سداد وبنت ألعرب
بقلم الكاتبة الزهيريه الزهيريه
البارت الحادي عشر
نظره حزينه على الماضي
وأخرى على المستقبل
وهكذا تتسرب منا الايام دون ان نحياها
ألق/ اي قرار تاخذه بحياتك يحتاج جرأة حتى تنفذه ولازم تتحلى بالشجاعة والصبر هذني حمدلله كلهن موجودات عندي بس أكو مشكله وحده وهي اذا انهزمت وين أروح وأني أصلاً كل شي ما اندل بأي مكان شلون شسوي لازم أحد ويايه ولازم قبل ما أنهزم آخذ فلوسنه مو يصفن لنزار آبو الكرستال أريد آخذ الفلوس وأروح بغير مكان اشتري بيت وأجيب يمي ابويه واخويه هاي الأحلام كلها حلوه بس ما اگدر وحدي واني صار فتره ما ادري بالموبايل من دگيت على هيثم وچان مغلق وقررت أتصل بعمه بسمه بس شلون واني ما عندي رقمها ومستحيل أطلب رقمها من عمي نزار لآن مليون بالميه ما ينطي الي وشلون أوصل لموبايله صعبه بس قررت اسأل كونه تطلب من عمي نزار بحجة تريد سلم عليها بعدين تذكرت الموبايل
ورحت طلعته چان طافي خليته على الشحن وقفلت الباب عليه حتى يجي عمي نزار خاف يسوي أقتحام للغرفة ويشوف الموبايل وبقى يمي بس ابويه ومن شويه شحن الموبايل فتحته لگيت رقم هواي متصل وبعدين لگيت رسالة مكتوب بيها حبيبتي ألق هذا رقمي الجديد أني هيثم ما صدگت عيوني هيثم وليش مبدل رقمه رجعت أتصلت على نفس الرقم جاوب عليه هيثم
هيثم/ هلو حبيبتي شلونچ مشتاقلچ
الق / حبيبتك صارلك شگد من غالق رقمك وشنو الذكرك بيه
هيثم/ حبيبتي عمچ من رجع بعد ما نخطف ثاني يوم دز عليه جماعة ضربوني ضرب چنت راح اموت بيدهم بس ربچ لطف بحالي لكون احبچ ويريد يبقيني الچ
ألق/ وين لگيت هذا الفلم عمي نزار ليش سوه بيك هيچ
هيثم/ لإن چنت دائماً أودي عليه ناس واخطبچ وما يقبل ولأن دزيتله خبر انه اذا ما يوافق على زواجنه اقتله لهذا گلك خلي اتغده بي قبل ما يتعشى بيه ودزلي جماعة ضربوني شوفي ألق إذا تحبيني تعالي ويايه نروح لأربيل ونعيش هناك وإذا تگولين لا هذا الرقم اكسره وبعد ما نتواصل نهائي
ألق/ وأني چنت في ذلك الوقت محتاجه شخص يساعدني واني بنفس الوقت أحبه لهيثم حب مو طبيعي لهذا قررت آخذ الفلوس واروح ويه حب عمري وأبني ويا حياتي واذا عمي نزار يشوفه مو مناسب كافي آني أشوفه مناسب إلي لهذا وافقت
هيثم/ شوفي يوم الثلاثاء بالليل راح أكون واگفلچ بالركن وتعالي وبنفس الليله لازم نطلع لأربيل ونعوف كل شي ورانه
ألق/ اگلك اني عندي شرط
هيثم/ گولي شنو شرطچ واني من هسه اگلچ موافق على اي شرط تخلي
ألق/ وحچيتله على موضوع زواجي من هذا أبو اسكندر وگتله على الفلوس وشلون چنت مخططه أتصل بعمه بسمه ومن نروح لاربيل ونستقر اريد بعد فتره أجي اخذ أبويه وأخويه
هيثم/ أبد لا تتصلين على عمتچ بسمه إما الفلوس اي عفيه كلهن جيبيهن ولا تخلين فلوس لنزار إي فلوس موجوده جيبيها هذا حقكم واوعدچ بس نستقر نجي ناخذ ابوچ واخوچ
ألق/ هنا اني ارتاحيت طالما ينفذ كل طلباتي واتفقنه على الموعد وظلينه الليل كله نسولف ونخطط لمستقبلنه وهذا چان المستقبل المجهول ولو چنت اعرف شنو راح يصير بالمستقبل چان طميت روحي جوه التراب وعلى ثاني يوم وچان يوم الاثنين اجى عمي نزار آخذ أبويه وراح وعرفت من نضال انه أخذه ذبه بالشماعيه وحتى من گالتلي وشافتني هادئه تخبلت تگلي شعجب شو ساكته شعجب بيوم اخذ اخوچ تخبلتي وما جاوبتها وبنفس اليوم بالليل إجى ابو اسكندر وعمي نزار دخله لصاله اجيت وگفت يم الباب واسمع
