بنات بارطاجو الكرونيك مع صحاباتكم تطلع شوي وتفاعلو فضلا وليس امرا باش نقدر نكملها
عند ادم
موصلاتو حتى معلومة على لميس في بالو اللي مزالت في الغرفة اصلا واحد مايقدر يتجرأ يحل عليها بلا امر منو ، كان في مستودع الخاص بيه يشوف ببرود في الجثث والشوميز تاعو البيضا اللي ولات حمرة من الدم وجه نظرو لهذاك اللي كان قاعد على ركايبو قدامو دخل سيراج بحماس
سراج : مامبا مافاتتش 3 ايام على زواجك رجعت لاعمالك
ادم : متهني ضك نسافر ونخلي كلش على راسك
سراج : معليش تستاهل المهم تكون بخير ومتهني
ادم : كشما لقيت حاجة ولا دليل على الحادثة تاع مايا؟
سراج : المدام مايا .... مالقيت واالو كلشي غامض مفهمت واالو ملقيت حتى دليل اني شددت الحراسة عليها وعلاجها ماشي مليح بصح اللي مفهمتوش شكون اللي راه متكفل بعلاجها خاطر عايلتها ميش غنية باش تتحمل هاذ التكاليف كاااملة
شاف فيه ببرود ومشا لبس لافاست تاعو يغطي بيها الدم هاذاك
----------------------------
لميس بهمس : افففففففف ذيك السماطة كررهت تقول رانا في عهد الرومان الغنا كلاسيكي يبهدل ربحت العيب باطل مع ادم مفهمتش لاه راهم يشوفو فيا كامل قريب يقعروني وزيد من الفوق حفل مختلط رجال ونسا نميييييي
تقدمت ليها مجموعة تاع بنات يحوسو يهدرو معاها وهي كانت تشوف في يارا بضجر من الملل
يارا وهي حاكمة الضحكة : خير لميس ماكنتيش متوقعة الحفلة هكذا ؟؟
لميس : امممم يبهدل حتى من الغنا كلاسيكي من اللي جيت وانا واقفة كي الشجرة ماشطحت ماتحركت مكاينة حتى حاجة حماسية تخليك تفرحي
" اهلا سيدة لوينو"
شافت فيها الطفلة من الفوق للتحت توترت لميس من وجود رجال اللي جاو مع البنات شوية وانسجمت معاهم تضحك وتقصر
..........
دخل للحفلة و عينيه حمورة منظرو كاان يخووف شاف فيها ديراكت وزاد شاف في الناس اللي يخزرولها وزاد عليه ضحكاتها اللي توزع فيها ع اللي يسوا اللي مايسواش وزيد نظرات الرجال لجسمها ولبستها القصيرة وزيد عريانة هي تتحدى فيه عيني عينك حاول يخوفها بصح طبيعتها متمردة متهمتمش وجرأتها تقول مخدومة من الحديد تدير الشي بلا ما تهتم للعواقب
دا خطواتو ليها وعروق يديه برزو لمحاتو جاي ليها حلت عينيها على وسعهم ولاول مرة تخاف منو لهاذ الدررجة لانها حست صح بحجم غلطتها كانت حالتو ماتبشرش بالخير عطاتو طول بظهرها تحوس تهرب بلا ما يلاحظو الناس مفهمتش وكتاش وكيفاش حملها ... هزها بقوة فوق كتافو وهي ترجف بين يديه مكانش طفلة متخافش من واحد كيما ادم بصح هي شخصيتها قوية ومتمردة كون وحدة اخرى في بلاصتها كون رضخت لادم
بقات يارا تحملق في امها بدون فهم وهي تشوف في غضب ادم حاولت تلحقهم بصح ماقدرتش كان ادم ديجا راح
