في نور عينيه

البارت السابع والعشرون

صَدك سَويتها وتبَطلّ تريد
وتعوّف أيامنْا وتنساها كُلها
عوفَك مَن تَعبنْا ومِن الجروّح
تِعال أحلامنٌا باجُر شَكلها ؟

في نور عينيه
الكاتبة هُـــــيام

________________

حبيباتي لحد تنسة التعليقات بين الفقرات والتصويت.. 💚✨

:::::::::::::

بعد مرور اسبوع يوم الأحد

عفت الملازم والهوسة والاقلام مطشرات ع الجرباية
وكمت توضيت وصليت

من أقرة شي وادون بالورقة واشرح لنفسي
لو اكوم اوكف كبال المراية واضل اشرح
بصوت عالي حت ما انساه بس المادة ما جاي تكمل هواي

شفت الصبح طلع والشمس بينت
كمت لبست جبة سودة ع حضي الاغبر
وعدلت روحي ع سريع ونزلت

ام إحسان : تعاي يمة اكليلج لكمة فتحي ريكج..

رانسي : ماريد يوم ما اشتهي..

إحسان : اكلي باباتي حت هناك مدوخين بالمحاضرات..

رانسي : ما اشتهي والله بليل اكلت بس يلة كوم وصلني
خاف اتأخر..

إحسان : يلة ما عندي شي، بس اشرب الچاي..

أباع علي وهو يشرب الجاي اريدة بسرعة يكمل
اباوع للساعة واكل ب اظافيري
شافني هيج كام

إحسان :يلة رنوسة كومي طالعين أحنة ..

ام إحسان : الله وياكم يمة..

أميرة : مع السلامة عيني..

صعدت بالسيارة واراجع بيني وبين نفسي

نزلت يم البوابة باوعت عزة بعيني
كلمرة الكة الخطوط والطلاب والهوسة للضالين
شو اليوم ماكو

دخلت للجامعة  واني الليل كلة منايمة. المادة هواية
بحيث الفجر كمت ابجي لأن المادة ما كملتها

اريد اوصل للقاعة مالتنه
دخلت لكيت القاعة تصوصي ماكو ولا نفر

اريد واحد من كروب قسمنا ماكو اختفو
انخبصت الملازم بيدي والهوسة البيها متنوصف الجنطة
كلشوية تريد توكع جاي امشي انلطمت بشخص

ملازمي وكعن  كمت ابجي احس نفسي مخبوصة
الوقت عدة والقاعة ما لكيتها وهسة الملازم اطشرن
دنكت ع الملازم الم بيهن وادردم بيني

رانسي : شنو هذاااا اليوم الأكشر شنو هذا..

دموعي ينزلن والم بالملازم ب استعجال بحيث
اخر ملزمة عفستها كمت وكفت حجة

أستاذ وليد :  كلما اشوفج الصبح مخبوصة..

رانسي :  اعتذر أستاذ ماشفتك مادري..

استاذ وليد : اي اذا مدنكة ع الملازم شنو شبيج صاير شي ..

ما جاوبته عفتة واستعجلت بمشيتي
تذكرت من جانت أديان تكلي شوكت
نصير نفس الأفلام التركية ونلطم بواحد
ويوكعن الملازم ونشيلهن سوة
صار الموقف وياي بس بحاله يرثي عليها
لعبت روحي من هذا الصباح شون يوم علية
اريد اروح لرئيس القسم 

طبيت لرئيس القسم مسحت دموعي
ومسحت وجهي وتحمحت وددكيت الباب

صلاح : تفضل..
رفع  راسة يشوف منو دخل

ابتسمت بوجهه وكتلة
رانسي : بلا زحمة دكتور
المرحلة الثانية طلاب الدكتور ضرغام وين يمتنحون..

صلاح : أنتِ يا مرحلة؟

رانسي : مرحلة ثانية..

حجة ب استهزاء

صلاح : وعندج امتحان ومتدرين وين؟؟!!..

رانسي : عفية دكتور كلي بس بيا قاعة ..

نتر وبصوت عالي

صلاح : جاية للجامعة شتسوووين إذا القاعه مال امتحانكم متندليها لا انتِ مرحلة اولئ واعذرج ولا اول يوم بالدوام شنو هاللعب والقلة المسؤولية العدكم...

رفعت ايدي ابرر ودموعي كام ينزلن

رانسي : والله دكتور رحت رحت لقسمنا لكيتة فارغ..

صلاح : امشيييي برة
طلاب هالوكت ميندل قاعتة وين
كدما متيهه اي طبعا متندلين حايرين بالتسخت ..

جاي احجي سمعت صوت ضرغام

ضرغام : دكتور سويلنا نسخ بع...

رفع راسة شافني انصدم

ضرغام : ول يابة هاي ليش ما رايحة للقاعة ؟؟!!..

