سداد وبنت العرب

البارت الثاني

البارت الثاني

بقلم الكاتبة الزهيريه الزهيريه
لو كنت اعلم ان في الحب إختصار
لاختصرت كل حروف الأبجدية
ويلاه لو مات الغرام في مهجتي
ما عاد في الأزمان حياً

الق/  طبعًا اصعب حياة تعيشها انه عندك آهل وانت عايش يتيم وهذا چان وضعي اني واخويه وبخلال حياتي چنت أحسد أخويه لانه من متلازم الداون ولكون اني كامله ما بيه شي چنت ادرك كل شي يصير بيه عكس أخويه چان ينضرب وينهان على ايد عمه نضال گولده ماهير وچانت عمه بسمه زوجة عمو زهير بمثابة ام النه بس بيها طبيعه انه تخاف من عمه نضال وتچفى شرها وچانت تحبنه اني وأخويه هواي يعني من تضربنه عمه نضال تاخذنه للمطبخ وتگعد وتبچي ويانه  وتشتري النه حتى نسكت

وطبعًا سبحان الله البشر شگد يخطط  وكأنه راح يعمر بهاي الدنيا والانسان لو يعرف شوكت يموت چان اجنب هواي أشياء وما سوها يعني جدي من زوج أبويه بس امي جابت أخويه ورجعها عمي نزار شارون لأهلها وتحديدًا بيوم سقوط بغداد يوم 4/9 مو بس بغداد سقطت حتى بيتنه هم سقط وصارت السلطه بيد شارون وگولده ماهير  الي همه عمي نزار وزوجته نضال  لأن بهذا اليوم جدو  إنتقل إلى رحمة الله وحتى لكون چانت حرب ماكو واحد يقبل يروح للنجف حتى يدفنون جدو لهذا آمنوا ارض الحديقة جثة جدو  والعجيبة انه بعد ما سقطت بغداد بشهر رجعوا حفروا المكان آلي آمنوا بي جدو طلعوا جثة جدو مو كأنه صار شهر من مات لا كأنه البارحه مات والغريبه انه الارض تحفظ الأمانة والانسان يخون الأمانة لآن جدو وصى عمي نزار على أبويه وعلينه وهو خير من خان الأمانة

وأني ما اگلك شلون چانت حياتنه خصوصًا بيبتي خطيه نصابت جلطه وهي وزنها فوگ 100 وعشرين كيلو  لهذا صارت شبه المقعده لان يا دوب تسحل روحها وتروح على التواليت وكله البيت واحنه وحتى سباحة بيبي على عمه بسمه واني فتحت عيني على عمه بسمه اصيحلها ماما وحتى اخويه كذلك وبسنة 2006 عمي زهير راح  لمنطقة الاسحاقي حتى يجيب رگي لان هو يبيع رگي بالسوگ ومن راجع الفجر واصل لمحله ومن دى ينزل الرگي من السيارة الحمل هو والحمال جايين 2 على دراجة  نارية وبأسلحتهم  مفرغين شواجير اسلحتهم بعمي زهير بحيث مليان طلق من راسه الى رجله ومنو رمى عليه ومنو سوه بي هيچ شي ماكو واحد يعرف منو بدت أقاويل تتألف ناس يگولون لكون هو من فلان طائفه كتلته وناس تگول لا لكونه چان بعثي على اساس چان عمي زهير آمين سر فرقة وهو المسكين ما اله علاقة بكل شي ومنو سوه بي هيچ الله اليعلم

وطبعًا اول ايام چانت عمه بسمه زوجة عمي زهير كله بغرفتها بس حمدلله شلون تسكت گولده ماهير عمه نضال على هي أرملة ونزار يحل عليها خليها تروح تلزم عده في بيت اهلها بعد شعدها يمنه شو هي لا ولد ولا تلد والله صدگ شر البليه ما يضحك يعني هي گولده ماهير نضال تعير عمه بسمه لكون ما عدها اطفال على اساس گولده مخلفه درزن أطفال شو هي هم نفس الوضع ما عدها أطفال بعد على شنو تعيرها

