للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
_______
هيَ ڪ الوَرد مُفعَمه ، مُنعِشه ، مُلفِته وبالِغةُ الرقه .
النهايات ماهي إلا بدايات جديدة لقصه أخرى واحداث ثانيه مليئه بأشياء اما تكون جميله او لا وفي كلا الحالتين لازم نعيشها برضانا لو غصب.
دخل بالعجل وكال بصوت عالي وهو يخاطب القاضي بأسلوب محترم.
لائِث: سعادة القاضي هذا دليل براءة سيادة النقيب هَيْصَم.
القاضي: جيبوه.
لائِث: قدمته للمحامي مالت هَيْصَم وهو بدوره وصله للقاضي فتح الفايل وتمعن بيه بعدين ناقش المساعدين مالته اخذ المطرقه بأيده واصدر الحكم.
القاضي: حكمت المحكمه حضوريا على المتهم (هَيْصَم حيدر) براءة وباستطاعته إكمال عمله بدون اي عائق،
رفعت الجلسه.
ضَرْضَم: من صدك صار يوم عرس لو مو الناس الموجوده جان ركص لائِث الفرحه واضحه بعيونا كلنه رحنه يمه مثل ابناء مشتاقين لأبوهم.
هَمْاس: يامرحبا بعودة الهَيْصَم لمكانه الأصلي واللي يستحقه.
هَيْصَم: فرحتي بشوفتكم اكبر.
هَمْهَام: اعيونك ليش حمر؟
لائِث: دخل بيها تراب لان اجيت اركض حتى أوصل على الوقت.
هَيْصَم: شكراً لائِث وشكرا الكم كلكم تعبتوا هاي الفتره ويايه.
لائِث: ابوك عزيز عليه لتخليني اسبه.
هَيْصَم: مشتهي عقوبه؟!
لائِث: كل شي من ايدك مشتهيه المهم هي رجعتك سالم النه وللفريق.
هَيْصَم: خلونا نرجع للمركز ونتناقش بهاي الأمور بعدين.
لائِث: كول خجلت ممتعود السيد هَيْصَم على هيج دلال من عدنا.
هَيْصَم: اني افكر بشغله وحده واذا طلعت صدك اموتك لائِث.
ضَرْضَم: ميحتاج تفكر سيادتك اهلك عدهم علم بلي صار.
هَيْصَم: راح احاسبك عليها بعدين.
لائِث: لو مهددت تجي للمركز وتسأل عليك مجان كلت شي وداعتك.
طلعنه خارج المحكمه وصعدنا السياره وسألني عن تفاصيل الحادثه وشلون وصل الدليل اليه.
هَيْصَم: غرد شلون عرفت بموضوع الدليل مو لازم يجي عن طريق المحامي ليش وصلك انت؟!
لائِث: بصلاة الصبح اكو احد دك الباب فتحته وشفت ظرف أخذته بأيدي ودخلت بنفس الوقت وصلتني رساله محتواها،
( المحامي خاين)
عرفت هذا الدليل لبرائتك.
ضَرْضَم: وليش تأخرت كل هذا الوقت؟!
لائِث: نجبرت اطلع مهمه وتصلت بيكم كلكم محد يفتح خط.
هَمْاس: داخل المحكمه اكيد منفتح خط ياذكي.
لائِث: ولتنسون مظاهرات والدنيا عالكه والطرق مسدودة وصلت بالف ياعلي.
هَمْهَام: المهم وصلت والسيد هَيْصَم طلع براءة.
هَيْصَم: وصل دورهم لازم يتعاقبون على اتهامي باطل.
لائِث: عرفت منو اللي اتهمك؟
هَيْصَم: الأسود وجماعته منو غيرهم.
ضَرْضَم: وممكن يكون لّهيم بما انو رجع للعراق.
هَيْصَم: لّهيم وحده ميكدر يسوي شي اذا ماكو جهه تدعمه وتسانده.
هَمْهَام: ومع هذا منكدر نثبت شي ونعتقلهم بالجرم المشهود.
هَيْصَم: منو كال؟!
هَمْاس: عندك خطه سيادتك؟
هَيْصَم: الهَيْصَم ميعيش بدون خطط بس بالأول اكو شخص لازم يتعاقب بشكل خاص ومن بعدها افضيلهم لازم نخلي حد ونكتب النهايه قصتنا طولت حيل.
لائِث: اريدهم إعدام على كل الجرائم اللي سووها.
هَيْصَم: ومراح اقبل بأقل من هيج صدكني.
جنت نايمه تعبانه والدنيا تفتر بيه ماعرف اني اللي افتر اصعب مراحل الحمل عند كل مرأة تقريباً وعلى رغم حبي لابني اللي يكبر داخل احشائي على كرهي لهذا الوضع انك تكون محتاج شخص يعتني بيك بكل الاوقات شغله امقتها خاصتا يم محمد ما احب اطلب شي من عنده اطلاقا احس بالمنيه،
فزيت مرعوبه بسبب أيد طاوقت ركبتي شفته مصغر اعيونه وينظرلي بطريقه غريبه بلعت ريقي هذا شنو يريد يسوي معقوله يفكر يموتني بهاي اللحظة!!!
