سداد وبنت العرب

البارت الخامس والثلاثين

سداد وبنت ألعرب
البارت الخامس والثلاثين

بقلم الكاتبة الزهيريه الزهيريه

عظم الله آجر رجولتك
مادمت تفتخر بخذلان قلب أنثى
اقصى ما تستطيع فعله البكاء
ورفع يدها الى السماء

الق/  اصعب شي بالحياة هي المواجهة لمن تكون انت على حق تدخل المواجهة وانت مو خايف وتخلي اصابيعك بعين اكبر واحد بس لمن تكون كذاب تخاف من المواجهه وما تريد تواجه هذا الشخص وبدك تنشگ الگاع وتبلعك ولا تواجه وهذا الشي چان دائمًا في بالي شلون لو عرف سداد وأنه احنه زوجنه شنو درت فعله وحتى من اتواجه ويا شنو ممكن اگول اله وشلون أبرر موقفي من إنه أني تهمته

بس دائمآ ادعي من رب العالمين آنه يلطف بحالي ويرزقني بسداد يستر عليه كل شي ما أريد منه هاي الدنيا بس الظاهر هذا حلم لأنه كلها أكدت إنه سداد ما راح يقبل بيه

ودائمًا ألتقي بسداد بس بالمصايب يعني لازم اكو مصيبه حتى نلتقي  ومن عرفت مومه إنه سداد ضارب سردار على راسه تخبلت وظلت تعيط وتبچي وترجع عليه ترزل بيه وتغلط عليه وهي موبايلها بيدها وتتصل على سردار الى ما اخوها رد عليها وبلغها انه سردار بخير وانه راح ياخذ يومين نقاهه ويرجع لبغداد

بس بعد هي گلبها على أبنها  ظلت تبچي وتنوح على سردار بحيث من خوفها على أبنها لا تاكل ولا تشرب وبس صلي وتدعي إنه رب العالمين يسلم سردار من كل أذى وأني أنتبهت إنه هلات أبد ما اهتمت انه سردار مصاب نهائيًا وسمعت مومه شلون تبچي وألي كسر خاطري إنه أطفاله من يشوفون مومه تبچي يجون يگعدون بحضنها ويبچون يريدون أبوهم ولليل فاض الصبر بهلات اجتي صيح

هلات/كافي شنو عدنه مأتم راسي نسطر بس تعوون

هنا گبت عليها مومه/ هلات لزمي حدچ اذا بعد تفكين حالگچ بكلمه ما تلومين الا نفسچ لو راح صگارچ

هلات/ ان شاء الله يموت وأخلص منه ومن سجنه

مومه/ ان شاء الله انتي تموتين تروحين فدوه لذيچ الراحت سكنت جوه لتراب لچ لتراب رجلها ما توصلين

ألق/ حسيت هلات نصدمت من الكلام بس بقت تباوع على مومه إلي بدورها ما خلت كلمه قبيحه ما گالتها بحق هلات وبعدها أنسحبت هلات وهي تبچي

ظليت متعجبه شنو أخلص من سردار وسجنه إذا لهاي الدرجه تكرهه  ليش ما تطلگ وشنو جابرها على سردار يعني كل موقف أشوفه يحيرني أكثر ما آني حايره بنفسي وبعدها مرت 3 أيام وبيوم الرابع رجع سردار وجابه خاله ومن دخل وشافه أمه وظل يبوس بيها ومن راسها وأيدها وهي حاضنته وتبچي ودخلوا جوه  سردار راح نام  على القنفه  وآني بقيت متردده شلون أروح اتحمد اله بسلامه لو خاف ينهد بيه وصلت لليل وآني اخاف أروح يمه بس بعدها شجعت نفسي ورحت لصاله وچان وحده ويگلب بموبايله واني ما أنتبهت على الساعه من دخلت لصاله وهو چان متمدد على القنفه ورأسه ملفوف بشاش أبيض وهو ما أنتبه عليه إلا لمن گتله/ حمدلله على سلامتك سردار

سردار/ الله يسلمچ الق

الق/ سداد سوا بيك هيچ من عرف آني زوجته

سردار/ مو مهم ليش سوه هيچ المهم إنه الحق ويا والغلط من عندي يا ريت لو يرجع الوقت چان ما سويت هيچ بس بعد الصار صار