وبعدها السبعه مال عمي زهير ما طالعه وراحت عمه بسمه لأهلها وحمد لله عمه بسمه بيت اهلها ورانا بفرعين يعني بنفس المنطقة  وصرنه تحت رحمة گولده نضال كلنه واني چان عمري 4 سنوات وأخويه 3 سنوات وحق الله چانت حتى لأبويه تضربه وتصيحله المنغولي وحتى أخويه تضربه ضرب بس الله اليعلم بي وتصيحله المنغولي النغل والله عشنه أيام بس اليعلم بيها نظل اسابيع بلا سباحه وحتى من تنطينه اكل والله تگعدنه بالمطبخ وذبلنه الاكل البايت بالصينيه عبالك دى تنطي لچلاب اما بيبي المسكينة نوبات تبقيها لليل بلا اكل بحجة انت دبه حميسه وضعفي اما عمي نزار أبد ما يرجع للبيت صاحي كله سكران

اما عماتي مريم ومنى نهائياً ابد ما يجن للبيت من جدو حرمهن من املاكه  وصارت مرات تجينه عمه بسمه تسبح بيبي واحنه هم سبحنه  لان حمدلله حتى گمل صار بينهوخطيه نظفتنه عمه بسمه  وشگد ما أوصف فضلها ورعايتها النه قليل بحقها وعمه بسمه راحت على عماتي مريم ومنى واني چنت وياها وحچتلهن كل إلي سوي بينه عمه گولده نضال  ولليوم أذكر كلام عمه مريم ومنى
مريم / حبيبتي بسمه احنه ابونه حرمنه من فلوسه وكلها نطاها لأولاده واني ومنى بقينه بذلة رجولتنه يا ما احتاجينه الفلس ومتنه من جوع وتحملنه غير هسه امي يفيدها نزار ورياض أني وأختي شعلينه شنو احنه بخيرهم ما خيرونه بس بشرهم عامين علينه

منى /وبلغي أمي هاي عدالة الله شوف شسوت بينه واستخسرت كل فلس بينه وفضلت ولدها ونسوان ولدها علينه وانطتهم كل فلوسها خلي همه يفيدوها واحنه متبرين منها ليوم القيامه وهاي حوبتنه شوف الله شسوه بيها

مريم/ عيني هسه بدون مطرود اخذي هاي بنت المنغولي وروحي تجين بعد بس انتي ومن تجين بعد لا تجيبن سيرتهم ولا تجيبين هاي بنت المنغولي وياچ

وطلعنه من يمهن والله الطريق كله تبچي عمه بسمه لما وصلتني لبيت جدو ومن دخلت يم بيبي ابد ما گالت لبيبي كلام عماتي نهائياً في وقتها ما أذكر شنو گالت لبيبي عنهن لان عمه نضال گبت عركه ويه بيبي وعمه بسمه على شنو ما أعرف وانتهت العركه بأنه عمه بسمه گالت لعمه نضال/ عيني راح أروح بس اجيت على عمتي حتى أتفق وياها على الق لان بدو يسجلون مواليدها بالمدرسة  وعمه نضال طلعت من غرفة بيبي
وعمه بسمه هم من دى تطلع ظلت تبوس بوجهي وهي تبچي وتگلي / شلون يا ربي وين اوديچ وشلون راح تعيشين ويه نضال الكم الله

وبالفعل عمه بسمه هي ألي سعت وسجلتني بالمدرسة خطيه ركضت بأيدها ورجلها لما سجلتني وحتى تجهيزات المدرسة هي جابتهم ألي وطبعًا ما أكذب واگول چنت شاطره بس چنت فهمي على النص لآن ماكو أحد يدرسني بصراحة وبالإضافة الى التكفخ مال گولده ماهير خلت دماغي محشش واني چانت عندي حرب نفسيه بالمدرسة  لان الطالبات كلهن يضحكن  عليه وكله يصيحلي بنت المنغولي وبالبداية چنت شابعه كفخات منهن بس الواضح هاي الدنيا الفقير يدوسون عليه لهذا صرت وحشية بحيث صارت الي تضربني اضربها لو اعضها  وحتى من جوعي صرت اكتلهن للطالبات واخذ منهن الأكل بحيث صارت عليه الشكاوى يم المديره هوايه عليه بالبداية چانت المديره تكتفي بس تضربني بس بعدين تطورت اني صرت ابوگ آكل ومصرف الطالبات وعمه نضال گولده تعرف بهذا الشي وشنو أجيب من المدرسه تاخذ الفلوس وتنطيني الأكل والحلويات

