سداد وبنت العرب

البارت الرابع عشر

سداد وبنت ألعرب
بقلم الكاتبة الزهيريه الزهيريه

البارت الثالث عشر

من لا يراني ذهبًا بين يديه
لا أراه ترابًا تحت قدمي

ألق/  طبعًا صعبه من تكون وحدك وبخطر وماكو أحد وياك اني چنت بخطر بس الله اليعلم بي ويايه ورده  وما نعرف وين نروح بس المهم نخلص وچنت ما همني دنيا ليل ولا همني أصوات نبح الچلاب علينه المهم نخلص منهم بس وين وجهتنه ما اعرف وچنت مقرره أطلب مساعده من اي احد يصدف بطريقنه وظلينه نركض بحيث ورده توگع وأرجع اگومها  بحيث ركضنه مسافة بس شنو نفسنه نگطع وبعدها صار علينه ضوه مال سياره

وصرنه اني وورده گدام السياره ونأشر بيدينه لصاحب السيارة وهو وگف وبس نزل

ألق/ عفيه الله يخليك أريد تنزلنه يم أقرب سيطره رحمه الله على والديك

وهو ما حچى شي بس گال تفضلن اني اوصلچن بس من هسه اگللچن ترى أقرب سيطره مسيرة نص يوم أكثر آو أقل ما أعرف

ألق/ ليش نص يوم ليش احنه وين رايحين
گال عيني ترى احنه على جبال حمرين أقرب سيطره هواي تبعد عن هنا ولكون احنه غبيات صدگنه وصعدنه ويا بس شنو الخوف يقره آلف واني وورده وحده لازگه بالثانيه  وعينه على الولد السايق  وهو كذلك عينه علينه آخر شي انطانه أسمه وسألنه

غزوان/ بلا زحمه انتن شنو مطلعچن بهذا الليل ووين رايحات

ألق / ظلينه اني وورده ساكتات

غزوان/ لا تخافن يجوز اساعدچن وحتى اذا ما ساعدتچن واحد يحچي للثاني وأقلها شويه نخلص من ملل الطريق

ألق/ احنه نريد السيطره وبس والله بجزيك كل خير عنه
وهو شافنه كل شي ما نحچي سكت وبعد حدود ساعه من المشي المستمر دگ موبايل غزوان وجاب بس شنو كلماته إي صح كل كلامه اي صح شنو معناها منعرف بس شنو گلبي لعب منه ليش ما أعرف ورده تباوع عليه بعدين أنتبهت عليه بخاصرته سلاح لو تخبلت أشرت لورده بعيوني على سلاحه وهي هم مثلي لزگت بيه ولازمه أيدي وتعصر بيها قوي اخير شي حسمت إمري

ألق/ عفيه رحمة الله على والديك تگدر تنزلنه هنا  احنه نكمل طريقنه

غزوان / وين تنزلن تدرين احنه وين مستحيل اوصلچن لأقرب سيطره وبعدها الله وياچن 

ألق/ ظلت ورده تندس بيه بمعنى اسكتي ومر هواي وقت والسياره تمشي بينه والمشكله أبد ما فاتت هاي السيارة بمكان بي بيوت وما أعرف احس عبالك طالعين تهريب  لان طريق ما اعرف شلون كله وعر نوب متنه عطش وتعب بس ما نريد أنام نخاف منه بس خلاص بعد وصلت حدها وغفينه اثنينه وحتى شگد نمنه ما نعرف بس صحينه على وحده تگعد بينه وصوتها مو غريب علينه فتحنه عيونه ويا ريت ما فتحناهن صارت گدامنه جميله واحنه تخبلنه أني وورده

جميله/ نزلن يا غبيات شنو فايدة الهزيمة ورجعتن لنفس القفص

ألق/ نباوع على المكان الموجودين بي ما نعرف احنه وين والسياره نزلونه منها وانتبهت نفس لمة الشباب في بيت جميله بس غزوان ماكو والعجيبه انه احس لساني نبلع من الخوف أريد احچي واسأل احنه وين ماكو بس البچي والخوف مسيطر علينه دخلونه البيت نوعًا ما زين ودخلونه بغرفة وقفلوا علينه الباب وظلينه بس نبچي

ورده / اگلچ الق شنو راح يسوون بينه

بعدني ما مجاوبه ورده وسمعنه صوت المفتاح بالقفل يعني راح ينفتح الباب ورجعنه وحده حضنت الثانيه ودخل الولد نفسه ابو السياره غزوان ويا جميله وآني طول الطريق والله من گد ما چنت منتبه على شكله عدل ومن صعدنه ويا ما أنتبهت عدل عليه لان چانت الدنيا ظلمه اما هسه أكو ضوه وشفته چان ولد يطلع عمره بالثلاثينات وهو طويل وبشرته حنطية وعيونه خضر وشعره مگلوب ليفوگ وملابسه كلها اسود وبيده قمچي  وصاح على واحد وطلب منه كرسي ومن جابوا اله

