سداد وبنت العرب

البارت الثالث والعشرون

سداد وبنت ألعرب

البارت الثالث والعشرون
بقلم الكاتبة الزهيريه الزهيريه

أسوأ الناس في حياتنه
هم من دخلوا من باب الثقة
وخرجوا من باب الغدر

ألق/  اكو مواقف تموت وما تريدها تكرر عليك يعني اني مرات أفكر اگول شنو چان بعقل عمي نزار من زوجني لسداد والمشكله هو يعرف الحقيقة يعرف انه سداد بريء ومع هذا زوجني آله زين ما فكر اني شلون راح اتواجه ويه سداد واعيش ويا بنفس البيت لا والمصيبة أكون زوجته يعني ما معقوله سداد راح يقابلني بالاحضان  لهذا من رحت دى اذب چيس الزباله وصرت قريب على باب الصاله طلع سداد ولازم بيده بنته وهو شافني آني بصراحة خفت منه بس هو ولا كانه شافني واني من اجيت ويه سداد من أربيل بصراحة ما هلگد أنتبهت على شكله

بس هسه لا دققت النظر بيه بصراحة من ظليت اباوع على تلاميحه كلش حلو أني حالي حال اي بنيه بعمري اي واحد اشوفه حلو تحبه ويصير فارس احلامها اني بالبداية من شفت سردار انعجبت بجماله بس سداد من دققت بملامحه دخل گلبي بثانيه وبأثناء هذا الموقف طلع سردار بس تفاجأ من شافني اني وسداد بنفس المكان وسردار بسرعه اشارلي براسه بمعنى دخلي جوه واني هم عفتهم ودخلت  وظليت واگفه بالمطبخ لان ما أعرف وين أروح وبعدها سمعت صوت سياره وباب الرئيسي نسد ودخل للمطبخ وگعد على كرسي وگدامه مائدة الطعام والي طلب مني اجي اگعد مقابيله وبده كلامه

سردار / شوفي ألق خلي احچي وياچ بصراحة حتى يكون الموضوع واضح الچ انتي وأني متأكدين من براءة سداد وأنه أنتي وعمچ تهمتوا سداد تهمه باطله  في سبيل تبرئين نفسچ واني لما أعرف سداد بريئ والله ما أجي على عمچ واحچي ويا لو تنطبق السماء على الأرض مو لإن إنتوا ناس فقره لا والله الفقر مو عيب بس لإن واعذريني من التعبير انتوا ناس بلا أخلاق لهذا التعامل ويه ناس بلا أخلاق مثل ما واحد يحفر الجبل بأبره ومع هذا دفعنه مبلغ خيالي وزوجناچ لسداد بس في سبيل يطلع سداد من السجن واكبر دليل على كذبچ انتي وعمچ وتهمتكم لسداد باطله انه هسه سداد من شافچ ما عرفچ أصلًا

ومن سألته عنچ گال اني ما أذكر شكلها لان ما باوعت عليها من الآصل وخلي انبهچ من هسه سداد لا تتقربين عليه ابد والبي مكفي الله يكون بعونه واحنه ما بلغنه سداد أنه احنه زوجناچ اله ابد ولان لو يعرف والله يتخبل عنده اهون يقتلچ ويدخل السجن ولا يزوجچ  لأن انتي تعرفين بيا مكان چنتي واي رجال ما يبقل يرتبط ببنيه من هذا المكان وتكون سلعة رخيصه لرايح ولجاي

واخلي هسه أتفق وياچ إتفاق وهو إنه مايعرف سداد انه أنتي زوجته راح تكونين گدامه بس خدامه لما الله يفرجها ونشوف شنو راح نسوي

ألق/ إني اعرف شنو راح اگلك ما راح صدگني ولو تعرف اني شلون چنت عايشه والله انت نفسك راح تتعجب وما تلومني أبد ومن ناحية سداد أطمئن أصلًا أخاف احچي ويا واني ولا اريد أصير گدامه ابد

سردار/ يعني تعرفين سداد برىء

ألق صعبت عليه نفسي وأني احس نفسي منبوذه من كل الناس ودموعي نزلت / گتله الله يشهد عليه اني ما أريد السوء لسداد بس اني حبيت وخان بيه الي حبيته