الى ما بيوم  چانت  المعلمة مالتنه درسنه ومخليه الجنطه على الرحلة يمي وهي اجتي عليها معلمة وگفن اثنينهن يسولفن واني فتحت جنطتها ولگيت فلوس هوايه  ملفوفات بلاستيكه مال فلوس اخذتهن وخليتهن بجنطتي وچان درس أخير وهي المعلمة ظلت تسولف ويه المعلمه لما دگ الجرس وهي گبل طلعتنه ومن وصلت للبيت اجتي

عمه نضال وفتشت جنطتي ولگت الفلوس وگالتلي / عفيه هاي الصيده الزينه ولچ منين جبتيهن

الق / من جنطة معلمتي

نضال/ ولچ اي عفيه بعد اشتغلي على المعلمات واذا تگدرين هم على جنطة المديره هاي فلوسها أكثر يا غبره

وعلى ثاني يوم آول ما دخلت للمدرسة گبل أخذني الحارس على الإدارة والمديرة لزمتني موتتني كتل
وهي تگلي / ولچ حرامية طلعي الفلوس الي بگتيهن من جنطة ست ختام

واني ابچي واگللها/ ما اخذت أي فلوس

والمديره تگلي / هسه اسلمچ للشرطة واخليهم يموتوچ كتل ويسجنوچ

هنا اني خفت گتلها / ست المديره الفلوس عند عمه نضال

والمديره تخبلت وصاحت على الحارس وگالتله/ تروح ويه هاي البنيه لبيتهم وتبلغهم انه بنتهم تبوگ واذا ما يجون أبلغ الشرطة عليهم

وبالفعل جابني الحارس يسحل بيه واني ابچي والمشكله بتك حذاء والفرده ثانيه وين راحت ما اعرف واني الي دليت الحارس على بيتنه وظل يدگ بالباب بس ماكو احد طلع  بحيث كسرها للباب وماكو آحد وطلعت جوارينه كونه وهاي حمدلله اي خبر بالمنطقة تطلع هي المؤسس مالته گاضيه نهاره كله عباتها براسها وتفتر بحيث ما تفوتها لا شارده ولا وارده

وهي شافت الحارس وهو لازم أيدي واني ابچي وهي گامت تصرخ وتصيح/ يا سامعين الصوت من أربع جهات هذا الرجال يريد يخطف بنت رياض المنغولي

وهي نحمد الله ونشكره صوتها ستريو وهي لأزمه أيدي الثانيه وجر بيه من الحارس وهاي ناس التمت منين ما أعرف واكو زلم التموا على الحارس وحصله كم كفخه وهمه يگولوله/ يا بلا شرف لمن مچلب ببنيه بگد بنتك وتريد تخطفها ما خفت ربك

وهو بالگوه خلص نفسه منهم فهمهم شنو المشكلة وانه هو حارس المدرسة  واكو واحد من جوارينه مد أيده وفتح ألباب الرئيسي ودخلني للبيت
وگال للحارس/ روح عيني واني ابلغ عمها بالموضوع وهو يجي يراجع المدرسه

ومن دخلت للبيت ماكو بس بيبي وأخويه وأبويه إلى الضهر يله اجتي عمه نضال وطبعًا اكيد جوارينه كونه گايله الها الصار واجتي شايطه عليه
نضال/ ولچ مصخمه انفضحنه بالمنطقة كلها واياچ وبالچ تگولين نطيت الفلوس لعمه نضال من يسالچ عمچ نزار فهمتي لما أشوف شلون نزار يسد الموضوع

وبالفعل للعصر ظهر عمي نزار بالبيت وتلگته عمه نضال/ يعني نزار اليوم بالمدرسه تاهمين الق على اساس بايگه فلوس ما أدري منين وهي طفله بصف آول تعرف تبوگ  روح باچر للمدرسه وأخذها وياك وشوف شنو المشكلة  وشوف المديره الي ما تخاف ربها شمسويه بيها شلون ضاربتها

وعلى ثاني يوم أخذني عمي نزار للمدرسه ومن دخلنه للأدارة المديره واول ما شاف المديره وگعلها دگ رزايل على شلون تضربين بنت اخويه وهي كل شي ما مسويه

