အပိုင်း - ၁၆
ကြည့်ထားလိုက်စမ်းပါ ။ ဒီလူက ကျွန်တော့်အပိုင်။
ဘယ်လိုအကြောင်းတရားတွေပဲရှိရှိ ဒီလူက
ကိုယ့်ရဲ့အပိုင်ပဲဆိုတာကို ဘေးနားမှာရှိနေတဲ့သူကို
မြင်သာအောင်ပြလိုက်နိုင်ရင်ကို ကျေနပ်နေပြီ။
နောက်ပြီး ကုမ္ပဏီမှာတုန်းကလို ကိုယ့်ကို နှင်မလွှတ်တာကို ပိုပြီးကျေနပ်သည်လေ။
*
*
*
*
*
*
*
*
" ကျေးဇူးပဲနော် ထက်မြတ် ၊ ကိုယ်တစ်ယောက်ထဲ
သာဆိုဒီနေ့မပြီးလောက်ဘူး ၊ အလုပ်ကအလျင်လို
နေပါတယ်ဆိုမှ လင်းမြတ်ကလဲခရီးသွားရတော့
ကိုယ်တော့သေပါပြီလို့တောင်တွေးနေမိတာ ၊ ထက်မြတ်လာကူပေးလို့တော်သွားတာ "
" ရပါတယ် ကိုထွဋ်ရဲ့ ဒီအပိုင်းတွေကျတော့
ကိုလင်းမြတ်က ကျွန်တော့်ကိုတော်တော်ရှင်းပြပေးထားလေ၊ သဘောတရားတွေနားလည်ထားတော့ အခုလက်တွေ့ပြန်လုပ်တဲ့အချိန်မှာ လွယ်သွားတာထင်တယ် "
ထက်မြတ်ဦးနဲ့စကားပြောနေရင်း အလုပ်တွေပြီးတဲ့အထိ ကိုယ့်ပေါင်ပေါ်မှာ ငြိမ်ပြီးထိုင်နေတဲ့သူကိုလည်းလှည့်ကြည်မိသည်။ကိုယ့်လည်ပင်းတွေကိုသိုင်းဖက်ထားရင်း ကိုယ့်ပခုံးပေါ် ခေါင်းတင်ကာ အိပ်ပင်ပျော်နေလေပြီ။ ဒီလိုပုံစံနဲ့များ အိပ်ပျော်နေရတယ်လို့ကွာ ။ခါးတွေနာကုန်တော့မှာပဲ ။သူဖြင့်တစ်လုံးမှနားမလည်တဲ့စာရင်းတွေလုပ်တဲ့နေရာလာထိုင်နေမှတော့ ပျင်းပြီးအိပ်ပျော်ပြီပေါ့။
" ကိုသက်ထက်ပန် အိပ်ပျော်နေပြီထင်တယ် "
" အဟွင်း! ! ပျင်းသွားတာရော မနက်ကအိပ်ရေး
မဝသေးတာပါပေါင်းပြီး အိပ်ချင်သွားတာနေမယ် ၊
သူကအိပ်ရမယ်သာဆိုရင်အစားမစားရလည်း ဖြစ်တဲ့လူစားမျိုး ၊ အအိပ်မက်တယ်"
သဘောကျစွာပြန်ဖြေမိရင်း နှာခေါင်းလုံးလုံးလေးကို
ဖြေးဖြေးလေးညှစ်လိုက်မိသည်။ အသားအရေက
နူးညံ့လွန်းလို့ သူ့တစ်ကိုယ်လုံးဘယ်နေရာကိုထိထိ
ဝါဂွမ်းလေးကိုတို့ထိရသလိုမျိုး ခံစားရစေရ၏ ။