كلي  هيج واني دموعي عشرة عشرة
تقرب يمي انخبص أكثر مني يدور بجيوبة
  مدلي كلينكس ويحجي

ضرغام : له له شبيج ابوية عليمن ..

اخذتها منه امسح بدموعي وينزلن
كلة دكتور صلاح

صلاح : طالبتك؟..

ضرغام : أي بس شعدها هينة؟..

انضارة تتنقل علية وع دكتور صباح

صلاح : حضرة جنابها المتفوقة
متندل القاعة جايتني تكلي وين القاعة ..

من كال هيج طلعت من الغرفة اريد ابجي
بصوت عالي أختنكت كدما يهين ويصيح ويرزل

درت وجهي اريد اطلع

صلاح : تعااااي مو جاي نحجي
وين كاعدين أحنة شنو تعوفينة نحجي واديرين وجهج..

درت وجهي ابجي

حجة ضرغام وجهه دم صار ويأشر بديه
ويحجي بس احسة كوة مسيطر ع غضبة

ضرغام :  العفو منك دكتور بس هي  طالبة من طلاب قسمك اجتك تسئلك عن القاعة الامتحانية وين المشكلة؟!
من امبجهيا ومنزل دموعها عليش؟
غلطانة؟ لا سوت ذنب؟ لا
بعد ليش تعلي صوتك عليها وتهضمها..

رد علية وهو صوتة يعله

صلاح : لأن عديمة مسؤولية
لو جان عدها اهتمام بدراستها مو اتيه القاعة 
وتجيني وين القاعة منو ادره بالقاعة الطالب لو رئيس القسم؟!..

ضرغام :لا اكيد رئيس القسم أدرة لأن الممثل اجة اخذ منك مفتاح القاعة وانت تعرف بكل امتحان تتبدل القاعة حسب
المادة والطلاب لحد الان عدهم أكثر من قاعة للامتحان
فيا حظرة الدكتور شمدريها هي وين وبعدين مع جل احترامي الك ولمكانتك بعد انت رئيس قسم ، وطلاب قسمك عندو مشكلة غير  يجيك تايريد تحلها  لو تتمشكل ويا؟؟

وكف صباح وضرب الميز ويصيح

صلاح: شنوووووو هالاهماال منها ع يا اساس الطلاب هيج يستهانون بالمادة وعدهم هيتة ويجون متأخرين  وبيا  صفة تجي تلومني إذا جان الذنب منها اسئلها كلها بيش الساعة أجيتي يعني هم متندل وهم متأخرة جامعة لو مدرسة اعدادية احنه..

  بعد المشادة الكلامية وجانت نبرة صوتهم ثنينهم نار
دار وجهه علية  ضرغام وكلي

ضرغام : مسحي دموعج
وروحي لقاعة الكندي فوك هسة جاي وراج..

هزيت راسي ردت اروح
باوعلي دكتور صلاح بكل غضب
دنكت راسي وجه الكلام لدكتور ضرغام

صلاح : متدخل للامتحان متمتحنها..

ضرغام : انه الاخذهم بالمادة
ف انه الأحدد مع احترامي لرأيك..

صلاح : واني رئيس القسم كلة اكلك متمتحنها..

رد علي بكل تحدي

ضرغام :  ك محاضر للمادة والامتحان من مسؤليتي
والطلاب طلابي انه احدد منو يمتحن ومنو لا..

صلاح  : متمتحنها وحجايتي تمشي
وامشي انتي اطلعي برة ..

ضرغام : أذاً  الامتحان يُلغى..

صفن على دكتور صلاح وعيونة نطن قبض كف ايدة
ردت اطلع بعد كافي ما اتحمل

َطلعت وكفت يم الباب واني اشوفهم واحدهم نار بالكلام
ثنينهم يحجون بغضب مكتوم محد يكدر يتجاوز ع الثاني
بس كلامهم دليل كافي لغضبهم

من كلي متمتحنين حسيت انتهيت ردت احجي واعترض
بس الموقف  ميسمح

اجة استاذ وليد
شافني أمسح بدموعي

أستاذ وليد :  قبل شوية مو جنت احاجيج ليش شردتي
شكو شبيج..

مسحت دموعي

رانسي : سلامتك أستاذ ما بيه شي..

أستاذ وليد : تحتاجين شي؟..

هزيت رأسي

أستاذ وليد :هسه اجيج خل احاجي الدكتور وارجعلج..

طب للغرفة كلهم 
أستاذ وليد : قسم من الطلاب بلشو يكتبون
وقسم  ما عدهم الأسئلة وين النسخ البقية ..

ثنينهم سكتو صاحلي دكتور صلاح
وهو صوته مليان نبرة مقرفة من الاستهزاء

صلاح : تعاي انتِ شسمج..

وكفت باب الغرفة
ومدنك ولازمة ملازمي وعيوني تنزل الدموع وامسحهم
موقف مفشل يقهر وفوك التعب كلة ومنايمة
يريد يحرمني من الامتحان وينتر 
استاذ وليد يباوع ب استغراب ع الوضع

رد ضرغام وهو يباوعلي

ضرغام : مو كتلج روحي للقاعة..

