سداد وبنت العرب

البارت الثاني والعشرون

سداد وبنت ألعرب
البارت الثاني والعشرون
بقلم الكاتبة الزهيريه الزهيريه

من باع عشرتنا لأجل غايات الآخرين
تحرم علينه رجعتهم حتى لو كانوا اقرب
الناس الينا وأقرب من حبل الوريد

ألق/ بعد إلي مريت يبقى كل أنسان تحكمه بيئته وآني حمدلله شلون چنت عايشه في بيئة هاي البيئة تكون بيئة نزار ونضال إضافةً الى انه ما چانت حالتنه الماديه زينه يعني نحمد الله ونشكره كل شي ما شايفه ومن دخلت  بيت اهل سردار يعني ظليت منبهره  بكل شي أشوفه في بيتهم كل شي بي فخم وهو من جابني لبيتهم وصاح على أمه وطبعًا مو بس البيت يبهر حتى أمه جمالها يجنن في حين هاي مبينه منتصف الستينات بس عبالك شابه وبياضها ناصع وشعرها أشقر ولابسه دشداشه قصيره لونها احمر ومن من شافتني ويه سردار تخبلت ومن طلع سردار هي تباوع عليه صفح
بعدها حچت ويايه وعلامات الاشمئزاز على وجهه

مومه/ انتي ما أعرف طالعه من يا مزبله بس گليلي شايفه حالچ شنو چان عمچ مطلعچ تگدين ولا تلزمين اي شي بالبيت ايدچ وسخه فهمتي بين ما يجي سردار ويشوف البلوه البلاني بيها وأني أسمعها بس ما أجاوب بس تحركت چنت واگفه يم تحفه ونلطخت رجلي بيها ووگعت وسوت صوت يطرش الإذن وام سردار گامت تعيط وشلون عياط واحد عنده ميت أنوب ثولتني الي ما أعرف شسوي واجتي بنيه إذا اگول ملاك من ملائكة السما ونازله قليل بحقها من جمالها وهي تباوع عليه وعلى ام سردار وتحچي كردي واني واگفه مثل الهبله كل شي ما افهم

وام سردار تبچي وتأشر على التحفه المكسوره من الكلام كله الي مليون بالميه ما فهمت منه شي بس عرفت هاي البنيه اسمها هلات لان ترطن وتگول هلات

واني حچيت ويه هاي لبنيه گتلها/ والله ما سويت شي بس نلطخت رجلي بيها ووگعت ونكسرت انطوني مكناسه هسه اجمعها واذبها بالزبالة اني حچيت هيچ لو مومه تخبلت  عبالك راح أدفن الميت بالزبالة مو تحفه

هلات / عيني إنتي تدرين هاي شگد  سعرها لتحفه لازم نجمعها قطعه قطعة ونخليها بصندوق خاص بنقل التحف وترجع لمعرض موجود بمنطقه راقيه ويشوفون شيسون يصلحوها او شوف شنو

ألق/ وراحت البنيه وجابت صندوگ  وشلون تجمع بالقطع بحذر وهي تولول على راسها واني واگفه بعدها

مومه/ هلات اخذيها خليها تگعد بالمطبخ  هاي وسخة

ألق/ أخذتني هلات للمطبخ واجتي ورانه مومه ومن ردت اگعد على كرسي عاطت بيه مومه وما خلتني اگعد على الكرسي وتحچي ويايه بنتر وتگلي

مومه/ لا تگعدين على الكرسي توسخي روحي گعدي هناك

ألق/ وانتبهت على المكان إلي تگلي گعدي بي چان وره باب المطبخ يعني إلي يجي من خارج البيت ويفتح الباب انضرب بالباب ومع هذا رحت گعدت وهاي البنيه هلات ما إلها  اي حچي كله مومه تحچي وهاي البنيه تنفذ  وبقيت گاعده والله ما أعرف شگد مر وقت

وبعدها هلات چانت دى سوي چاي ودى تحضر ووگعت الصينيه من ايدها ويمكن مرت ثواني واجى سردار وهو حچى ويه هلات ومن دخل لنص المطبخ وشافني فتح عيونه على وسعهن وگام يصيح على أمه

هنا بصراحة ارتاحيت من حچى عربي من اجتي أمه حتى أفهم شيگولون ومن حچى وياها چان صوته منخفض

سردار/ بس گلولي الله بسما يرحم وانتوا ما ترحمون ليش مگعدين البنيه وره الباب ادري هي حيوان  هسه هي وعمها مو خوش اوادم إنتوا تسوون مثلهم

مومه/ وين تريدني أخليها بجناح بفندق فلسطين هاي وحده گح ... لو نسيت شسوت بابن خالتك

