~ كتبتك حلم باوراقي وغيري قام يتهجاك
محيت الحلم لكن العوض في باقي أوراقي ~
عرف ابو سلمان ان الجد عايض بعد كل زواج يسوي غداء في بيته ، لكنه لزم على الجد عايض و حلف عليه ان الغداء هو يتكفل فيه و ببيته ، اتجه الكل ل بيت ابو سلمان ، و استقبلهم ب صدر رحبب و جداً
فتح ابو سلمان الباب و هو يقلطهم بالمجلس و دخلو الحريم للصاله ، انبهر الكل ب جمال البيت و حجمه الجميل و الهادي زي اصحابه
ام سلمان ببتسامه : يا هلا ياهلا ولله حي الله من زارنا
دخلو البنات مع الحريم يسلمون عليها و جلسو ، بدت الضيافه الجميله جداً ، دخلت شهد و هي لابسه سكراب المستشفى ، عضت شفتها من نست ان امها قالت ان فيه غداء عندهم ، تسحبت لغرفتها تحت انظار البنات الي ماسكين الضحكه لانها تمشي على اطراف اصابعها عشان امها ما تشوفها ، دخلت غرفتها و سكرت الباب و زفرت براحه ، مسكت جوالها و ارسله له " دخلت ابشرك و ما شافتني امي فشله الضيوف شافوني "
ضحك سلطان من شاف رسالتها و هو داخل للبيت و حط جواله ب جيبه ولا رد عليها ، ارسلت له الصباح انها طلعت ل الدوام و هي قالت ل امها انها عندها اجازه عشان الغداء لكن ما قدرت تاخذ اجازه و ولو قالت لسواق يجي ياخذها بيعلم امها عشان كذا استعانت ب صديق الطفوله سلطان ، دخل للمجلس و هو يتوجه يسلم على الكبار ثم جلس
فز للباب من دخل ابوه و معه اخوه الي اصغر منه : ارحبوووووو
ضحك ابو سلمان من شاف صديق دربه : يا مرحباااااا
تقدم سلطان يسلم على ابوه و اخوه و هو مشتاق لهم حيلللل : متى جيتو
ضحك ابو سلطان : ودك تعاتب بين الضيوف !
وخر سلطان عن ابوه و هو يضحك ، تقدم له ابو سلمان يسلم على ب حراره و هو مشتاق له حيل : اسفرت و انورت
ضحك ابو سلطان : يا هلا ياهلا
عرفه ابو سلمان على الموجودين كلهم و جلس معهم ، دخل طلال الي ابتسم الكل من شافه ، قام ابو حامد : يا هلا
ابتسم طلال و تقدم له : هلابك يا عم
الجد عايض : وين ابوك يا طلال
طلال : هلحين بيجي يا ابو محمد
سلم على الرجال كلهم و تقدم للعيال الي كانو مشتاقين له حيل
أمجد : وين الغيبههه يا طلال
ضحك طلال و هو يحضنه : تعرف الشغل
ابتسم عبدالرحمن : هذا ولله هو المحامي المزيون
دق فيصل عبدالرحمن بخفه : انكتم
ضحك طلال و هو يسلم على عبدالرحمن : بعد فيصل مابه ولا محامي مزيون لا تغلط يا ابو ايفان
فيصل بضحك : حي عينه
وسام ببتسامه : تخلينا نشتاق لك يعني !
ضحك طلال و هو يسلم على وسام و ذياب و باقي العيال و جلس
دخل ابو طلال و قام الكل عشان يسلم عليه ،
واخيراً دخل عريسنا الي يكلم بجواله و يهاوش ، ضحك بخفه و هو ينزل جواله : سلام عليكم
مسكو العيال ضحكتهم على شكله و هو يتقدم يسلم على الرجال الكبار ثم توجه للعيال : علامك
سلمان : يارجال غثونييي غثوني صايره مشكله جديده ي السجن
غمز له سلطان : افا عليك احلها انا
ابتسم سلمان و هو يحضنه : يابعدي انت
تقدم سلمان ل طلال و ضربه بخفه : زي الك،،، قاطع كلامه من سحبه طلال يسلم عليه : طيب لا تطيح وجهي قدام ابوي
ناظرو العيال كلهم ل ابو طلال الي يناظر فيهم و يضحك ، جلس سلمان بعد ما سلم على كل العيال : وين التبن عبيد !
ذياب : هلحين بيجي
دخلت ريحانه ، و ابتسم الكل من شافها ، و بهذي اللحظه طلعت شهد من غرفتها بعد ما تجهزت : يا هلا يا هلا بحرم اخوي
ضحكت ريحانه بخفه و هي تسلم عليها ، تقدمت ريحانه تسلم على الكبار ثم جلست مع البنات ، رفيف : اتمنى راح التوتر
ضحكت ريحانه بخفه : راح راح معليتس
جلست شهد جنب ريحانه و عطتها فنجال قهوه ، دخلت حلا و هي تشيل الجوري و تقدمت تسلم و جلست مع البنات
حلا : يناس يا الجماللل
ضحكت ريما : شكل حلا تسدد الفواتير
ريحانه بضحك : ولله ماهو شي عند جمالتس
ضحكت ديمه : كلمه و رد غطاها اسلم طيب عطونا وجه و تغزلو فينا
روح ببتسامه : ام السميه عاد انتي شي ثاني !
حضنتها ديمة : ياحظي و ياحظ سميتس
دخلت رنيم الي تدور على ايفان : احد شاف بنتي !