أستاذ وليد :شكو فهموني شصاير..

ضرغام : أستاذ وليد انه طالع والامتحان بالنسبة الي ملغي
أما إذا دكتور صلاح هالكد  مصر كملو النسخ البقية
وزعوها ع الطلاب وبتالي الامتحان هباءا منثورا عندي
في أمان الله..

رفع ايدة وطلع أشرلي
مشيت ورا
نسمع صياح دكتور صلاح واستاذ وليد يهدي بي
وذاك هرج القسم هرج

كعدت جانت مصطبة مقابيل القسم كعدت عليها
وخليت ايدي ع وجهي ابجي شمرت الملازم ع جهه

وكف كبالي وهو يفور

ضرغام : نَســـــرة نَســـــرة چم مرة كايلج لا تبجين كبالهم
لاتبجين كبال واحد ليش تعاندين يا ابوية...

سكتت وامسح بدموعي

ضرغام : شو دحكيلي عليمن هالدموع
انعل ابو الامتحان اليبچيچ..

وخرت ادية عن وجهي واحجي بحركة

رانسي :يكلي مهملة واني وحق القرآن
البارحة الليل كلة منايمة أقره للصبح
واجيت من وكت بس ادور ع القاعة فارغة مابيها احد..

ضرغام : مو دزيت الممثل يبلغ كل الكروبات
وكتلو بقاعة الكندي..

رانسي : مادري وآلله ما وصلني التبليغ ومحد كلي
بس رحت كتلة وين القاعة وهو لعب بيه لعب ..

ضرغام : شكو واحد زايعتو الدنيا يصير بهيج مناصب
خرب بي الي عينو رئيس قسم  كومي ابوية كومي غسلي..

سكت ضل يمشي يروح ويرجع ومخلي ايدة ع خصرة
ورافع الجاكيت وضايج

مسح جبهته  وتأفاف

اجة أستاذ وليد حجة وهو طكت روحه من الوضع

أستاذ وليد : دكتور فهمني صرت بينكم وثنينكم
نار شسوي هسة اني  ساعة بال٩ والطلاب من ال٨ بالقاعة..

ضرغام : ماكو امتحان خل تنسحب الأسئلة ويطلعون..

أستاذ وليد : كول يالله وهذا الامتحان الشهري
والعمادة يردون من عدنة درجات الشهريات خل يكملون الامتحان
ورانسي خليها ع الشهر الثاني..

ضرغام :  ليش تخليني احجي يا أستاذ وليد
امتحان ماكو وحك رب العزة  بعد حلفت
وخل يمشي كلمتو مو يريدها متمحن هاهي لتمتحن
خل يتونس ويحير بروحو تاشوف  منو ينطي الدرجات
واذا حجة وتنفس وحك هو الكافل اكلب عاليها ع واطيها
لحد الان ساكت وما حجيت شي عليمن ماخذنه بصياحو ما تكلي عليمن ..

أستاذ وليد : لا اله الا الله علكيفك دكتور
وهسة يا رانسي مو اني الصبح شفتج
وجنت اريد اروح اراقب ع القاعة ليش ما كتيلي متيهه
جان كتلج يابة روحي لقاعة الكندي هناك الامتحان ..

ضرغام : لا تلومها مالها ذنب لحد يحجي وياها
طالب ومرتبك ومخبوص من صباحيات الله يتلكاه كل هذا
حت المادة طارت من راسها شتريدة يصير بي
وحت إذا دخلت للامتحان متجاوب دحك لحالها..

تنهد استاذ وليد وصار بين نارين
بين دكتور صلاح الي يريد الدرجات مال الشهر لاول من
الاساتذه ولازم يكملن ب. اسرع وقت وبين عناد ضرغام
الي عاند ع الامتحان

رفعت راسي ع ضرغام

رانسي : امتحنهم دكتور ماريد ما امتحن اني
عادي خل ارسب..

حجيتها وبجيت

ضرغام :  يا بوية يبعد عيوني ليش تطلعيني من طوري
اسكتي لا تبجين..

حجاها بتوسل وهو يريد يسكتني

ضرغام :كومي وياي..

رانسي :وين..

ضرغام :كومي يابة..

كمت وأخذت ملازمي

أستاذ وليد : وين رايحين دكتور..

ضرغام :من رخصتك أستاذ وليد..

ما جاوبة ع سؤالة  وترخص منة

رحنة للغرفة مالتة فتحلي الباب
وطبيت خليت غراضي الميز

انطاني كاسة ماي
حت ما عرفت افتحها  متنرفع النايلونه

أخذها منها فتحها وانطانياها

ضرغام : هدي بنيتي..

