سداد وبنت العرب

البارت الثامن

سداد وبنت ألعرب

البارت الثامن
بقلم الكاتبة الزهيريه الزهيريه
إفعل ما شئت
ف سيأتي اليوم
الذي يفعل بك كما فعلت
عندما تظلم فستظلم يومًا ما
وعندما تكذب سيكذب عليك يومًا ما
فأفعل الان ما تحب ان يفعل بك غدًا

ألق/   احنه انخلقنه في هاي الدنيا مخيرين مو مسيرين بس مصيبتنه انه نختار غلط والأصعب انه لازم نتحمل مسؤولية أختيارنه بعد ما اجوي جماعة اخذو عمي نزار وبعدها هيثم خيرني بين أروح ويا أو انسى ظليت الوب شلون اني احب هيثم وأموت عليه وما اگدر بدونه هو اني يوم ما اگدر أنوب يروح وبعد ما يرجع غير اتخبل أموت شلون يا ربي اذا رحت ويه هيثم زين وابويه وأخويه شلون منو يبقى يمهم

واباوع عليهم والله البراءة كلها بعيونهم وبوجوهم وظليت حايره ويامن احچي ويه منو احچي مشكلتي  وبقينه اليوم وعلى ثاني يوم اجتي دورية مال شرطة وظلوا واگفين بالباب وبوقتها طلعتلهم عمه نضال ومن ضمن الدوريه ضابط

الضابط/ عيني البارحه اجانه نداء من دوريه جيش انه تم أقتحام بيتكم واخذوا رجل منكم واقتادوه الى جهة مجهولة

نضال/ اي صحيح عيني اخذوا زوجي

الضابط/ تعرفين الجهة الي اخذته او شكون بأحد

الق / وبعد ما جاوبت عمه نضال ما أدري منين طلعت كونه وجاوبت الضابط بدل عنه
كونه/ عيني ما يعرفون منو اخذه وخطيه نزار ذهب صافي بس هاي الناس الي ما تخاف من الله اخذوا

رجع الضابط يسأل عمه نضال / الجهة الي اخذته چانت چانت مدنيه لو تابعه للدوله

كونه / لا عيني چانوا مدنيين لآن احنه واگفين وكل الجوارين شهادة على حادثة الاختطاف خطيه المسكين راح بشربة مي

الضابط/ اختي شنو انتي عايشه عدهم ودى أوجه اسئلة إلهم لا كل شويه تنطين

الق / خطيه فشل كونه فشله مو طبيعيه وهم ظلت واگفه يمنه تسمع الحچي بس اي جواب شافي ما لگوا يم عمه نضال ومن راحوا دخلنه اني وعمه نضال وسألتها/ عمه انتي چنتي دائمًا من يجون جماعة عمو نزار چنتي تدخلين تضيفيهم شعجب ما گلتي للضابط عليهم

نضال/ شوفي حبيبتي اني مو غبيه دى أفتح على نفسي باب جهنم اذا بلغت عليهم بعد ساعه تگولون الله يرحمها لنضال متوازيه وخلي اگلچ من هسه اخذوا نزار يا يسووله گرصة أذن يا يرجعون بس راسه خليني بعيده اني شعليه

ألق/ وبقينه يومين على اعصابنه اما الخوف ما نسولف بي لأن صرنه نخاف اذا بزونه فاتت من الحديقة نقفل البوب علينه أما هيثم يوميه يتصل عليه بالليل

هيثم/ شنو ردچ ألق ترى ما بقى شي باچر بالليل أروح وبعد ما شوفيني تجين ويايه لو لا گليلي من هسه

ألق/ آني الى هسه ما أعرف مصير عمي نزار شلون أروح وابويه واخويه منو الهم

هيثم/ ترى إنتي بنيه ألق ومصيرچ في بيت زوجچ يعني قابل اليزوجچ ياخذ ابوچ واخوچ وياچ اما عمچ نزار ما معروف مصيره يعني احتمال يرجع واحتمال ما يرجع لهذا خلي نزوج ونروح نشوف حياتنه حبيبتي ترى ما ظل وقت لازم نطلع لاربيل

ألق/ بيومها نهيت الاتصال ويه هيثم بس ما جاوبته موافقه لو لا وبيوم الثالث أتصل بيه هيثم العصر

هيثم/ بما انه انتي ما تريدني مع السلامة ألق اليوم بالليل ساعة ب 12 اطلع لاربيل أشوف وجهچ بخير ألق وان شاء الله تلتقين بالأحسن مني