غزوان/ تصورين جميله منو بيهن چانت صاحبة فكرة الهروب

جميله/ شوف خلي أكون أمينه وياك أستاذ غزوان ورده هبشه وما تعرف لا تفكر ولا تخطط بس ألق كلش جسره وما تخاف لهذا اني متأكده ميه بالميه إنه ألق فكرت وخططت ونفذت

غزوان/ يعني شتگولين جميله شنو نوع العقاب إلها خلي الشباب بره يسوون عليها شده يا ورد  ولو اجلدها

جميله/ وانت أعرف استاذ غزوان  شنو العقاب المناسب إلها سوي

غزوان/ اني بيه طبيعه جميله وهي اعاقب المذنب والبريئ لهذا راح يتعاقبن اثنينهن

ألق/ وبالفعل أتقرب علينه اني وورده وأول قمچي اجه على جسمي شاطت روحي لله وبعدها بده يضرب بيه وبورده كل ضربه تجي تحس الجسم دى يشرح
وبعدها إجى أتصال وعافنه وبعدها قبل ما يطلع طلب من جميله

غزوان/ جميله گبل سبحيهن بمي ثلج حتى لا يصير لا ورم ولا زراگ بس قبل هذا كله هن بنات بعدهن لو مفتوحات على البحري

جميله/ لا بعدهن بنات بيوت

ألق/ هنا ظل يجعر على جميله على ليش ما بلغتيني شوفي أريد من آجي مره ثانية كل إثر للضرب ما الگى بيهن أريد انزلهن للشغل فهمتي لو أعيد وبعدها طلع وجميلة صاحت على وحده ثانية وياها وجابوا ثلچ ويخلون على اثار الضرب ومن يخلوا جسمنه يظل يحرگنه وحتى مراهم طبيه جابت وتخلي على جروح وهي دردم

جميله/ عمى بعينچن شبيچن ملگوفات يعني الله خلقچن حلوات وبعدچن صغار استغل جمالي وصغر عمري أفظع استغلال كاتلات روحچن على الحب والرجال شكو بي قنادر اجمع فلوس لتالي عمري الرجال شنو راح ينطيچ ثروه شو تزوجي وتحبي وهو كلب ابن كلب يخونچ ويجوعچ ويخلف منچ أطفال وبعدين يحچي عليچ گدام التسوه والماتسوه

ألق/ وبقت جميله دردم علينه وبذاك اليوم خطيه ورده وصلت للموت لان إرتفعت حرارتها بشكل مو طبيعي ويمها جميله سويلها كمادات وتنطيها خافض حراره وما تحسنت ورده الا بعد 3 أيام ومر تقريباً على وجودنه أسبوع واجى غزوان بالليل والعجيب انه غزوان ما يظهر الا بالليل

ودخل يمنه وهو يباوع علينه بنظرات تخوف يعني اني شگد أحاول أكون متمالكه أعصابي وما أرتبك بس مستحيل اي أحد يوگف گدام غزوان ما يخاف هو نظرات عيونه تخوف وهو هادىء ويحچي ويه جميله

غزوان/ شوفي جميله جاي زبون عليه واريد واجب الضيافه عدنه غير أريد وين ماكو بنيه  حلوه ولبقه جوه ايدچ توب تستقبل الزبون

جميله/ اني أرشح ألق لإن لبقه  وحلوه جمالها عبالك وحده هنديه

ألق/ لو تموتون اني ما الي شغل بيكم لو مو ضربوني لو تموتوني ما أروح وياكم الى أي مكان
واجى غزوان جرني من أيدي قوي وطلعني خارج الغرفه ودخلني غرفة ثانية وقفل الباب وأتقرب عليه

غزوان/ شوفي اذا ظلين هيچ ترى ما تعرفين شنو اگدر أسوي بيچ تدرين هسه أخلي الشباب الموجودين بره كلهم ينامون وياچ  او اگدر اخليچ مدمنة مخدرات واگدر ابيعچ أعضاء بشرية احنه هنا نشوفچ  مجرد كتله مال فلوس يعني تجارة وانتي بكيفچ بعد تردين باچر تجين ويايه وتكونين بس تستقبلين زبائن بمطعم لو تردين تختارين وحده من ذني يا إما تكونين گح... اما مدمنه اما أعضاء شنو تردين