ام حامد : اخذها عبدالرحمن يا بعدي
جلست رنيم و زفرت براحه و مسكت جوالها لقته مرسل انه خلا ام حامد تطلع له ايفان ، و بدت تاخذهم السواليف من جميع النواحي و الجمال ، كانت جمعه خفيفه و لطيفه على قلوب الكل كان الكل مستمتع ب اصغر التفاصيل ، لمت العيله الجميله و الاخوه الي بينهم و الترابط شي جميل و جداً
وسام : ياسر
التفت ياسر الي جالس جنب عبيد : تودي عايض امه ؟
عبيد : روح ياولدي
قام ياسر الي مسك يد عايض و اخذه للصاله ، قامت روح من شافته و انحنت تشيل عايض : اصبر ياسر بعطيك شي
وقف ياسر ينتظرها و هو يناظر ب امه و الجوري و يضحك بخفه و حلا تتبسم له ، رجعت له روح و عطته من الحلا الي موجود و عصير ليمون و همست له : قالت لي امك انك تحب عصير الليمون
حضنها ياسر بلطف : مره شكراً انتي احسن وحده
ضحكت روح و هي تمسح على راسه و طلع ياسر ، رجعت روح تجلس مع البنات و عايض ب حضنها
انتهت العزيمه و بدا الكل يرجع ل بيته لين ما باقي الا اهل البيت
كان جالس ب الصاله ام سلمان و شهد و ريحانه و ابو سلمان ، وققت شهد و راحت ل غرفتها و بدلت و طلعت
ابو سلمان : مداومه !
هزت شهد راسه ب ايه و تقدمت تسلم عليهم : لصباح اذا طلعت من الشركه مر علي
ريحانه : ليتس جلستي
تقدمت شهد و حضنتها : الايام واجد يابعدي بس ولله عندي عمليه مهمه و لازم اللحق عليها
ريحانه ببتسامه : عذرتس معك يابعدي .
اخذت شهد شنطتها وطلعت و لقت سلطان و سلمان يسولفون : تارك عروستك جوا و جالس تسولف مع ذا !
سلطان : وش فيه ذا
ضحكت شهد و هي تتقدم ل سيارته السوق عشان تروح للمستشفى دخل سلمان و وقف سلطان عند شباك السياره و طقه ، نزلت شهد الشباك : خير
ضحك سلطان بسخريه و رما عليها خاتم : كان ب سيارتي
ناظرت شهد بالخاتم و نطقت : مو حقي !
ابتسم سلمان و هو يمشي : حافظك
كانت شهد تتطنز عليه ولا هو حقها بس كانت تسوي اختبار ، ضحكت و هي تقفل الشباك و حركو للمستشفى
دخل سلمان للبيت و جلس جنبها و صبت له قهوه : سم
ابتسم سلمان و هو ياخذها منها : يبه
رفع ابو سلمان راسه له و نطق : يمديك تتوسط لي !
ضحك ابو سلمان بخفه : ب وش
تنهد سلمان و رجع ظهره ل ورا : رفضو اجازتي
ام سلمان : هاو ! ليه
حك سلمان راسه ب ملل : مافيه احد يمسك مكاني
ابو سلمان ببتسامه : احلها انا لا تحاتي
ام سلمان ببتسامه : سلمان يا ولدي خذ ريحانه ل جناحكم يمكن تبي ترتاح
ابتسمت ريحانه : بجلس معكم يا عمه
ام سلمان : لاحقه على الجلسه يا حبيبتي روحي ارتاحي و لو تبين ترتبين اغراكم ترا جابوها من الفندق
سلمان : مين جابها
ام سلمان : العوبا ما غيرها
ضحك سلمان بخفه : متى جت هي اصلاً
ام سلمان : يوم جو الضيوف
سلمان و هو يقوم : على الاقل جت و معها فايده ما كان في حيل ارجع لهم
ابو سلمان : لا تشيل هم الاجازه و انبسطو دلع بنت سيف تراها غاليه !
باس سلمان راسه : لا تحاتي
راح سلمان و راحت وراه ريحانه ، فتح الباب حق جناحهم و نطق : انا قلت نسكن عند اهلي ولا اخذت رايتس اعذريني بس اذا عندتس مشكله ب الوضع علميني
ابتسمت ريحانه : احسن كذا عادي لا تحاتي
التفت لها سلمان : ولله
هزت ريحانه راسها ب ايه و ابتسم سلمان و مسك يدها و يبوسها ، دخلو غرفت نومهم و لقو شناطهم كلها موجوده
سلمان و هو يجلس على الكنب : خذي راحتس البيت بيتس
دخل للبيت و هو يركض يتسابق مع عايض و يضحك ، مسك عايض و هو يرميه ب الهواء و يحضنه : ولد ابوهههه
ضحكت روح و هي تجلس : انتبه وسام
نزله وسام و جلس على الكنب : دام اني ما عندي دوام يبي لها جلسه تحت الجهنميه
روح وهي تقوم : اجل ببدل و اجيك ، راحت روح عشان تبدل و بدا وسام يضبط لهم جلسه ب الحوش ، فرط الفراش و حط العاب عايض و قطع بطيخ و حطه على الفراش ، جلس يلعب مع عايض ينتظرها تجي
دخلت روح و هي ماسكه برد شاهي و بيدها ثلاث كاسات
ابتسم وسام و هو يقوم ياخذه منها و جلست معهم ، جلس عايض و هو يحط العاب التركيب ب نصهم : ماما ركبيها وسام ما يعرف
ضحك وسام : ما تستحي انت
روح بضحك : نرتبها مع بابا وسام و نعلمه !
هز عايض راسه ب ايه و بدو يركبون القطع فوق بعضها و كل شوي وسام يخرب و عايض يعصب ثم يضحكه و يرجعون اصحاب
خلصو اخيراً و بنو بيت عايض : نسكن فيه انا و ماما و وسام و الي هنا ، اشر على بطن روح ، باست روح راسه بخفه و نطقت : بابا وسام تبيه يسكن معنا !
