سداد وبنت العرب

البارت العشرون

سداد وبنت ألعرب
البارت العشرون
بقلم الكاتبة الزهيريه الزهيريه

الأصيل حتى في عداوته شريف
وقليل الآصل حتى في صداقته
خبيث

ألق/ مرات من نكون بعمر صغير ما نعرف هاي الاخطاء بعدين شنو تكون عاقبتها  المهم ننفذ كلام المقابيلنه حتى نخلص جلدنه من الضرب وهذا چان وضعي من طلب من اتهم  سداد بدون وعي قبلت حتى اخلص من الضرب وبالفعل من قدمنه تقرير المستشفى وسجلنه الشكوه ضد سداد رجعنه للبيت وعمي يوصي بيه انه بعد راح يستدعوني للتحقيق وإنه ابقى مصره على أقوالي  وما اخاف أبد من سداد وبالتحقيق راح يستخدمون لهجة التخويف لازم تبقين مسيطره على اعصابچ على اساس خطيه عندي امتحانات بكلوريا ويوصي بيه لا اخاف

وبعدها مر اليوم وعلى ثاني يوم تم استدعائي من قبل الشرطة وعمي اخذني للمركز وچان موجود الضابط هذا الضابط ابو شوارب السود وسلم عليه عمي وگعدنه وبعدها بده الحديث الضابط

فرقد/  بلا زحمه إنتوا صار أكثر من شكوه تقدمتوا ضد سداد وانتوا وحدكم ينراد ألكم مركز وحدكم  يعني صار فتره انتوا بس تقدمون شكاوي روحوا ارتاحوا وريحوا دماغكم وريحونه وياكم هسه نبدي نسال أنتي البارحه  چنتي مقدمه بلاغ ضد سداد بأنه إجى لبيتكم واعتدى عليچ بالضرب احچيلي الحادثه

ألق/ سيدي چنت گاعده بالبيت من أجى سداد ومن ندگت الباب ما عبالي هو ومن فتحت الباب بالبداية سأل على عمي ومن عرف آني وحدي چان يريد يدخل يمي للبيت بس اني ما قبلت وهو ضربني واني وگعت وبده يضرب بيه موتني ضرب وبعدها عافني وراح

فرقد/ والله إذا أفرض أصير مخبل ما معقوله اصدگ هذا الكلام يعني انتي ويا بگتوا فلوس عمچ ونهزمتوا سوا عادي بس يدخل لبيتكم  ما تقبلين لا ما شاء الله صاحبة مبدئ  بابا اني گدامچ ضابط تحقيق مو واحد گاعده سفطين عليه حچي  إنتي بالقضيه الأولى چانت بينكم علاقة حب صحيح

الق / اي چانت بينه علاقة حب وحتى خطبني وعمي ما قبل

فرقد/ اي صح ما يقبل عمچ بسداد لان مو من مقامچ لازم يجي يخطبچ دكتور مهندس وانتي خطيه عالمه بايولوجيه شو إنتي بالدراسة مصخمتها وملطمتها وحالتكم الماديه جوه الصفر بعد على شنو خطيه ما قبل بسداد وانطاچ لفريق الركن أبو إسكندر

نزار/ سيدي هاي مو طريقة تحقيق

فرقد/ شوف انت هنا بقيتك وياها مجرد تسمع الكلام لا أكثر آما تعترض على طريقة شغلي لهنا وتوگف شنو شايفيني گدامكم أرنب شنو هذا التسفيط القاضي كل اعتماده على اوراق التحقيق ألي نرفعها احنه شنو أرفع هيچ مهزله ما يگول القاضي شنو هاي المهزله لان هذا مو تحقيق هاي مهزله يعني البنيه عدها علاقة ويا ومهزومه ويا وهسه تگلي يريد يدخل يمها وهي ما تقبل شويه احترموا عقلي

ألق/ سيدي آي صح اني چنت عندي علاقة ويا بس من باعني بأربيل أنتهت علاقتنه

فرقد/ اني عندي مليون علامة استفهام حول موضوع بيعچ بأربيل أريد أعرف شوكت باعچ أول ما انهزمتي ويا لو بعد شهر او اسبوع شوكت

ألق/ هو وصلني لبيت جميله وبعدها أختفى وما شفته الا من أجى هو و ويا فرقه وأخذوني وبعدها هو جابني لبغداد