الق/ أنت لهاي الدرجه تحب سداد بحيث ذب الصوچ على نفسك وأبد ما تلومه

سردار/ شوفي اني من خربت علاقتي بسداد احس روحي مخنوگ وأريد احچي ويه آي شخص وجيد أنه صرتي گدامي
آني وحيد أمي لا عندي اخ ولا اخت بعد ما جابتني امي لهاي الدنيا بسنه أبويه سوه حادث وهو چان بالمرور وراكب دراجه ناريه بوقتها نكسر عنده الحوض وآخر الفقرات عنده تهشمت تمامًا  وصار مقعد وأمي من ازوجت أبويه چانوا أهلها ما يريدوا لآن حالته المادية صعبه وعلى گد حاله بس هي تحبه واصرت تزوجه وهمه چان شرطهم انه أبد ما تجي وتطلب منهم مساعده ابد سواء ماديه او تزعل منه وتريد تجي يمهم ولا تطلگ نهائي وشنو يسوي بيها همه ما يدخلون هي وافقت وزوجته

ومن صار مقعد ماكو واحد وگف ويانه غير خالتي أمها لزوجتي هلات وخالتي ام سداد بس اما خوالي نهائيًا ما إلهم دخل بينه بس الي ينطي مو دائماً وباستمرار وخصوصًا احنه في بغداد وهمه في اربيل وما اگلچ على الأيام إلي مرينه بيها چانت ايام سوده بس أمي بطله ما اصدگ اكو وحده بالدنيا مثلها وشگد تحملت ضيم چانت موظفه وراتبها مو هلگد حتى تقاعد أبويه هم مو ذاك التقاعد القوي وچان لازم تربيني وتصرف عليه وعلى البيت وعلاج ابويه ولازم ما تحسس ابويه بضعفه صدگي چانت تجي من وظيفتها تغدينه وتبلش الظهريه كلها تخبز للناس وتگعدني يمها تخبز وتدرسني همزين الله ساترنه وعدنه بيت ملكنه لو إيجار چان وين نروح

وكبرت وطبعًا سداد مو بس آبن خالتي سداد أخويه إلي طلعت بي من الدنيا كلها عنده ويايه وگفات والله لو اگعد اعددهن ما ينعدن أبد وشاء القدر قبل ما أتخرج من الجامعه بسنه توفى ابويه بس حمدلله الله امي بيه ومن تخرجت آبو سداد هو إلي وظفني وآني وأمي ايد وحده هي تقاعدها وأني راتبي وجمعنه فلوس على سلف نزلنه البيت للگاع ورجعنه بنينا من جديد وآني ازوجت من حب عمري وصار عندي 2 أطفال بس القدر

الق/ بعدها گبل سردار سكت ومن سألته شبي القدر سكت وما حچى أبد رجع گال

سردار/ أني كل ما يمر يوم ويقترب موعد المحكمه مال قضيتچ انتي وسداد أخاف أكثر لإن ما اعرف شنو راح يصير

الق/ ليش سداد إجى من اربيل

سردار/ اي بيوم الي ضربني إجى لبغداد

الق/ واريا موجوده ويا بالبيت

سردار/ أنتي تحچين صدگ شنو هاي القباحه إلي عدها إذا رافعه عليه قضيه وتگعد ويا بالبيت لا ما أصور
اكيد ولت طلعت من البيت

الق/ بوقتها سألني سردار على حياتي الماضية وحچيتها اله  وهو ظل صافن

سردار/ أنتي الله يكون بعونچ شلون تربيتي في بيئه هذا مو ذنبچ هذا ذنب عمچ بس المشكله أنه انتي وسداد التقيتوا بظروف ماكو واحد بيها بعد يصدگ الثاني وسداد مرت عليه ظروف بس الله اليعلم بيها زين منه والله ما تخبل اني لو بمكانه چان انتحرت ترى صعبه مال تدفنين ابنچ بيدچ جوه التراب الله يعينك سداد على ما بلاك

ألق/ ورجع سردار ينصحني آنه إنزل الحمل وهو يگلي ما من الممكن سداد بيوم راح يقبل بيچ آبن خالتي وأعرفه خلي عقلچ براسچ واعرفي مصلحتچ  وما أنتبهت على الوقت الا لمن صاح الله وأكبر الفجر استأذنت منه وگمت صعدت فوگ واني حچي سردار ما فارگني ابد بحيث صارت الساعه 7 الصبح يله نمت  وآني من النوع الي ما أسهر لهذا ذبيت روحي مثل الميته ما حسيت على شي وما گعدت غير على واحد يندس بيه واني لكوني الليل كله ما نايمه أريد أفتح عيوني ما اگدر بس الندس صار قوي وهذا الي چان يندس بيه ما چان يندس بيه بأيده چان يندس برجله لإنه أني نايمه بالگاع على دوشگ وفتحت عيوني هنا مو بس وعيت من النوم وعيت على زماني هم لان چان يندس بيه برجله وهو لابس الحذاء چان (سداد)