سردار/ اي كلام بشي فات بعد ما يفيد صدگيني خلينه نشوف الأيام الجايه شنو ضامه النه

ألق/ عافني سردار وگام راح وهو يصيح على هلات انه تاخذني لغرفة حتى أرتاح بيها  وبالفعل اجتي عليه هلات وبيها طبيعه جامده حتى كلامها قليل عرفت فيما بعد إنه هلات زوجة سردار وعدهم أطفال أثنين ومر على وجودي يومين بهاي اليومين شفت 3 اطفال ولد وبنيه اطفال سردار واكو بنيه أسمها يبرق بنت سداد واني كل ما إنزل وأبقى بالمطبخ يجون الأطفال ياخذون حلويات من الثلاجة أطفال سردار دمهم جامد مثل امهم ويبرق حلوه ودمها محبوب وكل ما إطلع حاجه من الثلاجة تنطيني ومن أضحك وياها هي هم تضحك ومن الضوجه والملل لان ماكو احد يحچي ويايه أما مومه كارثة كل ما شوفني لو صيح عليه لو تغلط عليه ومن شفت بنت سداد

ألق/ تعالي تلعبين ويايه
وهي ما گالت لا فرحت اجتي گعدت مقابيلي وصرت لو نضرب ايدي بيدها لو ادغدغها وصارت هاي كل ما شوفها يمي مومه تاخذها من يمي وهي تغافل مومه وتجيني للمطبخ وبالليل شافها سردار يمي اوكل بيها

سردار/ الله يرضى عليچ عينچ عليها ترى هاي تعتبر مثل اليتيمه

ألق/ آني عبالي أمها ميته وهي من شافت سردار تعلگت برجله وهو خلاها على رگبته وأخذها ويا  وبيوم الثالث إجى سداد يفور وينطفي ويصيح ويغلط على منو ما أعرف بس من كلامه فهمت انه هو چان بالمحكمه واجى عليه سردار وبيده بنت سداد

سردار/ ألق أخذي يبرق يمچ فوگ سداد معصب بشكل ودى يحچي شيش بيش وما نريد الطفله تسمع شي

ألق/ أخذتها فوگ وصعدنه بالغرفه ألي آني بيها وحمد لله ما بيها شي غير بس دوشگ وغطوه ومخده
ومن دخلت يبرق وگعدتها على الدوشگ وگعدت يمها أنتبهت بيدها موبايل سألتها هذا مالتچ

يبرق/ لا هذا مال بابا

ألق/ فتحته وظلت تگلب بي تدخل من تطبيق وتطلع من تطبيق والله أحسن مني آخرها دخلت على الأستوديو وطلعت صور واكو صور وحده تجنن ومن سألت يبرق هاي منو گالت هاي ماما  وبعدها طلعت صور نفس البنيه بس ويه سداد وبالصور هو حاضنها واكو بعد صورت طفل ومن سألته هذا منو گالت هذا أخويه أيليا بس راح وبعد ما يرجع هو وروجيدا ومن سألتها روجيدا منو طلعت صوره لطفله ثانيه گالت هاي أختي
زين ذوله وينهم شو بس يبرق يم سداد

وبعدها انطيتها الموبايل وظلت تگلب بي وغفت ومن سمعت صوت سداد يصيح على يبرق شلتها ونزلتها وانطيتها اله وهو أخذها مني وگلي شكرًا وراح

وانتبهت صاير المغرب گلت لازال نزلت خلي آكل وبعدها أصعد وما أنزل أبد على باچر يله أنزل

وبسم الله بس دخلت للمطبخ صارت بوجهي مومه وما ادري شنو مخليه بمبخره ومن شافتني تباوع عليه وتگول اللهم كفينه شر الحسد والحاسدين بگلبي گتلها كل هذا العز والنعيم وما تردين احسدچ 

وبعدها إجى سردار حچى ويه أمه بالكردي بس فهمت الكلام على سداد لكون أكثر من مره نذكر اسمه وبعدها راح وطلعت ورا امه واني على السريع فتحت الثلاجة واخذت خياره وصمونه وبطل مي وصعدت ركض
وخليت الخياره بنص الصمونه واكلتها وشربت مي ورحت نمت على فراشي ومن رفعت الغطا حسيت رجلي نطخت بشي ومن رفعت الغطا كله طلع الموبايل الي چان بيد يبرق ولكون اني ما شايفه هيچ موبايل بحياتي هو اني چنت يم عمي نزار كاتلني الجوع اشوف هيچ موبايل وبعدني اباوع دگ الموبايل بيدي والمتصل أسمه مكتوب بالكردي لهذا ما أفهم شي منه ظليت بس اباوع عليه

وصدگ إلي گال ما شافوهم من باگوا شافوهم من تقاسموا يعني ما شافوا الجهاز من چان بيد يبرق شافوا الجهاز بيدي وبقى الجهاز يدگ لما دخلت مومه عليه للغرفه وهي تولول وتگول هاي باگت موبايل سداد

