فاطمه:- دخلت بشهر الثالث وصار عندي نزيف
ومهتميت للموضوع لان كلت عادي يمكن اي حامل
يصير وياهه هل شي فه اتغاضيت عن الموضوع
لان هذا اول حمل الي.....
لكن بعد مرور اسبوعين زاد النزيف عندي وحجيت وية
زوجي كال هسه اخابر مرت اخوي واشوف
اتصلنه عليها وكالت هل شي ابد موزين شلون
هيج ساكتين ضروري العصر اتروح للدكتورة
وفعلا رحت للدكتورة وسولفتلها الحالة
الدكتورة:- شلون هيج ساكتة عن نفسج ماما
هسه انطيج مثبتات وترحين تنامين على ضهرج
متتحركين ابددددد لو يحترك البيت متتحركين ابد
اذا رايده هذا الطفل سوي مثل مكتلج.....
فه اخذت المثبتات ورجعت للبيت وسولفت الزوجي
ونمت على ضهري مااتحرك ابد وامي هم اجت يمي
حتى تساعدني.....
وبيوم كعدت الصبح دخلت للحمام واشوف نفسي
نازفة نزيف كلش قوووي بحيث حسيت بشي وكع مني
فه ماهتميت خليته بعلاكه وذبيته بالزبل عبالي
شي عادي او عبالي نزيف قوي... بس ورة هل شي
الي صار اني حسيت براحة وحسيت نفسي صرت
خفيفة كلش...
حسيت صار عندي اسقاط بين الي مصدكه
وبين الي ممصدكه... دخلت عاليوتيوب
وكتبت ( اعراض اسقاط الطفل بشهر الثالث)
وطلعت الاعراض نفسها بالضبط..
اول ماكعد زوجي سولفتله كلشي رأسا
اتصل على اخته ام علي.....
ورة ساعتين اجت لان هيه متزوجة بكربلاء
وهم سولفتلها على كلشي..
ام علي:- شلون هيج اسوين وذبينه وين ذبيتي
فاطمه:- بالزبالة
ام علي:- خل اطلعه واشوفه...
فاطمة:- اول ماطلعته شافته وكالت
ام علي:- هذا طفل واكع ميصير اذبينه
لان بعد ماراح يصير عندج جهال ابد
لازم اضمينه او ورة 3 ايام اسبحين بي ولازم
تدفنينه هم لان موزين هاي هم روح...
فاطمة:- اول ماعرفت صار عندي اسقاط كعدت ابجي
ومتتتت بجييي وحتى زوجي كلش ضاااااج واختنك
ام علي:- يله ماصار شي لاتبجين يمعودة الله راح
يعوضج اكيد لاتبجين وصيري قوية....
لازم العصر ناخذج اسوين سونار اخاف تحتاجين
كورداج او شي.....
رحنه العصر للدكتور وسويت سونار وجنت خايفة
اخاف احتاج كورداج بس الحمدلله الدكتور كال
الرحم نظيف من كد مانزفت ومتحتاج لاي شي...
اول ماوصلنه للبيت جنت كلش ضايجه ووجهي
اصفر حيييل من التعب....
يونس:-يله حبيبتي كافي لاضوجين ان شاء الله
يصير عدنه والله يعوضنه
فاطمة:- ان شاء الله...
......... ورة اسبوع.......
يونس:- تدرين عدنه قطعه ارض مالت ابوي الله يرحمه
وجان كلش معتز بيهه وحتى من مات يوصي عليها
وميقبل احد يبيعهه فه اليوم راح يبيعونها
وعلى عينج الله راح يرزقنه لان صار سنين عارضيهه
ومانباعت وانتي عينج خير علينه....
فاطمه:- ان شاء الله بس ابوك بعده اله نفس بيها
خاف الله ميوفقكم اذا بعتوهه
يونس:- لا عليمن احسن ماصير مشاكل عليها
الكل يريد حصته.......
باعو القطعه وكلمن اخذ حصته من الارض...
حماي راشد عنده ولد 4 اثنين منهم كبار واستحقو
زواج فه قرر يزوج واحد من ولده بفلوس الحصة
مالته مال القطعه..... وضلو يدورون على مرة
حتى يخطبوهه اله.....
..... نرجع ليورة شوية........
(خل احجيلكم عن عيالي)
ابو زوجي مزوج اثنين والثانية هيه ام زوجي
فه عنده من ابوه بس اخت وحده....
ومن امه وابوه....
اخته ام علي.. وجانت هيه الجبيرة
وهيه كلش زينه وحبابه...
واخته ام محسن..... جانت بعد احسن والطف
وكلش حنونة وكلش زينه والكل يحبها اكثر من
اختها ام علي بهوااااي....