ابو اسكندر/ نزار هاي فلوس مهر العروسه وهاي سددت المبلغ كله ويوم الخميس اجي أستلمها منك
نزار/ خويه ابو اسكندر شوكت ما تريد تاخذها تعال أعقد وأخذها
ألق/ طمئنيت انه الموعد للخميس بعد بس اخذ الفلوس الثلاثاء وأطلع من البيت كله وبعدها ظليت أراقب وشفت عمي نزار وين يخلي الفلوس شفته مخليهن بعلاگه مال دعاية سگائر وعلى ثاني يوم الثلاثاء إجى هيثم من ساعة 10 بالليل بس اني تأخرت عليه لما غافلت نضال ودخلت لغرفة عمي نزار أخذت الفلوس ورحت للمطبخ وأخذت چيس مال زباله وخليتهن بچيس الزباله والله أيدي وگعت من گد ما ثگيله ومن دى اريد اطلع من باب المطبخ سمعت باب غرفة نضال نفتح اني بسرعه طفيت ضوه المطبخ وضوه الگراج وطلعت من باب المطبخ واني بالگراج أسمع صوت عمه نضال صيح من بالمطبخ ألق هاي انتي بالمطبخ
واني طلعت ركض بس تفاجأت واگفه تريله بباب بيتنه حاجبه عليه الركن بحيث طلعت من وره التريله وصار گدامي هيثم وهو يأشر بمعنى تعالي واني رحت عليه وهو اخذ مني الچيس واكو سياره مظلله صعدني بيها وانطلقت بينه السيارة وهيثم گاعد يمي وظلت تمشي بينه السياره بسرعه وهذا الوقت كله اني وهيثم ساكتين بس قلقت لان صار هوايه تمشي بينه السيارة
ألق/ اگلك هيثم وين راح نروح لآن السيارة صار هواي وقت تمشي بينه
هيثم/ حبيبتي راح نطلع لأربيل مو گتلچ لان ببغداد ما نگدر نبقى إذا بقينه إحتمال يوصل النه عمچ نزار لازم نطلع خارج بغداد حتى ما يگدر يوصل النه
ألق/ ما اعرف شگد مر وقت بس هواي طولنه بحيث بده الفجر يشع لما وصلنه لمنطقة كلها أشجار وخضار وبيها بيوت بس متباعده ومن وصلنه نزلنه من السياره وتحاسب هيثم ويه السايق والتفت عليه
هيثم/ راح نبقى هنا لما يجي كفيل يدخلنه
الق / كفيل لشنو ووين يدخلنه
هيثم/ كفيل يدخلنه لأربيل هنا اكو قانون وعلى كل شي محسابه والأكراد ما يرحمون أبد وخصوصًا ويه العرب ما يتهاونون
ألق/ دخلني هيثم في بيت بي وحده تطلع منتصف الثلاثينات وسلمنه عليها
هيثم/ عيني جميله راح اعوف يمچ ألق وبس يجي الكفيل ويكون هم يجي رجلچ حتى نعقد ونروح لأربيل
جميله / بعيني اخليها هاي خطيبة الغالي
ألق/ في وقتها چان كل شي طبيعي ومن راد يطلع هيثم أشارلي براسه بمعنى تعالي اني هم طلعت ورا طلعني خارج البيت
هيثم/ شوفي ألق اي شي لا تحچين گدام جميله راح تحاول تسحب لسانچ اي شي لا تگولين لا على الفلوس ولا شي
ألق/ ليش انت شنو راح تعوفني وحدي هنا وتروح اني اخاف
هيثم/ شنو تردين ابقى وياچن وانتن نسوان أثنين وتحلن عليه وثانيًا جميله مزوجه وعيب من زوجها ابقى وياها بنفس البيت وهو ما موجود ولا اراعي حرمة بيت ميصير حبيبتي اني اذا مزوجچ ما اقبل كائن من يكون يجي يمچ بالبيت حتى لو عمچ وما يحل عليچ هم ما أقبل فهمتي
ألق/ في وقتها سكتت وبعدها رجعت اسأل على الفلوس وين وديتهن
هيثم/ الفلوس بأمان لا تخافين هاي الفلوس يمي امانة الله ورسوله يعني انتي أمنتيني على نفسچ وعلى حياتچ وتامنين على الفلوس يمي
ألق/ لا هيثم اني أثق بيك ثقه عمياء