رماها في الطومبيل بقوة وركب هو ثاني لزت على روبتها بقوة تحوس تهبطها شوي تزيد من طولها باش مايشوفهاش خايفة من هدوءو عرفت اللي هاذا وش يسميوه الهدوء قبل العاصفة
بقا الطريق كاملة يسوق وهو ساكت عروقو قريب تخرج من يديه وصدرو يطلع ويهبط من كبت الغضب خرج الباكي تاع الدخان يدخن بشراهة يحوس باش يخفف من غضبو مالغري علابالو بلي مايقدرش حتان نطق ذاك اللسان اللي ميقدرش يسكت كثرمن 10 دقايق
لميس : حبس من الدخااان ماتتكيفش متوالي
مجاوبهاش بدات تسعل هي من الدخان اللي استنشقاتو رماها ديراكت من الكارو
لميس : بركا ما تطنش فيا يلا عندك وش رايح تهدر غار اهدر ضك وعيط ضك خير
بقات تشوف في برودو المستفز شدت على قبضتها بقوة من تجاهلو ليها كان مسمطها او بالاحرى موش حاب يهدر خاطر اذا هدر رايح يهدر بيدو
لميس : يلعن النهار اللي تلاقيت فيه بيك
وصلو للقصر نحات لاسانتير خارجة شدها من يدها اللي كانت حاطتها ع الباب كانت حاسبة روحها سلكت منو جبدها وهزها في حملتو وهي تفرفط مشا بيها للصالة الي يتدرب فيها وحطها وغلق الباب شعل الاضواء غلقت عينيها بقوة من شدة الضو نحا لافاست تاعو تزامنا مع شهقتها القوية اللي خرجت منها وحطت يدها على فمها بخوف من الدم اللي شافاتو عليه رجعت بوهن خطوات للخلف
جبد المسدس تاعو وصوبو عليها حست بنفسها رايح يتوقف بدات تتنفس بسرعة وصدرها يطلع ويهبط ندمت ع الدقيقة اللي خالفاتو وراحت ورا ظهرو
ادم : لميس راكي تلعبي معايا ، لميس راكي تتحداي فيا وتستفزي فيا وفي رجولتي حاطتني **** قداااااامك
قرب ليها وسلاحو مزال مصوبو جيهتها يحاول يتماسك في اعصابو قدما يقدر اما هي الخوف والرعب نااال منها كي شافت هيأتو الشيطانية قدامها ولات ترجف كي الريشة في يد الكاتب
ادم : عجبك الحال يا مرتي العزيزة بنضرات الرجال الشهوانية لجسمك كاااامل كانو يخزرولك خزرة ***
قرب ليها كثر وشدها من ذراعها بقوة لدرجة قريب صباعو يتلاقاو مع بعض تجمعو الدموع في عينيها من الالم
ادم وهو يلز على سنيه : عجبتك الروبة القصيرة هاذي ؟؟
لميس والدموع في عينيها : هيه عجبتني وعجبتني الحفلة ثاني
هز يدو للسما مستعد ينزل عليها بكف غمضت عينيها بقوة كرد فعل مقدرش يديرها ولا يمسها عطاها بظهر وضرب كيس الملاكمة بقووة مرة وزوج وثلاثة حتان ولا الرمل يسيح منو اما هي بقات واقفة ميش قادرة حتى تتحرك ... نحا الشوميز تاعو اللي كان ملون بالدم رماه في الارض دار ليها مرة اخرى وهو يتنفس بعمق شم عطرها الانثوي شدها من عنقها وقرصها تأوهت بألم
ادم : لاه مكثرة البارفان ؟؟ وش هاذ الرروج اللي في فمك اه ؟ تحوسييني نقتل كل واحد يشوف فيك باش تقتنعي بحياتك الجديدة وبلي انا راجلك ؟؟؟ كمل بالعياط : ر***** يخي قلت ل*** ماتروحييش .... اااخر مرة سمعتي؟ اخر مرة لمييس تعفسي على كلمتي وتديري حاجة من ورايا ساامعة مانيش حاب نلحق نضربك