فرقد / الرواية عجيبه غريبه يعني أريد اصدگ انه ما لمسچ وبقيتي بنيه بكر حتى من يبيعچ يحصل بيچ سعر زين بس علامات استفهام هو لكون رجعچ يعني لو هو يعرفچ وبايعچ ما يرجعچ ابد يگدر يبيعچ أعضاء بشرية حتى كل دليل عليه ماكو يعني سداد مو غبي لهاي الدرجه إضافةً هو حالته المادية كلش زينه يعني ما يحتاج هذا كله ومنصبه مرموق وهو يعرف اذا طلعت عليه هيچ شي ينحال مجلس تحقيقي  على العموم اخذنه اقوالچ والتقرير الطبي موجود وبعد تبقى يم القاضي

ألق/ طبعًا اني هذا الوقت مال التحقيق كله چنت ارجف لآن الضابط يخوف ونظرته تخلي الواحد يخرط العافيه ومن طلعنه يله تنفست لان احس صدري يعصر بيه والله من طلعت من المركز احس روحي ردتلي

ورجعني للبيت ومر تقريبًا 3 ايام وبعدها أني گاعده بالخرابه مال عمي وندگت الباب ومن فتحتها للباب وما شاء الله شلون باب من نريد نفتحها أو نسدها لازم بحذر لأن نخاف لا توگع الباب واني شفت وحده گدامي يطلع عمرها نهايةالاربعينات وحلوه كلش ومن لبسها مبينه حالتها الماديه كلش زينه وياها هاي الگالت اني جيرانكم كفاح

وهاي الكاشخه قدمت نفسها الي / شلونچ حبيبتي اني مومه خالة سداد وجايه عليچ ممكن اخذ من وقتچ دقايق نحچي بيها

كفاح وهي تضحك / يااااا اكو واحد يسمي بومه وتگليلها اخذ من وقتچ شنو شايفتها گاعده بالقنصليه

مومه/ حبيبتي مومه مو بومه وثانيًا لازم نستأذن من آي شخص من نريد نحچي ويا  لان هذا وقته واحنه دى نقتحم وقته لهذا يا ريت تتركينه بوحدنه

ألق/ بيني وبين نفسي تعجبت على جمالها وأناقتها ونزاكتها  لا وتحچي ويه كفاح ألي عبايتها يمكن من زمن اشور بانيبال وحتى ما لابسه حجاب جوه العبايه لان نص شعرها طالع ولابسه نعال ما اعرف احدد لونه  وعافتنه كفاح وهي تدردم اي بعد ما دليتها على بيت وين گامت تطرد بيه

وابتعدت عنه كفاح واني گتلها لضيفه تفضلي
ودخلت وهي تتلفت حولها وحتى علامات الاشمئزاز بينت عليها شگد حاولت تخفيها بس بينت على وجهه

مومه / بلا زحمه وين نگعد ونحچي لان ماكو مكان مثل ما اني شايفه

ألق/ حبيبتي احنه هذا وضعنه وين ما تردين تگعدين اگعدي تردين تظلين واگفه براحتچ

مومه / شوفي حبيبتي اني من اجيت والله سداد ما يقبل أجي نهائيًا الولد بالسجن والله فوگ راسچ ويعرف البريء من المذنب شنو ذنبه دخلتي سجن انتي وعمچ بتهمه باطله  والولد راح مستقبله يدمر من نسجن نرفع بي مجلس تحقيقي يعني حتى عمله راح يخسره ويطلع من عمله بوصمة عار انه هو عضو بعصابة تجارة الدعاره خافي الله الولد لا يعرفچ ولا شايفچ ولا حتى يعرف بيتكم وين احچي كلمة حق وگولي الحقيقه گدام رب العالمين قبل البشر

ألق/ بصراحة كلامها صحيح بس هذا الكلام وين يمشي يم عمي نزار بگلبي گلت اي اطلع سداد واوگع بيها اني دى عمي نزار يدفني واني حيه جاوبتها اني كل حچت للشرطة وما كذبت بعد هو يمه الموضوع  ليش دى يكذب

مومه / شوفي حبيبتي اذا على الفلوس انتوا شگد تردون اني انطيكم والله اي مبلغ تطلبوه إني حاضره وأدفع بس تنازلوا عن القضيه واحچوا الصدگ احنه ما نريد يطلع بكفاله او عن طريق تنازل عن حقكم راح يبقى عليه شك بشغله بس من تحچون الصدگ يطلع براءة من كل شي

ألق/ ظليت لا احچي ولا انطق بس العرض مالتها عجبني بس گتلها/ من يجي عمو اگله على عرضچ وهي انطتني رقمها مال الموبايل وراحت وهي كل شويه تگلي أنتظر مكالمة منكم

