سداد وبنت العرب

البارت الخامس والعشرون

سداد وبنت ألعرب
بقلم الكاتبة الزهيريه الزهيريه

البارت الخامس والعشرون

بعض البشر سوف يؤذونك
ثم سيتصرفون وكأنك آذيتهم

الق/ طبعًا أكو أشياء مرات نسمعها بس ما نصدگها الا شي يصير بينه ونشوفه بعينه يله نصدگ  وأني أذكر بيبي الله يرحمها من چانت تعذبها نضال تگول ربي آمنت بيك صدگ سلط واسلط عليك واني هذا ينطبق عليه من چنت في بيت عمي نزار الله چان مسلط عليه عمي نزار وزوجته نضال واني هم رجع سلطني على سداد وهسه الله سلط عليه ام سداد الظاهر المشلوع گلبه وين ما يروح يبقى مشلوع گلب

بيوم الي اجتي أخت مومه اني عبالي حالها من حال مومه هم خالة سداد لهذا صعدت اگعد بسداد ما يگعد ومن خليت ايدي على كتفه وادغ بي تخبل من گعد

سداد / لا تخلين ايدچ عليه فهمتي نوبه ثانية اكسرها الچ فهمتي

الق/ في وقتها بس هزيت براسي بمعنى موافقه وبلغته أنه أكو وحده تريده

سداد/ يله روحي طلعي من الغرفه أريد أبدل شلون أبدل

الق/ طلعت من غرفته واني متعجبه هذا شبي هو اني شنو سويتله هو بس گعدته شنو إذا دغيته على چتفه في سبيل يگعد شنو قابل بيه جرب ونزلت وهاي أخت مومه بعدها تحچي ويه منو ما أعرف لإن بيدها موبايلها ومن شافتني اجتي عليه وضربتني على ظهري وهي تگلي انت وين رحت

ألق/ رحت گعدت أستاذ سداد لان نايم وبلغته بوجودچ
وبعدها ما ردت عليه نزل سداد من فوگ ومن شافها أجى حضنها وظل يبوس براسها وأيدها وهو يردد كلمة دايه وبعدها اخذها وراح لصاله وهو يگول سوي چاي ورده

واني بگلبي اگول ما خلصت من مومه أنوب الله جابلي دايه سويت الچاي واني خلال هاي الأيام سداد كله الچاي مالته سكره قليل كلش لهذا عبالي دايه هم نفس الشي  وأني انطيتها الچاي وبعدها انطيت لسداد ومن تقربت عليه وانطيته الچاي حتى الكوب بيدي يرجف وهو انتبه عليه بس رجع يباوع على دايه وطبعًا كل ما أصير قريبه على سداد كل حاسه بيه تصير بيها رجفه شبيه ما اعرف ونوب هو حلو شعره أسود گالبه ليفوگ ويلمع وبشرته نقيه وعيونه سود واني كل ما أصير قريبه منه أظل اباوع بوجهه

واني بعدني غارقه بتأملاتي بسداد وصاحت عليه دايه وهي تگلي / تعال انت

وأني من تقربت عليها ضربتني على علبتي وهي تگلي ليش چاي مالتي ما بي قند

ألق/ صدگ استغرب كلامها گتلها العفو ما أفهم عليچ
وهي تخبلت

تگلي / شنو انت ما يفهم عليه اني يعرف يحچي عربي أحسن منك فهمت

الق/ باوعت على سداد وگتله/ والله أستاذ ما أفهم كلامها شبي الچاي ابدله لو ما خدران لو شنو الموضوع

سداد/ هاااا لا أمي قصدها انه الچاي ما بي شكر قند معناها شكر

الق/ هااا أستاذ آني عبالي هي مثلك تشرب الچاي قليل سكره ما أدري بيها تحبه حلو اعذروني لان ما أفهم على كلامها

اخذت الچاي من گدامها وآني اگول بگلبي هاي طلعت اضرب من مومه ادري هاي شلون أتفاهم وياها ومن رحت للمطبخ واجى ورايه

سداد / اعذريني ورده ترى امي گلبها طيب وهي بيها طبيعه من تحچي تأشر بيدها وتضرب يعني عادي تعلمي عليها هذا وضعها لا تزعلين من تضربچ

الق/ أستاذ اني مو مشكلتي الضرب اني مشكلتي ما أفهم كلامها

سداد/ أدري شلون قابل أجيب مترجم يا عيني الله يخليكم أني أعصابي تعبانه ما ناقصني جيبي الچاي والشكر يمها وخلي هي تخلي وفضوها

