أحيانًا عثرات الحياة
ليست ضدك بل هي
لآجلك لتعي ما هي الحياة
لتفهم مواقف لم تكن تفهمها
لترى أشياء لم تكن تراها
الق/ بخلال حياتي إلي عشتها وما شاء الله شلون چانت حياة مرات والله اسب جدي بگبره يعني شنو چان يدور بعقله من چان يريد طفل من واحد منغولي حتى يشيل إسمه أدري هو المنغولي يريد واحد يعتني بي ويلبي احتياجاته أنوب يخلف ويعتني بخلفته شلون واحنه من من نجي للدنيا ما نريد اب وأم يربونه ويعتنون بينه ويصرفون علينه لو بس اجينه لهاي الدنيا المهجومه خليت راسك ومتت وخليتنه بيد الما يرحمون
ودائمًا أصفن على حالي هو اني ناصحه وبعقلي وما بيه شي وما مدبرتها زين أخويه وأبويه هسه شلون بيهم ووين صفى بيهم الدهر وقررت أعقد اتفاق ويه سردار بس خلي يجي ومن گعد سداد من النوم أشوفه هو وسردار مخبوصين كل شويه يطلعون ويرجعون شبيهم ما اعرف وطلعوا بعدين وما راجع سداد غير ساعه 2 ونص بالليل ورجع سداد وبصراحة من شفته اذكرت شنو سوا بيه لعبت نفسي منه
وعفته ودخلت للغرفة واني قررت بعد ما ابقى ويه سداد أبد وبالفعل على ثاني يوم إجى سردار وچان واگف يسولف ويه دولفين بس كردي واني واگفه بنصهم مثل الأطرش بالزفه لان يحچون كردي بس ما اهتميت بشنو چانوا يحچون وحاچيت سردار وجاهلت وجود دولفين وگتله
الق/ بلا زحمه أستاذ سردار أريد احچي وياك اذا أمكن
ألتفت عليه سردار وبس هز براسه
وأني رحت قبله للغرفة وهو أجى ورايه ودخل گبل حتى بدون ما يدگ الباب
الق/ ترى المفروض دگ الباب ما يصير گبل تدخل
باوع عليه باستنكار
سردار/ شنو تردين ادگ الباب لما حضرتچ تفتحين الباب حتى سداد يشوفني هسه شنو تردين
الق/ شوف أستاذ سردار بصراحة أني بعد ما اگدر ابقى هنا بعد ويه سداد
سردار/ إي وگتلچ بس يرد عليچ عمچ اوديچ عليه شنو شايفه سداد مچلب بيچ حتى تبقين
الق/ عفيه بيك بس احنه ما نعرف شوكت تحصل عمي احتمال بعد يوم احتمال بعد شهر أو سنه الله اليعلم
سردار/ اگلچ لا تلفين ولا دورين عليه گليلي شنو تردين
الق/ أستاذ سردار إني بصراحة عندي اب واخ منغوليين وهاي صار 4 أشهر ما أدري بحالهم
سردار/ اي وشنو تردين تجيبيهم هنا حتى خالتي تدفنچ إنتي وياهم بالحديقه گعدي راحه حبابه هو إنتي لما الگواده مالتچ بملاهي اربيل تشوفين واحد مثل سداد لا وألي يضحك تگول ما أريد أبقى ويه سداد
الق/ لا ما فهمت انت شنو أريد إلي أريده منك تأجرلي حتى لو غرفه وصحيات حتى اجيبهم يمي واعتني بيهم ذوله كل ذنب ما الهم وأني يوميه أجي أخدم هنا في بيت سداد وهو راح ينطيني راتب واعيشهم
سردار/ وأني ليش أجارلچ غرفه اني شعليه وبعدين شنو قابل شغلچ يم سداد معتربتها وظيفة عند الدولة لا حبابة ترى سداد بس يحل موضوع زوجته يرجع لأربيل وما معقوله ياخذچ ويا قابل شنو ماكو خدم بأربيل لهذا لا تتأملين هواي ترى مسالتچ بالقليل شهر وبالأكثرية شهر ونص ترجعين يم عمچ فهمتي
الق/ أي وشنو أنت ناوي تخلي موضوع زواجي وطلاگي وحتى دخل بيه سداد هذا كله بدون علمه
إجى سردار گبل هجم عليه وخنگني
سردار/ انتي شنو تهدديني شوفي لچ نوبه ثانية اذا تهددين احسبي الله ما خلقچ فهمتي وحق ربچ انقلچ للاخره هاي المره راح اعبرها الچ مال التهديد
