هَيْصَم

البارت السادس والأربعون

للتواصل انستا zahraaahmedn99

علقوا بين الفقرات+ صوتوا للبارت+ تابعوا حسابي عيناي انتوا.

شاركوا القصه حتى نستمتع وي الهَيْصَم مع بعض
_______
دموع وبكاء
وقلب تمزق من العناء
وروح بائت القضاء
وجرح ليس لهُ شفاء
فراق من بعد لقاء
ونهاية قصة تكللت بالشقاء
وحب كتب عليه لا البقاء
فهل سيداوي العشق مرة آخرى قلبهُ؟؟؟
أم
سيحكم علية الماضي بالاكتفاء

الخاطره بقلمي
زهراء احمد

فتحت الدفتر بنية القراءة نصدمت واني اشوف صورة موجوده بالنص، شكلها قديمه مع هذا ركزت بيها،

رجال ومرأه بالزيارة وحاضنها من كتفها صفنت شويه بوجهه واني اريد الكي دليل واحد حتى او اختلاف ملامح بسيط يثبتلي هذا مو هَيْصَم بس كل شي يكول العكس،

يعني مجان حب عابر وإنما زوجته هيج واضح درت الصوره جان مكتوب بيها التاريخ(1/1/2009) الفرحه باينه بعيونهم نزلت دموعي صحيح هو ماضيه ومو حقي ادخل بس جان لازم يكلي هو متزوج من قبل ميصير يخبي عني هيج موضوع بالوقت اللي اني حجيتله كل حياتي،

نقهرت حيل وحسيت لحد الأن يحبها من اذكر لمعة اعيونه من يسولف بالماضي لو بأول لقائنا من يكلي لتحبيني كلها ادل على شي واحد انو لحد الان بكلبه الها مكان وين مجانت وحبي مستحيل يمحي ذكرياته،

على رغم ما أللي حق لكن يكولون المرة تحر لو بالكبر، قررت اسكت وما أبين اي شي اله وخليه هو يحجي حتى ميصير الحق عليه، انتظرته لليل طبعا رجعت الدفتر وتعمدت اخليه جزء من عنده ظاهر حتى يعرف اني شفته وحتى لو تعارك ويايه مو مشكله على الاقل اعرف شنو مخبي عني وما ابقى محتاره هيج والأفكار تلعب بعقلي،

خلص اليوم واني منتظره صارت الساعه عشره بالليل واني على نفس الفكره والقلق الفضول يموت خاصتا لو يخص انسان غالي عليك، نعست وسيطر النوم على عقلي وأغلق اجفاني فزيت وماعرف شكد نايمه على حركه بالغرفه بالعادة نومي مو هيج خفيف لكن بما انو منتظرته فعقلي كعدني،

مستغربت من شفته لازم الدفتر وفاتحه اعرفه نبه جداً على أقل شي واكيد وصلتله فكره اني شفته وعرفت بالموضوع، عدلت كعدتي حس عليه والتفتت مصغر اعيونه أجيت احجي تركني وطلع تبعته صدك نقهرت يعني ليش مكلي هو متزوج من قبل؟!
شنو الداعي يخبي عني هيج سيرة ومع هذا هو اللي ضاج،

صحيح اني رجعت الدفتر بس بقت الصورة يمي لزمتها بأيدي وتبعته للمطبخ لكيت يشرب مي مديت ايدي وخليت الصورة على الميز صار صوت بسرعه التفت عقد حاجبه وكال بنبرة استفهام.

هَيْصَم: بيج شي اليوم لَّباءَة؟!

فيروز: شنو هاي الصورة ليش ماعندي علم انك متزوج قبل هَيْصَم؟!

اعيونه صارن حمر جان لازم اكلاص بأيده ضربه على الحايط اطشر الكزاز على الأرض وصابتني خوفه بس اتظاهرت بأن الوضع طبيعي مجنت ناويه اسأل بس ماعرف ليش هيج سويت ورد فعله خلاني ساكته خاصتا من صرخ بوجهي بعصبيه على غير العادة.