" ကိုထွဋ်အတွက်တော့ လက်ထပ်ထားတဲ့အမျိုးသားဆိုတာထက် ကလေးလေးလိုဖြစ်နေမယ်ထင်တယ် ၊ဒီလောက်တောင်ချွဲတက်မှတော့ စိတ်ချမ်းသာစရာလေးတွေကို နေ့တိုင်းမြင်နေကြားနေရမှာပဲ "
" ထင်လို့ပါ သက်ထက်ပန်က သူများတွေထင်သလောက်လဲ မချွဲတက်ပါဘူး "
သက်ထက်ပန်ကမချွဲတက်ဘူး ။ သရုပ်ဆောင်တက်တာလိုပြောချင်ပေမယ့် ပြုံးယုံသာပြုံးမိသွားသည်။ ဒီကလေးက တကယ့်မနိုင်စိန် ။
" ကဲ ဒါဆိုကျွန်တော်ပြန်တော့မယ်နော် ကိုထွဋ် "
" ကျေးဇူးပဲနော်ထက်မြတ် ၊ နောက်ရက်အလုပ်တွေပါးသွားရင် ကိုယ်သီးသန့်လိုက်ကျွေးပါဦးမယ် ၊ ဒီရက်ထဲတော့အလုပ်တွေကများနေလို့ "
" ရပါတယ် ကိုထွဋ်ရယ် တကူးတကလုပ်ပေးရမယ့်
သူတွေမှမဟုတ်တာ ၊ ကဲ ကျွန်တော်သွားပြီနော် "
" ဟုတ်ပြီ ဟုတ်ပြီ ကိုယ်တော့လိုက်မပို့တော့ဘူးနော်ဒီမှာကမြင်တဲ့အတိုင်းပဲ "
ကိုယ်လုံးသေးသေးလေးကို ခပ်ဖွဖွထွေးပွေ့ပြီး
ပြောလိုက်တော့
" ဟုတ်ရပါတယ်ဗျာ "
ထက်မြတ်ဦးအခန်းထဲကနေထွက်သွားတော့မှ အိပ်ပျော်နေသူကိုပွေ့ချီဖို့ကြိုးစားလိုက်တဲ့အခါ လူးလွန့်လာသည့် ခန္ဓာကိုယ်နှင့်အတူ မျက်လုံးပွင့်လာသည်။ ပြီးတာနဲ့ ဘေးဘီကို လှည့်ကြည့်အကဲခတ်ရင်း သူ့မျက်လုံးတွေကိုပွတ်နေပြန်၏ ။
" အလုပ်ပြီးသွားပြီလား "
" ပြီးသွားလို့ ထက်မြတ်ဦးတောင် ပြန်သွားပြီ
မသိလိုက်ဘူးမဟုတ်လား အိပ်ပုတ်နေလို့ "
သက်ထက်ပန်ကတော့ ချက်ချင်းဆိုသလိုပဲ ကိုယ့်ပေါင်ပေါ်ကနေထပြီး အခန်းအပြင်ကိုထွက်ဖို့ပြင်သည်။သူ့လက်ကိုလှမ်းဆွဲထားတော့ မျက်မှောင်ကျုံ့ပြီးလှည့်ကြည့်လာရင်း
" ဘာတုန်း စားပြီးနားမလည် ချက်ချင်းထပြေးဖို့ပြင်နေတာလား "
" ဘာဗျ ခင်ဗျား "
" ဟာ ခင်ဗျားဖြစ်သွားပြီလား မြန်လိုက်တာကွ
ထက်မြတ်ရှေ့မှာကျ ကိုကိုဆို သားကဆို ၊
အခုလည်းကျရော ချက်ချင်းလေသံပြောင်းသွားတာ
ကြည့်စမ်း ၊ မသိရင် အနိမ့်ဆုံးကီးကနေ အမြင့်ဆုံးကီးကို ခုန်ကူးလိုက်သလိုပဲ အသံအနိမ့်အမြင့်က တအားကွာခြားတယ်နော်"
