سداد وبنت ألعرب
البارت الخامس عشر
بقلم الكاتبة الزهيريه الزهيريه
لا تفعل المستحيل لشخص
لم يفعل الممكن لك
ألق/ طبعًا كارثه من تكون ما تفهم على المقابيلك شنو يقصد بكلامه واني بحكم بيئتي طبعًا الغباء يمي يگوم يطلم بوقتها من گلي غزوان على استقبال الزبائن قبلت لان هذا چان باعتقادي إنه اخف من الختيارات الثلاثة الأولى ورجعوني للغرفة ومن دخلت اول شي أنتبهت عدم وجود ورده وثانيًا انه گبل نقفل عليه الباب من بره وبصراحة خفت على نفسي وعلى ورده لان خطيه هي من النوع الفقيره وعلى نيتها إضافةً هنا آي نوع غلط يكلفك حياتك
رجعت دگيت الباب وبقوه ماكو جواب وظليت اعيط بعلو صوتي وأصيح على جميله حتى تفتحلي الباب
وبعدها سمعت صوت جميله وهي تفتح الباب وتگول / وجع وقزرقط شكو شبيچ صمين ك.... وصيحين
الق / وين ورده ليش اجيت ما لگيتها
جميله/ حبيبتي ورده طلعت على باب الله شنو ناخذ منچ الأذن يله نطلعها
ألق/ غير هي شغلها مثل شغلي لو شنو شغلها
جميله/ شوفي حبيبتي هنا كلنه تحت إمرة غزوان شيگول نفذ وهو يحدد كل وحده شنو شغلها وطالما شغلها غير شغلچ يعني بعد حتى مستحيل تلتقن انصحچ إنه تنسيها
ألق/ اني بس متعجبه إنتوا شنو من گلب عدكم من تبيعون بنات الناس هسه همه زلم إنتي مره ما تگولين خطيه بنات من يصير بيهن هيچ گدام عينچ ما يعذبچ ضميرچ
جميله/ شوفي حبيبتي اني قبلچن صار بيه هيچ قبل كم سنه چنت مزوجه وعندي ولد وبنيه بس زوجي يشرب ويضربني ويضحك عليه الناس وربچ التسوه والما تسوه تضحك عليه اني چنت متحمله وساكته وكله لخاطر عيون أطفالي بس اني حالي حال اي مره مزوجه تريد تحس بحب زوجها بعنايته بحنيته چان يشتغل ويقبض فلوس وكلهن يصرفهن على ملاذته وآني وأطفالي نتحسر على اللگمه والله چنت اني واطفالي ما شابعين خبز بعدها صار مدمن مخدرات هنا صارت الطامه الكبرى يعني عنده استعداد يخلي الزلم تنام ويايه في سبيل يحصل على كم فلس يتعاطى بيهن او يشرب عرگ والى ما چان اكو واحد يطلبه فلوس والله من شوفي تصلين على ذياله من گد ما وجهه يشع أيمان وتقوى ومن چنت اطلع اله للباب واگله زوجي ما موجود ما يحچي شي بس يسلم عليه ويروح بعدها صار يگلي اني ما اجي على الفلوس أتمنى إنه زوجچ ما ينطيني الفلوس حتى آجي أشوف وجهچ الحلو بعدها طورت علاقتنه وصارت حب بعدها شجعني حتى اشرد ويا من زوجي واني هم چنت غبيه مثلچن وشردت ويا وهم باعني لعصابه ويكون بمعلومچ هاي عصابات يخلون الشباب يصادقون بنات وبحجة الحب والزواج يسحبوهن من اهلهن ويبيعوهن بأربيل المزوجه يبيعوها گصابه والبنيه بنت بيت هاي ياخذوها خوش بيها شغل
ألق/ گصابه شنو
جميله/ أني گدامچ من استلموني لكوني مزوجه اخذوا مني كليه لعد انتي مصوره المستشفيات بأربيل شلون يگلولچ اذا ما عندچ متبرع بكليه احنه عدنه كليه ويحسبون عليچ الكليه بذاك الحساب وهمه ماخذيها من ذني بنات الخايبه وهاي آني گدامچ أخذوا كليتي وچانوا ناوين يبيعوني تفصيخ بس ربچ خلالي استاذ غزوان بطريقي وهو طلب منهم يعوفوني لأن يحتاجني ويا
ألق/ اني لليوم عقلي ما يصدگ انه هيثم چذاب ونصاب وباعني انتي تدرين كم مره اجه خطبني من عمي
