تبسمت كي ميزت صوت اللي عيطلها ودارت
لميس : وش كاين اختي العزيزة ؟؟
قربت ميرا من لميس وحكمت ذراعها بقوة تحكي بغل : لميس راكي تحوسي على موتك نتي اقسم بالله نخليك تندمي على النهار اللي خممتي تتحدايني فيه وتقبلي تتزوجي بيه والايام بيناتنا مالا عسي روحك مليح
جبدت لميس يدها من يد ميرا : شوفي نقلك انا جامي قستك في حياتي ومانقيسكش بصح الله غالب ضك مجبورة ماعندي مانديرلك الزواج اللي راكي محروقة عليه انا اخر همي وماعندكش حق تلوميني على حاجة ميش غلطتي لومي روحك نتي اللي ماتدافعيش على حقك مره ومدايرة من روحك ألة تنفذي غار الاوامر مالا اقعدي نفذي حتان تبوري ولا يزوجك من واحد قدو في العمر ولا اكثر منو
هدرت كلماتها بهدوء ودارت للدروج هابطة مدت ميرا يديها رايحة تدزها من الغل والكره اللي تحس بيه اتجاهها بصح منعتها يد قوية حكمتلها يدها وغلقتلها فمها وسحبتها لبلاصة اخرى
هبطت لاخر درجة لقات اللي يتسمى باباها يستن فيها وعلى وجهو ابتسامة فرح ونصر حست لميس انو كون جا عندو جنحين كون طار
لميس بسخرية : هه حاجة باينة تتبسم خاطر وصلت للي تحبو ورايح تزوجني باش تدي وش تحوس وترميني كي الزبالة لحضن رجل اوخر مالغري بنتك من لحمك ودمك ماكنتش متوقعاتك بهاذ الحقارة
تبسم باباها بعصبية وهو لاز على سنيه وهمسلها في وذنها اللي يشوفو يقول راهو فرحان يشوفهم احسن اب وابنة
سامر : لسانك ياااا طفلة
قلبت عينيها وجات ماشية للقاعة بكل ثقة حبستها يد سامر اللي حكمها من ذراعها وجرها ليه بقوة
سامر : في خاطري نرسم صباعي الخمسة على وجهك القمر هذا بصح ميش حاب نسلمك لراجلك بكدمات
كان شاد على ذراعها بقوة حستها قريب تنصل بصح بقات محافظة على ثباتها مالغري الوجع اللي تحس بيه رخف يديو كي شاف سراج ماشي بجيهتو جاي ليه
رسم سامر ابتسامة مزيفة على وجهو وهبط الطرحة على وجهها اللي كانت مشبكة خلاتها متشوفش مليح وشدها من يدها مدخلها للقاعة مع دخلو بدا الغنا والعينين كامل توجهو ليها يشوفو فيها في قمة الجمال والاناقة مالغري الروبة سامبل مي واتاتها بزاااف بدات نبضات قلبهاا تزيد خايفة وهي تقدم بخطوات بطيئة خلات من ادم يتشوق يشوفها
واقف بقوتو وهيبتو وهندامو الللي زادو كاريزما بلبستو الرسمية النوار ونظراتو الحادة وملامحو المتبسمة وعلاش مايتبسمش وهو يستنا في هاذ اللحظة من وقت ماشافها / وجد كلشي بنفسو وعلى ذوقها هي كانت القاعة مزينة بالورد اللي تحبو هي والالوان اللي تحبهم هاذا هو العشق وش يديير
مشا ليها بكل فخر ورجولة تبسم باباها كي مد ادم يدو للميس هزت عينيها ليه بصح ماقدرتش تشوفو مليح ولا تميز ملامحو بسبة طرحتها فاجأها كي هبط وباس يدها بحنانة خلا جسمها يرتعش شد يدها مديها معاه للطاولة وين يعقدو