" ခင်ဗျား မျက်နှာလာမရူးနဲ့နော် ၊ လက်ကိုလွှတ်
အိပ်ချင်နေလို့ အခန်းထဲမှာသွားပြန်အိပ်မလို့ "
" လေသံကမာလိုက်တာကွာ ၊ နှလုံးသားလေး
နာကျင်သွားရပြီ "
ပြောရင်းနဲ့ လက်ကိုဆောင့်ဆွဲလိုက်တာကြောင့်
လူကယိုင်သွားရပြီး ထိုင်နေတဲ့သူ့ရဲ့ပေါင်ပေါ်ကို
ထပ်ပြီးထိုင်ရက်သားကျသွားရသည် ။ ကိုယ့်ခါးတွေကို သူ့လက်နှစ်ဖက်နဲ့ပွေ့ဖက်ထားရင်
" ဘာလို့ပြန်အိပ်ဖို့လုပ်နေတာလဲ နာရီကိုကြည့်ဦး
နေ့လည်ထမင်းစားချိန်ရောက်နေပြီ "
" မသိဘူး အရမ်းအိပ်ချင်လာလို့ "
" အချိန်မဟုတ်အိပ်ရင် နေမကောင်းဖြစ်တတ်တယ် မအိပ်တော့နဲ့နော် ထမင်းသွားစားရအောင် "
" အဲဒါဆိုလည်း အခုသွားစားမယ် "
" ခဏနေဦး ပြောစရာရှိသေးတယ် "
စကားဆုံးတာနဲ့ ကိုယ့်ပါးတွေကိုအတင်းဖိကပ်ကာ
နမ်းနေပြန်သည်။နမ်းတာမှ အားကုန်သုံးပြီးအချက်
ပေါင်းများစွာဖိပြီးနမ်းနေတာ ။
" ရား! !! ခင်ဗျား ဘယ်လိုဖြစ်နေတာလဲလို့
နာလိုက်တာ သူ့အသားမဟုတ်တိုင်းမညှာမတာ "
" ပါးကြီးတွေကဖောင်းကားနေတာပဲကွာ နမ်းလို့
ကောင်းချက်"
" ခင်ဗျာ "
" ကိုကိုလို့ပြန်ခေါ်ပါလား ၊ မင်းငယ်ငယ်ကဆိုရင်
ကိုယ်ခြံထဲဆင်ရင်တောင် ကိုကိုသားလည်းလိုက်မယ်နော်ဆိုပြီးပုဆိုးစဆွဲလိုက်တတ်တယ်လေ "
" ဟုတ်တယ်လေ အဲလိုတွေအနားကပ်တိုင်း ခင်ဗျားပဲ အော်ငေါက်နေတာမဟုတ်ဘူးလား "
" Sorry ကိုယ်တောင်းပန်တယ် "
" တောင်းပန်လည်း သေတဲ့အထိမှတ်ထားမှာဘဲ "
" ညာပြောနေပြန်ပါပြီ မင်းကအဲလိုတွေမှတ်ထားပြီး
ကိုယ့်ကိုစိတ်နာနေတဲ့သူမှမဟုတ်တာ ၊ ကိုယ့်ကိုဆိုရင် အမြဲတမ်း ခွင့်လွှတ်ပေးတယ်လေ "
" ဝါးဟားဟားလို့ပဲရီလိုက်ချင်တယ် ဘယ်တုန်းက
ခွင့်လွှတ်ပေးမိလို့်လဲ "
" အရင်ထဲကပဲလေ မင်းသာကိုယ့်ကိုခွင့်မလွှတ်ရင် ဘာလို့များ ကိုယ့်ကုမ္ပဏီအထိ လာလာချောင်းကြည့်နေမှာလဲ ဟုတ်တယ်မို့လား "
