في الصباح
حلت عينيها من الشمس اللي ضربت فيها فسدت عليها نومتها حلت عينيها بصدمة
لميس : وين رااااني ؟؟؟
ناضت من بلاصتها وهي تخزر للشمبرة باستغراب هاذي ماشي غرفتهم شهقت بقوة بعد ماتفكرت
لميس : هاذ الغرفة تاع اللي نهار نقذني
بقات تتجول في الغرفة حايرة وش جابها لهنا البارح كانت راقدة في غرفة واليوم صبحت في غرفة
لميس : وييييييلي بلاك راني مخطووووفة وين راه تيليفوني
حوست على تيليفونها ملقاتوش مشات جيهة الباب مع دورت الباس لقاتو محلول هبطت تستكشف البلاصة هبطت للكوزينة لقات الخدامات ثم يهدرو بالروسية
الخدامة : صباح الخير سيدة لوينو
لميس بالانجليزية : عفوا شكون نتي ؟ وانا وش راني ندير هنا ؟؟
تزامنت هدرتها مع دخول ميرا ويارا وفيروز وسيلفا
يارا بالعياط بالروسية : لميييييييس توححححشتك
استغربت لميس من تواجد يارا و الغاشي اللي يهدر بالروسية
لميس بالانجليزية : ياارااا ؟؟ وش راه صاري وانا وش راني ندير هنا
فيروز بالروسية : لاه راكي متفاجئة ؟
شافت فيها لميس بنظرات غير مبالية وتبسمت بسخرية لاختها اللي كانت تشوف فيها من الفوق للتحت بحقد
لميس : كيفاش وصلت لهنا ؟؟
مشات سيلفا باتجاهها حكمت يدها بلطف وهي تتبسم كي شافت ملامح وجه لميس اللي كانت كي الاطرش في الزفة ماهي فاهمة واالو
سيلفا : بسبة هربتكم نهار العرس وحماسكم نتوم الزوج مقدرناش نتعرفو على بعضانا شوفي انا نكون أم ادم وهاذي بنتي يارا ونظن مانحتاجش نعرفك على عايلتك
لميس : اااا تسما نتي عجوزتي كيما يقولو اسمحيلي مكانش علابالي حتى يارا ماقالتيليش بلي اختو بصح كيفاش جيت لهنا ماني شافية على حتى حاجة كنت في غرفة لقيت روحي في غرفة
يارا بحماس : علابالك ؟؟؟ جابك ادم ونتي راقدة في سابع نومة كان هازك بين يديه كي الطفلة الصغيرة تقول هاز بنتو ماشي مرتو كنا نحوسو نوضوك بصح ماحبش قاللنا خليوها تنوض وحدها مكانش علباالي بلي خويا رومنسي لهاذ الدرجة كنتو غاااااية في الرروعة
سيلفا : في يومين بدلتي ابني كان منرفز مبقاش يتقلق كيما كان ولا شوي كالم
شافت فيها لميس بصدمة ميش مأمنة اسكو راهي تكذب عليها ولا راهي تتمسخر بيها هاذاك العبد كالم ؟؟؟ وميش منرفز ؟ السيد مهبول في راسو يفرغ في غشو فيها وهوما يقولو مولاش منرفز ؟
حكمتها فيروز من يدها وهي ماشية لجيهة صال دومونج تلعبها حنينة على بنتها شافت في سيلفا وغمزتها
فيروز : هيا تفطري راكي باينة عياانة
قعدو كامل تجمعو ع الطابلة وجبدت لميس يدها من يد فيروز وقربت تهمسلها في وذنها
لميس : ماتلعبيليش دور الام الحنينة اللي خايفة على بنتها بركاي من التنيفيق تاعك
ميرا : هههه راني نشوف فيك تكالميتي شوي وتروضتي مكنتيش بهاذ الاحترام من قبل يضهرلي ادم عرف كيفاش يتعامل معاك ويخليك بهاذ الثبات والانصياع
لميس : ماتخمميش عليا انا نبقى انا واحد مايقدر يبدلي طبيعتي ولا شخصيتي حبيبتي ميرا وادم متأمنيش شحال تعجبو تصرفاتي ونظن هاذي امور بين راجل ومرتو
لزت ميرا على قبضتها من كلام لميس اللي احرجتها بيه دارت لميس لجيهة سيلفا
لميس : خالتي وين راه ادم ؟؟
سيلفا : راح للشركة يفري اموراتو وقال بلي رايح لمركز الشرطة باش يحكم كونجي ابني صابر الله يبارك قدر يوازن بين الخدمتين في زوج
بلعت يارا ريقها بخوف هي اكبر وحدة عللابالها صح وين يروح يخرج مزروب كيما اليوم فأكيد رايح لخدمتو الحقيقية
لميس وهي توكل : اممم فهمت
كملت شبعتها وجات نايضة بعد ما استأذنت منهم حبستها امها بهدرتها
فيروز : كيفاش اي ماشية علاقاتكم الزوجية يعني كاش خبر على حفيد ولا حفيدة في المستقبل !!!