سداد/  أني ادري الأنسان الحظ يخدمه مره وحده بحياته  ألا مثل آريا الحظ ساكن بحضنها ما شفت بحياتي وعندي سؤال دائمًا يتردد بدماغي ليش الآنسان الأخلاق وطيب حظه تعس بهاي الدنيا وليش الآنسان الي ما يخلي شي اعوج ما يسوي حظه فوگ النخل يعني شنو هاي عداله إلالهيه ولو عقاب لو اختبار تاهت عليه المسميات بس يبقى هذا الحظ النحس ما يغير شي بحياتي

ومن دخلنه للقاضي أدعت عليه آريا إنه اني عاجز جنسياً وحتى الوصفه الطبيه مال مراجعتي لدكتور طلعت ماخذتها وقدمتها للقاضي يعني يوم بعد يوم اكتشف نذالتها واگول معقوله اني چنت مزوج هاي الشيطانه وقبل دخولي للمحكمه بلغتني المحاميه سحر إنه الحضانه راح تنحسم من آول جلسه إلها تبقى بس قضية الطلاگ التعسفي لا هذا لازم أدله وشهود ومن حكم القاضي بالحضانه الها وحدد موعد بعد اسبوع لازم أسلم يبرق إلها وتحت أنظار القاضي

گوه چنت لازم أعصابي لا اجرم بيها وصلت حدها فوگ سقوط أخلاقها وخيانتها تريد تاخذ البنيه مني وتريد فلوس ولما طلعنه من يم القاضي اني بس استغفر ربي وأدعي يصبرني على ما بلاني وأول ما طلعنه ردت اهجم عليها حتى أضربها بس

المحاميه سحر / گالت عوفها هاي حفرت گبرها بيدها وهسه شوف

سداد/ نوعًا ما هدئت وهي ما اعرف شنو چانت تحچي ويه محاميها واني رجعت على بيت خالتي افور وانطفي يعني شنو خلاص راح تاخذ بنتي مني وظليت اسب وأغلط وافشر وخالتي وسردار بس يريدوني أسكت  وبس احس جمره بگلبي  ما أعرف وين انطي وجهي آخرها  ردت اتصل بفرقد حتى يعرف انه راح يستدعوا  وچنت أريد اتاكد انه راح يشهد لو لا لأن إلي يدخلون كلية الشرطة يحلفون يمين انه يقولون الحق إضافةً إنه أي شاهد يحلف بالقرآن يله يدلي بشهادته
أنوب أدور على موبايلي ماكو حتى بنتي ماكو صيحت اجتي الخدامه جابت بنتي وبعدها الموبايل ماكو وظلت خالتي هي وسردار يدورن عليه وبعدها گام يدگ سردار على موبايلي

سردار/ أنت متأكد چان وياك الموبايل لإن  اذا چان وياك من ادگ عليه نسمع صوته

سداد/ والله ويايه وحتى سلمته من دخلت للمحكمه سلمته بالاستعلامات ومن طلعت اخذته وبطريق الرجعه أتصل بيه اوزجان وحتى ما جاوبته اني متأكد ويايه

وطلع سردار راح لسياره هم دور عليه هم ماكو وبعدها خالتي جابته إلي وآني في وقتها ما سألت گد ما چان دماغي مشغول وأول ما لزمت الموبايل اتصلت على فرقد وشگد إتصلت بي بس ما جاوب أبد أنوب خفت لا بعد ما يجاوب عليه وألى ساعة متأخره من الليل أتصل بيه

فرقد/  كاكا سداد شنو رايك أجارلك غرفة من بيتي يعني كفيلك الله نادراً ما الگى ما متصل بيه لهذا فكرت بغرفة الإيجار حتى ليل ونهار گبالك وترحم موبايلي من اتصالاتك

سداد/ العفو سيدي خاف چنت نايم وقلقت نومك

فرقد/ كاكا سداد انت كلك على بعضك قالقني بقت على نومي انت قالقني أكثر من القضيه الفلسطينيه واريد انصحك كاكا سداد انه من تتصل مره وحده وما اجاوبك  يعني خلص بعد لا تتصل لان اني معناها ما متفرغ وبس أتفرغ أتصل بيك وآني البارحه چنت خفاره والله أريد أفتح عيوني ما اگدر من الظهر نايم الى هسه

سداد/ أعذرني سيدي بس  اليوم المحكمه مال بنتي ونحكم الحضانه لأمها بس طلاگ تعسفي ما گدرت تثبت عليه وهي طلبتك لشهاده

فرقد/ هاي غبيه ما تعرف ويه منو دى تلعب آني فرقد كفيلك الله اوديها لشط واجيبها عطشانه ولا يهمك اني احل الموضوع

