للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
_______
محمد
نطقَ الحَنينُ وفاضت الأحداقُ
والروحُ فد عَبَثَتْ بها الأشواقُ
ماذا أقولُ و كلّ نبضٍ داخلي
يشكو وعقلي للجنونِ يساقُ
بالأمسِ ظللني الربيعُ بغصنهِ
واليوم لا غُصنٌ ولا أوراقُ
يا، تاركاً روحي برغمِ تعلّقي
رفقاً بها فالبعد ليس يطاقُ
فتحت موبايلي ونزلت تطبيق "المجيب" ( تطبيق خاص بالمسائل الشرعيه) جان عندي سؤال وحبيت استفسر عن طريقه صار بوجهي صدفه سؤال شرعي بعنوان،
( ماحكم زواج البنت الباكر بدون علم ولي أمرها؟)
دفعني الفضول ادخل وأقرأ الحكم ضغطت عليه وقريت الجواب جان صادم اليه،
( العقد باطل)
ضربت على وجهي عزه بعيني يعني كل شي صار جان علاقه غير شرعيه حتى ابني اللي حامل بيه طفل مو شرعي!!!
سوده بوجهي شلون بيه وين اروح هسه وشنو اسوي؟؟
اذا عرف ابويه لو نسر يموتوني والله واخجل احجي شي لارفد هسه ياخذ عليه نظره قذرة وبعد كل هذا اللي سويته يطلع عقدي باطل وبدون معنى وكل اللي صار بالحرام،
بقيت افتر بالغرفه اخذتها طول بعرض لدرجه رجليه تعبت كعدت على الجربايه وصرت اشهك بدموعي اني مو كد هيج اختبار ابد ولا أكدر اكمل وي كل هذا العذاب، خطرت على بالي فكره احجي وي أيفلين بس تراجعت بسرعه شنو تكدر تسوي هي وشلون تساعدني؟؟
ماكو غير حل اللي دخلني بهيج مصيبه لازم يطلعني من عدها، مشمئزءة لدرجه ما أريد اسمع صوته بس شنو أكدر اسوي؟
اسوء شي بالحياة من ايكون ماعندك خيار غير تطلب المساعدة من عدوك طلعت رقمه وقبل ما اضغط اتصال صفنت اني شنو كاعده اسوي معقوله بعد كل اللي سويته حتى اخلص من عنده اجي اتصل بيه بسهوله واكله تعال تزوجني مره ثانيه عقدنا باطل لان والدي مايعرف؟؟
فرضاً رفض ومقبل يعقد عليه شنو اسوي بهاي الحاله او وين انطي وجهي او ابني ابن حرام؟؟
الوضع اللي اني بيه ما اتمنا لعدوي مع هذا ارجع اكول استاهل اني اللي دخلت نفسي بهيج مستنقع عايشه وي أهلي معززة مكرمه التهي بدراستي وانظف البيت لو امي تصيح عليه شويه وترجع تسكت افضل ما احب واحد منحط ميستاهل اهتمامي وحرصي وتضحيتي اله بأمس اوقات الحاجه تركني وحدي وراح وعايرني بلي سواه هو ومع كل هذا لازم هسه اذل نفسي حتى اطلع من هيج وضع قذر دخلتله برجليه وقبلت بيه بدون تفكير،
بعض الأخطاء خسارتها عمر بأكمله الندم والاعتذار ميشفن جروح الكلب كذب الجرح يبقى عايش وي الانسان حتى وفاته والذكريات مستحيل يجي يوم وتنحذف من الدماغ، بس مجبورة أمد أيدي لقاتلي حتى يطلعني من هيج ظرف،
بس هاي المره أيدي كرامتها عاليه اكثر من عندي مقبلت اضغط اتصال شمرت الموبايل وبجيت من كلبي ليش هيج سويتي بنفسج حوري هاي انت الوحيدة اللي اكلتيها وحدج ومنو اللي راح يوكف وياج ويطلعج من هيج مصيبه؟؟