شافت فيهم لميس باحراج من هدرتها
لميس : اكي قلتيها بفمك ماما علاقاتنا الزووجية
قالتها بأدب مخفضة صوتها باش ماتبينش لسيلفا ويارا علاقتهم الهشة والجافة اللي بين الام وبنتها
لميس : وضك اسمحولي اني رايحة
دورت وجهها خارجة حتان خبطت في صدر ادم تأوهت بألم وهي تمسح على جبهتها كأنها دخلت في حيط ماشي عبد
ادم : واخيراا ناضت الاميرة النائمة تاعنا على سلامتك مساء النور
قالها باش يقلقها شداتو بيدها الصغييرة مقارنة بيدو هو حس باللطف تاعها وبرائتها خرجاتو من لاصال دو مونج قبل مايدخل وراحو لغرفتهم غلقت باب الغرفة وربعت يديها تحت صدرها
لميس : وين رانا ؟؟ ولمن هاذ الفيلا ؟ وش رانا نديرو هنا ؟ وكيفاه وصلت لهنا ؟ وبالضبط لواش راك تخطط ؟
قالتها على ضربة وحدة وخذات نفس بعد ماخلصت هدرتها تستنا فيه يجاوب فيها مي هو قعد يخزر فيها بصمت
لميس بضجر : اففففففف من قبيل وانا نستنا فيك كررهت وملييت من حياة الثبات هاذي علابالك بيا منصبرش ومنقدرش نكون ديما ثابتة ونلعب دور الطفلة الرزينة والعاقلة متوال امك
بقا يشوف فيها بصمت ويسمعلها باهتمام قرب ليها وضمها لصدرو حس برااحة كبييرة شحال مليحة بعد يوم متتعب وشاق يلقا اللي يحبو ويعشقو يستنا فيه قرب نيفو لشعرها يستنشق ريحتو وهو يطبع قبلات رقيقة على رقبتها البيضة اما هي تدز فيه وتضرب فيه بكل قوتها بحجمها الصغير هاذاك
ادم : علاابلك ا لميس بعمايلك هاذو اللي راكي تديري فيهم ضك رايحة تخليني ندير حوايج فوق طاقتي متقدريش تتخليهم ماتديريش فيا هكذا عيشك
دزاتو بقوة وضيقت عينيها فيه مظهرها كان طفولي لاقسى درجة كانت في قمة الاغراء هزت صبعها في وجهو واليد لخرا تمسح في البلايص وين باسها
لميس : نتا صح ماتحشمش على اصلك شحال من مرة قتلك ماتقربش مني متفهمش ؟؟ نقولك ونعاودلك للمرة الاخيرة تزيد تعاودها نحطملك رجوليتك ونحرمك من كلمة بابا طول حياااتك هاني باش نقلك
مخلاتلوش حتى الفرصة يهدر حطت يديها على خصرها وتشوف فيه
لميس : مالا نتا هاذاك الراجل ؟؟
ادم وهو عاقد حواجبو : شكوون ؟؟
لميس : هاذي دارك ؟؟
ادم : دارنا
عضت على شفتها التحتانية بقوة : نتا اللي نقذتني هاذاك النهار ؟
ادم وهو يقرب منها : قصدك نهار كانت هذيك العصابة تحاول تخطفك ؟
هو يقرب ويهدر وهي تبعد لاور وتخزر فيه
ادم : قصدك النهار اللي طيحتيني في شبكتك
لميس : بصح قتلتو
قالت كلمتها وهي تبعد اكثر حتان لصقت في الحيط وراها
ادم : بصح حاول يمسك
لميس : نتا ضابط شرطة لاه تتصرف هكذا موش سبب باش تقدر تقتلو هاذي تعتبر جريمة في القانون ماعندكش حق تستعمل السلاح غار في الحالات القصوى شكون نتا بالضب.............