قويت نفسي وخليت أيدي على ايده وكلت بشجاعه مصطنعه.
حوري: تخبلت؟
مال راسه للجهة الثانيه وحرك شفايفه بمعنى يمكن، ضربت ايده ونزلت من الجربايه لزم أيدي وسحبني صرت بحضنه تذكرت كل ايامنا سوا قبل وشلون جان يعاملني بحب ولطافه خلاني اتعلق بيه بوقت كلش قصير،
شميت عطره جان اشبه بريحة الورد هادئ كلش ومنعش للرئة بنفس الوقت اخذت نفس عميق وحتفظت بيه داخلي فتحت اعيوني شفته صافن بوجهي اعيونه ونظراتها ذكرني شلون تخلى عني من حتاجيته دفعته بكل قوتي ونهضت بسرعه وحجيت بعصبيه.
حوري: لتحاول تستغلني والله العظيم تندم فاهمم.
نهض وتقرب من عندي صارت اعظامي واحد يضرب بالثاني من الخوف يحجي بهدوء ونظره استهزاء بعيونه.
محمد: شنو تسوين مثلاً؟
ترفعين عليه قضيه لو تشكيني لارفد؟؟
حوري: اذا اطلب الأمر ثنينهم وانت متكدر تسوي شي.
ضحك بصوت عالي وكمل كلامه.
محمد: شنو تكولين للقاضي من يسألج بابا ليش مشتكيه على زوجج شنو الجريمه مالته؟
والله سيدي حاول يعتدي عليه.
اني لو اريد القرب من عندج ماكو مخلوق يكدر يمنعني بس محترم كونج حامل وتعبانه بالاضافه عقلي مشغول بقضايا اكبر خليني اتفرغ من عدها واشوف شغلي وياج وي اسلوبج الجديد وناخذ حل لهاي التصرفات الغريبه، وبالنسبه لأرفد الواضح كلش مهتم بيج ويخاف عليج لدرجه الموبايل مبطل يرن من يوم تزوجنه لحد الأن لذلك بطلي تتظاهرين بالقوة كدامي وكأن انت غريبه عني وماعرفج.
حوري: أحقر انسان شفته بكل حياتي انت.
محمد: شنو مجانت حقارتي صدكيني متوصل لحقاره نسر وأرفد خليني ساكت لان الأوراق القديمه اذا نفتحت ادمر عائلتج باكملها.
حوري: شنو سوا نسر حتى هيج تكرها؟!
محمد: جريمه قتل بحق انسان بريئ.
حوري: شلون يعني؟!
محمد: جريمه شنو أعني يعني؟
حوري: نسر مستحيل يقتل انسان لتحاول تلعب بعقلي مراح اصدك.
محمد: والله انت حره تصدكين أو لا لكن هاي الحقيقه اللي اهلج تستروا عليها لخاطر مينفضحون وراحت نتيجتها أيفلين للمصح العقلي وصارت مريضه نفسيه عدها شهادة من الطب النفسي على انو هي مجنونه اختي ادمرت حياتها بسبب اخوج لتتوقعين أبداً يجي يوم وابطل بيه حقد وبغض لعائلتج بالكامل ولعلمج حتى اهلي ممعترف بيهم لان الهم أيد بدمار حياتهن الأولى ريفان اللي تزوجت ارفد غصب والثانيه أيفلين الدمرت حياتها بدون ذنب،
نسر ارتكب جرائم مو جريمه الأولى قتل انسانه بريئة حتى يكسب القضيه لصالحه ويترقى والثانيه أيفلين وشلون دخلها مصح والاخيره زواجه من عدها واتهامي بجريمه ما أللي علاقه بيها،
المسامحة تحتاج سبب وماكو اي سبب حتى اسامح اخوانج.
نزلت دموعي أتقدمت من عنده وضربته على صدره بكل قوتي وحجيت بتأنيب.
حوري: اني شنو ذنبي من كل اللي صار ليش دخلتني بمشروع انتقامك جان تكدر تاخذ حقك من عدهم ابساطه ليش دمرت حياتي؟؟
انت مثلهم اللي مقبلته على خواتك سويته بيه ولذلك لو تموت ما اسامحك ولا افتح وياك صفحه جديدة ابقى امقتك لآخر يوم بعمري واحاله ابريك الذمه.
لزم أيدي نظرته مليانه ندم كال بنبره هادئة وكمية حب جبيره بيها.