هز عايش راسه ب ايه و باس وسام راسه : صديقي عايض لازم نسكن سوا
صبت له روح شاهي و صبت لنفسها : وانا ابي
روح : ما يصلح لك ياعيوني
عايض : بس شوي ماما
وسام : حطي له نص عادي
صبت له روح شاهي شوي و شرب معهم و هو يتلذذ فيه ، قام وسام : جبت لك هديه
ابتسمت روح لانها تعرف هو وش جاب ، راح وسام ل زاويه الحوش و جاء و معه دراجه ، ركض عايض و هو يحضنه : وسامم
ضحك وسام : نعلمك عليه !
ابتسمت روح و هي تشوف وسام يعلم عايض على السيكل ، مرت سنتين و عايض للحين ما عرف لـ السيكل بس وسام صامل يعلمه
ناظرت ل بنتهم " ملك " و هي تحبي تتجه ل وسام و عايض ، ضحكت بخفه من شافت عايض يتجه و يحاول يشيلها و مشى لهم وسام و شالها ، تشوف بيتها كيف يغمره السعاده و الفرح ، ملك ، عايض ، و الاساس وسام الي لطالما هي ممتنه ل وجوده بينهم الان ، تشوف كيف يهتم فيها و بـ اطفالهم ، تشوف اهتمامه ب عايض الي كانه من لحمه و دمه ، تشوف كيف يحاول مع عايض عشان يناديه ابوي ما يناديه وسام
كل ما شافتهم تحس ب سعاده كبير تغمر قلبها و دايم تدعي الله لا يغير عليهم حالهم .
جالس على الكنب و هو يلعب بنته ذات 5 شهور " غزل " ابتسم من حاوطته من الخلف و هي تبوس خذه بخفه : وش تسوي لبنتي
ضحك هزاع بخفه و مسك يدها يجلسها جنبه : تدرين اني اسعد رجل بالكون !
ابتسمت رفيف و هي تشد على يده وكمل: احس بسعاده كبير يوم اشوفتس انتي و غزل ، دايم احمد ربي و اشكره اني صبرت لين صرتي حلالي و جبتي لي قطعه من القمر ، وجودتس حولي يكفيني و يغنيني عن كل شي تدرين !
حضنته رفيف و هي تحس ب سعاده كبيره : اشكر ربي على نعمتك ب حياتي ، احب وجودك حولي احب اهتمامك فينا احب كل شي يجي منك
انت سبب السعاده الي انا فيها الحين انت سبب بان رفيف تكون طايره بين الغيوم
باس هزاع راسها بخفه : ياحظي يوم اني سبب سعادتس ، ياحظي يوم اني زرعت فيتس الشعور الحلو .
جالسين على الشاطى و بنتهم تلعب قدامها ،عبدالرحمن: ما ودتس تجيبين لها اخت
ضحكت رنيم و هي تطالع ب ايفان الي تلعب قريب الماء : رزق الله ما نرده و متى ما جاء حياه الله
ابتسم عبدالرحمن بخفه و هو يقربها لحضنه و يحضنها و هم يتأملون ايفان الي تجمع من الصدف ، حبو انهم يبعدون عن العالم كله و يسافرون امُلج يبعدون عن صخب نجد و كل شي فيها ، ضحكت بخفه و هي تشوف عبدالرحمن يتقدم ل ايفان و يشيلها و يركض فيها على الشاطىء و ايفان تضحك بشكل جميل و مريح للعيون ، تشوف ضحكته من ضحكت بنته و كيف اخذت ملامح ابوها الهاديه و المريحه للعين ، تحمد ربها ليل نهار على اليوم الي جمعه فيها ، لو تقدر تروح تبوس راس ديمه و فيصل على العزيمه الي جمعتهم مع بعض ولا طلع من بالها ابداً .
دخل للبيت ببدلته و معه بوكيه ورد وردي كبيره ، ابتسم من شافها كلعاده جالسة على الكنب و متلحفه و تتابع ب التلفزيون : ديمتي
مسكت راسها و نطقت : ايش فيني بسم الله
رفعت راسها من سمعت خطواته تتجه لها نطت من مكانها و حضنته ب اقوى ما عندها : فيصلللل
ضحك فيصل و هو يشد عليها : اشتقت لك !
ديمه : ولله اكثر ولله
ابتسم فيصل و هو يبعد عنها و يقبلها بخفه : وين روح
ديمه ببتسامه : راقده داخل ، ليه ما علمتني انك بتجي !
فيصل : قلت اسوي مفاجاة لكم ، حط يده على بطنها : عسى ما تعبتس
ضحكت ديمه بخفه : شوي بس
فيصل و هو يجلس و يجلسها جنبه : رحتي لموعدتس امس !
هزت ديمه راسها ب ايه : وداني ذياب مع هيفاء
ضحك فيصل : ابتلش ذياب ب الحوامل كم باقي لها هي بعد
ديمه بضحك : انا اربع و هي ثلاث
ابتسم و هو ينحني يبوس بطنها : عساها بنت يارب
ديمه : ليه ما يجي اخ ل روح
فيصل : لاحقين على العيال ابي بنات يارب خلفتي كلها بنات
حضنته ديمه و هي تحس فيها كميه حب و اشتياق له مو طبيعي ، له اسبوع مسافر مع طلال عشان ماسكين قضيه ب الشرقيه و اخيراً رجع
قام و دخل لغرفه روح و طلع و هي بحضنه و واضح دوبها قايمه من النوم ، ابتسمت ديمه و هي تشوف كيف يعبر عن شوقه ل بنته الي لو يقدر يعطيها عيونه ما تغلا عليه ابداً .