سداد/ اني صرت ما عندي ثقه بأحد فقدت كل ثقه بأقرب الناس الي وبنفس الوقت گلبي تحجر چنت شگد گلبي ينكسر اذا اشوف موقف محزن هسه گلبي تحجر وگلبي تحجر على أقرب الناس إلي ليش الأنسان من يمشي عدل يظنون أنه غبي بس ما يعرفون انه الشر ماكو أسهل منه وسبحان الله الشر نشتري بفلوس اما الخير حتى لو مجانًا هم ما نريده وبوقتها صرت إي أنسان ما يهمني عادي اجاوز عليه

وأتصلت بخالتي مومه وهي آول ما ردت عليه
سداد/ آني ابنچ العار ما اعتب عليه أنتي ما گتيله هذا الي دى يصير غلط لو ابنچ غبي لهاي الدرجه

مومه/ شوف لك سداد تحچي وتغلط على سردار ارجع الغلط عليك فهمت هو لا قصده يأذيك ولا شي تعرفه لسردار شگد يحبك ومتعلق بيك وچان متخبل لكون أنت بالسجن وهسه تگول عار وغبي هذا كلامك مردود عليك فهمت

سداد/ اي صحيح يحبني يزور وكاله ويكربس براسي بنت ملهى لو يكرهني شيسوي ترى من چنت مسجون من تهمتني گتله عوفني انسجن وما أزوجها وما ادفع إلها فلوس شنو بعد

مومه/ هاي جزاتنه ولك سداد بدل ما تشكرنه

سداد/هسه هذا مو موضوعي خاله شوفي اني بالنسبة عني تعرفيني من چنت صغير والشي البراسي أسوي لو أعرف اموت هم أسوي لا تخلوني أصير مجرم وقاتل هاي بنت الملهى تاخذيها وتنزل الحمل وخلي أخلص

مومه/ البنيه ما تقبل تگول الطفل ما أنزل اموت وما انزله شسويلها يعني أخذها لدكتوره بالگوه تگوم تعيط وتلم عليه الناس وتعال أدخل للسجن على إنتي جايبه هاي البنيه حتى تقتلين أبنها شيخلصني من الحكومه

سداد/ هسه ما تقبل تنزل الحمل هذا الفلم افتهمنا بس تگدرين تسوين شي ثاني

مومه/ احچي شنو تريد لا تلف ولا دور عليه سداد

سداد/ اطرديها لشارع وخليها تروح على عمها الگواد هو يحير بيها

مومه/ ولك يا ظالم  النفس ولك خلي الله بين عيونك بنيه صغيره بعدها وين تشمرها لچلاب الشوارع

سداد/ ما يهمني ترجع لشارع إلي اجتي منه  لا تخافين عليها هسه ليلتين او 3 ويصير عدها بيت انتي خايفه عليها

مومه/ شوف سداد ما اطرد ألق أبد وشنو تريد روح سوي ويله عن أذنك عندي شغل روح

سداد/ وغلقت الخط بوجهي بگلبي گلت هينه اني أعلمكم سداد منو والظاهر المفاجآت ما تخلص أبد  على ثاني يوم اجتي آريا واني چنت دى ألعب يبرق والي يضحك بالموضوع خطيه شلون تمثل تمثيل مو طبيعي بس آني لكوني أعرفها عز المعرفه ما عبر عليه تمثيلها أبد وخطيه على أساس شلون مشتاقه ليبرق وتبوس بيها وتحضن وتبچي آخرها گتلها/ حمدلله هذا الفلم الهندي خلص لو بعده هسه بعد هذا الفلم دخلي بالمفيد حتى لا تطولين هنا انتي وقتچ ثمين

اريا/ انت ما تخاف ربك هاي بنتي نزلت من گلبي قبل بطني هاي بنت گلبي

سداد/ آي صحيح كلامچ مضبوط هو اني اشك بكلام القديسه آريا شبيه مخبل

آريا/ شوف سداد خلي نحلها بينه ودي أحسن من المحكمه

سداد/ شوفي روحي على الگواد إلي ضحك عليچ وگلچ موضوع الزنا شي راح تستغلي لصالچ روحي حبابه بولي ونامي وتغطي عدل حتى لا تبردين