محمد: مجنتي مشروع انتقام ابداً من الأساس حبيتج ولا جان عندي نيه اضحك عليج بكل اللي صار بس اخوانج هم السبب بلي احنه بيه هسه تقدمت اكثر من عشر مرات وهم رافضين والسبب غبي جداً اني محامي وتخصصي جنائي يعني هذا شغلي لازم ادافع عن المجرمين او اي شخص متهم اني ما اشوف الناس مثل الشرطه والجيش على انو لازم يتعاقب وإنما من وجهه نظري كمحامي ادافع عنه وأثبت برائته،
كل شخص بيناتنا اله مهنته الخاصه واني مهمنتي تتطلب اسوي هيج واخوانج عارضوا زواجنا لان يكرهوني والسبب أخذت حق أيفلين من اعيونهم ونزلت رتبت اخوج ونسجن فتره من الوقت،
صح ما اسأل عليهن ولا اطمأن بس يبقن خواتي ومثل ميكولون الدم بعمره ميصير مي.
حوري: ما اصدكك هاي المره لو شنو كلت.
محمد: لتصدكين لكن احفظيها عدل بعمري مفكرت انتقم بيج بسبب اخوانج وجان حبي الج صادق من البدايه وشغله ثانيه مهمه فكرت تطلعين من هذا البيت وترجعين يم أرفد السماء أقرب الها من عندج.
حوري: شنو تكدر تسوي مثلاً؟
محمد: ابسط شي بيت الطاعه هاي اذا ردت اكون رحيم وي عائلتج وما اتهمهم بخطفج وابعادج عني وخلي ابالج اني محامي بايعها خلصت حياتي وي المجرمين والقتله بسهوله أكدر اورط اخوانج بأشياء متخطر على العقل ابسطها متأجرة الاعضاء البشريه وشوفي اذا متنكلب حياتهم بين ليله ويوم وعليه خليج عاقله وابقي اهنا وتاقلمي وحاولي تفكرين بعقل بما انو احبج ما أكدر أأذيج لكن إذا سعيتي بتغير هاي المشاعر للكره او خليتيها تصير باردة ما اضمن شنو اسوي مستقبلاً كوني حذره عداوتي صعبه حيل سركي كلبي.
تركني بحيرتي ونزل ياترى شنو يكدر يسوي اكثر من اللي كاله؟
صافنه على الشباك فززني صوتها وهي تصيح.
كلاثم: ولج فيروزة تعالي.
طلعت ركض حسيت انو رجع اول مفتحت الباب صار بوجهي وهو مبتسم وحاضن خالتي منظرهم تربع بكلبي.
هَيْصَم: كافي لتبجين هذا اني يمج.
كلاثم: والله متت من الخوف كلت راح بيها هاي المره بس الحمد الله طلعك سالم اليه ورجعك لبيتك وعائلتك بخير وعافيه.
هَيْصَم: دعواتج ام الهَيْصَم هي اللي طلعتني من هاي المشكله.
كلاثم: ليش هيج صار وياك حبيبي؟!
هَيْصَم: لتهتمين بهذا الموضوع بما انو انتهى على خير.
كلاثم: انطيني وعد مينعاد ومتاذي نفسك لأي سبب.
هَيْصَم: وعد وغلاتج عندي مراح ارمي نفسي للموت تحت اي ظرف ما أريد اكثر من شوفتكم مرتاحين وبخير.
كلاثم: واحنه راحتنا بوجودك،
راح اجهز الغدة وانت ارتاح وخبر مرتك بطريقك لتضرب عن الأكل صارت جلده وعظمه حتى بدلة العرس مترهم عليها.
هَيْصَم: تدللين ام الهَيْصَم.
راحت خالتي للمطبخ واني بقيت واكفه بمكاني ماعرف شنو لازم اسوي بس صافنه بوجهه فززني وهو لازم أيدي ودخلني للغرفه وسحبني لحضنه لفيت ايدي على ركبته وبادلته الحضن بكل قوتي نزلت دموعي حسيت نفسي وعيت من الصدمه لذلك حجيت بسرعة.
فيروز: شتاقيتلك ليش تأخرت عليه هيج وانت وعدتني بس يومين من أكثر؟
هَيْصَم: يروح الهَيْصَم اشتياقي الج مينوصف بكلمات أكدر اعبر عنه بحضنج والغرق بتفاصيلج السلبن كلبي.
فيروز: لتخوفني عليك مره ثانيه انت تعرف ماعندي احد غيرك اذا صار بيك شي اموت والله.
هَيْصَم: اشش لتحجين هيج يومي قبل يومج وردة الهَيْصَم،
شو تعالي اشوف المشتاقلهن.
بعدت عن حضنه وباوعت بوجهه،
فيروز: لشنو مشتاق؟
هَيْصَم: لعيونج يعيوني، يكولون قيس مات بسبب حب ليلى والظاهر اني راح يموتني عيونج لَّباءَة.
فيروز: لتحجي بالموت عمرك طويل ان شاءالله.
هَيْصَم: ويخلص وياج،
مشتاقلج بكل لحظه خلصتها بالسجن احس بروحج اطوف يمي وهذا الشي الوحيد اللي صبرني هاي الأيام مجان مهم اشلون اطلع واخلص من الحبس وارجع لعملي بكد مو مهم ارجع اشوفج مره ثانيه،
سبيتي كلبي انت واحتليتي كل شي بيه.