ألق/ وغلق الخط بوجهي وظليت ابچي لان ما اعرف شسوي وظليت الوب وافكار راسي تتضارب شلون هيثم يعوفني ويروح واني راح اگدر على بعده لهذا حدود ساعة 9 ونص اتصلت عليه وبلغته انه اني موافقه أروح ويا حتى لو لآخر الدنيا

هيثم/ صدگ تحچين الق راح تجين ويايه هذا احلى خبر سمعته بحياتي انتي اليوم حضري نفسچ ساعه ب 12 بالليل نطلع لاربيل وما أريد احد يعرف أبد

ألق/ اتفقت ويه هيثم على الموعد وما بقى شي لازم أجهز نفسي استأذنت منه ورحت حضرت ملابس حتى من يصير الموعد بس أبدل واطلع بس تجري الرياح بما لا تشتهي السفن حدود ساعة 11 وربع بالليل اجى عمو نزار وهاي چانت بمثابة صدمه النه وخصوصًا آني لآن اخاف من عمو نزار ومنا اني عندي موعد ويه هيثم لهذا رجوع عمي نزار چان خارج حساباتي وحتى عمه نضال هم تسمرت بمكانها من شافته بس تمالكت أعصابها

نضال/ نزار شلونك وشوكت عافوك ومنو ذوله

نزار/ معليچ هذا شي خاص بيه انوب بقت عليه نضال أم المنغولي

ألق/ ودخل عمي نزار بس مبين مال واحد مرعوب وبقيت اني شلون بيه وأخير شي إتصلت على هيثم وبلغته آنه عمي نزار رجع شو هذا عاف سالفة انه نروح لأربيل ونزوح وركز على عمي نزار ويحلفني صحيح رجع عمچ وأني أحلف اگله رجع ويرجع يسأل شگال شسووا اله وشلون عافوا ومنو اخذه

الق / ما أعرف كل شي ما گال ورفض يذكر أي تفصيل شو هذا گام يكفر

هيثم/ انتي شنو من بشر من عرفتچ لليوم ما يوم سالتچ على موضوع يخصكم وجاوبتي مثل الأوادم يعني بس أريد أفهم گاعده بنصهم عميه وخرسه وطرشه

ألق/ تعجبت على رد فعل هيثم شبي هذا تصرفاته مو طبيعيه اني شعليه اذا عمي ما حچى شي وأخيرها هيثم غلق الخط بوجهي واتصل بي ما يجاوب وعفته واني تقريبًا للفجر يله نمت وما گعدت غير على صوت عمه نضال وهي تگعد بيه

نضال/ گومي يا مسعده وبيتچ على الشط وباچر يلعب عليچ البط گومي يا خايبه ما ظل شي كلها أيام ونصفى بالشارع

الق / خير شكو نصفى بالشارع راح تهدمون البيت

نضال/ لا حبيبتي عمچ الشفيه نزار راح يبيعه للبيت روحي اشتغلي گو ... سوي كل شي حتى تعيشين نفسچ وابوج واخوچ

الق / صدگ شگد چان النعاس مسيطر عليه بس من سمعت كلامها نفضت نفضه بس الله اليعلم بيها ساعتها راح النعاس وعيوني فتحتهن على وسعهن وگتلها / شنو يبيع البيت احنه وين نروح شنو نبقى بالشارع

نضال/ هو گالي راح أبيع البيت تعالي شوفي جاب دلال يقيم البيت

الق / صدگ گمت أركض ومديت راسي وأسمع عمي نزار يگول البيت 350 متر بشگد يسعر هسه واذا عندك شراي بعد احسن والدلال يجاوبه اني قبل فترة رادوا ناس بيت هنا بالمنطقة إتصل عليهم وأشوف اذا بعدهم يريدون البيت أجيبهم واجي عليك
يعني كلام نضال صدگ زين اذا يبيع وين نروح ومن طلع الدلال ودخل عمي نزار رحت عليه أسأله / عمو شنو راح تبيع البيت

نزار/ اي وشنو نملك راح ابيعه

ألق/ واحنه وين نروح آني وأبويه وأخويه

نزار / اخوچ راح اذبه على آهل امچ خوالچ مخابيل واخوچ مخبل وهمه يعرفون يربون المخابيل وابوچ اذبه بالشماعيه لان مخبل وانتي اكو ولد صاحبي دفع بيچ خوش سعر راح ازوجچ اله

ألق/ صدگ تخبلت عليه اني كل عمري جبته اخاف من عمي نزار ارجف بس من سمعت كلامه وخصوصًا على كلامه بعد ما عندي شي أخسره بقيت أصيح واگله / اخويه وأبويه مو مخابيل وأنت تعرف بس انت تريد تخلص منهم واني تبيعني بفلوس واني بنت اخوك يا ما عندك شرف ويه هاي الجمله اجتني ضربة على راسي تقريبًا افقدتني الوعي