ألق/ صدگ في وقتها ما أعرف منين اجتني الجرئه دفعت أيده بقوه وجاوبته/ شوف اني ما خايفه منك ولا من تهديدك بس صحيح اني صغيرة عمر بس نسيت اگلك اني تربية نزار ونضال يعني اني ما داخله دماغي مال انت خايف عليه من سداد لا يقتلني من يعرف اني زوجته بس عندي أستفسار منك بسيط وهو انت شلون زوجتني لسداد وهو أصلاً ما يعرف بنفسه انه مزوجني
سردار/ ترى إني زوجته لأن إني وكيله وگدام السيد گلت اني وكيله
ألق/ هاااا يعني انت وكيله وهي شنو الوكاله بلا زحمه فهمني
سردار/ الوكالة ورقه يوقع عليها إنه اني وكيل عنه بكل اموره ووقع عليها لهذا اگدر ازوجه اطلگه ابيع واشتري بسمه فهمتي
الق/ هذا الشي أني ما اصدگه اني اگدر هسه أروح أشتكي عليك واگول مزوجني من آبن خالته وهو ما يدري
بالبداية حسيته أرتبك بس بعدها گال / عادي ذاك سداد ورحي گولي اله إنه إنتي زوجته وتحملي الراح يجيچ من سداد وربچ شيصير وياچ ما أدخل مالي شغله بيچ
الق/ وسردار بي طبيعه وهي من يريد يحچي ويايه دائمًا ياخذني لنهاية الغرفه ويحچي بصوت خافت
ونكون بعيد عن الباب لهذا عافني ومشى وصل للباب وهو فتح الباب والظاهر چان سداد دى يمر من يم باب الغرفة وسردار فتحه للباب صاروا وجه بوجه
بس شنو سداد گبل عقد حواجبه وسأل سردار شدخلك لغرفتها وشنو چنت سوي
سردار/ لا صاحت عليه تگول الضوه ما يشتغل ودخلت سويته إلها
سداد/ بس من تدخل سوي الضوه تصيح لأمي تجي توگف يمك مو تدخل يمها وسد الباب
الق/ أكتفى سردار بالاعتذار من سداد وطلع وسد الباب ورا آما آني خابت آمالي أنوب أجاني هم جديد وهو إنه اذا راح سداد لأربيل وأني شلون أبقى يم عمي نزار والمشكله إنه سردار ما وصل لعمي وآني بلغت سداد وطردني وين أروح وظليت دايخه بزماني
والمشكله رجعت أحب سداد يعني چان غضبي منه على گد الي سوا بيه وظليت حايره اريد ابقى ويا وبين لازم الگى حل لنفسي اخاف يرجع لأربيل ويعوفني وبيومها بالليل طلع سداد لأربيل
ومر على الحادثة حدود 12 يوم وبيوم رجع سداد متخبل وهو يگول لدولفين باچر تجي آريا
اني من سمعت آريا راح ترجع تخبلت احس واحد وذب عليه بانزين شنو ترجع أنوب هرمونات الخبال مالتي گامت تقره آلف وهو يلوب إجى يمي للمطبخ وخله راسه جوه حنفية المي مال السنك وفتح المي وبعدها
سداد/ ورده جيبي خاولي بسرعه
الق/ واني هم رحت ركض سحبت الخاولي من قرب المغسله ورجعت انطيتها اله وهو غلق الحنفية وخله الخاولي على راسه وسألته/ أستاذ سداد شنو زوجتك راح ترجع
سداد/ اي راح ترجع ان شاء الله ترجع روحها بتابوت
الق/ آني النار ألي بداخلي أحسها راح تحرگ الاخضر واليابس وگتله/ وأني
باوع عليه مستغرب وعگد بين حواجبه
سداد/ إنتي شنو ليش انتي شنو دخلچ اذا رجعت زوجتي او ما رجعت
الق/ صدگ هنا صعبت عليه نفسي يعني شنو خلاص راح ترجع ام البيت وإني شنو راح أكون موقفي ما جاوبته بس نزلت دموعي وهو باوع عليه
ولزم أيدي وسحبني وگعدني على الكرسي وهو گعد مقابيلي وترك أيدي
سداد/ جاوبي بصراحه إنتي تفكرين بيه
الق/ ما چان عندي اي جواب أله واحس گلبي راح يطلع من صدري وخصوصًا من لزم أيدي أيده النعومه البيها والله أنعم من وجهي وچنت حالي حال آي بنيه بهيچ موقف تريد تسمع من التحبه إنه يصارحها بحبه بس هذا چان بس بخيالي جوابه چان صادم