ကြားလိုက်ရတဲ့စကားကြောင့် သက်ထက်ပန်တစ်ယောက် ကိုယ့်ဘာသာ မလုံမလဲဖြစ်မိသွားရတော့သည်။ အရင်အချိန်တွေတုန်းက သူ့ကုမ္ပဏီအရှေ့ထိ သွားသွားချောင်းကြည့်ခဲ့ဖူးတဲ့အကြောင်းတွေကို သူဘယ်လိုများသိသွားရတာလဲ ။
" ဘယ် ဘယ်တုန်းက လာချောင်းမိလို့လဲ မဟုတ်တာတွေကိုပြောနေတာ "
ငြင်းလိုက်မိပေမဲ့ လေသံကမူမမှန်ချင်။ ဒါကိုလည်း
လူကဲခတ်မညံ့သူက သေချာပေါက်သတိထားမိမှာပင်။
" ဒီမှာ ကိုယ်ကလေ ကိုယ်ရဲ့ကုမ္ပဏီပတ်ဝန်းကျင်မှာဘာဖြစ်လို့ဖြစ်နေမှန်းမသိရလောက်အောင် လက်လွတ်စပယ်နေမဲ့သူလို့ ခင်ဗျားလေးထင်နေတာလား ၊ ကလေးစိတ်နဲ့မို့လာချောင်းမိပါတယ်လို့ဝန်ခံလိုက်ရမှာကို အတင်းငြင်းနေတော့တာပဲ "
" မသိ မသိဘူး ထမင်းသွားစားတော့မယ် "
ထမင်းစားခန်းထဲထွက်ပြေးချင်ပေမယ့် တင်းကျပ်စွာဖက်ထားသူကြောင့် ထွက်ပြေးခွင့်မသာခဲ့ပါ ။
ကိုယ့်လည်တိုင်ဆီ အနမ်းတို့ဖြန့်ကြက်ခံလိုက်ရရင်း
" မင်း ကိုယ့်ကိုချစ်လား သက်ထက်ပန် "
" ဘာ ဘာလို့ခင်ဗျားကိုချစ်ရမှာလဲ "
သူကအရင်ပြောရမယ့်စကားကို ကိုယ့်လာမေးနေတာကြောင့် ဒေါသနဲ့ငြင်းလိုက်မိတော့၏ ။
" မညာရဘူး အမှန်တိုင်းပြော "
" ဒါဆို ခင်ဗျားအရင်ဖြေလေ ကျွန်တော့်ကိုချစ်လား "
" ကိုယ်ပြောထားတယ်လေကွာ ၊ ကိုယ့်ဘက်က
ကိုယ့်ရဲ့စိတ်ခံစားချက်ကို အလုံးစုံရှင်းရှင်းလင်းလင်း သိတဲ့အချိန်ကျရင် မင်းကိုဝန်ခံမယ်လို့ "
" ဟုတ်ပြီလေ ခင်ဗျားရဲ့စိတ်ခံစားချက်ကိုအလုံးစုံ
ရှင်းရှင်းလင်းလင်းသိတဲ့အချိန် ခင်ဗျားဘက်ကဝန်ခံ ၊ပြီးရင် မင်းရောငါ့ကိုချစ်လားသက်ထက်ပန်လို့ထပ်ပြီးမေးပါ ၊ အဲအချိန်ကျရင်အမှန်တိုင်းအဖြေပေးမယ်ခင်ဗျားဘက်ကစပြီးဝန်မခံသရွေ့ ကျွန်တော့်ဘက်ကလည်း ခင်ဗျားစိတ်နဲ့ထပ်တူပါပဲ ၊ ခင်ဗျားက ကျွန်တော့်ကိုချစ်ရင်ကျွန်တော်လည်းခင်ဗျားကိုချစ်တယ် ၊ ခင်ဗျားကမှမချစ်ရင်တော့ ကျွန်တော်ကလည်းချစ်မနေဘူး ၊ အဲဒီထက်ပိုပြီး ခင်ဗျားကမုန်းနေတာပါဆိုရင် ကျွန်တော့်