دخل للبيت و هو يدندن ابتسم من شافها جالسه مع امه و ابوه : يا مرحباااااااا
ابتسم الكل من شافه ، ابو سلمان : وينككك يا ولد وينكك
ضحك سلمان و هو يجلس جنبها : ولله يا يبه ابلشوني ابلشوني انا مدري وش دخلني الشغله ذي انا بتقاعد يمدي !
انفجر الكل ضحك و نطقت ريحانه : ويننن الي كان يقول اموت ولا اترك السجن
ضحك سلمان و هو يبوس يدها : ذاك ايام اول
ام سلمان : ما مريت على اختك !
التفت لها سلمان و ابتسم : سليط جاء ارسل لي انه هو الي بيمرها
ابو سلمان : دق عليه قول له يجي يتعشاء معنا
غمز سلمان : يراضي الحب خلهم
ضحك ابو سلمان من عرف ان شهد زعلانه من سلطان لانه راح ل مهمه بوقت ملكتهم لكنه غصب عنه راح
ابتسمت ام سلمان و التفتت ل ريحانه : كم باقي لك يابنتي !
ابتسمت ريحانه من بسمتها المريحه : شهر و شوي بس
تربع سلمان و التفت لها : حماس ولله ابطت اولدي بسرعه
ضحكت ريحانه : ماهو كيفي هو
ضحك سلمان و هو يقوم : عادي عادي اولدي بدري
ام سلمان : بترقد !
سلمان : بتروش و اجيكم
ابتسمت ريحانه و هي تشوفه يتجه ل جناحهم و يرقص بخفه ، التفتت ل ابوه و امه الي جالسين قدامها و يسولفون بخفه و ابو سلمان ماسك يد امه ، تشوف كيف هم عائله مترابطه و حنونه على بعض و بشكل جميل و جداً ، تشوف كيف سلمان يهتم ب شهد و يهتم ب ابوه و امه مع انه مشغول معها و بشغله الي متعبه حيل ، تشوف كيف اهله مهتمين فيها و بحملها بوقت غياب سلمان ب دوامه ، تشوف كيف شهد تخفف عنها توتر الولاده و تطمنها و تراجع معها ب مواعيدها ، تشوف كيف ام سلمان تجيب الاكل ل غرفتها و تجلس عندها لين تاكل ، الحنيه الي كانت ببيت اهلها ، لقتها ب بيت اهل رجلها الي كانو زي اهلها .
طلعت من المستشفى و وقفت عند الباب تنتظر سلمان يجي ، ناظرت ب الدبله الي بيدها ، مشتاقه له و جداً ممداهم يملكون و يلبسها الدبله الا راح مهمه ، غايب عنها له ثلاث اسابيع و بيكمل الشهر ولا اتصل عليها لو مره ، تدري انه بخير من الاخبار الي تصلها من سلمان لكن تبي تتطمن عليه بنفسها ، رفعت عيونها من حست ب احد وقف قدامها ، رفعت راسها و شافت الشخص الي هي متلهفه على شوفته من ثلاث اسابيع : اشتقتي لي !
رمت نفسها بحضنه و هي تحاوط رقبته ، تحس انها بتبكي شعور الشوق الي فيها كبير ، كبير اكثر من انه يختفي بحضنه ، كبير جداً منهم ، ابتسم و هو يحاوطها ، حس ب دموعها على عنقه و بعدها عنه ، مسك يدها و اخذها معه ل سيارته ، فتح لها الباب و ضحكت من شافه بوكيه ورد من وردها المفضل ورد الافندر مع ورد تيوليب ابيض ، اخذتها و حطتها بحضنها و ركب جنبها ، ناظرت فيه و هي تحس انها مو مصدقه انه موجود
ابتسم سلطان بخفه : تتعبيني بنظراتك ذي ترا !
تقدمت له تحضنه تبي تخفي الشوق الي بقلبها له : اشتقت لك
ضحك سلطان بخفه : اخيرا قلتيها
بعدت عنه شهد : زعلانه ترا !
ابتسم سلطان و هو يشغل السياره : عشان كذا جيتك و جبت معي رضاوتك افتحي الدرج الي قدامك
فتحت شهد الدرج و اخذت الظرف الموجود ، فتحته و ضحكت بصدمه : امانه !
هز سلطان راسه ب ايه و مسك يدها : جهزي نفسك يا عروس سلطان شهر و تكونين ببيتي !
ناظرت شهد من جديد ب الكرت الي بيدها ، موعد حفل زواجهم الي لها ثلاث شهور تنتظره .
دخل للبيت و ضحك من شافها جالسه ب السكراب حقها تلعب تهتان : يا مرحبااااا
رفعت راسه و ابتسمت من شافته : اخيراً جيت بتاخر عن دوامي سامي !
باس سامي راسها : ببدل و اجيتس انا بوديتس
هزت ريما راسها ب ايه و دخل سامي يبدل عشان يوديها لدوام ، طلع و شال تهتان : بنتظرتس تخلصين دوامتس عند امي
ريما : يارب ما تزعج عمتي بس
ضحك سامي بخفه : هي الي قالت لي اجيبها ولا ما كان وديتها
ضحكت ريما و هي تمسك يده و تطلع معه متجهين للمستشفى بيبدا دوامها و هي مناوبه ف الليل ضحكت من انسجام سامي ب الاغنيه و يغني بكل احساس : صدقيني قلبي يحكي لك حقيقه ، صدقيني قلبي ما أرى غيرك ملاك ، مسكت يده و هي تشد عليه و تهتان بحضنها و تضحك على سامي الي يضحك و هو يغني ، وقف عند المستشفى و نزلت بعد ما باسته هو و تهتان ، ناظر فيها لين ما دخلت المستشفى و هو يفكر فيها ، سعيد فيها جداً ، يحب وجودها حوله ، يكره وقته بدونها وده تكون قدام وجهه اربع و عشرين ساعه ، راضي يتأمل عيونها ل اخر ثانيه بحياته يحلف انها لو تطلب نجمه جابها لها لو تطلب الكون كله يلبي طلبها ، ضحك و هو يشوف تهتان واقفه على المقعد جنبه و ترقص على الاغنيه الي هو مشغلها .