سداد/  سيدي يعني راح تشهد

فرقد/ كاكا سداد انت يرادلك گلب ما مدشن واني ما بيه حيل أريد بس اسم المحامي مالتها وخلص وأني أصرف

سداد/ وانتهى الإتصال بينه واني إتصلت على سحر وطلبت اسم المحامي مال آريا ومن نطتني آسم المحامي كتبته ورسلته على الواتس لفرقد وظليت أنتظر خبر من فرقد

وأني بعد ما منها مجال صار أيام يم بيت خالتي وأريد أرجع لبيتي لان ما ماخذ راحتي أبد ومن بلغت خالتي وسردار حاولوا يبقوني يمهم بس آني اصريت إلا اروح وخالتي ظلت تبچي على يبرق وتريدها تبقى يمها واني وعدت خالتي بس أروح لدوامي راح أجيب يبرق يمهم بس همه ما عافوني الا أنطوني الخدامه مالتهم تبقى يمي وبعد اصرارهم قبلت وشغلت سيارتي وطلعتها من الگراج  وأنتظرت الخدامه لما اجتي ووياها يبرق وركبوا بالسياره بالمقاعد الخلفية وشگد ردت من يبرق تجي تگعد يمي ليگدام بس ما قبلت وظلت گاعده بحضن الخدامه والعجبني أنه الخدامه هم حاضنتها شوكت وحده عرفت الثانيه وهيچ وحده ولفت على الثانيه

وصلت للبيت ودخلت سيارتي للگراج ونزلنه ومن دخلنه للبيت حسيت روحي نقبضت بس لازم أواجه مشكلتي واقوي نفسي واحنه چنه واگفين بالمطبخ ألتفت على هاي الخدامه

سداد/ انتي شسمچ

ألق/ اسمي ورده أستاذ

سداد/ ورده اني هنا في بيتي ما أحب الضجيج واحب الترتيب واهم من هذا كله الاهتمام الأول والأخير لبنتي يبرق تخليها بعيونچ 

ألق/ تدلل استاذ الله يخليها الك ويرحم أمها برحمته الواسعة
شو هذا گبل هجم عليه عبالك وحش ولزمني من زندي وحيل يعصر بي

سداد/ وانتي منو گلچ هي ميته بعدين الله يرحمها على شنو

الق/ العفو استاذ والله استاذ سردار گلي اهتمي بيبرق لإن يتيمه وفهمت إنه أمها متوفيه
وعافني ابن الأوادم بعد ما حسيت أيدي راح تنكسر بيده

سداد/ شوفي اني ما إلي خلگچ بس لا تدخلين بشي ما يخصچ فهمتي

ألق/ اني ما نطقت  بحرف واحد وهو صعد فوگ واني ويبرق دخلنه لصاله وچانت صورة عرس سداد وزوجته على الحايط واني واگفه اباوع على الصوره واجى مو ورايه شلون فززني

سداد/ على شنو تباوعين نزليها وذبيها بالزبالة ما أريد اشوف اي صوره إلها بالبيت

الق/ وبدون كلام نزلتها وذبيتها بالمطبخ ورجعت لصالة وهو شفته گاعد  على القنفه وبنته بحضنه واني اجيت وگعدت بالگاع قريب على الباب وهو بالبداية چان ما منتبه لان چان صافن على السگف وبعدها ألتفت عليه

سداد/ إنتي ليش گاعده بالگاع گومي بابا گعدي هناك على ذيچ القنفه

ألق/ واني نفذت كلامه بس من گعدت على القنفه گتله/ بس هذا الشي ما راح يغير كوني خدامه ومن گعدت بالگاع هذا مكاني

سداد/ لا هذا مو مقياس واذا تشتغلين بالبيوت المهم لگمتچ حلال ولا خنتي احد ولا سرقتي من آحد الشغل مو عيب رفعي راسچ  انه انتي دى تشتغلين وما نحرفتي انتي شگد عمرچ  إنتي مزوجه

الق/ 15 سنه  لا ما مزوجه

سداد/ بعدچ صغيره وان شاء الله يبعثلچ ابن الاوادم إلي يستر عليچ

وبعدها گمت من يمها وأني مقهور عليها  بعدها طفله تشتغل وأقارن بينها وبين آريا كل وجه مقارنه بينهن ماكو هاي طفله وتشتغل حتى تعيش وذيچ الثانيه  عايشه عيشة ملوك وراحت دور شهوه 

ومن دگ موبايلي وشفته فرقد ومن رديت عليه

فرقد/ كاكا سداد عرفت اسم آبو الدجاج

يتبع/ بكم أكتمل
دمتم في امان الله وحفظه
تحية لكم من القلب الى القلب

الكاتبة الزهيريه الزهيريه