وبس إجى عمي نزار وحچيتله كل ما عرضته عليه خالة سداد وهو وجهه گام ينطي ألوان ساعه يگول خاف الشرطه دزتها علينه وساعه يگول ناخذ الفلوس منها أضعاف الراح مني ونخلص وما ندخل بسين وجيم وياهم

سداد/ يعني اني اعرف آنه الآنسان رب العالمين يختبر صبره ألا اني يرادلي صبر ايوب على ما بلاني اني فوگ ما خسرت أبني وبنتي لا هي عايشه ولا هي ميته الله سلط عليه إثنين اني بنظري گح ... لآن اثنينهن ما ماذيهن وكل وحده قضيتها شكل من آريا إلى الق والله من دخلوني السجن چنت اتمنى هذا كابوس واصحى منه بس الظاهر حاله من حال وفاة أيليا مو كابوس چان واقع وشلون واقع چان واقع مرير اني سداد الكل تحلف بسمعتي وأخلاقي نهايتي بالسجن على ايد وحده گح... اني بنفسي طلعتها من الملهى وحتى طلعتها مصلخه ملابس بيها خير ماكو عليها والله الملابس الچانت عليها بس على صدرها وخفيف كلش وعلى عضو التناسلي مالتها مثل الخيوط بس تجي هسه هي وعمها وصير شريفه براسي خلفله الله على اوزجان إلي جاب إلها ملابس وسترها

بوقتها بدي ارگع راسي بالحايط  أو اسوي بنفسي شي حتى بس أستوعب حجم المصيبه ألي آني بيها واباوع على الموجودين أكثرهم وجوهم مال مجرمين بحق وكل واحد سالفته شكل وما مر على وجودي غير ساعتين حتى إجى صديقي كوجر ومن عرف مشكلتي بالتفصيل

كوجر/ وربك هسه أروح اسحله الگو ... لو بي خير چان طم بنت اخو العار  أخاف ابلغ المدير ومن يعرف بدل ما يساعدك يدخلك مجلس تحقيقي هسه هاي شلون ورطه

سداد/ لا خلاص عوفها وين ما توصل خلي توصل واني چان الغلط مني مو من احد المفروض تدخل لبغداد وياها قوه أمنية وخليها محبوسه لما يجي كتابنا وكتابكم وعمها الشريف يستلمها عن طريق الشرطه وبكتاب رسمي إنه أستلمها مو اني اتكربس بيها والبلاني بيها اوزجان

وبعدها عافني كوجر واني اوصي بي انه ياخذ بنتي يبرق لبيت خالتي وما يگولون لأي أحد انه أني بالسجن 

كوجر/ وليش انطي بنتك لخالتك ليش أمها وين

سداد/ مو عبالك سألني على امها عبالك خله سچين بگلبي وما گدرت اجاوبه

كوجر/ أعتذر منك هذا شي يخص حياتك الخاصة ومالي حق أدخل بيها هسه آخذ يبرق لبيت خالتك

سداد/ عافني كوجر وراح واني بقيت ذاك اليوم والليل والله ما غمضلي جفن ولأ أكلت ابد في حين فرقد ابد ما قصر ويايه بس منو إله نفس وبعدها على ثاني يوم جايه  ألق ماخذين اقوالها ورجع فرقد دز عليه ومن دخلت يمه

فرقد/ تفضل سداد اگعد اجتي ألق اخذنه أقوالها وهي تأكد انت اعتديت عليها بالضرب

سداد/ سيدي والله وروح أبني اني حتى هي وين ساكنه ما اعرف بعدين اذا رايح إلهم للبيت اكيد أكو كاميرا مصورتني اذا تگلي همه ما عدهم كاميرا اكيد جوراينهم عدهم كاميرات

هنا العقيد فرقد مات من الضحك حتى غص بالضحك وعيونه گامت دمع
فرقد/ أعذرني سداد ما قصدي أضحك عليك بس بيت عمها ساكنين بالحواسم بمعسكر كان سابقاً للجيش وكل بيت بعيد عن البيت الثاني هواي وهمه اكثر الناس بهيچ أماكن ما عدهم ياكلون أنوب ينصبون كاميرات تحچي صدگ انت

سداد/ يعني شنو بس فهمني خلاص السالفه براسي ما منها مهرب

فرقد/ وانت لازم وياك محامي ولو انت على القضايا إلي نرفعت وياك لازم مو بس محامي واحد تحتاج لازم مكتب مال محاماة كامل وياك