واقف عند الباب ينتظرها تطلع من القاعه و ولده " عبدالله " بحضنه
ابتسم من شافها جايه له و هي ترقص و تغني ب روقان : اضحكي خليني اضحك ، ضحكتك بترد روحي ، ربنا وحده الي يعلم ،بعشقك ازاي ياروحي
ضحك بخفه و هي توقف قدامه : احس اني اسعد وحده ب الحياه وانا اشوفك واقف قدامي و ولدنا بين يدينك !
ابتسم و هو يبوس خدها : وانا اسعد واحد ب الدنيا وانا اشوفتس قدامي و تتمايلين و تاخذين عقلي بخصرتس
ضحكت أمل و هي تلبس عبايتها : عسى ما تعبك
أمجد : ابد بس بكاء عشر مرات
ضحكت أمل و هي تاخذه : عيونه امه ذا ما يصبر عنها
مسك أمجد يدها : ولا ابوه يصبر عن امه !
شدت على يده و هي تطلع معه و اتجهو ل بيتهم ، كانت صاحبتها ب الديره متزوجه و عزمتها ولا قدرت ترفض و وداها أمجد و هو راح لرجال و اخذ عبدالله معه عشان تاخد راحتها
ابتسم و هو يراقب الطريق : علامك !
التفت لها أمجد و باس يدها الي بكفه : امل حبيبة قلبي جنبي ! فيه شي اسعد من ذي اللحظه
ضحكت أمل بخفه : و أمجد نور عيوني جنبي ؟ فيه اسعد من ذي اللحظه او فيه اسعد من أمل ب هذي الوقت ؟
رفع كتوفه : يمكن أمجد الي يشوف حبيبته جنبه و ولده بحضنها ، يمكن أمجد الي حب الدنيا من حبها ؟
أمل ببتسامه : و يمكن أمل الي حبت الوقت الي أمجد موجود فيه و كرهت الوقت الي بدون أمجد .
دخل للبيت و يحلف ان ردت روحه ب المنظر الي شافه ، ابتسمت من شافته يتجه يجلس جنبها : جالسين بدوني
ياسر : انت طولت ابوي
باس عبيد راسه بخفه : الشغل وانا ابوك
نطت الجوري بحضنه : اشتقت لك بابا
ضحك عبيد بخفه و هو يطالع حلا : وانا اكثر اشتقت لك
صدت حلا تخفي ابتسامتها و هي تقطع عنب ل ياسر ، ياسر : يبه ترا بكره لازمم تجي المدرسه
عبيد بضحك : ليه مسوي مصيبه ؟
ياسر : انا ولد العميد عبيد اسوي مصيبه ! افا
ضحكت حلا و نطقت : عنده بكره تكريم و يبيك معه
عبيد : من عيون العميد يجي و غصب عنه
ياسر : تعال ببدلت الدوام عشان يشوفونك و يعرفون اني ولد العميد عبيد
ضحك عبيد و هو يشد على يد حلا الي بينهم : هم لو بس يدرون انك ولد احلا حلا ب الدنيا كل شي يصير بخير
ياسر : ولله عاد ماما جميله جداً
مسكت حلا خده بلطف : انت الجميل يعيون امك
الجوري بعبوس : وانا جميله ؟
حضنها ياسر و هي بحضن عبيد : انتي اجمل وحده
ضحكت حلا من منظرهم الجميل ، الجوري بحضن عبيد و ياسر يحضن الجوري و عبيد محاوطهم بيده اليسار و ماسك يدها بيده اليمين .
رما بدلته على السرير و طلع يدور عليها ، ابتسم من شافها جالسه ب الحوش و وسام يسولف لها ، جلس جنبها و باس راس وسام : اسلم وانا ابوك
ضحكت هيفاء بخفه : اخيراً جيت
تنهد ذياب و هو يتكي : اشغلوني ب القوه طلعت
مسكت هيفاء يده بلطف : تبي اسوي لك قهوه !
هز ذياب راسه ب لا : ابي اشوفتس بس
ابتسمت هيفاء و التفتت ل وسام الي كان يناظر فيهم بصمت : ايه و وش شريت ل عايض !
وسام : لعبه حقت الشيول
ضحك ذياب : اجل الي انا جيب ل عايض ؟
هز وسام راسه ب ايه : هو يجيب لي العاب لازم اجيب له صح ؟
ابتسم ذياب : صح وانا ابوك
وسام : متى بنروح لهم
ذياب : انت متى ودك و ابشر
نط وسام : هلحين
ضحك ذياب و هو يجلسه : هلحين اكيد انهم راقدين بكره تشوفه ي المزرعه
هيفاء : مزرعه ايش ؟
ذياب : عمي محسن عازم الكل للمزرعه حقته و مسوي غداء و عشاء هناك
هيفاء : كلنا ولا بس الرجال !
ذياب : لا يابعدي كلنا و كلن بيجي مع اهله ، و حنى بنروح و نشوف صديق وسام
نط وسام يحضن ذياب بفرح لانه بيشوف صديقه عايض
ابتسمت هيفاء بهدوء و هي تشوف كيف ذياب يحضن وسام ، ناظرها ذياب و سحبها لحضنه و صار يحضنها كلهم
وسام : انتو احلا ام و اب ب الدنيا
ضحكت هيفاء و هي تبوس خده : وانت احلا واحد ب الدنيا
ناظر ذياب لها : وانا اشهد
صدت هيفاء ل وسام و هي تضحك بخفه تدري انه يقصدها .