فيروز: لهاي الدرجه تحبني هَيْصَم؟
لزم خدودي ولمعت اعيونه تشرحلي شكد يحبني اضافلها نبرته المليانه حب.
هَيْصَم: انت ما دكيتي الباب رفستي صدري ودخلتي بنص الكلب،
احبج لَّباءَة الهَيْصَم او وردة حياته وروحه انت راحتي من تعب سنين طويله والعوض اللي ابقى طول عمري اشكر ربي عليه.
فيروز: ربي ميحرمني من عندك.
هَيْصَم: ولا من عندج يروحي.
خلصت الايام وجهزت اني وهو وخالتي للعرس اشترينا الأشياء الضروريه اما الغرفه بقت مثل ماهي هو راد يغيرها لكن اني اصريت تبقى نفسها بيها ذكريات حلوه ما أريد انساها بالأضافة هي تجنن وموديلها ملكي واللون الأسود والذهبي ضايفلها جمال اكثر،
باوعت لنفسي بالمرايه مكياجي تركي هادئ والفستان الأبيض اللي لابسته تصميمه ايضاً هادئ من الصدر بيه كرستال بسيط والردان طويله وهو بشكل عام مستور مو فاضح لان فستان محجبات ،حضرة سيد افندي يغار عليه حتى من النساء،
صافنه بنفسي وشلون وصلنه لهذا اليوم السعيد بعد المشاكل والكره اللي جان بيناتنا بالأول ابتسمت على احد ذكريات الماضي وشلون جانت معاملته اليه،
Flash back
مخليه أيدي على خدي وصافنه صار ثلاث ايام واني بهذا المكان لاهو يشرحلي شنو الموضوع ولا يرجعني لبيتي خسرت وظيفتي وراحتي كلها بسببه،
سمعت صوت طرقات قويه على الباب نهضت من مكاني واني ناسيه تحذيره اليه فتحته صار بوجهي شاب محجه شي بقى صافن بوجهي بدون مينطي رد فعل مثل الشخص اللي مضيع شغله ولكاها اني هم نثولت لحظتها ومسالت وبقيت صافنه مثله اشويه وسمعت صوته وهو يصيح.
هَيْصَم: رسمتها؟
عفوا منو تقصد؟؟
هَيْصَم: صار ساعه صافن بوجهه شنو الفلم؟
اعتذر بس حبيت اسال بيت ام حسنين وين صاير؟؟
هَيْصَم: يم المركز على ايدك اليمنى.
ليش مركز؟
هَيْصَم: لان راح تنسجن اذا تبقى واكف اهنا وماخذ هاي الوضعيه.
راح وهو دخل للبيت مباوع بوجهي دخل لغرفته وصاح بصوت عالي فززني من مكاني للصراحه خفت حيل وتعودت اسوي نفسي شجاعه واني اذا يصيح بيه هسه افقد الوعي.
دخلت للغرفه لونها اسود مثل گلبه تماماً اقتربت من عنده بعد مأشرلي وگعدت على الكرسي المقابيل اله ، اكتافه بارزة وصدرة عريض مثبت أديه على رجليه وشابكهم مع بعض ومخليهم تحت حنكه بلعت ريقي اليوم مراح ايعدي على خير ک العادة ولازم التزم الصمت والا ايكون العقاب سيء ،
بقى صافن بوجهي دقائق بدون مينطي ردة فعل و ملامحه مستحيل تگدر تقرأها اخذت نفس عميق وسويت نفسي مسيطره على الأمر عكس داخلي تماماً بس حبيت انو اظهر شجاعتي حتى ميحاول يستغل ضعفي ، بعد فتره طويله يلا نطق
هَيْصَم: شنو جنتي تسوين يمه؟؟
جاوبته واني عاقدة حاجبي،
فيروز: منوو هوو!!
سحب الكرسي مالتي وحاوطه بين أديه وجهي قريب وجهه حجه بنبرة توعد وهو ينظرلي بنظرة غريبه ، خوف على رعب ، خجل مشاعر ملخبطه اجتاحتني بهاي اللحظة طارن كلهن من اقترب من عندي حيل انفاسه لفحت وجهي يحجي والشرار يطاير من اعيونه خله كل خلية بجسمي تنتفض خوف.
صفن بعيونج خمس دقايق برأيج قلع هاي العيون راح يفي بالغرض ويعلمه الدرس لو استخدم طُرق ثانيه هممم؟
سويت نفسي مسيطره على الوضع وحجيت بثقه.
فيروز: طرق الباب وطلعت مجان عندي نيه ثانيه اذا تريد تعاقب عاقبه اله اني ما ألي دخل.
هَيْصَم: يتعاقب ليش لا لكن انت ميعدي الامر وياج على خير صدكيني،
الف مره نبهت حياتج معرضه للخطر ملازم تسوين شي بدون علمي لكن متسمعين الكلمه وتسوين العكس شنو فائدة طلعتج للباب؟
عندج شخص منتظرته لو تردين تشوفين الشارع بأي طريق مصمميه؟!