تذكرت رب العالمين وكلت ماكو غيره نهضت بسرعه ورحت توضيت ورجعت لغرفتي قفلت الباب وفرشت السجادة فتحت المجر طلعت شمعه علكتها لام البنين يكولون تقضي الحاجات اذا علكت شمعه وصليت ركعتين هديتهن الها سويت هيج ونزلت دموعي قسمت عليها بابنها ابا عبدالله الحسين عليه السلام ومصيبته يوم العاشر لان هي تحبه اكثر من أولادها تذكرت هم قمر بني هاشم ابا الفضل العباس عليه السلام طلبت انو تدعيلي عند الله لان منزلتها عنده عظيمه وهي وسيلتي لربي يخلصني من هاي المشكله ويتوب عليه ويحلي اياها ماعندي احد غيرهم كلها تخلت عني ومبقى عندي غير الله، بجيت وندبت وتوسلت بربي والائمة عليهم السلام مخليت احد كلها طلبت من عدها هم الوسيله إلى اليه واقرب اله من عندي ويحبهم اكيد مراح يرجعني بفضلهم ومكانتهم عنده،
سجدت على التربه وبقيت أقره هذا الدعاء،
( يا كاشف الكرب عن وجه أخيك الحسين، اكشف كربي بحقّ أخيك الحسين) بقيت اكررها حتى تعبت واكو شعور راحه غريب حاوط كلبي مسحت دموعي ولميت السجادة وكأن شخص طمأني من الداخل بانو مشكلتي نحلت،
رجعت كل شي لمكانه ورجعت لجربايتي صارت صديقتي من اجيت لبيت اهلي لحد الأن صار يومين واني هنا مو نفس الحب اللي جنت عايشه بيه حتى امي تغيرت عليه اشوفها تسولف وتضحك وي ريفان وايفلين واني متباوع بوجهي وارفد اغلب وقته بالمستشفى اما نسر ما التقي بيه ابداً ، عائلتي نبذتني مثل شخص مصاب بمرض معدي ويخافون لا اعديهم خسرت كل شي بين ليله ويوم وياريت خسارتي بيها عوض حتى اتصال ميتصل ولادز رساله يطمأن بيها عليه ويشوف اذا محتاجه شي او لا،
ملمته ابد لان هو صادق ويايه جدا من كال انت اجيتي للطريق بكم كلمه حلوه صحيح والله اني أجيت واصلاً ركضت بس كال احبج ياريت لو عندي اكثر من عشر اصابع جان كطعتهم من العض،
رجعت راسي على المخده وبدأت رحله ثانيه من دموعي هاي الأيام اصعب إيام دا اعيشها حالياً خليت أيدي على بطني صار عمره ثلاث اشهر تقريباً كبرت شويه واحس هو عايش داخلي يكولون الجنين يسمع ويحس وي امه وبما انو محد يمي بالغرفه حبيت افتح كلبي وافضفض لحبيبي،
انت الصح الوحيد بكميه الاغلاط اللي سويتها يمكن من تكبر مراح تعرف الحقيقه وراح احرص متعرف بس خلي ابالك انو امك وحده غبيه حبت واحد ميستاهل اظفرها، انطيته كل شي وقتي، وشرفي، وسمعتي، وحتى حب اهلي وثقتهم بس هو شنو قدملي؟؟
بالوقت اللي احتاجيت من عنده كلمه وحده يكلي بيها لتخافين اني وياج شنو ماصار تبره من عدنا ومعترف بيك ويكول الله اعلم اذا ابني او لا، كرهته على مقدار حبي اله وياريت انت ما تطلع عليه واحد حقير مايعرف شنو دين وحرام، مجرم منحط،
حسيت نفسي ختنكت مسحت دموعي وفتحت الموبايل عقلي يكلي اتصلي حتى اطلعين من هاي المشكله وكلبي يكلي لا راح يكسرج مره ثانيه وهاي المره مبيها مجال اموت من صدك قبل ما اتصل شفت اسمه على الشاشه شهكت راودني هذا الشعور اللي ماعرف شنو، كلبي راد يطلع من مكانه ورجفه احتلت كل جسمي تذكرت ايام حبنا شلون جنت اسعد انسانه بالدنيا كلها وشلون تغير الوضع كله بين ليله ويوم وصرت ما اطيقه،
الوضع مو مال ابيع ثكل براسه فتحت خط وخليته على أذني سمعت صوته ونزلت دموعي بسرعه جانت تطربني من اسمعها ليش هسه احسها بدون طعم معقوله كرهته من صدك؟؟
محمد: صباح الخير سركي كلبي.