آريا/ طبعًا بعد اتفاقي ويه سداد على روحتي للكشافه وأخذت منه مبلغ وچان لازم انطي ليسر ورحت للسوگ ويسر عنده محل مال دجاج بالسوگ وهو كل مره يفتر بالسياره ويبيع دجاج بس واني اتصلت بي وبلغته أنه الفلوس عندي وين أشوفه حتى اسلمه الفلوس گلي اني اليوم ما اطلع بالسيارة راح ابقى بالمحل ومن تجين للسوگ بس اسألي على يسر ابو الدجاج كلها دليچ عليه

واني مثل ما علمني سويت ويايه جيرانه آم بسام وگتلها أريد كيلو دجاج حتى اطبخه وزوجي گلي اخذي من يسر ابو الدجاج وين صاير هذا ابو الدجاج

ام بسام/ هاااا يسر ابو بنين اني اخذ منه دجاج تعالي ويايه

آريا/ وأخذتني ام بسام ورحنه عليه وهو شافني ويه ام بسام أرتبك بشكل واخذت منه كيلو دجاج وام بسام التهت سولف ويه وحده واني بسرعه طلعت الفلوس من جنطتي وانطيتهن اله وهو غمزلي وضحك وبعدها رحنه على ابو العطاريات اخذت مي ورد وبخور ورجعت للبيت وبيومها بطل مي ورد وبخور كلفن سداد مليون ونص وراها بليلتين هم خليت من المضعف الجنسي الكيميائي لسداد ورجع نفس الوضع ما عنده أي رغبه جنسيه وهو تخبل ويگلي

سداد/ شوفي آريا هاي مواضيع الدجل ما تدخل دماغي يعني شنو كل ليلتين انام بيها ويه زوجتي ادفع مليون ونص اذا اريد اطلع وحده من الملهى هم أرخص يعني اني كل اجازة لازم لدجاله مالتچ فوگ ال 5 ملايين هذا مو وضع واني شنو راح اگظي عمري كله هيچ لا ربحنه

آريا/ لعد شلون سداد اني زوجه وألي حق عليك غير حقوقي الزوجية تنطيني وانت خايف على الفلوس

سداد/ لا حبيبتي مو قصدي بس شويه اني من النوع إلي ابزع بسرعه اعذريني

آريا/ بوقتها مثلت عليه أنه اني دى اتاذى وآني أحبه وعلى ثاني عدت نفس السالفة وهم سحبت من سداد مليون ونص وانطيتهن ليسر يعني بين ما خلصت السبعة ايام الچانت باقيه من إجازة سداد اني ساحبه 3 مليون وراح سداد لدوامه يعني راح يبقى أكثر من اسبوعين يله يجي وبيومها عرف يسر انه سداد التحق لدوامه

يسر/ آريا اليوم بالليل أجي نعقد عقد متعه أريد أكون قريب عليچ بعد ما أتحمل

آريا/ شلون نعقد اني سداد وصلني مرتين

يسر / گتلچ الچ حق وفهمتچ شنو شروطه يعني يصير بينه وصل بس القذف حرام فهمتي

آريا/ بس اطفالي شلون يسر من يشوفوك أكيد راح يگولون لابوهم شلون بهذا الوضع

يسر / لا تخافين أني مخطط لكل شي لا يبقى في بالچ

آريا/ واتفقنه اني ويسر على ساعه 12 بالليل واني طبيعة أطفالي ما ينامون غير الفجر وبذاك اليوم گعدت اجهز بنفسي كأني عروس من مكياج وإزالة الشعر وعطر ما خليت شي بنفسي وشگد حاولت أخلي أطفالي ينامون بس ماكو فأيده وأتصل عليه يسر وگلي هو بالباب ومن طلعت وفتحت ألباب تفاجأت إنه لابس عباية على الراس ومنقبه ومن سألتها انتي منو عرفته من صوته ودخلته وهو بس دخل وسديت الباب گبل حضني قوي

يسر / اوف يا عطرچ شگد أحبه

اريا/ اگلك شلون راح تدخل للبيت وأطفالي شلون

يسر / بنفس الطريقه هاي على اساس اني صديقتچ وندخل للغرفة هي حسبتها ساعه واطلع من يمچ

اريا/ رجع يسر النقاب على وجهه وعدل العباية ودخلنه للبيت أيليا ما يفهم بعده صغير اما روجيدا ويبرق يفهمن ومن شافن يسر واجني عليه يسالن على ام العباية گتلهن صديقتي انتن ابقن العبن ويه اخوچن هسه شويه وارجعلچن ودخلنه اني ويسر للغرفة وقفلنه الباب نخاف لا واحد من أطفالي يدخل علينه ويسر ذب العباية والنقاب وهو يتلفت بالغرفة