ဘက်ကလည်းထပ်တူထပ်မျှပါဘဲ ၊ ကျွန်တော့်အပေါ် ခင်ဗျားဘယ်လိုဆက်ဆံသလဲဆိုတာကိုမူတည်ပြီးတူညီတဲ့တုန့်ပြန်မှုဘဲရမှာပါ ၊ ပေးဆက်ပြီးချစ်တာတို့တစ်ဖက်သတ်ချစ်တာတို့ဆိုတာမျိုးလေး လာမပြောပါနဲ့ ကျွန်တော်ကအဲလောက်ဈေးမပေါဘူး "
" ခေါင်းမာချက်ကလည်း ထင်မထားလောက်အောင်ပဲကွာ"
ခပ်တိုးတိုးပြောလာသည့်စကားထဲတွင် စိတ်မကျေနပ်ခြင်းတွေပါနေမှန်းသိသာသည်။ တော်ပြီလေ ခန္ဓာကိုယ် တစ်ခုလုံးကိုဈေးပေါပေါနဲ့ပေးထားခဲ့ရပြီးပြီ။ နှလုံးသားထဲကနေပေါက်ဖွားလာတဲ့ သန့်စင်တဲ့အချစ်ကိုတော့ ရတဲ့နည်းနဲ့ဂုဏ်မြှင့်ပါရစေ။
" ကောင်းပြီလေ ဒါဆိုရင် အခု ကိုယ်တို့တွေသဘောတူညီချက်တစ်ခုလောက်လုပ်ရအောင် "
" ဘာလုပ်မှာလဲ "
" မင်းက အရင်ကလိုပဲ ကိုယ့်ကိုကိုကိုလို့ခေါ်ပေးပြီး
မင်းကိုမင်း သားလို့သုံးပေးရမယ် "
" ဒါဆို ခင်ဗျားကရော "
" ကိုယ်ကမင်းကို သက်ထက်လို့ခေါ်မှာ ၊ နောက်ပြီး
မင်းကဒီနေ့လိုမျိုးဘဲ ဘယ်သူ့အရှေ့မှာမဆို
ကိုယ့်အပေါ်သဝန်တိုခွင့်ရှိတယ် ၊ မင်းကိုလည်း
ပိုပြီးဂရုစိုက်ပေးမယ် "
" ကောင်းပြီလေ သဘောတူတယ် "
ကိုယ့်ရဲ့တောင်းဆိုချက်ကို ငြင်းဆန်မယ်ထင်နေမိပေမယ့်ချက်ချင်းပဲသဘောတူကြောင်းပြောလာသည်။သက်ထက်ပန် ဒီကောင်လေးရဲ့စိတ်က တကယ်ကို ခန့်မှန်းရခက်လှသည်။
*
*
*
*
*
*
*
*
သဘောတူညီချက်တစ်ခုကိုရပြီးတဲ့နောက်မှာတော့
မကိုဋ်ရဲ့အိမ်မှာ အရင်ကလိုပဲ ဆူဆူညံ့ညံ့အသံတစ်ချို့ပြန်ကြားလာရလေတော့သည် ။
" ကိုကို သားဒီနေ့ကုမ္ပဏီကိုလိုက်လာပြီ ကိုကိုနဲ့
ထမင်းအတူတူစားမယ်နော် "
" ကိုကိုရေ ဒီနေ့တော့ စောစောပြန်လာနော် "
" ကိုကို ပိတ်ရက်ကျအလုပ်ရှိရင် အိမ်မှာဘဲလုပ်နော် "
" ကိုကိုရေ ပိတ်ရက်ရရင် သားကိုအပြင်လိုက်ပို့ပေးနော်ပန်းမျိုးစေ့တွေဝယ်ချင်လို့ "
" အိမ်မှာနေရတာပျင်းလို့ ကုမ္ပဏီကိုလိုက်ချင်တယ် သားကို ခေါ်ပါလားကိုကို "