حبيت استفزة جاوبته بسرعة.
حوري: بما انو مااصبح بوجهك اكيد خير.
محمد: مبقى شي ويجي الخميس هانت.
حوري: ليش شنو ناوي تسوي؟!
محمد: ترجعين للبيت شنو اسوي مثلاً؟!
حوري: بس هيج؟
محمد: اكيد مراح اخلي مرتي وابني بوضع محلو مو أخلاقنا هاي سركيي.
حوري: واذا مقبلت ارجع وياك؟
محمد: ليش محسستني راح اخذ اذنج؟!
شفت انو متحمس لذلك حجيت بدون مقدمات.
حوري: ليش باي حق ترجعني واني مو زوجتك؟!
محمد: سركي كلبي شاربه شي بمكان الجاي الصبح؟
حوري: عقدنا باطل ابنا حرام وكل اللي صار غير شرعي بما انو والدي ميعرف.
محمد: لا بالله وضعج مو طبيعي مصخنه حوريه؟
حوري: اي وضعي مو طبيعي بسببك شلون تفكر بهيج موضوع غلط من الأساس ليش مسالت؟!
محمد: المعمم اللي عقدنا يمه عمامته مترين شلون اعرف هو ماعنده علم العقد باطل بدون علم ولي الأمر؟!
اذا هو اثول اني شكووو.
حوري: والحل؟
محمد: نعقد مره ثانيه وين المشكله؟!
حوري: ومنو كال راح اوافق بالعكس تماما بما انو زواجنا باطل خلي نطلك محكمه وكل واحد يروح بطريقه وننتهي من هاي المهزله نهائي.
محمد: من كلت انت مخربطه بالجاي تلوميني،
شوفي سركي كلبي هي جمله وحده خليها بعقلج وقفلي عليها مثل ماخليتج اني سركي لكلبي وسديته مقابل كل البنات، طلاك ماكووو بححح انسي حلم اليهودي بالجنه واضح،
موافقتج اكيده وعلى موعدنا الخميس زواجنا راح يتجدد وهاي المره راح تصيرين زوجتي حق وحقيقه خلي ننسى الماضي واللي صار ونفتح صفحه جديدة ولا كأن شي صاير سامحيني وتقبلي انو مستحيل اتنازل عنج بعد كل هذا التعب ياتعبي انت ومربحي.
حوري: مصدك نفسك كلش على بالك من تحجي كم كلمه حلوه راح اقتنع واكلك اي موافقه بدون تفكير مثل مسويت قبل، تحلم انو اسامحك وافتح وياك صفحه جديده ذمتك ابريها حلم اليهودي بالمغفرة.
محمد: المهم حضري نفسج من تصيرين بحضني بعدين كولي مراح اسامحك.
حوري: لتحجي ويايه بهاي الطريقه لتنسى اني محرمه عليك هسه.
محمد: حامل ببني وتكلي محرمه عليك حبيبي اكو عقل بدماغج لو لاا؟!
حوري: راح اسده تره صاير تزعجني حيل هاي الأيام.
محمد: احاول اقدر ظروفج قدر الأمكان وكل مره اكول حامل وهرمونات الحوامل صعبه لكن انت صايره هوايه تتجاوزين حوري ميحتاج كل مره ارجع اذكرج اني منو الف مره كلت اسف واعتذر متردين تسامحيني مو مشكله لكن متحترميني وتعامليني بهذا الأسلوب اني ما أقبل.
