سوف تعود إليّ مجدّداً بعدما يؤلمون قلبك أعدك بذلك 🖤
نمت يم زهراء ساعة ب٨ اله ربع كلت لزهاء كعديني
بل ٩ لأن المحاضرة تبدي بل٩ ونص نمت وفزيت
بل ٩ وربع ملكيت زهراء يمي كمت ركض عل باب
مبقى شي على المحاضره افتح بالباب مقفولة كمت
ادكك حيل عل باب واصيح زهراء
شجون.. زهراء زهراء
سمعت القفل مال باب الغرفة ينفتح وخرت من الباب
أمير فتحها للباب
شجون.. أمير راح اتأخر عل محاضرة راح ابدل بسرعة
طلعت جرني من ايدي حيل
أمير.. يامحاضره باب البيت متعتبيها
شجون.. أمير فدوه لاتسوي هيج مشكلتي وياك معليها
بالجامعة
أمير.. كتلج ماكو محاضره وانسيها للجامعة اصلاً
كمت ابجي واتوسل بي بس خلي اروح امتحن وانته
وصلني وانته جيبني مقبل
أمير.. يلا صعدي بالغرفة لاتبقين هنا
جرني من ايدي صعدني للغرفة شمرني وقفل الباب
كمت الطم مادري اني شمسويه وهيج تعاقبت بأمير
مادري شسوي طلعت حركتي بالملابس شمرت
كل الملابس بالكاع مخليت شي بالكنتور هذا كله
واحس قلبي ناره مطفت كمت اهلس بشعري ماعرف
شسوي حسيت بذاك اليوم اخر يوم اليه
سمعت الباب انفتحت شفت أمير وبيده صينيه مال
ريوك ضل صافن عل غرفة
أمير.. عود شنو الاستفاديه من سويتي هيج
مجاوبته اباوع عليه ودموعي موكفت
أمير.. تعالي اكلي يلا
شجون.. أمير الله يخليك المحاضرة راحت عليه والله
ماسوي شي ولا احجي شي بس اروح للجامعة اليوم
عندي امتحان
أمير.. استغفرالله رجعنه لسالفته الصخام كتلج ماكو
اعتبري نفسج من اليوم مبطلة
شجون.. زين مبطلة ليش قافل عليه الباب شنو اني حيوان
أمير.. افتح الباب بعد ما الكاج بالبيت
شجون.. أمير انته لاتحبني ولا تريدني بس دتسوي هيج دتعذبني هم يجي يوم ويصير عندك بنيه والله
يطلع سوالفها بيك
ركع الصينية وطلع وقفل الباب واني مادري شسوي
ردت انفجر واموت دكيت على لارا وسولفتلها كلشي
لارا.. لج انهزمي واني اخويه محامي اخلي يتكفل
بكلشي اذا بقيتي يم أمير تموتين
سديت الخط من لارا مادري شسوي اذا انهزمت شيكولون على أمير بس ماكدر ابقى اكثر من هيج
طاقتي خلصت ضليت ابجي لحد منمت
فزيت على غصون تكعدني
غصون.. كومي اكلي جبتلج الغده
شجون.. اخذيه وياج ماكدر اكل
غصون ضلت تباوع عليه متعرف شتحجي
غصون.. ليش مسويه بالغرفة هيج هسه اذا شافج أمير
هم يصير عصبي ويضربج
شجون.. خلي يجي يضرب تعودت
كعدت على جرباية غصون
غصون.. شجون ليش متنهزمين وتخلصين منا
شجون.. لو بيدي هسا انهزم بس متشوفين حابسني
هنا
غصون.. اني أكدر اساعدج
شجون.. اتساعديني لو هاي خطة من ام أمير
غصون.. لا والله بس انتي دافعتيلي ذيج المره واني
أريد اردها الج
شجون.. يي وشلون تساعديني
غصون.. المفتاح مال غرفة يم ام أمير أكدر أخذه
وافتحلج الباب
شجون.. وهاي شوكت
غصون.. باجر من أمير واخوانه يطلعون من الشغل
شجون.. شوفي غصون ماريد اكرهج دتحجين صدك
لو هاي اتفاقية
غصون.. لا والله بس اذا انتي معاجبج بكيفج
شجون.. لعد باجر انتضرج من يطلع أمير
غصون.. يي اني اصعد وافتح الباب
نزلت غصون بس اني مواثقه بيها بس كلت عسى ولعل
تطلع مو مثلهم
كمت اخذت الجنطة وحطيت بيها ملابسي والملازم
والمستمسكات مالتي
وحطيت الجنطة جوه الجرباية وكعدت اكلت شويه
وكمت غسلت وكعدت
صارت مغرب كمت للحمام تكرمون غسلت ولبست
طلعت لكيت أمير كاعد على جربايه باوعلي ورجع
يباوع بالتلفزيون
شفت الغرفة عبالك مضروبه هاون
نشفت راسي ولميته وجمعت الملابس بمكان واحد
وكعدت اصفط بيهن ضهري انكسر رجعتهن لمكانهن