شربت الكاسة كلها ردت بعد وحده
انطاني
ضرغام :  يول هاي بعدج تشربين ماي چثير
من يصيرلج شي لو تبجين..

هزيت رأسي وشربته دفعة وحدة

ضرغام : علكيفج نَســـــرة
الماي ينشرب بثلث دفعات ميصير دفعة وحدة ابوية انتِ..

اخذها مني شرب وشمر الكاسة

ضرغام :مو اطلعين هسة اجيج..

رانسي : وين  رايح لعد..

ضرغام : الباب راح اسدها..

خلة وطلع رجعت وجهي ع الكرسي
احس راسي راح ينفجر كام يدك
الغرفة هدوء و النكدات البي صوتها مالي المكان

نص ساعة وجة
طب نزع الچاكيت
وخلاها ع الميز وكعد مقابيلي
َماكعد ع كرسية الي يم ميزة

خلة ايدية ع افخاذه وقدم ظهرة
ما انتكأ ع  الكرسي

رفعلي راسة

ضرغام : هههههه فدوة لهل الخشيم الأحمر من البچي..

ابتسمت وتلمست خشمي
رانسي :شبي ليش تقلد..

ضرغام : هسة أنه قلدت؟

رانسي : مدري مو تضحك..

ضرغام : هو اليدحك لوجهج يضحك وحدو يغير النفسية
لا تلوميني انه شعلي ..

أبتسملتة
لان ادري بي يحجي هيج يشاقيني عود يريدني ابتسم

ضرغام : يروحلج فدوة دكتور صلاح شني هو ويزعل
هالعيون ..

رانسي : والله جنت اتوقعة حباب لأن اني ابد ما حاجية
ويا كلت خل اروحلة يعني شي عادي بس يدليني
ع القاعة حت اروح امتحن وخلص سواها سالفة شكبرها ..

ضرغام :لا تحاجين واحد من هل جامعة
ولا تبتسمين بوجه احد تراهم  ماينطون عين
لا دكتور ولا أستاذ ابتعدي كل البعد عنهم..

رانسي : يعني حت انتَ؟..

ضرغام :شني كلبتيها علي
عفتي الكادر كلو والأمة المحمدية أجيتي لضرغام..

رانسي : اي غير انتَ تكول لا تحاجين واحد بالجامعة
لا أستاذ ولا دكتور..

ضرغام :  أنه خايف عليج من غايتهم الدنيا تخوف
وما بيها أمان لا تكولين هذا حباب وذاك حباب
الإنسان ما ينعرف الا بالعشرة الَوجه يغر..

باوعت لاضافيري وحجيت

رانسي : صح جنت  أكول  عن دكتور صلاح حباب
طلع مو حباب
وانت جنت أكول عنك مو حباب
بس من عاشرتك طلعت كلش حباب جنك سوالف بابا
حت من تكلي ابوية افرح..

رفعت عيني لمحت عيونة تلمع لمع من يباوعلي

ضرغام : نَســـــرة..

رانسي :هاا..

ضرغام : كايلها الج وارجع اكولها
اصيرلج  ابو وام ودنيا كاملة  وشترديني أصيرلج
بس ابتعدي عن كل أحد بجامعة
خليني الج دكتورج وابو وصديق واليعجبج
بس لا تتقربين من أحد اخاف عليج
أنت ترفة مو حمل سوالفهم دحكي اليوم
بس رحتي سئلتي عن القاعة بجة اعيونج
وانه ماريد تمرين بهيجي مواقف ..

رانسي :  ما علية ب أحد من الجامعة
واذا عن الاساتذة والدكاترة حت ما احجي وياهم
الا هم من يسئلوني اجاوبهم..

ضرغام : عفية ابوية أنتِ، وهسة يلة كومينا..

رانسي : وين!..

ضرغام : نتريك واوديج للبيت نامي عويناتج تعبانات..

رانسي : لعد والمحاضرات..

باوع لساعتة ورفع راسة

ضرغام : الأولى ضاعت بالامتحان
والثانية أستاذ وليد عليكم اخذتلج منو اجازة
والثالثة انة عليكم..

رانسي :شمدريك عدنة اليوم ٣ محاضرات..

ضرغام : شفت جدولج، يلة امشينا..

رانسي : عادي بس اغسل وجهي؟!..

ضرغام :انتظرج شعندي جيبي غراضج الزمهن عنج..

رانسي : لا عادي هن بس ملازم والجنطة..

ضرغام : دنطيني..

أنطيتة الملازم كلهن جنت جايبتهم
وأخذت الجنطة وطبيت  اغسل

غسلت وجهي لأن لكيت وجهي صاير فلم
الكحلة سايلة والحمرة طايرة
فتحت شالي رجعت لفيتة
وخليت حمرة ع شفايفي وع خدودي
ومسحت الزايد من الكحلة وطلعت..