سداد/ بوقتها طلبت من فرقد موبايلي حتى إتصل على المحاميه سحر وهو ما قصر طلب من الشرطي سلام ينطيني موبايلي من انطى إلي إتصلت بيها وبعد عناء يله جاوبت عليه وطلبت تجي لمركز الشرطة.... وذكرت اسم المركز  و تقريبًا مر على إتصالي بيها حدود ساعتين ومن اجوي صاحوا عليه انه عندي زيارة أني عبالي المحاميه بس طلعت خالتي مومه وأبنها سردار وخطيه ظلت تبوس بيه وتبچي وتستفسر عن سبب سجني وليش ماكو آريا ويايه

اني بعد ما عندي طاقه أضم اكثر من هيچ  اريد واحد احچيله كل شي وهاي آول مره خالتي شوف دموعي بعد وفاة أبني ايليا وحچيت كل شي إلها ما ضميت كل شي عنها وهي ظلت صافنه على حظي وبعدهم يمي دخلت المحاميه سحر وهي متعجبه ليش اني مسجون ورجعت عدت القصه على المحاميه

سحر/ هاي القضيه مو بوقتها انت عندك قضية زوجتك والحضانه تدري لو تعرف هسه هاي قضيتك ومسجون تاخذ حكم من آول جلسه بحضانة الطفله وتگدر حتى تگول چان يريد يبعني او اي تهمه تلزگها بيك

سداد/ دخيل ربچ والله أعصابي منتهيه وحتى أعصاب ما بقت عندي شوفيلي حل اكو ماده قانونيه شي حتى أخلص

سحر/ گتلك اذا القضية مال هاي البنيه نرفعت محكمة ما راح تخدمنه بشي بالعكس راح صير علينه شوشره لهذا هاي البنيه خلي نحاول نحلها وياها ودي أفضل يا تعرض عليها فلوس حتى تسكت وسقط الدعوه يا الخيار الثاني انه تزوجها

سداد/ شلون أزوجها شنو هي الي جبتها شريفه صارت گح... انوب وحده من ملهى كل عقلچ لو اموت ما أزوجها شبيه مخبل

مومه/ خاله حبيبي آني أروح عليها واحچي وياهم  عسى من اعرض عليهم فلوس يقبلون

سداد/ يا ربي من چانت مضمومه إلي هاي المصيبه واني ما چنت اريد خالتي مومه تروح بس حتى فرقد هم شجع على هذا المقترح  وبعد بيومين اجتي خالتي مومه
ووياها يبرق وبلغتني انه راحت على ألق وعرضت العرض مالتنه وإنه عمها حاچي ويه خالتي إنه أهم طلب عنده إنه استر على بنت اخوه  وطالب مبلغ خيالي بحيث نصدمت من السعر

مومه/ يمه سداد اني ادفعهن وأنت ازوج البنيه وفتره وطلگها

سداد/ لو اموت ما أزوجها

مومه/ أعرف إنه حقك ما تقبل بيها وماكو اي رجال ما يقبل بيها وهسه هذا قدرك بهاي الدنيا

سداد/ بس آني رفضت رفض  قاطع وطلبت إنه يبقون على المحكمه وين ما تصير خلي تصير

وبقيت بعد يومين واستدعاني فرقد وبلغني موضوع بحيث خلاني حاير بزماني

فرقد/ شوف سداد اجى تبليغ من جوارينكم انه بيتك مكسور الإقفال مال البيت ودخلوا للبيت  والعجيب انه البيت كل شي باقي بمكانه ما ماخذين شي من البيت وبعد سحب تسجيل الكاميرات لگينه هاي الي مكسره الإقفال هي آريا زوجة حضرتك

سداد/ بس هي اخذت كل ذهبها وحاجياتها شنو بعد رجعها أو جايه تاخذ شي

فرقد/  اكيد جايه عدها يمك حاجة ومهمه هاي الحاجة النستها يمك مهمه بحيث ما اهتمت إنه ممكن تتهمها إنه سرقت البيت المهم تاخذ الحاجه المنسيه من يمك وگول گال فرقد  هاي الحاجه هي ادانتها بالخيانه لهذا لازم تخفي هذا الدليل الي ضدها يعني بين قوسين دليل إدانتها يمك وگدامك بالبيت وانت ما شفته أبد وضيعت هاي الفرصه الذهبية من أيدك

يتبع/ بكم أكتمل
تحية لكم من القلب الى القلب
دمتم في امان الله وحفظه
أختكم الكاتبة الزهيريه الزهيريه