ألق/ خلاص خليني بس إستقبل زبائن بالمطعم

سداد/  بعد حادثة أبني وبنتي صرت كلشي أتوقع بس مآل آريا تكذب ما چان يشيلها عقلي ما چنت متوقع بس أدير ظهري تجيني الطعنه منها وهي بالتحديد والله حبي الها ما ينوصف تصعد وتنزل ويه النفس بيومها چنت يم عقيد فرقد واني چنت بمقتل أبني من دخلوا أهل البنيه المخطوفه ما ادري مقتوله وانتهى التحقيق انه يعتقل عمها وزوجته ظليت صافن معقوله كل واحد بينه همه شكل يعني بنفس الليله نزهقت روحين بريئه ما إلها ذنب روح أبني وروح البنيه وما انتبهت إلا من گال

فرقد/ عيني هذا ما يطلع ألا لمن يگول البنيه وين صفى بيها الدهر واليوم ان شاء الله يتعللون بي الشباب هنا ألا لمن يعترف البنيه وين

سداد/ وطبعًا خطيبها ابو اسكندر ضم صوته لصوت فرقد وشجع على اعتقال عمها وزوجة عمها اما ابو عمامه ما اله  كل كلام وانسحبوا أبو عمامه وابو اسكندر وعمها أخذوا الشرطة وآني إتفقت ويه عقيد فرقد على أستجواب جيرانه أبو بسام وأم بسام وبحضوري وطلعت من يمه وآني أحس رأسي راح ينفجر شلون لو الشكوك كلها طلعت صدگ وين أروح بحالي صرت حتى أتحاشى النظر لزوجتي حتى لو هي ما قتلت أيليا بس إهمالها هو الضيع الأطفال وهي من توفى أيليا ابد ما تحاچينه ألا نادرا  ومر تقريبًا يومين وأتصل بيه فرقد وبلغني انه على اليوم الثاني راح يجي ابو بسام وزوجته للاستجواب وطلب مني الحضور

طبعًا هذا كله واني أبد ما گلت اي شي  ضميت الموضوع على آريا وعلى الثاني توجهت للمركز ومن دخلت للمركز شفت ابو بسام وزوجته وهو من شافني أجى سألني

ابو بسام/ السلام عليكم أخويه بلا زحمه اني متهم وزوجتي متهمين بشي ليش استدعونه

سداد/ ما أعرف أكيد يسالونكم كم سؤال لا أكثر ولا اقل
وظل ابو بسام يسولف عن الحادثه ويعزيني  شويه وطلع سلام صاح عليه دخلت  وبعدها صاح على أبو بسام  ومن دخل سلم وگعد

فرقد/ الله بالخير ابو بسام طبعًا احنه اليوم استدعيناك حتى نسألك عن الحادثة جارك سداد

ابو بسام/ اني أي معلومه ما عندي واسأل الأخ سداد صار شگد هو ساكن بصفي واحنه على گد السلام وبس ويا جاري أنت بحالك وأني بحالي واني واهل بيتي بينه طبيعه ما نحب نختلط بأحد آما الحادثه  سمعنه زوجة حضرته تصرخ وزوجتي راحت إلها للبيت واني حالي حال الناس ألي كلها تجمعت ببابهم اني چنت واگف وهواي نسوان دخلن لبيتهم وطلعت زوجتي گالت الطفل الصغير ميت وآني اتصلت بالشرطة ومن اجتي الشرطة دخلت لبيتي وبعد ما ادري بشي 

فرقد/ يعني افهم من كلامك آنه انت أبد ما داخل بيت الأخ سداد

ابو بسام/ سيدي إذا احنه على گد السلام  يعني شلون أدخل بيتهم

فرقد/ اخذنه أقوالك تعال أبصم وتفضل انت بره ودخلوا ام بسام أبني سلام دخل اختك ام بسام 

ودخلت ام بسام وبعد ما ذكرت أسمها وعمرها
فرقد/  ام بسام انتي صديقة زوجة سداد ام أيليا صح

ام بسام/ مو علاقة قويه بس مرتين طلعت وياها للسوگ دليتها طريق السوگ لان هي گالت آلي زوجي مسوي عمليه وأريد اسوگ وما اندل السوگ وين ورحت وياها وبعدها ما شفتها ألا لمن بيوم وفاة أبنها وخلص

فرقد/ شلون بس مرتين رحتي وياها وانتي  عرفتيها على طريق العلوية حتى تحل مشكلة زوجها وتنطون للعلويه ملايين حتى سوي شغل لزوجها  سحر ما اعرف شنو