حوري: والله انت ماتستحق غير هذا الأسلوب اعذرني.
محمد: لتنسين يحلوه كل شي صار برضاج اني مغصبتج على شي لذلك لتجبريني استخدم وياج غير أسلوب.
حوري: جنت متخيله انك تستحق لكن مع الأسف طلعت مو كد الوعد، على كل حال تعبانه اني وما عندي خلك حتى اجادلك.
محمد: لحظه بس انت وين هسه؟
حوري: بغرفتي وين يعني.
محمد: ليش محد يمج؟
حوري: وليش يكونون يمي؟!
محمد: من رحتي لحد الأن هيج وضعج؟
حوري: والفضل ألك اكيد اني ما ألوم اي أحد بيهم اصلا زين خلوني عايشه بعد كل اللي صار وسويته بس ألومك انت اللي عفتني وحدي وغدرت بيه بالوقت العلقت كل امالي بيك.
محمد: وعيونج اعوضج بس ترجعين يمي اعرف انو كلبج ياذيج ومجروحه من عندي حيل وصدكيني راح اداوي كل هذا الألم وننسى الهم والحزن ونفتح صفحه جديده احنه وابنه.
حوري: شلون راح تجيب سيد حتى يعقد بعلم اهلي؟
محمد: مستعجله؟
حوري: مجرد سؤال ما أريد ابني يطلع غير شرعي لا أكثر والا يا مخبله تقبل ترجع تزوجك مره ثانيه!!!
محمد: الشرح يفقد لذة الحماس خليها ليوم الخميس وراح تشوفين شنو اسوي ما عليج بس تنتظرين سركي كلبي.
حوري: غزل غريب مثلك.
محمد: وميلوك بس على حوريتي.
سديت الموبايل ومابين التفكير وهمي ماعرف شلون غفيت.
أيفلين: اليوم الشمس ابيتي شنو صار وتذكرتنه اخي العزيز؟!
محمد: على اساس اني ما اتصل واسأل عنكم تبقين ناكره لحب اخوج الوحيد ضلعه.
أيفلين: شلونك؟
محمد: مو زين صار يومين غايبه عني احس نفسي ضايع بدونها كلب اخوج تعلق بزعطوطه ومبتلي بحب عقيم خيه.
أيفلين: اتحمل نتيجه اغلاطك اللي تجي من أيده الله يزيده ويباركله.
محمد: ان شاءالله يتصلح كل شي بس محتاج مساعدتج بشي مهم.
أيفلين: ادلل كول واني حاضره.
محمد: ميدلل عليج ظالم خيتي، أريد تخلين بالج عليها اعرفها وحده مهمله وحتى صحتها متهتملها ولا راح تاكل وتخلصها نوم ودموع واني خايف عليها ليصير بيها شي اطمأني عليها وطمنيني.
أيفلين: ادلل وحيدي.
محمد: شلونج؟
أيفلين: الحمدلله.
محمد: والاثول شلونه وياج؟
أيفلين: الحمدلله.
محمد: بدون جذب ايفو.
أيفلين: زين والله دا احاول افتح صفحه جديدة ونعيش بسلام انسى لتهتم بيه خليني اروح اشوف سركي كلبك شلونها.
محمد: متصير باذنج سالفه ابد.
أيفلين: اذا نصي صوتك من تخابرها لتخليني اسمع.
محمد: هي مفضوحه متشوفين ليش نكشفنا.
أيفلين: تستاهل لو ارفد بقى ميعرف جان ولدت الطفل ومحد يعرف بيكم.
محمد: مو لهاي الدرجه جنت ناوي اعترف بكل الموضوع وحتى خططت لكل شي صار اصلا معرفت أرفد جان شي خارج الخطه لهذا السبب ضجت كلش بوقتها لتخليني افتح دفاتر قديمه عندي شغل مهم ولتنسين شنو كتلج اعتمادي عليج.
أيفلين: تمام حبيبي لتخلي بالك راح اوكلها غصب عليها وابقى يمها وانزلها يم عمتي واضحكها مطلوب شي ثاني بعد؟؟
محمد: سلامتج خيتي الجميله.