وقفت بجنبو بصعوبة حاكمة في يدو بقوة عقد حواجبو مستغرب دارتلو بيدها هبط خاطر كان فارق الطول والحجم باين بيناتهم هبط لمستواها يسمعها وش تهدر
لميس بهمس : باش يكون في علمك تزوجتك مصلحة ماشي حبا فيك مالا ماكان لاه تشقي روحك تعاملني بلطافة وحنانة وبوسة اليد خاطر ميش رايحة نتأثر
زاد انحنى شوي لمستوى وذنها وزاد شد بقوة على يدها باش يخليها تستوعب هدرتو وهمس بنبرة خلاها ترجف
أدم : باش يكون في علمك تزوجتك حبا وماعندي حتى مصلحة معاك من غير انك رايحة تولي ليا ونخبيك ع العالم جوهرتي
تمكن الخوف منها ومن هدرتو بعدت عليه ووجهت النظر تاعها للجيهة لخرا اما الضياف كانو يشوفو فيهم باعجاب وكاين اللي يشوف بحقد وكاين اللي موش مبالي طاحت عينها على يارا اللي كانت الفرحة تنطق من عينيها استغربت من وجودها بيسك معرضتهاش كان علابالها روحت لموسكو قعدو على طاولة العقد كان سيراج وواحد اوخر هوما الشهود مدلها الكارني هزت السيال بتردد مزلها خايفة حاسة روحها رايحة تسينيي على موتها غمضت عينيها بقوة خاطر مكانش مهرب ضك مبعد وقعت وفوتتلو الكارني ليه وقع بلا تردد
صفقو كاامل بعد ماخلصو وقفت لميس وادم قدمت سيلفا اللي كانت ميتة بالفرحة واخيرا تزوج ميش مصدقة هاذ الشي سلمت عليه وعليها
سيلفا : الله على مرت بني جيتي تهبببببلي كامل حسدوني عليك حتى قبل مايشوفوك
تبسمت لميس معاها ومدت سيلفا يديها تهزلها الطرحة على وجهها غمضت لميس عينيها خايفة تشوفو تهرب عندها نورمال حلت عينيها بالشوي قابلها بهيأتو شافت فيه ميش مأمنة دات اكبر صدمة في حياتها
لميس : انت !!!!!! وش تدير هنا ؟ اععععع مستحيييييل متقليش عييييشك
تبسم بسخرية وما اعطى حتى اهمية لكلامها حكم يدها بلطف وحطلها الخاتم في صبعها
ادم : هاذا أسعد يوم في حياتي
بقات تشوف فيه بصدمة مارمشتش دقيقة كانت اخر حاجة اخر حاجة متوقعتها ماكانتش حتى تقدر تيماجينيها
ادم : ماتبقايش تتفرجي في وجهي كي البوهالية
فاقت على روحها دورت وجها للجيهة لاخرى تحاول تستوعب الصدمة هاذي شعلو الموسيقى الرومانسية باش يشطحو الازواج حكم يدها ماشي حبساتو باليد الاخرى
لميس : مانعرفش نرقص
ادم : هه وشكون قالك رايحين نشطحو !!!!
لميس عقدت حواجبها ميش فاهمة سحبها للميكروفون يهدر مع الضياف
ادم : اسمحولنا جاونا حوايج ايرجون لازم نروحو خاطر ستنيت هاذ اليوم بفارغ الصبر
حلت عينيها على وسعهم من الصدمة وعضت على شفايفها باحراج كبيير
لميس : حماار وش راك تدير هب.............
شهقت كي هزها من تول الضياف بين يديه خارج بيها وكاامل يصفقو وهي تضرب فيه على صدرو من كم الاحراج والحشمة اللي تحس بيها حطها في الطومبيل بلطف وزرب ركب ع الجيهة لخرا وهي تغلي وجهها طلع احمر شي من الحشمة وشي من القلقة
لميس : هبببللللللت ؟؟؟؟ مريض نتا ؟؟ ديجا وين راك مديني هبططني هنا
أدم : وين رايح نديك زعما ؟ نسيتي بلي وليتي ملكي !!!!