جميله/ أصلاً هاي العصابه وين ماكو بنيه الظروف كلها ضدها وما عدها أحد حتى من يبيعها ماكو احد او اهل يطالبون بيها وثانيًا نزار وهيثم اثنينهم من نفس العصابه وكل واحد اختصاصه شكل وعمچ من ما قبل ينطيچ لهيثم لإن نزار يعرف شنو شغل هيثم يعني لو نزار موافق ينطيچ لهيثم اي شي يسوي بيچ هيثم ما مسموح لنزار يعترض شوفي بعد حياتچ وحاولي بكل جهدچ إنه تتعاونين ويه غزوان لأن غزوان حوصلته صغيره يتحملچ مره مرتين أكثر من هيچ ما يتحمل فهمتي انصحچ ركزي على غزوان
ألق/ بعدها عافتني جميله واني ما أعرف شنو راح يكون مصيري وأتسأل يا ترى شنو سووا بورده ويا ترى اني بداخل أربيل لو بعدني ما داخلتها وما أعرف شگد مر وقت واجوي عليه انه راح إنتقل بغير مكان واني رحت وياهم وأتلفت بكل الأماكن عسى أشوف ورده بس أملي خاب صعدت وياهم بسيارة مظلله وصلوني بمكان تقريبًا شبه اگول بستان جنه المكان حلو بشكل من أشجار وجو نقي وصار گدامنه بيت حلو وهذوله الشباب چانوا ويايه بالسياره فتحوا القفل مال الباب ودخلنه واكو هواي بنات بعمري وأكبر مني وأكو أصغر مني وكل وحده قصتها شكل وهن انتبهن عليه وبعدها كل وحده نصرفت لحالها
اما اني بس دخلوني رجعوا گبل قفلوا الباب هنا چان عالم مختلف كل وحده گاعده جهز بالثانيه وسألتني وحده عن أسمي وهي انطتني اسمها
ولاء / أنتي هنا راح تشوفين بنات من كل الأجناس اني هنا مسؤوله على الكل أنتي هنا شنو شغلچ گالولچ
ألق/ اني غزوان
ولاء/ قصدچ أستاذ غزوان من تحچين عن اسيادچ احچي بإحترام
ألق/ الأستاذ غزوان إتفقت ويا إنه أكون بالمطعم باستقبال الزبائن
ولاء/ هااا علم هنا اكو بنات يجهزنچ وراح تبقين لما يطلب أستاذ غزوان حضورچ فهمتي
ألق /بوقتها صاحت على بنات أثنين وبلغتهن انه اني على شغل المطعم ولازم يرتبني واكو وحده طلبت مني أدخل للحمام ومن دخلت شو هاي دخلت ويايه باوعت عليها مستغربه وگتلها عيني ترى أعرف أسبح ماكو داعي تدخلين ويايه
گالت / إسمي طيبه هذا شي والشي الثاني اني ما دى اسبحچ لا دى أنظف جسمچ من الشعر وبعدها تقشير لبشرة الجسم والوجهه وتستلمچ بعدي إسماء
ألق/ ومن ظليت احچي عليها وصوتي صار عالي اجتني وحده الله لا يكذبني يمكن طولها 180 سم ووزنها أصور 150 كجم بحيث من شفتها رجعت 10 خطوات الى الوراء وشلون صاحت بيه صوت واجتني صلختني براشدي فرت وجهي فر وهي تگلي / لچ هنا ماكو صوت يعله فوگ صوتي انتي هنا شغلچ گح... شنو جايه صيرين شريفه براسنه يله طيبه شوفي شغلچ واذا نطقت حرف واحد بس صيحي عليه وشوفي اذا ما خليتها تبوس قنادر وعافتنه وطلعت ورگعت الباب قوي وراها
وبعدها بدت رحلة تنظيف الجسم وهاي آول مره بحياتي هيچ تنظيف احس جسمي يحرگني وصار أحمر گمت ابچي بعدها ما أعرف اشكال تخلي مستحضرات على جسمي وما خلصنه الله لا يكذبني يمكن بعد 4 ساعات ورجعت طلعتني على إسماء هاي حفتلي وجهي وشمرت الحاجب وهم رجعت تحير شنو تخلي على وجهي وفتحت شعري وهو بعده رطب سرحته ونشفته بالشسوار
اسماء/ شعرچ يجنن لونه اسود قاتم وسرح وعيونچ سود سوادهن غامق وبشرتچ بيها طخه ما سمار عبالك هنديه شنو عندچ ابوچ او امچ من الهند هسه شعرچ ما راح أسوي بي شي بس اعدله من جوه واسويلچ گذله واسوي بي خصلتين لونها ذهبي وبس