سردار/  امي عيني لا تحجزين بفندق اكو غرف فوگ فارغه وخلوها بوحده منهن وانطوها فراش انطوها ملابس خلوها تروح حمام تسبح ارحموا من في الأرض يرحمكم من في السماء

مومه/ انت خبل سردار هاي اكيد بيها مقروبات وراح تسوي عنده مرض خليها تطلع من البيت كله

سردار/ أمي اني أجيب إلها ملابس وفراش على روح ابويه بس مو هسه هذا سداد گاعد لا يسمعنه انطوها ملابس من عدكم اعتبروها بثواب أرواحكم ادري شنو ما تسوون ثواب على روحكم

الق / صدگ هنا صعبت عليه روحي ونزلت دموعي من سمعت كلام سردار وهو باوع عليه واجى يمي وانطاني أيده وگومني وهو يحاچي هاي البنيه

سردار/ هلات جيبي ملابس من عندچ

ألق/ ورجع يحچي ويايه سردار/ گومي بابا تعالي سبحي بالحمام وبعدها تعالي هنا بالمطبخ اكلي ورحي ويه هلات فوگ بالغرفة أرتاحي

ألق/ وصلني سردار للحمام وفتح باب الحمام وگلي دخلي وهو راح واجتي هلات جابتلي ملابس وانطتهن إلي وراحت وإني اباوع على الحمام ساعه منذهله واكو حتى مرايات على جوانب الحمام على طول الحايط وعرضه أنوب مو حمام شكبره وحتى البوري ما أعرف وين والمشكله من وگفت گدام المرايه اباوع على نفسي الملابس مال الاكراد الجابهن الي اوزجان ألوانها صارخه ونوب وسخات لان ما عندي ملابس لهذا چنت البسهن نفسهن إضافة اباوع على وجهي يمكن يرادلي محجاره هاي السوده مال الرجل لوجهي مو ليفه وظليت واگفه مشكلتي البوري وين ومر هواي وقت وندگت عليه الباب

مومه/ اطلعي يله ما شايفه حمام عمى بعينچ وعين الخلفچ

ألق/ أنوب دگ الباب مالتها بقوه وفززتني وفتحت الباب وهي شافتني بعدني بملابسي وهي ظلت تغلط عليه وسبحان الله من تريد تغلط عليه تحچي عربي ومن تريد تحجي وياهم تحچي كردي حتى ما أفهم ومن عرفت ما أعرف المي وين ظلت تغلط واجتي كفختني حيل على راسي واجتي جرتني بقوه جوه الدوش وطلع الكاك مال المي ينسحب الى فوگ ويجي المي وفتحت مثل دولاب وطلعت ليفه وهواي انواع مال غسول

مومه/ يله تغوسلي إن شاء الله الغسله الاخيره

ألق/ وعافتني وطلعت واني سديت الباب وراها وقفلتها ونزعت ملابسي وفتحت شعري ودخلت جوه الدوش وحمد لله صدگ مال عمك ما يهمك شعري غسلته من كل انواع الغسول الي نطته الي وبعدها ليفت طلعت من جلدي جلد بحيث صار أحمر غسلت غسلة العمر ولبست وفتحت الباب وظليت واگفه واجتي مومه جابتلي چيس مال زباله وظلت واگفه على راسي وذبيت الملابس الي چنت لابستهن وحتى الليفه الي ليفت بيها ذبيتها ومن طلعت بيدها بخاخ وترش عليه من فوگ الى جوه ومن الريحه  عرفته ديتول وانطتني مشط حتى امشط وقراصه وصاحت عليه حتى اذب چيس ملابسي بره بالحاويه يم الباب الخارجي ومن وصلت للمطبخ صاح عليه

سردار / نعيمهً تعالي آكلي ذبي الچيس يم باب المطبخ وتعالي اكلي

ألق/ اكو چان اكل على ميز الطعام من جبن وصمون قشطه وسردار قبل ما يطلع صبلي چاي وحليب واني چنت حيل جوعانه بس أخاف أكل وتجي مومه تصيح عليه بس بعد ما منها اني ميته جوع وحتى ما گعدت اني واگفه اسوي لفات جبن وگد ما جوعانه ابلع اللگمه بلع ومن اختنگ اشرب من كوب الحليب وبعدها سمعت خطوات قريبه على المطبخ اخذت الچيس وطلعت من باب يطل على الگراج والحاويه يم الباب الرئيسي والگراج كلش چبير اباوع على حاوية الزباله واگول ويه نفسي حيل هاي ألي يروح للحاويه لازم ياخذ تكسي حمدلله الله يرحم بيتنه چان كله 3 غرف وبيبي الله يرحمها تگول لنضال نزار مگعدچ بقصر هسه  اذا شوف هاي القلعه شتگول رحت ذبيت الچيس بالحاويه
ومن رجعت وصرت قريب على باب الصاله طلع سداد ولازم أيد بنته وشافني وظل يباوع عليه