فيروز: ميحتاج تكبر الموضوع لهاي الدرجه مجرد طلعت للباب ليش هيج منفعل وتصيح بوجهي؟!
هَيْصَم: لان ياذكيه ممكن يكون مراقب البيت وراد يتأكد من اكون مموجود شوكت تصيرين صاحبة مسؤوليه وتفكرين بعقل بدون ما انبه كل مره؟؟
فيروز: لازم اطلع غلطانه وي كل مره نحجي بيها تحلل الأمور على مزاجك وتلومني.
هَيْصَم: كم مره كلت حياتج مهدده؟
اني شخص ما احب اجامل ومشاعرج متهمني لهذا السبب من اول يوم حجيتلج الحقيقه بس الواضح عقلج بيه مشكله افهميها حياتج مهدده لذلك اخذي الحذر الباب متوصليه حتى لو اني اللي اطرقه وحتى لو تسمعين صوتي وضحت الفكره لو ارجع اعيددد،
حياتج مهدده بس اطلعين تموتين لو تنخطفين وضحت لَّباءَة لو ارجع اعيدها مره ثانيه؟؟
فيروز: وضحت لتصيح عليه.
هَيْصَم: لا اخذج بالاحضان على سوايتج السودة اني اكلها تموتين هي تفتح الباب وتصفن بوجه العالم الماكلين لحم حمير مو مثلج.
فيروز: شنو قصدك؟!
هَيْصَم: غباء فوول هذا قصدي.
فيروز: تكولها بوجهي هم!!!
هَيْصَم: احسن ما احجيها وره ظهرج وتصير غيبه واني رجال على عتبه موت ما أريد ادخل جهنم بسببج.
فيروز: رجعني لبيتي مستحيل ابقى اهنا يمك دقيقه وحده.
هَيْصَم: حاولي متحبين هذا المكان خلال هاي الأيام اللي تبقين بيها اهنا ولتحبيني هم لأن ما اضمنلج شنو يصير وياج بعدين.
فيروز: ليش تساعدني؟
هَيْصَم: مو كل شي بالحياة اله شرح بعض الأمور لازم نعيشها لَّباءَة.
فيروز: اكره هذا الأسم.
هَيْصَم: واني ماعندي غيره لحضرتج لذلك مشكلتج عزيزتي.
Back
رجعت لواقعي على صوت خالتي وصل الهَيْصَم للصالون لبستني البرنص وعلى رغم هو فستان محجبات لكن السيد افندي عارض اطلع هيج بالمكياج غيرته ماعرف خوفه قاتل بشكل لكن هو محبب على قلبي حيل،
مسك أيدي وهمس قريب أذني.
هَيْصَم: لو تعرفين شكد انتظرت هذا اليوم لَّبوتي.
ابتسمت وحسيت بالخجل صعدنا بالسيارة ورحنه للقاعة صارت الدخوليه النه وخواته اللي يطشن ورد وأمه تهلهل أجواء رائعة تمنيتها لكل ابنيه عايشه قصة حب وي رجل صادق، كعدنه على الكوشه وبدت الأجواء الجميلة المستحيل تنسي وتنمحي من الذاكره وعلى رغم من وجود هوايه ناس اصدقاء واقرباء مجان شاغل بالي وعقلي غيره هو وصلت فقره الرقص لزم أيدي وخلاها على صدره ولف ايده على خصري تبادلنه النظرات الهائمه أبعض والابتسامات اللي تشرح مدا فرحنا بهذا اليوم انتهت هاي الأجواء ورجعت لمكاني بعدين قطعنه كيكة العرس وبدلنا الخواتم وصارت النهايه ولازم نغادر إلى القفص الذهبي،
المرحله الأهم بحياة كل بنيه من تطلع من بيت والدها وتدخل بيت زوجها ومن يمسك ابوها ايدها ويسلمها للعريس وهاي اللي بقت حسره بداخلي اليوم وبهيج مناسبه مفرحه ماكو احد من اقاربي موجود، لا ام تكلي مبروك وتقدملي نصائح لحياتي الجايه ولا اب يهدده اذا اذيتها تأذيني ياويلك، اليوم صدقاً عرفت قيمتهم من يكونون بحياتنا وشنو هي اهميتهم،
منو استشير اذا تعاركت وياه؟
وبمنو اتصل إذا تأذيت من عنده؟؟
اصعب شي بالكون هو اليتم من يكون ماعندك احد وتصفعك الدنيا من كل جانب،
انقهرت وتغرغرت عيوني بالدموع تمنيت الزمن يرجع للماضي واسرق يوم واحد من حياتي وي والدي وابدله بهذا اليوم ، أريده يسلمني بايده للهَيْصَم وما احس نفسي وحيده وبدون سند،
حس عليه الواضح لزم أيدي ورفعها لشفايفه مقبلها ابتسم بوجهي وكال.