شدها من رقبتها وقربها ليه مزال مابردش قلبو من الغضب اللي اه حاس بيه
ادم : شوفي مانيش حاب نغلط معاك ونوصلك لحاجة ماشي مليحة وراني مزلت نحذر فيك ونعاود متخلينيش نوريلك الجانب الاخر اللي فيا بصح نتي ماحبيتيش تفهمي حاسبة اللي راني نتمسخر وماني قادر ندير حتى حاجة بصح بأفعالك هاذو راكي نتي اللي تحفزي في شياطيني يخرجو ونهار نتقلب اكي تشوفي ادم الحقاني
كان يحاول يخوفها بكلامو موش حاب يوصل ويطبق الكلام لافعال حاكم روحو قدر الامكان باش مايأذيهاش وهي مصرة تخرج الوحش اللي فيه بأفعالها المتمردة والمتهورة زاد على ما بيه كلامها اللي خرجو من حبال عقلو تعرف مليح كيفاه تلعبلو على اعصابو
لميس : تاع من الدم اللي كان فيا لشوميز تاعك علابالي بلي ميش دمك تضاربت ؟ ؟؟؟
بكلامها هاذ صاي خرجاتو من رحمة ربي شكل قبضتو وخبط الحيط بققوة وهو يعيط خلاها تحس وتشك اللي عظام يدو تكسرو وجهت نظرها لوجهو مالقات حتى مظهر يدل على الالم للحظة شكت اللي هو ألة
ادم بالعياط : ******* نتي نهدر مع حيط ولا معامن ؟ عندك قلب ولا حجرة قوليليي برك ماتحسيش بحبي لييك ؟ ماحسيتيش بخوفي وغيرتي عليك؟ وشنهي اللي مزال ما استوعبوش مخخك؟
بقات تشوف فيه بجمود هي اصلا طفلة فقدت احساس الحب ولا نقولو ماتصدقوش اصلا ماتعرفوش وش هو جامي حست بحب اهلها كيفاه يحبها انسان واحد اوخر ... حاسة اللي يهدر عليه ادم مجرد شعور شهوة لجسم انثى الفكرة الاخرة هاذي حيرتلها مواجعها القديمة بدات تبعد عليه ببطء بعد ماستوعبت البلاصة اللي راهي فيها بلاصة مغلوقة مالغري الضو مي الضلمة بيسك مكانش ضو ربي وضوء الطبيعة وشخص يدعي عليها الحب زاد ارتجافها كي تفكرت كلشي وتصور كلشي في مخيلتها بحذافيرو بدات تبكي بقوة طرطقت ضربة وحدة بالبكا .. هو فكرها بوترها الحساس
كي سمع صوت شهقاتها حس بحاجة ثقيلة بركت على قلبو قرب ليها وضمها لصدرو بخوف
ادم : خلااص ماتبكيش اشششششش
توتر من دموعها خاطر صح صح يحبها ويعشقها بكل تفاصيلها كان قادر يكسرها ويدير فيها وش يعجز المخ يتخيلو كيما يدير معاهم اكل كون واحد اوخر دار معاه ربع برك وش دارتو لميس كون شاف الويلااات بعينيه بصح يفضل كون تتكسر كل عضامو ومتمسش شعرة وحدة من اللي يحبهم وخاااصة لممييس
لميس : مانبكيش مانيش ضعيفة
ادم وهو يمسح على شعرها بحنية : ماكيش ضعيفة مالا ؟؟ علاابالك الحاجة اللي ماشي مليحة فيك ا لميس هي انك دايما تحبي تكوني قوية
لميس وهي تمسح في دموعهاا للي محبتش تحبس : انا اصلا هكذاك
ادم : من اللخر قوليلي وش تحوسي؟ وش الهدف تاعك ؟
خرجت شهقة منها كيما تاع الاولاد اللي يبكيو وهي تحاول تبعد عليه وتدز فيه
لميس : الطلاق
....♥♥♥يتبع