يسر / الله ولچ شنو هاي من غرفة تخبل راقية الغرفة هذا زوجچ شگد عنده فلوس ونايم عليهن

آريا/ وانت هسه جاي شوف غرفه لو شنو

يسر/لا جاي أزوج حبيبتي شوفي راح اعلمچ شلون نعقد تگولين زوجتك نفسي على مهر قدره وخلي المهر الي يعجبچ والمده التعجبچ

آريا/ زوجتك نفسي على مهر قدره مائة إلف دينار ومدته سنه

يسر / قبلت

آريا/ بعد ما عقدنه وأتقرب عليه صار هو ويمارس العلاقة الحميمه يضربني قوي بحيث اظل اعيط بعلو صوتي ويجن بناتي يدگن بالباب ويصيحن شبيچ ماما وگوه اكتم صرختي الى ما خلصت ذيچ الساعة اتاذيت هواي وهو لبس العباية والنقاب وطلع

ومن دخلت اسبح شفت جسمي كله طگع وبقيت حايره شلون لو رجع سداد وشاف جسمي وبقينه اني ويسر حدود العشرة أيام يوميه يجي بالليل ويكرر آلي يصير اول ليله من ضرب قوي ويخلص ويروح بس بيوم 11 الله رحمني من ضربه والظهر اني گاعده اغدي أطفالي ندگت الباب طلعت وچانت اخت سداد جيهان هي وعدها اطفال أثنين ولد وبنية ومن شفتها انصدمت لأن زيارتها النه غير متوقعه وبعد السلام

جيهان/ حبيبتي آريا مشتاقلكم واجيت أريد أشوف سداد وينه هذا البذات ميته على شوفتكم صرتوا من اهل بغداد ونسيتونه لكن احنه ما نسيناكم وسويتها مفاجأة ألكم واجيت أشوفكم بدون ما تدرون شنو رأيكم بالمفاجاة

اني ظليت انطي ما اخذ ودخلنه للبيت وبناتي فرحن من شافن عمتهن واني لازم أبلغ يسر آنه ما يجي
وأتصلت على يسر ما يقارب 5 مرات ما جاوب أنوب خفت لا ما يصير عندي مجال أتصل وهو يجي بالليل وظليت أتصل بي لساعة 9 بالليل يله رد عليه ومن گتله على زيارة جيهان النه گام يصيح بس بعدها گبل هدئ وحتى استغربت نبرة صوته يعني من الصياح والغلط گبل صار أليف

يسر / آسف حبيبتي صدگيني مو قصدي اتعصب عليچ بس اني ما أرتاح اذا ما اشوفچ طالما اجتي اخت زوجچ خلاص ننتظرها لما تروح بس حبيبتي اني محتاج فلوس اريد منچ تنطيني مليون ما عندي

اريا/ منين انطيك فلوس وسداد ما موجود

يسر/ إني انتبهت ذيچ الأيام كلها إنتي لابسه ذهب سداد ما موجود انطيني ذهبچ ومن الله يمكني اشتريلچ واعوضچ عن الذهب

آريا/ واذا بعدين سداد سالني عن الذهب مالتي شنو يكون جوابي اله

يسر / تدرين سهله بعدين شنو يكون جوابچ عوفيها عليه باچر اطلعي أنتي وحماتچ للسوگ وبحجة دى تسوگين جيبيلي ما خف حمله وغلا ثمنه اريد القطع الثگيله فهمتي حبيبتي

آريا/ على ثاني يوم من ردت اطلع للسوگ جيهان ما قبلت تطلع وبقت يم الأطفال واني رحت لسوگ وانطيته جزء من ذهبي واشتريت اشياء من السوگ حتى شوف جيهان انه اني طلعت اسوگ مو ارجع وأيدي فارغه

وجيهان بقت يمي 3 ايام بس من يتصل سداد عليه تحلفني تگلي لا تگولين لسداد إني موجوده عدكم حتى من يجي ويشوفني صير مفاجأة وبيوم الرابع اجى سداد ومن شاف جيهان ظل حاضنها ويبوس بيها
واني وبناتي سلمنه عليه وبوس أيليا بعدها سالنه شلونه
جاوبته بنتي روجيدا/ كلنه زينين بس خطيه ماما تجي صديقتها يمها وتدخل وياها للغرفة وماما ظل تعيط

يتبع/ بكم أكتمل
تحية لكم من القلب الى القلب
دمتم في امان الله وحفظه
اختكم الكاتبة الزهيريه الزهيريه