وبعدها راح هيثم وبقيت يم جميله ولكل حادث حديث يعني من راح هيثم بعدها بيومين اكو ولد ثاني مقارب لعمر هيثم هم جاب وحده ويا مواليدها 2000 وتگول جميله هذا آبن خالتي وهاي البنيه ابن عمها ناهي عليها وما يقبلون ينطوها لأبن خالتي
سداد/ مرات كل شي يخطر على بالك إلا المفاجآت من تجيك تخليك بذهول وما تعرف تصرف يعني آني أبد ما چنت مصور بيوم راح اخسر واحد من أطفالي والله چنت دائماً ادعي من الله يخلي يومي قبل يومهم بس تبقى إرادة الله فوگ كل شي من وصلت للبيت چان كل شي متغير مو مثل ما عفته أيليا أبني آخر مره شفته من يركض ورايه وروجيدا تحسنت نوعًا ما هسه احس السگف وگع على البيت لأن اطفالي ماكو بي اخذني صديقي كوجر للمركز أريد أعرف وين أخذوهم بحيث كأنه اكو غمامة على عيوني كل شي ما أشوف مثل المخدر والله كوجر يجر بيه مثل اللعبه بيده اني
والمصيبة انه من رحنه للمركز كل تعاون منهم ويانه أبد آني أبني متوفي وبنتي ما اعرف وين ماخذيها وضابط الخفر وين ما اعرف آما مدير المركز موصيهم لو يصير أنقلاب بالدوله ما يگعدوا بوقتها كوجر ظل يصيح بعلو صوته واكو ناس ويانه هم گاموا يصيحون ما اعرف في وقتها ما چنت مركز ما اعرف البنيه مهزومه ما اعرف مخطوفه هيچ شي يعني وتعالت اصواتنه ويه أصواتهم واجوي هواي عناصر من الشرطه الموجودين سحبوا علينه أسلحتهم وكوجر أتصل
كوجر/ اوزجان سداد مات ابنه واحنه بمركز.... تعال حاصرونه
سداد/ نفتح الباب المقابيلنه وطلع واحد لابس برموده وفانيله تعلاگه
فرقد/ هاي شنو وين احنه بالعلاوي شكو بس غفيت صار الانقلاب
سداد/ واكو واحد من عناصر الشرطة جاوبه بعد دگ تحية/ سيدي هنا الاخ قبل ساعه اجتنه أخباريه انه بنته قتلت اخوها والأخ كردي يهددنه بحكومة كردستان والاخ الثاني خطيبة ما اعرف مخطوفه ما أعرف مهزومه ويهددنه آنه هو من جماعة السيد
فرقد/ والله بارك الله بيكم شنو فرقد راح يوحد طوائف العراق بالمركز عيني خلي أبدل واريد أشوف يهددونه شنو
سداد/ وبعدها خل الضابط يبدل ملابسه بس شنو طول وكل شويه نسأل عليه يگولون دى يبدل وبعد ما رجع كوجر يتعارك مره ثانية دگ جرس من الغرفة المقابيلنه نفسها الدخل الظابط يبدل بيها دخل الشرطي وبعدين طلع گال النه تعالوا دخلوا ومن دخلنه دگينه تحية
فرقد/ تفضلوا گعدوا سلام أبني جيب مي
سلام/ لحضرتك سيدي
فرقد/ طاح حظك أبني النه كلنه جيب مي سلام وين ضابط الخفر زيد شو ماكو ترك المركز مثل السبحه مگطوعه وضايع شاهولها
سلام/ سيدي گال هسه اجي يجيب عصير ويجي
فرقد/ طاح حظك أبني سلام من حق زيد يشرب العصير قبل الاذان لان بعد الأذان يصير آثم عليه ولا ينسى اللبن والخيار ويه العصير
سداد/ احنه گاعدين على اعصابنه والضابط يجادل ويه الشرطي وبعدها التفت علينه
فرقد/ تفضلوا وبعدها نتفاهم على موضوع تهددونه بحكومة كردستان
سداد/ سيدي على الله وعليك اني كل شي ما فاهم بنتي وين وأبني وين شنو الصار ما اعرف
فرقد/ اذا انت ما فاهم آني شلون راح أفهم وضابط الخفر القضيه يم
سداد / وبعده الضابط يحچي دخل مديري واوزجان ومديري قدم الهويه مالته شافه الضابط گام دگ تحية لمديري ومديري طلب الضابط فرقد انه هو يشرف بنفسه على التحقيق في قضية ابن سداد ورجع مديري عزاني بوفاة ابني وطلع هو واوزجان وبقينه آني وكوجر والضابط دگ جرس ودخل الشرطي