سداد/ شوفي يا بنت الناس أنتي بعدچ طفله وينچ وين الحب بابا هاي لكون اني گدامچ تحسين هيچ شي انصحچ ترجعين لدراستچ وإذا تردين آني اساعدچ وارجعچ للدراسة إما مال تفكرين بيه ألغي هذا الموضوع لان مستحيل بيوم اباوع عليچ او أقبل بيچ ولا تاخذين في بالچ لكون إنتي خدامه لا مستوى والفارق الطبقي ما يهمني لان اني في نظري أنه الرجال هو يصرف على زوجته بس اني بعد ما أرتبط ولا ازوج أبد وحتى لو فكرت أزوج مستحيل أزوج وحده بنت عرب اني ما ارتبط او أزوج الا كرديه لهذا راح تبقين مجرد خدامه هنا لا أكثر واني كلها فتره وأرجع لأربيل وأنتي تنتهي خدماتچ هنا
الق / وعافني وراح وخلاني بكلامه لو آلف دكتور ما يطيب أثر كلامه بيه ومشاعري صارت متضاربه ساعه اگول اني إذا عندي كرامه ما ابقى بعد هنا ويه سداد وساعه أريد اگله انه هو زوجي وأني إلي حقوق عليه حالي من حال زوجته
سداد/ طبعًا صار كل يوم يمر عليه أسوء من يوم ألي قبله وبعد المصالحه ويه اوزجان صارت المصايب تتوالى عليه يعني ألي صار ويانه إي شخص يسمع يتخبل سالفه حتى بالاحلام ما صير كل واحد بينه صارت بي حادثة احنه چان عددنه خمسة صديقنه إلي چانت المصالحه في بيته واوزجان وإني وكوجر وصديقنه الرابع هذا چانت مصيبته ماكو عقل يشيلها وهي انه من راجع للبيت جايب ويا وحده بنت ليل ومن داخل هو وياها للبيت وزوجته شايفته صارت تعيط وتغلط عليه وهو بالبداية ضاربها بس هي ما ساكته صوتها صار يعله اكثر تفشر عليه هو ساحب سلاحه وضاربها طلقتين وهاي بنت الليل من شايفته قتل زوجته هي راكضه تريد تطلع هم ضاربها طلقه براسها وسامع ولده يبچون بالغرفه داخل عليهم كل واحد ضاربه طلقة بحيث الجوارين سامعين صوت طلق النار من بيته ومبلغين عليه أقرب سيطرة جيش وجايه السيطره لگيته نايم بصف اطفاله المقتولين ومن صحى ثاني عرف بالكارثة إلي مسويها تقريبًا شبه متخبل
أكثر شي خبلني هو وفاة اوزجان بحيث ما تحملت هذا اوزجان أعز صديق عندي هو وكوجر رحت لأربيل وچان بعده بالطب العدلي وبعد التشريح سلموا لأهله ومن جابوا لبيتهم تخبلت عليه معقوله هذا اوزجان هسه هو بتابوت بچيت عليه والله مثل ما بچيت على أبني ومن شفت آبو اذكرت أبني من مات وعرفت هسه شنو دى يمر بي ابو وشنو شعوره وظليت وياهم الى ما ندفن بمثواها الاخير وقبل ما نعوف اوزجان وهو آول يوم أله بالآخرة
صاح أبو اوزجان/ يرحم والديكم قبل ما تمشون أريد كل الموجودين تبرون اوزجان الذمه هو بعد راح يم ربه وما أريدها تبروا بس باللسان اريدها من گلوبكم قبل لسانكم
سداد/ إني آول واحد صحت بصوت عالي مبري الذمه
دنيا وآخره وبعدها بقيت بأربيل ما يقارب خمسة أيام وبعدها رجعت لبغداد وأول وصولي للعاصمه بوجهي على المركز على فرقد ومن سالت عليه بالمركز گالوا عنده اجتماع وظليت أنتظره ما يقارب ساعه يله عرف اني موجود وگاللهم دخلوا
دخلت لمكتبه ومن سلمت عليه عزاني بوفاة صاحبي وظلينه نتناقش بموضوع الصار ويه الكل وهو عاف كل شي وركز على صديقنه الي قتل عائلته
فرقد/ تدري كاكا سداد إنتوا الأكراد عدكم أشياء عجيبه غريبه يعني صاحبك چان بيا حال وجايب ويا بنت ليل لا الطامه وين لگاها هاي يمكن اجتي على آجلها يعني بعد كلامك آني كضابط تحقيق الشبه محصوره بين صاحب البيت وبينك انت