ألق/ وعافني وراح وهو شبي ما اعرف بس أحسه يلوب وبس مخلي بنته بحضنه وعلى الغده هو جاب من بره آكل لأن يعرف اني ما اعرف اطبخ وهو تعبان ومن شافت دايه الآكل من بره تخبلت وما اعرف شنو تحچي بس كررت  أسم أريا هواي  وهو عصب بشكل وشمر الآكل بالگاع وظل يصيح  وصوته يطرش الإذن وخطيه يبرق گامت تبچي اني شلت يبرق وطلعت أركض من الصالة لان خطيه فزعوها وظليت بالغرفة وهاي الغرفة الي انطاها الي سداد گلي هاي چانت غرفة أطفالي

وأثناء صراخ سداد خطيه يبرق تخلي وجهه برگبتي وتبچي وخايفه وما اعرف شگد استمر هذا الوضع لكن بعدها سكت سداد بس سمعت رگعت باب المطبخ وصار هدوء تعجبت شو سكتوا ونزلت يبرق بالگاع ولازمتها من ايدها وطلعنه من الغرفه بس چان ماكو أحد لا دايه ولا سداد  وحتى صعدت فوگ بس ماكو احد رجعت لصالة وگعدت يبرق على القنفه وجبت چيس ولميت الآكل من الگاع واني أشوف الناس إلي الله ناطيها نعمه شلون تسوي بنعمة الله واذكرت كونه شلون چانت تلم أكل النه من الجوارين الفضاله وناكلها خلي تجي شوف الكباب والدجاج شلون ينذب بالزبالة ومسحت الصاله كلها بزاهي ورتبتها واني بگلبي ادعي على دايه هسه وكتچ اني جوعانه من البارحه أكلت وخطيه هاي الطفله كل شي ما ماكله طلعت طماطة هاي اليتميه الي ما أعرف غيرها حمستها وحميت الچاي وسويت حليب ليبرق واني صبيت چاي إلي وگعدنه ناكل

ومن شفت يبرق تاكل وتشهگ نزلت دموعي عليها لأن ذكرتني بنفسي شلون چانت سوي بيه عمه نضال طبعاً كارثه الأطفال الي يبقون بدون أمهم لان اليتيم  يعتبر يتيم الأم مو يتيم الاب واگول خطيه هاي وين أمها عنها ميته مثل ما گال سردار لو وين ويبرق شربت حليب وظليت اغمس الصمون بالطماطه وتاكل

وبعدنه ناكل ودخل سداد والله فزيت من شفته وانوب معصب ومن شافني اوكل يبرق

سداد/ رحمة الله على والديچ صبيلي چاي وجيبي الي لصاله

الق/ واني هم نفذت كلامه وصبيت چاي اله واخذته لصالة وطبعًا بهيچ موقف صعب الواحد يظل ساكت يعني آني لكون العركه كلها چانت بالكردي يعني يا ربي هم رعبوني اني وهاي الطفله وهم خلونه جوعانين وهم انوب ما يخلونه نفهم شي يعني الفضول يكتل كتل ومن انطيته الچاي قررت اسأل جواب خلفله الله عليه ما جاوب وترزلت خلص بعد هذا حظي
سألت / أستاذ سداد أني سببت الك مشكلة اليوم

سداد/ لا المشكلة مو يمچ بس يمكن اني غلطت غلطة عمري وچان ضحية هاي الغلطة أطفال ما الها ذنب

الق/ أستاذ خطيه يبرق نرعبت من صوتك

سداد/ هو آني منو هاد حيلي غير يبرق لا تخلين في بالچ ورده وعينچ على يبرق واعتبريها اختچ الصغيره

الق/ عرفته ما يريد يحچي بالموضوع جاوبته إنتوا بعيوني أستاذ سداد
وهو بس هز براسه بس دائماً هو صافن شبي ما اعرف ولليل ندگ الباب وجرس سوه اني چنت العب ويه يبرق  وهو چان يگلب بموبايله وگام حتى يفتح الباب واني من فضولي گمت ورا ووگفت بشباك المطبخ ودخلت مومه ودايه وسردار وأني اللوگيه على اساس اني ام البيت والمعزبه أخذت گلاصات عصير ورحت وخليت الصينيه على الطبله واخذت گلاص وانطيته لدايه ومن قبيل اللواگه الفول گتلها/ تفضلي ست دايه
وما أحس غير اجتني كفخه على راسي  يمكن الله لا يكذبني نزلت مخي بحلگي  وهي تگلي / تگول دايه إجى العصر ويريد القصر دايه بعينك بنت لا سام ولا سلى