اخوانه 5 (احسان هوة الجبير بس يكولون عنه
موزين واني ابد مشايفته لان ميتحاجون هوة ويونس)
(اخوه راشد هوة حباب وفطير كلش لكن زوجته
وبناته احسهم مو راحة شوي)
(اخوه ماجد معوق وهوة زين وحباب)
(اخوه عمار هذا كلش عصبي وميتحاجه ويحس
نفسه هوة ولاغيره ويريد حجايته تمشي
عالكل بحيث زوجته واولاده يخافون منه كلش)
(اخوه محمد هوة اكبر من زوجي بشوية
وهوة الوحيد الي بينهم زين كلشششش واحسن
واحد بيهم كلهم)
وكلمن بيته وحده وعازل.......
............. بيوم من الايام
راسلتني بت عم امي الي عشت يمهم شهر
واسمهه سارة.......
سارة:- هلا فطوم شلونج
فاطمه:- الحمدلله كلبي انتم شلونكم
سارة:- موزينه يمعودة تعبت كلش من امي
امي راح ادمرني متخليني براحتي تتحكم بيه
تدرين اريد ازوج واخلص
فاطمه:- شبيهه وياج
سارة:- لج موتتني والله ماريد اضل وياهم بعد
فدوة ادعيلي اتزوج واخلص
فاطمه:- بس انتي هل سنة تتخرجين وترحين كلية
حرامات والله
سارة:- ماريد كلشي لادراسه ولاشي
اريد اخلص
فاطمه:- زين انتي مو تحبين جيرانكم ليش
ميجي يتقدملج
سارة:- يمعودة كلب ابن كلب ويضحك عليه
الحقير...
فاطمه:- موخوش سالفة والله
يله ان شاء الله تجيج قسمه زينه وترتاحين
.... واني اراسل دخل زوجي
يونس:- هاي ويامن تراسلين
فاطمه:- بت عم امي هيه صديقتي كلش
يونس:- ها شعدهه
فاطمه:- ماعدهه شي بس خطيه شوية امها
كلش وكحه ومسيطرة عليهه وتريد تتزوج
يونس:- اي يله
فاطمه:- شنو اي يله تريد تتزوجهه يعني
يونس:- شبيج بوية مو ابن اخوي يريد يتزوج
خل نجمع راسين بالحلال وهذا بي ثواب
فاطمه:- والله هيه خوش فكرة خل اكللهه واشوف
.....
فاطمه:- تعااي ولج لكيتلج عريس
سارة:- صدك منو هذا
فاطمه:- ابن حماي جاي يدوروله على مرة
شدكولين لو نجي نخطبج
سارة:- بس منو هذا شكد عمره شيشتغل اهله منو
فاطمه:- شبيج ابن حماي وعمره بالعشرينات وهوة
حباب بس همه عيال وهوة عنده شغل فه احجي
وية امج ورديلي خبر .......
...... ردتلي خبر وامها كالت ميخالف خل يجون
ونتعرف عليهم.......
وبيوم جانت عدنه اخت زوجي ام علي
فه حجيت وياهه بالموضوع وعمتي سمعت
كالتلي.....
ام يونس:- ديربالج تتورطين وياهم ترة اذا صار
شي باجر عكبه يذبوهه براسج واني ولدي واعرفهم
كلش زين فه ديربالج عوفي هذا الموضوع
وكليلهم بطلو لو اي شي
ام علي:- اي صح والله ديربالج
..... فكرت بالموضوع اي هم صدك شلي بهل دوخه
فاطمه:- اكلك يونس خل نعوف هذا الموضوع
احسن خاف باجر عكبه يصير شي يصير زعل
يذبوها براسنه....
وبعدين همه بيتهم رهينه
وبيتهم كلشي مابي لاطباخ زين لاكاونتر
حتى سخان مابي والبنيه مدلله عد اهلها
يونس:- لا مايصير هيج شي لاتخافين وبعدين
هوة بيتهم اكيد راح يرتبونه.....فه باجر
مرت راشد راح تجي واخذيهه دليهه بيتهم
ومالج علاقة باي واحد
فاطمه:- ماادري بس خايفة يصير شي
يونس:- ماراح يصير شي ولاتحجين هيج بعد
....... ثاني يوم اجت مرت راشد ومرت عمار ومرت محمد ورحنه كلنه سوة.....
طبينه البيتهم وكعدن يسولفن ويضحكن وبعدين
حجو بالمهر.......
مرت راشد:- شوفي والله احنه ماعدنه ووضعنه شوي تعبان فه ماعدنه غير مليونين ونص
ام سارة:- بس وين تكفي ياعيني
مرت راشد:- والله لو عدنه بطن عيني بس ماعدنه
ام سارة:- لعد سووهن عاد 3 ملايين
مرت راشد:- اذا هيج هاي هيه باجر تجي الزلم
وتشوف المرة وبيها خير وتدلل.....
