سداد وبنت ألعرب
البارت التاسع عشر
بقلم الكاتبة الزهيريه الزهيريه
الثقة اصعب شي تجده
وأسهل شي تخسره
ألق/ طبعًا الأنسان من يغلط وتكون عاقبة غلطه وخيمه يگوم يتخبط ومن خوفه من العقاب يذب التهمه على إي شخص في سبيل يخلص نفسه وإني نرعبت من سمعت شنو صاير بعمي نزار يعني ما معقوله من يسلموني اله يبقيني عايشه واشتم الهوى ومن إجى وشافني چان خير دليل وما من الممكن انه اعترف أني نهزمت ويه هيثم لأن هذا غباء بعينه لآن عمي نزار وهيثم نفس الصنف واثنينهم من عصابه وحده يعني عمي نزار يذبحني ويدفني ولا هيثم ولا الاكبر من هيثم يحچون ويا وچانت عندي مشكله براس منو اذبها لهذا شغلت دماغي اذبها براس ذاك الولد إلي چان زين ويايه بأربيل بس المشكله ما أعرف انطق أسمه وإسمه ثگيل ما أعرف الفظه وما معقوله اگول عليه وانهزمت ويا وآني أسمه ما أعرف اگوله
لهذا چان أسلم إلي أنه اذبها براس سداد أولآ هذا أعرف أسمه وثانياً والأهم ما أعرف غيره وهم عمي نزار ما يگدر يسويله شي هذا چان يدور في بالي وقتها إما إلي صار بعدين ما چان متوقع وظل عمي نزار يتهدد عليه
والضابط فرقد/ هسه شنو الأجراء إلي تريد تتبعه بقضية بنت اخوك تاخذها وياك وتسد الموضوع لو شنو تريد
نزار/ لا عيني ما أتحرك منا إلا اشتكي عليه لان مو بس شردت ويا لا باگت مبلغ كلش چبير وراحت ويا وهو اخذ الفلوس منها وهسه رجعها عليه اذبحها هي ويا اذا ما رجع الفلوس وصلح غلطه وياها
فرقد/ هسه خلص قدم دعوه ضده وحاليًا نوجهله مذكرة ظبط وإحضار ولما نحقق ويا ونترفع القضيه للمحكمه وبعدها القاضي هو يحكم عليه مو احنه
ألق/ بيها ظليت ارجف هسه شنو راح أرجع ويه عمي نزار وشنو راح يصير بيه
عقيد فرقد / هسه راح يتم التحقيق وياچ بالبداية أريد أعرف وين رحتوا وشنو سويتوا وانتي هسه بعدچ بنيه بكر لا هذا كله لازم يثبت حتى نقارن بين اقوالچ وأقواله
ألق/ اكدت آنه إني بعدني بنيه ورجعت حچيت كل الصار ويايه بس ما گلت هيثم ولا جبته بالطاري گلت سداد
فرقد/ هسه ثبت أقوالچ هنا لكن فيما بعد اذا ناقضتي كلامچ بكلمه وحده معناها انتي كاذبه ومن حق الطرف الاخر يرفع عليكم قضية تشهير
ألق/ وبعدها وقعت على اقوالي وهنا لازم بعد أروح ويه عمي وطلعنه من المركز وعقيد فرقد يوصي انه لازم يخلي موبايله مفتوح لإن إحتمال يحتاجنه ولازم من يحتاجنه نجي للمركز وأخذني عمي نزار شو ماكو سيارته اخذ تكسي وبعدها ما أخذني على بيتنه لا اخذني على مكان تقريبًا المساحه مال البيت كلها 50 متر وخرابه بمعنى الكلمه يعني ماكو غير غرفتين وصحيات غرفة بيها بس حصيره وفراش ومخده وبطانيه يكرم عن طاري الله الچلب ما ينام على هيچ فراش والغرفه الثانية بيها طباخ ابو 2 عيون كاتله الوسخ وبالگاع مخلي واكو قوري اسود وعلاگه بيها صمونتين يمكن صار 3 أيام من جايبهن لان بادي بيهن العفن صرت احچي ويه روحي واگول هسه يقتلني هنا وماكو واحد يدري بيه
واني بين ذهلتي من المكان وبين ما احاچي نفسي اجتني ضربه على ظهري شوغت روحي للسما ومن التفتت شفت عمي نزار بيده صونده وبده يضرب بيه تكعورت على نفسي وهو يضرب وين ما چان تجي الضربه على ظهري على أيدي على رجلي دماني دمي وما عافني الا هو اختنگ وگام يگح لان تعب بس شنو عافني جنازه بالگاع لا ايد ولا رجل بحيث ما اعرف غفيت ما أدري أغمى عليه حسيت على ايد تهز بيه وصوت وحده