ألق/ عرفت فيما بعد انه دايه مو اسمها طلعت دايه معناها بالكردي  أمي

سداد/  طبعًا يعني مرات اشوف إنسان قبيح والقباحه مو بالشكل القباحه بالافعال واكو مرات قباحة أفعال شخص تفوق الخيال واني من چنت نايم وگعدتني ورده وبلغتني اكو وحده تريدني تعجبت منو هاي تريدني لهذا بسرعه بدلت ونزلت وچانت مفاجئه بالنسبه إلي چانت امي وبعد الترحيب وبقينه ساعتين حسيت امي اكو شي تريد تستفسر عنه وطول الوقت تراقب ورده وبعدها ما منها مجال بدت تحچي على انت ما تخاف الله مطرد زوجتك  وجايب صديقتك وتگلي خدامه ومن سألتها من گلچ اني مطرد زوجتي
بلغتني إنه آريا متصله بيها وتبچي وتتوسل بيها انه اني مطردها وجايب صديقتي للبيت بحجة تشتغل عندي وانه هي هسه في بيت گرايبهم وما عدها مصرف وماخذ منها يبرق وما اخليها شوفها  وهي مضطرة ترفع عليه قضية حضانة الطفله وتريد حقوقها مني وما تگدر ترجع لبيت اهلها في اربيل لان وضعهم المادي كلش صعب وأنه اني بعد وفاة ابني صرت مخبل لأن اتهمتها انه عدها علاقة بواحد ومزوجته زواج متعه

يعني هنا اذا عندي ذرة عقل هسه كل عقل ما بقى نهائيًا وگمت حتى الاكل شمرته بالگاع تريد شوه سمعتي عند أهلي الساقطه جاوبت أمي أنه تبلغها لو تموت فلس أحمر مني ما شوف وأعلى ما بخيلها تركبه الگح.. اني مخبل تريد مني فلوس حتى تنطي لأبو الدجاج حتى ينام وياها هسه أشوفها سداد منو

بوقتها أمي ما صدگت وصارت مشاده كلاميه بيني وبينها إلها آول ما إلها آخر إنتهت هاي المشاده آنه أمي مصدگه آني مخبل وطلعت وراحت على بيت خالتي مومه

وأني في وقتها اتصل عليه فرقد وگلي تعالي سداد اذا تگدر لأن ما اعرف شنو اگلك على الرقم

وآني منا افور وانطفي رحت على فرقد للمركز افور وانطفي وهو من دخلت چان يحچي بالموبايل  وگعدت واني وجهي محتقن وهو إنتهى من الاتصال

فرقد/ الله بالخير كاكا سداد أول شي ألي عرفته عن الرقم شي يحير وهو انه الرقم اولا بسم واحد متوفي ومن اهل كركوك  والمكالمات بي متوقفه وبس إتصال يستقبل والأرقام الي متواصل وياهن كلش قليلات ومن اخذنه كشف بالأرقام طلعت كلها بيها أوليات لناس من معارفه الظاهر عنده اللعب على النسوان المزوجه حرفه وأكيد عنده أرقام غير هذا لان من ينصب على وحده وياخذ حالها ومالها اكيد بعدين يحرگ الرقم وهذا الرقم ما ينطي لآي احد من معارفه شلون شياطين والله يحيرون الواحد بس مستحيل اعوفهم آني فرقد يعصى عليه هذا الموضوع لا والله اني فلا ابن ابويه اذا ما طلعت الحيه من الزاغور

سداد/ تعقدت أكثر ومن حچيتله شلون متصله بأمي وتشكي مني

فرقد/ ترى بلغتك إنه راح تلگى فاينه جديده وترى هي ما مهتمه لبنتها هي كل همها شلون تحصل فلوس منك لا أكثر الظاهر ابو الدجاج مفلسها تفلس ومجزره

سداد/ تدري سيدي والله هسه من اجيتك الطريق كله اگول يجوز اني مخبل صدگ لان ماكو آي دليل ضدها

فرقد/ ماكو واحد ذكي صدگني لازم اكو شي بغبائه يعوفه ورا وينكشف بي بس خلي شويه آصفي دماغي وإني أعرف شلون أطلعهم من جوه الگاع