رجعنه واتفقنه باجر هم انروح ولازم اني اروح وياهم
لان اني اندل بيتهم.....
من عرفت عمتي كلش ضاجت مني وضلت تحجي
عليه وبعدين كالت يله يجوز قسمه.....
ثاني يوم رحنه اني ويونس والعريس اسمه علي
وابوه واخوه وحماي محمد.....
دخلنه البيتهم وجان موجودين ابوها وشيخ عشيرتهم
وعمامهه طبعا اني كلهم اعرفهم لان اقاربنه وسلمت
عالكل.....
طبت سارة وكعدت يم ابوهه وجانت طالعه حلوة
كلش ومرتبه نفسها بحيث علي ضل بس يباوعلهه
حتى يونس كلسا اشوفه يباوعلها......
بعدها الكل وافق وقرو سورة الفاتحة...
بدون محد يسأل على الولد.....
اول ماطلعنه منهم كالي يونس
يونس:- البنيه كلش حلوة
وامبينه مؤدبة بحيث خلت الكل صافن عليهه
ضجت من كلامه كلش.......... وكتله
فاطمه:-ليش شنو عجبتك
يونس:- لا ولج بس علاوي يستاهل
فاطمه:- ايي صدكتك..... غلست عنه ومحجيت شي..
..... وراهه راحت سارة وامها البيت الولد
وشافو بيتهم موزين وتعبان ورهينه هم
وماعدهم كلشي بيتهم.......
رأسا طلعو وعافوهم وكالو احنه بطلنه
وسارة بس تبجي لان حبته العلي
بس كلش ضاجت من وضعيه بيتهم..
راح زوجي وحماي راشد وحماي عمار واخذو
زلم وياهم حتى يحجون وياهم ويغيرون رئيهم
بعد محاولات هواي بالكوه قنعوهم او وافقوو
وبعد اسبوع الزواج.... وبيت حماي راشد
جهزو بيتهم وجابو غراض جدد للبيت....
.......واجه يوم العقد مال الشيخ ورحنه اني وزوجي
واهل علي العريس.....
لكن عمتي رفضت اروح وية زوجي وعرضتلي
وكالت ستوج طارحه حتى الاربعين ماطالع ميصير
اطلعين بس اني كتلها خرافات وهذا حجي هيج
وغلست عنه ورحت وية زوجي....
اشوف زوجي مهتم للموضوع كلش بحيث حتى اني
طنشني وموبحالي واخذ العريس وراحو يعقدون
بعدها اجت سارة وامها وعقدو هيه وعلي وزوجي
وياهم واكف وكاتل نفسه...
بعدهه كلش ضجت وعفتهم ورحت وية مرت راشد
ضل يصيح وراي وطنشته وعفته.......
رجعت البيت حماي راشد واني مختنكه كلش
اول مارجعو شفته مطنكر واخذاني وراح
ولزم ايدي عصرهه حييييل والطريق
كله ضل يدردم....
بما انو بيت حماي راشد
قريب علينه رجعنه مشي للبيت...
يونس:- هذا تصرفج شنوو يعني اشكين بيه ولج
وكدام ولد اخويه هااا
فاطمه:- اني ماشكيت بيك ترة
يونس:- والله لو ما منا ناس جا علمتج شلون
اسمعي ولج اذا اشكين بيه اسوي بيج سواية
بس الله يدري بيهه ولو شوفيني وية ميت مرة
ماشكين خوش لو لا
فاطمه:- هسه كافي بالبيت عود نحجي هسه احنه
بشارع ترة....
يونس:- اي خل اطب للبيت واعلمج
فاطمه:- طبينه للبيت واني كلش خفت منه
لان من يصير عصبي يتغير كلش عبالك موهوة
طبيت الغرفتي ودفعني عالجرباية حيييل
يونس:- اسمعععييييي ديرباللج تعيديهه مرة ثانيه
فاطمه:- يله ماشي.... عافني وطلع..
بعدها كلت اني شبيه اهتم لهيج بشر اصلا
هيج انسان مايستحق اغار عليه واضوج
...........بس هوة هيج طبعه من يعصب
ميعرف شيحجي وشيسوي لكن من يهدئ
يصير شخص ثاني تمام ويصير زين كلش.....
بعدها كالعاده يعصب ويصيح ويسوي كلشي
وراه ساعه ساعتين نتراضه ويراضيني
ويعتذر مني وكأنو شي ماصار......
واجه يوم العرس جنت فرحانه لان صديقتي راح تكون
قريبة مني وراح نضل سوة ونسولف سوة بس
كلشي بمرور الوقت يتغير............... يتبع