قبل ماتبداو حطو فوط وفوتو تقراو وفي الاخير حطولي رايكم في البارت والكرونيك كاااملة وتوقعاتكم للحلقات الجايين تفااااعلو نكمل نحط
لميس : بصح تاعك ........
قطعت هدرتها في النص كي شافت نظراتو موجهة للبستها القصيرة شغل ماكان يهدر وزيد خارجة هكذا قادرة تتلقا مع خدام في الطريق جا رايح يهدر طلعت على روس صباعها وحطت يدها على فمو
لميس : صاااي علابالي وش راح تهدر بصح والله مانبدل مانيش حابة نزيد الهدرة معاك وضك ارواح نحوس نهدر معاك في حاجة
شداتو من يدو ومشات قدامو تجر فيه ومشات للغرفة تاعهم طلقت يدو وتربعت في الارض بقا هو واقف يستنا فيها وش تهدر دات نفس عمييق وبدات تهدر
لميس : شوف باش يكون في علمك انا ميش رايحة نعيش حياتي تعيسة بسبة هاذ الزواج واكيييد ميش رايحة نكون الزوجة الاسيرة السجينة واكييد ثاني ميش رايحة نبقا ماكثة في البيت قاعدة برك وبما انك نتا ضك زوجي الكريم وعندنا غار يومين ملي تزوجنا ماكش تخمم نروحو شهر عسل بلا عسل !!! خاطر انا مستحيل نقدر نتحمل هاذ الديقوطاج والمللل ومن الواجب عليك وهاذي بلامزيتك تديني في سفر حتى وكنت مانحبكش خاطر انا مرتك وبالسيف عليك وهاذا من حقي واوبليجي عليك تلبيلي الطلب تاعي صينو تعرفني مهبولة في راسي وندير غار المصايب نشيبلك راااسك خاطر ميش رايحة ضك نقعد نندب على راسي وعلى سعدي المسود بزواجي منك ونقعد في السرير وندير روحي زعما حزينة وتلخيصا لوش كنت نهدر ملخر ماتدينيش نفضحك ونبهدل بيك نفرج فيك الغاشي ونتا خير
تنفست بعمق بعد ماكملت هدرتها وبقات تشوف بنظرات حادة قريب تقعرو بقا يشوف فيها لفترة وانفجر بالضحك من ثرثرتها الزااايدة كون ملخر قاتلو حابة نروح شهر عسل وعلاش هاذ الهدرة كااامل مدايرة فيها مقدمة وعرض وخاتمة بقات هي تشوف فيه تايهة في ضحكتو وبالضبط مركزة في ليفوسات اللي خذاولها عقلها
ادم : فكرت فيها من قبل بصح حسبتك ماتحبيش وترفضي الفكرة
ناضت من بلاصتها ووقفت متوالو
لميس : هااا لاه نرفض تجيني فرصة نسافرو نحوس ونرفضها ؟؟
كملت بحماس : تسما نررووووحو ؟؟؟
ادم : امممممم
هزلها راسو بايه وجا داير رايح للحمام تفاجئ بعناق لميس ليه من لاور بقوة
لميس : اعععع مااااارسي مارررسي
بعد ماحست بروحها بعدت بالزربة ومحات ملامح الفرحة من وجها
لميس : قصدي هاذي اوبليجي عليك وبلا مزيتك حبيت ولا كرهت ماشي غار لا قبلت نتا
هزلها حاجبو تاع اكي منيتيك تبسمتلو بجنب ودارت رايحة للسرير وهي تعرج تسطحت مغطية روحها كامل ووجهها من الاحراج
شاف فيها نظرة اخيرة ومشا للحمام وهي بقات تسب في روحها مبعد ناضت ميش قادرة حتى تحط رجلها في الارض عضت على شفتها التحتانية بألم تحاول تكتم وجعها تقاوات على روحها ومشات رايحة للكوزينة تجيب كشما توكل قعدت في وسط الدروج كي حست بوجع رجلها مين رايح يزيد بقات تمسح عليه بخفة وهي تتأوه شافتها خدامة راحت تجري ليها
الخدامة : اكي لباس مدام ؟؟؟؟ وشبيك نعيط للطبيب ؟
لميس بابتسامة : هههه لالا مكان والو تلوى رجلي برك عيشك معليش تجيبيلي كاش حاجة نوكلها ؟ تبناج هكذا شيكولا ولاكاين لاكرااام بليييز
الخدامة : ااا اكيييد
لميس : اني هنا مالا حتان تجي
هزتلها الخدامة راسها بايه وراحت تجيبلها وش تحوس وهي تتبسم عجبتها لميس بزااف تصرفاتها وعفويتها تتحب ثمثم وتدخل للقلب هاذا وين فهمت لاه طاح فيها وحبها ادم دقايق ورجعت لقاتها مزالت في بلاصتها
لميس : مااااارسي حبي ناضت متركزة غار على رجل رايحة تحكم عليها
الخدامة : خلي نوصلك للباب
لميس : مارسي تديري فيا مزية
الخدامة : لا لا واجبي
وصلتلها البلاتو للباب حكماتو عليها لميس وزادت تشكرتها دخلت لقات ادم مزال ماخرجش من الحمام تربعت فوق السرير وحطت البلاتو فوقو وهزت تيليفونها تكمل الرواية اللي كانت تقرا فيها وهي توكل
لميس : بغغغغغل هاذي جاايحة بقرة
خرج من الحمام شافها توكل وتهدر وحدها دورت وجهها ليه حلت عينيها كي شافاتو لاف غار الفوطة رجعت نظرها للتيليفون ديراكت
ادم : وشبيك ؟؟؟
لميس وهي تشوف في التيليفون : والو نقرا في الرواية برك
ادم : ولاه راكي تهدري وحدك
مشا لادريسنغ وهو مزال يهدر لبس شورت يوصل للركبة ورجع
ادم : ماجاوبتينيش
لميس : قلقتني البطلة برك
ادم : وش احداث الرواية ؟
لميس : راجل يحب مرا ومهووس بيها مايخليها تدير والو .. واذا ناقشاتو ولا خالفاتو يعنفها ويضربها لدرجة جسمها يولي كي اللوحة الفنية وغيرتو عليها ميش نورمال وهي ماقدرتش حتى تغير من شخصيتها وتوقف في وجهو ولا ؟ بالعكس تخاف منو بزااااف وتديرلو وش يحب وتهتم بيه لاقصى درجة
شافت فيه ومبعد في التيلفون : ضك هاذي لوجيك ؟؟؟؟
ادم : وش اللي ميش لوجيك ؟
لميس: تتمسخر بيا!!!!