هَيْصَم: راح اكون اب وصديق وحبيب وزوج، ما اخليج تحسين انو انت وحدج طول ما اني عايش، اصنع من حزني ابتسامه الج تنورين بيها يومي وحياتي، مستحيل اتخله عنج تحت اي ظرف والموت ياخذني قبل ما اخلف بوعدي الج يروح الهَيْصَم او وردة حياته،
ما أريد اشوف حزن بعيونج الحلوة والا تتعاقبين وهاي المره عقابج أقسى من قبل.
ابتسمت وحجيت بكل حب.
فيروز: الله ميحرمني من عندك ويحفظك اليه حبيبي.
لزم أيدي وطلعنه من القاعه بعد ملبسني البرنص صعدنا بالسياره سمعت صوت اصدقاءه وشلون فرحانين وياه خاصتا لائِث بقى طول الطريق ويانه سيارته قريبه علينه شغل اغنيه ومعلي الصوت هاي المره شفت هَيْصَم مختلف عن كل يوم الفرح مالي وجهه والابتسامة ممفارقه ثغره فرحت على فرحه، طبعا هذا كله اشوفه لان السياره مضلله لذلك رفعت البرنص وخلصها سيد افندي يباوعلي ويغمز،
لاحظت الطريق اللي يمشي بيه مو نفسه طريق البيت مختلف تماما بس لا،
رفعت نظري اله حسيت دموعي راح تنزل وهو نظرلي بابتسامة سمعت خالتي تحجي وياه.
كلاثم: وين رايحين ابني هذا مو طريق البيت؟!
هَيْصَم: اكو وعد قطعته على شخص عزيز واني هسه اوفي بيه.
كلاثم: غموضك حتى بهيج يوم!!
هَيْصَم: هسه تعرفين ام الهَيْصَم ميحتاج تستعجلين.
وصلنه لفرعنه نزلت دموعي واني اذكر ايامي اهنا وطريق المدرسه وشلون والدي جان يستقبلني بحضنه من ارجع للبيت ذكريات وأيام مستحيل تنمحي لو اعيش عمرين من أجمل سنين حياتي اللي انتهت للأسف ويبقى الحنين بداخلي الها لايوصف،
توقف أمام البيت مجان وحده وإنما كل اصدقاءه وياه وكأن متفق وياهم نزل واجه ناحيتي فتح الباب وساعدني انزل دخلني البيت جان مرتب ونظيف على رغم محد ساكن بيه عرفت كل هذا من عنده اجتي خالتي وريهاف دخلني للداخل مخلين كوشه ومرتبين الصاله بيتنا مو حيل جبير وإنما على كد الحال ومع هذا حيل مرتب وبنظري أجمل من الفلل والعمارات يكفي الحنيه والدفو اللي بيه احس بالأمان حتى بحياطينه بيت الاهل يبقى مميز لان بيه ريحتهم وذكرياتهم،
اسمع أصواتهم سوو حفله بره ابتسمت لان نفذ وعده ومنسه طلبي شويه وسمعت صوت رجال جبير خالتي كالت هذا عمو مهدي والد الدكتور أرفد دخل ولزم أيدي هيج العادات لازم الاب هو اللي يسلم البنيه لزوجها وكون والدي مستشهد تكفل بهاي المهمه والد أرفد.
سلمني لهَيْصَم وخاطبه بنبرة تهديد.
مهدي: من اليوم فيروز هي بنتي مثل حوري وأكثر اذا ضوجتها لو زعلتها متلوم الا نفسك اخذها من عندك واخليك تحلم تشوفها.
حسيت بفخر بكلامه بنفس الوقت ضحكت على رد هَيْصَم عليه.
هَيْصَم: الواضح انت متبري من منصبك!!
مهدي: لتهددني ولك تعرفني اسويها وميكدر احد يوكف بطريقي.
أرفد: لتخاف صدكني من يشوفها ينسى حتى نفسه.
هَيْصَم: مثلك يعني؟
أرفد: اني الكي نفسي بيها عزيزي.
هَيْصَم: أخجل ولتتغزل كدامي بيها.
أرفد: ليش أخجل مرتي حلالي واتغزل بيها شلون ميعجبني مو هيج ري كلبي؟
ريفان: اي هيج.
أرفد: شفت حتى هي مأيدتني.
هَيْصَم: متستحي صاير فد مره بلا اخلاق.
أرفد: نتعلم من عندك ابن الخاله.
هَيْصَم: اني اعلمك بس على الدين والمواعظ مو هيج لائِث،
لائِث وين راح؟
لائِث: يمك سيدي.
هَيْصَم: اني اعلم بس على الدين والحكم مو صح لائِث؟
لائِث: واني اشهد اصلا قبل فتره دزت عليه الحوزة يلبسوا اعمامه بس هو رفض كال ماعيف الوطن واتجه للدين خليني أفيدكم بس بحكمي.
أرفد: يوم اللي نفرح بيك لائِث عزيزي.
لائِث: كله لبن خالتك صار شهر اتوسل بيه وهو مامنطي جواب كلبي ورم من وراه.
هَيْصَم: تعال اخطب لو تريد اني اخطبك يعني؟!
لائِث: هلهلي ام الهَيْصَم راح يصير عرسين بهذا الأسبوع.