" ကိုကို အလုပ်ကအပြန် အရမ်းနောက်မကျရင်
မုန့်ဝင်ဝယ်လာပေးပါလား "
" ကိုထက်မြတ်ဦးနဲ့ အရမ်းမရောနဲ့နော် ကိုကို"
" ကိုကိုရေ ..... "
" ကိုကိုရေ .... "
သက်ထက်ပန်ရဲ့ ကိုကိုရေဆိုသည့်စကားသည့်
နေ့စဉ်ကြားနေရသည့် အိမ်ရဲ့ဆည်းလည်းပင်
ဖြစ်နေလေတော့သည်။
*
*
*
*
*
*
*
*
" အောက်ကိုဆင်းဦးနော် သက်ထက် "
အိမ်ထောင်သက်သုံးလပြည့်သည့်နေမှာပင် ကိုယ့်ကိုအရေးကြီးတဲ့နေရာဆီ သွားစရာရှိလို့ဆိုပြီးခေါ်လာခြင်းဖြစ်သည်။ ဘယ်ကိုသွားမှာလဲဆိုပြီးမေးမိပေမယ့်ရောက်ရင်သိမှာပေါ့လိုသာပြန်ဖြေခဲ့လေသည်။
အခုရောက်လာရသည့်နေရာကတော့ လူသူကင်းမဲ့
နေသော သုသာန်တစပြင်သာဖြစ်နေသည်။
" လာ ကိုယ့်လက်ကိုတွဲ "
ကမ်းလာပေးသည့်လက်ကို လှမ်းဆွဲလိုက်သည့်အခါ သူ့လက်ဖျားတွေဆီမှ အေးစက်လွန်းနေသော
အထိအတွေ့။ သူကြောက်နေတာလား ဒါမှမဟုတ်
စိတ်လှုပ်ရှားနေတာလား ။ဝေခွဲမရသည့်အတွေးနှင့်ပင် သူဆွဲခေါ်ရသို့လိုက်ပါသွားရသည်။
အရိပ်အာဝါသကို သေချာစွာလုပ်ပေးထားသည့်
အသစ်တိုင်းရှိနေသေးသော အုတ်ဂူလေးတစ်ခု ။
နေ့စဉ်လဲပေးထားပုံရသည့် ပန်းတစ်ချို့ ။
အုတ်ဂူထက်က စာတန်းကိုဖတ်ကြည့်မိတော့
" မောင်ရှိန်းခေါင်ယံ ( အသက် ၁၉ နှစ် )
7.12.2022 ဗုဒ္ဓဟူးနေ့တွင် ကွယ်လွန်သည်။ "တဲ့။
" ဒါ ဒါက "
ကိုကို့ကိုမော့ကြည့်လိုက်ရင်း စကားဆိုလိုက်မိတော့ ခပ်ဖွဖွလေးပြုံးပြလာကာ
" ကိုကိုနဲ့သက်ထက် သူဆီကိုတစ်ခါလောက်တော့
အတူတူလာတွေ့သင့်တယ်ထင်လို့လေ "
ပြောပြီးတာနဲ့ ရှေ့ပြန်လှည့်သွားသူရဲ့မျက်ဝန်းတွေထဲမှာ မျက်ရည်ကြည်စအချို့ရစ်သိုင်းနေမှန်း သိလိုက်သည်။ သိပ်ကိုအသည်းမာတဲ့သူဆီနေက မျက်ရည်ကျရလောက် အောင် အချစ်ခံရတဲ့သူဆီ ကိုယ်ပါလိုက်လာခဲ့ရတာပါလား။