ادم وهو يصب في الما في الكاس : تديري هكذا ومتفاعلة علاجال كي راكي تقراي في رواية مالا كون جيتي في بلاصتها وش تديري ؟؟
لميس : هاهاهاها انا اصلا تقريبا اني في بلاصتها مع زوج غريب الاطوار ومتحكم بصح انا ولا ولا والف لا ومن المستحيل تكون شخصيتي كيفها هي ميش مدايرة مكانة لروحها وقابلة الذل راضية باللي عايشاتو في الوقت اللي الناس عايشة حياتها بالطول والعرض تحواس وخرجات ولبسات وخددمة وهي مزالت ميش قادرة تفرض رايها
هدرت هدرتها منفعلة وهي تشير بيدها هنا ولهيه حكملها يدها اللي تتطاير وحدها
ادم بحددة : كيفاه اكي عايشة كيفها ؟ لاه انا نضربك ؟ نهينك ؟ نذلك ؟ كاش دقيقة حسستك بلي نتي والو ؟؟؟
سلبت يدها من قبضتو وهدرت وهي تحسب بصباعها بطريقة لطيفة خلاتو يخزرلها بعششق
لميس : نتا تفهم الناقص بزاااف قلت تقريييبا ومن هاذ التقريب هو انك متملك ومغياار وحابسني هنا وتحاول تفرض في رايك عليا بصح باينة بلي مانسمحلكش
ادم : علابالي بيك عنيدة لدرجة الجنون وانا متملك لدرجة كبيرة بصح بتصرفاتك هاذي يا لميس رايحة تخليني نوكلك لاه راكي تحاولي تغريني
لميس بصدمة : اناااا!!! وكتا حاولت ياوحد الكذااب
ناضت من السرير وهي تحط في الشيبس في فمها
لميس : انا مالحة وغير قابلة او صالحة للاكل طعمي مالح وجسمي ملوث
قرب ليها وهو يحاول يحكمها غار باش يخوفها حكمها من فمها وقعد يمشيلها في الخط
ادم : وانا نحب الماالح
لميس : اععع بعععد عليا ماتقربش ديرني خط احمر وخلي مسافة الامان بيناتنا تجنبا لحوادث أليمة
بقا يخزرلها يشبع من وجهها ومن ريحتها اللي تخدرو محتار من روحو كيفاه نسى الغضب تاعو بمجرد ما هدر معاها كيفاه يحب يسمع هدرتها وثرثرتها وهو يكره الهدرة
لميس : اخرج اخرج ديجا حابة نقعد وحدي
ناضت من بلاصتها باش تخرجو حست بأألم رجلها قعدت طوول
ادم : وين نروح
لميس : ماتقليش ناوي ترقد هنا معايا
ادم : وش تستناي مني مالا نرقد في الحمام واقيل
مشا تسطح طول فوق السرير بجنبها قدمت ليه تدز فيه بيديها الزوج
لميس : ااا نووض نوض ارقد وين رقدت البارح في الجاردان غار هاذي اللي ماتصراش
ادم : لاه ماتروحيش نتي هاذي هي غرفتي حبيتي ترقدي هاهي قدامك يخي راجلك
لميس : هاهاها والله غار صح ؟ في احلامك ... ديجا نقلك ؟؟؟
هزت المخاد حطتهم في الوسط بيناتهم وهو يشوف فيها وش راهي تدير
لميس : شوف تفوت هاذ الحدود الراس يطير ونحرمك من كلمة بابا لللااابد
كملت كلامها ودارت بجنبها غطات راسها اما هو ناض راح جاب علبة الاسعافات حكم رجلها بقوة ناضت مفزوعة
لميس : اااي وش راك تدي....آآآآآآآآآآآآآآآآآآآي
عيطت بقوة وبألم بعد ما لوى رجلها للجهة المعاكسة باش مايبقاش متلوي وضمدهالها
لميس والدموع في عينيها : مهببووووول متوحححش لاه درت هكذا حماار وجعععتني
تغاضى على كلامها وحسب روحو ماسمعوش هز كاس الما ومدولها مع دوليبران يكالميلها السطر
ادم : هاذا باش ماتحاوليش مرة اخرى تخبي عليا حاجة توجعك
بقات تحملق فيه ميش مأمنة كيفاش يكون الانسان متقلب لهاذ الدرجة
.......يتبع♥♥♥