سداد/   هاي الحياة كل شي چان متوقع بيها بس الصار ويايه ما چنت متخيل بيوم أبد أدخل سجن وما چنت متوقع خيانه وهاي الخيانه اجتي من أقرب الناس إلي ومن طلعت من السجن اكبر مفاجأة چانت الي من سمعت عم ألق ماخذ ضعف المبلغ تخبلت لأن خالتي دافعتهن وگتلها لخالتي وسردار

سداد/ بس گلولي ليش دفعتوا چان خليتوني بالسجن وما طلعتوني قابل شيريد يسوي خلي اخذ حكم ولا اخلي واحد گوا... ياخذ من فلوس خاوه

وبوقتها خالتي وكوجر وسردار ظلوا يهدون بيه بس شيفيد ووعدت خالتي إنه انطيها الفلوس لان هي ما إلها ذنب وطول ما آني موجود أنتبهت عليهم احسهم مرتبكين وشنو سبب هذا الارتباك ما اعرف وكوجر راح وبقيت اني ردت أروح لبيتي وچنت ناوي أروح اگلب بيتي راس على عقب حتى أشوف شنو بعد موجود عسى وعلى الله الگى دليل ثاني على آريا ومن سمعوا خالتي وسردار تخبلوا على وين رايح واگعد وشعندك رايح  بس الفاجئني انه جايبين خدامه للبيت وآني أعرف خالتي موتها وسمها ولا احد يلمس غرض بالبيت وعرض عليه سردار عرض غريب

سردار/ اگلك سداد انت هسه صفيت وحدك  وانت كلها أيام وترجع لدوامك وين تخلي بنتك يبرق وبنفس الوقت بيتك محتاج وحده تنظف وترتب ما ناوي تزوج وجيبلك وحده للبيت تراعي بنتك وبيتك

سداد/ انت تحچي صدگ سردار بعد لو أموت ما ازوج وبنتي راح اخذها لاربيل يم أمي وحتى روجيدا راح أطالب بنقلها لمصحه هناك واعالجها والتهي بشغلي رحمه لأهلك هو اني أطفالي أمهم ما رحمتهم واحد جوه التراب والثانيه بمصحه أنوب أزوج هاي الحبابه ألي راح تجي شنو سوي لا خلاص راح أعيش حياتي لبناتي وخلص

سردار/ اكو مقترح ثاني طول وجودك في بغداد احنه جبنه خدامه آخذها وياك في بيتك تخدمك وبيتك وبنتك ومن تروح لدوامك جيبها هي وبنتك

سداد/ وشگد رفضت بس اصر عليه سردار الا تجي الخدامه ويايه وفي وقتها گتله الله كريم أشوف اني يحچي ويايه سردار واني بالي بالبيت واستأذنت منهم أروح للبيت أجيب ملابس إلي ولآن اريد اگلب البيت ومن ردت إطلع رادت تجي ويايه يبرق بس خليتها يم سردار وطلعت رحت للبيت من دخلت كل شي بمكانه بس من دخلت لغرفة النوم شفت بس كنتورها مگلوب يعني هنا چانت ضامه الموبايل

وأخذت إليه ملابس وصفنت گلت على شنو گالب البيت اكيد من اجتي اخذت كل دليل ضدها وطلعت وفتحت كنتور ابني أيليا وطگيت بچي اخذت ملابسه هو وروجيدا وشم بيهن ريحتهم معقوله راحوا مني بشربة مي ودگ موبايلي ومن شفت مكتوب بالشاشة فرقد يتصل بك ومن جاوبته

فرقد/  وصلت لحل وهو شوف سداد اذا  ما گدرنه نوصل لرقمها واكيد چانت تتصل من هذا الرقم بس بي لهذا اريدك تتردد على السوگ شوفه موجود وحاول بكل جهدك تحصل على رقمه لان من خلاله راح نوصل لرقمها واطلعلك كل شي چانت تسوي وتحچي من هذا الرقم