جانت كاعد ع الكرسي

رانسي : كملت

باوعلي صفن ع وجهي وتركزت
انضارة ع شفايفي
مسح جبتهه ودار وجهه
اخذ كلينكس من الميز وانطانياه

ضرغام : هاج..

اخذتها منة
واشر بحاجبة ع شفايفي
استحيت الموقف مرتين صار ينعاد علية منة
بس هسة استحيت لأن كمت اعرفة وبينه كلام
استحيت أكثر اخذتها منه ونزلت عيوني وهو طلع كدامي
مسحتها كلها عضيت اصبعي من الفشلة وطلعت ورا

مشيت وراه دار وجه علية
وباوع لوجهي ابتسم

ضرغام : حدري هينة يمي ليش تمشين وراي..

رانسي : مو أنت تمشي بسرعة خطوتك جبيرة
احتاج خطوتين يالة اوصل لخطوة من خطواتك..

ضرغام : ها اها وهاي كصرنا خطواتنا
بعد امر؟ خدمة؟!

ابتسمت ومشيت

رانسي :انطيني ملازمي

مدلياهن خليتهم ع صدري وعكست ايدي
وامشي ويا طبينا للنادي شبه فارغ لأن الكل بالمحاضرات
بس الي ضاربين كاعدين بي كم واحد طفار 

جاب اكل وخلاه ع الميز
جبنا كاستين چاي إلى واله

وكعدنا ناكل
وإني صوت الشهكة مال البجية
موجودة كلشوية واسوي صوت
يرفع عينة  ومبين مقهور عليه
كام صب كوب چاي الة للمرة الثانية

ضرغام : اللهي اشبع كل جوعان

من اكعد اكل ويا دائماً اسمعها منة
َومن يشرب ماي يكول

((سلام الله عليك يا ابا عبد الله))

رانسي : عودتني صرت كلما أشرب ماي
اسلم ع سيد الشهداء  شنو السبب

ضرغام : 
اكو حادثة كلش مؤلمة

من جابو الطشت بي  رأس الحُسيــــــــــن مقطوع من النحر
حت يحركون كلب بناتو علي خلو الطشت كبال

السيدة رقيــــــــــة والسيدة سَكيِنــــــــــة
وانطوهن ماي حت يسكن عطش الحُسين (ع)

هُم يدون ميكدرن يشربنة الماي  لأن جان مقطوع النحر
ف انطونهن الماي شماتة بيهن

السيدة رقيــــــــــة متشوف بعيونها ب اخر ايام
لان ضربوها ع عيونها

رانسي : يعني جانت السيدة رقية متشوف؟!

ضرغام : بعض الروايات تكول

تلقت ضرب حت طفت إحدى عيونها
ف السيدة زينب ام المصائب عليها السلام قامت بلف عيونها
يعني عصبتهن ثنينهن

ومن جابو رأس الحُســــــــين روحي له الفداء
كالت اشم ريحة ابي الحُســــــــين

السيدة رقيــــــــــة بصوت طفولي تحاجي لاختها حت ادليها تكلها
وين بابا وين بابا بصوت باكي وحزين

ردت عليها السيدة سَكيِنــــــــــة وهي طفلة
تصرخ وتشوف راس ابوها بالطشت والشفاه مشققة

تكلها
كدامنا بابا

كالت السيدة رقيـــــــــة  وهي دموعها تجري
وصوتها بي شهكات طفلة صغيرة
بحنجرة مجرحة من البكاء
وجسم مرهق من السوط
وعيون لا ترى  من ضرب كفوف الاعداء

خل يَشرب الماي
بابا تسمعني؟
هاك بابا اشرب الماي أنت مو عطشان
احنه ما راح نشرب الماي أنت اشرب!

الحُسيــــــــــن وهو مقطوع النحر جاوبها
كلها

أي بابا حبيبتي  أسمعج

كلتلة بتوسل وصوتها يبكي ع حالهم

أشرب الماء

رد الحُسيــــــــــن (ع)  وهو يحاجي السيدة سَكيِنة

كلها
سَكيِنة بنتي

كلتلة
نعم يا ابتاه

كلها

قولي  لشيعتي
بعد ما تقرأيهم عني السلام
سلمي عليهم وكليلهم

نقلت السيدة سَكيِنــــــــــة رسالة ابوها وهي تكول

يا شيعتي مهما شربتم عذب ماء فاذكروني

أوسـمعـتـم بغـريـب او شهـيـد فاندبوني

فأنـا السبط الذي من غـير جـرم قـتلوني

و بجرد الخيل بعد القتل عمدا سحقـوني

ليتكم في يوم عاشــورا جميعا تنظروني

كيف استسقي لطفلي فابوا ان يرحموني

وسـقـوه سهم بغي عوض الماء المعـيـنِ

رانسي :
جان يحجي وتنزل دمعة من عيونة ويمسحها
وقبل لا يمحي أثر الدمعة الأولى تسبقها الثانية
صوتة وهو يرويلي الرواية يذبح

وإني لا إرادي دموعي تنزل ومغمضة عيوني
واتصور حال أهل ال بيت محمد (ص) شلون چانو
سبايا

جنت اشوف بالرسمات واليوتيوب
والتمثيل شلون يخلون راس الحُسين عليه السلام

تخيلت منظر  السيدة ام المصائب
السيدة زينب وهيه تشوف حال اخوها الحُسين
وبناته بهذا المشهد

رانسي :  وشصار بحال السيدة رقية عليها السلام..