أيفلين: مع السلامة اخي الجميل.
فزيت من نومتي على صوتها وهي تطرق على الباب نهضت من مكاني بتململ مابيه حيل وماعندي خلك لاي شي ،فتحت الباب ودخلت ابتسمت بوجهي ولزمت أيدي وحجت بهدوء.
أيفلين: شلونج؟
حوري: الحمدلله.
أيفلين: ليش كاعده وحدج اهنا تعالي انزلي يمنا همات نسولف وتغيرين جو كعدت الغرفه محلوه دائماً.
حوري: مرتاحه هيج وحتى ما ازعج احد بيكم.
أيفلين: ازعل من عندج انت بنت هاي العائله سواء قبلوا او لا انتِ جزء من بهذا البيت.
حوري: اهلي تبروا من عندي مشكورين لان قبلوا بيه اجي وابقى هنا لازم اكون ممنونه من عدهم بعد أللي سويته فتحولي ابوابهم وستقبلوني برحابة صدر.
أيفلين: هم اهلج وهذا واجبهم يوكفون وي بنتهم ويدعموها لتكونين ممنونه لان دخلوج للبيت لأن هذا اقل شي ممكن يقدموا لبنتهم المتزوجة.
حوري: اي صح بس مو لبنيه عاقه مثلي.
أيفلين: لتاخذين حجي نسر على محمل الجد من عصبيته هيج كال والا انت تعرفين شكد يحبج وميقبل احد يزعلج ابد.
حوري: ما ألوم احد غير نفسي غلطت وهاي النتيجه استاهل ومتقبله كل شي يصير ويايه هسه صدكيني.
أيفلين: هوايه اللي يغلطون بس قله الأشخاص اليندمون على غلطهم ويتوبون من عنده الله يحبج لهذا السبب دلج على الطريق الصح والناس مو مهم رأيهم على النبي محمد صل الله عليه وآله وسلم مقبلوا يقبلون علينا؟
أمسحي دموعج وتعالي انزلي واللي معاجبه وجودج هو يطلع.
نزلت صار بوجهي نسر وياه ارفد أجيت ارجع لزمتني ايفلين من أيدي ومنعتني وحجت بصوت عالي.
أيفلين: اللي ميعجبه مشكلته اهم شي انت وسلامتج وسلامة ابنج انت واخويه الغالي حبيب كلبي محمد.
نسر: اي اهم شي محمد حتى يدافع عن المجرمين اكثر.
أيفلين: هذا شغله وين المشكله؟!
نسر: ماكو مشكله سلامتج.
أيفلين: الله يسلمك.
تركنا وراح لغرفته وهو معصب حسيت بيهم متعاركين بس مهتميت اللي بيه مكفيني حتى اشيل هم غيري،
التفتت اله من كال.
أرفد: شلونها بنيتي اليوم؟
ابتسمت غصب.
حوري: الحمدلله انت شلونك؟
أرفد: اذا انت بخير اني بخير باباتي.
حوري: ان شاءالله دومك بخير حبيبي.
أرفد: لتضوجين وتهتمين لكلام احد وتزعلين نفسج اللي معاجبه الباب موجود اهم شي راحتج بابا.
حوري: الله لايحرمني من عندك ويخليك خيمه على راسي دائماً.
أرفد: ويحفظج اليه باباتي انزلي يمنا جوا اغير ملابسي واجي يمكم.
ناهده: واني اكول ليش المطبخ منور شمعت بيتي نزلت يم امها.
نزلت دموعي هذا اسلوبها ويايه دائماً قبل بس اخ من سوالفي اللي دمرت كل شي وحطمت حياتي بدون فائدة مجبت لنفسي غير الهم والحزن وشوف شنو صار بيه بعدين.
حوري: البيت انت نوره ماما.
ناهده: ليش باقيه فوك ومتقبلين تنزلين يمنا؟
حوري: ماكو شي بس لان تعبانه شويه.