تگول/ لا ما ميته هاي وينها بيها نفس ما اعرف شنو صير منه خلي نجيب عليه الدوريه مال الجيش خاف خاطفها
فتحت عيوني شفتها وحده وياها أثنين نسوان ومن ظليت أون ووحده حچت ويايه گالت / حبيبتي اني جيرانكم كفاح سمعت صوت عياطچ بس ما اگدر ادخل انتي شنو هذا الزلمه الضربچ خاطفچ لو شنو قصتچ
الق / لا خاله هذا عمي
وبعدني ما مكمله كلامي
كفاح/ وخله خاله تخلخل ضلوعچ منين اجيت خالتچ شنو هازه كاروكچ شو اني بعدني كله عمري 44 سنه بعز شبابي والله يا الله
ألق/ اني ما بيه حيل احچي بس جاوبتها انه هذا عمي واني بعد شويه وأصير زينه
وهنه هم شافن ماكو نتيجه من الحچي ويايه عافني وراحن وگوه گدرت أعدل نفسي واگعد وارتچي على الحايط ومر وقت كلش هواي وصارت الدنيا ظلمه واني أخاف اگوم من مكاني بعدها سمعت صوت غمضت عيوني في حين نحمد الله ونشكره على نعمة العقل هي الدنيا ظلمه بعد على شنو مغمضه عيوني ما أعرف بس نفتح ضوه وفتحت عيوني وصار گبالي عمي نزار اني گبل لميت نفسي وتكورت عليها عبالي راح يجي يضربني بس ما ضربني واجى گعد گدامي
نزار/ هسه احچيلي شنو الصار وياچ بدون كذب والفلوس وين وديتيهن ومال اتهمتي الولد الكردي هم ما صدگتچ هسه على السريع گولي منو چان وياچ
ألق/ عمو أخاف احچي واخاف تموتني
نزار / احچي بنت المطي حتى افهمچ
ألق/ وحچيت لعمي كل الصار وذكرت آنه انهزمت ويه هيثم
وعمي نزار ضربني على راسي وهو يگلي بنت المطي هيثم اخذ فلوسي ولچ ادفنچ وآني اگول شلون سافر وينشر صور كله من برشلونه طلع كله بفليساتي ولچ بنت السطل ما لگيتي غير هيثم ولچ هو يسواله نعال
ألق/ عمو والله ما چنت اريد اخذ فلوس بس هو اصر
نزار/ اعتيادي وين يلگه مطيه مثلچ هم أخذ فلوسي وباعچ بنت السطل لو يعيش عمره كله أبو الوسخ ما يشوف هيچ مبلغ مو أنوب يصير اله بس عفيه بيچ تفهمين صدگ تربيتي ما ضاعت بيچ همزين تهمتي الولد الكردي والا چان منين طلعت فلوس لو گايله هيثم چان دفنتچ بالمركز چان منين اخذ فلوس شوفي لچ هسه راح اخذچ للمستشفى ونسوي تقرير أنه هذا الولد الكردي إجى استغل عدم وجودي بالبيت وضربچ وچان راح يموتچ يله گومي دى نروح للمستشفى
ألق/ أخذني عمي نزار للمستشفى ودخلوني للطوارئ وبعد كشف الدكتورات عليه وشافن جسمي مخطط مثل الحمار الوحشي وخطيه ذني الدكتورات عبالهن أني مزوجه وزوجي ضاربني وگعدن يشجعن بيه على اخذي حقچ شلون يضربچ هيچ واذا تسكتين بالمره الجايه هم يضربچ واحتمال تموتين بيده والله انطني طاقه مو طبيعيه واني هم اخذني الواهس وصرت اشرحلهن شلون چنت انضرب يعني خصم الحچي عشت الدور وهنه ما قصرن وكتبن تقرير بيه أنه اني ماخذه ضرب وهذا الضرب چان راح أموت بي واحتمال أموت ومن طلعنه عمي نزار ما ضيع وقت وبوجهه للمركز وقدم شكوه بسداد انه متهجم على البيت في غيابه وضاربني وتهمه مال سداد چانت شروع بالقتل واخذوا اقوالنه ونضمت القضيه مال الضرب الى قضية تغرير بمراهقة ما بالغه وسرقت الفلوس