ريهاف: خجلت وحسيت النار تطلع من وجهي صدك ميستحي مو كافي نظراته من دخل لحد الأن كملها بحجيه هيج، ماعنده اخلاق هذا الرجال ابد.
هَيْصَم: مرتي تعبت صار ساعه واكفه وخروا عن طريقي.
لائِث: هي هيج والله متطلع بدون طبل،
شباب فوتوا جوه سووله عرس تحلف بيه المنطقة،
هَيْصَم: لائِث شنو هاي منو طلب من عندك تسوي هيج؟
لائِث: هو عرس لو فاتحه لازم نغني ونركص.
فيروز: شغل اغنيه وعله الصوت ومن صدك سوو عرس ثاني مختلف عن اللي صار بالقاعة.
هم عريس هم نشمي
وهم ربعه يزفونه
وهي وياه وتتمنا
وهو بحبها خي عونه.
طلعنه من بيت والدي والفرحه ماليتنا صعدنا السياره وبقوا اصدقاءه طول الطريق محتفلين ويانه وهو الابتسامه مفارقت وجهه حسيت بيه فرحان حيل وهذا الشي مفرحني اكثر من اشوفه يبادلني مشاعر جان محذرني من عدها سابقاً،
وصلنه للبيت ونزلنا مقبل نروح للفندق يكول البيت أأمن،
بدأ الخوف يسري بجسمي للحظه ستوعبت الحياة المقبله عليها راح اتشارك وياه نفس الغرفه وبعد منلتقي بالختلات وكأن مسوين جريمه، خجل على توتر على مشاعر مخربطه مكدرت افهمها كل بنيه تعيش هاي اللحظه راح تفهم قصدي واللي عاشتها هم تعرف هذا الإحساس،
اني مخايفه من عنده ك هَيْصَم وإنما من المسؤوليات اللي راح اتحملها من صرت زوجته فعلاً،
دخلت الغرفه بمساعدة خالتي وهو ماعرف وين ساعدتني ونزعتني البرنص والحجاب اللي لابسته وعدلت شعري يوصل لنصف ظهري وحافظت على لونه الأسود مع خصل رماديه جانت تسريحه بسيطه سوتها خالتي بسرعة قبل ميجي، فكرت راح تقدملي نصيحه او تحجي اي شي مطمأن لكلبي بهاي اللحظة بس سوت العكس كالت جمله وحده قبل متطلع من سمعت صوته قريب على الغرفه.
كلاثم: انت كدها بنتي واذا احتاجيتي شي اني موجوده بالغرفه الثانية.
اول مفتحت الباب التقوا ماعرف شنو همست قريب أذنه ابتسم واشرلها بعيونه بمعنى لتخافين، حسيت نفسي بقاعه المحكمه ومنتظره الحكم هيج جسمي انطه رد فعل برجفته شعور رهيب بعمري محسيته بلعت ريقي هو ليش لازم نخاف هيج واحنه نعرف من الأساس شنو يعني زواج ومسؤوليه؟!
أجيت اطفر من مكاني واروح وي خالتي واكلها دخيلج لتعيفيني وحدي خايفه بس كل افكاري تبخرت من دخل وهو مبتسم واني مموتني غير هاي الابتسامه احس راح ادخل وياه معركه وهو المنتصر اكيد بيها،
ابتسمت بوجهه بعدين كلت لنفسي اثكلي يافيروز عيب هسه شنو يكول عليه،
اقترب من عندي خطوة تمنيت بهاي اللحظه يصير زلزال بالمكان اللي اني بيه وتنشك الكاع وتبلعني لكن ايضاً هاي الامنيه بائت بالفشل، واضح جداً ان الامر واقع لامحاله،
توترت ورتبكت من كعد على الجربايه قريب من عندي لزم أيدي الباردة من الخوف بأيدة الدافيه وخله اصابيع ايده الثانيه تحت حنكي ولف وجهي اله كال وهو يطمأني وشكد حبيت هذا اسلوبه.
هَيْصَم: جوعانه؟
أشرت براسي بلا.
هَيْصَم: تعبانه؟
هاي لازم احجي الاشاره متفيد لذلك جاوبته.
فيروز: يعني مو كلش.
رفع أيدي اللي بيها الحنه على رغم احنه ممسوين حفلة حنه بس البارحه بالليل جابلي الحنه للغرفه وحناني يكلي لازم تصيرين مثل كل عروس مينقصج شي،
هَيْصَم: على رغم ماحب ريحتها بس ماعرف ليش احسها عطري المفضل وهي بأيدج لأي درجه حبج سحرني لَّباءَة؟
فيروز: انت افضل شخص تعرفت عليه وراح اتعرف عليه كل حياتي منقذي ومأمني وآماني احبك بكل اللغات هَيْصَم.
هَيْصَم: بس أني زعلان من عندج هوايه اليوم.
عقدت حاجبي وكلت بأستفهام،
فيروز: ليش؟!
هَيْصَم: خايفه وانت يمي، اني اعتبرج أنثى الأسد وبالعادة اللَّبوات ميخافن ليش انت خايفه هسه؟!