ضرغام : بعد ما تحملت السيدة رقية فرفعت العصابة عن وجها وشافت رأس ابوها شهكت شهكة وصلت روحها للسماء وماتت..

لوما السيدة رقية ملفوفة عيونها
جانت ماتت من الطريق
لان هو طول الطريق  بالسبي النحر الحُســــــــين مرفوع بالرمح
فهي الوحيدة ما جانت تشوفو  لذلك من رفعت العصابه وشافتة ماتت

عفت الاكل ما كدرت بعد اكل
مسحت دموعي وكمت غسلت

من أجيت

ضرغام : ها نروح..

رانسي :اي ماعندي شي..

وصلنة للكراج قبل لا نصعد السيارة طلع تليفونة

ضرغام : شلونك ابو سجاد الغالي
_ عساك يابة بخير
_ والله الحمدلله عايشين نشم الهوى
_ هههههه فدوة لكلبك
_ اكلك يابة انه بالجامعة
و نَســـــرة تخربطت شوية وهسة راح اوديها للبيت

_ لا لا بس داخت مابيها شي يابة لا تخاف
_ مابيها شي صدكني هاي كدامي
_ عليمن تعوف شغلك يابة انه ماعندي محاضرة
اوصلها وارجع
_ أحنة أهل عوف الزحمة ع جنب لا تجيب طاريها وياي
_ ها وياها

مدالي التليفون كلي اخوج

رانسي :ها حبيبي
إحسان : شبيج باباتي مو كتلج اني اكلي حت ما تتخربطين
بالدوام..

رانسي : مابية شي عيني صرت زينة وهسة اكلنا اني ودكتور ضرغام بالنادي

إحسان : معدل ضرغام والله يلة روحي خل يوصلج للبيت
ردت أجي عليج بس ما قبل ديربالج ع روحج باباتي

رانسي : ماشي عيني يلة باي

سديتة منة وهو يباوعلي ويبتسم ع طول ما اني احجي بتليفون
هو صافن علية

سيارتة كلش عالية
لازم اخلي رجلي ع هاي المدري شنو
وبعدين اصعد

استحيت أصعد لأن اعثر بيها
ضحك كلي

ضرغام :هههه خلي ايدج هينة يابة
حت تسيطرين وبعدين صعدي

اكو بالسيارة يدة لفوك اخلي ايدي بيها وبعدين اصعد
صعدت

سد الباب
ودار ع جهتة صعد

شغل اغاني هيثم

رانسي : هاي بعدك تسمعلة

ضرغام : عجل وين أنطي وجهي بدونو هو المصَبرني ع البالي

رانسي : آلله يهديها وتصير يمك بالحقيقة وتعوف بالك

ضحك وهز راسة وسكت

ايد مخلي عكسة
ع حافة الجامة وكف ايدة يمسح بلحيتة
وايد الثانية ع الستيرن

ضرغام : شتكولين دعوتج مستجابة؟!

رانسي :هههه هاي بعد يم رب العالمين بكيفة..

ضرغام : ونعم بالله لا تنسين اسمي واسمها دوم ادعيلنة..

رانسي : صدك شسمها حت ادعيلكم..

ضرغام : أنتِ بس كولي ضرغام وضَنـــه كلبو
وهو بعد رب العالمين أعلم بكلشي..

رانسي : يارب بحق الحُسيـــــن الشهيد تجمع
ضرغام وضَنـــه كلبة..

طلعت راسي  من الجامة ادعي بصوت عالي

وهو يضحك علية  بصوت بحيث
وجهة صار أحمر من الضحك

مد ايدة ع جيب البنطرون مالتة
وشوية رفع نفسة لفوك
لان ميكدر يدخل ايدة
طلع الجكاير والجداحة
يدخن

وصلني للبيت امي فتحت الباب
شافتة وهي الضحكة انرسمت عليها

هو هم يضحك وياها
امي كصيرة كلش وجبيرة
وهو طويل حنة ضهرة عليها باسها من فوك شيلتها برأسها
راد يبوس إيدها جرتها
اني صافنة عليهم وابتسم

ام إحسان : هلة يمة  هلة  شونك وليدي

ضرغام : بعد روحي حجية  بخير ما دامكم بخير

ام إحسان : فدوة لهل الطول تعال طب لينة ليش واكف

ضرغام :عندي محاضرة والله بس جبت نَســـــرة واجيت

دار وجها علية

ام إحسان : يا يمة شجابج

ضرغام :داخت هناك حجية وجبتها حت ما تتخربط

ام إحسان :هاي بدون ريوك اوف منها أكلها اكليلج لكمة
علتني عل شالعة كلبي ما تاكل تتنعوص