آريا/ إني اعرف إنه أنت مستحيل بعد تريد نرجع سوه

سداد/ هاي إلا واني مگرن حتى اقبل بيچ

آريا/ إني اعرف انه عن طريق المحكمه كل شي ما أحصل بس اني مو قصدي على قضية الزنا اني قصدي على يبرق

سداد/ وشبيها يبرق

أريا/ آني هسه من طلعت من يمك اگدر اروح أشتكي وأخذ حضانة يبرق يمي بس أني گلت أحسن شي تدفعلي فلوس وأخلي يبرق يمك  وبعد ما آجي عليها ولا تشوفني أبد

سداد- لازم متوازيه بس تردين فلوس لان عمى بعينچ تردين تبيعين بنتچ

اريا/ ليش تگول بعتها ليش ما تگول أخليها يمك وأنت تربيها أحسن

سداد/ ضحكت  ومن كل گلبي وجاوبتها لا عيني اني اريدچ تروحين تشتكين عليه وعادي بدون ما ترفعين قضيه هاي يبرق اخذيها وياچ وروحي والگلب يدعيلچ

اريا/ يعني انت متريدها تگعد وياك وتريد ذبها عليه

سداد/ لا حتى أسهل عليچ الموضوع تردين تروحين تشتكين الله عليچ روحي أشتكي زين بعد لا دوخيني ومن تطلعين سدي الباب وراچ

وعفتها وأخذت يبرق وصعدت فوگ واني وگفت بشباك الغرفه وشفتها من طلعت  وردت أبلغ فرقد بالموضوع إتصلت عليه جاوبني وبعد السلام

فرقد/ احچي كاكا سداد گول الي عندك  لا ظل تطلگ وصير عندك ولاده متعسره

سداد/ ما أعرف شلون أبدي وياك بس صار موقف قبل شويه واريد ابلغك بي

فرقد/ احچي وانجز بكلامك

سداد/ وحچيت الموضوع كله لفرقد

فرقد/ ألعب عيني اذا  الله ما كذبني وآني متأكد هاي متعرضه لعملية إبتزاز لهذا شوفها تريد تبيع بنتها الك في سبيل تحصل فلوس

سداد/ معقوله سيدي متعرضه لتهديد منو يهددها

فرقد/ شوف كاكا سداد اكو مثل آني هواي أحبه لآن دائمآ يطبق بحذافيره وهذا المثل يگول إذا إختلف اللصان ظهرت السرقه وهذا بداية المطاف شوف اني وانت موجودين اذا مو الاختلاف بينهم راح يتركون دليل ضدهم وبهذا الدليل الف الحبل على رگابهم گول گال فرقد

ومن نهيت حديثي ويه فرقد وإني ادعي من الله انه ربي يظهر الحق حتى بنتي تبقى بحضني لان اذا راحت ويه أمها ضيع

وبعدها مرت أيام واجى يوم المحكمه وهذا اليوم اني چنت منتظره بفارغ الصبر أريد أشوف منو راح يجي ومنو ما راح يجي لأن قبلها بيوم اتصلت على سردار وبلغته / شوف سردار آني وياك بعد ما نتفق ومن تخلص هاي القضيه اني بعد لا اشوفك ولا شوفني لأنه السويته بيه مو قليل

سردار/ آني اعرف شنو راح اگلك وشنو راح ابرر موقفي گدامك ما يفيد الحچي اني شفت موقفك كلش ضعيف في وقتها ما اريدك تنسجن لخاطر يبرق والله ولان انت اخويه الي ما جابته امي بس انت ما صدگ لهذا حقك ما ألومك اللوم كله عليه بس شسوي گلي

سداد/ حلو يعني ما تعرف شسوي اني اگلك شسوي اني گتلك الطفل ينزل

سردار/ اگلك ما تقبل تنزله شسويلها مچلبه بي بيدها وسنونها شسوي گلي

سداد/ هسه أني اگلك شسوي ما طول ما تعرف شسوي أريد منك ذب ألق بشارع وهي ساعتها راح تعرف الله حق وتجي تنزله وهي الممنونه منك

سردار/ امي متقبل وهذا الشي انت متأكد منه

سداد/ خلاص راح اشوفك بالمحكمه وتحملوا الراح يجيكم مني

يتبع/
تحية لكم من القلب الى القلب
دمتم في امان الله وحفظه