قاطعها كي حصرها في الحيط وحط سبابتو على فمها قرب لوذنها وهمس بصوت خفيف خلى جسمها يرعش من الجاست هاذي خاصة بعد ما دور ذراعو على خصرها ولزها ليه
ادم : كاينين حوايج مالزمش على زوجتي حبيبة قلبي تعرفهم او تسقسي عليهم باش نعيشو الاز وتقدري تستقري معايا
بعد من وذنها وشاف في عينيها اللون اللي خلاه يكون عاشق ليها واسير ليهم قرب ليها رايح يقبلها شاف خزرت عينها كي تبدلت لنظرة ماكرة
لميس بثقة : اك تحلم
تبسمت بنصر وهزت رجلها ضرباتو بقوة بين رجليه خلاتو يتلوى من الالم هوى على رجليه وهو مغمض عينيه هاذا وين حس بالرجال اللي كانت تضربهم
لميس : متقدر تتوقع مني حتى حاجة انا مليئة بالمفاجئات وحذرتك من قببل
شافت فيه كي مادار حتى ردة فعل وجاوبها بقات تخزرلو يتلوى بالسطر حست روحها بالغت بزااف في ردة فعلها
لميس : وجعتك ؟؟
سقساتو باهتمام وهي تشوف فيه موش قادر يوقف ولا يجاوبها قربت ليه وقعدت متوالو بعد ماحست بغلطتها
لميس : ادم اسمحلي بزااف على وش درت بصح نتا اللي محبيتش تفهم روحك مرتين وانا نقلك
خبط في الارض بقوة من الالم اول مرررررة واحد يتجرأ ويديرها جامي مسو واحد بشعرة تجي وحدة مايتعداش طولها ميترة ونص صدرو دير فيه اللي مقدروش يديروه زعماء المافيا الكباار والاسوء انو مايقدر يديرلها والو ولا يمس منها شعرة بيسك هاذا هو العشق
لميس : نجيبلك الدوا ؟؟
شافت فيه كي هز راسو ليها موش مأمن وش راهي تهدر وشمن دوا يقدر يكالمي ؟؟
ادم بالعياط : لميس اخرجي منا قبل مانوض ليك نفلعصك
هزت حاجبها الايمن وربعت يديها تحت صدرها
لميس : شوف اسيدي تعطيني طريحة ؟ جرب سعدك تشوف نتا تضرب وانا نضرب محسوب سايبة عندك انا اللي حمارة نخمم فيك تستاهل
خبط على الارض بقوة حتان حست اللي يدو تكسرت شافت نظراتو اللي خلاوها ترجف تخمم اللي قادر ينوض يسلخها عادي
ادم وهو يلز على سنيه: لميييييييس
بلعت ريقها وهي تشوف في هيأتو وخرجت بلا ما تقول كلمة اخرى
.....................
كانت متسطحة فوق السرير في السبيطار بعد ماغداتها الممرضة ملت وكرهت من الوضع اللي راهي فيه حاسة بالقنطة وضيقة الروح تستنا وكتا تولي تمشي على رجليها على احر من الجمر شافت الباس تاع الباب يتحرك غمضت طول عينيها علابالها شكون
تبسم كي شافها هز الكرسي حطو متوالها مقابلها وبقا يخزرلها بهيام مفهمش كيفاش حبها لهاذ الدرجة وبهاذ السرعة قرب ليها طبع بوسة على خدها وعلى جبينها بلعت ريقها في خاطرها تنوض تضربو بصح وضعها مايسمحلهاش
سراج : علابالي ماكيش راقدة
حلت عينيها الخضورة تشوف طول فيه فهم من نظرتها بلي ميش حابة هاذ الشي اللي راه يصرا اي طفلة في بلاصتها كانت راح تكون نفس ردة فعلها وش يجيك من شخص غريب ماتعرفو مايعرفك وجامي شفتو يضهر اهتمامو بيك ويخرجلك من العدم شاف نظرة الحيرة في عينيها ولا يفهمها بلا ماتهدر حط يدو على يدها هبطت عينيها ليدو وبعدها فيه تخزرلو بغضب كبييير فهم روحو سحبها
سراج : علابالي ماكي فاهمة والو ومعلابالكش شكون انا مي كلشي راح يبانلك بعد ماتتعافاي وانا راح نكون معاك في كل خطوة حتان ترجعي كيما كنتي و................
ماكملش هدرتو كي شافها قلبت عينيها بملل وبعدها غمضتهم ضحك بعفوية بعد مافهم اللي هي ميش حابة تواجدو معاها
سراج : معليش اني رايح بصح نقعد نجيك ديماااا وميش رايح نخليك دقيقة
شاف فيها نظرة اخيرة وخرج مع خرج حلت عينيها تخزر في السقف بشرود ميش عاجبتها روحها كي بدات تميل ليه لازم تحط حد لمشاعرها اللي بدات تتحرك خاطر ميش وقتو
........يتبع ♥♥♥