الق / هذا الوقت كله هي تحچي واني ما اجاوبها وبالفعل سوت مثل ما گالت ومن كملت طلبت مني أشوف نفسي بالمرايه والله ما عرفت نفسي أبد بس هذا كله في سبيل اصير عاهره وظليت أفكر ويه نفسي شلون أخلص منهم يعني أني شنو مصيري عدهم أحسن حل انهزم منهم من المطعم وبعد ترتيبات السوهن الي متت تعب بحيث بس جابولي آكل گبل أكلت شويه وذبيت روحي مثل الميته ولا حسيت على الا لمن مي ثلج صار عليه فزيت صارت گدامي هاي الضخمه الضربتني بالحمام وصوته قبيح صدگ أنكر الاصوات لصوت الحمير وهي نحمد الله ونشكره صوت الحمار احلى من صوتها گالت صحي النوم اليوم تروحين للمطعم طلبچ أستاذ غزوان بالاسم
گمت غسلت وجهي وهاي الضخمه واگفه على راسي حتى أسناني جبرتني افرشهن وجابتلي ملابس وصاحت على طيبه تجي ساعدني حتى ألبس ولبستني وتعدل بيه وسالت طيبه هاي الضخمه تجهزني جاوبتها هاي الضخمه بصوت قوي لا همه هناك يجهزوها احنه شعلينه وطلعوني وصعدوني بسيارة وما چنت وحدي اكو بعد ويايه 3 بنات وانطلقت بينه السياره للمطعم الي من وصلت اله ما طلع مطعم طلع ملهى ليلي
سداد/ كل شي چنت انصدم بي وبذيچ الفتره صدمه وره صدمه تجيني يعني معقوله هاي حياتي كلها چانت وهم وچنت عايش بكذبة كبيره مال عائلة واطفال يعني شنو حياتي چانت الى هاي الدرجه هشه بحياتي بأول نسمة هوه طار كل شي وانهدمت حياتي وصفيت كل شي ماكو من واجه عقيد فرقد آريا بام بسام كل وحده متمسكه بأقوالها يعني المن صدگ وعقيد فرقد چان مصدگ ام بسام اما آريا چان مقتنع ميه بالميه كذابه ودگ جرس ودخل سلام واني استأذنت منه أروح وحلفته انه من تتوفر عنده تسجيل الكاميرات أريد اشوفهن وطلعت من عنده ورحت للبيت
فرقد/ أبني سلام أريد تسجيل الكاميرات البيوت الموجوده حول بيت سداد أرفعوا طلب لهيئة المحكمة اوقع عليه واريدك أنت بنفسك تاخذه للمحكمة ويوقع عليه القاضي وتنطي لنقيب مهند فهمت هذا انتهينه منه آما عم هاي البنيه التبخرت ما اعرف وين راحت شنو سويتوا ويا اگلك خلي يجيني نقيب مهند أحسن
بعد دگ التحية مهند / سيدي عم هاي البنيه ينكر إنه قتل البنيه ويگول نخطفت
فرقد/ نقيب مهند تحچي الصدگ انت ليش انت بعدك تسأله ويجاوبك لا اريده يتعلگ وينضرب فلقه بحيث اني جوه هنا بمكتبي أسمع صوته ما اعرف أريد يگول البنيه وين راحت شسوا بيها وزوجته القيتوا القبض عليها لو بعدكم
مهند/ اي سيدي بالتوقيف مال النساء سيدي تحقق وياها
فرقد/ لا النسوان احلى شي تلعب باعصابهن ما أحقق وياها هاي الأيام اخليها تسوي على نار هادئه إضافة تهديد بالتعذيب اذا ما اعترفت اخليها من استجوبها گبل تنزل التانكي وتعترف على كل شي واريد وحده من الشرطيات العدنه الما معروفات تنزع الزي مالتها وتلبس لبس عادي على أساس هي مسجونه وتگعد يمها وظل ترعب بيها على طرق التعذيب العدنه في حالة ما أعترفت وبعدها أجيبها يمي واخليها تعترف فهمت يله هسه أريد منك سوي الطلبته منك
سداد/ مر على حادثة أبني 40 يوم واني بعدني كل شي ما فهمت ولا وصلت لشي وبعدها ما طلب العقيد فرقد تصوير الكاميرات باسبوع بلغني أنه بامكاني أجي أشوف التسجيل الكاميرات وبالفعل رحت ومن دخلت لمكتبه وهو بده الحديث