فرقد/ أبني سلام أريد ملف القضيه مال قتل الطفل
سلام/ من نقيب زيد
فرقد/ طاح حظك ابني من مكتب زيد وهو ما موجود هذا المفاتيح بيها نسخه من مفتاح مكتبه شوف يا هو النسخه مال مكتبه وفتحه وجيبلي قضية قتل الطفل وتعال
سداد/ وبعدها بدقائق إجى الشرطي وجاب الفايل مال القضيه وظل يقره وبعدها رفع راسه
فرقد/ من اجى النداء انه اكو طفله قاتله اخوها وطلعت دورية من المركز لان الرقعة الجغرافية مال بيتكم على مركزنه النقيب زيد محرر بكشف الدلاله الاولي انه ماكو بالبيت غير زوجة حضرتك وأطفالك بالبيت وإنه البنيه والبالغة من العمر6 سنوات قاتله أخوها هذا شي يخلينه امام أكثر من دائرة اتهام وهي من قتلت البنيه اخوها وين چانت الام هذا شي ومنو يگول هذا الشي صحيح احنه من خلال الطب العدلي راح نعرف اذا چانت الطفله القتلت ام غير شخص اما الطفل حاليًا بالطب العدلي والبنيه حاليًا محتجزه بالمستشفى لان حالتها صعبه على أن يتم الكشف عليها اني حاليًا ما أفيدك بشي لان هسه ساعه 5 وربع الفجر وبعده الضابط ما مخلص كلامه وصارت هوسه وصياح ودخل الشرطي سلام
سلام/ سيدي اهل البنيه الگتلك عليها صار ساعه واگفين بره ويهددون يگولون راح نرفع شكوه عليكم يم السيد تنطون أولويه للاكراد واحنه ما تتعاونون ويانه
فرقد/ طاح حظك ابني هسه احنه شنسوي لازم نخدم قوميات العراق كله شنو مشكلتهم ابني سلام
سلام/ سيدي بنيه ما اعرف شنو مشكلتها عمها يگول مخطوفه وخطيبها أبو اسكندر يگول باگت المهر مالتي ونهزمت
فرقد/ إسكندر منو شنو اني اعرف اسكندر ويه مراد بوادي الذئاب شجابه للعراق خليهم يدخلون لا هاي المره يجينه السيد عفيه بلد كله ماشي بالواسطات
سداد/ دخلوا إثنين رجال واثنينهم يطلعون أعمارهم بالخمسينات واحد يگول مخطوفه والثاني يگول مهزومه
فرقد/ حتى بلاغ ما نگدر نسوي ألكم اذا ما يمر 48 ساعه يله تتحرك دورياتنه آو نستجوب آحد شاكين بي
نزار/ يعني البنيه تموت وانتوا بعدكم ما متحركين من مكانكم
فرقد/ اكيد لأن هذا وياك أبوها ما أدري اخوها ما اعرف شنو صلته بيها يگول باگت فلوسي يعني هاي ما مخطوفه هاي مهزومه والدولة ما مسوؤله على البنات إلي ينهزمن انت تحير بهذا العار وحدك
سداد/ شگد حاولوا ويه الضابط بس رفض گاللهم بعد 24 ساعه يله نقيد دعوه واذا ثبت بالدليل القاطع انه مخطوفه نعمم صورها على الدوريات آما إذا مهزومه ما نگدر كل شي نسويلكم وطلعوا ورجع يكمل ويايه انت هم ما راح افيدك بشي إلا تطلع نتيجة الطب العدلي يله نگدر نحقق بالموضوع ورجعت توسلت بي آنه يسرع بالقضيه
فرقد/ لكون مديرك وصاني عليك تدلل خاف بيوم نحتاج مديرك أكون مقدمله خدمة هسه أتصل بابن خالتي هو بالطب العدلي وراح اوصي شويه يستعجل بالقضية
سداد/ وأتصل على واحد اسمه أحمد
فرقد/ حبيبي ابو كرار اكو يمك جثة طفل أريد تنطيني تقرير نهائي بوفاته باسرع وقت واريد ترفعلي بصمات البيت أنت بنفسك تطلع لان موصين عليه من فوگ يله اريد همتك حمندش
سداد/ وغلق خط ورجع عليه سألني سؤال غريب
فرقد/ طبعًا ابن خالتي احمد خلي على أيدك اليمنه لانه مضبوط برفع البصمات بس عندي سؤال شلونها علاقتك بزوجتك
يتبع/ بكم أكتمل
دمتم في امان الله وحفظه
تحية لكم من القلب
أختكم الكاتبة الزهيريه الزهيريه