فيروز: مخايفه.
هَيْصَم: بس ايدج متكول هيج، افتحي كلبج اعتبريني صديق مو زوج ولتفكرين انت مجبره على شي مجرد انو لبستي الفستان الأبيض وتشاركنا الغرفه كل هاي الأمور متهمني مثل متهمني راحتج وضحكتج ماكو شي يزعجني بالدنيا مثل خوفج لَّباءَة احس كل اللي بنيته بيج اتهدم.
فيروز: هي فكرة هذا اليوم مخيفه بدون سبب انت ما ألك علاقه بالموضوع.
هَيْصَم: هذا اليوم مبيه اي فكره اني وانت عايشين بهذا البيت من فتره طويله ولازم تكونين تعودتي على اسلوبي وشلون اتعامل وياج،
اذا تنجرحين اني احس بالالم مابالج اكون سبب اذيتج يروحي!!
فيروز: اعرف مراح تأذيني بيوم لهذا السبب احس بالأمان وياك.
هَيْصَم: اذا هيج بطلي ترجفين اني طالع اجيب شي ناكله وانت غيري ملابسج واذا تحتاجين الوالدة تساعدج أصيحها.
ابتسمت على كلمة الوالدة ومكال امي محسسني انو هي امي همات،
فيروز: ميحتاج أكدر اغير ملابسي.
ابتسملي وطلع اليوم هوايه خسر ابتسامات سيد افندي،
نهضت من مكاني وقفلت الباب خفت يدخل فجأة صحيح اني وياه عايشين صار فتره طويله مع بعض بس متشاركنا هيج تفاصيل خاصة لذلك الخجل موجود برضاته او غصب،
فتحت الكنتور صار بوجهي ثوب نوم ابيض من الستن للركبة وياه الروب مالته مستور مو فاضح بشكل مبالغ فتحت البدله بسرعه ولبسته هو والروب اللي يوصل قريب الكعب مالت رجلي فتحت الباب ورجعت لمكاني وعدلت شعراتي طول شويه وبعدين دخل بايده صينيه من شفت شنو بيها رفعت راسي متفاجئه هو من شاف وجهي بسرعه كال.
هَيْصَم: لائِث وصلها للبيت قبل منجي.
فيروز: ونظامك؟
هَيْصَم: نخالف اليوم مو مشكله.
الاكل قوزي والمشكله اني ما اكل هيج اكل بالليل ماحبه وهو هم مياكله خلصناها ابتسامات ومأكلنه هوايه حجيت بداخلي ليش المتزوجين ياكلون هيج اكل بليلة عرسهم بشنو مقصره البيتزا مثلاً؟!
نهضت من مكاني وهو طلع الصينيه فرشت اسناني وقبل ميجي رحت سريع نمت على السرير حسيت عليه بعد فتره بيه قريب عليه قضمت شفايفي بتوتر شوكت يخلص هذا اليوم،
همس قريب أذني.
هَيْصَم: اريد اعيش كل حياتي واني اردد كلمة احبج ومع هذا احسها مو كافيه حتى اعبرلج عن مشاعري الحقيقية والاحساس اللي احس بيه من تكونين قريبه من عندي.
ابتسمت على كلامه والتفتت اله بشعور لا ارادي حضنته هو هم بادلني الحضن حسيت بيه يطبع قبله على جبيني وبعدين عيوني حتى وصل لشفايفي عبث بملامحي بهدوء وكمية حب جبيره شعور رائع من تكون بين أحضان حبيبك،
انتهت ليله من أجمل الليالي على همساته قريب أذني،
هَيْصَم: مبروك لَّباءَة الهَيْصَم.
خجلت ودفنت نفسي بصدرة ونمت بين احضانه، انتهى اسبوع كامل على اجمل مايكون وتحدد موعد خطبه ريهاف ولائِث الاسبوع القادم،
هَيْصَم مموجود بالبيت واني حبيت اغير جو وانظف وجانت البدايه من الغرفه الفضول دفعني اصعد واشوف شنو فوك الكنتور موجود جبت كرسي وصعدت مديت ايدي توقفت يم شي لزمته وسحبته اتفاجأت نفس الدفتر اللي تظاهر بحرقه الفضول هاي المره دفعني أقره شنو مكتوب حبيت اعرف علاقة الحب اللي عاشها وين انتهت لكن ماصدمني وخلاني افقد تحكمي بأيدي هو اللي شفته..
يتبع..
البارت اكثر من 4100 كلمه اعتبروا تعويض عن الايام الفاتت،
اعرف نزعجتوا من التأخير اللي صار لكن لاستشهاد الإمام الكاظم عليه السلام حرمه بالأضافة محسيت ملائم ينزل بارت زفاف الهَيْصَم وفيروز بهيج إيام عظيمه وان شاء الله منتأخر هيج بالايام القادمه وينزل البارت على الموعد.
تصبحون على الف خير وعافيه شمعاتي.
حسابي الأنستا.