فرقد/ والله سداد يعني ما أعرف شگلك آني اعرف إنه غلطة الشاطر بألف ألا مثل هيچ تخطيط ماكو سحبت تصوير كاميرات 3 بيوت تسجيل كاميرا البيت المقابيل بيتك وتسجيل كاميرا بيت على يمينك هو بيت ابو بسام وكاميرا بيت على يسار بيتك موضوع إنه طالعه ويه ام بسام صحيح وانه مرتك جايه على ام بسام صحيح لان كلهن مراجعهن ابو بسام قبلنه والرجال مصدگ انه زوجته ماخذه زوجتك للساحره ما أدري للعلويه ما أعرف شيسمنها النسوان وطبعًا اكو غلط كثير من النسوان يوگعن بي وهي من تطلع ويه وحده لسوگ ما تگول لزوجها انه راح تروح ويه فلانه لسوگ شوفها مسأله طبيعيه بس بعدين توگع بشر ما تعرف شلون تطلع منه أبد يعني آم بسام من طالعه ويه زوجتك ما مبلغه زوجها أبد لهذا من شاف التسجيل الكاميرا وشايفها طالعه ويه زوجتك يگول هاي تلگاها سوي اشكال ألوان واني ما أدري وحالف يمين أعظم بعد ما ترجع على ذمته
اما بيتك ماكو احد يدخله غير وحده مبوشه وساعه 12 بالليل وهاي شسوي يمكم ما اعرف وليش تجي بنص الليل وما تجي بالنهار هاي إجابة الاسئلة كلها يم زوجة حضرتك وخلاني افور وانطفي بوقتها جاوبته
سداد/ سيدي يصير اجيب زوجتي تستجوبها على التسجيلات أريد كل أقوالها مثبته عن طريق الحكومة
فرقد/ شوف هي أصلًا بعد ما أنطى الطب الشرعي تقرير نهائي أنه الطفله هي قتلت أخوها بعد المفروض تنسد ملف القضيه على هذا الشي بس اني هاي من يمي دى أحقق لان أريد أعرف السبب شنو الي وصل الطفله لهاي الحالة وانتبهت انه زوجة حضرتك چانت تروح سوي سحر على اساس عندك ضعف جنسي يعني هذا الشي وگف عقلي شلون عندك ضعف وشلون عندك 3 أطفال ذوله منين اجوي شنو حضرتك عندك ضعف جنسي من اول ما ازوجتها لو بعدين اجاك الضعف لو شنو
سداد/ وحچيتله كل شي وانه ضعف اجاني من فتره
فرقد/ هذا فلم يعني العلويه هي الداء والدواء بهيچ حاله لازم بعد نجيب العلوية نفسها وهاي العلوية ماكو أحد يعرفها غير زوجة حضرتك جيبها باچر حتى استجوبها آني متاكد اكو بعد حلقه مفقوده من نلگى هاي الحلقة راح يتضح كل شي بين (اذا عرف السبب بطل العجب)
سداد/ وعدته على ثاني يوم أجيبها حتى أعرف شنو چان يصير وراء ظهري طلعت وكل يوم أتخبط أكثر ما آني متخبط بحياتي وعلى ثاني يوم طلبت منها انه تجي للمركز حتى ثبت أقوالها على ام بسام وتوقع ونرجع لهذا قبلت تروح ويايه لان من المره السابقه من تواجهت هي وام بسام گامت متقبل تطلع ويايه ومن وصلنه دخلت دخلت وأني وياها وبده عقيد
فرقد / بلا زحمه اخت آريا بدون مقدمات أني سحبت تسجيل الكاميرات القريبة على بيتكم ولاحظت بكل التسجيلات أنه أكو وحده مبوشه تدخل يمچ ساعة 12 بالليل وبعد ساعة تطلع ممكن أعرف هي منو
اريا/ هاي علوية چنت اجيبها ترى تسوي عمل لزوجي لان سبق وأن ذكرت انه عنده ضعف جنسي
فرقد/ هاااا هذا سمعته منچ سابقًا أريد عنوان العلويه نفسها او حضرتچ جيبيها انتي
آريا/ مستحيل شنو اورط العلوية بهذا الموضوع اكيد زوجها يذبحها وينهجم بيتها لو أعرف انسجن ما اگول عنوانها خطيه چانت سوي خير ويايه هيچ اجازيها
فرقد/ صحيح لازم ما تگولين هي منو حضرتچ تخافين الله وتخافين من هجمان البيوت والخير السوته وياچ العلوية اخذت ثمن الخير ملايين خوش خير هذا دليني اني هم على هذا الخير حتى أسوي لان بي ملايين وخطيه انتي مستقتله على مود العلويه لا ينهجم بيت العلوية بس عندچ عادي هجمتي بيت المسكينة ام بسام لهذا لازم اجازيها أحسن مجازات للعلويه بس تعرفين ليش انتي مستقتله على العلويه لإن العلوية مالتچ رجال وهو صاحب البصمات
يتبع/ بكم اكتمل
دمتم في امان الله وحفظه
تحية لكم من القلب الى القلب
الكاتبة الزهيريه الزهيريه