سداد/ طبعًا أني شگد شفت ناس ما تستحي بس مثل آريا ما شفت آني اعرف هيچ وحده مثلها آنه اكتفيت بس بالطلاگ المفروض تستر على نفسها وتنسحب بهدوء وبعد ما شوفني خلقتها انه زين من عندي سترت عليها بس الظاهر آريا تعبت من التمثيل وظهرت على حقيقتها وهي قلة الاصل فوگ شينه گوة عينه هذا المثل طبقته آريا بكل حذافيره والعجيب وصلني بلاغ عن طريق مركز الشرطة آنه احضر للمحكمه لان مرفوعه عليه قضية طلاگ تعسفي وتريد حضانة بنتي يبرق تخبلت كله ولا تاخذ مني بنتي والمشكله لو ام وحريصه على أطفالها خلي تاخذها بس حمدلله بسببها أيليا جوه التراب وروجيدا بمصحه لهذا من مصلحة يبرق تظل يمي وما تكون بحضانة آريا ومن حچيت عقيد فرقد انطاني شنو ممكن يصير بس ما هذا قدملي نصيحة
عقيد فرقد/ شوف سداد آني اعرف قضيتك وكلها صارت على أيدي وأعرف انت مظلوم بس القاضي ما اله شغل بالحچي عليه بالأدلة واني ما أعرف كل قانون شنو الماده مالته لهذا راح احولك على باحثه إجتماعية وهي ممكن ساعدك لآن القانون بي هواي ثغرات ممكن واحد يستخدم هاي الثغرات وتنگلب القضيه لصالحك بس خلي اگلك من هسه ترى هاي الباحثه كاتبة قصص وتنشر يعني اذا تسمع قضيتك هسه طير من الفرحه كفيلك الله شرك على الحبل وانت گاعد ببيتك لهذا إتفق وياها إنه ممنوع نشر اي شي بدون علمك والا راح تتعرض لمسألة القانونية
سداد / وبالفعل حولي رقم وسجلته وراسلت على الواتساب وبعد المراسلة ساعتين ماكو اجابه رجعت أتصلت ماكو رد ومر حدود 6 ساعات يله لگيت الرقم مجاوب ومن طلبت إتصال وانه اني من طرف عقيد فرقد وافقت وأتصلت وبعد السلام والتعارف شرحتلها قضيتي بأختصار وهي هواي نشدت لكلامي وظلت تسأل وتستحوب وبعدها
الزهيريه/ والله انت قصتك تحير الواحد بس اني باحثه إجتماعية يعني ما أفيدك بشي لازم محامي لأن المحامي يكون دارس كل ماده قانونيه واذا ما عندك محامي أني اعرف محاميه شاطره تلزم قضيتك
سداد/ عفيه رحمه لوالديچ واحد يحولني على الثاني هاي شوكت الگى اجابات لاسئلتي واستفساراتي
الزهيريه/ صدگني اني مسؤوله على كلامي هاي المحاميه ذكيه كلش وتفيدك وما تخسر شي اذا سألتها وأستفسرت منها
سداد/ انطتني رقم محاميه ظليت ساعه اباوع على الرقم إتصل لو لا أخير شي إتصلت وردت عليه
السلام عليكم بلا زحمه انتي ست سحر اني من طرف الكاتبة الزهيريه والعقيد فرقد
سحر / الزهيريه اعرفها بس عقيد فرقد ما أعرفه على العموم تفضل
سداد/ اني شرحت إلها موضوعي بالمختصر
سحر / عيني الكلام بالموبايل ما يفيد وما يفهم اذا تريد تعال العصر اني اشتغل بمكتب العصر ونتفاهم
سداد/ وانطتني العنوان وحددت موعد ويايه على ساعه 6 العصر وآني هم للعصر بدلت ليبرق وأخذتها ويايه ورحت للعنوان المكتب وچان بيت بمنطقة راقيه وهواي بنات يشتغلن بي لهذا سألت عليها بالاسم يله صاحوا عليها وچانت بنيه طبيعيه وسلمت عليها
سحر / شوف أني ما فهمت منك على الموبايل لهذا هسه احچيلي مفصل حتى اعرف أجاوبك
سداد/ حچيت إلها كل شي مر بيه الى ما طلگتها
سحر/ شوف خلي أكون صريحه وياك أولآ الطلاگ التعسفي ترى من حق الزوجه انه تاخذ مضاعف حقوقها وحتى تأجر الها بيت لمدة ثلاث سنوات واما الحضانه فهي بالقانون العراقي من حق الزوجه بس عندي سؤال من طلگتها أكو شهود عليك
