ سيدي سردار من موقفه الأخير الصار صرت ذره ما اصدگ بسردار المشكله مو هنا المشكله إلي زنيت وياها حامل

فرقد/ هذا الشي ما راح يكون شي گتلك القانون إلي يزني ويه وحده اذا مو حامل شي راجع آلك تزوجها او لا وتبقى شغلة عشائريًا اما اذا حامل ينسبون الك بس الطفل لكن راح يأثر عليك بقضية بنتك بالحضانه او هي تريد تثبت الزنى حتى عدها ورقه رابحه البنيه كل مره تبتزك وتاخذ فلوس

سداد/ سيدي اني هاي البنيه إلي زنيت وياها الطفل الحامل بي ما أريده وهي مچلبه بي ما تريد تنزله

فرقد/ اعتيادي كاكا ما تنزله اكيد شافتها فرصه حتى تكون ام لطفل ابو حالته الماديه زينه وهي حالها من حال زوجتك تريد تحصل فلوس أعرض عليها فلوس شوف ردة فعلها هسه گبل توافق تنزله

سداد/ راح أعرض عليها مبلغ محترم وأشوف 
بوقتها شكرته وغلقت ويا الخط واني بقيت اباوع على على الموبايل وأفكر ويه نفسي إتصل على سردار لو لا بعدها قررت أتصل بي وأتصلت بي وهو رن الموبايل يمه بس ما جاوبني أبد عرفته بعد ما تهمته بالمحكمة بعد ما يجاوب عليه ابد وأتصلت على خالتي مومه
وهي من ردت عليه سلمت عليها ما جاوبت على سلامي

مومه/ أدخل بالموضوع سداد شعندك متصل

سداد/ يعني خاله إنتي فوگ ما ابنچ غلطان والغلط راكبه من راسه لرجله زعلانه عليه ما تردين سلامي  على العموم براحتچ خاله بس أني هذا حدي وياكم ألق تنزل الحمل مالتها أفضل وأني مستعد انطيها إي مبلغ تريده بس خلي نخلص

مومه/ هو بكل الاحوال الطفل مشوه يعني تنزله افضل إلها وهي اتفقت ويه سردار يعني ماكو داعي تدفع اي فلوس

سداد/ اكيد يكون مشوه اذا زنى شتردون يطلع مثلًا يكون نبي

مومه/ هذا سردار يريد يحچي وياك

سداد/ حمد لله إتصل عليه ما يجاوب احچي وياچ يريد يحچي ويايه

سردار/ شوف سداد بغض النظر عن كل الصار بينه وما يوم اصدگ بعد علاقتنه ترجع مثل گبل بس هسه احنه يجمعنه موضوع واحد وهو حمل ألق البنيه الطفل مشوه في بطنها ودكتوره نصحتها تنزله واحنه نريد منك تجي توقع بالمستشفى على مسوؤليتك انه ينزل وبعلمك

سداد/ هههههه والله ضحكتني شايفني غبي حتى آجي أوقع شنو تردون أوثق زواجي عن طريق المستشفى حتى ثاني يوم الگى توقيع موافقتي بالمحكمه روح حباب ألعب غيرها بعده ما انخلق الي يلعب عليه وانت مصور اني يعد أثق بيك

سردار/ شوف سداد ربك فوگ راسك ويجي يوم ويطلع حوبة هاي الطفله بيك ولا تگلي فقدت الثقه البنيه انت من أخذتها چنت تحت تأثير المخدر او لا البنيه بكر وهسه هي تنزل الحمل ألي حملت بي منك  وهي طفله احتمال تموت بس أذكر انت عندك بنات ما تخاف لا الله يعابيك بيهن انت أيدك طويله وتظلم بس غضب ربك اكبر من طولة أيدك بنيه ما عدها آحد واحنه ظلمناها وين نروح من الله مو ربك قادر على ان يكفخنه بس شنو اگول الك ما راح تحس انت مو فقدت الثقه بالنساء لا انت أصلًا ما عندك ثقه بنفسك وهذا أخطر شي ممكن يواجه الأنسان هو عدم ثقته بنفسه روح راجع دكتور نفسي احسن آلك

سداد/ ما چان عندي اي جواب نهيت إتصالي ويا بعد ما انطى وعد إنه ينزل الطفل والق بعد ما تبقى يمهم يحاول يشوف اي احد من أقاربها ويوديها يمهم

وبعدها مر 4 ايام على هذا  الإتصال شنو صار في بيت خالتي مومه ما اعرف  بس اجاني اتصال من فرقد فر راسي فر وهو يگلي تعالي سداد أريد أشوفك شي مهم كلش

وبحيث هو گلي تعالي باچر الصبح بس آني ما  اگدر ظليت الوب أريد اعرف شيريد يگول وظليت الح عليه بالإتصال وهو ما يجاوبني الى ثاني يوم الصبح رحت عليه للمركز بعد ليله مرهقه وأني افكر شنو هذا الشي
وهو چان عنده جوله على السجون ظليت أنتظره يمكن الى ساعه 11 الصبح يله إجى فرقد ومن شافني

عگد حواجبه فرقد/ كاكا سداد عندي ملاحظة عليك وهي من تلطش بالموبايل تشعل الموتى ترى گتلك الصبح اگلك واني ابويه مستلگ وعندي مناداة من وزارة الداخلية وانت تتصل گتلك الصبح بعد خلاص أنتظر للصبح واگلك هسه تفضل ويايه لمكتبي

سداد/ دخلت ويا واني دماغي يفتر وهو گعد على مكتبه وبعده رجع بكرسيه على الحايط ورفع رجله على المكتب وگال

فرقد/ تدري كاكا سداد إنه الآنسان شگد يمر عليه وقت بشغله تفوته اشياء وهي تافه لكن توصله لغير شي اني في وقت گتلك رقم ابو الدجاج هو الارقام إلي يتعامل وياهم محدودين اكو شي شركة الاتصالات ما زودتنه بي وهو تحويل الرصيد من رقم الى رقم من خطرت على بالي تحويل الرصيد رسلوا الي رقم هواي يحول رصيد لابو الدجاج ومن طلعت بيانات الرقم طلع بأسمك

يتبع/
تحية لكم من القلب الى القلب
دمتم في امان الله وحفظه
الكاتبة الزهيريه الزهيريه