سداد/  سيدي باچر أتردد على السوگ واكيد راح اطلع بنتيجه وشكرته لأن فرقد هذا كله تحرياته مو رسميه
وأتصلت على على المحاميه وبلغتني انه بعد يومين ويصير اول جلسه وهي حضانة يبرق والنفقة وأكدت عليه سحر الحضور من الصبح واتفقت وياها أشوفها بالمحكمه ومن نهيت إتصالي بيها واخذت ملابس الي ولبنتي وطلعت ورجعت لبيت خالتي والعجيب بالموضوع انه يحچون بالخدامه وخالتي وهلات يگومن يسون آكل لعد الخدامه شنو شغلها ما  أعرف

وبقينه اني وسردار تعللنه لوقت متأخر ومن ردت أنام خليت يبرق بحضني ونمت وما گعدت الا ثاني يوم الصبح على يبرق تلعب بخشمي ومن گعدت تگلي نانا تگول تعال تريگ گمت غسلت وجهي واباوع على الساعة چانت 9 وثلث بس أكلت شويه  وبسرعه گمت بدلت ورحت لسوگ  وظليت أتلفت وأمشي واباوع بالوجوه وكل ما أشوف واحد ابو دجاج اگول يمكن هذا وهنا اجت على بالي شلون راح أعرفه وآني أصلًا حتى اسمه ما أعرفه وظليت بس أفتر بالسوگ وماكو فايده أخير شي قررت أتصل بفرقد حتى ينطيني اسمه ومن اتصلت بي  ومن سالته على اسم ابو الدجاج

فرقد/  شنو ربك دينك تحچي صدگ سداد هي اثناء ما أعترفت ذكرت اسمه يمكن مره او مرتين بس اني شكو أحفظ اسمه غير أنت تحفظه هو ضرتك الك مو ضرتي

ونهيت الإتصال ويه فرقد ورجعت لبيت خالتي افور وانطفي أعرف الگح.. حظها قوي بس مثل حظ آريا ما شفت وشافني سردار والتعصب مبين على وجهي وحچيت اله كل الصار

سردار/ هي مو گالت چانت جيرانه هي توديني عليه ما بيها شي روح على جيرانكم وأسألها اسم ابو الدجاج شنو

سداد/ يمعود هي المره نهجم بيتها وطلگها زوجها  وين الگاها حتى أسألها واذا رحت على زوجها وسالته على ابو الدجاج يمكن يشتري دبل طابوگ ويضربني بي براسي

سردار/ شلون ما بقى شي لجلسه وهي الحضانه من حقها

سداد/ رحمه لاهلك لا ذكرني والله دى أموت شلون لو أخذت يبرق مني كون الله ياخذ روحي ولا تاخذ بنتي مني

وبقيت يومين في بيت خالتي وهاي اليومين مرن على أعصابي واجى يوم موعد جلسة المحكمة ورحت ومن دخلت وقريب على غرفة قاضي الشرعية موجوده المحاميه سحر وتقريبًا ساعه واجتي آريا ووياها محامي وشويه وصاحوا بسمائنا ومن دخلنه آريا هي ومحاميها وگفوا على جهة اليمنى لان هي المدعية واني  وسحر وگفنه على جهة اليسرى لكون آني المدعي عليه وبدت المرافعه وبدها محامي آريا  يوجه كلامه للقاضي

المحامي/  سيدي المدعي عليه سداد ماخذ طفله يبرق وما يقبل أمها تشوفها في حين الحضانه من حق الام هذا شي والآمر الثاني المدعي عليه سداد طلق زوجته طلاق تعسفي والأمر ألكم حضرة القاضي

سحر/ سيدي عندي مداخله على كلام المحامي وهو انه موكلي لم يطلق زوجته من الآصل وهي ألى ألان هي زوجته وعلى ذمته وغادرت بيت الزوجية بدون سبب يذكر في تعيش برفاهية وهي من تركت البنت عند أبوها

رجع القاضي سأل آريا عن آي إدعاء موجه الها مني
آريا/ سيدي اني غادرت بيت الزوجية لان زوجي غير قادر على معاشرتي معاشرة الأزواج عنده ضعف جنسي كامل  وهذا ثابت خلال مراجعته لدكتور وآخذ علاج  وما فاده العلاج وهو طلقني بمركز الشرطه وأمام الضابط فرقد والطلاق تعسفي بعد ان رمى عليه يمين الطلاق

القاضي/ حكمت المحكمه بضم  حضانة الطفله يبرق لامها آريا والزام المدعي عليه بنفقة لطفله من يوم خروج أريا من بيت الزوجية وتحمل كافة مصاريف المحاماة اما موضوع الطلاق التعسفي يطلب الضابط فرقد لشهادة رفعت الجلسة

يتبع / بكم أكتمل
تحية لكم من القلب الى القلب
دمتم في امان الله وحفظه
الكاتبة الزهيريه الزهيريه