لميس : مانيش سلعة باش نولي ملكك ... واصلا اي حاجة كي نملكوها وتولي مملة وسامطة
ادم : هاذا تعريفك نتي .. انتي بالنسبة ليا حاجة اخرى
تبسملها باستفزاز وركب لا سانتير ليه مستعد رايح يسوق
لميس : اييي حبببس هكذا راك تخطف فيا من عرسي اسي خونا ضك نعيط لابوليس
حلت الباب رايحة تخرج شدها بقوة وغلق البيبان اوتوماتيكي
ادم : ركبي لا سانتير
ربعت لميس يديها كي الطفلة الصغيرة هازة شنافتها : مهأ
مازادش هدر كلمة معاه و ديراكت ديمارا بسرعة حكمت قلبها من الخوف زربت ركبت لاسانتير
أدم : كي نوصلو للدار نديكلاريو انا وياك بخصوص خطفك باش يحوسو على الخاطف اللي تجرأ يخطفك من عرسك
لميس : اك تحاول تمشيلي في الخط وتسايرني وتعاملني كي الحمقاء البهلولة يخي ؟؟
أدم : نن مانيش حاب نفسدلك وش حابة برك
لميس : نقص لافيتاس خصنا شوي ونطيرو ضك يحكموك لابوليس
ضحك هاذيك الضحكة الرجولية اللي كانت مزيج بين السخرية والجد : انا مايحكمونيش لابوليس
ردت عليه بنفس النبرة وزادت فيها شوي : لاه نتا ولد الرايس واقيل وانا معلاباليش و........
تبسمت وسط كلامها بشر فكت السانتير وحلت الكارو كاامل وشافت فيها
لميس : قتلك ونظن نتا ماسمعتنيش ضك تشوف مالا الهبال كيفاش مصور
بقا يستنا فيها وش رايحة تدير خرجت نصها الفوقاني كلو ع الكارو وهي تعيط على طولها وشعرها يتطاير بالهوا من سرعة الطومبيل
لميس : اجرووووو لياااا يا نااس راني مخفوطة قصدي مخطووووفة يااا البوليسي اجري ليا هذا الراجل خاطفنني
ادم بحدة: لميس ادخلي بركاي من الهبااال
شاف طومبيلات لابوليس حابسينلو في الطريق ضحك ذيك الضحكة الرجولية مرة اخرى وهو يهمس لروحو : طيحني ربي في وحدة جمررة
دخلت وقعدت في بلاصتها تتبسم بفخر على انجازها تقول جابت الصيد من وذنو حاسبة روحها طيحاتو في المشاكل حلت فمها على شكل O كي شافت ذاك البوليسي انحنى لأدم باحترام
البوليسي: مرحبا الدون
لاحظت لميس ارتباك البوليسي اما ادم طلع حاجبو بحدة فاق لوخر على روحو
البوليسي : قصدي سيدي المفتش كاين مشكل ؟؟؟
لميس : وي / ادم : لا
حلت عينيه على وسعهم كي شافت البوليسي رايح يروح
لميس : ااااااي يا وحد الاطرش اسسسمع نهدر معاك ماكش تسمع ؟؟ اني نقلك خطفني وزيد يسوق بسرعة فاتت حدود الاشارة
البوليسي : سمعت لا من المفتش وكلامو مايعصاش سيدتي
هدر باحترام ومشا خلاها مصدومة
لميس : نعل **** وين رهي العدالة تاع نمي هاذي كييف..... اعععععع وش تكون نتا اكزاكت فهممني
تجاهلها وكمل يسوق تنهدت بضجر : وين مديني ؟؟
سمطها للمرة الثانية خلاها تتقلق وجها حمار حطت راسها ع الكارو تخزر لبرا وبقات تايهة تخمم في اللي جاي مستحيل تقدر تعيش ولا تتأقلم معاه
.....يتبع♥♥♥