~ يوم العزيمه ~
اتجه الكل لمزرعه ابو رسن و الكل فرحان ل وقت العزيمه الي بتجمعهم كلهم سوا ، ترك الكل دوامه و اتجه للمزرعه ، فيهم شوق كبير للجمعه الي بتجمعهم سوا ، وقف وسام و هو جاء اول واحد عشان يساعد عمه ، نط عايض اول ما شاف جده و ركض له ، انحنى ابو رسن يبوسه : يا هلا يا هلا
ابتسمت روح و هي تتقدم تبوس راسه : شنوحك يا بـيي
ابتسم ابو رسن : الحمد لله يابعدي انتي
تقدم وسام و باس راسه ، اخذ ابو رسن ملك الي كانت بحضن وسام : يا بعدي انتي
وسام : تبي مساعده يا عم !
ابو رسن : لا ياولدي اجلسو انتو و روح المجلس لكم
هزت روح راسها ب ايه و دخلت للمجلس الي كان من طين ب المزرعه لكن شكله من الداخل جميل و جداً ، دخل وسام بعدها و هو ينزل الحلا الي معهم و طلع يساعد ابو رسن و عايض يساعدهم ولا يقصر ، دخلت سياره عبدالرحمن و وقف جنب سياره وسام ، رفع وسام راسه و ابتسم من شافه : الحريم ب المجلس
هز عبدالرحمن راسه ب ايه و هو ينزل ايفان و رنيم دخلت للمجلس
تقدم يسلم على ابو رسن : شحالك يا ابو رسن
ابتسم ابو رسن : على ما تحب ياولدي انتو شنوحكم
عبدالرحمن ببتسامه : الحمد لله
دخلت رنيم و ابتسمت من شافت روح تنزل عبايتها : يا مرحبااا
ضحكت روح و هي تتقدم تحضنها : اشتقت لتس
رنيم : ولله اكثر
روح : لا اشوفتس تسافرين ولا بزعل
رنيم بضحك : من عيوني
دخلت رسن و ابتسمت من شافتهم : يا هلا يا هلا
ضحكت روح و هي تتقدم تحضنها : هلا ب القاطعه
رسن بضحك: حرام عليتس
رنيم و هي تحضنها : اتفق مع روح
روح : وين محسن
رسن : مع مصلح
ضحكت روح : غريبههه جاي
رسن بضحك : ابوي تله مع اذنه
ابتسمو العيال من شافو مصلح يتجه لهم و معه امير و ميرا و محسن
تقدم يسلم على ابو رسن و سلم على العيال و جلس جنبهم
دخلت سيارة ذياب و ابتسم من شافهم جالسين على الفرش الي مفروطه بين الزرع و العشب ، وقف جنب سيارات العيال و نزل و معه وسام الي انطلق ل عايض ، دخلت هيفاء للبنات : سلامم
قامو البنات يسلمون عليها : الحمد لله ما جينا اول ناس
رنيم : اصلاً غريبه ما جيتو اخر الناس
ضحكت هيفاء و كانو بيجلسون الا دخلت حلا و معها الجوري : اهليننن
راحو البنات يسلمون عليها و اخذت روح الجوري و تحضنها : اهلين ب الجوري و بس
ضحكت الجوري و هي تحضن روح بلطف ، دخلت ريما و نزلت الاكياس من يدها ، ضحكت روح : جايبه الرياض معتس انتي !
ريما : تكفين ترا سامي ما خلا شي الا قشه
دخلت شهد و معها ريحانه : سلاممم بناتتت
ضحكو البنات من شافو شكل ريحانه اللطيف و شهد الي تساعدها : يا هلا
نزلو سلمان و سلطان من السياره و طبعاً ك العاده يتهاوشون ، سكتو من شافو العيال يناظرون فيها و يضحكون ، تقدمو يسلمون على ابو رسن و جلست جنب العيال
ذياب بضحك : كيف تجمعتو انتو من جديد !
سلطان : يا شيخ ذا نشبهههه
سلمان : لا ولله تبيني اخلي اختي معك !
رفع سلطان يده يوريه الدبله ، ضحك سلمان و هو يصد و يشرب من فنجاله من صب له وسام
وقفت سيارت أمجد و هزاع بنفس الوقت و عرفو العيال انهم كانو يتسابقون
نزل أمجد و صراخ : عيال مين وقف اول !