ناهده: اهم شي راحتج حبيبتي تعالي مسويه غده تاكلين اصابيعج وراه خلينا ناكل سوا واذا تحبين تجين ويايه لبيت خالتج نبقى يم البنات لان خالتج يم جنتها بالبيت.
حوري: لا ما أريد اروح لمكان خليني اهنا افضل.
ناهده: لتخجلين بنتي اللي صار صار وانتهى ماكو داعي تخافين او تخجلين بما انو ممسويه شي غلط.
رحت يمها وحضنتها أريد احس بالأمان اللي فقدته من يوم قررت اسوي شي غلط وامشي بدرب مابيه بس وجع للكلب.
حوري: سامحيني الله عليج اذيتكم هوايه بأغلاطي وعذبتكم ويايه ورطت نفسي وبهذلتكم.
مسحت على ظهري وتحجي ويايه بحنيتها المعتادة عليها.
ناهده: اذا الله بعظمته يغفر كبائر الذنوب منو اني وابقى زعلانه على وحيدتي وحبيبة امها؟؟
حوري: الله لايحرمني من عندج ومن عطرج يعمري.
ناهده: ولامن عندج حبيبتي.
خلصت هاي الأيام بهدوء تام حتى وصل يوم الخميس كعدت الساعه سبعه الصبح على صوت الموبايل شفته هو فتحته وخليته على أذني بدون حتى ميكول شلونج حجه بدون مقدمات.
محمد: اليوم ساعه اربعه راح اجي وي السيد حضري نفسج سركي كلبي.
سدا بوجهي بدون ميحجي اي جمله اضافيه عرفته مشغول هاي عادته من زمان، خلص اليوم بشكل طبيعي من صارت ساعه ثنتين دخلت للحمام وسويت الروتين المعتاد محد يعرف بالموضوع واني محجيت لأحد هو يتورط بقراراته الغلط اني معاد يهمني شي ابد حتى لو ننفصل وصلت بيه مرحله النفس عندي مو مهم حتى لو خسرته،
نشفت شعري ولبست فستان وردي وخليت مكياج خفيف وبقيت منتظره وصلتني رساله ساعه اربعه إلا دقايق فتحتها طلع واصل للبيت لحسن الحظ والدي موجود وحتى نسر وارفد،
بقيت منتظره جوا ومنزلت حتى اجتي ريفان للغرفه وكالت يصيحوج نزلت وصار بوجهي نسر وارفد وبابا عيني راحت لمحمد مبتسم ولا كأن هامه شي وهم عيونهم يطاير منها شرار على اي دقيقه يفترسوه، قاطع هذا الصمت المريب ارفد وهو يكول.
ارفد: ماعدنه بنات للزواج واجت من الله انك رميت عليها يمين الطلاق مبقى غير تنفصل عنها بالمحكمه وكل واحد يروح بطريقه.
محمد: اسأل عن رأيها ممكن تكون معارضه.
التفتلي وكال بنبره تساؤل بعيونه حجي وكأن يطلب من عندي ما اخجله.
أرفد: شنو قرارج بنيتي؟
حوري: اللي تكول عليه هو يصير بدون اعتراض.
شفت ابتسامه بعيونه قبل ثغره ابتسمت براحه لان مغدرت بيه هاي المره لكن مدام هذا الشي حتى قاطعنا بمكر وهو يكول،
محمد: انتوا جبرتوني استخدم غير أسلوب اكلوها اولاد العم..
يتبع..
البارت اقل بشويه من 3800 كلمه.
للتوضيح ليش فصلت قصة حوري عن هَيْصَم و لَّباءَة، لأن شي ميشبه شي بالأحداث اللي صارت بهاي الفتره ومكدرت اكتب البارت نص لهذا ونص لهذا لهذا السبب فصلتهم وبكل الاحول هو بقى بارت واحد لحوري بعدين نكتب النهايه بإذن العليم ونختم القصه ونودع أبطالنا.
تصبحون على الف خير وعافيه شمعاتي.
حسابي الأنستا.