ام بسام/ سيدي استر عليه الله يستر على عرضك ترى اذا يسمع هذا الكلام ابو بسام هسه يطلگني يا علوية يا سحر كفيلك هو الله اني رحت وياها مرتين للسوگ بس واني لا أعرف علوية ولا سحوره آني  ما  أطلع للسوگ على گد المسواگ  وبس واذا مصدگ كلامي جيبها واجهني بيها

فرقد/ وهو هذا المطلوب راح اواجهچ بيها ونشوف منو صادگه ومنو كاذبه   سداد بلا زحمه أريد منك تحضر زوجتك وخلي يتواجهن أريد اوگع على العله وين  وما أريد كل شي تگللها خليها هنا تجي تتفاجأ بام بسام

سداد/ واني هم حچيت شي گمت طلعت وأول ما شافني آبو بسام ظل يسأل شكو وليش راح تطلع واني ما گتله اي شي بس گتله شويه وأرجع رحت للبيت واني الطريق كله أغلي معقوله اني هيچ يصير بيه ولك سداد ابنك راح نتيجة اهمالك قبل إهمالها أمشي وألوم نفسي على روجيدا  خطيه بحالة إنهيار كامل لو أيليا صفى جوه التراب هذا ذنب منو ذنب اب چان يكد ويتعب حتى يوفر إلهم عيشه كريمه لو ام چانت مهمله بحيث ضاعوا أطفال أثنين وصلت للبيت  شفت آريا وهي گاعده صافنه 

سداد/ گومي بدلي وتعالي ويايه ويبرق هم بدلي إلها راح نذبها يم بيت خالتي ونطلع مناك لغير مكان اريدچ بشغله

اريا/ يعني وين نروح گلي اني ما أريد اطلع البيه مكفيني

سداد/ موضوع مهم يخصنه
وهي بتملل بدلت ويبرق هم بدلت إلها وبطريقنه مرينه على بيت خالتي خلينه يمهم يبرق وطلعنه للمركز وهي من وصلنه للمركز وجهه ظل ينطي ألوان بحيث الارتباك بين على وجهه

أريا/ سداد انت ليش جبتني للمركز

سداد/ الضابط يريد يسالچ سؤال لا أكثر
وظلت تلح تريد تعرف شيريد منها الضابط بس ما انطيتها نجده الى ما أخذتها الى مكتب فرقد ومن دخلنه سلام لضابط فرقد وشافت ام بسام گدامها تخبلت بس شلون ماكو مفر

فرقد/ تفضلوا گعدوا بلا زحمه أخت اريا انتي چنتي تسحبين مبالغ خيالية من زوجچ وتروحين للعلويه ما أدري الساحره ويه آم بسام صحيح هذا الكلام

اريا/ أي صح

سداد/ هنا گبت العيطة لان ام بسام عاطت بيها
ام بسام/ ولچ خافي ربچ وانتي ما هواي من دفنتي ابنچ جوه التراب

سداد/ وعلى صوتها دخل ابو بسام لان گام يصيح على زوجتي شبيها لهذا دخله سلام يمنه وفرقد أسلوبه ذكي يستفز الطرفين حتى يطلع الحچي منهن

فرقد/ يعني هسه المن نصدگ آم بسام لو ام ايليا يعني شسون يم الساحره

ام بسام/ سيدي والله لا رايحه ولا واصله واني ما أفهم بهيچ سوالف

آريا/ اني ما أعرف هي دلتني على العلوية لان زوجي چان يشكو من ضعف  جنسي 

فرقد/ ضعف شنو  لعد 3 أطفال منين اجوي هبطوا عليكم من السما

سداد/ بوقتها الكلام سمعه ابو بسام ولزم أم بسام موتها كتل وذب عليها يمين الطلاگ وعافها وطلع وهي هجمت على آريا وتريد تضربها

آم بسام/ هجمتي بيتي الله يهجم بيتچ فوگ راسچ أكثر ما هو مهجوم ان شاء الله تطلع حوبتي بيچ مثل تهمتيني

سداد/ يعني الصار كله ما استفادينه منه لان رجعنه لنقطة الصفر وطلعت آريا لسياره ورجعت على فرقد انه شنو الفايده من الصار

فرقد / اني اصدگ جيرانك ما اصدگ زوجة حضرتك أبد واحنه حاليًا اخذنه بصمات ابو بسام وراح نطابق ويه البصمات العدنه ونشوف وبقى شغله وهي انه راح اسحب تصوير كاميرات البيوت حتى أشوف شنو الصار

يتبع/ بكم أكتمل
دمتم في امان الله وحفظه
اختكم الكاتبة الزهيريه الزهيريه