وسام : انا اقول أمجد
رما هزاع عليه عقاله : انكتم انت
نزلو البنات و اتجهو للمجلس ، دخلت أمل و نزلت الاكياس الي معها و تقدمت تسلم على البنات ، و بعدها دخلت رفيف الي شايل غزل و سلمت عليهم و جلست ، دخلت ديمه الي تدندن بخفه : ارحبووووووو
ضحكو البنات و قامو يسلمون عليها ، ديمه : اشتقت لكم حيللللل
رنيم : ولله اكثرررر
ديمه : انتي ب الذات خلي املج تنفعنس
نزل فيصل و هو ماسك روح الصغيره بيدها عشان لا تطيح من العشب ، تقدم يسلم على ابو رسن و جلس مع العيال ، رفع وسام جواله من جته رساله من ديمه " امي و ابوي بيجون ! "
رد و كتب لها " ايه بيجون مع عمي محمد " ابتسم من رجع للمحادثه فوق و شاف المقطع حق روح يوم كانت ترقص و تتمايل ب العزيمه حقت سامي ، الفديو الي عاده مليون مره و مره ولا يطفش و هو يعيده يحلف انه حفظ ادق التفاصيل الي موجوده ب الفديو يشوف كيف تتمايل و تلعب ب شعرها الي يقتله من جماله ، يحلف انها احلا أمراه ب الحياه كلها ، بدت السيارات تدخل و بدو الكبار ينزلون و الحريم يدخلون للمجلس ، ابو سلمان ، ابو سلطان ، ابو سعد ، ابو سامي ، ابو مصلح ، ابو حامد ، الجد عايض ، ابو امل ، الكل بدون اي استثنى ، جلسو كلهم و هم مبسوطين حيل ب الجو ، الجلسه الي الكل كان يحتاجها ، الكل كان يحتاج يغير من روتينه شوي بس ، الاطفال الي يلعبون ب العابهم ، الرجال الكبار و سواليفهم القديمه ، هواش سلطان و سلمان المعتاد ، دخل سعد اخيراً و راحت مها للمجلس و هو تقدم يسلم على الرجال و جلس جنب العيال ، صح انه سعد كان نادر ما يجتمع معهم لكن كان له جوه ب الجلسه و الكل كان يحبه و ينتظرون جيته ، دخلت مها و فرحو البنات حيل ب جيتها و هم يشوفون معها " ابتسام " بنتها الصغيره الي لها 7 شهور و هيام الي جلست جنب مها و كانت عاقله حيل و الكل يعرف هيام ب الهدوء و حياها اللطيف ، تجمعو البنات كلهم مع اهلهم و جمعتهم البسيطه الي الكل كان يحتاجها و بشده ، السعاده و الرضا الي تغمر قلوب الجميع ، حبهم لبعض ، ضحكهم و مزوحهم مع بعض ، محد يشيل بقلبه على اي فرد ب الجلسه ، الكل كان يحب الثاني و يغليه جداً ،
بعد العشاء بدا الكل يرجع ل بيتهم و جلسو العيال ضبطو لهم جلسه ب الخارج و ب وسطها شبة نار ، كل الاطفال نامو ب المجلس و طلعو البنات يجلسو مع العيال بنفس الجلسه بس متغطيات ، و كل وحده جلست جنب رجلها ، وسام و روح ، ذياب و هيفاء ، سامي و ريما ، سلمان و ريحانه ، رفيف و هزاع ، عبدالرحمن و رنيم ، فيصل و ديمه ، سلطان و شهد ، عبيد و حلا ، جالسين حول بعض بس بينهم مسافه
أمجد ببتسامه : يازين هلجلسه
ضحك سلمان بخفه و هو يشرب قهوه: سوا فينا خير ابو رسن
وسام : اي ولله انشهددد
فز سلطان و التفت ل وسام : غرددددد يبو عايض غردد
ضحك وسام بخفه : ماهو حلا !
عبيد بسخريه : الحلا جنبي
رما ذياب عليه عقاله : انكتم لا اجلدك
انفجر الكل يضحك و استحت حلا حيللل و هي تضحك بخفه
سلمان : طالبك يبو عايض
ابتسم وسام و نطق : وش ودك فيه
سلمان : الي يجي منك كلهههه زين
عدل وسام جلسته و مسك يد روح الي بينه و بينها و نطق بحب :
المحبه انت ، وأنت الغير عادي
من عرفتك ، والمشاعر مستقره
يبتسم يومي ، ويطرب بك فؤادي
راحتي بـ رضاك ، حلّت كل مُرّه
هاك قلب و هاك عين ، و هاك غادي
دلّه لـ دربك ، وخذ خيره و شره
وش ابي بـ وجيه خلق الله وأنادي
وجهك الله خالقه طيب و مسره
انشهد صدق من قال
الروح لـ اوت داوت ولا حبت احيت .
اعتلت ضحكات الكل من خجل روح الي بان عليها حتى وهي متغطيه وجالسه جنبه ، اختلفت ردود العيال و هم يعززون ل وسام
رفع فيصل جواله من جاته رساله و نطق : ياعيال طلال يعتذر منكم و يقول اعذروه ما قدر انه يجي
سلمان : ذا خايس خايس
عبدالرحمن : هو بالشرقيه صح ؟
هز فيصل راسه ب ايه : اهلك نفسه الحمار
ضحك ذياب بخفه : ارسلت له و لزمت عليه لكنه حلف مليون مره عشان اصدقه انه ما يقدر
رجع هزاع ظهره يتكي على المركز : يازين القعده بس
ضحك سلطان بسخريه : فاضت مشاعره بلغلط
ناظر فيه هزاع بطرف عين : حاشم الي جنبك و الي جنبي ولا قمت اتوطا في بطنك
ضحك سلطان بخفه : يصير خير
ابتسم عبيد بهدوء : احمد ربي الف مره و مره على اني جالس بينكم
عبدالرحمن ببتسامه : انشهد
ديمه ب هدوء : الله لا يغير علينا
شهد ببتسامه : ما ندمت ولا واحد ب الميه على اني اجلت سفرتي عشان اجي !
سلمان : كان سافرت و جبتس مع اذنتس
سلطان : تخسي
انفجرو كلهم ضحك على محارشات سلمان و سلطان الي مستحيل تخلص ، هيفاء : تصدقون اني احس ب الامان حولكم !
روح بهدوء : على سبيل الامان ، ان الله يجمعنا ب الطيبين بدون سعى منى
حلا ببتسامه : فالقلوب على نقائها تقع .