اعضلهه شفتي فضحتني

ضرغام :أي والله حجية عنيدة استلمي منها بس العناد

باوعتلة يا شو كلب علية
ضرغام :   يلة يابة طبن جوة انه رايح

ام إحسان : تتعال طب نسويلك لكمة اكلو أنت ونَسرة ع كولتك

ضرغام :اكلنة هناك والله وعندي محاضرة بعد نص ساعة
وراي طريق 

ام إحسان :خاف تريد تشرد
ضحك وباوعلي عود يعني احجي

ابتسمت
رانسي :اي ماما صح عندة محاضرة والله

ام إحسان : الله يوفقك يمة توكل بدربك..

بأس رأسها وراح
صعد بالسيارة باوعلي وابتسم
رفعت ايدي أشرتلة بمعنى باي

رفع كف ايدة وخلاه ع صدره وهز راسة
وراح

رانسي : فضحتنيه كباله تكليله تتنعوص شجاج يا أمي..

ام إحسان : حت بعد تاكلين وتصيرين حبابة شالعة كلب الرجال
جايبج بنص دوامة ومريكج..

رانسي : اي يا ماما قابل اني كتلة ريكني لو وصلني
هو وحدة والله..

ام إحسان :اوف منج اوف امشي طبي..

طبيت للبيت شيماء فوك
ومسرة تنضف بالاستقبال
واميرة تحضر غدة

أميرة :هاي شنو راجعة من وقت اليوم..

رانسي : لو تشوفين شصار بية هناك..

أميرة :شصار ولج..

رانسي : خل ابدل وانزل اسولفلج ع صلوحي الحقنة..

صعدت للفوك بدلت ونزلت سحلت شيماء

شيماء : شكو وجع شبيج هديني يمعودة..

رانسي : تعاي ما بيه حيل اعيد السالفة مرتين..

شيماء :دهديني عابت لهل الوجه..

رانسي : نزلي لا اوكعج من الدرج واسوي سوالف الحماية والچنه..

شيماء : وأنتي شنو مقصرة الحية العكربة..

هيه ترد واني ارد عليها خلصنه الدرج مناكر
نزلت للجوة واكفين يم أميرة كلحنة
بالمطبخ هيه تطبخ واحنه ملتمين داير ميدورها
مكتفة ادية واحجيلهن السالفة

وهن يعلقن ع كل موقف

شيماء : جيبولي صلوحي خل اخلي حفوظة أدم بوجهه

مسرة :لا والله لو منج الزكة بتفله شنو ابجي قابل انتي شمسوية

اميرة : رانسي غير تحاجي كلة أستاذ شكو بيها إذا دليتني
عليمن تبجين يا عيني

رانسي :ولجن مو جنت مخبوصة وخفت ارسب والليل اني مناييمة
هسه اي اسكتن خل أكمل

فجاي اكمل السالفة وصلت من كال
ضرغام الامتحان انلغى

صاحن

شيمااء : ههههه ولكممممم كفووو كفو بابن الانبار..

مسرة : وحق الله اتذكر من جنت بالجامعة اريدلي واحد بي حظ كلهم مابيهم حظ أنتِ منين محصلته هل الضرغام..

أميرة : بس اسكتن زين رانسي يعني لغة الامتحان لكل الكروبات..

رانسي : اي ولج چان امتحان موحد ل٦ كروبات مال قسمنا
والكل مجتمع بالقاعه الكُبرى ولغاه..

شيماء : أكلج رانسي شو احس عدكم بدايات المحبة ..

تحجي وتغمزلي

مسرة : أي والله يخية ام آدم اني هم احس..

ضربتهن حيل وصحت

رانسي : ولجننننن لاااا والله مو هيج اني وياه علاقتنة
فد محترمة بشكل تخيلن يحسبني كبنية إله
واصلا اني صغيرة علي كلششش
حت هو من يحاجيني دايما يكلي
بنتي او ابوية يعني محاسبني غير شي والله شبيجن ليش يروح
بالجن بعيد..

أميرة : شو اني هم احسة مو يم هاي السوالف بعيد عنها
وجهه وجبروته مو مال حب وعشق وهيج سوالف ..

رانسي : لا كلي ع بنية يحبها وجانت بينهم علاقة حب
بس من صارت سالفتي وعقدنا متعاركة ويا وما متقبلة الوضع..

شيماء : عزا وهسه شلون بي رجعو لو لا ..