سداد/ سيدي گول غيرها اني هم چنت راح أموت لان ما شفت بالتصوير مال كاميرات الجوارين شگد مفلش من باب الى حايط
فرقد/ طبعًا بعد حادثة الاغتصاب بعد المن أغتصبت هسه الأيام تكشفها انت لو باقي في بيت صاحبك چان التهمة ركبت عليك بس أنت طالع من يم بيت صاحبك لهذا التهمه ما ترهم عليك بقى صاحب البيت نفسه لان انت ويا چان اقل ضرر وقع عليكم قياساً مثل الباقين
سداد/ تعرف سيدي اني الله لطف بحالي لأن أني واوزجان تبادلنه بالسيارات چان اني هسه بمكان اوزجان بعد فحص السياره ثبت إنه البريك فگس بفعل فاعل يعني مو بنفس الليله مسويها لا قبل يومين أو اكثر بحيث مسوي بس تمشي بالسياره 120 يفگس البريك
فرقد/ اكيد اني چنت متوقع هذا الشي بس دماغي يدور وبعد ما لگفها بس أكيد هذا الشخص يستفيد بموتك ويصير وريثك
سداد/ تقصد آريا
فرقد/ هي أو غيرها
سداد/ تعجبت آريا تنعقل بس مال غيرها منو ومن سألته ما جاوبني
فرقد/ شوف سداد احنه بحكم شغلنه اعدائنه هواي لهذا ما تگدر تحدد منو عدوك إلي غدرك آبن خالتي احمد إلي شفته هذا يشتغل بالأدلة الجنائية ومن سولفت إله موضوعكم گالي فرقد حاليًا دخل للبلد نوع من المخدر يخليك مدة 24 ساعه متدري بنفسك ويستعملوه بالخارج لاجراء تجارب على البشر وهو ينطي عن طريق الهواء يعني تشتمه بس ما من ممكن إنتوا تشتموا هذا خلوا الكم عن طريق هاي الحاجتين يا چانوا مخلي بعبوه رشاش ورشوابالغرفه إلي انتوا بيها يا عن طريق اجهزة التبريد ماكو غيرها بس هذا ما متوفر بكل مكان هذا تتعامل بي العصابات الچبيره لهذا انت من گتلي على بريك السيارة گتلك هذا عداء شخصي اما هذا وضعكم هاي چانت تصفيه عليكم اما هاي منو بس ربك يعلم لهذا اخذ حذرك يا آبن الناس لما ربك يفرجها
سداد/ طلعت من فرقد وإني ألف فكره وشك براسي
وبعدها بأيام قليله صار موعد قضية بيت الطاعة يم الباحثه الاجتماعية وچانت جلسه كل واحد يحچي إلي عنده بس ما حچينه هواي لآن اثنينه دى نكذب لهذا نحسمت القضيه آنه ترجع آريا لبيتها وتقرر بعد 3 ايام وتجي
بس اني شنو ارجف وأدعي من الله ينطيني الصبر وما أجرم بيها وبنفس الوقت فرحان لإن حبيبتي يبرق راح ترجع لحضني
وآني خلاص بعد قررت كلها أيام وأرفع طلب للمدير يقبل انقل لأربيل حتى أبيع البيت وأرجع لبيت أهلي اسكن بعد ما أسكن في بيت وحدي بس من وأني گاعد اذكرت أني شفت سردار طلع من غرفة ورده وبعد من كلامها من گالت وآني اتذكرت هاي البنيه يمي راح يكمل الشهر يعني هي راتبها شگد وبيت خالتي مومه على شگد متفقين على الراتب حتى انطيها راتبها اخير الشهر واستغني عن خدماتها
وخطر على بالي سؤال وردت اعرف الاجابه منها لهذا صحت عليها
سداد/ اگلچ ورده أنتي شگد راتبچ
الق/ ما اعرف اسأل استاذ سردار واي شي تنطوا إلي حمدلله والشكر أحسن من الماكو
سداد/ عجيبه اول مره أشوف وحده تشتغل ما تتفق على آجر شنو تشتغل لحين ميسره وبعدها سألتها انه سردار وين شافچ ووين التقيتوا وشغلچ في بيتهم اريد تگليلي اهلچ وين حتى احچي وياهم بخصوصچ
يتبع/
تحية لكم من القلب الى القلب
دمتم في امان الله وحفظه
أختكم الكاتبة الزهيريه الزهيريه