في مكان بعيد ، مكان يحزن الكل فيه ، مكان يكره الشخص انه يزوره بسبب انه يضعف فيه ، فتح الباب و نطق : سلام عليكم دار قوم مؤمنين ، انتم السابقون وانا ان شاء الله بكم لاحقون ، قرب ل قبر فقيدته و يكب عليه ماء يحتاج الماء ذا ينكب على صدره ، تنهد بضيق و هو يجلس جنب القبر و نطق بحزن و انكسار : ما عاد للبيت طعم من دونتس ، ولله اني دنيتي من بعدتس خساير ، ولله اني ما عاد اطعم للحياه طعم من بعد فراقتس ، لكن جيت اقول لتس ان رسن و روح بخير و باحسن حال ، قلبهم فيه حزن بعد فراقتس لكن يتضاهرون ب القوه وانا ادري ان هلقوه كسبوها من امهم ، ولله يا روضه ان الايام صعبه من دونتس ، من يوم ودعتس وانا ماني بمرتاح ، يالله عسى النعيم يلازمتس في قبرتس ، ماطاحت الدمعه الا كل حيلي طاح ، ولا غاب عنا طاريتس ولا غاب ذكراتس ، يالله عسى روحتس من العنا ترتاح ، وعساتس باعلى جنان ربي مستقرتس ، متي وصعب بهدنيا رجوعتس ، ولله لو ادري ان شوفتس ذيتس الاخيره ، ولله لا ضميتس لين تشكي ضلوعتس .
بدو العيال ينسحبون تدريجينا ، وقف عبيد عند الباب و طلعت له ياسر و شاله و هي شالت الجوري ، رفع عبيد يده : فامان الله يا بعدي
ردو كلهم عليه و ركب عبيد السياره و انطلقو لبيتهم ، مسك يدها و باسها بخفه : احبتس .
قامو سلمان و سلطان الي يتهاوشون ك العاده ، مسك سلمان يد ريحانه و يساعدها لين ركبت السياره ، ركبت شهد جنب ريحانه و سلطان و سلمان قدام ، ناظر سلمان لعيون ريحانه ب المرايه و ابتسم بخفه و هو يناظر ل الطريق ، رجع سلطان يده ب ورا و دخلها من بيت الباب و المرتبه و مسكت يده شهد بخفه وهي تضحك .
قام ذياب و بحضنه وسام الي صحى من نص نومه : انتبهو للخط و انتم راجعين
عبدالرحمن : لا تحاتي
مسك ذياب يد هيفاء و اتجهو لسياره : احبك
ضحك ذياب بخفه و التفت لها : ماهو كثر ذياب
طلعت و هي شايله تهتان : دحوم يلا ؟
قام عبدالرحمن و مسك الاغراض الي معها و التفت للعيال : لا تبطون يا عيال
أمجد بسخريه : خايف علينا ؟
ضحك عبدالرحمن بسخريه : خايف على المزرعه
مسك يد رنيم و اتجهو لسياره و انطلقو لبيتهم
قام سامي و هو يتمغط : الحمد لله يارب
ابتسمت ريما و هي تقوم معه : بجيب وغدنا و اجيك
ضحك سامي و هو يتجه معها للمجلس ، وقف عند الباب و انتظرها لين طلعت ، اخذ منها تهتان و اتجهو لسياره : يخليك لنا
ابتسم سامي بخفه و هو يركب : و يخليكم ل سامي .
قام هزاع و رفيف و معهم غزل : أمجد
التفت له أمجد الي يلعب عبدالله بحضنه : سم يا اخو أمجد
ضحك هزاع و هو يروح : سلامتك
ابتسم أمجد ب خفوت و هو يقوم و قامت أمل معه : بجيب اغراضي اصبر ، راحت أمل للمجلس و جابت اغراضها و اتجهو يمشون لسياره ، متجهين ل بيتهم : يشهد علي ربي اني احبتس
أمل : ولله احبك بعد
التفت فيصل لها : مشينا !
هزت ديمه راسها ب ايه و هي تقوم معه : بجيب روح
راحت ديمه تجيب روح و اول مطلعت اخذها فيصل : عنتس
ابتسمت ديمه و هي تمسك يده : احبك
ضحك فيصل بخفه : وانا احبتس
ديمه : بيوحشونا صح ؟
فيصل ببتسامه : حنى الي بنوحشهم صدقيني
طلعت و هي تشيل ملك و عايض ماسك يدها ، شال وسام عايض الي حاوطه : ابوي ابي ارقد
ابتسم وسام بفرح من نطق له عايض " ابوي " و كانت هذي اول مره عايض يقول به ابوي : هلحين ترقد يا عيون ابوك انت
ناظرت روح لعيون وسام الي كانت تلمع من الفرحه اتجهو لسيارتهم
روح : انتهينا ؟
ابتسم وسام بخفه : تونا بدينا
كلنا نمر ب اوقات صعبه و اوقات حلوه و اوقات غريبه ، و زي ما قالو اهلنا ، تراها ماهيب دايم مرابيع و حياة ، كل انسان يمر ب اوقات صعبه بحياته لكن عليك دايم انك ما تفقد الامل و لا تيأسنّ ففي الآمل مُتسعٌ و في الغيوبِ تبأشيرٌ وأفراح سيطلعُ الفجرُلا تعجَل نسائمةُ فالليل مهما تمادى ينزاحُ ، حافظو على الصلاه و على قرأة القران دايم ، اقرو اذكاركم بكل وقت ، لا تستهينون ب الاشياء الي تقدمونها ل ربكم لو كانت صغيره فهي كبيره عند ربكم و ربكم كريم ، الحمد لله على اوجاع بليت بها قلوبنا و كتب في صفحاتنا اجر الصابرين .
الحمد لله على التمام ب الموافق 30-12-1444 انتهيت من روايتي الاولى
#" الروح إذا آوت دأوَت و إذا أَحبت أحيت "
اتمنى انها نالت اعجبكم و وصلت لكم رساله بسيطه منها ، احبكم و جداً
شاركوني الاجزاء الي ما نسيتوها بحسابي انستا n.aili8 و لنا لقاء اخر ب روايه جديده ان شاء الله 💙