سداد/ اي من طلگتها چان بمركز الشرطة وبس ولد ضابط چان موجود هذا الشاهد الوحيد عليه من طلگتها
سحر/ حلو هذا أحلى ثغره أولآ هي من أعترفت بخيانتها إعترافها غير قانوني چان لإن اصلا ماكو چان دعوه عليها لهذا الضابط ما يگدر يجي يشهد وياها لان أصلاً انتوا شنو چنتوا سوون بالمركز لهذا أطمئن لو تطلع نخله براسها ما يجي يشهد وياها يعني نگدر ننكر بالمحكمه آنه أنت أصلًا ما طلگتها لهذا راح تتخبط ما تعرف شلون تثبت للمحكمه انت طلگتها تعسفي لهذا راح أستغل هذا الشي ضدها بالحضانه يعني الغبيه حفرت گبرها بيدها لهذا اريد منك تنطيني وكاله خاصه حتى أستلم القضيه
سداد/ سويت وكاله خاصة إلها وطلعت من يمها وآني نوعًا ما مرتاح وبعدها توجهت للبيت واني اباوع على كل ركن بي هذا البيت الشهد ولادة أطفالي وضحهم ومن شويه شويه يكبرون وحبي لزوجتي صرت اكره حتى حياطين البيت وقررت بس أخلص من المصايب العندي اطلب نقل شغلي لأربيل لإن كرهت بغداد وأني صار الليل طلبت دليفري واكلنه آني ويبرق وبعدها أخذتها يمي ونمنه لان صارت روحي بيبرق أخاف تبعد عني لا يصير بيها مثل إخوتها
وعلى ثاني يوم گعدت على صوت الباب يندگ وألي يدگ الباب عبالك يريد يكسره گمت على السريع فتحت الباب صار بوجهي ملازم آول بالشرطة ويا 2 هم من الشرطة وشوفني مذكرة ضبط وإحضار بحقي وما أعترضت بس طلبت منه أدخل أبدل وأطلع اله وهو ما حچى شي بس طلب السرعه
واني دخلت ابدل وأتصلت على كوجر وطلبت منه يجي ياخذ يبرق يمه وهي چانت بعدها نايمه وطلعت ويه الدوريه ومن وصلت للمركز دخلوني يم
عقيد فرقد / والله يا سداد ليش ما تجي تعيش ويايه بالبيت لان ما شاء الله صرت اشوفك أكثر ما أشوف أهلي على العموم انت البنيه إلي جبتها تاهمتك إنه انت غررت بيها وبعد ما أنت وياها سرقتوا فلوس عمها
سداد/ صدگ متت ضحك سيدي انت تحچي صدگ والله اني حتى ما أذكر شكلها لان ما ركزت عليها ولا حتى أذكر اسمها ولا اعرف هي منو بعد شلون نهزمت ويايه واخذنه فلوس عمها ولما صديقي اوزجان والله ولا اجيبها اني شعليه واذا تريد واجهني بيها والملهى إلي جبناها منه موجود وكل شي موثق لا أعرفها ولا تعرفني وأني بيومها بلغت على وفاة أبني وعمها چان دى يبلغ على عدم وجودها هي اني چنت بالمركز بعد شلون چنت وياها
فرقد/ والله كاكا سداد هي طلعت ما مختفيه بنفس يوم التبليغ لا قبل يومين مختفيه
سداد/ هنا تخبلت يعني شنو خلاص ركبت السالفه كلها براسي آني اعرف واحد يخونه ألحظ بموقف وأحد مو كل موقف ولا الثاني راح اتخبل گمت اهذري بالحچي آخرها أتصلت باوزجان وظليت اسب وأغلط عليه وفرقد يعدئ بيه بعدها سألني/ سداد انت البارحه وين چنت ما بين الظهر والعصر
سداد/ والله سيدي ما أذكر وين چنت بالتحديد
بس بقت اجابتي مجهوله وهاي اجابتي خلتني مصدر الشك الأول
فرقد/ والله سداد اني ما أعرف شنو اگلك بس انت الحظ معدوم عندك لآن ألق من البارحه بعد ما أنت ضاربها ناقلها عمها للمستشفى ومنطتها المستشفى تقرير بحالتها وأنت هسه متوجهتلك تهمة ( شروع بالقتل ) لهذا راح يتم احتجازك الى ان تنرفع القضيه للقاضي وبعدها نشوف شنو يحكم وتگدر تطلع منا بكفاله
يتبع/ بكم أكتمل
تحية لكم من القلب الى القلب
دمتم في امان الله
اختكم الكاتبة الزهيريه الزهيريه