وفرشت بالكاع وتمددت ضليت اتكلب لحد منمت
فزيت على صوت الكنتور شفت أمير ديطلع ملابسه
سويت نفسي نايمه غسل وبدل واتعطر وطلع
قفل الباب وراح كمت اني ركض طلعت الجبة والشال
وحطيتهن بصفي وكعدت سمعت صوت السيارة مال
أمير طلعت من البيت بقيت كاعدة واكل بنفسي
واكول غصون الجذابة ضحكت عليه تقريباً وره خمس
دقايق الباب انفتحت شفت غصون
غصون.. يلا لبسي بسرعة
لبست الجبة وحطيت الشال على راسي وأخذت الفلوس
الي جنت اجمعها أمير ينطيني فلوس للجامعة جنت
ماصرف اضمهن نزلت من الدرج على كيف
طلعت للكراج فتحتلي الباب غصون وطلعت
ممصدكه احس روحي اتحررت كمت اركض للشارع
العام مادري وين اروح
اجرت تكسي وانطيته عنوان الدار اني بالسيارة واحس
أمير راح يشوفني وينزلني ويرجعني للبيت وصلت
للدار انطيته الكروه ونزلت شفت الحارس كاعد
شجون.. مديرة الدار موجوده
الحارس.. لا والله هسه خمس دقايق وتجي ليش بنيتي
محتاجة شي
شجون.. لا عمو ماكو شي بس اني جنت هنا بالدار واجيت اسلم عليها
الحارس.. هسه تجي بنيتي انتظريها
ضليت واكفه لحد مجتي مديره الدار ( الي اصيحلها
ماما)
نزلت من السيارة شفتها مكدرت اسكت كمت اشهك
اجتي سلمت عل حارس وشافتني بسرعة اتذكرتني
حضنتني واني مكدرت اكتم انفجرت
المديرة.. شجون بنيتي ليش متسئلين عليه نسيتني
بسرعة
مكدرت احجي من شهكاتي اخذتني بالدار انطتني مي
وكعدت كبالي
المديرة.. شبيج شجون هاي ليش هيج حالتج
سولفتلها على كل شي
شجون.. ماعندي مكان غير الدار اجيت هنا
كامت حضنتني وكالتلي هنا تبقين مطلعين بعد واشوف
شلون ميطلكج
شجون.. ماما شتريدين اسويلج بس ماريد ارجع يمه
المديرة.. لج اشلون اخليج ترجعين بيده كومي خلي
اوديج للغرفة ترتاحين
اخذتني للغرفة بيها سراير كبار للبنات الي يباتون بالدار
جان اكو ٣ بنات نايمات
المديرة.. روحي نامي ارتاحي ومن تكعدين اني اوصي
البنات عليج ميتعبنج
بستها من راسها ورحت عل جرباية
طلعت تلفوني من الجنطة وقفلته ونمت واول نومه
ارتاح بيها
كعدت على صوت الجهال
طلعت من الغرفة لكيتهم ديتركيون الكل باوع علية
انصدموا
اجتي المديرة وكالت
المديرة.. هاي شجون اختكم الجديدة مو تضوجوها
ديرو بالكم عليها ولاتعبوها
الكل كال صار ماما
كملو ريوك وغسلوا واجوي يسلمون عليه كلهم مكيفين
لأن اني صغيره لأن كل المساعدات كبار
جنت ضايجة بس من شفتهم نفستي حسيتها صارت
احسن
كمت لميت وياهم الريوك وعدلنا الجربايات
ودخلوا البنات سبحوهم طلعن البنات سئلت الابنية
كتلها
شجون.. شلون راح تسوين شعرهن
الابنية.. ضفيرة
شجون.. بس ضفيرة
الابنية.. يي انتي تعرفين تسوين فيكات بالشعر
شجون.. يي
الابنية كالت لكل البنات يجن عليه اسويلهن شعرهن
سويت بشعر الابنيه فيكه كلهن عجبنهن ورادن مثلها
سويتلهن وحده وحده كيفن
ياهيه التشوف شعرها تجي تبوسني وتروح
اتعرفت عل بنات وهنه هم عرفني
سارة.. عيني شجون انتي بعد اختصاصج الشعر
شجون.. تمام
رحت على المديرة
شجون.. ماما خاف يجي يسئل عليه كولي مجتي
هنا
فهمتها وطلعت فتحت التلفون لكيت التلفون محترك
أمير وزهراء وسهام حاركيه للتلفون مكالمات ورسايل
حضرتهم ودكيت على لارا وكتلها على الصار
لارا.. هسه ادزلج رقم اخويه محامي دكيله
دزتلي الرقم سجلته ودكيتله ارتبكت بس كلت هاي هيه لهنا وانتي ماتحمل ابقى وياه
دكيت وجاوبني وفهمته وكال تعالي للمكتب مالتي
خلي افتهم منج
ولهنا وصلنه لنهاية البارت مو تنسون التصويت والمتابعة باااي 🤍