سداد/ بعدها استأذنت منه طلعت وأحس يوم بعد يوم تتعقد أكثر وبعدها سلمت بنتي لأمها وآني گلبي ينزف دم وبعدها من رجعت للبيت احس البيت أظلم موجودين بي بس ورده وأمي وبقيت يومين نفسيتي مدمره دمار وأتصل عليه صديقي كوجر وبلغني انه المدير مالتنه انطى امر لازم أداوم وچان بعد ما عندي حل

وعفت ورده وأمي بالبيت ورحت لدوامي واتصلت بيه المحاميه سحر وتگول ما  بقى شي لجلسة بيت الطاعه
وأني تقريبًا صار اسبوع غايب عن البيت وطلبت أجازه يومين من المدير ورجعت للبيت

لگيت البيت تقريباً صاير عليه هجوم لان جام المطبخ كله مكسر وبس سلمت على امي وورده سالت شنو مكسر الجام ماكو جواب مقنع أبد ودخلت سبحت وطلعت ورحت للمطبخ طلبت آكل من ورده واني چنت متاكد أمي ما تحچي شي بس بداخلي متأكد مليون بالميه صاير شي وماكو غير ورده ابوگ لسانها

سداد/ بالكذب من إني بالدوام أتصلي عليه گولي أشوف سداد شلونه عايش ميت بس هنا ثابرتني أستاذ وأستاذ شنو الزاد والمارتديلا ما يغزرن لو اكلنه حصو  وما غزر

ألق / أستاذ  رحمة على روح ابوك هو آني ملابس ما عندي البس غير بس هذا إلي لابسته اغسله وأرجع ألبسه منين أجيب موبايل ورصيد حتى أتصل بيك

سداد/ معقوله انتي ملابس ما عندچ آفا وآني موجود والله اليوم يمچ احلى ملابس ليش ما گتيلي

الق/ أستاذ بصراحه انت من حرگت ملابس زوجتك چنت اريد اگلك انطيهن إلي وأكسب بيه آجر لان ما عندي بس شفتك معصب وخفت احچي

سداد/ خلي تولي لا تلبسين من ذيچ الوسخه اني أخلي زوجة سردار اجيبلچ احلى ملابس

الق/ لا استاذ هي مو وسخه بالعكس كلش حلوه اني الوسخه

سداد/ هي منو

سداد/ زوجتك

الق/ وأنتي وين شفتيها احچي الصدگ بدون كذب

الق/ الصراحه أستاذ من انت ما موجود اجتي وظلت تعيط وتغلط عليك وياها يبرق بس شنو ملبسه يبرق ملابسه مشگگه وظلت تعيط وتگول يا ناس يا عالم سداد شامر بنته عليه واني ما عندي منين أوكلها الماعنده غيره ذب بنته بالشارع

هنا صدگت شمعت وسألتها / وهي كسرت جام المطبخ

الق/ آي استاذ ظلت تضرب الجام بالحجار وصيح طردني وذبني بالشارع وجايب الگح ... بالبيت والناس كلها التمت علينه

سداد/ گوه گدرت ابلع الكلام إلي گالته ورده بس على أعصابي لإن ثاني يوم المحكمه وصحيح مثل ما گال فرقد  تلوب تريد بكل الطرق فلوس يعني اني ما شي بالطريق الصحيح

وعلى ثاني يوم بدلت وكشخت وطلعت رحت للمحكمه ومن وصلت يم قاضي الشرعيه لگيتها هي ومحاميها موجودين ضحكت بداخلي گلت ويه نفسي  أدري شنو چانوا حاجزين غرفة بالمحكمه وباتوا بيها شبيهم جايين من الصبح

ومر حدود ربع ساعه واجتي المحاميه سحر وبعدها دخلنه للقاضي وترافعت سحر أنه اني احب زوجتي وأريدها ترجع للبيت  وانه البيت موجود كامل من كل شي واثاثه من الابره الى غرفة النوم جاهزه

وبعد ما اترافع المحامي مالتها قرر القاضي انه
1/ تحال القضيه الى الباحثه الاجتماعية
2/ يطلع كشف من المحكمه على بيت الزوجية حتى يشوفون صحيح اكو بيت ومأثث

وأخرها رجع القاضي سألها في حالة اكو بيت ومتوفر كل شي بي ترجعين لزوجچ

وهاي  وحده من قباحات آريا وكان جوابها للقاضي انه موافقه ترجع للبيت وهاي چانت أكبر صدمه الي

يتبع/ بكم أكتمل
دمتم في امان الله
تحية لكم من القلب الى القلب
الكاتبة الزهيريه الزهيريه