رانسي :  لا لحد الان متعاوفين
وميت عليها يكلي ورة كل فرض اصلي ركعتين
حت الله يحنن كلبها علي
لو من يحجي عنها عيونة تلمع تلمع بيها
مبين كلش يحبها ومتأذي
اصلآ حت بالجامعة ما تنرفع عينة ع بنية
رغم هن كاتلات رواحهن علي  وبس يردن موضوع يحجن ويا
الوحيدة اني يحاجيني لأن يعرفني ويعرف اهلي..

مسرة :  أكلج  اوكفي عوفج من هاي السوالف
يعني إنتو طولتو سنة تقريبا بالعقد يعني سنة كاملة
هو عايفها وبعده يحبها معقولة؟!  ما نساها ما حب غيرها ..

شيماء : هم هيج حبهم بجنون هذولة..

اميرة : تسكتن لو شلون بس تعلقن خل تكمل السالفة..

كملت السالفة وهن كلشوية يعلقن ع شي
فحطني لساني وكعت وصلة منه

بين ما عدة الوقت واجو اخوتي
تغدينا وصعدت فوك تعبانة اريد أنام

فتحت السبلت وسديت الباب ورحت بسابع نومة

.....

هشام : راح يجون يمي جماعتي ياسمين التطلع اكسر رأسها
حسجن ما أريد اسمعو خوش...

هزيت رأسي

ياسمين : خوش  زين اخليلكم بارد بالصينية تاخذو..

هشام :لا ٣ كلاصات جاي..

ياسمين : بهل الحر چاي بروح الحسين ما تحسون انتو..

دحكلي صفح وراح
خليت القوري وصعدت ألم الملابس من المشر الفوك

شفت نسرين نزلت

ياسمين : نسرين الماي ع الطباخ
خدري ونصي حت يخدر ع راحتو..

نسرين
نزلت من الفوك كلتلي ياسمينة ع الچاي
عبالي لجدتي خدرت وطلعت للساحة

رحت غسلت وجهي الدنيا مبوخة
طبيت للتواليت وطلعت اغسل واباوع ع وجهي
بالمراية فتحت الحجاب ورجعت لفيتو
مدري شغني اغنيه لازكة براسي
ادندن بيها واسوي حركات
وصلت يم باب الديوانية

خليت ايدي ع الباب ردت افتحها
انتفحت وشفت هشام عيونو بكصتو
ويأشرلي يردني أطلع

صحت بصوت عالي

نسرين : عفية حواجب والحسين كلما اشوفك تخوزر بيه
شكو شمسوية..

دفعني وطلع وسد الباب
وسحلني من طرف دشدادشتي من يم علباتي

نسرين : ااايييي شجاااك هشام شبيك

هشام : لججججج اسسسسس صوتج فضحتينييي يالكائنات..

نسرين : شسويتلك هو هيجي تسحلني چني طلعي..

هشام : لا والله هاشة مو طلي جماعتي يمي شون أطبين
انه مو كلت التوصل اكسر راسها انتي شني من بشر
لوما سامع صوتج واطفرلج جان اليوم فضحتينا بين الازلام..

نسرين : يا عجل انه شمدريني اشتم كفة أيدي ..

رفعت ايدي اشم بيها
دمغني ع راسي وهو يدردَم علية

هشام : والكعبة إذا ما تمشين من هينة اعلك اديج
بركبتج عرمة صلفة.

نحجي والچاي فار وكام ينزل من القوري وطفت النار
دحك للچلي ودحكلي وهز ايدو

هشام : لو مكعدهم بالشارع ولا هالاكلان تبن
تحجن صدك تجذبن  انتن..

نسرين :  شكو شو ادحكلي شني كايلي ع چاي
وما ادري...

هشام : امشي عمي امشي صيحي لياسمين واذا سمعت
صوتج لو طلعتي برة احش رجولج حش ولا تضلين توكفين هينه
وتَجوعرين وياسمين ما ياسمين اصعدلها اصيحلها واجي..

راح للطباخ طفة النار وطلع وهو ضايج
انه هم
عفتو ومشيت دخيل جدو بس يحجي ع نسرين
ما عاجبو العجب اوف منك

صعدت لفوك اصيح لياسمين خفت
اوكف جوة واصيحلها حت يسحلني سحل وحق الله

وصلت للمر
فتحت الغرفة ما لكيتها
تمشيت ردت اشوفها وين
عكبت للغرف الأولى شفتها
واكفة بالجهه الثانيه
يم غرفة وفاء وصلت يمها ندستها اخترعت وخلت إيدها ع حلكها

ياسمين : اشششش

سكتتني ورجعت تسمع
الصدمة الي بيها ياسمينة متنوصف
مديت اذني وياها اريد اسمع شتحجي وفاء حت هيج مصدومة
ياسمين جانت ياسمين مخلية ايد ع حلكها من الصدمة وفاتحة
عيونها بكل حيلها  ...

_________

وللحكاية البقية ♥️✨

شنو رأيكم بالبارت؟! ❤️

شنو توقعاتكم للبارت الجاي؟! ❤️

✨أختكم هُـــــيام ✨