" ကိုယ် ဒီတစ်ခေါက်လာတွေ့တာနည်းနည်းကြာသွားတယ်နော် ၊ အဆင်ပြေပြေနဲ့ အေးအေးချမ်းချမ်းရောရှိတယ်မဟုတ်လား ရှိန်းငယ် ၊ ဒီတစ်ခါတော့ ဧည့်သည်တစ်ယောက်ပါခေါ်လာပေးတယ် ၊ သူက သက်ထက်ပန်တဲ့ ကိုယ့်ရဲ့ ကိုယ့်ရဲ့အမျိုးသားပေါ့၊ ရှိန်းငယ်ဆုံးပြီးသိပ်မကြာခင်ပဲ ကိုယ်လက်ထပ်လိုက်တယ်လေ ၊ နောက်ပြီး သူကရှိန်းငယ်နှလုံးလှူပေးခဲ့တဲ့ကလေးပဲ ၊ သူလေးကျန်းကျန်းမာမာရှိနေတာကိုမြင်ရရင် ပျော်မယ်မဟုတ်လား "
ပြောလက်စ စကားကိုခဏရပ်လိုက်ကာ ကိုယ့်ဘက်ကို လှည့်ကြည့်လာလေသည်။
သက်ထက်ပန်မှာလဲ ကိုယ့်ရဲ့အသက်သခင်ကျေးဇူးရှင်ရှိတဲ့နေရာဆီကို ရောက်လာရတဲ့အချိန်မှာ လက်ဖျားတွေအေးစက်လာရတော့သည်။
" ကျွန်တော်ကသက်ထက်ပန်က ၊ အကိုလေးရှိန်း
နှလုံးလှူပေးခဲ့တဲ့သူပါ ၊ အသက်သခင်ကိုအစောကြီးထဲက လာတွေ့သင့်ပေမယ့် အခုမှလာမိလို့တောင်းပန်ပါတယ် နောက်ပြီး အရာအားလုံးအတွက် ကျေးဇူးတင်ပါတယ်၊
စိတ်ရင်းအမှန်နဲ့ကိုကျေးဇူးတင်တာပါ "
စကားသံတို့ ခဏတာမျှတိတ်ဆိတ်သွားပြီးမှ
"သက်ထက်လေးလဲ ကျန်းကျန်းမာမာရှိနေတယ်၊
ကိုယ်လဲ ပျော်အောင်နေ အင်း .... ကိုယ်လဲ
အဆင်ပြေအောင်နေနေလို့ ရှိန်းငယ်လဲ ဘာကိုမှ
နောက်ဆံမတင်းဘဲ အေးချမ်းတဲ့ဘဝသစ်တစ်ခုကို
စရမယ်နော်၊ တစ်ချိန်ချိန်များပြန်ဆုံဖြစ်ခဲ့ရင် ဒီဘဝမှာမင်းကို မကာကွယ်နိုင်ခဲ့သမျှအတိုးချပြီးကာကွယ်ပေးဖို့ ကတိပေးပါတယ် ၊ဒီဘဝမှာတော့ ကိုယ့်ကမင်းကို လက်လွှတ်ပေးလိုက်ပြီမို့ အေးချမ်းပါစေတော့ ရှိန်းငယ်ရယ် "
အဖျားခတ်တုန်ရီသွားသောစကားသံနှင့် လွင့်စင်ကျလာ သည့်မျက်ရည်တစ်စက်။ ဘာကြောင့်မှန်းမသိ သတ်ထက်ပန်ရဲ့ နှလုံးသားထဲအထိနင့်နင့်နဲနဲဝမ်းနည်းသွားစေသည်။ ဖြေးဖြေးလေးတိုက်ခတ်နေသည့် လေနုအေး။ တိတ်ဆိတ်လွန်းသည့်ပတ်ဝန်းကျင်။ သက်ရှိလူသားနှစ်ယောက်၊ သက်မဲ့အုတ်ဂူလေးတစ်ခု ။ ရေစက်ပါလာလို့ဆုံတွေ့ရတာမျိုးထင်ပါရဲ့။
Eros_90
10.5.23 ( ည ၈နာရီ ၅၅မိနစ် )
13.5.23 ရက်နေ့ အပိုင်းသစ်Update ရှိပါမည်။