والمديره تگله/ بنت اخوك باگت فلوس معلمتها وهي خطيه هستوها قابضه سلفه وصديقاتها شهدن عليها

وعمي نزار صار يهددها بجماعة فيما بعد فهمت انه هو منتمي لحزب ويحچي بحيل صدر ويگول للمديره/ والله إلا أعزل المدرسه تتهموها بالبوگ وتضربوها أني مو آبن ابويه اذا خليتچ تگعدين وره هذا الميز إلا اخليهم يشيلوچ بصندوگ سيارة البطه شنو دليلچ عليها حچي بنات صغار

وخله المديره تتوسل بي تريد بس سد الموضوع على احنه خطئنه وسامحنه وانه اني بنيه فقيره حتى صوت ما ينسمع ألي  وبعد هاي المشكلة صارت المديره ما تستقبل اي شكوه ضدي  وبقيت بنفس المدرسة

وسبحان الله الي عايش مثل طفولتي بجوع وضرب وخوف يصير بمصاصه يتقشمر يعني اني بعمر أول ابتدائي لا احد ينطيني أكل ولا مصرف وارجع من المدرسه حتى آكل بالبيت ماكو شتتوقعون راح اطلع والله اكثر الاحيان الجوارين تتصدق علينه واكو وحده من جوارينه اسمها كونه لليوم اذكرها چانت اجيب الأكل الزايد وتنطي ألي وتگلي روحي أكلي أنتي واخوچ وابوچ وبيبيتچ قبل ما تجي نضيله

والعجيب عمه نضال چانت هواي تطلع وين تروح ما أعرف وعمي نزار كل شي ما نفهم منه يجي بالنهار بس يصيح ويسب ويغلط ويضرب بينه ويطلع وين يولي ما اعرف وبالليل هو سكران

ونضال گولده ماهير چانت من تجي تدزني على محل صاير براس الفرع مالتنه اجيبلها حلويات لو معلبات لأن حضرتها تكون جوعانه وتريد تزقنب ومن أروح مرات اكو ولد موجود من يشوفني ينطيني حلويات الي يگلي شتردين اخذي واني في وقتها طفله ما افهم شي لهذا اخذ الي ولاخويه ومن أرجع للبيت ولكوني غبره وما أفهم  ما اضمهن لهذا گولده ماهير شوفهن وتاخذهن مني  وفي ذلك  ما عندي احد يعلمني او ينصحني لهذا الولد إلي بالمحل گام ما يقبل ينطيني إي حلويات وبعدها بأيام گلي اذا تردين انطيچ حلويات تعالي ويايه للمخزن شويه وبعدها انطيچ شنو تريدين
وأخذني ويا للمخزن

هسه نجي على البطل
السلام عليكم
اسمي سداد طبعًا اني كردي من أربيل مواليدي 1987 متزوج واب لثلاثة اطفال وابويه چان من أشد أنصار كاكا مسعود البرزاني وضعنه المادي توب بس بينه صفه بعائلتنه آنه عنصريين يعني ما نزوج الا كردية لهذا اني حبيت بنيه ويايه اختي بالجامعه فائقة الجمال وهي هم حبتني بحيث ايام الجامعة عشنه احلى قصه حب وكل صديقاتها بالجامعه يحسدونها الى ما تخرجنه من جامعاتنه وتقدمت الها ولكون احنه من عائلة معروفة آهلها انطوها إلي وهذا چان اجمل شي بحياتي آنه راح انجمع بحبيبتي وبالفعل ازوجنه واول ما ازوجنه الله رزقنه إنه حبيبتي صارت حامل وهذا چان اسعد خبر اسمعه بحياتي بهذا الوقت تمرض والدي وأني استلمت مكانه وصرت اتنقل بحارسة شخصيات من عائلة البرزاني
الى ما صرت بحارسة شخصية كردية داوم في الخضراء في بغداد لهذا چان لازم انتقل لبغداد واخذ زوجتي ويايه وهذا چان مصيبة حياتي

يتبع
طبعًا كلها سالت شلون موعد التنزيل راح يكون يومين تنزيل ويوم أستراحة
بكم اكتمل
تحية لكم من القلب الى القلب
أختكم الكاتبة الزهيريه الزهيريه